“Chisopa-Mulonga wa Akwa Hashi Eswe” Kakulinga Wika Yize Yalita

1. Kuchi Apalahama asolwele ngwo kafulielele ha ululi wa Yehova? (Tala chizulie ha uputukilo.)

“TE CHISOPA-MULONGA wa akwa hashi eswe kechi kulinga ni ululi nyi?” (Uputukilo 18:25) Apalahama, lunga washishika kakahulile chihula chino, mumu lia kuyambashana. Alioze chihula chenyi chasolwele ngwenyi kapwile ni kufuliela muli Yehova ngwo te mapatwila mbonge ya Sondome ni Ngomora ni ululi ungunu. Kapwile ni shindakenyo ngwenyi, Yehova te kechi “kushiha akwa ululi hamwe ni yingulungulu.” Kuli Apalahama ‘chino te kuchahashile kupwa.’ Kulutwe, Yehova yaliamba mwene ngwenyi: “Iye Liwe, yitanga yenyi yingunu, mumu majila jenyi eswe ja ululi. Iye Zambi ya jika; keshi uhenge; mukwa pundu, mukwa umwenemwene.”—Shimbi Yamuchiali 31:19; 32:4.

2. Mumu liaka chili chikalu Yehova kulinga yuma ya uhenge?

² Mumu liaka Apalahama afulielele ngwenyi Yehova kakulinga wika yize yalita? Mumu Yehova kali chilweza chinene hakutwala ku ululi ni ungunu. Maliji “ululi” ni “ungunu” kanji-kanji kakwaazachisa hamwika mu Yisoneko ya Hepreu mumu kakwete ulumbunwiso umuwika. Amu shimbi ja Yehova japwa wika jipema, kashika iye makasopa milonga kanawa. Mbimbiliya yinambe ngwo: Iye ‘kazanga ungunu ni ululi.’—Samu 33:5.

3. Hana chilweza cha upi uze wakulingiwa musono hano hashi.

³ Chino chili utakamiso ha kunyingika ngwetu Yehova kakulinga wika yuma ya ululi. Musono, hashi heswe hanazale too ni yuma ya uhenge. Chakutalilaho, atu amwe kakwaasa mu mazuwo aususu ha upi uze ayo kalingile. Mumu lia kupima cha DNA hanji manyinga, mba manyingika ngwo amwe keshi mulonga niumwe. Alioze yino kakuyilinga muze hapalikisa miaka yinji mu zuwo lia ususu. Upi wacho wakuneha ufwatulo hamwe ni uli. Alioze, kuli uhenge ukwo uze muuhasa kupwa ukalu chinji kuukumba. Uhenge uka wenawo?

YUMA YA UHENGE MU CHIKUNGULWILA

4. Kuchi ufulielo wa akwa-Kristu muuhasa kupwa mu cheseko?

⁴ Akwa-Kristu kakushimbwila kumona yimwe yuma ya uhenge haze lia chikungulwila. Alioze, ufulielo wetu muuhasa kupwa mu cheseko nyi mutumona hanji matulinga yimwe yuma yize muyisoloka ngwe ya uhenge mu chikungulwila. Nyi yino muyilingiwa, yika watamba kulinga? Shina muwecha hanga yikutalingise?

5. Mumu liaka kutwatambile kukomoka nyi mutumona hanji matulinga yuma ya uhenge mu chikungulwila?

⁵ Yetwese tuli yihenge nawa twakuvulumuna, kashika umwe mahasa kutulinga yuma yize kuyalitele hanji ni yetu mutuhasa kulinga yize kuyalitele kuli umwe ndumbu mu chikungulwila. (1 Yoano 1:8) Chipwe ngwe chino chapwa chikalu kulingiwa, nihindu akwa-Kristu ashishika keshi kukomoka hanji kutalinga muze mukulingiwa umwe uhenge. Yehova hanatwehe chiyulo chipema mu Mbimbiliya chize chakutukwasa hanga tununge ni kushishika muze umwe ndumbu hanji pangi matulinga yuma ya uhenge.—Samu 55:12-14.

6, 7. Uhenge uka umwe ndumbu amwene mu chikungulwila, nawa yitanga yika yamukwashile?

⁶ Tutalenu chilweza cha ndumbu Willi Diehl. Kukatuka ha mwaka 1931, Ndumbu Diehl yakalakala ni ushishiko weswe ku Mbetele ya Bern mu Suíça. Ha mwaka 1946, yaya ku Shikola ya muchinake ya Ngiliate mu Nova Iorque E.U.A. Muze ahwishile shikola, yamusa kalayi wa mbonge mu Suíça. Mu sango ja mwono wenyi, Ndumbu Diehl yamba ngwenyi, ha kakweji wa Maio 1949, yalweza mandumbu ku mutango wa Suíça ngwenyi, kanazange kumbata. Mandumbu waze te akwete yiteli yamwamba ngwo, mamuchiza yiteli yeswe yize apwile nayo. Iye te mapwa wika pionelu. Ndumbu Diehl yamba ngwenyi: “Kangukanjishile kuhanjika pande, nawa mandumbu anji te kakutumona ngwe hanatusosolola mu chikungulwila.”

⁷ Yika ndumbu Diehl alingile? Aye yamba ngwenyi: “Yetu twanyingikine ngwetu Yisoneko kuyakanjishile ulo, chocho yituputuka kulemba ni kufuliela muli Yehova.” Chipwe ngwe mandumbu amwe kakanyingikine nyonga lia Yehova hakutwala ku ulo, alioze hakupalika cha matangwa, ayo yalinyingika, mba hi Ndumbu Diehl yafunyina yiteli yenyi. Yehova kawahishile ushishiko wenyi.a (Tala maliji mushi lia lifwo.) Tulihulenu ngwetu: ‘Nyi mungumona uhenge wacho, shina mungulihumikiza ni kushimbwila ngwami Yehova malulieka yuma? Nyi mungufuliela muli yami mwene ni kweseka kufunyisa upi ni upi?’—Yishima 11:2; tanga Mika 7:7.

8. Mumu liaka mutuhasa kulimbenja hakunyonga ngwo yetu hanji akwetu kanaalingi yuma ya uhenge?

⁸ Nyi mumona ngwe kunasoloka umwe uhenge mu chikungulwila, iwuluka ngwe hanji yena mwe unalimbenja. Mumu liaka? Mumu tuli akwa-shili nawa hanji kutushi kunyingika chikuma chacho. Chikwo nawa hanji kutushi ni kunyingika yuma yeswe yize yinalingiwako. Alioze chipwe ngwe mutuyinyingika hanji ka, nihindu twatamba kulemba kuli Yehova hakutwala ku chikuma chacho, kumufuliela, ni kununga ni kushishika. Chino muchitukinda “kulimika ni Yehova.”—Tanga Yishima 19:3.

9. Yilweza yika mutulilongesa ha mutwe uno ni uze muusulako?

⁹ Tutalenu yikuma yitatu ya uhenge yize atu ja Yehova apalikilemo ku mashimbu akunyima. Mu mutwe uno, mutulilongesa hakutwala kuli kakwata-mbuli wa Apalahama Yosefwe, ni yize amulingile kuli mandumbu jenyi. Mu mutwe uze muusulaho, mutulilongesa chize Yehova alingile hali Mwanangana Ahabe ni yize alingile postolo Petulu mu Andiakia ku Seria. Muze mutulilongesa yilweza yino, tala mutapu uze muhasa kulihulikila muli Yehova ni kufunga usepa we kuli iye, chipi-chipi muze munyonga ngwe kanakulingi yuma ya uhenge.

YOSEFWE KAPALIKILE MU YUMA YA UHENGE

10, 11. (a) Uhenge uka Yosefwe amwene? (b) Uhashi uka Yosefwe apwile nawo muze apwile mu kamenga?

¹⁰ Yosefwe kapwile kavumbi washishika wa Yehova, yoze wamwene uhenge mu chifuchi cha yilambala. Alioze uhenge uze wamwehele yikola ku mbunge, wapwile uze amulingile kuli mandumbu jenyi. Muze Yosefwe te ali ni miaka 17, mandumbu jenyi yamukwata ni kumulanjisa ngwe ndungo. Chocho yamutwala mu Engitu. (Uputukilo 37:23-28; 42:21) Mu chifuchi chacho, Yosefwe yamuliongela ngwo kambile kulisumbakenya ku tachi ni umwe pwo, chocho yamusa mu kamenga chakuhona kumusopesa. (Uputukilo 39:17-20) Yosefwe kamwene lamba mu undungo nawa kamusele mu kamenga ha miaka 13. Yika mutuhasa kulilongesa ha yize amwene Yosefwe, yize muyitukwasa muze mandumbu jetu matulinga yuma ya uhenge?

¹¹ Muze Yosefwe apwile mu kamenga, mukwa-kuhana musenge wa mwanangana neye yamusamo. Ha umwe ufuku, mukwa-kuhana musenge yalota chimwe, chize Yehova akwashile Yosefwe hanga achilumbunune. Yosefwe yalumbununa ngwenyi, mukwa-kuhana musenge te mamutuhwisa mu kamenga ni kukalakalila nawa Falau. Hachino, Yosefwe yapwa ni uhashi wa kulumbunwina lunga wacho yipikalo yenyi. Mutuhasa kulilongesa yuma yinji, hi wika ko ha yize Yosefwe ahanjikile, alioze ni ha yize kakahanjikile.—Uputukilo 40:5-13.

12, 13. (a) Kuchi tunanyingika ngwetu Yosefwe kakanyongene wika ha lamba lienyi? (b) Yika Yosefwe kakalwezele kuli mukwa-kuhana musenge?

¹² Tanga Uputukilo 40:14, 15. Twamona ngwetu Yosefwe kambile ngwenyi “angwiyile.” Liji lia Mbimbiliya lize azachisa hano mulihasa nawa kulumbunuka “kuseununa hanji kwondolola.” Kwamba pundu, iye kamwene yuma yinji ya uhenge. Yosefwe yamba nawa ngwenyi, kakapwile ni chikulikuli ku mbunge ha uhenge uze amulingile. Kashika alwezele mukwa-kuhana musenge hanga amuvuluke kuli Falau. Nyonga lienyi te lika? Aye yamba ngwenyi: Hanga “akanguchize kama mu zuwo lino.”

¹³ Shina Yosefwe kanyongene wika ha lamba lienyi, chakuhona kulinga nichimwe hakutwala ha lamba liacho? Ka! Yosefwe kanyingikine ngwenyi kamulingile yuma yinji ya uhenge. Kashika alumbunwine kapinda wenyi kuli mukwa-kuhana musenge, ni kushimbwila ngwo lunga wacho te mahasa kumukwasa kama. Alioze Yisoneko kuyambile ngwo Yosefwe kalwezele kuli mutu mweswawo, chipwe Falau, ngwo mandumbu jenyi kamulanjishile. Kashika muze mandumbu jenyi ayile mu Engitu Yosefwe yaatambula kanawa, Falau yaazumbula ni kwaalweza hanga aye ni kutunga mu Engitu ni kuwahilila ni yuma “yipema yeswe ya chifuchi.”—Uputukilo 45:16-20.

14. Yika muyitukwasa tuhone kwamba chuma chize kuchalitele muze matulinga yuma ya uhenge mu chikungulwila?

¹⁴ Nyi mutumona ngwetu kanatulingi yuma ya uhenge mu chikungulwila, twatamba kukanyama hanga twehuke kuhanjika yuma yacho kuli mutu mweswawo. Hachino, twatamba wika kwita ukwaso kuli makulwana amu chikungulwila ni kwaalweza yuma yacho nyi ndumbu wacho kalinga shili yinene. (Ulevi 5:1) Alioze nyi kwalingiwile shili yinene, mutuhasa kulivwashana ni ndumbwetu chakuhona kulweza yuma yacho kuli atu akwo, chipwe kuli makulwana amu chikungulwila. (Tanga Mateu 5:23, 24; 18:15.) Twatamba kushishika ni kukaula shimbi ja mu Mbimbiliya ha yuma yino. Ha mashimbu amwe mutuhasa kunyingika ngwetu chikuma chimwe chapwanga wika kuhona kunyingika, nawa ngwetu katulingile yuma ya uhenge. Hachino, mutuhasa kusakwilila mumu kutwahanjikile yuma yipi hakutwala kuli mandumbu jetu! Twiwulukenu ngwetu chipwe ngwe twalinga upi hanji ka, kuhanjika yuma yize kuyalitele kuchichi kuhwisa mulonga. Kushishika kuli Yehova ni kuli mandumbu jetu muchitukwasa kwehuka kulinga uhenge wacho. Mukwa-masamu yamba ngwenyi, kuli “yoze wakwenda keshi chitela.” Mutu wacho “keshi kuhanjika ni luchoko hakutwala kuli mwenyembo wenyi.”—Samu 15:2, 3; Tiangu 3:5.

IWULUKA USEPA WE ULEMU

15. Kuchi usepa wa Yosefwe ni Yehova wapwile chiwape?

¹⁵ Mutuhasa kuwana longeso likwo lilemu ha chilweza cha Yosefwe. Ha miaka 13 yize apwile mu lamba, Yosefwe kasolwele ngwenyi, kapwile ni nyonga lia Yehova hakutwala ku yuma yize yalingiwile ku mwono wenyi. (Uputukilo 45:5-8) Iye kakalamikijile Yehova ha lamba lize apwile nalio. Chipwe ngwe Yosefwe kakavulamine lamba lize amwene, alioze, kakafungile toto ku mbunge. Chahiana ulemu, kakechele hanga uhenge ni yitanga yipi ya akwo yimuhandunune kuli Yehova. Ushishiko wa Yosefwe wamukwashile kumona chize Yehova ahwishile yuma ya uhenge ni kumuwahisa hamwe ni asoko jenyi.

16. Mumu liaka twatamba kukundama kuli Yehova nyi matulinga yuma ya uhenge mu chikungulwila?

¹⁶ Chimwika nawa, ni yetu twatamba kulemesa ni kufunga usepa wetu ni Yehova. Kutwatambile kwecha hanga uhenge wa mandumbu jetu utuhandunune kuli Zambi yoze twazanga ni ku uwayilo wenyi. (A-Roma 8:38, 39) Alioze, nyi matulinga yuma ya uhenge mu chikungulwila, twimbululenu Yosefwe ni kukundama kuli Yehova. Tupwenu ni nyonga ngwe lize Zambi ­akwete ­hakutwala ku uhenge uze wakulingiwa. Muze hitwasa tachi hanga tuhwise kapinda wacho hakukaula shimbi ja mu Mbimbiliya, mutufupiwa kuyikunjika mu moko ja Yehova. Nyi twalinga chocho, mutuhasa kupwa ni shindakenyo ngwetu, iye makalulieka yuma ha mashimbu ni mu mutapu uze walita.

FULIELA “CHISOPA-MULONGA WA AKWA HASHI ESWE”

17. Kuchi mutuhasa kusolola ngwetu twafuliela muli “Chisopa-mulonga wa akwa hashi eswe”?

¹⁷ Shimbu tuchili hano hashi hapi, mutuhasa kushimbwila kupalika mu yimwe yuma ya uhenge. Ha mashimbu amwe, yena hanji ndumbu yoze wanyingika munuhasa kupalika hanji kumona yimwe yuma yize muyisoloka ngwe ya uhenge mu chikungulwila. Nyi yino muyilingiwa kanda utalinga. (Samu 119:165) Alioze, nunga ni kushishika kuli Zambi, lemba ni kwita ukwaso nawa fuliela muli iye. Iwuluka ngwe mumu lia uhenge, muhasa kuhona kunyingika kanawa yize yinalingiwako, nawa hanji kuuchi kunyingika yeswe. Imbulula chilweza cha Yosefwe nawa ehuka kuhanjika yuma yize kuyalitele, yize muyihasa kupihisa chinji yuma. Hachino, shimbu ulijikijile, nunga ni kushishika ni kushimbwila ni uhumikizo weswe ngwe Yehova makahwisa milonga yacho. Nyi walinga chocho, mupwa ni utayizo wa Yehova nawa makuwahisa ngwe chize alingile kuli Yosefwe. Muhasa kupwa ni shindakenyo ngwe Yehova, “Chisopa-mulonga wa akwa hashi eswe,” makalinga wika yize yalita, “majila jenyi eswe a ululi.”—Uputukilo 18:25; Shimbi Yamuchiali 32:4.

18. Yika mutukalilongesa ha mutwe uze muusulaho?

¹⁸ Mu mutwe uze muusulaho, mutulilongesa yilweza yaali ya uhenge yize yalingiwile mukachi ka tuvumbi twa Yehova ku mashimbu akunyima. Yilweza yacho muyitukwasa hanga tumone chize kulikehesa ni kukonekena akwetu muchihasa kutukwasa hanga twimbulule chize Yehova akunyonga hakutwala ku ululi.