Jita mu Ucrânia Yinayi ni Kulinga Miaka Yaali—Kutalatala Chika Mbimbiliya Yakutwaha?

Liamatano 24 ya Fevereiro 2023, jita yipi yize yinalingiwa mu Ucrânia yakumbanyisa mwaka. Kulita ni jimwe sango, unji wa maswalale 300,000 a mu Rússia ni a mu Ucrânia kafwa ku jita yacho hanji kulemana. Chikwo nawa, jita yacho yashiha atu waze hi maswalale ko unji wa 30,000. Alioze, nyi mutwalula kanawa atu waze afwa ku jita yino mahasa kupwa anji kuhiana.

Chaluyinda, chinasoloka ngwe jita yino kuyichi kuhwa ni hakamwihi.

• “Kwasala hakehe tukumbanyise mwaka chize haze maswalale a Rússia anjilile mu Ucrânia, nawa kukushi nichimwe chize chinasolola ngwo jita yacho yinayi ni kuhwa. Kukushi niyimwe yize yinasolola ngwo chimwe cha ku yifuchi yacho muchikumba, chikwo nawa, chinasoloka ngwe yifuchi yino yaali kuyazangile kulivwashana.”—NPR (National Public Radio) 19 ya Fevereiro 2023.

Atu anji kananenganyana mumu lia yikola ni lamba lize jita yino ni jita jikwo yaneha hali atu waze keshi chitela nichimwe hashi heswe. Shina Mbimbiliya yakutwaha chimwe kutalatala? Shina tangwa limwe jita jeswe mujiza kahwa?

Jita yize muyikahwisa jita jeswe

Mbimbiliya yakuhanjika ha yimwe jita yize muyikalamwina atu hi kwanongesa ko. Jita yacho kanayivuluka ngwo Armagedone; yize analumbununa ngwo, “jita ya tangwa linene lia Zambi Mukwa-Ndundo-Jeswe.” (Usolwelo 16:14, 16.) Kupalikila mu jita yacho, Zambi makanongesa manguvulu eswe a hano hashi waze akukoka jita jize jakupihisa yuma. Mba unyingike chize Armagedone muyikaneha sambukila ya mutolo, tanga yikuma yino:

• “Jita ya Armagedone Yika?”

• “Armagedone Yili Lusango Mupema!”