Twimbenu ni Chiseke!
“Chinapeme kwimbila uhaliso Zambi yetu.”—SAMU 147:1.
1. Yika kwimba muchitukwasa kulinga?
UMWE njimba waya lufuma yamba ngwenyi: “Maliji kakuneha amwe manyonga muli mutu. Kwimba chakuvwisa mutu kuwaha ku mbunge. Alioze mwaso wakulingisa mutu evwe yize anembi.” Miaso yetu yinasolola uhaliso ni zango lia Tata yetu wa mwilu, Yehova. Yakutukwasa tukundame kuli iye. Yeyize kwimba miaso chikwete ulemu unji mu uwayilo wamwenemwene, chipwe mutwimba ukawetu hanji hamwe ni mandumbu jetu.
2, 3. (a) Kuchi amwe mahasa kwivwa ha kwimba ni liji mwilu mu chikungulwila? (b) Yihula yika mutukumbulula ha mutwe uno?
2 Kuchi wakwivwa ha kwimba ni liji mwilu mu chikungulwila? Shina wakwivwa sonyi? Ku minyachi yimwe malunga keshi kulivwa kanawa ha kwimba mukachi lia akwo. Ndako yino muyihasa kuneha nyonga lipi mu chikungulwila cheswe, chipi-chipi nyi makulwana amu chikungulwila mevwa sonyi ja kwimba hanji kulinga milimo yeka muze chikungulwila chinembi.—Samu 30:12.
3 Kwimba chakulinga chihanda mu uwayilo wetu kuli Yehova. Kashika kutwatambile kwendangana ha mashimbu waze tunembi mu chikungulwila hanji kuhona kupwa ha chihanda chino chilemu cha uwayilo wetu. Hachino, twatamba kulihula ngwetu: ‘Kuchi nakwivwa muze twakwimba ha kukunguluka chetu? Yika munguhasa kulinga ni nakwivwa sonyi jakwimba ha mbunga? Nawa kuchi munguhasa kwimba miaso ya Wanangana ni chiseke?’
KWIMBA CHIKWETE ULEMU MU UWAYILO WAMWENEMWENE
4, 5. Mu Izalele ya ku shakulu kwimba mu tembele kuchi achiluliekele?
4 Chize ku shakulu, tuvumbi a Yehova kakuzachisa miaso hanga amuhalise. Chokuwaha hakunyingika ngwo, A-Izalele muze te akushishika kuli Yehova, kwimba chapwile ni ulemu unji mu uwayilo wo. Chakutalilaho, muze Ndawichi aluliekele yimwe hakutwala ku tembele, iye yalulieka A-Levi 4,000 hanga ahalise Yehova ni miaso. Hakachi ka wano, ‘waze alongolokele ni kwimbila kanawa Yehova; kapwile 288.’—1 Sango ja Mianangana 23:5; 25:7.
5 Miaso ni kwimba yapwile nawa ni ulemu hakukunjika tembele kuli Zambi. Mbimbiliya yinatulweza ngwo: “Muze akwa yitavwi ni njimba apwile ngwe mutu umuwika nikuhana liji limuwika lia kuhalisa ni kusakwila Yehova, ni muze liji lio liahiohiele hamwe ni yitavwi, ni sembalu, ni yisaji hakuhalisa Yehova, . . . uhenya wa Yehova wazalishile zuwo lia Zambi.” Kwamba pundu, chino chakolesele chinji ufulielo wa A-Izalele!—2 Sango ja Mianangana 5:13, 14; 7:6.
6. Ululikiso uka wa miaso ni kwimba uze alingile Nehemia muze te ali nguvulu mu Yerusaleme?
6 Nehemia, yoze waluliekele A-Izalele hanga atungulule yipanga ya tembele, kaluliekele nawa A-Levi hanga embe miaso ni tulialia. Yino yanehene chiseke chinji ha tangwa liacho lia kukunjika yipanga kuli Zambi. Nehemia yasakula ‘yizavu yaali ya akwa-kusakwila.’ Njimba jacho yajinga helu lia yipanga ya mbonge, akwo yaya sali likwo chocho yalitakanyina ha chipanga chize chapwile hakamwihi ni tembele. Kuhiohia cho achivwile kuli atu kusuku. (Nehemia 12:27, 28, 31, 38, 40, 43) Mutuhasa kwamba pundu ngwetu, Yehova kevwile kuwaha ha kumona tuvumbi jenyi mamwimbila miaso ya uhaliso ni chiseke cheswe.
7. Kuchi Yesu asolwele ngwenyi kwimba te muchipwa ni ulemu mu uwayilo wa akwa-Kristu?
7 Ha matangwa ja Yesu, nihindu miaso te yikwete ulemu mu uwayilo wamwenemwene. Achinyonga ha yize yalingiwile ha ufuku uze alingile chiwanyino chilemu mu mwono wa atu. Muze Yesu halinga Chiwanyino cha Mwene cha Ufuku ni tumbaji jenyi, ayo eswe yemba miaso ya kuhalisa nayo Yehova.—Tanga Mateu 26:30.
8. Kuchi akwa-Kristu atangu ahichikile chilweza cha kuhalisa Zambi ni miaso?
8 Akwa-Kristu atangu kahichikile chilweza chipema cha kuhalisa Zambi ni miaso. Kulisa ni A-Izalele waze te akuya ni kuwayila Yehova mu tembele, akwa-Kristu wano te kakulikungulula ku mazuwo jo. Chipwe ngwe mazuwo jacho kakapwile apema ngwe tembele, nihindu mandumbu te kakwimba ni chiseke. Kashika postolo Paulu alwezele mandumbu jenyi akwa-Kristu ngwenyi: “Nulilongese, nikulishinjila umwe ni mukwo mu masamu, ni miaso, ni mimbo ya uspiritu. Imbenu ni vumbi mu mbunge jenu kuli Zambi.” (A-Kolosu 3:16) Miaso ya mukanda wetu wa miaso, twatamba kuyimba “ni vumbi mu mbunge.” Miaso yino yinalingi chihanda cha ‘kulia cha ha mwaka walita’ chize akutwaha kuli ‘ndungo wamwenemwene, wakanyama.’—Mateu 24:45.
KUCHI MUHASA KULULIEKA KWIMBA CHE?
9. (a) Mumu liaka amwe akwivwa sonyi ja kwimba ni liji mwilu muze twakulikungulula? (b) Kuchi twatamba kuhalisa Yehova ni miaso, nawa aya atamba kuchisongwela? (Tala chizulie ha uputukilo.)
9 Yika yakukuvwisa sonyi ja kwimba? Hanji munyachi chipwe asoko jenu keshi kuzanga kwimba. Nyi hanji wakulitesa ni njimba waze wakutala ha chisaji ni ha TV, waze akwimba kanawa, chino kota che chakukuvwisa sonyi ja kwimba. Alioze yetweswe tukwete chiteli cha kuhalisa Yehova ni miaso. Kashika zundula mukanda we wa miaso, hetula mutwe, nawa emba ni chiseke! (Ezera 3:11; tanga Samu 147:1.) Mu mazuwo anji a Wanangana musono, muliali ma tela waze akusolola maliji a miaso, chino muchihasa kutukwasa twimbe ni liji mwilu. Chikwo nawa kwimba miaso ya Wanangana musono, hachisa ha katalilo wa Shikola ya makulwana amu chikungulwila. Chino chinasolola ulemu wa makulwana kusongwela kwimba ha kukunguluka mu chikungulwila.
10. Yika twatamba kwiwuluka ni tunevu woma wa kwimba ni liji mwilu?
10 Atu anji kakwivwa woma wa kwimba ni liji mwilu, mumu kakunyonga ngwo kanembe mwilu chinji hanji ngwo keshi ni liji lipema. Nyi chenacho, tunyongenu hachino. Muze twakuhanjika “yetu eswe twakutalinga mu yuma yinji,” alioze yino kuyishi kutukinda kuhanjika. (Tiangu 3:2) Kashika kutwatambile kweche kwimbila Yehova miaso ya uhaliso mumu ngwo kutushi ni liji lipema!
11, 12. Kuchi mutuhasa kululieka kwimba chetu?
11 Mutuhasa kwivwa woma wa kwimba mumu kutushi kunyingika chize mutwimba. Alioze kuli yimwe yuma yize muyihasa kutukwasa kululieka kwimba chetu.a—Tala maliji mushi lia lifwo.
12 Muhasa kwimba chikolo ni liji mwilu ha kunyingika kuhwima kanawa. Ngwe chize kahia kazembwe kakutemuna ndeya, kuhwima muchilulieka liji lie muze unahanjika hanji unembi. Nyi wakuhanjika ni liji mwilu che watamba kulinga muze unembi hanji kuhiana. (Tala yikuma ha mukanda Shikola ya Milimo ya Zambi, ha mafwo 181 ndo 184, mushi lia chikuma “Kunyingika Kuhwima Kanawa,” uli mu malimi akwo.) Kashika, ha mashimbu amwe Mbimbiliya yakulweza tuvumbi a Yehova hanga “akalomoke ni chiseke” muze anembi miaso ya uhaliso.—Samu 33:1-3.
13. Lumbununa chize muhasa kwimba kanawa hamwe ni shindakenyo.
13 Ha uwayilo wenu wamu usoko hanji wa wika, eseka kwimba miaso yize wakuzanga chinji mu mukanda wetu wa miaso. Tanga maliji a miaso ni liji mwilu hamwe ni shindakenyo. Kusulaho, zachisa liji lioliene, tongola maliji eswe mu hita mufunda ni kuhwima chochene chimuwika. Hachino, emba maliji jacho hakuzachisa liji lioliene likolo. (Izaia 24:14) Nyi walinga chocho, liji lie mulipema muze muwimba. Kashika, kanda wivwa woma hanji sonyi ja kwimba!
14. (a) Kuchi kwazulula chinji kanwa muchihasa kutukwasa twimbe kanawa? (Tala mushete “Chize Muhasa Kululieka Kwimba Che.”) (b) Yikuma yika wawana yize muyikukwasa kwimba kanawa?
14 Mba uhase kwimba kanawa ni liji lipema, watamba kutohwesa mu kanwa. Hachino, muze muwimba, azulula kanwa lieswe kuhiana chize wakwazulula muze unahanjika. Alioze yika watamba kulinga nyi mulivwa ngwe uli ni liji likehe hanji linene chinji? Muhasa kuwana ukwaso ha yikuma yili mu mushete “Chize Mukumba Yimwe Yipikalo Hanga Ululieke Liji Lie,” mu mukanda Shikola ya Milimo ya Zambi ha lifwo 184, mu malimi akwo.
IMBENU MIASO YA UHALISO NI MBUNGE YESWE
15. (a) Yika atuhwishile ha kukunguluka cha mwaka, ha mwaka 2016? (b) Mumu liaka atuhwisa mukanda wa miaso waha?
15 Atu waze apwile ha kukunguluka cha mwaka, ha mwaka 2016, kevwile kuwaha muze Ndumbu Stephen Lett wamu Chizavu cha Tusongo, atuhwishile mukanda waha wa miaso uli ni mutwe ngwo, Twimbilenu Yehova ni Chiseke. Ndumbu Lett yalumbununa ngwenyi chitela atuhwishila mukanda wa miaso waha, chili mumu Mbimbiliya yetu kayilulieka cheka. Maliji a miaso kaalumuna hanga achize yihanjikiso yize kuyishi mu Mbimbiliya yetu yaha. Chikwo nawa, mu mukanda uno waha kawezelamo miaso yinahanjika ha mulimo wa kwambujola ni ukuule. Nawa, amu kwimba chikwete ulemu mu uwayilo wetu, Chizavu cha Tusongo kazangile hanga atuhwise mukanda wa miaso wakayanda. Kashika chifukilo chinalifu ni cha Mbimbiliya yaha. (Tradução do Novo Mundo da Bíblia Sagrada.)
16, 17. Yuma yika yikwo alumuna mu mukanda wa miaso waha?
16 Mba tuzachise kanawa mukanda uno wa miaso, miaso yamo hanayilulieka mu yikuma ni kuyisa hamuwika. Chakutalilaho, miaso yitangu 12 yinahanjeka hali Yehova, miaso 8 yize yinasulaho yinahanjeka hali Yesu ni ukuule, miaso yeswe che ayilinga. Kuuputukilo wa mukanda wa miaso kuli katalilo wa yikuma yeswe. Chino muchihasa kukwasa mandumbu waze akuhanjika pande ja mbunga hanga asakule kanawa miaso.
17 Mba atukwase kwimba ni mbunge yeswe, maliji amwe kaalumuna hanga alumbunune kanawa sango jili ha miaso. Maliji waze atu te keshi kwaahanjeka nawa chinji kasalakanyisaho eka. Chizechene nawa, mwaso wakwamba ngwo, “Kusuula” kawalumuna ngwo, “Lihumikizenu,” ni maliji a mwaso kaalumuna. Nawa te chinalite kwalumuna mwaso wakwamba ngwo, “Funga Mbunge Ye” wapwile ngwe tunahane akwetu chiyulo. Haliapwila unasolola fumbo hali yetweswe ngwo, “Tufungenu Mbunge Jetu.” Mumu liaka? Mumu chitangu, muze mutu memba mwaso wacho te chapwa ngwe kanalweze akwo hanga akaule yize yili ha mwaso. Chino te muchihasa kupinjisa ngeji, atu aha mu ufulielo, akweze, ni mandumbu a mapwo waze ali ha kukunguluka chetu cha chikungulwila, cha mbonge ni cha mambonge. Kashika alumwine mutwe ni maliji a mwaso wacho.
mbenu miaso ha uwayilo wenu wamu usoko (Tala paragrafu 18)
18. Mumu liaka twatamba kulilongesa kwimba kanawa miaso yaha? (Tala maliji mushi lia lifwo.)
18 Miaso yinji mu mukanda “Twimbilenu Yehova ni Chiseke” yili ngwe yilemba. Miaso yino muyihasa kutukwasa hanga tulweze Yehova chize tunevu ku mbunge. Miaso yikwo muyitukwasa hanga yitukasumwise “ku zango ni yitanga yipema.” (A-Hepreu 10:24) Twatamba kunyingika kanawa mimbo, kupwa cha miaso hamwe ni maliji jayo. Mutapu umwe wakulingilamo chocho, uli wakupanjeka miaso yize mandumbu jetu hanayikopa kulu. Miaso yacho yili ha jw.org. Nyi mutwimbila miaso ku zuwo, chino muchitukwasa kuyimba kanawa hamwe ni chiseke.b—Tala maliji mushi lia lifwo.
19. Kuchi eswe mu chikungulwila mahasa kuwayila Yehova?
19 Twiwulukenu ngwetu, kwimba chikwete ulemu unji mu uwayilo wetu. Kwimba chapwa jila yipema yakusolwelamo ngwetu twakuzanga Yehova, nawa ngwetu twakuwahilila ha yuma yeswe yize akutulingila. (Tanga Izaia 12:5.) Kashika, nyi muwimba ni chiseke, ena mukolweza akwenu no alinge chocho. Yetweswe mu chikungulwila, akweze, tushinakaji, hanji waze achili aha mu umwenemwene, mutuhasa kuwayila Yehova ha kumwimbila miaso. Kashika, kanda wivwa sonyi ja kwimba ni mbunge yeswe. Kaula chiyulo cha mukwa-kwimba samu wambile ngwenyi: “Embilenu Yehova!” Chochene, twimbenu ni chiseke!—Samu 96:1.
a Mba uwane nawa yikuma yikwo ya chize mululieka liji lie ha kwimba, tala JW Broadcasting wa Dezembro 2014.
b Hita chimene ni chingoloshi cha hita kukunguluka cha mambonge ni cha mbonge, katalilo kakuputuka ni yinema ya miaso ya minutu kumi. Yinema yino ya miaso yakutukwasa tupwe ni chiseke cha kwimba ni kutululieka hanga tupanjike kanawa pande. Kashika shimbu yinema yacho kanda yiputuka, twatamba tulieswe kutwama mu yihela yetu hanga tuyipanjeka kanawa muze muyiputuka.