Kawaha Atu Waze Akuwayila Zambi ya Uwahililo

1. Mumu liaka Yela ja Yehova akuwahilila? (Tala chizulie ha uputukilo.)

YELA JA YEHOVA kakwete uwahililo wamwenemwene. Kweswako ali hamuwika, ngwe mu chikungulwila, ku kukunguluka cha mbonge ni cha mambonge, ha chiteleka, mwawana eswe kanasehe ni kulihanjikisa umwe ni mukwo. Mba mumu liaka ayo akuwahilila? Kakuwahilila mumu kananyingika ngwo Yehova, kali “Zambi ya uwahililo.” Ayo kakumuwahila ni kusa tachi hanga amwimbulule. (1 Timoteu 1:11, NM; Samu 16:11) Yehova kali Chishina cha uwahililo, kashika akuzanga hanga tuwahilile, nawa kakutwaha yuma yinji yize yakutuvwisa kuwaha.—Shimbi Yamuchiali 12:7; Chilumbununyi 3:12, 13.

2, 3. (a) Kupwa ni uwahililo yika chinalumbunuka? (b) Mumu liaka muchihasa kupwa chikalu kuwahilila?

² Mba yena? Shina ukwete uwahililo? Kuwahilila chinalumbunuka kwivwa kanawa, kusuwuluka ni mwono we hanji kwivwa chiseke chinji. Mbimbiliya yinasolola ngwo waze akuwahisa kuli Yehova e mahasa kupwa ni uwahililo wamwenemwene. Alioze, mumu liaka ha matangwa wano muchihasa kupwa chikalu kuwahilila?

³ Mumu twakupalika mu yuma yipi, ngwe kufwisa mutu yoze twazanga chinji hanji kumusosolola mu chikungulwila, kulilakula ni yoze twalimbata nenyi, hanji kutuchiza ha mulimo. Muchihasa nawa kupwa chikalu kuwahilila nyi twatwama ku zuwo kuze kushi sambukila, matukekuna kuli waze twakalakala no hanji alongi-ni-akwetu, chipwe muze matuhungumiona ni kutusa mu mazuwo a ususu mumu lia kuwayila Yehova. Hanji tuli ni musongo upi, chipwe ngwetu tukwete musongo wa kuhomba. Chipwe chocho, iwuluka ngwe Yesu Kristu, “mukwa kuyula wa kuwaha” kakuzanga kutakamisa atu ni kwavwisa kuwaha. (1 Timoteu 6:15; Mateu 11:28-30) Ha Longeso lia ha Mulundu, Yesu katongwele yimwe yuma yize muyihasa kutukwasa hanga tuwahilile, chipwe muze tunamono lamba linji mumu lia kupwa hano hashi ha Satana.

MBA TUWAHILILE TWATAMBA KUPWA NI USEPA UKOLO NI YEHOVA

4, 5. Yika mutuhasa kulinga mba tununge ni kuwahilila?

⁴ Chuma chitangu chize Yesu atongwele chikwete ulemu unji. Iye yamba ngwenyi: “Kawaha yiswale mu spiritu, mumu Wanangana wa malilu niwo.” (Mateu 5:3) Nyi mutunyingika uswale wetu wa ku spiritu, mututayiza ngwetu twatamba kunyingika Zambi ni kufupa ukwaso ni usongwelo wenyi. Kuchi twakuchilinga? Twakuchilinga ha kulilongesa Mbimbiliya, kwononokena Zambi, ni kupwisa uwayilo wenyi chuma chilemu ku mwono wetu. Kulinga yino yuma muchitukwasa tuwahilile ku mwono. Ufulielo wetu ha kumanunuka cha yilakenyo ya Zambi muukola chinji. Nawa “kutalatala chawaha” chize twakuwana mu Mbimbiliya chakututakamisa.—Titu 2:13.

⁵ Nyi mutuzanga kupwa ni uwahililo, twatamba kununga ni kukolesa usepa wetu ni Yehova, chipwe ngwe mukulingiwa yeswayo ku mwono wetu. Postolo Paulu yasoneka ngwenyi: “Wahililenu muli Mwene matangwa eswe: cheka nawa mungwamba ngwami, Wahililenu.” (A-Fwilipu 4:4) Mba tupwe ni usepa upema ni Yehova, twatamba kupwa ni mana a Zambi. Mbimbiliya yinambe ngwo: “Kawaha yoze mawana mana, ni yoze mazuka malinjekela. Kuli waze mayizuka yapwa ngwe mutondo wa mwono. Kawaha waze akuyilalaminya.”—Yishima 3:13, 18.

6. Yika nawa twatamba kulinga mba tununge ni kuwahilila?

⁶ Alioze mba tuwahilile, chili chilemu kununga ni kukaula yize twakulilongesa mu Mbimbiliya. Yesu yashindakenya ulemu wacho hakwamba ngwenyi: “Nyi nunanyingika yino yuma, munuwaha nyi munuyilinga.” (Yoano 13:17; tanga Tiangu 1:25.) Chino chapwa chilemu nyi tunazange kukolesa ufulielo wetu ni kununga ni uwahililo. Alioze kuchi mutuhasa kupwa ni uwahililo chipwe ngwe kuli yuma yinji yize muyihasa kutuchiza uwahililo wacho? Tutalenu nawa yize Yesu ambile ha Longeso lia ha Mulundu.

YIZE MUYITUNEHENA UWAHILILO

7. Kuchi waze ananyenganyana mahasa kuwahilila?

⁷ “Kawaha waze akulinyenga, mumu kumakaalembejeka.” (Mateu 5:4) Mutuhasa kulihula ngwetu: ‘Mba kuchi waze akulinyenga mahasa kuwahilila?’ Yesu kakapwile ni kuhanjika hali eswe waze akunyenganyana. Yingulungulu anji kakunyenganyana hamukunda wa lamba lize akumona ‘ha matangwa wano a kusula’ nawa ‘akalu’ kukumba. (2 Timoteu 3:1) Alioze ayo kakunyonga wika hali ene hi hali Yehova ko, kashika ayo keshi kupwa ni usepa ukolo ni Yehova nawa keshi kuwahilila ku mwono. Ha chisoneko chino, Yesu te kanahanjika hali atu waze ali yiswale ku spiritu. Ayo kakunyenganyana hakumona chize atu anji akwehuka Zambi hanji keshi kutwama kulita ni yize Zambi akuzanga. Ayo kananyingika nawa ngwo kali yihenge, nawa kanamono yuma yipi yize yinalingiwa hano hashi. Yehova kakumona kunyenganyana cha yiswale ku spiritu, kashika akwatakamisa kupalikila mu Liji lienyi, ni kwaha uwahililo ni mwono.—Tanga Ezekiele 5:11; 9:4.

8. Kuchi kushimbika muchihasa kutukwasa kupwa ni uwahililo?

⁸ “Kawaha akwa kushimbika, mumu kumakahinga he hashi.” (Mateu 5:5) Kuchi kushimbika muchihasa kutukwasa kupwa ni uwahililo? Atu anji kapwa akalu nawa yilianyi, yitanga yino muyihasa kuneha milonga yinji. Alioze muze akulilongesa umwenemwene, ayo kakwalumuna yitanga yo ni kuzala ‘utu waha.’ Haliapwila kanasolola yitanga yipema ngwe, “mbunge ja keke, ni utu, ni mbunge ja kulikehesa, ni kushimbika, ni uhomboloji.” (A-Kolosu 3:9-12) Hachino, ayo kakupwa ni sambukila, usepa upema ni akwo nawa kakuwahilila. Chikwo nawa, Liji lia Zambi lialakenya ngwo, ayo “kumakazuka chifuchi.”—Samu 37:8-10, 29.

9. (a) Yika te Yesu anambe kwamba muze ambile ngwenyi akwa-kushimbika “kumakazuka chifuchi”? (b) Mumu liaka “waze akwivwa usona ha ululi, ngwe zala ni pwila anevu” mahasa kuwahilila?

⁹ Yika te Yesu anambe kwamba muze ambile ngwenyi akwa-kushimbika “kumakazuka chifuchi”? Akwa-Kristu akuwayisa kumakazuka chifuchi muze makayula hashi ngwe mianangana ni asasendote. (Usolwelo 20:6) Waze keshi ni kutalatala cha kuya mu malilu, makazuka chifuchi haze makatwama ku miaka yeswe. Ayo makapwa angunu nawa makapwa ni sambukila ni uwahililo. Atu wano e nawa Yesu ambile ngwenyi: “Kawaha waze akwivwa usona ha ululi, ngwe zala ni pwila anevu.” (Mateu 5:6) Ayo makakuchisa usona wo ha ululi, muze Yehova kamachiza upi weswe hano hashi. (2 Petulu 3:13) Kashika, akwa-ululi makawahilila mu chifuchi chaha, nawa kechi kanyenganyana hamukunda wa yuma yipi yize yingulungulu akulinga.—Samu 37:17.

10. Kupwa mukwa keke yika chinalumbunuka?

¹⁰ “Kawaha akwa kwiwa keke, mumu kumakawana keke.” (Mateu 5:7) Kupwa mukwa-keke chinalumbunuka kusangulwisa, kusolola utu ni kupwa mukwa-kenda, chekwamba kuvwila keke waze anamono lamba. Hachino, keke yatamba kusoloka ku yitanga hi mu kanwa wika ko. Mbimbiliya yakulongesa ngwo, kupwa ni keke chinalumbunuka nawa kulinga chimwe hanga ukwase akwenu.

11. Chishima cha Ka-Samaria mupema yika chinatulongesa?

¹¹ Tanga Luka 10:30-37. Chishima cha Yesu cha Ka-Samaria mupema, chinasolola kanawa chize mutuhasa kuvwila akwetu keke. Ka-Samaria kevwile keke, chocho yalinga chimwe hanga akwase lunga yoze te unamono lamba. Muze Yesu te hahwisa chishima chacho, yamba ngwenyi: “Yako, ukalinge chizechene.” Kashika mutuhasa kulihula ngwetu: ‘Shina ni yami ye nakulinga? Shina ngunalingi yize Ka-Samaria mupema alingile? Muze akwetu anamono lamba, kutala nakwakwasa? Chakutalilaho, shina muhasa kama kukwasa tushinakaji mu chikungulwila, tuliwa, hanji akweze waze yisemi jo hi Yela ja Yehova ko? Kutala munguhasa ‘kusangulwisa akwa ulenda ku mbunge’ hanga ngwatakamise?’—1 A-Tesalonika 5:14; Tiangu 1:27.

12. Mumu liaka twakuwahilila muze mutuvwila akwetu keke?

¹² Mumu liaka twakuwahilila muze twakuvwila akwetu keke? Mumu kuvwila akwetu keke, chakutupwisa yihanyi, nawa Yesu kambile ngwenyi kuhana chakuneha uwahililo. Chikwo nawa twakuvwisa Yehova kuwaha. (Yilinga 20:35; tanga A-Hepreu 13:16.) Mwanangana Ndawichi yamba hali mutu yoze ukwete keke ngwenyi: “Yehova mamufunga, mamwaha mwono, kumakawaha mu chifuchi.” (Samu 41:1, 2) Nyi mutuvwila akwetu keke, ni yetu Yehova matuvwila keke, nawa mutukawahilila ku miaka yeswe.—Tiangu 2:13.

KAWAHA “AKWA KUPEMA MU MBUNGE”

13, 14. Mumu liaka chili chilemu kupwa ni mbunge yipema?

¹³ Yesu yamba ngwenyi: “Kawaha akwa kupema mu mbunge, mumu kumakamona Zambi.” (Mateu 5:8) Mba tupwe apema mu mbunge, twatamba kwehuka manyonga ni usolo upi. Chino chikwete ulemu nyi tunazange hanga Yehova atayize uwayilo wetu.—Tanga 2 A-Korindu 4:2; 1 Timoteu 1:5.

¹⁴ Waze apema mu mbunge, mahasa kupwa ni usepa upema ni Yehova, yoze wambile ngwenyi: “Kawaha waze hanakoso mazalo jo.” (Usolwelo 22:14) Maliji kukosa “mazalo jo,” yika analumbunuka? Kuli akwa-Kristu akuwayisa, kanalumbunuka ngwo, Yehova kakwamona ngwe kalinanga, chocho makaaha mwono wa mutolo, ni kuwahilila ku miaka yeswe. Kuli mbunga yinene, waze makatwama hashi, kanalumbununa ngwo, Yehova kakwatayiza kupwa masepa jenyi mumu kakwamona ngwenyi kali akwa-ululi. Mbimbiliya yakwamba ngwo, ayo ‘hanakoso mahina jo, hanaatomesa mu manyinga ja mwe Mwana-panga.’—Usolwelo 7:9, 13, 14.

15, 16. Kuchi waze akwete mbunge yipema mahasa ‘kumona Zambi’?

¹⁵ Yehova kambile ngwenyi: “Mutu kechi kutwama ni mwono nyi mamona meso jami.” (Kutuhuka 33:20) Mba, kuchi akwa-kupema mu mbunge “kumakamona Zambi”? Mu Ngregu liji “kumona” linalumbunuka kunyonga, kwivwa hanji kunyingika chimwe chuma. Kashika ‘kumona Zambi’ chinalumbunuka kunyingika chize apwa ni kuzanga ndako jenyi. (A-Efwesu 1:18) Yesu kembulwile ndako ja Zambi ni ungunu weswe, kashika ambile ngwenyi: “Yoze wangumona hamona mwe Tata.”—Yoano 14:7-9.

¹⁶ Chikwo nawa, ‘twakumona Zambi’ muze twakunyingika chize akutukwasa ku mwono wetu. (Yombi 42:5) Mutuhasa nawa “kumona” Yehova ha kulihulikila ha yuma yipema yize alakenya kuli waze manunga ni kulinanga ni kumulingila ni ushishiko weswe. Nawa akwa-Kristu akuwayisa makamona Yehova ni meso muze makaahindwisa ni kuya mu malilu.—1 Yoano 3:2.

MUTUHASA KUWAHILILA CHIPWE NGWE TULI NI YIPIKALO

17. Mumu liaka akwa-sambukila akuwahilila?

¹⁷ Yesu yamba nawa ngwenyi: “Kawaha yitakanyishi” hanji akwa-sambukila. (Mateu 5:9) Nyi twafupa kupwa ni sambukila ni akwetu, mutuhasa kuwahilila. Kambaji Tiangu yasoneka ngwenyi: “Mapwa akwa kukuwa mihuko ya ululi mu sambukila kuli waze akulinga sambukila.” (Tiangu 3:18) Kashika nyi unase tachi hanga ulivwashane ni umwe mu chikungulwila chenu hanji mu usoko, eta kuli Yehova hanga akukwase kupwa mukwa-sambukila. Hachino, Yehova makwaha spiritu yenyi yisandu ni kukukwasa hanga usolole yitanga ya Ukristu ni kuwahilila. Yesu yashindakenya ulemu wa chize twatamba kufupa sambukila hakwamba ngwenyi: “Nyi kachi unalambula chawana che ku chilumbilo, ni kuze muwiwuluka ngwe mukwenu chuma chimwe a kuli nacho. Hichikako chawana che ku chilumbilo, uliange kuya ukawane ni mukwenu, mba ukeze, ukalambule chawana che.”—Mateu 5:23, 24.

18, 19. Kuchi akwa-Kristu akuwahilila chipwe ngwe kanaahungumiona?

¹⁸ “Kunwawaha muze manuchoka, ni muze manuhungumiona, ni muze manulamikiza ungulungulu, mumu hali yami.” Yika maliji wano a Yesu analumbunuka? Iye yawezela ko ngwenyi: “Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangile.” (Mateu 5:11, 12) Muze apostolo aalambile ni kwakanjisa kwambujola, ayo “yakatuka kumeso ja akwa kuyula nikuwahilila.” Ayo kakevwile kuwaha mumu lia kwalamba. Alioze yaawahilila ha “kutela kusauka mumu” ha jina lia Yesu.—Yilinga 5:41.

¹⁹ Musono, atu ja Yehova no kakunyongonona ni uwahililo muze akwahungumiona hamukunda wa jina lia Yesu. (Tanga Tiangu 1:2-4.) Ngwe apostolo, kutushi kuwahilila ni lamba hanji yihungumiona yize twakumona. Alioze nyi mutununga ni kushishika kuli Yehova, Iye matwaha hamu hanga tunyongonone. Tutalenu yize yalingiwile kuli Henryk Dornik ni ndumbwenyi. Mu Agosto wa mwaka 1944, ayo yaatuma ku chilombo kuze te akufungila funge. Akwa-kole waze atumineko yamba ngwo: “Chili chikalu kwashinjila kulinga chuma cheswacho. Lamba lize anamono linaanehena uwahililo.” Henryk yamba ngwenyi: “Chipwe ngwe chakafupile kufwa mumu lia kukalila yimwe, alioze kukumba yihungumiona ni hamu mumu lia ushishiko wami kuli Yehova te chakungwaha uwahililo.” Yawezela ko nawa ngwenyi: “Kulemba chinji chakolesele usepa wami ni Yehova, chocho iye yangukwasa.”

20. Mumu liaka twakwivwa kuwaha ha kulingila “Zambi ya uwahililo”?

²⁰ Nyi Yehova, “Zambi ya uwahililo,” matuvwila kuwaha, acho mutuhasa kuwahilila chipwe ngwe maatuhungumiona, asoko malimika ni yetu, mutuyiza, hanji mutupwa tushinakaji. (1 Timoteu 1:11, NM.) Mutuhasa nawa kuwahilila mumu Zambi yetu yoze “keshi mahuza,” katulakenya yuma yinji yipema. (Titu 1:2) Muze Yehova makamanununa yilakenyo yenyi, kutuchi kewuluka nawa yipikalo yize tukwete musono. Twakwivwa kuwaha hakumona chize mwono muukapwa mu Paraisu. Chochene, ‘mutukawahilila mu kulumbama cha sambukila.’—Samu 37:11.