Imbululenu Kulikehesa cha Yehova

1. Mumu liaka kulikehesa cha Yehova chakukomwesa?

MUSONO, muze twakumona manguvulu shina mutuhasa kwamba ngwetu, ayo kali akwa-kulikehesa? Ka. Alioze, Yehova mukwa-ndundo jeswe kali mukwa-kulikehesa. (Samu 113:5-8) Kulikehesa chili chihanda cha utu wa Yehova. Kukushi mutu niumwe yoze wakulikehesa ngwe Yehova. Kukushi chilayi nichimwe chize chakusolola ngwo, Yehova kali mukwa-kuzo. Ha mutwe uno, mutumona majila awana waze masolola utu wa Yehova. Mutumona chize akusolola kulikehesa ha hita chikuma. Mutumona nawa chize Yesu embulwile kulikehesa cha Tato. Nyi twachilinga, muchitukwasa kukundama kuli Yehova, ni kwimbulula kulikehesa chenyi.

YEHOVA KALI MUTU MWASHI

2. Yika mukanda wa Samu 62:8 wakutulongesa hakutwala kuli Yehova? (Tala nawa chizulie ha chifukilo.)

² Mutu mukwa-kuzo hi mwashiko. Iye kakulimona ngwe kahiana akwo, kanji-kanji iye kakulinga yuma yize yakutwala akwo alivwe chipi. Kashika, atu kakunyonga chinji muze anambe kukundama kuli iye, hanji lume kwecha kulikata nenyi. Alioze Yehova kalisa. Tata yetu wa mu malilu, kali mukwa-kulikehesa. Iye nawa, kakutusanyika hanga tukundame kuli iye, tumulweze yeswe yize tunanyongo ni chize tunalivwu. (Tanga Samu 62:8.) Chizechene ngwe tata wa zango akuzanga kwivwa yize yinapinjisa anenyi, Yehova neye kakuzanga kwivwa yilemba ya tuvumbi twenyi. Iye katumine hanga yilemba yinji ayisoneke mu Mbimbiliya. Chino chinasolola ngwo, Yehova kapwa mutu mwashi nawa kakuzanga kutupanjika. (Yoshu. 10:12-14; 1 Samue. 1:10-18) Mba yika mutuhasa kulinga nyi ha mashimbu amwe mutulivwa ngwetu kutwatelele kulemba kuli Yehova mumu lia tupalia amwe waze twakulinga?

3. Mumu liaka mutuhasa kupwa ni shindakenyo ngwetu Yehova kanazange tukundame kuli iye kupalikila mu yilemba?

³ Mutuhasa kulemba kuli Yehova chipwe muze mutulivwa ngwetu kutwatelele zango lienyi. Mumu liaka tunambe chocho? Ha chilweza cha Yesu cha mwana chimwangi, Yesu yatesa Yehova ni umwe tata wa zango yoze mwanenyi wapwile ni kunyonga ngwo katelele kufuna cheka kuli usoko wenyi. Yika tata yono alingile muze amwene mwanenyi kanafuna ku zuwo? Yesu yamba ngwenyi, muze tato amumwene shimbu te uchili kusuku, “yazomboka, yamukangayika ni kumumbejala chinji.” (Luka 15:17-20) Yehova kali ngwe tata yono, muze akwiva yilemba ya tuvumbi twenyi waze amakuka mbunge mumu lia kulihisa hanji mumu lia yipikalo, kulikehesa chakumutwala hanga aapanjike kanawa. (Lungu. 3:19, 20) Mumu lia keke, Yehova kakuzomboka ni kwiza kuli yetu hanga atulembejeke ni kutwaha shindakenyo ngwenyi, kakutuzanga ni kutukonekena. (Iza. 57:15) Kuchi Yehova ‘akuzomboka’ musono ni kwiza kuli yetu? Ha yisuho yinji, iye kakuchilinga kupalikila muli makulwana a mu chikungulwila, muli asoko ni masepa jetu waze ali mu umwenemwene. (Tia. 5:14, 15) Yehova kakutwaha ukwaso uno mumu kanazange hanga tukundame kuli iye.

4. Yika Yesu alingile yize yasolwele ngwo, atu mahasa kumukundama?

⁴ Kuchi Yesu akwimbulula Tato? Chizechene ngwe Yehova, Yesu neye kali mukwa-kulikehesa. Kashika atu te akulivwa kanawa ni kukundama kuli iye. Ayo te keshi kwivwa woma wa kukundama kuli Yesu. (Marku 4:10, 11) Muze Yesu apwile ni kwahula hanga asolole nyonga lio hakutwala ku chimwe chikuma, ayo te kakuhanjika yize akunyonga. (Mateu 16:13-16) Chipwe muze ayo te akuhengesa, te keshi kuvwila Yesu woma, mumu Yesu kapwile chimbovu, mukwa-kulihumikiza, nawa mukwa-keke. (Mateu 17:24-27) Amu Yesu apwile ni kwimbulula kanawa Tato, chapwile chashi tumbaji twenyi kunyingika utu wa Yehova. (Yoa. 14:9) Ayo kapwile ni kumona ngwo Yehova kali mukwa-kulikehesa, mutu mwashi, te kalisa ni mangana-a-mayingeleja waze apwile akwa-kuzo, akalu nawa keshi kulihulumba ni atu.

5. Mumu liaka chakupwa chashi akwetu kukundama kuli yetu nyi twapwa akwa-kulikehesa?

⁵ Kuchi mutuhasa kwimbulula Yehova? Nyi ngwe twapwa akwa-kulikehesa, chino muchitukwasa kupwa atu ashi. Kulikehesa muchitukwasa kwehuka yitanga ngwe, chipululu, kuzo ni kutulikila akwetu toto. Kulikehesa muchitukwasa kupwa yimbovu, akwa-kulihumikiza, nawa akwa-kukonekena. Yitanga yino, muyikwasa hanga akwetu akundame kuli yetu. (Kolo. 3:12-14) Chili chilemu chinji kuli makulwana a mu chikungulwila kupwa atu ashi. Alioze, nyi kanazange kupwa ni chitanga chino, katamba kupalikisa mashimbu anji ni mandumbu. Makulwana katamba kusa tachi hanga alikungulule mu chikungulwila hamwe ni mandumbu shimbu achitalile ha videoconferência. Shimbu ni shimbu nyi muchilita, katamba nawa kusa tachi hanga ambujole ku zuwo ni zuwo hamwe ni mandumbu. Nyi makulwana makundama kuli mandumbu, muchipwa chashi kuli mandumbu kwalweza yize ayo anapalika.

YEHOVA KAKWALUMUNA NYONGA LIENYI

6-7. Hana yilweza yinasolola ngwo, Yehova kalumwine nyonga lienyi muze tuvumbi twenyi alembele kuli iye.

⁶ Akwa-kuzo kanji-kanji kakunyonga ngwo kananyingika yuma yeswe, nawa keshi kuzanga kwalumuna manyonga jo. Alioze Yehova hi chocho ko apwa, chipwe ngwe kanyingika yize yinatupemena. Mumu lia kupwa mukwa-kulikehesa, iye kali mutu mwashi nawa kakuzanga kwivwa yize atu akwamba. Ngwe chilweza, tala yize yalingiwile kuli Miriame, yayo ya Mose. Iye ni Arone kahanjikile yuma yipi hakutwala kuli Mose yoze Yehova atongwele hanga asongwele atu jenyi. Yize ambile yasolwele ngwo, kanahono vumbi mwene Yehova. Mumu lia chino, Yehova yapihilila chocho yafumba Miriame ha kumwasa musongo wa mbumba. Alioze, Arone yeta kuli Mose hanga Mose aliumbe kuli Yehova awuke kama mbumba ya Miriame. Yika Yehova alingile? Nyi te kapwile mukwa kuzo, kachi Yehova kakapanjikile Mose chipwe kwalumuna nyonga lienyi. Alioze, amu Yehova ali mukwa-kulikehesa, iye yauka Miriame.—Kwa. 12:1-15.

⁷ Yehova kasolwele nawa ngwo kali mukwa-kulikehesa, ha chize apanjikile Mwanangana Hezekia. Kupalikila muli profeta Izaia, Yehova yalweza Hezekia ngwenyi, kumafwa. Mwanangana Hezekia yalila chinji, yaliumba kuli Yehova hanga amuuke. Chocho Yehova yakumbulula kulemba chenyi ha kumuwezela miaka 15 ya mwono. (2 Mia. 20:1, 5, 6) Yehova kakuvwila atu keke. Amu apwa mukwa-kulikehesa, iye kakuzanga chinji kwapanjika.

8. Yilweza yika yinasolola ngwo, Yesu kalumwine nyonga lienyi? (Marku 3:1-6)

⁸ Kuchi Yesu embulwile Tato? Yesu te kakulingila akwo yuma yipema muze te chakufupiwa. Ngwe chilweza, iye kaukile atu ha tangwa lia Sambata, chuma chize mangana-a-mayingeleja waze te keshi kulisa mu chihela cha atu, anyongene ngwo katambile kuchilinga. (Tanga Marku 3:1-6.) Musono, ngwe mutwe wa chikungulwila, Yesu machinunga ni kwalumuna nyonga lienyi. Ngwe chilweza, muze mandumbu amwe mu chikungulwila akulinga shili yinene, Yesu kakulihumikiza ni kwaha uhashi hanga alumune yitanga yo.—Uso. 2:2-5.

9. Kuchi mutuhasa kusolola ngwetu, twakwalumuna manyonga jetu? (Tala nawa yizulie.)

⁹ Kuchi mutuhasa kwimbulula Yehova? Chizechene ngwe Yehova, twatamba kupwa akwa-kulikehesa ni kusa tachi hanga twalumune manyonga jetu ni chize mutulinga yuma. (Tia. 3:17) Ngwe chilweza, yisemi waze akwalumuna manyonga jo, keshi kutayiza yuma yeswe yize ana jo akulinga, nawa keshi kushimbwila hanga ano alinge yuma yize ayo kechi kuhasa kulinga. Yakomba kali chilweza chipema ha chikuma chino, ngwe chize anamusolola ha lusango uli ha Uputukilo 33:12-14. Chikwo nawa, yisemi akwa-kulikehesa waze akwalumuna manyonga jo, keshi kutesa ana jo umwe ni mukwo. Makulwana no katamba kwalumuna manyonga jo. Ngwe chilweza, mukulwana wa mu chikungulwila katambile kulikwachilila ha manyonga jenyi, alioze katamba kukwasa chiyulo chize makulwana anji atayiza chinakatuka mu Mbimbiliya. (1 Timo. 3:2, 3) Chikwo nawa, yetu eswe mu chikungulwila twatamba kusa tachi hanga tuvumbike manyonga ja akwetu, chipwe ngwe manyonga jetu kalisa. (Roma 14:1) Umwenemwene uli ngwo, yetu eswe mu chikungulwila twatamba kusa tachi hanga ‘atu eswe akamone ngwo, yetu kutushi kulikwachilila ha manyonga jetu.’—Fwili. 4:5.

YEHOVA KALI MUKWA-KULIHUMIKIZA

10. Kuchi Yehova asolwele uhumikizo?

¹⁰ Kota kuunanyingika ngwe, atu akwa-kuzo keshi kuzanga kushimbwila. Kuzo yakwatwala hanga ahone kupwa akwa-kulihumikiza. Alioze Yehova kalisa. Iye kakulihumikiza chinji kuhiana mutu mweswawo. Ngwe chilweza, ha matangwa ja Noa, Yehova kambile ngwenyi, mukupalika miaka 120 mba anongese atu api. (Uputu. 6:3) Mumu lia chino, Noa kapwile ni mashimbu akulela anenyi, nawa ni ukwaso wa usoko wenyi, yatunga ulungu. Ha chisuho chikwo, Yehova yapanjika ni uhumikizo muze Apalahama amuhulile hakutwala ku unongeso wa Sondome ni Ngomora. Nyi Yehova kapwile mukwa-kuzo, kachi kambile ngwenyi, yena iya mba unguhule chocho? Alioze amu apwa mukwa-kulikehesa, Yehova yalihumikiza ni Apalahama.—Uputu. 18:20-33.

11. Ngwe chize anasolola ha mukanda 2 Petulu 3:9, mumu liaka Yehova ananungu ni kulihumikiza?

¹¹ Musono, Yehova kananungu ni kulikehesa ni kulihumikiza. Iye kanashimbwila tangwa lize atesele kuneha songo. Mba mumu liaka iye apwa mukwa-kulihumikiza? “Mumu kazangile mutu niumwe hanga atoke, alioze kanazange hanga eswe alikonyeke.” (Tanga 2 Petulu 3:9.) Shina kulihumikiza cha Yehova chili cha mokomoko? Ka. Tununu a tununu twa atu a mbunge yipema hakundama kuli iye ni kupwa masepa jenyi. Ni yetu tunashimbwila ngwetu, tununu twa atu akwo akudame kuli iye. Alioze kulihumikiza cha Yehova, chili ni haze chasulila. Yehova kakuzanga atu, alioze keshi kulengulula yuma yipi. Iye kechi kwecha hanga upi ununge ku miaka yeswe.—Haba. 2:3.

12. Kuchi Yesu akwimbulula kulihumikiza cha Yehova?

¹² Kuchi Yesu akwimbulula Tato? Ha miaka yinji, Yesu kakwimbulula kulihumikiza cha Yehova. Yesu kakumona chize Satana akuhanjika mahuza hali tuvumbi ashishika a Yehova. (Uputu. 3:4, 5; Yombi 1:11; Uso. 12:10) Yesu nawa kakumona chize atu anamono lamba linji hano hashi. Tunyongenu chize Yesu anazange kunongesa milimo ya Ndiapu. (1 Yoa. 3:8) Yika yakukwasa Yesu kulihumikiza ndo haze Yehova mamuhela chiyulo cha kunongesa liakulu milimo yeswe ya Satana? Chuma chimwe chili kulikehesa. Amu ali mukwa-kulikehesa, Yesu kakwecha yuma yeswe mu moko ja Yehova ni kushimbwila ngwo, Yehova mwe wika uli ni ulite wa kutesa shimbu lize yuma yino muyilingiwa.—Yili. 1:7.

13. Kuchi Yesu apwile ni kulihumikiza ni apostolo jenyi, nawa mumu liaka?

¹³ Muze Yesu apwile hano hashi, iye kasolwele kuli apostolo jenyi ngwo kali mukwa-kulihumikiza. Ngwe chilweza, muze apostolo apwile ni kuzwela hakutwala kuli yoze wapwile mulemu mukachi ko, Yesu te keshi kulivutula hanji kuhona kushimbwila. Shimbu achilinge, iye te kakununga ni kulihumikiza. (Luka 9:46; 22:24-27) Yesu kapwile ni shindakenyo ngwenyi, ha kupalika cha mashimbu apostolo te malilongesa kupwa akwa-kulikehesa. Shina ni yena hiunalingi kapalia yono mwene ha yisuho yinji? Nyi chenacho, kota wakusakwilila ha kupwa ni Mwanangana walihumikiza nawa mukwa-kulikehesa.

14. Kuchi mutuhasa kupwa akwa-kulihumikiza?

¹⁴ Kuchi mutuhasa kwimbulula Yehova? Mba tunyonge ni kulinga yuma ngwe Yehova, twatamba kupwa ni “kunyonga cha Kristu.” (1 Kori. 2:16) Kuchi mutuhasa kunyingika kanawa kunyonga cha Kristu? Chijimbikilo nichimwe kuchishiho. Mba tuchilinge, twatamba kutanga mikanda ya Evanjelu. Hanyima twatamba kupukuna ha yize mikanda yacho yakutulongesa hakutwala ku kunyonga cha Kristu. Chikwo nawa, twatamba kulemba kuli Yehova hanga atukwase kwimbulula kulikehesa ni kulihumikiza cha Yesu. Nyi mutulilongesa kunyonga cha Kristu, muchipwa chashi kwimbulula Yehova ha kulihumikiza ni yetu ene ni mandumbu jetu.—Mateu 18:26-30, 35.

YEHOVA KAKULEMESA CHINJI ATU WAZE ALIKEHESA

15. Hana chilweza chinasolola ngwo, Yehova kakuzanga akwa-kulikehesa. (Samu 138:6)

¹⁵ Tanga Samu 138:6. Tunyongenu Yehova Chitunda wa hashi heswe, malihulumba hali atu waze akulikehesa. Ha miaka yinji, Yehova kakutala hali atu waze keshi kwalemesa kuli akwo. Atu amwe, hanji kutwanyingikine kanawa. Alioze Yehova katumine hanga majina jo, aasoneke mu Mbimbiliya. Ngwe chilweza, Yehova katumine hanga Mose asoneke jina lia umwe pwo avuluka ngwo Debola. Iye kapwile ni kukalakala ni ushishiko weswe kuli asoko ja Izake ni Yakomba ngwe maseka, ha miaka 125. Yetu kutwanyingikine yuma yinji hakutwala kuli pwo yono washishika. Alioze Yehova katumine Mose hanga asoneke jina lia pwo yono ni kusolola chize apwile ni kumuzanga chinji. (Uputu. 24:59; 35:8) Ha kupalika cha miaka, Yehova yasakula umwe mukweze avuluka ngwo Ndawichi, yoze wapwile ni kufunga yimuna hanga apwe mwanangana wa mu Izalele. (2 Samue. 22:1, 36) Ha kupalika cha limwe shimbu muze Yesu asemukine, Yehova yatuma angelo hanga ahane sango kuli chimwe chizavu cha tufunga ni kwaha uhashi ngwe atu atangu waze anyingikine hakutwala ku kusemuka cha Mesaya mu Mbeteleme. (Luka 2:8-11) Muze Yosefwe ni Maria atwalile Yesu mu tembele, tushinakaji aali Simeone ni Ana yamona Yesu mwana wa Zambi. (Luka 2:25-30, 36-38) Chili chipema kunyingika ngwo, chipwe ngwe Yehova “kanangama, hindu kakutala hali akwa-kulikehesa.”

16. Kuchi Yesu embulwile Tato ha chize te akutwama ni atu?

¹⁶ Kuchi Yesu akwimbulula Tato? Chizechene ngwe Yehova, Yesu neye kakuzanga atu waze akulikehesa. Iye kalongesele umwenemwene hakutwala ku Wanangana wa Zambi kuli atu waze “kajamine ha kulilongesa.” (Yili. 4:13; Mateu 11:25) Iye nawa kaukile mieji. Kakachilingile wika hanga awuke misongo yo, alioze kachilingile mu yimwe jila yize yasolwele ngwo, kakwalemesa. (Luka 5:13) Ha ufuku muze te kanda achifwa, Yesu yakosa molu ja tumbaji twenyi, chuma chize apwile ni kulinga wika kuli ngamba ku zuwo. (Yoa. 13:5) Muze te kanda achiya mu malilu, Yesu yahana kuli tumbaji twenyi kuchingako yetu, umwe mulimo ulemu chinji, wa kukwasa atu hanga akalilamwine.—Mateu 28:19, 20.

17. Kuchi mutuhasa kulemesa akwetu? (Tala nawa chizulie.)

¹⁷ Kuchi mutuhasa kwimbulula Yehova? Twakulemesa atu, ha kulianyina no sango jipema ja wanangana chipwe ngwe kali a ku chihela cheswacho, kakwete chikowa chalisa, kalilongesele chinji hanji ka. Twakulemesa mandumbu jetu a malunga ni a mapwo, ha kwamona ngwo katuhiana chipwe ngwe tukwete utotombo weswawo hanji tuli ni chimwe chiteli chize ayo keshi nacho. (Fwili. 2:3) Yehova kakuwahilila muze twakupwa akwa-kulikehesa, ha kulianga kumona akwetu ngwo katuhiana.—Roma 12:10; Zefa. 3:12.

18. Kuchi unazange kwimbulula kulikehesa cha Yehova?

¹⁸ Muze twakusa tachi hanga twimbulule Tata yetu wa mu malilu, twakupwa atu ashi, twakwalumuna manyonga jetu, nawa twakupwa akwa-kulihumikiza. Chikwo nawa, chizechene ngwe Yehova, twakulemesa atu waze akulikehesa. Nyi twasa tachi hanga twimbulule kulikehesa cha Yehova, mutupwa atu alemu kumeso jenyi.—Iza. 43:4.