Nguvulu Muka Yena Musakula?—Yika Mbimbiliya Yakulongesa?

Ha poso jize mujihataho, mukulingiwa eleições mu yifuchi yinji hano hashi. Atu kanakwate yiyulo yilemu hakutwala kuli nguvulu yoze masakula hanga aayule.

Yika Mbimbiliya Yakulongesa?

Ndundo ja manguvulu ja atu jili ni haze jasulila

Mbimbiliya yakusolola haze hasulila ndundo ja manguvulu eswe a atu.

• “Kanda nufuliela yilolo, hanji umwe mwana mutu yoze keshi kuhasa kukwasa. Mwiku wenyi muwiza kumukatuka, mahilukila ku mavu. Tangwa lioliene manyonga jenyi majimuka.”—Samu 146:3, 4.

Chipwe manguvulu waze akuhasa kulinga yuma kanawa, nihindu tangwa limwe kumafwa. Chikwo nawa, keshi kuhasa kwamba ngwo, yuma yipema yize alinga muyikanunga chizechene muze o mahwisa kuyula cho.—Chilumbununyi 2:18, 19.

Umwenemwene uli ngwo, Mbimbiliya yakusolola pundu ngwo, atu kakaatangile ni uhashi wa kuliyula ene.

• Kuchatwamine muli mukwa kwenda kusongwela mashimbo jenyi.”—Jeremia 10:23.

Shina kuli nguvulu yoze mahasa kuyula kanawa atu?

Nguvulu yoze Zambi hanasakula

Mbimbiliya yakwamba ngwo, Zambi hanasakula nguvulu wambwende; yoze mutuhasa kujikijila, Yesu Kristu. (Samu 2:6) Yesu kali Mwanangana mu Wanangana wa Zambi, uze unayulu mu malilu.—Mateu 6:10.

Muzanga kusakula Yesu hanga akuyule? Mbimbiliya yinasolola ulemu wa kusakula Yesu hanga atuyule:

• ‘Halisenu mwe Mwana [Yesu Kristu], kuchina Zambi matenuka mba munukuwa mu jila, mumu utenu wenyi muusasaminya washi. Kawaha waze eswe akuswama muli iye.’—Samu 2:12.

Wano e mashimbu waze watamba kukwata chiyulo cha kusakula nguvulu yoze makuyula. Uprofeto wa mu Mbimbiliya unasolola ngwo, Yesu kaputukile kuyula ha mwaka 1914, nawa ngwo, kwasala hakehe Wanangana wa Zambi muunongesa manguvulu eswe a atu.—Daniele 2:44.

Mba unyingike kanawa chize muhasa kukwasa kuyula cha Yesu, tanga chikuma chinambe ngwo, “Kwasa Wanangana wa Zambi Haliapwila!”