Yize Mulinga Mba Uwahilile Muze Unapalika mu Yipikalo—Yika Mbimbiliya Yakulongesa?

Ha mashimbu wano akalu tuli, muchihasa kupwa chikalu kunyingika kanawa yuma yize muyihasa kulingiwa ku mwono wetu. Chipwe chocho, kanji-kanji, uwahililo wetu wakutala ha manyonga jetu hi ha yize ko tunapalika ku mwono. Mbimbiliya yakwamba ngwo, chipwe ngwe kanapalika mu yipikalo yeswayo, nihindu atu waze akwete “mbunge ya chiseke, yapwa ngwe festa yize kuyishi kuhwa.” (Yishima 15:15) Yika mutuhasa kulinga hanga tuwahilile? Tala chize shimbi ja mu Mbimbiliya mujihasa kukukwasa ha chikuma chino.

Sako tachi ukumbe kusakalala

Mbimbiliya yakwamba ngwo: “Kulema mu mbunge ya mutu kuchakumuhongesa, alioze liji lipema kuliakumuwahisa.”—Yishima 12:25.

• Mbimbiliya muyihasa kukukwasa hanga uhone kusakalala chinji. Mba uwane sango jikwo, tanga chikuma “Yize Mbimbiliya Yakwamba Hakutwala ku Kusakalala.”

Ehuka kulivwa ukawe

Mbimbiliya yakwamba ngwo: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.”—Yishima 17:17.

• Mu Mbimbiliya muli yiyulo yize muyihasa kukukwasa hanga uhone kulivwa ukawe ha kupwa ni masepa apema. Tanga chikuma, “Kumba Kapinda wa Kulivwa Ukawe ha Kupwa ni Masepa—Chize Mbimbiliya Muyihasa Kukukwasa.”

Zanga Zambi ni enyembo je

Mbimbiliya yakwamba ngwo: “Zanga Yehova Zambi ye, ni mbunge ye yeswe, ni mwono we weswe ni kunyonga che cheswe. . . . Zanga mwenyembo we ngwe chize wakulizanga yena mwene.”a—Mateu 22:37-39.

• Kulemba muchihasa kutukwasa kupwa masepa ja Zambi. Mba unyingike sango jikwo, tanga chikuma “Shina Zambi Kakwivwa Yilemba Ye?”

• Twakusolola zango lietu hali akwetu muze twakukaula Shimbi ya Oru. Mba uwane sango jinji, tanga chikuma “Shimbi ya Oru Yika?”

Hanji muzanga kulilongesa Mbimbiliya hanga unyingike chize muhasa kuwahilila muze unapalika mu yipikalo. Mba uhase kuchilinga, tunakusanyika hanga ulilongese Mbimbiliya ni yetu chawana.