Shina Wanangana wa Zambi Uli Chuma Chize Chatwama mu Mbunge ya Mutu?
Kumbululo lia mu Mbimbiliya
Ka, Wanangana wa Zambi hi chimwe chuma ko chize chatwama mu mbunge ya Mukwa-Kristu.a Mbimbiliya yakusolola ku chihela kuze kwatwama Wanangana wacho, muze yakwamba ngwo, “Wanangana wa malilu.” (Mateu 4:17) Tala chize Mbimbiliya yakusolola ngwo Wanangana uli umwe unguvulu mu malilu.
Wanangana wa Zambi ukwete akwa-kuyula, atu waze akupwa kuyula, shimbi ni mulimo wa kumanununa upale wa Zambi mu malilu ni hashi.—Mateu 6:10; Usolwelo 5:10.
Unguvulu hanji ngwetu Wanangana wa Zambi, muukayula “akwa mavungu eswe ni minyachi yeswe, ni malimi eswe” a hashi. (Daniele 7:13, 14) Chiyulo chacho kakamuhelecho kuli atu, alioze kuli Zambi mwene.—Samu 2:4-6; Izaia 9:7.
Yesu kambile ngwenyi, apostolo jenyi ashishika makapwa no hamuwika mu malilu hanga ‘akatwame ha ngunja.’—Luka 22:28, 30.
Wanangana wa Zambi ukwete akwa-kole jawo, alioze akwa-kole jacho eswe maakanongesa.—Samu 2:1, 2, 8, 9; 110:1, 2; 1 A-Korindu 15:25, 26.
Mbimbiliya kuyishi kulongesa ngwo, Wanangana wa mu malilu watwama mu mbunge ya mutu hanji ngwetu wakuyula mu mbunge ya mutu. Alioze yakusolola ngwo, “liji lia Wanangana” hanji “sango lipema lia Wanangana” mulihasa kutukwata kumbunge ni kwalumuna mbunge yetu.—Mateu 13:19; 24:14.
Maliji akwamba ngwo “wanangana mukachi kenu uli” yika analumbunuka?
Chuma chimwe chize chakupinjisa atu hakutwala ku kuze Wanangana watwama, chili chize Mbimbiliya jimwe jakulumbununa chisoneko cha Luka 17:21. Chakutalilaho, Mbimbiliya ya Almeida, revista e atualizada, yakwamba ngwo: “wanangana wa Zambi uli muchima lienu.” Nyi tunazange kuwana ulumbunwiso walita wa chisoneko chino twatamba kunyingika yize yisoneko yikwo yakwamba.
Wanangana kuwakapwile mu mbunge ja A-Fwaliseu atu waze apwile ni kulizata
Yesu te kanahanjika ni A-Fwaliseu, chimwe chizavu cha mangana a yingeleja waze apwile akwa-kole jenyi, chikwo nawa atwamine punga hanga amushihe. (Mateu 12:14; Luka 17:20) Shina te muchilita Yesu kwamba ngwenyi, Wanangana wapwile chimwe chuma mu mbunge ja A-Fwaliseu atu waze apwile ni kulizata? Yesu yamba kuli ayo ngwenyi: “Muchima nunazala too ni ulembese ni uhulia.”—Mateu 23:27, 28.
Mbimbiliya jikwo jakulumbununa kanawa maliji a Yesu ali ha Luka 17:21, ngwo: “Wanangana wa Zambi mukachi kenu uli.” (O grifo é nosso; Nova Versão Internacional) “Wanangana wa Zambi uli hamwe ni yenu” (Tradução do Novo Mundo) Wanangana wa mu malilu wapwile “mukachi” ka A-Fwaliseu hanji ngwetu hamwe no mumu Yesu yoze asakwile kuli Zambi ngwe Mwanangana, kapwile hamuwika ni ayo, kulutwe lio.—Luka 1:32, 33.
a Mayingeleja anji kakulongesa ngwo, Wanangana wa Zambi watwama mu mbunge ya mutu ni mutu. Chakutalilaho, mu Estados Unidos, Convenção Batista ya ku Sule yakwamba ngwo, Wanangana wa Zambi uli “chiyulo cha Zambi ku mbunge hanji ku mwono wa mutu.” Chizecchene nawa, Papa Bento XVI kasonekene ha mukanda wenyi Jesus de Nazaré ngwenyi, “Wanangana wa Zambi wakwiza ku mbunge yize yakwononoka.”