Yisemi, Shina Nunakwase Ana Jenu Hanga Ajame ni Kwaapapachisa?

1. Shindakenyo yika yisemi akwa-Kristu akuzanga kupwa nayo shimbu ana jo kanda achaapapachisa?

“HA Tukweji anji nanungine ni kulweza yisemi jami ngwami ngunazange hanga angupapachise, nawa ayo te kakuhanjika ni yami ha chikuma chacho. Kazangile kupwa ni shindakenyo nyi te ngunanyingika ulemu wa chiyulo chami. Chiyulo chino chilemu chamanunukine ha tangwa 31 lia Dezembro 1934.” Yino ye yalingiwile kuli ndumbu Blossom Brandt muze akwachile chiyulo cha kumupapachisa. Ni musono nawa, yisemi kakuzanga kukwasa ana jo hanga akwate yiyulo ya mana. Nyi mwana mashimbula kumupapachisa chakuhona kunyingika chitela cha mumu liaka anashimbula, chino muchihasa kupihisa usepa wenyi ni Yehova. (Tiangu 4:17) Yisemi waze akwete mana, shimbu mwano kanda achimupapachisa ayo kakuzanga kunyingike nyi hajama ni kupwa kambaji ka Kristu.

2. (a) Kapalia muka amwe tulayi a mbonge akumona? (b) Yika mutushimutwina mu mutwe uno?

² Amwe tulayi a mbonge kakumona ngwo akweze anji waze anayi ni kukumbanyisa miaka 20, nihindu kanda achaapapachisa chipwe ngwe kanakolela mu umwenemwene. Kanji-kanji akweze jacho kakuya ku kukunguluka, kwambujola nawa ene kakulimona ngwe kali Yela ja Yehova. Mumu lia yimwe yitela ayo keshi kulihana kuli Yehova ni kwaapapachisa. Kanji-kanji yino yakulingiwa mumu yisemi kakunyonga ngwo ana jo kanda achijama ni kwaapapachisa. Mu mutwe uno, mutushimutwinamo yikuma yiwana yize yakukinda yisemi kukolweza ana jo hanga aapapachise.

SHINA MWANAMI KALI NI MIAKA YAKUMBANA MBA AMUPAPACHISE?

3. Yika yapikalishile yisemi ja Blossom?

³ Yisemi ja Blossom waze twatongola ha paragrafu yitangu, kalipikalile chinji hali iye nyi te hapwa ni miaka yakumbana ha kunyingika ulemu ni ulumbunwiso wa upapachiso. Mba kuchi yisemi mahasa kunyingika nyi mwano hajama ni kuhana mwono wenyi kuli Yehova?

4. Kuchi shimbi ya Yesu yili ha Mateu 28:19, 20 muyihasa kukwasa yisemi musono?

⁴ Tanga Mateu 28:19, 20. Mbimbiliya kuyambile miaka yize mutu atamba kupwa nayo mba amupapachise. Alioze chili chipema kuli yisemi kunyonga kanawa ha chize chinalumbunuka kupwa kambaji ka Yesu. Mu limi lia Ngregu, liji “nukatayise tumbaji” lize lili ha Mateu 28:19, linalumbunuka kulongesa mutu ni nyonga lia kumukwasa hanga apwe kambaji hanji longi wa Mbimbiliya. Kambaji kali mutu yoze unalilongesa kunyingika Yesu ni kumukaula. Yisemi katamba kulongesa ana jo putu ku ukemba wo hanga alihane kuli Yehova ni kupwa tumbaji twa Kristu. Chochene, ana-kemba katambile kwaapapachisa. Alioze, Mbimbiliya yinasolola ngwo akweze ni anakemba mahasa kunyingika umwenemwene wa Mbimbiliya ni kuuzanga.

5, 6. (a) Yize Mbimbiliya yinambe hali Timoteu yika yatulongesa hakutwala ku upapachiso wenyi? (b) Mutapu uka upema uze yisemi a mana makwashilamo ana jo?

⁵ Kambaji Timoteu kaputukile kuwayila Yehova muze te uchili kanuke. Postolo Paulu yamba ngwenyi, Timoteu kaputukile kulilongesa umwenemwene wa Liji lia Zambi “chize ku ukemba” wenyi. Tato ya Timoteu te keshi kuwayila Yehova, alioze naye ni koko wa pwo kakwashile Timoteu kuzanga Liji lia Zambi. Hachino, Timoteu yakola chinji ku ufulielo. (2 Timoteu 1:5; 3:14, 15) Iye kota kajamine ni kutambula yiteli mu chikungulwila muze te anayi ni kukumbanyisa miaka 20.—Yilinga 16:1-3.

⁶ Hita mwana kakwete utu wenyi. Ana eswe keshi kujama chimuwika mu ufulielo. Ana amwe kakunyingika umwenemwene, makwata yiyulo yipema ni kuzanga kwaapapachisa muze achili twanuke. Akwo mahasa kujama ni kwaapapachisa muze makola ndambu. Yisemi waze akwete mana keshi kushinjila ana jo hanga aapapachise. Alioze, kakwaakwasa hanga ene akole ku ufulielo wo. Yisemi kakuwahilila muze ana jo makaula shimbi yize yili ha Yishima 27:11. (Tanga.) Alioze yisemi katamba kunyingika ngwo, nyonga lio lili lia kukwasa ana jo hanga apwe tumbaji twa Kristu. Hachino, yisemi katamba kulihula ngwo, ‘Shina mwanetu kananyingika kanawa umwenemwene mba ahane mwono wenyi kuli Zambi ni kumupapachisa?’

SHINA MWANAMI HANYINGIKA KANAWA UMWENEMWENE?

7. Shina mutu katamba kunyingika malongeso eswe amu Mbimbiliya mba amupapachise? Lumbununa.

⁷ Muze yisemi akulongesa ana jo, ayo kakwaakwasa hanga anyingike kanawa umwenemwene. Chinyingi chino muchikolweza ana hanga alihane-ene kuli Zambi. Alioze chino kuchalumbunukine ngwo mwana katamba kunyingika malongeso eswe amu Mbimbiliya mba alihane kuli Zambi ni kumupapachisa. Hita kambaji ka Kristu katamba kununga ni kulilongesa chipwe muze hamupapachisa kulu. (Tanga A-Kolosu 1:9, 10.) Mba yika mutu atamba kunyingika shimbu kanda achimupapachisa?

8, 9. Yika yalingiwile kuli kalayi wa zuwo lia ususu mu Fwilipu? Nawa yika mutuhasa kulilongesa ha chilweza chenyi?

⁸ Chilweza cha umwe usoko ku shakulu muchihasa kukwasa yisemi musono. (Yilinga 16:25-33) Ha mwaka 50, Paulu yaya ku mbonge ya Fwilipu mu wenyi wamuchiali wa mishionaliu. Muze aheteleko, iye ni Saila yaaliongela yuma yasaki, yaakwata ni kwaasa mu zuwo lia ususu. Ha ufuku, yikulingiwa munyiko unene uze wazulwile yajilo yeswe. Kalayi wa zuwo lia ususu yanyonga ngwenyi, funge eswe kachina, chocho yafupa kulishiha. Alioze Paulu yamukwika hanga eche kulishiha. Hohene Paulu ni Saila yamulongesa umwenemwene hakutwala kuli Yesu hamwe ni usoko wenyi. Ayo yafuliela mu yuma yize alilongesele hali Yesu nawa yanyingika ulemu wa kuyikaula ku mwono wo. Chocho yaapapachisa chakuhona kushimbula. Mba yika mutulilongesa ha chilweza chino?

⁹ Kalayi yono, kota kapwile swalale Ka-Roma yoze te hajama ha mulimo. Iye te kanyingikine Liji lia Zambi. Hachino, mba apwe mukwa-Kristu, iye te katamba kunyingika umwenemwene wa Mbimbiliya, kunyingika yize Yehova akwita kuli tuvumbi twenyi, ni kwononoka yize Yesu alongesele. Yize alilongesele ha shimbu likehe yamukwashile hanga amupapachise. Chipwe chocho, iye kanungine ni kulilongesa chipwe muze te hamupapachisa kulu. Kashika, yika muhasa kulinga nyi mwane mamba ngwenyi kanazenge amupapachise mumu lia zango lize akwete kuli Yehova ni kumwononokena? Muhasa kumulweza ahanjike ni makulwana amu chikungulwila hanga ayo anyingike nyi hajama hanga amupapachise.a (Tala maliji mushi lia lifwo.) Ngwe akwa-Kristu eswe akupapachisa, ni iye manunga ni kulilongesa hakutwala kuli Yehova ku mwono wenyi weswe, chipwe mu paraisu.—A-Roma 11:33, 34.

FUMBO LIKA LIPEMA LIZE ANA JETU ANAFUPIWA?

10, 11. (a) Yika yisemi amwe akunyonga hali ana jo? (b) Yika muyihasa kukwasa mwana mba alimike ni Satana?

¹⁰ Yisemi amwe kakunyonga ngwo muchilita mwano kumupapachisa muze mahwisa shikola ni kupwa ni mulimo upema. Yisemi jacho mahasa kupwa ni nyonga lipema, alioze katamba kulihula ngwo: ‘Shina yino muyihasa kukwasa mwanetu kupwa ni kufumbuka chipema? Shina nyonga liacho linalite ni yize Mbimbiliya yakutulongesa? Kuchi Yehova anazange hanga tuzachise mwono wetu?’—Tanga Chilumbununyi 12:1.

¹¹ Chili chilemu kwiwuluka ngwo, yitanga ya hano hashi ni yuma yize yiliho yakulimika ni yize Yehova akuzanga. (Tiangu 4:7, 8; 1 Yoano 2:15-17; 5:19) Usepa upema ni Yehova we muhasa kukwasa mwanenu kulimika ni Satana, yitanga ya hano hashi, ni kunyonga chaho chipi. Nyi yisemi masa kulutwe shikola ni milimo ya ku musunya, ana jo mahasa kufuliela ngwo yuma ya hano hashi yikwete ulemu unji kuhiana usepa wo ni Yehova. Chino chili ponde yinene ku mwono wa ana. Yisemi, shina munuzanga hanga ana jenu alilongese yuma ya hano hashi yize amwe akunyonga ngwo ye yakuneha uwahililo? Mulali umwe wa kufumbukilamo ku mwono ni kupwa ni uwahililo wamwenemwene uli kusa Yehova kulutwe ku mwono wetu.—Tanga Samu 1:2, 3.

MBA KUCHI MUCHIPWA NYI MWANAMI MALINGA SHILI?

12. Mumu liaka yisemi amwe akunyonga ngwo chipema mwano kushimbula mba amupapachise?

¹² Umwe mama kalumbunwine mumu liaka kakazangile hanga mwanenyi wa pwo amupapachise. Yamba ngwenyi, “Napwile ni kwivwa woma hakutwala ku chikuma cha kusosolola mutu mu chikungulwila.” Ngwe ndumbu wacho, yisemi amwe kakunyonga ngwo chipema mwano kushimbula mba amupapachise muze makola hanga achine kulinga uhenge. (Uputukilo 8:21; Yishima 22:15) Yisemi jacho kakunyonga ngwo, mwano nyi kamupapachishile, keshi kamusosolola mu chikungulwila. Alioze, shina lino lili nyonga lipema?—Tiangu 1:22.

13. Nyi mutu kanda amupapachisa, shina chinalumbunuka ngwo keshi chitela kumeso ja Yehova? Lumbununa.

¹³ Chochene, yisemi keshi kuzanga hanga mwano amupapachise shimbu kanda achijama ni kuhana mwono wenyi kuli Yehova. Alioze chili uhenge unene kunyonga ngwo mwana mapwa ni chitela kumeso ja Yehova muze mamupapachisa. Mwana kakupwa ni chitela kumeso ja Zambi muze manyingika yize Mbimbiliya yakwamba ngwo yipema ni yipi. (Tanga Tiangu 4:17.) Yisemi a mana keshi kukinda ana jo hanga achine kwaapapachisa. Chipwe muze mwana uchili kanuke, ayo kakumulongesa kuzanga yize Yehova akwamba ngwenyi yipema ni kuvwila lwaji yuma yipi, ngwe chize yisemi ene akulinga. (Luka 6:40) Zango lia mwane kuli Yehova mulimufunga ku shili yinene, mumu iye mazanga kulinga yize Yehova akuzanga.—Izaia 35:8.

UKWASO UZE MANDUMBU AKWO NO MAHASA KUHANA

14. Kuchi makulwana amu chikungulwila mahasa kukwasa yisemi?

¹⁴ Makulwana amu chikungulwila mahasa kukwasa yisemi ha yize akulinga, nyi mahanjika yuma yalita hakutwala ku mulimo wa Yehova. Umwe ndumbu wa pwo yewuluka ngwenyi, Ndumbu Russell kahanjikile nenyi muze te ali ni miaka yisambano. Yamba ngwenyi: “Iye kachijile minutu 15 hanga ahanjike ni yami hakutwala ku yize te mungulinga mu mulimo wa Yehova.” Mba yika ayukileko? Kulutwe, ndumbu wacho yapwa pionelu, chocho yalinga miaka kuhiana 70 mu upionelu! Chochene, maliji alita nawa a utakamiso mahasa kukwasa mutu ku mwono wenyi weswe. (Yishima 25:11) Makulwana mahasa nawa kusanyika yisemi hamwe ni ana jo hanga akwase ku milimo ya Zuwo lia Wanangana. Yisemi mahasa kuhana milimo kuli ana jo kulita ni miaka ni uhashi uze akwete.

15. Kuchi mandumbu akwo mu chikungulwila mahasa kukwasa akweze?

¹⁵ Kuchi mandumbu akwo mu chikungulwila mahasa kukwasa yisemi? Mahasa kwaakwasa ha kusolola zango lingunu hali akweze. Chakutalilaho, muhasa kufupa kunyingika yuma yize yinasolola ngwo umwe mukweze kanase tachi hanga akundame kuli Yehova. Hakulihula ngwenyi: Kutala mukweze wacho kakukumbulula kanawa ha kukunguluka? Kakulinga chihanda ha kukunguluka cha mukachi ka poso? Shina kakwambujola kuli akwo ku shikola? Kutala kakulinga yuma yalita muze mamweseka ni yuma yipi? Nyi che akulinga, mulweze ngwenyi kakulinga kanawa! Mutuhasa kuhanjika ni akweze shimbu kukunguluka kanda chiputuka ni muze muchihwa. Nyi twalinga chocho, twanuke malivwa ngwo kanalinga chihanda cha “chikungulwila chinene.”—Samu 35:18.

KWASENU ANA JENU HANGA AJAME NI KWAAPAPACHISA

16, 17. (a) Mumu liaka chili chilemu ana kwaapapachisa? (b) Uwahililo uka yisemi akwa-Kristu mahasa kupwa nawo? (Tala chizulie ha uputukilo.)

¹⁶ Chiwape chinene chize yisemi akwete chili kulongesa ana jo kuzanga Yehova. (Samu 127:3; A-Efwesu 6:4) Mu vungu lia Izalele, ana te kakusemuka ni chihinga cha kuwayila Yehova. Alioze chino kuchishi kulingiwa kuli ana jetu musono. Nyi yisemi kakuzanga Yehova ni umwenemwene, kuchalumbunukine ngwo ana jo no che makalinga. Kukatuka muze mwana masemuka, yisemi katamba kumukwasa hanga apwe kambaji ka Kristu yoze malihana kuli Zambi ni kumupapachisa. Mumu liaka chili ni ulemu? Mumu kulihana kuli Yehova, upapachiso ni kulinga mulimo wenyi, ye muyikamukwasa mba akalilamwine ha luyinda munene.—Mateu 24:13.

¹⁷ Muze Blossom azangile hanga amupapachise, yisemi jenyi kafupile kunyingika nyi hajama lume. Muze anyingikine ngwo hajama, chocho yamukwasa ha chiyulo chize akwachile. Blossom yalumbununa yize tato alingile ha ufuku shimbu te kanda achimupapachisa. Yamba ngwenyi: “Yetu eswe twasele makungunya hashi, chocho tata yalemba. Yalweza Yehova ngwenyi kanawahilila chinji ha chiyulo cha mwanenyi wa kemba yoze unahane mwono wenyi kuli Iye.” Hakupalika cha miaka 60, Blossom yamba ngwenyi: “Munguhasa kwamba ngwami, ku mwono wami weswe kanda nguvulama kama ufuku wacho!” Yisemi, ni yenu munuhasa kuwahilila muze munumona ana jenu kanalihane kuli Yehova ni kwaapapachisa.