Nunga ni Kusolola Zango Lize Liakutakamisa

1. Chuma chika chilemu chize Yesu atongwele chinji ha ufuku wakasula apwile ni tumbaji twenyi?

HA UFUKU wakasula muze apwile ni tumbaji twenyi shimbu te kanda achifwa, Yesu yatongola zango yisuho 30. Iye yalweza tumbaji twenyi ngwenyi, ayo katamba ‘kulizanga umwe ni mukwo.’ (Yoano 15:12, 17) Zango lio te mulipwa chilayi chize muchisolola kuli akwo ngwo, kali tumbaji amwenemwene a Kristu. (Yoano 13:34, 35) Zango lize Yesu ambile hi lia mu kanwa wika ko, alioze lili zango liamwenemwene lize liakukatuka ku mbunge. Yesu ngwenyi: “Zango liahiana lino niumwe keshi nalio, kachi umwe matumbika mwono wenyi hali tusendo twenyi. Yenu nuli tusendo twami, nyi munulinga cheswacho mungunwamba.”—Yoano 15:13, 14.

2. (a) Ha yika tuvumbi twa Zambi aanyingikina musono? (b) Yihula yika mutukumbulula ha mutwe uno?

² Tuvumbi twa Yehova musono, kaanyingikina ha zango lio ni kulinunga cho chingunu. (1 Yoano 3:10, 11) Kakulinga chino chakuhona kulitala ha vungu, munyachi, limi lize akuhanjika, kuze akatuka, hanji kuze akolelele. Hashi heswe, tuvumbi twa Yehova kakulizanga chinji umwe ni mukwo. Mumu liaka zango linafupiwa chinji musono? Kuchi Yehova ni Yesu akututakamisa ni zango? Nawa kuchi mutuhasa kusolola zango liacho ha kutakamisa ni kukolweza akwetu?—1 A-Korindu 8:1.

MUMU LIAKA ZANGO LINAFUPIWA CHINJI MUSONO?

3. Kuchi ‘miaka yino yikalu,’ yinakwata hali atu musono?

³ Tuli ha “miaka yikalu,” nawa tunamono ‘lamba ni yinyengo’ yinji ku mwono. (2 Timoteu 3:1-5; Samu 90:10) Atu anji kakufupa kulishiha mumu lia kumona lamba linji. Kashika hita mwaka, atu kuhiana 800,000 kakulishiha ene, chino chinasolola ngwo hita mutu kakulishiha hakupalika cha mitulo 40. Chaluyinda, chipwe mandumbu jetu amwe no hanalishihi ene.

4. Atu aka atongola mu Mbimbiliya waze azangile kufwa?

⁴ Ha mashimbu waze asonekene Mbimbiliya, amwe tuvumbi ashishika a Zambi no kazangile kufwa hamukunda wa yipikalo yize apwile nayo. Chakutalilaho, Yombi yoze wapwile ni yipikalo yinji, yamba ngwenyi: ‘Chazangile nawa kutwama ni mwono, hinahonga.’ (Yombi 7:16; 14:13) Yona kalivwile ngwe keshi ulemu, chocho yamba ngwenyi: ‘Yehova, nungushihe, mumu kuli yami shinaho kufwa hi mwono ko.’ (Yona 4:3) Profeta Eliya neye yalivwa ngwe keshi ni ulemu, chocho yamba ngwenyi: “Kunahu, Yehova, tambula kama mwono wami.” (1 Mianangana 19:4) Alioze Yehova kazangile chinji tuvumbi wano ashishika, chocho yafupa hanga anunge ni mwono. Iye kakaahishile ha yize ayo ambile. Alioze, yaakwasa hanga azange mwono ni kutwama mu mulali uze te mahasa kununga ni kumulingila ni ushishiko weswe.

5. Mumu liaka mandumbu jetu anafupiwa zango lietu musono?

⁵ Musono, mandumbu jetu anji kanapalika mu yipikalo yinji, kashika kanafupiwa zango lietu. Amwe kakwalenya hanji kwahungumiona kuli akwo. Eka kakwavwisa woma ni kwapinjisa ku yihela kuze akukalakalila. Akwo kota kakuhonga wika mumu lia kukalakala maola anji, hanji mumu lia milimo yikalu yize akwete. Eka kanamono yipikalo yinji mu usoko. Kota ayo kalimbachile ni atu waze keshi kuwayila Yehova, waze akwakekuna hita tangwa. Mumu lia yuma ya mutapu au, amwe kakuhonga, hachino mahasa kuputuka kulimona ngwe keshi ni ulemu. Mba iya kevwe mahasa kwakwasa?

ZANGO LIA YEHOVA LIAKUTUTAKAMISA

6. Kuchi zango lia Yehova lia kutakamisa tuvumbi twenyi?

⁶ Yehova hanalweze tuvumbi twenyi ngwenyi kakwazanga nawa manunga ni kwazanga ku miaka yeswe. Achinyonga chize A-Izalele evwile muze Yehova aambile ngwenyi: ‘Nwapwile a zango liami; alemu. Nanuzangile,’ kashika ‘kanda nwivwa woma mumu nguli hamwe ni yenu!’ (Izaia 43:4, 5) Tunanyingika ngwetu hita umwe wa kuli yetu kakwete ulemu ku meso ja Yehova.a (Tala maliji mushi lia lifwo.) Mbimbiliya yalakenya ngwo: “Kajita yoze wakuhana kukumba. Kumakevwa kuwaha ni yena ni chiseke chinji.”—Zefania 3:16, 17.

7. Kuchi zango lia Yehova lili ngwe lia pwo yoze unamwisa? (Tala chizulie ha uputukilo.)

⁷ Yehova kalakenya kukolweza ni kutakamisa atu jenyi chipwe ngwe mapwa ni yipikalo yeswayo. Kambile ngwenyi: “Munukamwa, makanumbata mu kapwete kenyi, makanususuminya ha makungunwa jenyi. Ngwe mwana wa kuwumbikiza kuli naye, chocho mungukanuwumbikiza.” (Izaia 66:12,13) Mwana kakwivwa kuwaha chinji muze anamukwata kuli naye ni kumuhehesa! Yehova katuzanga chinji, mba kanazange hanga tutwame kanawa. Kashika, kanda unyonga ngwe kushi ni ulemu ku meso ja Yehova.—Jeremia 31:3.

8, 9. Kuchi zango lia Yesu mulihasa kututakamisa?

⁸ Kuli nawa chikuma chikwo chize chakutukwasa tunyingike ngwetu Yehova kakutuzanga. Mbimbiliya yinambe ngwo: “Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Chitapo cha Yesu chakusolola zango lize akwete hali yetu, nawa zango liacho lia kututamisa. Mbimbiliya yinambe ngwo chipwe “luyinda, hanji kapinda,” kuyichi kuhasa ‘kutuhandununa ku zango lia Kristu.’—A-Roma 8:35, 38, 39.

⁹ Ha mashimbu amwe twakupwa ni yipikalo yize yakutuhongesa ku mujimba hanji ku manyonga ni kutuchiza uwahililo uze tukwete wa kuwayila Yehova. Alioze kunyonga ha chize Kristu akutuzanga muchihasa kutwaha tachi hanga tunyongonone. (Tanga 2 A-Korindu 5:14, 15.) Zango lia Yesu lia kutukwasa tununge ni kuwayila Yehova. Liakutukwasa tuhone kuhonga muze mutumona luyinda, yihungumiona, kuzakalala hanji kutulemeka ku mbunge.

MANDUMBU JETU KANAFUPIWA ZANGO LIETU

10, 11. Aya waze ali ni chiteli chakutakamisa mandumbu waze analema ku mbunge? Lumbununa.

¹⁰ Yehova nawa kakuzachisa chikungulwila hanga atutakamise ni zango lienyi. Nyi twazanga mandumbu, tunasolola ngwetu twakuzanga Yehova. Twakusa tachi hanga tukwase mandumbu jetu anyingike ngwo kali ni ulemu nawa Yehova kakwazanga. (1 Yoano 4:19-21) Postolo Paulu kasonekene ngwenyi: “Likolesenu umwe ni mukwo, chizechene ngwe nwakulinga.” (1 A-Tesalonika 5:11) Hi makulwana a mu chikungulwila wika ko akwete chiteli cha kutakamisa akwo. Yetweswe mutuhasa kwimbulula Yehova ni Yesu ha kutakamisa mandumbu jetu.—Tanga A-Roma 15:1, 2.

¹¹ Mandumbu amwe mu chikungulwila waze anamono lamba linji mumu lia kuhomba hanji kuzakalala, mahasa kufupa ukwaso wa mandotolo. (Luka 5:31) Makulwana amu chikungulwila ni mandumbu akwo kanyingika ngwo chipwe ngwe kalilongesele ya undotolo, nihindu ukwaso ni utakamiso wo muyihasa kukwasa chinji. Mandumbu eswe mu chikungulwila mahasa ‘kusangulwisa akwa-ulenda ku mbunge, kukolesa akwa-kulela, kulihumikiza ni eswe.’ (1 A-Tesalonika 5:14) Twatamba kusa tachi hanga tunyingike chize akwivwa mandumbu jetu. Muze analeme ku mbunge, twatamba kulihumikiza ni kuhanjika no yuma yize muyaatakamisa. Shina wakusa tachi hanga utakamise akwenu? Yika mulinga mba uhase kulembejeka ni kukolweza akwenu?

12. Hana chilweza cha umwe pangi yoze wawanyine utakamiso ha zango lia mandumbu jenyi mu chikungulwila.

¹² Pangi umwe mu Europa yamba ngwenyi: “Ha mashimbu amwe nakupwa ni manyonga akulishiha, alioze ngukwete ukwaso wangunda. Mandumbu amu chikungulwila chetu kakulamwina mwono wami. Ayo kanguzanga chinji nawa kakungutakamisa mashimbu eswe. Chipwe ngwe atu akehe wika ananyingika ngwo ngukwete musongo wa kuhomba chinji, nihindu mandumbu kakupwa hamwe ni yami mashimbu eswe. Ndumbu umwe ni mukwo-pwo hanapu ngwe yisemi jami aku ufulielo. Ayo kakungufunga kanawa, ni kupwa hamwe ni yami ha tangwa lieswe liamuwundu.” Chipwe ngwe amwe akuli yetu kutuchi kuhasa kukwasa mandumbu mu mulali uno, alioze yetweswe mutuhasa kusa tachi hanga tutakamise mandumbu jetu.b (Tala maliji mushi lia lifwo.)

MAJILA WAZE MUTUTAKAMISHINAMO AKWETU NI ZANGO

13. Yika twatamba kulinga ha kulembejeka akwetu?

¹³ Pwako ni kupanjika akwenu kanawa. (Tiangu 1:19) Mutusolola zango nyi mutupanjika mandumbu jetu kanawa ni kwevwila keke. Ni umbovu weswe, hula ndumbu yihula yize muyikukwasa kunyingika yize yinapalika ku mwono wenyi. Acho mahasa kumona ngwenyi unalihulumba hali iye, kulita ni chize nawa musoloka ku meso je. Muze anahanjika, kanda umuteta liji, lihumikize ni kumwecha hanga asolole chize anevu. Nyi wamupanjika kanawa, munyingika chize anevu nawa muhasa kumukwasa hanga akujikijile. Chino muchipwa chashi kuli iye apanjike yize unamulweze muze unamukwasa. Nyi wakulihulumba hali akwenu, muhasa kwalembejeka chinji.

14. Mumu liaka kutwatambile kuyenga-yenga akwetu?

¹⁴ Kanda upwa ni kuyenga-yenga akwenu. Mutu yoze unahombo nyi manyingika ngwenyi twakumuyenga-yenga, mahomba chinji. Nyi twalinga chocho, muchipwa chikalu kumukwasa. Mbimbiliya yinambe ngwo: “Kwali mukwa kuhanjika kalusulusu ngwe kutuwa cha katana, alioze limi lia mukwa mana kuliakuwuka.” (Yishima 12:18) Chipwe ngwe kutwambile kulemeka mutu yoze unahombo ni maliji jetu, alioze mutumuvwisa chinji yikola nyi mutuhanjika kalusulusu chakuhona kunyonga. Mba tuhwimise ndumbwetu mbunge, twatamba kumukwasa hanga amone ngwenyi, tunase tachi hanga tunyingike chize anevu.—Mateu 7:12.

15. Yikwata yika tuli nayo yize mutuhasa kuzachisa hanga tutakamise akwetu?

¹⁵ Zachisa Mbimbiliya hanga utakamise akwenu. (Tanga A-Roma 15:4, 5.) Mbimbiliya uli mukanda wa ‘Zambi yoze wakuhana uhumikizo ni kulembejeka,’ kashika nyi twayizachisa mutuwanamo maliji anji a kutulembejeka. Tukwete nawa yikwata yikwo yakuhengwola nayo Mbimbiliya. (Índice das Publicações da Torre de Vigia ni Guia de Pesquisa para Testemunhas de Jeová.) Yikwata yino muyitukwasa kuwana yisoneko ni mikanda yize mutuzachisa hanga tukolweze ni kutakamisa mandumbu jetu.

16. Yitanga yika muyitukwasa mba tutakamise waze anahombo?

¹⁶ Pwako chimbovu nawa mutu mupema. Yehova kapwa “Tato ya keke, kanda Zambi ya kulembejeka cheswe,” nawa kakwete “mbunge ya keke” hali tuvumbi twenyi. (Tanga 2 A-Korindu 1:3-6; Luka 1:78; A-Roma 15:13) Paulu katuhele chilweza chipema mumu iye kembulwile Yehova. Kashika ahashile kwamba ngwenyi: “Twendenu ni vumbi mukachi kenu, chizechene ngwe naye malela ana jenyi mwene. Chocho nikunufwila chikolo, chatuwahilile kulianyina ni yenu, hi sango lipema wika ko, alioze kunutumbikila mwono wetu nawa, mumu nwalumukine akwetu a zango chikolo.” (1 A-Tesalonika 2:7, 8) Nyi twapwa yimbovu ngwe Yehova, mutuhasa kulembejeka mandumbu jetu waze a kulemba hanga aalembejeke.

17. Kuchi twatamba kumona mandumbu jetu mba tuhase kwatakamisa?

¹⁷ Kanda ushimbwila ungunu kuli mandumbu je. Nyingika ngwe hano hashi kuheshi mutu mungunu. Kashika, nyi mufupa ungunu hali mandumbu je, tangwa limwe mukaliseha. (Chilumbununyi 7:21, 22) Twiwulukenu ngwetu Yehova katunyingika kanawa ngwenyi tuli yihenge. Kashika tunafupiwa kulihumikiza kuli umwe ni mukwo. (A-Efwesu 4:2, 32) Kanda tulinga nichimwe chize muchilingisa mandumbu jetu alivwe ngwe keshi kulinga nichimwe hanji kwatesa ni mandumbu akwo. Alioze twatamba kwatakamisa ni kwalweza yuma yipema yize akulinga. Chino muchakwasa hanga awahilile ha kulingila Yehova.—A-Ngalashia 6:4.

18. Mumu liaka twatamba kutakamisa akwetu ni zango?

¹⁸ Tuvumbi eswe a Yehova kakwete ulemu kuli iye ni kuli Yesu. (A-Ngalashia 2:20) Twakuzanga mandumbu jetu ni mbunge yeswe, kashika twatamba kutwama no kanawa. Mbimbiliya yinambe ngwo: “Tukaulenu yuma yipema yize yatwala ku sambukila, ni yuma yize mutuhasa kulikolesanayo umwe ni mukwo.” (A-Roma 14:19) Tunashimbwila ni mbunge yeswe kutwama mu Paraisu, muze kumuchikapwa nichimwe chize muchikatuhongesa! Kumuchikapwa yikola ni jita. Atu kechi kafwa mumu lia shili yize akuhinga. Kumuchikapwa nawa yihungumiona, yipikalo mu usoko, chipwe kutuvwisa yikola ku mbunge. Kusongo lia kanunu ka miaka, atu eswe makapwa angunu. Waze makanunga ni kushishika ndo ha cheseko chakasula makapwisa ana ja Yehova hano hashi, mba ‘makatusuka ku undungo wa kupola ndo ku kutusuka cha uhenya wa ana a Zambi.’ (A-Roma 8:21) Kashika twatamba kupwa ni zango lize mulitutakamisa ni kulikwasa umwe ni mukwo mba tukatwame mu paraisu.