Tusakwililenu Yehova Mwe Tengi Yetu

1. Mumu liaka Yehova kali Tengi munene?

HA Kakweji wa Novembro wa mwaka 2010, chimwe chikwachilo cha uma, cha mu China kachilanjishile mu ndando ya 70 a tununu twa dolar mu Inglaterra. Chili kukomoka ha kunyingika ngwetu, tengi mahasa kuumba chimwe chuma changwaza ni ulopa chize muchipema ni kufwika ndando yinji. Yehova tengi yetu, kali tengi munene chinji kuhiana tengi eswe a atu. Mbimbiliya yinambe ngwo, Yehova kalingile mutu mungunu “ku fufuta ya mavu,” che kwamba ku ulopa. (Uputukilo 2:7) Chocho Alama yapwa “mwana Zambi” mumu kamulingile ni uhashi wa kwimbulula yitanga ya Zambi.—Luka 3:38.

2, 3. Kuchi mutuhasa kwimbulula yitanga ya A-Izalele waze alikonyekenene?

² Muze Alama avulumwine kuli Sakatanga wenyi, ha chino iye yalituna kupwa mwana wa Zambi. Alioze ana anji a Alama kakusakula Yehova ngwe Mwata wo. (A-Hepreu 12:1) Ha kulipalumwisa ene kuli Sakatanga wo, kakusolola ngwo kakuzanga hanga Zambi apwe Tato nawa Tengi yo, hi Satana ko. (Yoano 8:44) Ushishiko wo kuli Zambi wakutwiwulwisa yize A-Izalele waze alikonyekenene ambile, ngwo: “Yehova, nuli Tata. Etu tuli uma, enu nuli tengi. Etu eswe tuli chitanga cha moko jenu.”—Izaia 64:8.

³ Tuvumbi amwenemwene a Yehova musono no kakusa tachi hanga alipalumwise ni kumwononokena. Ayo kakumona ngwo chili chilemu chinji kuvuluka Yehova ngwo Tato, nawa kanazange hanga iye apwe Tengi yo. Shina tunazange kupwa ulopa wazeya uze Zambi mahasa kuumba hanga alinge chimwe chikwachilo cha uma chipema? Kutala twakumona mandumbu ni mapangi jetu ngwe atu waze machinunga ni kwaafumba kuli Zambi? Mba atukwase hanga tupwe ni nyonga lipema, mutushimutwina chize Yehova akusakula atu waze iye mafumba, mumu liaka iye akwaafumba ni chize iye akuchilinga.

YEHOVA KAKUSAKULA ATU WAZE IYE AKUFUMBA

4. Kuchi Yehova akusakula atu waze akukundama kuli iye? Hana chilweza.

⁴ Yehova keshi kumona atu ngwe chize yetu twakwaamona. Alioze, iye kakuhengula mu mbunge ni kunyingika chize yetu twapwa. (Tanga 1 Samuele 16:7b.) Yehova kachisolwele muze aputukile chikungulwila cha akwa-Kristu. Iye ni Mwanenyi, kasakwile atu anji waze amwe akuli ayo mahasa kwaamona ngwe keshi ni ulemu. (Yoano 6:44) Chakutalilaho, umwe wa kuli atu jacho kapwile Ka-Fariseu yoze te avuluka ngwo Saulu, yoze wapwile, “mukwa kushililika Zambi, mukwa kuhungumiona, mukwa kupopolola.” (1 Timoteu 1:13) Chipwe chocho, Yehova kahengwile mbunge ya Saulu, alioze iye kakamumwene ngwe uma uze kuushi ni ulemu. (Yishima 17:3) Alioze, Yehova kamwene ngwenyi, mahasa kwalumuna yitanga ya Saulu hanga apwe ‘chikwachilo chize atongwele’ yoze te mambujola kuli “mavungu, ni mianangana, ni ana a Izalele.” (Yilinga 9:15) Yehova nawa hanasakula atu akwo waze iye mahasa kufumba hanga apwe ‘chimwe chikwachilo chilemu,’ ngwe yizengi, akwa-kulinga utanji, ni eji. (A-Roma 9:21; 1 A-Korindu 6:9-11) Muze o akulilongesa Mbimbiliya, kakukolesa ufulielo wo muli Yehova nawa kakwecha hanga aafumbe.

5, 6. Kuchi ufulielo wetu muli Yehova ngwe Tengi yetu uli ni ulemu ha yize twakunyonga hali (a) atu mu sango lipema? (b) mandumbu ni mapangi jetu?

⁵ Tunafuliela ngwetu, Yehova kali ni uhashi wa kusakula ni kukundama kuli atu waze akwete yitanga yalita. Kashika kutwatambile kusopesa akwetu muze mutuya mu sango lipema chipwe mu chikungulwila chetu. Chakutalilaho, achitala chize umwe lunga avuluka ngwo, Michael alingile muze Yela ja Yehova amumenekene. Yamba ngwenyi: “Te nakwomba nyima Yela ja Yehova ni kwaalengulula ngwe katwamineko. Te chishi kwaazanga! Alioze kulutwe lia matangwa, yuma yiyalumuka, yingunyingika amwe asoko waze te nakukomoka chinji ha mukunda wa yitanga yo yipema. Alioze limwe tangwa yingukomoka chinji ha kunyingika ngwami, o kali Yela ja Yehova! Yitanga yo yangulingishile hanga ngwalumune ndako jami. Mba yingumona ngwami napwile ni kwaanyongena chipi hakuhona kwaanyingika ni yuma ya mahuza yize napwile ni kwivwa.” Micheal yafupa kwaanyingika kanawa ha chino yatayiza longeso lia Mbimbiliya. Kulutwe lia matangwa yamupapachisa ni kunjila mu mulimo wa shimbu-lieswe.

⁶ Muze mutunyingika Yehova ngwe Tengi yetu, yitanga yetu hakutwala kuli mandumbu ni mapangi jetu yakwalumuka. Mutupwa ni kwaamona ngwe atu ananungu ni kwaafumba. Che chize Yehova akwamona. Iye kakumona yize yatwama mu ma mbunge jo nawa kananyingika ngwenyi, uhenge wo uli wa mashimbu akehe. Iye nawa kananyingika chize mutu ni mutu mahasa kupwa kulutwe lia matangwa. (Samu 130:3) Mutuhasa kwimbulula Yehova nyi twapwa ni manyonga apema ngwe aiye hakutwala kuli mandumbu jetu. Mutuhasa kukalakala hamuwika ni Tengi yetu hanga tukwase mandumbu ni mapangi hanga akole mu ufulielo. (1 A-Tesalonika 5:14, 15) Makulwana mu chikungulwila katamba kupwa yilweza yipema ha chikuma chacho.—A-Efwesu 4:8, 11-13.

MUMU LIAKA YEHOVA AKUTUFUMBA?

7. Mumu liaka wazanga fumbo lia Yehova?

⁷ Atu amwe mahasa kwamba ngwo: ‘Ami te kuchishi kulemesa fumbo lize yisemi jami te akungwaha, ndo muze napwile ni ana jami.’ Alioze, muze tunakola mutuhasa kulemesa fumbo, mumu tunanyingika ngwetu fumbo yili yimwe jila yakusolwelamo zango. (Tanga A-Hepreu 12:5, 6, 11.) Ewa, Yehova kakutuzanga ngwe ana jenyi, kashika akutufumba hanji kutukwasa kwalumuna yitanga yetu ni uhomboloji weswe. Iye kanazange hanga tupwe ni mana, ni chiseke ni kumuzanga ngwe Tata yetu. (Yishima 23:15) Yehova keshi kuzanga hanga tumone lamba, chipwe kufwa chakuhona kulikonyeka.—A-Efwesu 2:2, 3.

8, 9. Kuchi Yehova akutulongesa musono, nawa kuchi malongeso jacho manunga ndo kulutwe lia matangwa?

⁸ Shimbu te kanda tuchinyingika Yehova, kota twapwile ni yitanga yipi. Alioze Yehova yatufumba ni kutukwasa kwalumuna yitanga yetu, ha chino, yitupwa ni yitanga yipema. (Izaia 11:6-8; A-Kolosu 3:9, 10) Tuli mu paraisu ya ku spiritu. Chili chimwe chihela chipema chize Yehova anatululiekela ha matangwa jetu hanga atufumbe. Mu paraisu yacho twakuwanamo ufunge ni ukulungunga chipwe ngwe hano hashi ha too ni upi. Waze akolele mu usoko muze te kumushi zango, haliapwila kakwaasolwela zango liamwenemwene kuli mandumbu ni mapangi jo amu paraisu ya ku spiritu. (Yoano 13:35) Nawa hitunalilongesa kusolola zango hali akwetu. Alioze kuhiana yino yeswe, hitwanyingika Yehova nawa haliapwila tunatambula zango lienyi lia utata.—Tiangu 4:8.

⁹ Mu chifuchi chaha mutukayuka chinji ku paraisu ya ku spiritu. Mutukawahilila nawa ni mwono mu paraisu yize makayula ku Wanangana wa Zambi. Ha mashimbu jacho, Yehova makanunga ni kutufumba hamwe ni kutulongesa mujila yize tuchi kuhasa kunyonga kanawa haliapwila. (Izaia 11:9) Yehova nawa makapemesa manyonga ni mijimba yetu hanga yipwe yingunu. Chino muchikatukwasa kunyingika ni kwononokena shimbi jenyi ni mbunge yeswe. Kashika tunungenu ni kwecha hanga Yehova atufumbe, nawa tusololenu kuli iye ngwetu twakulemesa mutapu uno wa zango lienyi hali yetu.—Yishima 3:11, 12.

CHIZE YEHOVA AKUTUFUMBA

10. Kuchi Yesu embulwile uhomboloji ni utotombo wa Tengi Munene?

¹⁰ Ngwe chize tengi yoze ukwete utotombo unji ananyingika mutapu wa ulopa uze maumba, Tengi yetu Yehova, neye kanatunyingika kanawa. Iye kananyingika uhenge ni uhashi wetu ni chize mutukola ku ufulielo, nawa kakufumba kulita ni chize mutu ni mutu apwa. (Tanga Samu 103:10-14.) Mutuhasa kunyingika chize Yehova akutumona ha kuhengula chize Yesu apwile ni kunyonga ha uhenge wa apostolo jenyi. Ha mashimbu amwe, apostolo te kakuzwela ha chikuma cha iya yoze te mulemu ha kachi ko. Nyi wapwileho, kachi kuchi wamwene yitanga ya apostolo? Kota kachi wanyongene ngwo o hi ulopa wazeya ko. Yesu kanyingikine ngwenyi, te maafumba nyi mapanjika chiyulo chenyi chipema nawa cha uhomboloji nawa nyi te membulula kulikehesa chenyi. (Marku 9:33-37; 10:37, 41-45; Luka 22:24-27) Muze Yesu amuhindwishile, apostolo jenyi yatambula spiritu ya Zambi hi kalihulikile nawa hakunyingika yoze te mulemu. Alioze yalihulikila mu mulimo uze Yesu ehele.—Yilinga 5:42.

11. Mu majila aka waze Ndawichi asolwele ngwenyi kali ulopa wazeya, nawa kuchi mutuhasa kumwimbulula?

¹¹ Musono, Yehova kanazachisa Mbimbiliya, spiritu yenyi yisandu ni chikungulwila hanga atufumbe. Kuchi Mbimbiliya muyihasa kutufumba? Twatamba kuyitanga ni kupukuna ha yize tunatange ni kwita ukwaso kuli Yehova hanga tukaule yuma yize tunalilongesa. Mwanangana Ndawichi yasoneka ngwenyi: “Mungukwiwuluka ha muhela wami ni kupukuna yuma ya yena hakachi ka ufuku.” (Samu 63:6) Aye yasoneka nawa ngwenyi: “Mungusakwilila Yehova, yoze hanangulongesa mana: Chipwe ha ufuku mbunge yami kuyakufumbuka.” (Samu 16:7) Chochene, Ndawichi kapukunwine ha chiyulo cha Yehova ni kwecha hanga chiyulo chacho chifumbe mbunge ni kunyonga chenyi, chipwe muze te chakupwa chikalu kuchitayiza. (2 Samuele 12:1-13) Ndawichi hanatuhichikila chilweza chipema cha kulikehesa ni kwononoka. Kashika, achilihule ngwe: ‘Muze nakutanga Mbimbiliya, shina nakupukuna ha yize ngunatange ni kwecha chiyulo cha Zambi hanga chihete ku mbunge ni ku manyonga jami? Shina munguhasa nawa kuchilinga chinji?’—Samu 1:2, 3.

12, 13. Kuchi Yehova akutufumba kupalikila mu spiritu yisandu ni mu chikungulwila cha akwa-Kristu?

¹² Spiritu yisandu muyihasa kutufumba mu majila anji. Chakutalilaho, muyihasa kutukwasa hanga twimbulule utu wa Yesu, ni kusolola yitanga yeka ni yeka ya muhuko wa spiritu. (A-Ngalishia 5:22, 23) Chitanga chimwe cha ku muhuko wacho chili zango. Twakuzanga Zambi nawa tunazange kumwononokena ni kutufumba kuli iye mumu tunanyingika ngwetu, shimbi jenyi jili jipema ku mwono wetu. Chikwo nawa, spiritu yisandu muyihasa kututakamisa hanga twehuke yitanga yipi ya hano hashi. (A-Efwesu 2:2) Muze postolo Paulu apwile mukweze, te kakukaula yitanga yakulizata ya mangana a ulembelo wa A-Yunda. Alioze spiritu yisandu yamukwashile hanga alumune yitanga yenyi. Kulutwe lia matangwa yasoneka ngwenyi: “Kunahasa kulinga yuma yeswe muli yoze” wakungwaha tachi. (A-Fwilipu 4:13) Ni yetu twatamba kwita spiritu yisandu, ni kunyingika ngwetu, Yehova makumbulula yilemba yetu ya ku mbunge.—Samu 10:17.

¹³ Yehova nawa kakuzachisa chikungulwila ni makulwana hanga atufumbe. Chakutalilaho, nyi makulwana amu chikungulwila mamona ngwo tuli ni umwe ulelu, ayo mahasa kutukwasa. Ha chino, o keshi kuhana yiyulo yize yakukatuka mu manyonga jo. (A-Ngalishia 6:1) Alioze kakulemba kuli Yehova ni kulikehesa cheswe hanga apwe ni chinyingi hamwe ni malinjekela. Chocho, o kakuhengula Mbimbiliya ni mikanda yetu hanga awane sango jize mujitukwasa ku mwono. Nyi makulwana meza ni kukwaha chiyulo cha zango, ngwe hakutwala ha chize wakuzala, watamba kwiwuluka ngwe, chiyulo chacho chinasolola zango lia Zambi hali yena. Nyi wakaula chiyulo chacho, muupwa ngwe ulopa wazeya uze Yehova mahasa kuumba, nawa muyuka chinji.

14. Chipwe ngwe Yehova kali ni chiyulo ha ulopa, nihindu kuchi aye akusolola vumbi ha chawana chetu cha kusakula chipi ni chipema?

¹⁴ Nyi twanyingika chize Yehova akutufumba, chino muchitukwasa kupwa ni usendo upema ni mandumbu ni mapangi jetu. Nawa, mutupwa ni manyonga apema hali atu mu sango lipema ni hali alongi jetu a Mbimbiliya. Ku mashimbu waze asonekene Mbimbiliya, tengi mba aumbe ulopa, iye te kakuululieka kanawa ha kuchiza mawe ni yimwe yuma yikwo. Tengi Munene, Yehova kakukwasa atu waze akuzanga hanga iye aafumbe. Aye keshi kwaashinjila hanga alumune yitanga yo, alioze iye kakwaasolwela shimbi jenyi jipema. Mba hi ene masakula nyi malumuna yimwe yitanga yize yinafupiwa kwalumuna ku mwono wo.

15, 16. Kuchi alongi a Mbimbiliya akusolola ngwo kanazange hanga Yehova afumbe? Hana chilweza.

¹⁵ Tala yize yalingiwile kuli pangi Tessie, mu Austrália. Chapwile chashi kuli iye kulilongesa yize Mbimbiliya yakwamba. Alioze aye kakakolele chinji mu ufulielo nawa te keshi kuya ku kukunguluka. Pangi yoze te wakulilongesa nenyi yalemba kuli Yehova ni kukwata chiyulo hanga eche kulilongesa nenyi. Alioze chimwe chuma chipema yichilingiwa. Muze te analilongesa, Tessie yalweza longeshi wenyi mumu liaka te keshi kukola mu ufulielo. Aye yamba ngwenyi te kakulimona ngwe mukwa-saki mumu te kakulinga yuma kutenga ni kakuzanga kuheha yiheho ya mbongo. Alioze haliapwila, hanalitwamina kuheha yiheho yacho.

¹⁶ Ha kupalika cha mashimbu, Tessie yaputuka kuya ku kukunguluka ni kusolola yitanga ya akwa-Kristu chipwe ngwe te kakumuhungumiona kuli masepa jenyi atangu. Kulutwe lia matangwa, Tessie yamupapachisa nawa yapwa pionelu wa shimbu lieswe chipwe muze te ali ni ana kemba. Chino chinasolola ngwo, nyi alongi a Mbimbiliya aputuka kwalumuna mwono wo hanga evwise Zambi kuwaha, iye kakukundama kuli ayo, nawa kakwaapwisa yikwachilo yilemu.

17. (a) Yika wakuzanga chinji ha kupwa ni Yehova ngwe Tengi ye? (b) Yikuma yika yakufumba nayo yize mutulilongesa mu mutwe uze muusulaho?

¹⁷ Musono, amwe tengi machinunga ni kuumba kanawa ulopa ni kuulinga yikwachilo yipema. Chezechene nawa, ni Yehova neye ni uhomboloji weswe kakutufumba hakutwaha chiyulo chenyi, nawa kakutuhengwola kanawa ni kutala chize mutupwa. (Tanga Samu 32:8.) Shina yena muhasa kumona chize Yehova akukuzanga? Kutala yena wakumona chize Yehova akukufumba ni zango lieswe? Nyi chenacho, yitanga yika muyikukwasa kununga ni kupwa ngwe ulopa wazeya uze Yehova mahasa kuumba hanji kufumba? Yuma yika watamba kwehuka hanga uchine kupwa ngwe ulopa womu uze wapwa ukalu kuumba? Kuchi yisemi mahasa kukalakala hamwe ni Yehova hanga afumbe ana jo? Mutwe uze muusulaho muukumbulula yihula yino.