Kufunga Mazuwo a Wanangana ha Mashimbu a Musongo wa COVID-19

“Mandumbu a mu Chizavu cha Tusongo kanakakolweza mandumbu eswe ngwo, nyi kwapwile ukanjiso wa manguvulu ku yihela kuze atwama, kukatuka ha tangwa 1 lia Abril, mandumbu eswe katamba kulikungulwila mu mazuwo a Wanangana.” Yela ja Yehova a hashi heswe kanakawahilila chinji ni mutambi wacho asele ha site jw.org mu kakweji wa março 2022. Ngwe chize tunanyingika, musongo wa COVID-19 kanda uchihwa.a Mba yika yapwile kulinga hanga waze makunguluka alifunge ku musongo wacho? Shina Mazuwo jetu a Wanangana te achili akufunga kanawa chipwe ngwe kwapalikile miaka yaali chakuhona kukungulukilamo?

Kwamba umwenemwene, mandumbu jetu aliluliekele kulu hanga akungulukile mu mazuwo a Wanangana.

Kahanyine Ukwaso Kulita ni Yize te Yinafupiwa

Ha mwaka 2020 muze atukanjishile kukungulukila mu mazuwo a Wanangana, kwapalikile wika kakweji umuwika mba mandumbu a ku Chishina Chinene waze akutala mu mulimo wa kutunga aputuke kuhengwola chize musongo wa COVID-19 te muukwata ha chize twakuzachisa mazuwo jetu a Wanangana ni yize twatamba kulinga hanga mazuwo jacho apwe akufunga kanawa.

Hita chihela chapwile ni yize te yinafupiwa. Ndumbu Matthew wakalakala mu chipatulo chatala ha yuma ya kutunga kambile ngwenyi: “Ku yihela yimwe kwahonene yikwata yakusanyina ku moko. Chikwo nawa, mumu lia kuhona meya a ku mulonda mu zuwo lia Wanangana, mandumbu te katamba kwalanda hanji kuya ni kwataha ku lwiji. Mu yifuchi yimwe, manguvulu kasele shimbi jeka hakutwala ku chikuma cha kuzachisa (ar-condicionado) hanji ngwetu, chikungo cha kukekemesa mu zuwo ni placa ya sango ja kulinanga.”

Kuchi mandumbu jetu ahashile kukumba yipikalo yacho? Ndumbu Matthew kambile nawa ngwenyi: “Kulanda-landa yikwata ya ndando yikehe che chakwashile kuhwisa kapinda wetu.” Chakutalilaho, mu chifuchi cha Papua Nova-Guiné mandumbu kalanjile mambashila akwete mulonda, waze akunjila njongo ya meya 20. Mandumbu kahashile kusa yikwata yipema ku zuwo lia Wanangana yize yafwikile wika 40 ndolare. Mu África, mandumbu kasele yikwata yipema chinji ya kusanyina ku moko mu unji wa mazuwo a Wanangana 6,000, yikwata yacho kayilanjile mu Ásia.

Mulimo ukwo wapwile kulinga, unatale ha kusalakanyisa yikwata yikulu ya kukekemesa mu zuwo lia Wanangana ni yikwata yaha. Mu mazuwo anji a Wanangana kaselemo yikwata yize te muyikwasa mandumbu ahone kukwata-kwata ku microfone muze anakumbulula. Mandumbu kasele nawa tachi jinji hanga musongo uhone kulitanda ha kukusumuna mashimbu eswe homa haze atu akukwata-kwata ngwe, ku yikolo ni ku mulonda. Mu kumba ja mazuwo amwe a Wanangana mandumbu kanakasamo yikwata ya kusanyina ku moko yize yakukalakala chakuhona kuyipola. Mu chifuchi cha Chile, yikwata yeswe asele mu hita zuwo lia Wanangana yafwikile 1,400 ndolare.

Madumbu kalingile nawa yuma yikwo afunge kanawa milambu yetu. Ku yihela yimwe, mandumbu kazachishile ukwaso uze manguvulu ahanyine wa kulifunga ku musongo. Mandumbu a ku Mitango kalanjile yikwata yinji ha shimbu limuwika kuhiana yize apwile ni kulanda ku mashimbu akunyima hanga afunge kanawa milambu yetu. Mandumbu a ku Mitango ni a mu Chipatulo cha Kulanda Yikwata cha Hashi Heswe, kapwile ni kulanda-landa yikwata kuli ene waze akuyilinga. Chino chapwile ni kutepulwisa ndando ni matangwa waze yikwata yacho te mayituma.

“Au we Ufunge te Ngunafupiwa”

Yikwata yize asele mu mazuwo a Wanangana yakwashile atu anji kulivwa kanawa muze kukunguluka cheka mu zuwo lia Wanangana chaputukile. Ndumbu Dulcine watwama ku Peru kalipikalile chinji muze anyingikine ngwenyi, maaputuka kulikungulwila cheka mu zuwo lia Wanangana. Mwene ngwenyi: “Nakwachikile musongo wa COVID-19 muzemwene waputukile, kashika nevwile woma ngwo, te mungukwachika cheka musongo wacho ha kuya mu zuwo lia Wanangana. Alioze muze nahetele mu zuwo lia Wanangana yingumona ngwami, makulwana a mu chikungulwila kaluliekele yuma yinji hanga atufunge ngwe, kusa chikwachilo ku microfone ni kukusumuna mu zuwo lia Wanangana muze kukunguluka kanda chiputuka ni muze hichahwa. Yuma yeswa ayi yangukwashile kumuna ngwami, auze wapwile ufunge uze te ngunafupiwa.”b

Sara, ndumbu watwama ku Zâmbia nenyi kapalikile mu kapinda walisa, mwene ngwenyi: “Lunga liami kafwile mumu lia COVID-19, kashika nanyongene ha chize te mungulivwa nyi napwa ha kukunguluka ukawami.” Mba yika iye amwene? Ndumbu Sara kanunungu nawa ngwenyi: “Kukunguluka cheka mu zuwo lia Wanangana changukwashile kumona ngwami, Yehova kali hamuwika ni yetu ha matangwa wano a kusula. Musono nakutambula chinji utakamiso ni ukwaso uze ngunafupiwa kuli makulwana ni mandumbu akwo a mu chikungulwila.”

Mandumbu jetu eswe a hashi heswe kanawahilila chinji ha kuputuka kukunguluka cheka mu mazuwo a Wanangana. Tunasakwila chinji ha milambu yenu yize yimwe yapwa kulingila ha site donate.jw.org. Milambu yacho yakwasa hanga yihela ya uwayilo walinanga yipwe yihela yipema, yize muyikwasa mandumbu eswe kulivwa kanawa muze anakunguluka hamuwika.