MUTWE WA KULILONGESA 49
MWASO 44 Kulemba cha Yoze Unafupiwa Ukwaso
Chize Mukanda wa Yombi Muutukwasa Kuhana Chiyulo
“Ivwa haliapwila kuhanjika chami.”—YOMBI 33:1.
YIZE MUTULILONGESA
Mutulilongesa mu mukanda wa Yombi, yize twatamba kwamba ni chize twatamba kuyamba, muze mutuhana chiyulo kuli akwetu
1-2. Uhashi uka masepa atatu a Yombi apwile nawo?
MUZE Yombi atokesele upite wenyi weswe, atu anji kanyingikine lusango wacho. Malunga atatu waze te anamunyingika, yamukaula ku Uze hanga amutakamise. Majina ja malunga jacho kapwile Elifaze, Bilidade ni Zofare. Muze malunga wano amwene yize yalingiwile kuli Yombi, ayo yakomoka chinji.
2 Achinyonga ha yize Yombi apalikile. Iye kapwile ni kumona lamba, mumu katokesele yuma yeswe yize apwile nayo. Yimuna jenyi eswe keyile ni kwashiha, ana jenyi eswe ni ndungo jenyi kafwile. Ana jenyi kafwile muze zuwo liapuzukile. Muze te hikwalingiwa yuma yino yeswe, Yombi yakwachika musongo. Mujimba wenyi weswe yiupwa ni mahute waze amunehenene yikola yinji. Muze Elifaze, Bilidade ni Zofare ahetele, Yombi te kanatwama ha uto nawa te kananenganyana chinji. Yika ayo alingile? Ayo katwamine ni Yombi matangwa shimbiali chakuhona kumulweza chuma nichimwe, chipwe ngwe kamwene ngwo, Yombi te kanamono lamba. (Yombi 2:12, 13) Umwe mukweze avuluka ngwo Elihu, yeza ni kutala Yombi nawa yatwama hamwe no. Yombi yazanga kufwa ni kuputuka kunyonga ngwenyi, kachi kakasemukine. (Yombi 3:1-3, 11) kwamba umwenemwene, Yombi te kanafupu ukwaso wa masepa jenyi. Kashika, malunga wano te kali ni uhashi wa kutakamisa Yombi ni kusolola ngwo, ayo kali masepa jenyi amwenemwene waze akulihulumba hali iye. Tutalenu yize ayo alingile.
3. Yika mutumona ha mutwe uno?
3 Yehova katumine Mose hanga asoneke yize masepa a Yombi atatu ni Elihu ambile ni yize alingile. Chinasoloka ngwe yuma yimwe yize Elifaze ambile, yakatukile kuli Satana. Alioze, yize Elihu ambile, yakatukile kuli Yehova. (Yombi 4:12-16; 33:24, 25) Kashika mu mukanda wa Yombi, twakuwana yiyulo yipema ni yiyulo yipi yize ahanyine kuli Yombi. Ha mutwe uno, mutumona chize mukanda wa Yombi muuhasa kutukwasa muze mutufupa kuhana chiyulo kuli umwe sepa. Alioze chitangu, mutumona chilweza chipi cha masepa atatu a Yombi. Mba hanyima mututala chilweza chipema cha Elihu, yize ambile ni yize alingile. Mutumona nawa chize A-Izalele atambile kuyuka ha kulilongesa mukanda wa Yombi ni chize mutuhasa kuyuka musono.
CHIZE MASEPA ATATU A YOMBI AMUHELE CHIYULO
4. Mumu liaka masepa atatu a Yombi kakahashile kumutakamisa?
4 Mbimbiliya yakwamba ngwo, masepa atatu a Yombi kayile kuli iye hanga amutakamise mumu lia yuma yipi yize yalingiwile kuli iye. (Yombi 2:11) Alioze ayo kakatakamishine Yombi. Mumu liaka? Mumu lia yikuma yitatu. Chitangu ayo kakasele mashimbu hanga apanjike Yombi ni kweseka kunyingika yize yinalingiwako. Ngwe chilweza, ayo kanyongene ngwo Yombi kalinga yimwe yuma yipi, kashika te unamono lamba.a (Yombi 4:7; 11:14) Chamuchiali, yiyulo yize malunga wano ahanyine kuli Yombi, kuyakamukwashile, kakayihanyine ni zango nawa yamulemekene ku mbunge. Ngwe chilweza, malunga eswe atatu kahanjikile maliji waze asolokele ngwe kali apema, alioze te kalitele kulita ni mashimbu jacho. (Yombi 13:12) Bilidade yalweza Yombi ha yisuho yaali ngwenyi kanahanjika chinji. (Yombi 8:2; 18:2) Zofare neye yalweza yombi ngwenyi ‘keshi mana.’ (Yombi 11:12) Chamuchitatu, chipwe ngwe malunga wano atatu kakahanjikile ni liji mwilu kuli Yombi, nihindu yize ayo ambile ni chize ayambile, yatwalile Yombi kulihisa ni kulivwa ngwe keshi kumuzanga. (Yombi 15:7-11) Kashika, mutuhasa kwamba ngwetu, malunga wano, kalihulikilile chinji ha kusolola kuli Yombi ngwo iye kalinga yimwe yuma yipi, shimbu alihulikile ha kumutakamisa ni kukolesa ufulielo wenyi.
Nyi unahane chiyulo kuli umwe, kanda umutwala alivwe ngwe yena mwe wakulinga kanawa yuma kuhiana iye. Nyonga lie liatamba kupwa lia kumukwasa (Tala paragrafu 4)
5. Kuchi chiyulo chize masepa atatu ahanyine, chakwachile hali Yombi?
5 Kutwatambile kukomoka ngwetu, yiyulo yize masepa atatu a Yombi amuhele, kuyakamukwashile. Muze masepa atatu a Yombi ahwishile kuhanjika nenyi, Yombi yalivwa chipi kuhiana chize te analivwu shimbu kanda achihanjika nenyi. (Yombi 19:2) Mumu lia kumulamikiza yuma yinji, iye yazanga kulikalila. Kashika mutuhasa kuningika mumu liaka chapwile chilemu kuli Yombi kulikalila, ha kwamba ngwenyi, kali mukwa-ululi ni mumu liaka ambile yuma yize te katambile kwamba. (Yombi 6:3, 26) Yize masepa atatu a Yombi ambile, kuyakalitele ni manyonga a Yehova nawa kakasolwelele Yombi keke. Kashika, Satana yaakalakalisa hanga ahongese Yombi. (Yombi 2:4, 6) Kuchi lusango yono wayukishile atu ku mashimbu akunyima, nawa kuchi mahasa kutuyukisa musono?
6. Yika makulwana a mu Izalele atambile kulilongesa ha chilweza chipi cha masepa atatu a Yombi?
6 Chize A-Izalele atambile kuyuka. Muze Yehova ahanyine shimbi kuli A-Izalele, iye yasakula makulwana ni ngaji hanga aakwase kukaula shimbi jacho. (Shimbi 1:15-18; 27:1) Malunga jacho te katamba kupanjika kanawa shimbu kanda achihana chimwe chiyulo hanji kupatwila umwe mutu. (2 Sango 19:6) Ayo nawa te katamba kuhula hanga apwe ni shindakenyo ngwo, kananyingika umwenemwene. (Shimbi 19:18) Chikwo nawa, ayo te katamba kuhanjika ni umbovu kuli atu waze mafupa ukwaso. Mumu liaka? Mumu nyi ayo kechi kuhanjika ni umbovu, te muchipwa chikalu kuli atu waze te mafupa ukwaso, kwalweza chize analivwu. (Kutuhu. 22:22-24) Wano kapwile malongeso waze makulwana a mu Izalele atambile kuwana ha mukanda wa Yombi.
7. Kuchizako makulwana, aya nawa te mahasa kuhana yiyulo ni kuyuka ha lusango wa mukanda wa Yombi? (Yishima 27:9)
7 Kwamba umwenemwene, hi makulwana wika ko te atamba kuhana yiyulo mu Izalele. Mutu mweswe, te mahasa kukwasa sepa lienyi kukundama kuli Yehova chipwe kumwaha chimwe chiyulo muze malinga chimwe chuma chipi. (Samu 141:5) Masepa amwenemwene kakulikwasa umwe ni mukwo. (Tanga Yishima 27:9.) Nyi A-Izalele kapukwine ha chilweza chipi cha masepa atatu a Yombi, kachi kanyingikine yize mamba ni yize malinga muze mahana chimwe chiyulo.
8. Yika kutwatambile kulinga muze mutuhana yiyulo kuli akwetu? (Tala nawa yizulie.)
8 Chize mutuhasa kuyuka. Muze mandumbu jetu a malunga ni a mapwo mapalika mu lamba, twatamba kupwa akulilulieka mba twakwase. Alioze mba tuchilinge, twatamba kulisa ni masepa atatu a Yombi. Chitangu, shimbu kanda tuchihana chimwe chiyulo, twatamba kunyingika kanawa sango jeswe. Chamuchiali, yiyulo yize mutuhana kuli akwetu yatamba kukatuka mu Liji lia Zambi. (Yombi 4:8; 5:3, 27) Chamuchitatu, twatamba kwehuka kuhanjika maliji akalu, hanji api. Twiulukenu ngwetu, yuma yimwe yize masepa ja Yombi ambile yapwile yamwenemwene, kashika postolo Paulu atongwele majili waze Elifaze ambile. (Tesa nawa Yombi 5:13 ni 1 A-Korindu 3:19.) Alioze yuma yize ayo ambile hakutwala kuli Zambi kuyakapwile yamwenemwene, yalemekene Yombi ku mbunge. Kashika Yehova ambile ngwenyi, ayo kakambile umwenemwene. (Yombi 42:7, 8) Muze mutuhana yiyulo kuli akwetu, kanda twatwala anyonge ngwo Yehova kali mukalu, keshi kuzanga tuvumbi twenyi. Haliapwila tutalenu yize mutuhasa kulilongesa ha chilweza cha Elihu.
Muze unambe kuhana chiyulo (1) nyingika kanawa yize mutu wacho anapalika (2) kalakalisa Liji lia Zambi ni (3) hanjika ni umbovu hamwe ni vumbi (Tala paragrafu 8)
CHIZE ELIHU AHANYINE CHIYULO KULI YOMBI
9. Lumbununa mumu liaka Yombi afupile ukwaso hanyima lia masepa jenyi atatu kuhanjika, ni chize Yehova amuhele ukwaso wacho.
9 Muze Yombi ni masepa jenyi ahwishile kuhanjika, mukachi ko kota yuma kuyakendele kanawa. Malunga jacho kota kahanjikile yuma yinji, kashika yinambate tupitulu 28 a mukanda wacho. Chikwo nawa, yuma yinji yize ambile, yasolwele ngwo te kanevwu uli. Kashika twahasa kunyingika mumu liaka Yombi te anafupu utakamiso ni kumukwasa hanga apwe ni nyonga lialita. Kuchi Yehova akwashile Yombi? Iye katumine Elihu hanga amukwase. Mumu liaka Elihu kakalipupwile kuhanjika ngwe chize alingile masepa akwo atatu a Yombi? Iye yamba ngwenyi: “Yami nguli kanuke,” “yenu nuli makulwana kashika nevwile sonyi ni woma kulumbununa chikuma chami kuli yenu.” (Yombi 32:6, 7) Elihu kanyingikine ngwenyi, makulwana jacho te hatwama miaka yinji, kali ni mana anji ni utotombo kuhiana iye mumu lia kupwa mukweze. Alioze hanyima lia kupanjika Yombi ni masepa jenyi ni uhumikizo weswe, Elihu mba yahanjika. Yamba ngwenyi: “Mana katwamine muli anene wika kusa chinyingi chize chinalite, hi cha makulwana wika ko.” (Yombi 32:9) Hanyima, yika Elihu ambile nawa kuchi ayambile?
10. Yika Elihu alingile shimbu te kanda achihana chiyulo kuli Yombi? (Yombi 33:6, 7)
10 Elihu kazangile hanga Yombi ahwime mbunge, mba amulweze yize te anambe kwamba. Kuchi achilingile? Elihu, kasele manyonga jenyi mu chihela. Kuchi tunachinyingika? Tunachinyingika, mumu Mbimbiliya yakwamba ngwo, chitangu, Elihu kwevwile uli. (Yombi 32:2-5) Chipwe chocho, Elihu kakahanjikile maliji akalu kuli Yombi. Iye yalikehesa ni kuhanjika ni Yombi ngwe sepa wamwenemwene. Yalweza Yombi ngwenyi: “Kumeso ja Zambi chimuwika ngunapu ni yena.” (Tanga Yombi 33:6, 7.) Hanyima, Elihu yasolola ngwenyi kevwile kanawa yize Yombi ahanjikile. Muze te kanda achihana chiyulo kuli Yombi, iye yatongola yikuma yimwe ha yize Yombi ahanjikile. (Yombi 32:11; 33:8-11) Yino ye Elihu alingile nawa muze ayile ni kuhana chiyulo kuli Yombi ha chisuho chikwo.—Yombi 34:5, 6, 9; 35:1-4.
11. Kuchi Elihu ahanyine chiyulo kuli Yombi? (Yombi 33:1)
11 Muze Elihu ahanyine chiyulo kuli Yombi, iye kachilingile mu jila yize yasolwele ngwo kakumulemesa ni kumuvumbika. Ngwe chilweza, iye katongwele Yombi ha jina lienyi, chuma chize masepa jenyi atatu kakalingile. (Tanga Yombi 33:1.) Elihu kota keulukile chize te anazange kuhanjika muze Yombi ni masepa jenyi te analihangujola. Hachino, Elihu yahana uhashi kuli Yombi wa kuhanjika muze te anamwehe chiyulo. (Yombi 32:4; 33:32) Chikwo nawa, Elihu kasolwele kuli Yombi ngwo, yuma yimwe yize ambile ni yize alingile te kuyalitele, kashika ni zango lieswe amwiulwile hakutwala ku mana a Yehova, ndundo, ululi, ni utu wa zango lienyi. (Yombi 36:18, 21-26; 37:23, 24) Pundu lume, chiyulo chipema chize Elihu ahanyine kuli Yombi, chamukwashile kulilulieka hanga apanjike yiyulo yikwo ya Yehova. (Yombi 38:1-3) Kuchi chilweza cha Elihu, chayukishile tuvumbi twa Zambi kunyima nawa kuchi muchihasa kutuyukisa musono?
12. Kuchi Yehova akwashile atu jenyi kupalikila muli aprofeta, nawa kuchi A-Izalele ayukile ha chilweza chipema cha Elihu?
12 Chize A-Izalele atambile kuyuka. Yehova katongwele aprofeta hanga akwase atu jenyi kunyingika upale wenyi. Ngwe chilweza, ha mashimbu ja Akwa-Kuyula, Yehova katongwele profeta wa pwo Debola hanga ahane usongwelo kuli atu jenyi. Yehova nawa katongwele Samuele muze te uchili kanuke hanga ahane usongwolo kuli A-Izalele. (Kuyu. 4:4-7; 5:7; 1 Samue. 3:19, 20) Kusulaho, ha mashimbu ja mianangana, Yehova yatongola aprofeta hanga akwase A-Izalele anunge ni kumuwayila. Muze atu te akuhona kumwononokena, iye te kakutuma aprofeta hanga aakwase afune kuli Yehova. (2 Samue. 12:1-4; Yili. 3:24) Chilweza cha Elihu chize chili mu mukanda wa Yombi, chakwashile malunga ni mapwo ashishika kunyingika yize mahanjika ni chize mayihanjika muze anahana chiyulo.
13. Kuchi mutuhasa kutakamisa mandumbu jetu a ku ufulielo?
13 Chize mutuhasa kuyuka. Yetu Akwa-Kristu twakukwasa akwetu hanga anyingike upale wa Zambi. Jila yimwe twakuchilingilamo, yili kwambujola yize Mbimbiliya yakulongesa. Jila yikwo yili ha kuhanjika maliji apema waze matakamisa ni kukolweza mandumbu jetu a ku ufulielo. (1 Kori. 14:3) Chipi-chipi makulwana a mu chikungulwila, katamba kusa tachi hanga ahanjike ni umbovu ni zango chipwe ngwe ndumbu umwe mevwa uli, mamba hanji kulinga yuma yize kuyalitele.—1 Tesa. 5:14; Yombi 6:3.
14-15. Kuchi makulwana a mu chikungulwila mahasa kwimbulula Elihu muze anazange kuhana chiyulo kuli umwe ndumbu?
14 Tuchinyongenu ha chikuma chino. Umwe mukulwana wa mu chikungulwila manyingika ngwo, umwe ndumbu wa pwo kanahongo chinji. Mba mukulwana wacho ni umwe ndumbu mukwo, maya ni kumeneka ndumbwetu hanga amutakamise. Ha mashimbu waze anahanjika nenyi, ndumbwetu wa pwo malumbununa ngwenyi, chipwe ngwe kakusa tachi hanga aye ni kwambujola ni ku kukunguluka, nihindu keshi kuwahilila. Yika mukulwana wa mu chikungulwila atamba kulinga?
15 Chitangu, mukulwana katamba kunyingika yize yakutwala ndumbu wacho kulivwa chocho. Mba achilinge, katamba kumuhula-hula ni kumupanjika kanawa muze anahanjika. Shina kakulivwa ngwe keshi kulingila chinji Zambi hanji kulivwa nawa ngwo Yehova keshi kumuzanga? Nyi kanasakalala mumu lia “yipikalo ya ku mwono?” (Luka 21:34) Makulwana katamba kumuchichimieka ha yuma yipema yize akulinga. Ngwe chilweza, makulwana katamba kumuchichimieka ha tachi jize akusa hanga aye ku kukunguluka ni kwambujola chipwe ngwe kuchishi kupwa chashi iye kuchilinga. Muze mukulwana manyingika kanwa mumu liaka iye akulivwa chocho, henaho manda Mbimbiliya hanga amukwase kunyingika ngwo Yehova kakumuzanga.—Ngala. 2:20.
NUNGA NI KUWANA MALONGESO MU MUKANDA WA YOMBI
16. Kuchi mutuhasa kununga ni kuyuka ha malongeso waze ali mu mukanda wa Yombi?
16 Mutuhasa kuyuka yuma yinji ha kuhengwola mukanda wa Yombi. Ngwe chize twamona ha mutwe wapalika, mukanda wa Yombi kuushi kutulweza wika mumu liaka Zambi akwecha lamba, alioze wakutukwasa nawa tununge ni kushishika kuli Yehova muze tunapalika mu lamba liacho. Chikwo nawa, ha mutwe uno twamonaho chize yetu eswe mutuhasa kwimbulula chilweza chipema cha Elihu ha kuhana yiyulo, shimbu twimbulule masepa atatu a Yombi waze kakamuhele yiyulo yipema. Kashika, shimbu kanda uchihana chiyulo kuli umwe mutu, muchilita kuhengwola kanawa malongeso waze ali mu mukanda wa Yombi. Nyi hikwapalika mashimbu anji chize haze watangile mukanda wa Yombi, shina muchilita kuputuka kuutanga cheka? Nyi wachilinga, muwana malongeso anji apema mu mukanda uno.
MWASO 125 “Kawaha Akwa Kwivwa Keke!”
a Chinasoloka ngwe Ndiapu mwe watwalile Elifaze kwamba ngwo kuli Yehova kukushi mutu mukwa-ululi nawa kukushi mutu yoze mahasa kuvwisa Zambi kuwaha. Elifaze katayijile manyonga wano a mahuza chocho yatongola maliji jacho muze te anahanjika ni Yombi.—Yombi 4:17; 15:15, 16; 22:2.