Samu 37:4—“Wahilila Nawa Muli YEHOVA”

“Wahilila nawa muli Yehova, iye kumakwaha cheswe unazange mu mbunge ye.”—Samu 37:4, Mukanda Usandu wa Zambi.

“Wahilila muli Mwene Zambi, neye makwaha yize unazange.”—Samu 37:4, Mukanda wa Zambi 1991.

Ulumbunwiso wa mukanda wa Samu 37:4

Mukwa-kwimba masamu kanakolweza tuvumbi twa Zambi awahilile ni usepa wo upema ni Yehovaa. Waze eswe ali ni usepa upema ni Yehova, mahasa kupwa ni shindakenyo ngwo, iye makamanununa yize yili mu mbunge yo kulita ni upale wenyi.

“Wahilila nawa muli Yehova.” Mbimbiliya jikwo jakulumbununa maliji wano ngwo ‘wahilila ha kulingila MWENE’ hanji ‘wahilila ha yize MWENE anakulakenya.’ Mu maliji akwo, maliji wano kanalumbunuka ngwo, yetu twatamba ‘kuwahilila’ ha kuwayila Zambi wamwenemwene. (Samu 37:4) Mumu liaka tunambe chocho?

Waze akuwayila Yehova kakunyingika yuma hakutwala kuli iye mu Mbimbiliya, chikwo nawa, ayo kakunyingika yuma yize Zambi akuzanga ni yize keshi kuzanga. Ayo kananyingika ngwo, katambile wika kunyingika Zambi, alioze katamba nawa kumwononokena. Muze akuchilinga, kakupwa ni mbunge yitoma, chikwo nawa chakwafunga ku yuma yipi ni yiyulo yize kuyalitele. (Yishima 3:5, 6) Ngwe chilweza, ayo keshi kwecha ufwatulo ni chipululu yachize sambukila ya ku mbunge, muze akumona atu waze akwete kuzo ni yitanga yipi mafumbuka kanawa ku mwono. (Samu 37:1, 7-9) Atu ja Zambi kakuwahilila ha kunyingika ngwo, kwasala hakehe, iye mahwisa yuma yeswe yipi ni kuwahisa waze akushishika ha kumwononokena. (Samu 37:34) Chikwo nawa, ayo kakuwahilila chinji ha kunyingika ngwo, kali ni utayizo wa Tato wa mu malilu.—Samu 5:12; Yishima 27:11.

“Iye kumakwaha cheswe unazange mu mbunge ye.” Maliji wano mahasa nawa kulumbunuka ngwo, ‘iye makumbulula yilemba ye,’ hanji ‘iye makwaha yize unazange chinji.’ Alioze, chino kuchalumbunukine ngwo, Yehova makumbulula yilemba yeswayo. Chizechene ngwe umwe tata mupema, Yehova neye kananyingika kanawa yuma yize ana Jenyi akuzanga. Chikwo nawa, yuma yize twakwita mu yilemba ni mwono uze twakumbata, yatamba kulita ni shimbi ni upale wenyi. (Yishima 28:9; Tiangu 4:3; 1 Yoano 5:14) Nyi twachilinga, mutuhasa kukundama kuli yoze “Wakwivwa kulemba” ni kupwa ni shindakenyo ngwetu, iye matwivwa.—Samu 65:2; Mateu 21:22.

Amwe maliji hakutwala ku mukanda wa Samu 37:4

Samu 37 yili ya Mwanangana Ndawichi. Iye kayisonekene ha kukaula kulita cha chize sona japwa hanji mu mutapu wa sona jize mujihasa kusolola ulumbunwiso wa yimwe.b

Ndawichi kamulingile yuma yinji yipi. Iye kachinyine muze ambile kumushaha kuli Mwanangana Saulu ni atu akwo. (2 Samuele 22:1) Chipwe chocho, Ndawichi nihindu kanungine ni kujikijila muli Zambi. Iye te kananyingika ngwenyi, ha shimbu yalita, Yehova monwona yingulungulu. (Samu 37:10, 11) Kashika, chipwe ngwe yingulungulu kanafumbuka kanawa ku mwono, nihindu makaateta ngwe ‘mwambu [hanji yambu] ya wisu.’—Samu 37:2, 20, 35, 36.

Mukanda wa Samu 37, unatese yuma yize muyikalingiwa kuli waze akukaula shimbi ja Zambi ni kuli waze keshi kujikaula. (Samu 37:16, 17, 21, 22, 27, 28) Kashika, samu yino yakutukwasa kupwa ni mana ni kupwa nawa mutu yoze uli ni utayizo wa Zambi.

Tala chinema chino chikehe hanga chikukwase kumona yikuma yili mu mukanda wa Masamu.