Tushinakaji Yenu Nuli Alemu Chinji mu Chikungulwila

Muchihasa kupwa nawa ngwe, kuushi kunyanga ha kulinga yuma ngwe chize wapwile kulinga mumu lia ushinakaji. Chikwo nawa, chipwe ngwe wakulingila Yehova ha miaka yinji, hanji muhasa kulivwa chipi mumu lia kuhona kulinga yuma ngwe chize wapwile ni kuyilinga. Ngwe chilweza, hanji wakutesa yuma yize wapwile ni kulinga kunyima ni yize unalingi haliapwila. Nyi chenacho, yika muyihasa kukukwasa kuwahilila?

YIZE YEHOVA ANAZANGE HANGA ULINGE

Lihule ngwe: ‘Yika Yehova anashimbwila hali yami?’ Muhasa kuwana utakamiso ha maliji ali ha Shimbi Yamuchiali 6:5 anambe ngwo: “Nwatamba kuzanga Yehova Zambi yenu ni mbunge yenu yeswe ni mwono wenu weswe ni tachi jenu jeswe.”

Kulita ni versu yino, Yehova kanashimbwila hanga umuwayile ni mbunge yeswe ni mwono weswe ni tachi jeswe. Chikuma chino, muchikukwasa hanga uhone kulitesa ni akwenu hanji kutesa yize wakulinga haliapwila ni yize wapwile ni kulinga kunyima.

Uchinyonga ha chino: Muze wapwile mukweze, yika wapwile ni kuhana kuli Yehova? Atu ja Yehova anji mahasa kwamba ngwo, kapwile ni kumwaha yuma yeswe yipema. Kashika, muze wapwile mukweze kota wahanyine kuli Yehova yuma yipema yize wapwile ni kuhasa kulinga. Alioze yuma yalumuka. Yika muhasa kuhana kuli Yehova haliapwila? Kwamba pundu, yuma yipema yize muhasa kuhana kuli Yehova, yili yize muyilita ni uhashi we haliapwila. Nyi wamwena yuma mu jila yino, chino muchikukwasa kumona ngwe, muchinunga ni kuhana yuma yipema kuli Yehova ngwe chize wapwile ni kulinga kunyima.

YUMA YIZE WAPALIKA KU MWONO MUYIHA KUKWASA AKWENU

Chikuma chikwo chili: Shimbu unyonge ha yuma yize kuuchi kuhasa kulinga, nyonga ha uhashi uze uli nawo wa kukwasa akwenu ni yinyingi ya ushinakaji we. Ngwe Mukwa-Kristu kashinakaji, yena muhasa kulinga yuma yize kuwakahashile kulinga ku ukweze we. Ngwe chilweza, muhasa kulinga yuma yino:

Lweza akwenu lusango we wa ku mwono. Nyonga ha yize Mbimbiliya yakwamba ha versu jino:

Mwanangana Ndawichi: “Napwile mukweze, haliapwila nguli mukulwana, hindu chamwene mukwa ululi kanamwehuka, hanji munyachi wenyi muufupafupa ya kulia.”—Samu 37:25.

Yoshua: “Talenu! Kwasala hakehe hanga ngufwe, alioze nunanyingika kanawa ni mbunge yenu yeswe, ni mwono wenu weswe ngwenu, nilimwe liji lia ku yilakenyo yeswe yipema yize Yehova Zambi yenu anulakenyene liahona liakuhi. Yeswe yamanunuka kuli yenu, nichimwe kuchahonene.”—Yoshu. 23:14.

Hanji ni yena che wakunyonga. Yize Ndawichi ni Yoshua ambile, yili ni ulemu unji mumu ayo eswe kahanjikile ha yuma yize apalikile ku mwono wo. Tuvumbi wano a Yehova ashishika, kahanjikile yuma yize apalikile, yize amwene ni yize avwile ha miaka yinji, kashika yilweza yo muyihasa kukukwasa.

Nyi ngwe wakuwayila Yehova ha miaka yinji, muhasa kuhanjika ha yuma yize Yehova akulingilile ni yize alingilile akwenu. Shina uneuluka kama amwe mashimbu waze Yehova awahishile atu jenyi mu yimwe jila yalipwila? Muhasa kulweza akwenu hakutwala ku mashimbu jacho. Chino nawa muchihasa kukukwasa kwiuluka mashimbu jacho apema waze wapalikile ku mwono we. Pundu lume, yena muhasa kutakamisa mandumbu jetu a malunga ni a mapwo ha kwalweza lusango we wa ku mwono.—Roma 1:11, 12.

Jila yikwo yize muhasa kutakamishinamo mandumbu je, yili kupwa ha kukunguluka. Kupwa ha kukunguluka, muchihasa kukutakamisa ni kutakamisa mandumbu. Connie, yoze twatongola helu yamba ngwenyi: “Kupwa ha kukunguluka chakungukwasa nguhone kunenganyana mumu lia zango lize mandumbu akungusolwela. Nakweseka kusolola usakwililo wami kuli akwetu ha kwaha yimwe yawana. Chikwo nawa, nakusa tachi hanga ngununge kupwa hamwe ni mandumbu jami a malunga ni ma mapwo.

YEHOVA KAKULEMESA YESWE YIZE WAKUMULINGILA

Mu Mbimbiliya, muli yilweza yinji ya atu waze Yehova te akuzanga chipwe ngwe ayo te keshi kuhasa kumulingila ngwe chize apwile ni kulinga. Tunyongenu ha chilweza cha kashinakaji wa mu Izalele Semone, yoze wapwileko ha mashimbu waze Yesu asemukine. Muze apwile ni kuya ku tembele, iye kapwile ni kumona akweze waze te akulinga milimo yilemu. Iye kota kapwile ni kunyonga ngwenyi, keshi nawa ni ulemu kuli Yehova mumu keshi kuhasa kumulingila ngwe chize akweze apwile ni kulinga. Alioze, Yehova te kakumwena yuma mu jila yeka. Iye kapwile ni kumona Semone ngwe “lunga mukwa-ululi, mukwa-kuvwila Zambi woma” ni kumuwahisa ni chiwape cha kumona Yesu muze apwile mwana-kemba. Kupalikila muli Semone, Yehova nawa yasolola ngwo, Yesu mwe makapwa Mesaya. (Luka 2:25-35) Pundu lume, Yehova kakamwene wika ushinakaji wa Semone, alioze iye te kakumumona ngwe lunga yoze uli ni ufulielo ukolo yoze nawa wapwile ni “spiritu yisandu.”

Ni yena muhasa kupwa ni shindakenyo ngwe, Yehova kakulemesa ushishiko we mu mulimo wenyi, chipwe ngwe haliapwila kushi kuhasa kumulingila ngwe chize wapwile ni kulinga. Mumu liaka? Mumu iye ‘kakutayiza chawana kulita ni chize mutu alinacho, hi kulita ko ni chize keshi nacho.’—2 Kori. 8:12.

Kashika, lihulikile wika ha yize muhasa kulinga. Ngwe chilweza, nyonga ha yimwe jila yakwambulwilamo yize muyikukwasa kwambujola chipwe ha shimbu likehe wika. Muhasa nawa kutakamisa umwe ndumbu ha kumusanyika ku telefone chipwe kumusonekena mukanda. Nyingika ngwe, yuma yikehe-yikehe muyihasa kutakamisa mandumbu je, chipi-chipi nyi ngwe yinakatuka kuli kavumbi ka Yehova yoze wamulingila ha miaka yinji.

Amwe kakupinda ni misongo. Tala chilweza cha ku África Oriental mu mushete, “Mbimbiliya yalamwinyine mwono wenyi.”

Iwuluka ngwe, chilweza che cha kulingila Yehova ha miaka yinji ni kununga kumulingila ni ushishiko, muchihasa kutakamisa mandumbu je. Yena uli chilweza chipema cha kunyongonona, nawa muhasa kupwa ni shindakenyo ngwe, ‘Zambi kechi keza kavulama mulimo we ni zango lize wamusolwelele ha jina lienyi ha kulingila asandu ni kununga ni kwalingila.’—Hepre. 6:10.

NUNGA NI KUKWASA AKWENU

Akwa-kuhengwola kakwamba ngwo, tushinakaji anji a malunga ni a mapwo waze akukwasa akwo, kali ni mijimba yipema, kakunyonga ni kawashi, nawa kakutwama miaka yinji.

Ewa, kulingila akwetu yuma yipema, kuchishi kuchiza kapinda mweswe wa ushinakaji. Wanangana wa Zambi we wika muukachiza kufwa ni uhenge uze wakutwala hanga atu ashinakaje.—Roma 5:12.

Alioze chipwe haliapwila, linga yize Yehova akukwita hanga ulinge. Yino yinachingi kukwasa atu anyingike Yehova ni kukundama kuli iye. Kulinga chino, muchikolesa kutalatala che nawa chino muchiyukisa mujimba we. Tushinakaji, nyingikenu ngwenu, Yehova kakulemesa yize nwakumulingila mu mulimo wenyi, nawa mandumbu mu chikungulwila kakutakama chinji ha chilweza chenu chipema.