MUTWE WA KULILONGESA 43
MWASO 41 Ivwa Kama Kulemba Chami
Lembela Akwenu Mashimbu Eswe
‘Lilembelenu umwe ni mukwo . . . kuliumba cha mukwa-ululi chili ni tachi jinji.’—TIA. 5:16.
Yize Mutulilongesa
Mutumona mumu liaka chili chilemu kulembela akwetu, ni chize mutuhasa kuchilinga.
1. Kuchi tunanyingika ngwetu kulemba chetu chili chilemu kuli Yehova?
KULEMBA chili chimwe chawana chipema chinji. Tuchinyongenu ha chino, Yehova kahanyine yimwe yiteli kuli angelo. (Samu 91:11) Iye nawa kahanyine yiteli yilemu kuli Mwanenyi. (Mateu 28:18) Alioze shina Yehova kahanyine kuli umwe mutu chiteli cha kupanjika yilemba yetu? Ka. Yehova mwene ‘kakwivwa kulemba.’ Mwene mwe wakutupanjika muze twakulemba kuli iye.—Samu 65:2.
2. Mumu liaka mutuhasa kwamba ngwetu postolo Paulu kali chilweza chipema cha kulembela akwetu?
2 Mutuhasa kulemba kuli Yehova ni kumulweza yuma yeswe yize yinatupinjisa. Alioze twatamba nawa kulembela akwetu. Postolo Paulu kali chilweza chipema ha chikuma chino. Iye kasonekenene chikungulwila cha A-Efwesu ngwenyi: “Nakununga ni kunutongola mu yilemba yami.” (Efwe. 1:16) Paulu nawa te kakulembela mutu ni mutu. Ngwe chilweza, iye kalwezele Timoteu ngwenyi: “Ngunasakwilila Zambi . . . chishi kukuvulama muze nakuliumba kuli Zambi ufuku ni mwalwa.” (2 Timo. 1:3) Paulu te kakupalika mu yipikalo yinji, nawa te kakulemba ha yipikalo yacho. (2 Kori. 11:23; 12:7, 8) Chipwe chocho, iye te kakulembela akwo.
3. Yika muyihasa kututwala tuvulame kulembela akwetu?
3 Ha mashimbu amwe, mutuhasa kuvulama kulembela akwetu. Mumu liaka? Umwe ndumbu wa pwo avuluka ngwo Sabrina,a kanalumbununa mumu liaka. Iye yamba ngwenyi: “Mwono hano hashi unakale chinji, kashika ha mashimbu amwe mutuhasa kulihulikila ha yipikalo yetu ni kulilembela wika yetu ene.” Shina chino hichinalingiwa kuli yena? Nyi wakumbulula ngwe ewa ha chihula chino, mutwe uno muukukwasa kunyingika (1) mumu liaka chili chilemu kulembela akwetu, (2) kunyingika chize muhasa kuchilinga.
MUMU LIAKA TWATAMBA KULEMBELA AKWETU?
4-5. ‘Tachi jika yilemba’ yetu yikwete hali akwetu? (Tiangu 5:16)
4 Kulembela akwetu chikwete “tachi jinji.” (Tanga Tiangu 5:16.) Yilemba yetu muyihasa kukwata ha mwono wa akwetu. Yesu kanyingikine ngwenyi, yilemba muyihasa kukwata ha mwono wa umwe mutu. Muze anyingikine ngwenyi postolo Petulu te malituna iye, yamba ngwenyi: “Naliumba chinji kuli Zambi mumu lia yena hanga ufulielo we uhone kukokoloka.” (Luka 22:32) Paulu neye kanyingikine tachi jize yilemba yikwete. Muze apwile mu zuwo lia ususu ku Roma, iye yasonekena Fwilimu ngwenyi: “Nguli ni kutalatala ngwami makangutusula mu zuwo lia ususu, kulita ni yilemba yenu, hanga ngukahiluke kuli yenu.” (Tala nawa “makangutusula hanga ngukeze kuli yenu” ha nota mu Mbimbiliya ya estudo ha Fwilim. 22.) Yino ye yalingiwileko lume. Ha kupalika cha mashimbu akehe, Paulu yamutusula mu zuwo lia ususu, ni kuputuka cheka kwambujola.
5 Kwamba pundu, chino kuchalumbunukine ngwo kulemba chetu muchihasa kutwala Yehova alinge chuma cheswacho. Yehova kakulihulumba ni kwita chetu, nawa ha yisuho yimwe kakukumbulula yilema yetu kulita ni kwita chetu. Kunyingika chino, muchihasa kutukwasa kulemba chinji kuli Yehova ha chimwe chikuma ni kujikijila muli iye ha kwecha chikuma chacho mu moko jenyi.—Samu 37:5; Tala nawa 2 A-Korindu 1:11.
6. Kuchi kulemba chakutukwasa kusolwela akwetu zango ni keke? (1 Petulu 3:8)
6 Kulembela akwetu chakutukwasa kupwa ‘akwa-keke.’ (Tanga 1 Petulu 3:8.) Mutu yoze ukwete keke, muze akumona akwo mamona lamba, kakuzanga kulinga yimwe hanga aakwase. (Marku 1:40, 41) Kulembela akwetu chakutuyukisa chinji. Ngwe chilweza, umwe mukulwana avuluka ngwo Michael, yamba ngwenyi: “Muze nakulembela akwetu hakutwala ku yize anafupu, chino chakungukwasa kunyingika yipikalo yo ni kwokesa zango liami hali ayo. Chakungukundamisa nawa kuli ayo chipwe ngwe o keshi kuchinyingika.” Mukulwana mukwo avuluka ngwo Richard, yamba ngwenyi: “Muze twakulembela umwe, chino chakututwala kulinga yimwe hanga tumukwase. Nawa muze twakulinga chimwe chuma hanga tukwase mutu wacho, chakupwa ngwe tunakwase kukumbulula yilemba yetu.”
7. Kuchi kulembela akwetu chakutukwasa kupwa ni nyonga lialita hakutwala ku yipikalo yetu? (A-Fwilipu 2:3, 4) (Tala nawa yizulie.)
7 Kulembela akwetu chakutukwasa kupwa ni manyonga alita hakutwala ku yipikalo yetu. (Tanga A-Fwilipu 2:3, 4.) Twatwama hashi haze anayula kuli Satana, kashika yetu eswe twakupalika mu yipikalo. (Yoa. 5:19; Uso. 12:12) Kupwa ni chako cha kulembela akwetu chakutwiulula ngwo, “mandumbu jetu waze ali hashi heswe no kanapalika mu lamba lino liene.” (1 Petu. 5:9) Umwe pionelu avuluka ngwo Katherine, yamba ngwenyi: “Kulembela akwetu chakungwiulula ngwo, no kanapalika mu yipikalo. Kashika, chino chakungukwasa nguhone kulihulikila ha yipikalo yami.”
Kulembela akwetu chakutukwasa kupwa ni nyonga lialita hakutwala ku yipikalo yetu (Tala paragrafu 7)d
AYO KANAFUPU YILEMBA YETU
8. Aya nawa twatamba kulembela?
8 Aya twatamba kutongola mu yilemba yetu? Mutuhasa kulembela atu anji. Ngwe chilweza, mutuhasa kulembela waze anayiji, akweze waze akwashinjila ku shikola hanga alinge yuma yize kuyalitele, atu waze anapinji ni ushinakaji, hanji mandumbu jetu waze akupalika mu yihungumiona kukatuka kuli asoko hanji kuli nguvulu. (Mateu 10:18, 36; Yili. 12:5) Mumu lia mbwaja ya akwa-mafwefwe, mandumbu amwe kakuhichika mazuwo jo, eka kanamono lamba mumu lia luyinda wa chisemewa. Muze twakulembela mandumbu wano, twakusolola ngwetu tunononokena shimbi ya Yesu ya ‘kulizanga umwe ni mukwo.’—Yoa. 13:34.
9. Mumu liaka twatamba kulembela mandumbu waze akutusongwela mu ululikiso wa Yehova hamwe ni mapwo jo?
9 Mutuhasa nawa kulembela mandumbu waze akutusongwela mu ululikiso wa Yehova. Ngwe mandumbu a mu Chizavu cha Tusongo ni yikwashi jo, mandumbu a mu Komite ya Mutango, tulayi waze akusongwela milimo ha Mbetele, tulayi a mbonge, makulwana a mu chikungulwila ni tuvumbi. Mandumbu wano, kakukalakala chinji hanga atufunge. Chikwo nawa, kakupinda ni yipikalo yo ya ku mwono. (2 Kori. 12:15) Umwe kalayi wa mbonge avuluka ngwo Mark yamba ngwenyi: “Kapinda umwe ngukwete kali kupwa kusuku ni yisemi jami. Ayo hapwa tushinakaji nawa kakupinda ni misongo, ngunanyingika ngwami, ndumbwami ni mukwo-lunga, kakwafunga kanawa. Alioze chipwe chocho, nakwivwa yikola yinji ku mbunge, mumu chishi kuhasa kulinga yuma yinji hanga ngufunge yisemi jami.” Yetu kutwanyingikine yipikalo yize mandumbu wano akupalika, alioze, muchipema chinji kwasa mu yilemba yetu. (1 Tesa. 5:12, 13) Mutuhasa nawa kulembela mapwo jo mumu ushishiko wo wakukwasa hanga mandumbu wano, anunge mu yiteli yo.
10-11. Kuchi tunanyingika ngwetu, kulembela mandumbu jetu eswe chipwe ngwe kutwatongwele ha majina chakuvwisa Yehova kuwaha?
10 Ngwe chize twamona, twakulembela mandumbu jetu eswe. Ngwe chilweza, chipwe ngwe kutwatongwele mutu niumwe, yetu kanji-kanji twakwita kuli Yehova hanga akwase waze ali mu mazuwo a ususu, ni waze afwisa. Umwe mukulwana avuluka ngwo Donald yamba ngwenyi: “Tuli ni mandumbu anji anapalika mu yipikalo. Kashika ha yisuho yimwe, twakulembela mandumbu jetu eswe ni kwita hanga Yehova akwase waze anamono lamba.”
11 Shina yilemba yino yakuvwisa Yehova kuwaha? Ewa. Mumu yetu kutwanyingikine yize mandumbu jetu anafupu, kashika hi chipiko kulembela mandumbu eswe. (Yoa. 17:20; Efwe. 6:18) Yilemba yino yakusolola ngwo, twakuzanga mandumbu jetu a hashi heswe.—1 Petu. 2:17.
MUZE UNALEMBE TONGOLA MANDUMBU HA MAJINA JO
12. Nyi twanyingika yize mandumbu jetu anapalika, yika mutuhasa kulinga muze tunalembe?
12 Nyingika yize mandumbu anapalika. Kuchizako kulembela mandumbu jetu eswe, twatamba nawa kulemba hali mutu ni mutu. Shina kuli umwe mu chikungulwila che yoze unapinji ni umwe musongo uze kuushi kuya? Shina kuli mukweze umwe yoze unahongo mumu lia yihungumiona yize akupalika ku shikola? Nyi unanyingika umwe ndumbu yoze unase tachi hanga alele ana jenyi mu “fumbo ni mu shimbi ja Yehova”? (Efwe. 6:4) Nyi wanyingika yize mandumbu anapalika, chino muchikukwasa kulisa mu chihela cho ni kwatongola mu yilemba ye.b—Roma 12:15.
13. Yika mutuhasa kulinga mba tutongole mu yilemba majina ja mandumbu waze kutwanyingikine?
13 Lembela umwe ndumbu ha kutongola jina lienyi. Mutuhasa kuchilinga chipwe lume kuli mandumbu waze kutwanyingikine. Ngwe chilweza, mandumbu jetu anji mu Cingapura, mu Crimeia, Eritria ni mu Russia, kali mu mazuwo a ususu.c Nyi tunazange kutongola majina jo, mutuhasa kwawana ha site jw.org. Umwe kalayi wa mbonge avuluka ngwo Brian, yamba ngwenyi: “Nanyingikine ngwami, muze nakusoneka jina lia umwe ndumbu yoze uli mu zuwo lia ususu, ni kulivuluka ni liji mwilu, chakupwa chashi kumwiuluka ni kumutongola mu yilemba.”
14-15. Yika muyitukwasa kutongola mu yilemba yuma yize mandumbu jetu anafupu?
14 Lweza kuli Yehova ukwaso uze unazange hanga ahane kuli mandumbu. Michael, yoze twatongola ku uputukilo, yamba ngwenyi: “Muze nakutanga sango ja mandumbu waze ali mu zuwo lia ususu ha jw.org, nakweseka kulisa mu chihela cho ni kunyonga chize yami te mungulivwa. Kwamba pundu, te mungulipikala chinji hali mukwetu pwo ni kusa shindakenyo ngwami, kuli umwe yoze mamufunga. Chino chakungukwasa kunyingika yize mungutongola mu yilemba, muze nakulembela mandumbu alimbata waze ali mu zuwo lia ususu.”—Hepre. 13:3, nota.
15 Kunyonga ha yize mandumbu jetu ali mu mazuwo a ususu akupalika tangwa ha tangwa, muchitukwasa kunyingika yize mutwechila mu yilemba yetu. Ngwe chilweza, mutuhasa kwita hanga tufunga ahone kwamwesa lamba, ni kwita nawa hanga manguvulu aatayize kuwayila Yehova ni utuswilo. (1 Timo. 2:1, 2) Mutuhasa nawa kulemba hanga chilweza cho, chitakamise mandumbu mu chikungulwila chetu ni kukwasa atu waze keshi kuwayila Yehova amone yitanga yo yipema, ni kuzanga kupanjika sango jize twakwambujola. (1 Petu. 2:12) Kwamba pundu, yuma yino nawa mutuhasa kuyilinga muze mutulembela mandumbu waze anapalika mu yipikalo yalisa. Muze twakunyingika yize mandumbu jetu anapalika, kwatongola mu yilemba ni kwita yize anafupu, twakusolola ngwetu ‘zango lietu linalumbama umwe kuli mukwo.’—1 Tesa. 3:12.
PWAKO NI NYONGA LIALITA HAKUTWALA KU YILEMBA
16. Mumu liaka twatamba kupwa ni nyonga lialita hakutwala ku yilemba yetu? (Mateu 6:8)
16 Ngwe chize twamona, yilemba yetu muyihasa kukwata ha yize muyilingiwa ku mwono wa akwetu. Alioze twatamba kupwa ni nyonga lialita hakutwala ku yilemba yetu. Muze twakulemba, kutushi kulweza Yehova yuma yize iye kanyingikine. Chikwo nawa, iye kafupile yiyulo yetu hanga amone yize atamba kulinga ha chimwe chikuma. Shimbu mutu mwene kanda achinyingika yize anafupu, hanji nawa yetu kanda tuchinyingika yize mutu wacho anapalika, Yehova kakulianga kunyingika yize mutu wacho anafupu. (Tanga Mateu 6:8.) Mba mumu liaka twatamba kulembela akwetu? Kuchizako yikuma yize hitwatongola, kulembela akwetu, yili jila ya kusolwelamo zango lietu hali ayo. Kashika Yehova kakuwahilila muze akumona tuvumbi twenyi mapwa akwa-zango ngwe iye.
17-18. Chilweza chika muchitukwasa kupwa ni nyonga lialita hakutwala ku yilemba yetu?
17 Ha mashimbu amwe, muchihasa kusoloka ngwe yilemba yetu kuyakwashile. Chipwe chocho, yilemba yetu yakusolola zango lize tukwete hali mandumbu jetu, nawa Yehova kakulihulikila ha chino. Ngwe chilweza, tunyongenu hali yisemi waze akwete ano aali, umwe wa lunga mukwo wa pwo. Mba mwana wa lunga mayiza chinji, chocho mwana wa pwo maliumba kuli tato ni kwita ngwenyi: “Linga kama chimwe ukwase ndumbwami, iye keshi kanawa.” Chisemi kananyingika yuma yeswe nawa iye kakuzanga mwanenyi, kashika kanamufungu kanawa. Alioze mawahilila chinji muze mamona mwanenyi wa pwo malihulumba ni kuliumba kuli iye hanga akwase ndumbwenyi wa lunga.
18 Yino ye Yehova akutwita hanga tulinge. Iye kanashimbwila hanga tulihulumbe hali akwetu ni kulilembela amwe ni akwo. Muze twakuchilinga, twakusolola ngwetu kutushi kunyonga wika hali yetu ene, alioze twakuzanga mandumbu ni mbunge yetu yeswe. Yehova kakumona yuma yino yeswe. (2 Tesa. 1:3; Hepre. 6:10) Ngwe chize twamona, ha yisuho yimwe yilemba yetu muyihasa kukwata ha mwono wa umwe ndumbu. Kashika, kanda tuvulama kulembela akwetu.
MWASO 101 Tulinunge ni Kuzachila Hamuwika
a Majina amwe kapwa kwalumuna.
b Tala chinema ha jw.org Takeshi Shimizu: Yehova ‘Kakwivwa Kulemba.’
c Mba uwane majina ja mandumbu waze ali mu mazuwo a ususu, yako ha jw.org, ha chikuma fupa, soneka “Yela ja Yehova waze ali mu zuwo lia ususu mumu lia ufulielo wo.”
d ULUMBUNWISO WA CHIZULIE: Chipwe ngwe mandumbu jetu kanapalika mu lamba nihindu ayo kakulembela akwo