Atu Waze Atala ha Kupwa Kanawa ku Mwono Kanahane Utowezo wa Chize Redes Sociais Yinapinjisa Akweze—Yika Mbimbiliya Yakulongesa?

Ha 23 Maio, 2023, atu waze atala ha kupwa kanawa ku mwono mu Estados Unidos, kanakatoweza atu ha chize redes sociais yinapinjisa akweze.

• “Chipwe ngwe redes sociais muyihasa kukwasa chinji twanuke ni akweze, alioze kuli yuma yinji yize yinasolola ngwo redes sociais muyihasa nawa kuneha ponde yinene ku manyonga ni ku mwono wa twanuke ni akweze.”—Redes Sociais e Saúde Mental dos Jovens: Comunicado do Cirurgião-Geral dos EUA, 2023.

Kuhengwala chino chasolwele yuma yize yinapikalisa atu.

• Akweze ali ni miaka 12 ni 15 “waze akuzachisa redes sociais ha maola atatu ha tangwa, kali mu ponde yinene ya kupwa ni musongo wa mahesu-hesu, ngwe wa kuhonga ku mbunge ni kusakalala.”

• Kuhengwola chize alingile kuli akweze a miaka 14, chasolwele ngwo “kuzachisa chinji redes sociais, chakutokesa tulo ni kutwala akweze alisosombe ha internet, ahone kuwahilila ni mijimba yo, kupwa ni musongo wa kuhonga ku mbunge, chipi-chipi kuli ana-mapwo.”

Kuchi yisemi mahasa kufunga ana jo ku ponde yino? Mu Mbimbiliya muli yihulo yipema hakutwala ku chikuma chino.

Yize yisemi mahasa kulinga

Linga yize muhasa. Yisemi katamba kunyonga ha ponde yize muyizako ha kuzachisa redes sociais ni kutesa nyi ana jo mahasa kuyizachisa nyi ka.

• Chiyulo cha Mbimbiliya: “Fumba mwana mu jila yize chamutamba kuya.”—Yishima 22:6.

• Nyi unazange kunyingika yikuma yikwo, tanga chikuma “Devo Deixar Meu Filho Usar Redes Sociais?”

Nyi mutayiza ngwe mwane katamba kuzachisa redes sociais, kanyama ha kunyingika ponde jize mujihasa kusoloka ni kunyinga chize akuzachisa internet. Kuchi muhasa kuchilinga?

Funga mwane ku sango jize mujihasa kumusa mu ponde. Longesa mwane anyingika ni kwehuka sango jize mujihasa kumusa mu ponde ha internet.

• Chiyulo cha Mbimbiliya: “Utanji ni luchisa mweswe, chipwe kuzo kanda ayivuluka hakachi kenu, . . . chipwe yitanga ya sonyi, chipwe sango ja uhepuke, chipwe miselo yize kuyalitele.”—A-Efwesu 5:3, 4.

• Mba uwane ukwaso ukwo, tanga chikuma “Ensine seu Filho Adolescente a Usar as Redes Sociais com Segurança.”

Sako jimwe shimbi. Tesa shimbu lize mwane mahasa kuzachisa redes sociais ni maola waze malinga muze anayizachisa.

• Chiyulo cha Mbimbiliya: “Kanyamenu hanga nuchine kwenda ngwe yihepuke . . . Kanda nukisa mashimbu jenu.”—A-Efwesu 5:15, 16.

• Zachisa chinema cha kufunjeka: Kanyama ha Kuzachisa Internet hanga ukwase mwane anyingike mumu liaka chili chilemu kusa shimbi ha kuzachisa internet.