KANYAMENU!

Yika Mbimbiliya Yinambe Hakutwala ku Uwayilo ni Jita Yize Yili mu Ucrânia?

Talenu yuma yize mangana a mayingeleja analingi hakutwala ku jita yize yili mu Ucrânia:

“Tetekeli wa yingeleja ya Ortodoxa mu Russia, Patriarch Kirill, kambile chimwe chinasolola ngwo kawahililile ni yize chifuchi cha Russia chinalingi. . . . Yuma yize te akwamba mu yingeleja yenyi ye yinakwasa Putin ha jita yize anase.”—EUobserver, 7 Março 2022.
“Patriarch Kirill . . . kamba maliji amwe atachi waze anasolola ngwo chinalite chifuchi chenyi kuzwelesa Ucrânia, ni kwamba ngwenyi jita yacho yili jila yimwe yakukumbilamo shili.”—AP News, 8 Março 2022.
“Tetekeli wa yingeleja ya Ortodoxa mu Ucrânia, Metropolitan Epiphanius I, Liakasoka kawahisanga atu jenyi ngwenyi, katamba kuzwela ni akwa-Rússia ananjila mu chifuchi cho, ni kwamba nawa ngwenyi kushiha maswalale a Rússia hi shili ko.”—Jerusalem Post, 16 Março 2022.
“Chizavu chatala ha mayingeleja eswe a mu Ucrânia chinakamba ngwo: Tuli hamuwika ni maswalale jetu eswe a mu Ucrânia. Tunasakwilila chinji ha tachi jize anase hanga afunge Ucrânia kuli chingalwe yoze unatulukukila. Tuli ni kwalembelako chinji.”—UCCROa Statement, 24 Fevereiro 2022.

Kuchi wanyonga? Shina uwayilo uze wakuliamba ngwo, wakukaula Yesu Kristu watamba kukolweza atu jo hanga ase jita nyi? Yika Mbimbiliya yakwamba ha chikuma chino?

Chize mayingeleja akulinjisa-njisa mu sango ja jita

Putu lume ku matangwa akunyima, mayingeleja anji kanji-kanji te kakutayiza ni kukundwiza jita aku malionga ngwo kanazange kuneha sambukila. Ha miaka yinji, Yela ja Yehova kakusolola ulembekese wacho wa mayingeleja. Tala yilweza yimwe yize yili mu mikanda yetu.

Mukanda umwe, wasolola ngwo akwa-yingeleja ya Katolika e alingishile mba ashihe atu anji ni kulionga ngwo atu jacho kashihile mu jina lia Zambi ni Kristu.—As Cruzadas: uma ‘trágica ilusão’’
Mukanda watala ha yingeleja ya Katolika mu África wasolola chize mayingeleja ahonene kukinda jita hakachi ka minyachi, hanga ahone kulishiha ene.
Mitwe yakwamba ngwo “Shina Mayingeleja e Akwete Mulonga?,” “Mulimo wa Mayingeleja mu Jita Jize Anase Atu,” ni “Mayingeleja Kanalinjisa mu Jita,” yinalumbununa ngwo, mangana a mu Katolika, Ortodoxa ni Protestante eswe kakukwasa jita jinji.

Shina uwayilo wa Akwa-Kristu watamba Kukwasa Jita?

Yesu kalongesele ngwenyi: “Ukazange mwenyembo we ngwe wakulizanga yena mwene.” (Mateu 22:39) “Zangenu akwa kole jenu.”—Mateu 5:44-47.

Nyongenu ha chino: Shina chamwenemwene yingeleja muyihasa kwamba ngwo yakukaula shimbi ya Yesu yakulizanga umwe ni mukwo nyi kakukolweza atu jo hanga alishihe ene mu jita? Tala kumbululo ha yikuma yinambe ngwo: “Os cristãos verdadeiros e a guerra” ni “É possível amar os inimigos?”

Yesu kambile ngwenyi: “Wanangana wami hi wa hashi ko. Nyi kachi Wanangana wami wapwa wa hashi, kachi tumbaji twami jita anase, hanga kechi kangukunjika.” (Yoano 18:36) “Waze eswe manda katana kumakatoka ku katana.”—Mateu 26:47-52.

Nyongenu ha chino: Nyi akwa-Kristu kakashile jita hanga akalile Yesu, shina katamba kwasa jita hanga akalile chuma cheswacho? Tanga chikuma chinambe ngwo, “A Guerra é Compatível com o Cristianismo?” hanga chize akwa-Kristu akukaula chilweza ni malongeso ja Yesu ni ushishiko weswe.

Yika muyikalingiwa ku mayingeleja waze akulinjisa mu jita?

Mbimbiliya yakwamba ngwo Zambi keshi kutayiza mayingeleja waze akuliamba ngwo kakumanyinako Yesu alioze mahona kukaula malongeso jenyi.—Mateu 7:21-23; Titu 1:16.

Mukanda wa Usolwelo unambe ngwo Zambi kakumona mayingeleja jacho ngwo kali ni chiteli ha kufwa cha “waze eswe ashihile hashi.” (Usolwelo 18:21, 24) Mba unyingike mumu liaka, tanga chikuma chinambe ngwo: “O que é Babilônia, a Grande?”
Yesu kasolwele ngwenyi mayingeleja eswe waze Zambi makalituna makaanongesa mumu lia yitanga yo yipi, ngwe chizechene “makambila mu kahia” mutondo upi uze wa kwima mihuko yipi. (Mateu 7:15-20) Tanga chikuma chinambe ngwo, “Songo lia Mayingeleja Linakundama!” hanga umone chize yino muyikalingiwa.

Yela ja Yehova Kalisa Chinji

Mu Russia ni Ucrânia ni yifuchi yikwo, Yela ja Yehova kakwononokena shimbi ya Yesu yakuhona kulinjisa mu yuma ya mafwefwe ni kwasa jita. Kashika, kutushi kulinjisa mu yikokojola yacho. Yela ja Yehova amwe kakwamwesa lamba linji mumu lia kufupa kukaula yize Mbimbiliya yakwalongesa. (Yoano 15:19, 20; 2 Timoteu 3:12) Chakutalilaho, nguvulu wa Rússia kasa Yela ja Yehova anji mu mazuwo aususu ni kwamwesa lamba linji mumu lia chikuma chacho. Yatambula ni yihela yetu yize te twakulikungulwila ni kuwayila Zambi. Mba unyingike nawa sango jikwo ha chikuma chino ya ha www.jw-russia.org.

Tala chinema cha minutu yiwana chinambe ngwo, Testemunhas de Jeová em Irkutsk continuam fiéis, apesar das invasões domiciliares violentas hanga umone chize Yela ja Yehova mu Rússia anaahungumiona mumu lia ufulielo.
Yela ja Yehova kaanyingika mumu lia nyonga lio lia kwehuka yuma ya mafwefwe. Tala chinema chinambe ngwo, Kumana Ngu mu Yihungumiona hanga umone chize ayo anungine ni kwehuka yuma ya mafwefwe chipwe ngwe kaahungumionene chinji Alemanha ya A-Nazi ni União Soviética.

Yako ha site yetu hanga unyingike yuma yinji hakutwala ku ufulielo wetu, kuchingako ni chilakenyo cha mu Mbimbiliya chinambe ngwo, hashi kuhechi kapwa nawa jita. (Izaia 2:4; Jeremia 29:11) Nyi unazange kunyingika nawa sango jikwo tunakwite hanga utusanyike.

Yizulie kukatuka ku chipipa ni ku utata jakutwaha kuli: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mu chizavu chatala ha mayingeleja eswe a mu Ucrânia avuluka ngwo UCCRO, muli mayingeleja 15 waze amanyinako mayingeleja a Ortodoxa, Gregas ni Katolika Romana, Protestante ni Evangélica hamuwika ni mayingeleja a Judaismo ni Muçulmano.