Samu 46:10—“Holenu, Nunyingike, Yami Zambi”

“Holenu, nunyingike, yami Zambi. Mungukanangama hakachi ka mavungu; mungukanangama hashi heswe.”—Samu 46:10, Mukanda Usandu wa Zambi.

“Litwaminenu kubinda, nyingikenu ngwenu, yami nguli Zambi; nakuyula mavungu, nakuyula akwa hashi eswe.”—Samu 46:10, Mukanda wa Zambi 1991.

Ulumbunwiso wa Samu 46:10

Zambi kanazange hanga atu eswe amuwayile ni kunyingika ulite wenyi wa kuyula hashi heswe. Atu waze anazange kutwama ku miaka ya mutolo, katamba kunyingika ni kutayiza ngwo, Zambi kali ni ndundo ja kutuyula, chikwo nawa iye wika mwe watela kutuyula.—Usolwelo 4:11.

“Holenu, nunyingike, yami Zambi.” Mbimbiliya jimwe jakulumbununa liji “Holenu” ngwo, “litwaminenu kubinda.” Chino chakutwala atu anji kunyonga ngwo maliji “holenu, nunyingike, yami Zambi,” kanalumbunuka kuhola muze anawayila mu yingeleja yo hanga asolole vumbi. Alioze, maliji wano kanasolola ngwo, Yehovaa kanatoweza yifuchi yeswe hanga eche kulimika nenyi ni kunyingika ngwo, iye wika mwe twatamba kuwayila.

Utowezo ngwe uno twakuuwana ha Samu 2. Ha mukanda wacho, Yehova kanalakenya kunongesa waze akulimika ni iye. Alioze, atu waze akutayiza kuyula cha Zambi, kakujikijila muli iye hanga aasongwele ni kwaha tachi ni mana. Ayo kakuwahilila ha ‘kuswama muli iye’ muze anapalika mu yipikalo.—Samu 2:9-12.

“Mungukanangama hakachi ka mavungu; mungukanangama hashi heswe.” Ku miaka ya kunyima, Zambi kapwile ni kumuhalisa muze te akuzachisa ndundo jenyi hanga afunge atu jenyi. (Kutuhuka 15:1-3) Kulutwe lia matangwa, makamuhalisa kuhiana, muze atu eswe hano hashi makatayiza kuyula chenyi ni kumuwayila.—Samu 86:9, 10; Izaia 2:11.

Amwe maliji hakutwala ku mukanda Samu 46:10

Umwe mukanda wakwamba ngwo, mukanda wa Samu 46 uli “mwaso uze atu ja Zambi embile hanga ahalise Zambi yoze wakulamwina atu jenyi ni ndundo.” Muze ayo embile mwaso uno, kasolwele ngwo kakujikila ha ukwaso wa Yehova. (Samu 46:1, 2) Maliji a mukanda uno, unakaewulula ngwo Yehova kali hamwe no mashimbu eswe.—Samu 46:7, 11.

Mba akolese ujikijilo wo muli Yehova ni ndundo jenyi ja kwafunga, mukanda wa Samu 46 wakwashile kunyonga ha milimo ya Zambi wa ndundo. (Samu 46:8) Chekwamba, wakwashile kulihulikila ha ndundo jenyi ja kuhwisa jita. (Samu 46:9) Yehova kahwishile jita ku mashimbu a kunyima, ha kufunga atu jenyi kuli akwa-kole. Kashika, Mbimbiliya yakutulakenya ngwo, Zambi makahwisa jita hashi heswe.—Izaia 2:4.

Shina Yehova kakukwasa tuvumbi twenyi ni musono? Ewa. Kwamba pundu, postolo Paulu kakolwezele Akwa-Kristu kujikijila muli Yehova hanga aakwase. (A-Hepreu 13:6) Maliji waze ali ha Samu 46, kakutujikijisa hanga tufuliele muli Zambi hanga atukwase. Chikwo nawa, kakutukwasa kumona Zambi ngwe “uchinyino wetu ni tachi jetu.”—Samu 46:1.

Tala chinema chino chikehe hanga chikukwase kumona yikuma yili mu mukanda wa Masamu.