Shina Armagedone Muyikaputukila mu Israel?—Yika Mbimbiliya Yakulongesa?

Mbimbiliya yakusolola ngwo, Armagedone hi jita ko yize muyilingiwa mu chifuchi chimuwika, alioze yili jita yize Zambi makasa ni manguvulu ja atu.

• ‘Sango jacho jinakatuka kuli andemoniu . . . ni kuya kuli mianangana a hashi heswe . . . mukuakungulwila ku jita ya tangwa linene lia Zambi Mukwa-Ndundo-Jeswe. Ayo akungulwile mianangana hamuwika mu chihela chize avuluka mu Hepreu ngwo, Armagedone.’—Usolwelo 16:14, 16.

Liji “Armagedone” linakatuka mu limi lia Hepreu Har Meghid·dohn linalumbunuka ngwo, “Mulundu wa Megidu.” Megidu yapwile yimwe mbonge mu Izalele ya ku shakulu. Kashika atu amwe akutayiza ngwo, Armagedone muyikaputukila mu Israel. Alioze, mbonge ya Megidu chipwe lume yihela yikwo ya ku Oriente Médio hi yinene-yinene ko chinji mba yihase kukumbana “mianangana a hashi heswe” hamwe ni maswalale jo.

Mukanda wa Usolwelo kausonekene mu “yilayi” hanji ngwetu mu yijimbikilo. (Usolwelo 1:1) Kashika, liji Armagedone kulishi kutala ha chimwe chihela, alioze ha yize muyikalingiwa muze manguvulu a hashi heswe makalikunga hamuwika hanga akase jita ya kasula ni Zambi.—Usolwelo 19:11-16, 19-21.