Kutuhuka
15 Ha tangwa liacho, Mose ni A-Izalele yembila Yehova mwaso uno ngwo:
“Mungwimbila Yehova mumu iye hanangama chinji.
Hambila tuvwalu ni akwa-kwendesa tuvwalu mu kalunga-lwiji.
2 Yehova iye tachi jami ni ndundo jami, mumu iye hapwa ulamwino wami.
Yono mwe Zambi yami, mungumuhalisa, Zambi ya tata, mungumunangamisa.
3 Yehova kali kajita wa ndundo. Yehova lie jina lienyi.
4 Iye kambila matemba a jita a Falau ni tujita twenyi mu kalunga-lwiji,
Tujita twenyi a ndundo kashimbama mu Kalunga-lwiji Muchila.
5 Meya haafuka, o hashimbama ngwe liwe ha mashima.
6 Yehova, kwoko lie lia chindume likwete ndundo jinji,
Yehova, kwoko lie lia chindume mulihasa kufwenya mukwa-kole.
7 Waze akukukatukila, wakwanongesa ni ndundo je jinji,
Wakutuma utenu we usasu, hanga wanongese ngwe mwambu.
8 Ni mwiku wa mu mazulu je, wakungile meya a mu kalunga-lwiji hamuwika,
Meya anji yamana hamuwika.
Meya a kuvwelwoka yalikwata mukachi lia kalunga-lwiji.
9 Mukwa-kole yamba ngwenyi: ‘Mungwakaula, mungwawana!
Mungutambula yikumba yo yeswe yize ngunazange!
Mungutomona katana kami! Kwoko liami mulianongesa!’
10 Wafujile ni mwiku we, kalunga-lwiji yaafuka,
Yashimbama ngwe chikungo chilemu mu meya anji.
11 Yehova, kazambi muka walifwa ni yena?
Iya wakusolola ndundo mu usandu ngwe yena?
Yena yoze atamba kuvwila woma ni kwimbila miaso ya uhaliso, yena yoze wakulinga yikomokeso.
12 Wazundulanga kwoko lie lia chindume, chocho hashi yihaamina.
13 Mu utu wa zango lie wasongwela atu waze wakuula,
Ku tachi je, mwasongwela ku chihela che chisandu kuze watwama.
14 Atu makachivwa, mba makachikima ni woma,
A-Filistea makevwa mwongo unji.
15 Kashika miata ja minyachi ya Endome makachikima ni woma,
Manguvulu a ndundo A-Moape no makachikima ni woma.
Atu eswe a mu Kanana makazeya.
16 Woma unji muukaakwata.
Mumu lia unene wa ndundo je, makamana kikili ngwe liwe
Ndo muze atu je mapalika, Yehova,
Ndo muze atu waze watangile mapalika.
17 Yena mukaatwala ni kwatumba ha mulundu wa chihinga che,
Chihela chize waluliekele hanga yena Yehova utwameho,
Chihela chisandu, chize yena Yehova watungile ni moko je.
18 Yehova makayula ku miaka ya mutolo.
19 Muze tuvwalu, matemba a jita ni akwa-kwendesa tuvwalu a Falau anjilile mu kalunga-lwiji,
Yehova yahilwisa meya a mu kalunga-lwiji hali ayo,
Alioze A-Izalele yazauka mukachi ka kalunga-lwiji hashi homu.”
20 Mba profeta wa pwo, Miriame, ndumbu ya Arone, yanda ngoma, mapwo eswe yamukaula ni kwimba ngoma ni kuhangana. 21 Miriame kapwile ni kukumbulula malunga ni kwimba ngwenyi:
“Imbilenu Yehova, mumu halinangamisa chikolo.
Hambila kavwalu ni mukwa-kwendesa kavwalu mu kalunga-lwiji.”
22 Kulutwe, Mose yakatuka ni A-Izalele ku Kalunga-lwiji Muchila, yaya mu puya ya Shure, yenda matangwa atatu mu puya, alioze kawanyine meya. 23 Yaheta ku Mara, alioze kahashile kunwa meya jako, mumu meya jacho te asasu. Kashika Mose alukile chihela chacho jina ngwenyi, Mara. 24 Chocho atu yaputuka kulinyenyeta kuli Mose ngwo: “Yika mutunwa?” 25 Iye yaliumba kuli Yehova, mba Yehova yamulweza umwe mutondo. Muze Mose ambilile mutondo wacho mu meya, meya yapwa ayema.
Kuzekwene Zambi yaasela shimbi, yaeseka hanga amone nyi te mamwononokena nyi ka. 26 Zambi yamba ngwenyi: “Nyi yenu nwapanjika kanawa liji lia yami Yehova Zambi yenu, nwalinga yuma yipema kumeso jami, nwapanjika kanawa shimbi jami ni kujifunga, chichi kaneha hali yenu misongo yize nanehene hali A-Engitu, mumu yami Yehova, nakunuuka.”
27 Mba o yaheta ku Elime, kuze kwapwile mafuji a meya 12 ni yingaji 70. Chocho yajikako mbalaka hakamwihi ni meya.