MUTWE WA KULILONGESA 42
MWASO 44 Kulemba cha Yoze Unafupiwa Ukwaso
Chize Kulemba Muchihasa ku Kukundamisa Kuli Yehova
“Hinasanyika ni mbunge yami yeswe; ungukumbulule kama, Yehova.”—SAMU 119:145.
YIZE MUTULILONGESA
Mutulilongesa hakutwala ku yilemba ya tuvumbi twa Yehova yize yili mu Mbimbiliya.
1-2. (a) Yika muyihasa kutukwika kulweza Yehova mu yilemba chize tunalivwu? (b) Kuchi tunanyingika ngwetu Yehova kakupanjika yilemba yetu?
SHINA mashimbu amwe wakwamba yuma yoyene mu yilemba chakuhona kulweza Yehova chize unalivwu? Nyi chenacho, nyingika ngwe kuushi ukawe. Ha mashimbu amwe, mumu lia kupwa ni yuma yinji ya kulinga, kota wakulemba kafuji-fuji. Hanji nawa, chakupwa chikalu kuli yena kulweza Yehova chize unalivwu mumu wakunyonga ngwe kuuchi kuhasa kukundama kuli iye.
2 Mbimbiliya yakutukolweza ngwo muze tunalembe kuli Yehova, chuma chilemu hi kupemesa ko maliji, alioze chili kulemba ni mbunge yeswe. Yehova kakupanjika ‘kwita cha yimbovu.’ (Samu 10:17) Chikwo nawa, iye kakupanjika maliji eswe muze twakulemba.—Samu 139:1-3.
3. Yihula yika mutukumbulula ha mutwe uno?
3 Mutuhasa kulihula ngwetu: Mumu liaka twatamba kulemba kuli Yehova ni mbunge yeswe? Kuchi mutuhasa kulemba mujila yize muyihasa kutukundamisa kuli Yehova? Kuchi kupukuna ha yilemba ya tuvumbi twa Yehova yize yili mu Mbimbiliya, muchihasa kutukwasa kupemesa yilemba yetu? Yika mutuhasa kulinga nyi tunakakajana kulweza Yehova chize tunalivwu? Tutalenu makumbululo a yihula yino.
KANDA WECHA CHUMA NICHIMWE CHIKUKINDE KULEMBA KULI YEHOVA
4. Yika muyihasa kutukwasa kulemba kuli Yehova ni mbunge yetu yeswe? (Samu 119:145)
4 Muze twakunyingika ngwetu, Yehova kali sepa mupema yoze unazange yuma yipema hali yetu, chakupwa chashi kuli yetu kulemba kuli iye ni kumulweza chize tunevwu. Mukwa-kusoneka Samu 119, neye che alingile. Iye kapalikile mu yipikalo yinji nawa kamuliongelele yuma ya mahuza. (Samu 119:23, 69, 78) Kapwile nawa ni kunenganyana mumu lia uhenge wenyi. (Samu 119:5) Nihindu, te kakusa tachi hanga apwe ni usepa upema ni Yehova. Iye te keshi kwivwa woma wa kulweza Yehova yeswe yize anevwu ku mbunge.—Tanga Samu 119:145.
5. Mumu liaka kutwatambile kwecha chuma nichimwe chitukinde kulemba kuli Yehova?
5 Yehova kanazange hanga yivulumunyi no alembe kuli iye. (Iza. 55:6, 7) Kashika, kutwatambile kwecha chuma nichimwe chitukinde kulemba kuli Yehova. Ngwe chilweza, uchinyonga ngwe waya wenyi ku chimwe chihela chize kuwanyingikine, koko mutoka. Alioze, muwana mutu yoze unanyingika kanawa ku chihela chacho. Shina muwivwa sonyi ja kwita ukwaso kuli mutu wacho, mumu ngwo watoka? Ka. Chizechene nawa, ha mashimbu amwe ni yetu mutuhasa kulivwa ngwe hitwatoka mumu lia shili yize twalingile. Alioze twatamba kunyingika ngwetu, mutuhasa kujikijila Yehova ni kumulweza yeswe yize tunevwu.—Samu 119:25, 176.
CHIZE MUHASA KULEMBA NI MBUNGE YESWE
6-7. Yika muyitukwasa kulweza Yehova mu yilemba chize tunalivwu? Hana chilweza. (Tala nawa maliji mushi lia lifwo)
6 Nyi mutulweza Yehova yuma yeswe yize tunanyongo ni chize tunalivwu, mutukundama kuli iye. Mba, yika mutuhasa kulinga hanga yilemba yetu yitukwase kukundama kuli Yehova?
7 Pukuna ha yitanga ya Yehova.a Kupukuna ha yitanga ya Yehova, muchitukwasa kumulweza yeswe yize tunevwu ku mbunge chakuhona kwivwa woma. (Samu 145:8, 9, 18) Tutalenu chilweza cha ndumbwetu wa pwo avuluka ngwo Christine, yoze wapwile ni tato chitenu. Iye yamba ngwenyi: “Kuhanjika ni Yehova ngwe umwe Tata, kuchakapwile chashi. Napwile ni kunyonga ngwami, mumu lia uhenge wami, Yehova hanangumbila.” Yitanga yika ya Yehova yamukwashile? Iye yamba nawa ngwenyi: “Nanyongene chinji hakutwala ku utu wa zango lia Yehova. Chino changukwashile kupwa ni shindakenyo ngwami, Yehova kakunguzanga. Ngunanyingika ngwami, iye mangukwasa mashimbu eswe. Chipwe ngwe nahengesa, Yehova mangukwasa nawa manunga ni kunguzanga. Kunyonga ha utu wa zango lia Yehova, chakungukwasa kulweza Yehova yuma yize yakunguvwisa kuwaha ni yize yakungunehena chinyengo.”
8-9. Kuchi mutuhasa kuyuka ha kunyonga kanawa shimbu kanda tuchilemba?
8 Nyonga ha yize mulweza Yehova mu yilemba. Shimbu kanda uchilemba, muhasa kulihula ngwe: ‘Yipikalo yika ngulinayo haliapwila? Shina kuli umwe yoze natamba kukonekena? Shina ngunapalika mu umwe kapinda yoze unafupiwa ukwaso wa Yehova mba ngumukumbe?’ (2 Mia. 19:15-19) Mutuhasa nawa kukaula chilweza cha Yesu ha kulemba hakutwala ku yuma yize yinatale ha jina ni Wanangana wa Yehova.—Mateu 6:9, 10.
9 Muze ndumbu Aliska, amuwanyine ni musongo wa cancer ya mu wongo, chapwile chikalu kuli iye kulemba kuli Yehova. Iye yamba ngwenyi: “Nanengananyine chinji, kashika chapwile chikalu kuli yami kunyonga kanawa hakutwala ku yuma yize mungulweza Yehova mu yilemba.” Mba yika yamukwashile? Yamba nawa ngwenyi: “Shimbu kanda nguchilemba, nakulianga kululieka manyonga jami hanga muze mungulemba, nguchine kulihulikila wika hali yami mwene. Kulinga chino, chakungukwasa kulihumikiza ni kulivwa kanawa muze nakulemba kuli Yehova hakutwala ku yuma yikwo.”
10. Mumu liaka twatamba kulemba ha mashimbu anji? (Tala nawa yizulie.)
10 Lemba ha mashimbu anji. Tunanyingika ngwetu, chipwe kulembab ha mashimbu akehe wika muchihasa kutukundamisa kuli Yehova. Alioze, kulemba ha mashimbu anji muchihasa kutukwasa kulweza Yehova yeswe yize tunevwu ni yize tunanyongo. Lunga lia Aliska, avuluka ngwo Elijah, yamba ngwenyi: “Nakulemba ha yisuho yinji ha tangwa. Kulinga chino, chakungukwasa kukundama kuli Yehova. Ngunanyingika ngwami, Yehova kujishi kumuhwa muze akwivwa yilemba yami chipwe ngwe yakumbata mashimbu anji.” Kashika mba tulembe ha mashimbu anji, twatamba kuwana mashimbu apema ni chihela kuze mutu niumwe hanji chuma cheswacho kuchichi kutupinjisa. Nyi twawana chihela chacho, mutuhasa kulemba ni liji mwilu nawa mashimbu eswe.
Fupa mashimbu ni chihela kuze kwahola, hanga uhanjike ni Tatenu wa mu malilu (Tala paragrafu 10)
PUKUNA HA YILEMBA YA MU MBIMBILIYA
11. Kuchi mutuhasa kuyuka ha kupukuna ha yilemba ya mu Mbimbiliya? (Tala nawa mushete “Shina Wakulivwa Ngwe Chize Ayo Alivwile?”)
11 Nyi mutupukuna ha yilemba ya tuvumbi twa Yehova ni ha miaso ya mu Mbimbiliya, mutuyuka chinji. Mumu liaka tunambe chocho? Mumu ayo kapwile ni kulemba ni mbunge yeswe ni kulweza Yehova chize analivwu. Kashika kwimbulula chilweza cho muze tunalembe, muchitukwasa kuwana maliji aha waze mutuhasa kuvuluka mu yilemba yetu. Chikwo nawa, hanji muhasa kuwana mu Mbimbiliya yilemba ya kavumbi ka Yehova yoze wapalikile mu yuma yize yena unapalika nawa yoze wechile kuli Yehova yuma yizeyene unazange kwita.
12. Yika mutuhasa kulihula ha kupukuna ha yilemba ya mu Mbimbiliya?
12 Muze unapukuna ha yilemba ya mu Mbimbiliya, lihule ngwe: Iya wahanjikile maliji wano, nawa ha mashimbu aka? Shina maliji wano kanatale nawa hali yami? Yika munguhasa kulilongesa ha kulemba chino? Hengwola mu mikanda yetu hanga uwane kumbululo lia yihula yino. Tutalenu yimwe yilweza.
13. Yika mutuhasa kulilongesa kuli Hana hakutwala ku yilemba? (1 Samuele 1:10, 11) (Tala nawa yizulie ha chifukilo.)
13 Tanga 1 Samuele 1:10, 11. Muze Hana ahanjikile maliji wano mu yilemba, iye te kanapalika mu kapinda munene. Iye kapwile mumba nawa mukwo-muhali te kakupwisa mwono wenyi ukalu chinji. (1 Samue. 1:4-7) Nyi unapalika mu umwe kapinda yoze keshi kuhwa, yika muhasa kulilongesa ha kulemba cha Hana? Iye kalivwile kanawa ha kulemba kuli Yehova ni kumulweza yeswe yize te anapalika ku mwono. (1 Samue. 1:12, 18) Ni yetu mutuhasa kulivwa kanawa ha kumbila chiteli chetu kuli Yehova ha kumulweza yeswe yize tunevwu ni kapinda yoze tunapalika.—Samu 55:22.
Hana kapwile mumba nawa chihalika chenyi te kakumupinjisa mashimbu eswe. Kashika, iye yaazulula mbunge yenyi kuli Yehova mu yilemba (Tala paragrafu 13)
14. (a) Yika nawa mutuhasa kulilongesa ha chilweza cha Hana? (b) Kuchi kutanga ni kupukuna Liji lia Zambi muchihasa kutukwasa kunyingika yuma yize mutulweza Yehova mu yilemba? (Tala maliji mushi lia lifwo.)
14 Ha kupalika cha yimwe miaka muze mwanenyi Samuele asemukine, Hana yatwala mwanenyi kuli Sasendote wa lutwe, Eli. (1 Samue. 1:24-28) Muze iye te analembe ni mbunge yenyi yeswe, yamba ngwenyi, Yehova kakukwasa ni kufunga tuvumbi twenyi ashishika.c (1 Samue. 2:1, 8, 9) Chipwe ngwe yipikalo yenyi ku zuwo kuyakahwile, nihindu Hana yalihulikila ha chize Yehova amuwahishile. Yika mutuhasa kulilongesa ha chilweza chenyi? Mutuhasa kunyongonona mu yipikalo ha kulihulikila wika ha chize Yehova anatukwasa ndo haliapwila.
15. Muze tunapalika mu yuma yipi, yika mutuhasa kulilongesa ha yilemba ya profeta Jeremia? (Jeremia 12:1)
15 Tanga Jeremia 12:1. Ha shimbu limwe, profeta Jeremia kapwile ni kulivwa chipi ha kumona yingulungulu kali ni mwono upema. Iye nawa te kakwivwa kupihia mumu A-Izalele ni akwo te kakumukekuna. (Jere. 20:7, 8) Chipwe ngwe kalivwile chipi, nihindu kakahanjikile yuma yipi hakutwala ku upatwilo wa Zambi. Muze apwile ni kumona chize Yehova te akufumba waze te keshi kumwononokena, Jeremia yakolesa ufulielo wenyi ha upatwilo wa Zambi. (Jere. 32:19) Kupalikila mu yilemba, ni yetu mutuhasa kuhanjika chize tunalivwu ni kushimbwila ngwetu, Yehova ha shimbu lialita malulieka yuma yeswe hamwe ni kapinda yoze tunapalika haliapwila.
16. Yika mutuhasa kulilongesa hali Ka-Levi yoze wapwile mu ufunge? (Samu 42:1-4) (Tala nawa yizulie.)
16 Tanga Samu 42:1-4. Mwaso uno kausonekene kuli Ka-Levi yoze wapwile mu ufunge nawa yoze te keshi kulikungulula ni A-Izalele-ni-akwo. Samu yino yinasolola chize iye te akulivwa. Mutuhasa kulivwa ngwe chize iye alivwile, nyi ngwe kutushi kuhasa kulinga yuma mumu lia musongo uze tukwete, hanji mumu lia kutusa mu zuwo lia ususu hamukunda wa ufulielo wetu. Ha mashimbu amwe, mutuhasa kulivwa chipi, alioze ha mashimbu akwo mutuhasa kulivwa kanawa. Chino muchihasa kutukwasa kuhengwola manyonga jetu ni kutesa yuma kanawa. Ngwe chilweza, Ka-Levi kanyingikine ngwenyi, iye mapwa ni uhashi waha wa kuhalisa Yehova. (Samu 42:5) Iye te kakupukuna nawa ha chize Yehova te akumufunga. (Samu 42:8) Kulemba ni mbunge yeswe kuli Zambi, muchitukwasa kulihumikiza ni kupwa ni tachi ja kunyongonona.
Ka-Levi yoze wasonekene Samu 42, kazulwile mbunge yenyi kuli Yehova. Muze twakulweza Yehova chize tunalivwu, twakumwena yuma mujila yeka (Tala paragrafu 16)
17. (a) Yika mutuhasa kulilongesa ha chilweza cha profeta Yona? (Yona 2:1, 2) (b) Kuchi maliji waze ali ha mukanda wa Masamu, mahasa kutukwasa muze mutupalika mu yipikalo? (Tala maliji mushi lia lifwo.)
17 Tanga Yona 2:1, 2. Profeta Yona kalembele muze apwile mu jimo lia yishi. Chipwe ngwe kahengesele kuli Yehova, nihindu iye te kali ni shindakenyo ngwenyi, Yehova mevwa kulemba chenyi. Yona kavulukile maliji waze twakuwana mu mukanda wa Masamu.d Chino chinasolola ngwo, iye te kananyingika kanawa mukanda wacho. Kupukuna mukanda wa Masamu, chamukwashile kupwa ni shindakenyo ngwenyi, Yehova mamukwasa. Chizechene nawa, nyi mutusa tachi hanga tunyingike jimwe versu ja mu Mbimbiliya, muchitukwasa kwiuluka maliji jacho muze mutulemba kuli Yehova ha mashimbu akalu.
NUNGA NI KUKUNDAMA KULI YEHOVA MU YILEMBA
18-19. Nyi ha mashimbu amwe chakupwa chikalu kulweza Yehova chize tunevwu, shindakenyo yika twakuwana ha A-Roma 8:26, 27? Hana chilweza.
18 Tanga A-Roma 8:26, 27. Ha mashimbu amwe, muchihasa kupwa chikalu kulweza Yehova chize tunalivwu. Alioze kutwatambile kulipikala chinji mumu spiritu yisandu ya Zambi “muyihasa kutukwasa.” Kuchi chino muchihasa kulingiwa? Kupalikila mu spiritu yenyi yisandu, Yehova yecha hanga yilemba yimwe ayisoneke mu Mbimbiliya. Kashika, muze muchipwa chikalu kuli yetu kulweza Yehova yize tunanyongo, nihindu Yehova mahasa kutayiza maliji a yilemba yimwe yize mutuwana mu Mbimbiliya, ngwe yuma yize yetu tweta ni ku yikumbulula.
19 Nyonga lino liakwashile ndumbwetu wa pwo ku Russia, avuluka ngwo Yelena. Iye kamusumine mulonga ni kumutwala mu zuwo lia ususu mumu lia kulemba ni kutanga Mbimbiliya. Amu te akusakalala chinji, chapwile chikalu kuli iye kulemba kuli Yehova. Yamba ngwenyi: “Nguneuluka ngwami, muze nakulivwa chipi, chishi kuhasa kunyingika yize munguhanjika mu yilemba. Alioze te nakwiuluka nawa ngwami, Yehova matayiza yilemba ya tuvumbi twenyi a ku shakulu yize yili mu Mbimbiliya, ngwe yilemba yami. Kunyingika chino, changutakamishine chinji ha mashimbu jacho akalu.”
20. Nyi ngwe tunasakalala alioze tunazange kulemba, yika mutuhasa kulinga?
20 Muze tunasakalala, muchihasa kupwa chikalu kulihulikila ha yize tunalembe. Mba tululieke manyonga jetu, twatamba kutanga mukanda wa Masamu ni liji mwilu. Mutuhasa nawa kusoneka chize tunevwu, ngwe chize Ndawichi alingile. (Samu 18, 34, 142; maliji atangu.) Kwamba umwenemwene, kukushi umwe katalilo walita yoze unasolola chize twatamba kulemba. (Samu 141:2) Kashika, fupa jila yize yalita kuli yena.
21. Mumu liaka twatamba kulemba ni mbunge yeswe?
21 Chakutukolweza kunyingika ngwetu, Yehova kananyingika chize tunalivwu chipwe muze kanda tuchimulweza chuma nichimwe. (Samu 139:4) Nihindu, iye kakuwahilila muze twakulemba kuli iye mumu twakusolola ngwetu, twakumujikijila. Kashika, kanda wivwa woma wa kulemba kuli tatenu wa mu malilu. Tanga yilemba ya mu Mbimbiliya hanga yikukwase kunyingika yize mwamba. Lemba kuli Yehova ni mbunge ye yeswe. Mulweze yuma yize yakukunehena uwahililo ni yize yakukuvwisa chinyengo. Yehova kali sepa lie wamwenemwene nawa mapwa sali lie mashimbu eswe.
MWASO 45 Kupukuna Cha Mbunge Yami
a Tala “yimwe yitanga ya Yehova” yize anatongola ha mukanda Yisoneko Yize Yakusongwela Mwono wa Akwa-Kristu ha chikuma “Yehova.”
b Yilemba yize akulinga ha kukunguluka yakupwa yihi.
c Mu yilemba yenyi, Hana kavulukile maliji waze Mose asonekene. Chino chinasolola ngwo, iye kapwile ni kupukuna ha Yisoneko. (Shimbi 4:35; 8:18; 32:4, 39; 1 Samue. 2:2, 6, 7) Hakupalika cha mashimbu anji, Maria naye ya Yesu kavulukile maliji waze Hana avulukile.—Luka 1:46-55.
d Ha yilemba yili ha Yona 2:3-9, tala chize Yona avulukile yihanda ya mukanda wa Samu. Masamu 69:1; 16:10; 30:3; 142:2, 3; 143:4, 5; 18:6; 3:8.