Manguvulu Kanambe Ngwo Armagedone Yinambe Kulingiwa—Yika Mbimbiliya Yakulongesa?

Liakasoka chimene ha tangwa 10 lia Outubro, 2022, Akwa-Rússia yatuma mata a mbomba mu mambonge a Ucrânia. Chino kachilinganga hanga akumbulule ha tendazundu yize yochanga chau chinene chize chakununga Crimeia ni Rússia. Yino yeswe yalingiwa ha amwe mashimbu chize haze manguvulu amwe ambile ngwo, kwasala hakehe Armagedone muyihasa kulingiwa.

• “Kanda tuchipalika mu yimwe Armagedone chize ha shimbu lia [Presidente wa mu Estados Unidos John F.] Kennedy ni mbomba ja mu chifuchi cha Cuba. . . . Ngunamono ngwami nyi mazachisa mata anene-anene a mbomba chino muchihasa kuneha Armagedone.”—Presidente wa mu Estados Unidos Joe Biden, 6 Outubro, 2022.

• “Ngunatayiza ngwami yino muyipwa Armagedone, muyineha ponde yinji hashi heswe.”—Presidente wa mu Ucrânia Volodymyr Zelensky, muze te anahanjika hakutwala ku lamba lize mulizako ha kuzachisa mata anene-anene a mbomba, BBC News, 8 Outubro, 2022.

Shina kuzachisa mata anene-anene a mbomba che muchineha Armagedone? Yika Mbimbiliya yakulongesa?

Shina kuzachisa mata a mbomba che muchineha Armagedone?

Ka. Liji “Armagedone” liakusoloka kamuwika mu Mbimbiliya, ha Usolwelo 16:16. Liji lino kuliatalile ha jita yize yifuchi yimwe yakwasa ni yifuchi yikwo, alioze linatale ha jita ya Zambi ni “mianangana a yifuchi yeswe ya hashi.” (Usolwelo 16:14) Zambi makazachisa jita ya Armagedone hanga akanongese manguvulu eswe a hashi.—Daniele 2:44.

Mba unyingike nawa yize jita ya Armagedone muyikalinga hano hashi, tanga chikuma O Que é a Batalha do Armagedom?

Shina hashi ni atu eswe aliho makaanongesa ku jita ya mata anene-anene?

Ka. Chipwe ngwe hanji manguvulu makazachisa mata jacho kulutwe, nihindu Zambi keshi kecha hanga hashi anongeseho. Mbimbiliya yinambe ngwo:

• ‘Hashi muhasala chizechene ku miaka yeswe.’—Chilumbununyi 1:4.

• “Akwa ululi kumakazuka chifuchi; kumakatwamamo ku miaka ya mutolo.”—Samu 37:29.

Chipwe chocho, uprofeto wa mu Mbimbiliya ni yuma yize yinalingiwa hano hashi yinasolola ngwo, kwasala hakehe hanga songo lize. (Mateu 24:3-7; 2 Timoteu 3:1-5) Fupa kunyingika yize Mbimbiliya yakwamba hakutwala ku yuma ya kulutwe lia matangwa kupalikila mu longeso lia Mbimbiliya liawana.