MUTWE WA KULILONGESA 37
MWASO 114 “Lihumikizenu”
Yize Mutuhasa Kulinga Muze Atu Matulinga Yuma Yipi
“Yafupa ululi, kumanyi yevwa muteto wika!”—IZA. 5:7.
YIZE MUTULILONGESA
Mutumona chize chilweza cha Yesu muchihasa kutukwasa muze matulinga yuma yipi ni yize mutuhasa kulinga hanga tuvwise Yehova kuwaha.
1-2. Yika atu anji akulinga muze akumona yuma yipi, nawa yika mutuhasa kulihula?
ATU anji kakwalinga yuma yipi mumu lia kupwa yiswale, mumu lia chize apwa, mumu lia kuze akolelele, chize akusoloka, ni mumu lia yuma yikwo nawa. Atu akwo, kakumona lamba mumu lia akwa-mingoso ni manguvulu waze keshi kulihulumba hali atu, alioze akufupa wika kupwa pichi. Kashika, mumu lia yitanga ni yiyulo yipi ya atu wano, atu akwo kakumona lamba.
2 Kutushi kukomoka ha kumona atu mapihilila mumu lia upi uze unalingiwa hashi. Mumu yetu eswe, twakuzanga kutwama mu chifuchi chize mutulivwa kanawa, muze atu keshi kutulinga yuma yipi. Yino yakutwala atu anji kulinjisa mu yizavu hanga ahwise kapinda yoze anamono mu chifuchi cho. Ayo kakulimika ni nguvulu, kuhona kwononokena shimbi ja chifuchi ni kuputuka kukalila nguvulu yoze wakwalakenya ngwo, mahwisa kapinda wo. Alioze Mbimbiliya yakututoweza ngwo, kanda tulinga ‘chihanda hano hashi,’ twatamba kushimbwila Wanangana wa Zambi mumu we wika muukahwisa upi weswe hano hashi. (Yoa. 17:16) Chipwe chocho, mutuhasa kulivwa chipi muze mutumona mutu umwe mamulinga yuma yipi. Hanji nawa mutuhasa kulihula ngwetu: Shina kuli yimwe yize munguhasa kulinga haliapwila hanga nguhwise kapinda yono? Mba tukumbulule chihula chino, chitangu tunyingikenu chize Yehova ni Yesu akwiva muze akumona atu maalinga yuma yipi.
YEHOVA NI YESU KESHI KUZANGA ATU WAZE AKULINGA YUMA YIPI KULI AKWO
3. Mumu liaka twakulivwa chipi muze twakumona atu mamwesa lamba akwo? (Izaia 5:7)
3 Mbimbiliya yakutulumbunwina mumu liaka twakulivwa chipi muze twakumona atu mamwesa lamba akwo. Yakulumbununa ngwo, mumu Yehova katutangile mu chifwa chenyi nawa kakuzanga ululi. (Samu 33:5; Uputu. 1:26) Yehova keshi kulinga yuma yipi kuli atu, kashika kazangile hanga yetu tulinge yuma yipi kuli akwetu. (Shimbi 32:3, 4; Mika 6:8; Zeka. 7:9) Ngwe chilweza, ha mashimbu a profeta Izaia, Yehova ‘kevwile miteto’ kuli A-Izalele waze apwile ni kwamwesa lamba kuli enyembo jo. (Tanga Izaia 5:7.) Yehova yalinga yimwe hanga alambe waze te keshi kwononokena shimbi jenyi ni waze apwile ni kumwesa lamba akwo.—Iza. 5:5, 13.
4. Kuchi Yesu akulivwa muze akumona atu malinga yuma yipi kuli akwo? (Tala nawa chizulie.)
4 Chizechene ngwe Yehova, Yesu neye keshi kuzanga atu waze akulinga yuma yipi kuli akwo. Muze apwile hano hashi, tangwa limwe yamona umwe lunga yoze wapwile chilema, chocho yamuvwila keke ni kumukwasa. Alioze muze mangana-a-mayingeleja achimwene, yapihilila. Mumu ayo te kakulihulikila chinji ha kufunga shimbi ja Sambata shimbu alihulikile ha kukwasa lunga wacho. Kuchi Yesu alivwile muze amwene yitanga yipi ya mangana jacho? Iye “yevwa uli ni chinyengo chinji mumu lia kukala cha mbunge jo.”—Marku 3:1-6.
Mangana-a-yingeleja A-Yunda te keshi kulisa mu chihela cha atu. Alioze Yesu kapwile ni kusolwela atu keke (Tala paragrafu 4)
5. Yika twatamba kwiuluka muze mutumona atu malinga akwo yuma yipi?
5 Yehova ni Yesu keshi kuwahilila muze akumona atu malinga yuma yipi kuli akwo. Kashika hi chipiko ni yetu kwivwa uli muze mutumona yuma yipi yinalingiwa. (Efwe. 4:26) Twatamba kwiuluka ngwetu, chipwe ngwe mutwivwa uli, nihindu kutuchi kuhasa kuhwisa kapinda wacho. Kwamba umwenemwene, nyi twanunga ni kwivwa uli unji mutuhasa wika kulikokela yikola ku manyonga ni ku musunya. (Samu 37:1, 8; Tia. 1:20) Kashika, yika mutuhasa kulinga muze mutumona atu malinga yuma yipi kuli akwo? Tutalenu yize mutuhasa kulilongesa ha chilweza cha Yesu.
YIZE YESU ALINGILE MUZE APWILE NI KUMONA ATU MALINGA AKWO YUMA YIPI
6. Yuma yika yipi Yesu apwile ni kumona chinji muze apwile hano hashi? (Tala nawa chizulie.)
6 Muze apwile hano hashi, Yesu te kakumona yuma yinji yipi. Iye te kakumona chize mangana-a-mayingeleja akumwesa atu lamba ha kwakalishila shimbi. (Mateu 23:2-4) Kapwile nawa ni kumona chize unguvulu wa A-Roma wapwile ni kumwesa atu lamba. A-Yunda anji, te kakushimbwila kutusuka mu chiyulo cha A-Roma, kashika amwe apwile ni kulinga yizavu hanga alimike ni unguvulu wa A-Roma. Chipwe chocho, Yesu te keshi kukwasa yizavu yacho hanji kweseka kwalumuna unguvulu. Muze anyingikine ngwenyi atu kanazange kumupwisa mwanangana, iye yachina.—Yoa. 6:15.
Yesu kachinyine atu muze azangile kumunjisa mu yuma ya mafwefwe (Tala paragrafu 6)
7-8. Mumu liaka Yesu kakahwishile yuma yeswe yipi muze apwile hano hashi? (Yoano 18:36)
7 Muze Yesu apwile hano hashi, iye te keshi kulinjisa mu yuma ya mafwefwe hanga ahwise lamba lize atu apwile ni kumona. Mumu liaka? Mumu iye kanyingikine ngwenyi, atu keshi kuhasa kuliyula ene. (Samu 146:3; Jere. 10:23) Iye nawa kanyingikine ngwenyi, atu kechi kuhasa kuchiza Satana yoze unayula hano hashi, nawa yoze wakupupuchisa manyonga jo ni kwatwala kulinga yuma yipi kuli akwo. (Yoa. 8:44; Efwe. 2:2) Yesu kanyingikine nawa ngwenyi, ayo kechi kuhasa kuhwisa uhenge uze wakwakwika kulinga yuma yipema mashimbu eswe.—Chilu. 7:20.
8 Yesu kanyingikine ngwenyi, Wanangana wa Zambi we wika muuhasa kuhwisa yuma yeswe yize yakutwala atu hanga alinge akwo yuma yipi. Kashika iye apwile ni kusa tachi hanga apalikise mashimbu anji ni “kwambujola sango jipema ja Wanangana wa Zambi.” (Luka 8:1) Ha kulinga chino, iye yatakamisa waze apwile ni “zala ni pwila ya ululi” ngwo, yuma yeswe yipi yize nwakumona mu chifuchi chino muyikahwa. (Mateu 5:6 tala nawa nota ha Mbimbiliya ya estudo ha Luka 18:7, 8) Yesu kechi kahwisa yuma yipi kupalikila mu yizavu yize yakulimika ni manguvulu. Alioze makachilinga kupalikila mu Wanangana wa Zambi uze kuushi kulinjisa mu yuma ya hano hashi.—Tanga Yoano 18:36.
TWIMBULULENU YESU MUZE MUTUMONA YUMA YIPI
9. Yika yakutwaha shindakenyo ngwetu Wanangana wa Zambi we wika muukahwisa upi weswe uze twakumona hano hashi?
9 Musono, twakumona upi unji kuhiana uze Yesu amwene muze apwile hano hashi. Chishina cha upi weswe uze twakumona, kali Satana ni atu yihenge waze akwimbulula chilweza chenyi. (2 Timo. 3:1-5, 13; Uso. 12:12) Chizechene ngwe Yesu, ni yetu tunanyingika ngwetu, Wanangana wa Zambi we wika muukahwisa yuma yize yakuneha upi hano hashi. Mutusolola ngwetu twakukwasa Wanangana wacho, ha kwehuka kulinjisa mu yuma ya mafwefwe ni mu yizavu yize yakulimika ni nguvulu. Tutalenu chilweza cha umwe ndumbu wa pwo avuluka ngwo Stacy.a Muze te kanda achinyingika umwenemwene, iye kapwile ni kukwasa yizavu yize yapwile ni kulimika ni nguvulu hanga ahwise kapinda yoze wapwile mu chifuchi cho. Alioze ha kupalika cha mashimbu, yaputuka kuyambashana nyi yuma yize apwile ni kulinga yinalite nyi ka. Iye yamba ngwenyi: “Muze napwile ni kukwasa yizavu yacho napwile ni kulihula ngwami, ayi ngunalingi lume yinalite? Haliapwila nakukwasa Wanangana wa Zambi mumu ngunanyingika ngwami, che chuma chalita kulinga. Nguli ni shindakenyo ngwami, kupalikila mu Wanangana wacho, Yehova makahwisa upi weswe uze yami chichi kuhasa kuhwisa.—Samu 72:1, 4.
10. Kulita ni Mateu 5:43-48 kuchi tunanyingika ngwetu, kutunga yizavu ya kulimika ni nguvulu kuchalitele ni yize Yesu alongesele? (Tala nawa chizulie.)
10 Atu anji musono kakutunga yizavu hanga alumune unguvulu. Ayo kakwivwa uli unji, keshi kwononokena shimbi, chikwo nawa kakulinga upi kuli akwo. Yino hi yize ko Yesu atulongesele hanga tulinge. (Efwe. 4:31) Umwe ndumbu avuluka ngwo Jeffrey, yamba ngwenyi: “Ngunanyingika ngwami muze atu akulinjisa mu yizavu ya kulimika ni nguvulu, chakupwa chashi ayo kupwa atu akalu, kupihisa yuma, kuputuka kwiya ni kulinga yuma yipi kuli akwo.” Alioze, Yesu katulongesele hanga tuzange atu eswe, chipwe waze keshi kutayiza yize twafuliela ni waze akutuhungumiona. (Tanga Mateu 5:43-48.) Yetu Akwa-Kristu, twatamba kusa tachi hanga twehuke kulinga yuma yeswayo yize kuyalitele ni yize Yesu atulongesele.
Twatamba kupwa ni hamu mba tuhone kulinjisa mu yuma ya mafwefwe ya hano hashi hanji kukwasa chimwe chizavu (Tala paragrafu 10)
11. Mumu liaka ha mashimbu amwe muchihasa kupwa chikalu kwimbulula chilweza cha Yesu?
11 Chipwe ngwe tunanyingika ngwetu Wanangana wa Zambi we wika muukahwisa upi weswe hano hashi, nihindu muchihasa kupwa chikalu kwimbulula chilweza cha Yesu muze matulinga yuma yipi. Tutalenu chize Janiya alivwile muze amulingile yuma yipi kuli akwo mumu lia chikowa chenyi. “Nevwile uli ni yikola yinji ku mbunge mumu lia upi uze apwile ni kungulinga, chocho yinguzanga kufunyisa upi wacho. Kashika yingunjila mu chizavu chize chakukalila atu waze ali ni chikowa chalisa ni cha akwo. Nanyongene ngwami, kulinga chino muchihasa kuhwisa upi uze napwile ni kumona.” Ha kupalika cha mashimbu, Janiya yamona ngwenyi katamba kwalumuna manyonga jenyi. Iye yamba nawa ngwenyi, “Napwile ni kwecha atu angulweze yize natamba kulinga, chocho yingumona ngwami, napwile ni kujikijila chinji atu kuhiana Yehova. Kashika, yingukwata chiyulo cha kwecha kukwasa chizavu chacho.” Chipwe ngwe mutwivwa uli mumu lia kutulinga yuma yipi hanji muze mutumona atu malinga yuma yipi, nihindu twatamba kukeya hanga uli wacho uhone kutuyula hanji kututwala tulinjise mu yuma ya hano hashi.—Yoa. 15:19.
12. Mumu liaka twatamba kukeya hakutwatala ku yize mututanga, mutwivwa hanji yize mututala?
12 Yika muyitukwasa kulihumikiza muze matulinga yuma yipi hanji muze mutumona atu akwo maalinga yuma yipi? Chuma chimwe chize chakukwasa atu anji chili kukeya ha yize akutanga, yize akwivwa ni yize akutala. Sango jimwe jize akusa ha internet ni ha rede social, jakuvwisa atu kupihia ni kwatwala hanga alimike ni nguvulu. Kanji-kanji, atu waze akusa sango ha rede social hanji ha internet, keshi kutulweza chize yuma yalingiwile. Ayo kakutulweza wika yuma kulita ni chize ayo ananyongo. Kashika nyi twapalikisa mashimbu anji ni kutanga hanji kwivwa sango jacho, chino muchihasa kututwala hanga tulipikale, tunenganyane ni kwivwa uli. (Yishi. 24:10) Chino nawa muchihasa kututwala hanga tuhone kusa Wanangana wa Zambi ha chihela chitangu ku mwono wetu, ni kuvulama ngwo Wanangana wa Zambi we wika muukahwisa lamba lieswe hano hashi.
13. Kuchi kutanga Mbimbiliya mashimbu eswe muchihasa kutukwasa kupwa ni nyonga lialita hakutwala ku yuma yipi yize twakumona?
13 Kupwa ni chako cha kutanga Mbimbiliya ni kuyipukuna, muchihasa kutukwasa kunyingika yize twatamba kulinga muze matulinga yuma yipi hanji muze akwetu maalinga yuma yipi. Ndumbwetu wa pwo avuluka ngwo Alia, kapwile ni kulivwa chipi muze apwile ni kumona atu akwo maalinga yuma yipi. Iye kapwile ni kumona ngwenyi, atu waze apwile ni kulinga yuma yipi kuli akwo, te keshi kwalinga chuma nichimwe. Chocho yamba ngwenyi: “Nyi chamwenemwene nakufuliela ngwami Yehova mwe makachiza upi weswe hano hashi, natamba kwalumuna manyonga jami. Ha mashimbu jacho, natangile chisoneko cha Yombi 34: 22-29. Versu jino jangukwashile kumona ngwami, kukushi mutu yoze mahasa kuswama kumeso ja Yehova. Iye wika unanyingika kanawa kupatwila atu ni ululi, nawa iye wika mwe makahwisa kapinda mweswe yoze twakumona hano hashi.” Kashika, muze tunachishimbwila Wanangana wa Zambi ukahwise upi weswe uze twakumona hano hashi, yika twatamba kulinga haliapwila?
YUMA YIKA YIPEMA YIZE MUTUHASA KULINGA HALIAPWILA?
14. Yika mutuhasa kulinga haliapwila? (A-Kolosu 3:10, 11)
14 Yetu kutuchi kuhasa kukwika atu kulinga yuma yipi kuli akwo. Alioze, chuma mutuhasa kulinga chili kununga ni kulinga yuma yipema. Ngwe chize twalilongesa, twatamba kwimbulula Yesu ha kusolwela atu zango. Mumu zango liacho lie mulitukwasa kulingila atu yuma yipema, chipwe lume waze akutuhungumiona. (Mateu 7:12; Roma 12:17) Pundu lume, Yehova kakuwahilila chinji muze twakulinga yuma yipema kuli atu eswe.—Tanga A-Kolosu 3:10, 11.
15. Mumu liaka twatamba kulongesa atu yize Mbimbiliya yakwamba?
15 Jila yipema ya kukwashilamo atu kwecha kulinga yuma yipi, yili kwalongesa hakutwala kuli Yehova Zambi. Mumu liaka tunambe chocho? Mumu Mbimbiliya yakwamba ngwo, “chinyingi cha Yehova” muchihasa kwalumuna mutu yoze wapwile chitenu hanji chingalwe, kupwa mukwa-sambukila. (Iza. 11:6, 7, 9) Jemal, muze te kanda achililongesa umwenemwene, kapwile ni kunyonga ngwenyi, nguvulu wa mu chifuchi cho keshi kuyula kanawa. Chocho yanjila mu chimwe chizavu chize chapwile ni kulimika ni nguvulu hanga chimuchize ha wata. Iye yamba ngwenyi: “Umwenemwene wa mu Mbimbiliya uze nalilongesele, walumwine mwono wami. Wangukwashile nawa kunyingika ngwo, yetu kutuchi kuhasa kwalumuna atu ku tachi.” Yize Jemal alilongesele yamukwashile kulitwamina kulimika ni nguvulu. Kashika, nyi twakwasa atu anji kulilongesa umwenemwene wa mu Mbimbiliya, ayo mahasa kwecha kulinga yuma yipi yize yakuneha lamba kuli akwo.
16. Mumu liaka unazange kulweza atu yize Wanangana wa Zambi muukalinga?
16 Chizechene ngwe Yesu, ni yetu tunazange kulweza atu ngwetu, Wanangana wa Zambi we wika muukahwisa upi weswe hano hashi. Sango jino mujihasa kutakamisa atu waze akwamwesa lamba kuli akwo. (Jere. 29:11) Stacy yoze twatongolanga ku uputukilo, yamba nawa ngwenyi: “Kulilongesa umwenemwene wa mu Mbimbiliya, che chakungukwasa muze nakumona atu malinga yuma yipi kuli akwo. Yehova kakututakamisa kupalikila mu umwenemwene wa mu Mbimbiliya.” Twatamba kulilulieka kanawa mba tutakamise ni kwambujola yilakenyo ya mu Mbimbiliya kuli atu waze akwalinga yuma yipi. Ngwe chize twamona ha mutwe uno, mutuhasa kupwa ni shindakenyo ya yize mutwamba, nyi twanyingika kanawa yize Mbimbiliya yakwamba hakutwala ku lamba. Chino, muchitukwasa nawa kwambulwila akwetu ku shikola ni ku milimo, ni kwalweza yize Yehova makalinga hanga ahwise lamba lieswe hano hashi.b
17. Kuchi Yehova akutukwasa kunyongonona muze atu akutulinga yuma yipi?
17 Tunanyingika ngwetu yuma yipi muyinunga ni kulingiwa, mumu Satana mwe “nguvulu wa hano hashi.” Alioze tunanyingika nawa ngwetu, yuma muyikapema kulutwe. Mumu Yehova kanalakenya kutukwasa haliapwila ha kuchiza yuma yipi yeswe hano hashi ni ‘kuhuma’ nguvulu wa hano hashi. (Yoa. 12:31) Ngwe chilweza, kupalikila mu Mbimbiliya, iye kakutulweza mumu liaka hano hashi hali lamba linji ni chize akwivwa hali atu waze akumwesa akwo lamba. (Samu 34:17-19) Kupalikila mu chilweza cha Yesu, twamona yize mutuhasa kulinga muze akwetu matulinga yuma yipi. Kwasala hakehe hanga Wanangana wa Zambi uchize upi weswe uze twakumona hano hashi. Kukuchi kapwa nawa mutu niumwe yoze makamona lamba. (2 Petu. 3:13) Kashika, tunungenu ni kusa tachi hanga twambujole hakutwala ku Wanangana wa Zambi ni kununga ni kushimbwila tangwa lize hano hashi muhakazala too ni “ululi.”—Iza. 9:7.
MWASO 158 Hikwasala Hakehe!
a Majina amwe kapwa kwalumuna.
b Tala nawa apendice A ha yikuma 24-27 ha kamukanda Zangenu Atu—Mba Nwapwise Tumbaji.