Chikwata Chimwe Chalipwila cha Kulongesa Nacho Atu Mbimbiliya

Ha Janeiro ya 2021, Chizavu cha Tusongo chatwile mutambi wa kutuhwisa mukanda waha wa kulongesa nawo Mbimbiliya, Wahilila ku Mwono ku Miaka Yeswe!a Kuchi wevwile ha mutambi wacho? Matthew, yoze watwama mu Canadá, yamba ngwenyi: “Nevwile kuwaha chinji! Nawahililile chinji lume hakwivwa pande ni yinema yize yalumbunwine yize asonekenene mukanda wacho ni kusolola nawa chize awesekele amone nyi unawaha. Napwile ni kushimbwila nguumone hanga nguputuke kuuzachisa.”

Kuli jila yaha yize mutupwa ni kuzachishilamo mukanda Wahilila ku Mwono ku Miaka Yeswe! hakusongwela malongeso a Mbimbiliya. Alioze, kuli nawa kalisa mukwo ni mikanda yeka yikulu. Muze muzachisa mukanda wacho muwivwa ngwe uli mukanda umwe walipwila. Tuhengwolenu mukanda wacho kanawa hanga tumone yize tunambila ngwetu uli umwe mukanda walipwila.

Mukanda Waha Walipwila

Mapapilo alemu. Mumu liaka mukanda Wahilila ku Mwono ku Miaka Yeswe! uli ni mapapilo alemu? Mumu uli ni unji wa yizulie yipema 600, kuhiana mukanda Kutulongesa. Mukanda waha uli nawa ni mafwo anji waze keshi ni chimwe. Ayi ye azachishilile mapapilo alemu, nyi ka, kachi yizulie yili sali limwe muyipwa ni kusoloka ni ku sali likwo. Yeyize mandumbu a ku chipwatulo avuluka ngwo International Printing Department (IPD), ku Wallkill, Nova York, EUA, esekele kuufwambisa ha mitapu yiwana ya mapapilo alisa. Kulutwe, Komite ya Redação yiyihengwola mapapilo jacho ni kusakula papilo lize liapwile lilemu kuhiana mapapilo akwo. Chipwe ngwe papilo liacho linafwika mbongo jinji kuhiana mapapilo azachisa ha mikanda yikwo, alioze chuma chilemu chili kukwasa alongi a Mbimbiliya atange hita lifwo lia mukanda Wahilila ku Mwono ku Miaka Yeswe! chakuhona kwalumbanganyisa ku yizulie yili sali likwo lia lifwo.

Chifukilo chalisa. Chifukilo cha mukanda Wahilila ku Mwono ku Miaka Yeswe! chinalise chinji ni yifukilo ya mikanda yeka, mumu kalamikineho yimwe yize muyifunga mukanda wacho. Ha chifukilo chacho kalamikineho yimwe yize yinasolola kanawa yizulie yize yiliho. Yuma yize alamika ha chifukilo chacho muyifunga nawa mukanda hanga uhone kulienyeka mumu lia kuuzachisa chinji. Ngwe chize hitwamba kulu, yize alamika ha chifukilo chacho yinafwika mbongo jinji kashika, mitango yinji yakalakalila hamuwika hanga awane kuze mapwa ni kuwana yakulamika ha chifukilo chacho yize yili ni ndando yikehe.

Mumu liaka anakasakula mapapilo andando yinene? Ndumbu wakalakala ku chipatulo cha IPD, ngwenyi: “Twamona ngwetu mukanda wacho mauzachisa chinji. Kashika, tunazange hanga ununge ni kusoloka kanawa chipwe ngwe mauzachisa chinji.” Eduardo, yoze wakalakala ku kufwambisa mikanda mu mutango wa Brazil, yamba ngwenyi: “Tunawahilila chinji ha kumona chize ululikiso wa Yehova wazachisa mapapilo apema ha mukanda uno hanga upeme ni kushimbula, tunazachisa kanawa milambu yize akuhana mandumbu.”

Kuufwambwisa ha Mafwo ha Mashimbu a COVID-19

Twaputukile kufwambwisa mukanda Wahilila ku Mwono ku Miaka Yeswe! ha kakweji wa Março 2021. Chapwile chikalu kulinga mulimo wacho ha mashimbu a musongo wa COVID-19. Mumu lia kuyika Mbetele, kutwapwile nawa ni mandumbu waze te akwizaza ni kutukwasa kufwambwisa mikanda kukatuka haze. Chapwile chikalu nawa kusanyika mandumbu aha apwe Mambetelita. Chocho, yipatulo yimwe yakufwambwishila mikanda kuyapwile ni atu anji. Yipatulo yikwo nawa yituyiyika mumu lia shimbi ja nguvulu.

Kuchi twakumbile kapinda wacho? Muze te tunafwambwisa mikanda, mandumbu a ku yipatulo yeka yaatuma akwase ku mulimo wakufwambwisa mikanda. Ndumbu Joel, yoze wakalakala ku IPD, ngwenyi: “Twahashile kulinga mulimo wacho mumu lia mbunge yakulihana yize mandumbu asolwele hanga alilongese kulinga mulimo waha.”

Chipwe ngwe mulimo wacho unakakala chinji, nihindu hitwafwambwisa mikanda yinji ya mukanda Wahilila ku Mwono ku Miaka Yeswe! Kufwambwisa mukanda wacho chinakafupiwa yuma yinji, ngwe yikombola, mapapilo, ulombo ni ulimbo wakulamika nacho mapapilo. Ha tukweji atano wika kukatuka haze tunakaputukila mulimo wacho, tunakazachisa unji wa mbongo kuhiana 2.3 milhões a ndolare. Tunakafwambwisa wika mikanda yize echile mu yikungulwila hanga tuhone kukisa mbongo.

“Mulimo Umwe wa Ulangaji”

Kuchi alongeshi ni alongi a Mbimbiliya anevu ha mukanda uno wa kulongesa nawo Mbimbiliya? Ndumbu Paul wa ku Austrália, ngwenyi: “Ngunazange chinji kusongwela malongeso a Mbimbiliya mumu mukanda Wahilila ku Mwono ku Miaka Yeswe! unapeme chinji. Mukanda wacho wapwa kusoneka kanawa, kashika unakwasa longeshi kushimutwina kanawa ni longi. Muli sango jashi kwivwa, yihula yipema, yinema, yizulie ni yuma yikwo yize yinakwasa chinji alongi. Uli mukanda umwe wa ulangaji uze unakwasa ni yamimwene kulongesa kanawa atu.”

Longi umwe wa mu Estados Unidos, ngwenyi: “Nazanga chinji au mukanda waha. Yizulie yilimo yinangukwasa chinji kunyingika yikuma yilemu. Yinema yilimo yinangukwata chinji ku mbunge ni kungukwasa ngulinge yize ngunalilongesa.” Longi yono kakulilongesa kaali ha poso ni kukunguluka mashimbu eswe.

Tunashimbwila kufwambwisa tununu a tununu a mukanda Wahilila ku Mwono ku Miaka Yeswe! mu malimi anji. Chizavu cha Tusongo hichatayiza kulu kufwambwisa mukanda wacho mu malimi 710, chekwamba, malimi jacho kanahiane chinji malimi waze atayijile kufwambwisa mukanda Kutulongesa!

Mba mbongo jakufwambwisa mukanda wacho kulihi jinakatuka? Jinakatuka ku milambu akuhana ku mulimo wetu wa hashi heswe, yize akuhana kupalikila ha site yetu donate.jw.org. Tunanusakwila chinji ha mbunge yenu yakuhana milambu yize yinakwasa ku mulimo wakufwambwisa yikwata yakulongesa nayo Mbimbiliya hanga atu alilongese hakutwala kuli Yehova ni kupwa ni “mwono ku miaka ya mutolo.”—Samu 22:26.