MUTWE WA KULILONGESA 15
MWASO 30 Tata, Zambi Kanda Sepa Liami
Kupwa ni Usepa Upema ni Zambi Chakutuyukisa!
“Chipema kuli yami kukundama kuli Zambi.”—SAMU 73:28.
YIZE MUTULILONGESA
Mutumona chize mutuhasa kukundama kuli Yehova ni yiwape yize mutuyuka ha kuchilinga.
1-2. (a) Yika twatamba kulinga mba tupwe sepa lia umwe mutu? (b) Yika mutumona ha mutwe uno?
SHINA ukwete umwe sepa yoze wakuzanga chinji? Kuchi usepa wenu waputukile? Muchihasa kupwa ngwe, nwapalikishile mashimbu hamuwika, yiunyingika yipikalo yize akupalika, yuma yize akuzanga ni yize keshi kuzanga. Wamwene ngwe, kali ni yitanga yize wakuzanga, chocho yiuputuka kumwimbulula. Ha kupalika cha mashimbu, yiuputuka kumuzanga chinji.
2 Kupwa sepa lia umwe chakufupiwa mashimbu ni tachi. Chino che chakulingiwa nawa nyi tunazange kupwa sepa lia Yehova. Ha mutwe uno, mutumonaho chize mutuhasa kukolesa usepa wetu ni Yehova ni yize mutuyuka ha kuchilinga. Alioze chitangu, mutumona mumu liaka chili chipema kukundama kuli Sepa lietu mupema, Yehova.
3. Mumu liaka twatamba kupukuna ha yiwape yize yakwiza ha kukundama kuli Yehova? Hana chilweza.
3 Tuli ni shindakenyo ngwetu, kupwa sepa lia Yehova chili chuma chipema. Alioze kupukuna ha upeme wa kuchilinga, muchitukwasa kununga ni kukundama kuli iye. (Samu 63:6-8) Ngwe chilweza, yetu eswe tunanyingika ngwetu, mba tupwe ni mujimba upema, twatamba kulia kanawa, kunana-nana mujimba, kupomba mashimbu anji ni kunwa meya anji. Alioze anji a kuli yetu, kutushi kukaula usongwelo uno. Chipwe chocho, nyi mutunyonga ha yiwape yize mutuzuka ha kupwa ni mujimba upema, chino muchitukwasa hanga tuhone kulengulula usongwelo wacho. Chizechene nawa, tunanyingika ngwetu, chili chipema kupwa masepa ja Yehova. Alioze, kunyonga ha yiwape yize mutuzuka mumu lia kupwa masepa jenyi, muchitukwasa hanga tukundame kuli iye.—Samu 119:27-30.
4. Yika ambile mukwa-kwimba Samu 73:28?
4 Tanga Samu 73:28. Mukwa-kusoneka Samu 73, kapwile Ka-Levi yoze atongwele hanga apwe ngimba mu tembele ya Yehova. Kota kapwile ni kuwayila Yehova ni ushishiko weswe ha miaka yinji. Chipwe chocho, nihindu kanyingikine ulemu wa kukundama kuli Yehova ni kukwasa akwo hanga achilinge. Mumu liaka chili chipema kunyingika kanawa Yehova ni kukolesa usepa wetu ni iye?
KUPWA MASEPA JA ZAMBI CHAKUTUNEHENA UWAHILILO
5. (a) Mumu liaka tunambe ngwetu kupwa sepa lia Yehova chakutunehena uwahililo? (b) Kulita ni Yishima 2:6-16, kuchi mana ja Yehova akutukwasa?
5 Nyi twakolesa usepa wetu ni Yehova mutuwahilila chinji. (Samu 65:4) Kuli yuma yinji yize yatutwala kwamba chocho. Ngwe chilweza, muze twakutanga Mbimbiliya ni kunyingika yize Yehova akutulweza ni kuyikaula ku mwono wetu, twakupwa ni mana. Mana jacho, kakutukwasa twehuke yitanga yipi ni kwehuka kulinga shili yinene. (Tanga Yishima 2:6-16.) Mbimbiliya yakwamba ngwo: “Kawaha yoze mawana mana, ni yoze mazuka malinjekela.”—Yishi. 3:13.
6. Yika yatwalile mukwa-kusoneka samu kutokesa uwahililo wenyi?
6 Ha mashimbu amwe, chipwe masepa ja Yehova no kakunenganyana. Mukwa-kusoneka Samu 73, katokesele uwahililo wenyi muze aputukile kunyonga ha yuma yize kuyalitele. Kevwile chipululu, mumu kulita ni iye, atu waze te keshi kwononokena Yehova kapwile ni mwono upema. Mukwa-kwimba samu yino kapwile ni manyonga api ngwo, yingalwe ni akwa-kulizata e wika apwile ni mwono upema. (Samu 73:3-7, 12) Iye kapwile ni kuyambashana nyi te kanalingi kanawa ha kuwayila Yehova. Yanenganyana chinji ni kwamba ngwenyi: ‘Nalikatalisa ha kupemesa mbunge yami, ni kusanyisa moko jami mu kulinanga.’—Samu 73:13.
7. Yika twatamba kulinga nyi tunanenganyana? (Tala nawa chizulie ha chifukilo.)
7 Chipwe ngwe kapwile ni kunenganyana chinji, nihindu mukwa-kwimba samu yalinga chimwe. Iye yanjila “muma musandu mwa Zambi,” chocho Yehova yamukwasa kwalumuna manyonga jenyi. (Samu 73:17-19) Ni musono nawa, Sepa lietu Yehova kakutumona muze tunanenganyana. Kashika, nyi tweta usongwelo wenyi ni kutayiza ukwaso uze akutwaha kupalikila mu Liji lienyi ni mu chikungulwila, mutupwa ni tachi jize mujitukwasa hanga tukumbe kunenganyana. Alioze, nyi mutuhona yakulinga mumu lia kusakalala chinji, Yehova matukolweza ni kutuhwimisa mbunge.—Samu 94:19.a
Ka-Levi yoze wasonekene Samu 73, kanamana “muma musandu mwa Zambi” (Tala paragrafu 7)
KUPWA MASEPA JA ZAMBI MUCHITWAHA MWONO UPEMA NI KUTALATALA
8. Yika twakuzuka muze twakupwa masepa ja Yehova?
8 Kupwa masepa ja Zambi chakutuyukisa ha yikuma yikwo yaali. Chitangu, chakutukwasa kunyingika ulumbunwiso wa mwono. Chamuchiali, chakutwaha kutalatala cha kulutwe lia matangwa. (Jere. 29:11) Mutuhanjika hakutwala ku yikuma yino yaali.
9. Mumu liaka kupwa masepa ja Yehova chakutukwasa kunyingika ulemu wa mwono?
9 Atu anji musono kakwamba ngwo, Zambi katwamineko. Nyonga lino, liakwatwala ahone kunyingika ulemu wa mwono ni kunyonga ngwo, tangwa limwe atu kechi keza kapwa ko nawa. Alioze kupwa masepa ja Yehova, chakutukwasa kunyingika ulemu wa mwono. Kulilongesa Mbimbiliya, chakutukwasa kupwa ni shindakenyo ngwetu, Zambi kwali, nawa ngwo iye “kakuwahisa waze akumufupa ni mbunge yeswe.” (Hepre. 11:6) Yehova katutangile ni uhashi wa kumuwayila, kashika muze twakuchilinga, twakupwa ni uwahililo unji ku mwono.—Shimbi 10:12, 13.
10. Kulita ni Samu 37:29, yika Yehova analakenya kuli waze akufuliela muli iye?
10 Atu anji musono, keshi ni kutalatala cha kulutwe lia matangwa. Kuli ayo, yuma yilemu ku mwono yili wika kukalakala, kumbata, kusema ni kufunga mbongo jize mujikaakwasa muze makapwa tushinakaji. Ayo kanyingikine yize Zambi analakenya kulutwe lia matangwa. Alioze yetu tunanyingika ngwetu, Yehova kakufunga tuvumbi twenyi. (Samu 25:3-5; 1 Timo. 6:17) Twakufuliela muli Zambi kanda Sepa lietu; nawa tukwete shindakenyo ngwetu, mamanununa yuma yeswe yize hanalakenya. Twakushimbwila yuma yinji yipema, chipi-chipi muze mutukamuwayila mu Paraisu ku miaka yeswe.—Tanga Samu 37:29.
11. Kuchi twakuyuka ha kupwa masepa ja Zambi, nawa kuchi chino chakukwata hali iye?
11 Kupwa masepa ja Zambi chakutuyukisa mu majila akwo anji. Ngwe chilweza, muze twakuvulumuna ni kulikonyeka, Yehova kakutukonekena. (Iza. 1:18) Kulinga chino, chakutukwasa kupwa ni mbunge yitoma chakuhona kulilamikiza ha uhenge uze twalingile kunyima. (Samu 32:1-5) Chikwo nawa, Yehova kakuwahilila chinji muze twakupwa masepa jenyi. (Yishi. 23:15) Pundu lume, twakuzuka yuma yinji yipema mumu lia kupwa masepa ja Yehova. Haliapwila, tutalenu yize mutuhasa kulinga hanga tununge ni kupwa masepa ja Zambi.
NUNGA NI KUPWA SEPA LIA ZAMBI
12. Yika walingile mba upwe sepa lia Zambi?
12 Nyi hanakupapachisa, kota walinga yuma yinji mba upwe sepa lia Zambi. Walilongesa umwenemwene unji hakutwala kuli Yehova ni Yesu, walikonyeka ku shili ye, wasolola ufulielo we muli Zambi ni kusa tachi hanga utwame kulita ni upale wenyi. Alioze, mba tupwe ni usepa ukolo ni Zambi, twatamba kununga ni kulinga yuma yino.—Kolo. 2:6.
13. Yuma yika yitatu yize muyitukwasa kununga ni kupwa masepa ja Yehova?
13 Yika muyitukwasa mba tununge ni kupwa masepa ja Yehova? (1) Twatamba kununga ni kutanga Mbimbiliya ni kulilongesayo. Alioze, nyonga lietu kuliatambile wika kupwa lia kulilongesa yuma ya helu-helu hakutwala kuli Zambi. Twatamba kunyingika manyonga ja Zambi, yize anazange hanga tulinge ni kukaula yuma yacho ku mwono wetu. (Efwe. 5:15-17) (2) Twatamba kukolesa ufulielo wetu ha kupukuna ha majila eka ni eka waze Zambi akusolwelamo zango lienyi hali yetu. (3) Twatamba kuvwila lwaji yuma yize Yehova keshi kuzanga ni kwehuka kulikata ni atu waze akulinga yuma yacho.—Samu 1:1; 101:3.
14. Kulita ni 1 A-Korindu 10:31, yuma yika twatamba kulinga tangwa ha tangwa mba tuvwise Yehova kuwaha? (Tala nawa chizulie.)
14 Tanga 1 A-Korindu 10:31. Chili chilemu kusa tachi hanga tulinge yuma yize yakuvwisa Yehova kuwaha. Chino kuchatalile wika ha kuya ni kwambujola hanji kukunguluka. Alioze, chinatale nawa ha yuma yeswe yize twakulinga tangwa ha tangwa. Ngwe chilweza, muze twakuhanjika umwenemwene mu yuma yeswe ni kulianyina ni akwetu yuma yize tuli nayo, twakuvwisa Yehova kuwaha. (2 Kori. 8:21; 9:7) Chikwo nawa, iye kanazange hanga tulemese chawana cha mwono. Twakukundama kuli Yoze watuhele mwono, ha kulia ni kunwa chakuhona kuhianyisa, ni kufunga mujimba wetu mu majila akwo waze alita. Tachi jize twakusa hanga tuvwise Yehova kuwaha chipwe mu yuma yikehe-yikehe, jakwokesa zango lienyi hali yetu.—Luka 16:10.
Wano kali majila waze mutuhasa kuvwishilamo Yehova kuwaha: kwendesa kanawa mashinyi, kunana-nana mujimba, kulia kanawa ni kupwa yihanyi (Tala paragrafu 14)
15. Yika Yehova anazange hanga tulinge hali akwetu?
15 Yehova kakulinga yuma yipema hali akwa-ululi ni hali yihenge. (Mateu 5:45) Yino ye anashimbwila hanga ni yetu tulinge. Ngwe chilweza, yetu kutushi kuhanjika yuma yipi hali mutu niumwe, twakwehuka mbwanja ni ‘kusolola umbovu kuli atu eswe.’ (Titu 3:2) Kashika, chipwe ngwe mutuliwana ni mutu yoze keshi kufuliela muli Yehova, yetu kutushi kulimona ngwe tunamuhiane. (2 Timo. 2:23-25) Twakukundama kuli Zambi muze twakusolola umbovu ni kutwama kanawa ni akwetu.
KOLESA USEPA WE NI YEHOVA CHIPWE MUZE MUHENGESA
16. Kuchi mukwa-kusoneka Samu 73, alivwile mumu lia upi uze alingile?
16 Ha mashimbu amwe, mumu lia kulinga yimwe yuma yipi, mutuhasa kuputuka kunyonga ngwetu, Yehova kechi kuhasa nawa kupwa sepa lietu. Mukwa-kusoneka Samu 73 neye che anyongene. Yamba ngwenyi; ‘Kwasalile hakehe kachi yiliato yami yayile, shimbo jami te kwasala hakehe jisenunuke.’ (Samu 73:2) Yamba nawa ngwenyi: ‘Angutwile muchima liami, yingupwa ngwe chishi mana, napwile ngwe kashitu kumeso ja Yehova.’ (Samu 73:21, 22) Mumu lia upi uze alingile, kota mukwa-kusoneka samu kapwile ni kulimona ngwe keshi ni ulemu, nawa ngwo katelele zango lia Yehova.
17. (a) Yika mukwa-kwimba samu alingile ha mashimbu akalu ku mwono wenyi? (b) Yika chilweza chenyi chinatulongesa? (Tala nawa yizulie.)
17 Chipwe ngwe mukwa-kusoneka samu kalivwile ngwo, katokesa usepa wenyi ni Yehova, nihindu nyonga liacho kuliakalingile mashimbu anji. Chinasoloka ngwe ha mashimbu jacho akalu, iye kahashile kumona ulemu wa kukundama kuli Yehova. Kashika ambile kuli Yehova ngwenyi: “Chipwe chocho nguli hamwe ni yena matangwa eswe, wakukwata kwoko liami lia chindume. Kumukangusongwela ni mana je, mba kulutwe kumukangutwala ku ulemu.” (Samu 73:23, 24) Ni yetu muze tunahongo hanji tunanenganyana, twatamba kufupa ukwaso wa Yehova mumu iye kali liwe lize liakutujikijisa. (Samu 73:26; 94:18) Chipwe ngwe ha mashimbu amwe mutusosoloka kuli Yehova, nihindu mutuhasa kufuna kuli iye ni kupwa ni shindakenyo ngwetu, matukonekena. (Samu 86:5) Twatamba kukundama chinji kuli Zambi, chipi-chipi muze tunapalika ha mashimbu akalu ku mwono wetu.—Samu 103:13, 14.
Muze tunazeye ku ufulielo, twatamba kukundama chinji kuli Yehova ha kulemba mashimbu eswe ni kukunguluka (Tala paragrafu 17)
NUNGA NI KUPWA SEPA LIA YEHOVA KU MIAKA YESWE
18. Mumu liaka mutuhasa kwamba ngwetu kukundama kuli Yehova kuchishi musulo?
18 Kulilongesa hakutwala kuli Yehova ni kukundama kuli iye, kuchishi musulo. Kuchi tunachinyingika? Tunachinyingika mumu Mbimbiliya yakwamba ngwo, majila, “mana ni yinyingi ya Zambi, kuyajotoka.”—Roma 11:33.
19. Shindakenyo yika tunawane ha Samu yino twalilongesa?
19 Samu 79:13 yinambe ngwo: “Yetu atu je kanda mapanga a kelo je mutukusakwilila ku miaka ya mutolo. Chocho mutusolola uhaliso kuli yena ku yisemuko yeswe.” Nyi wanunga ni kukundama kuli Yehova, muzuka yiwape yenyi ku miaka yeswe ni kwamba ni shindakenyo yeswe ngwe: “Zambi iye tachi ja mbunge yami, iye chihanda chami ku miaka ya mutolo.”—Samu 73:26.
MWASO 32 Pwenu Sali lia Yehova!
a Atu waze analipikala hanji kusakalala ha mashimbu anji, muchipema kufupa ukwaso wa mandotolo. Mba unyingike sango jikwo hakutwala ku chikuma chino, tala Kaposhi wa Kutalila No. 1 2023.