Shina Hiwalilulieka ni Kukupapachisa?

Walilongesa yuma yinji hakutwala kuli Yehova mu longeso lie lia Mbimbiliya. Kota walumuna yimwe ku mwono we hanga ukaule yize unalilongesa. Alioze mukuhasa kupwa chuma chimwe chize muchikulingisa hanga unyonge ngwo kanda uchililulieka hanga ulihane kuli Yehova ni kukupapachisa. Ha longeso lino, mutushimutwinaho yuma yimwe yize muyihasa kukukwika hanga akupapachise ni chize muhasa kukumba yuma yacho.

1. Shina watamba kunyingika yuma yeswe ya mu Mbimbiliya mba akupapachise?

Mutu katamba kupwa ni “chinyingi cha umwenemwene” mba amupapachise. (1 Timoteu 2:4) Alioze, chino kuchalumbunukine ngwo watamba kunyingika makumbululo eswe a yihula ya mu Mbimbiliya mba akupapachise. Mumu chipwe akwa-Kristu waze apapachishile kulu, nihindu machinunga ni kulilongesa. (A-Kolosu 1:9, 10) Alioze watamba kupwa ni chinyingi cha yuma yilemu ya mu Mbimbiliya. Makulwana a mu chikungulwila makukwasa kunyingika nyi uli ni chinyingi chize mutu atamba kupwa nacho mba amupapachise nyi ka.

2. Yuma yika watamba kulinga shimbu kanda achikupapachisa?

Shimbu kanda achikupapachisa, watamba ‘kulikonyeka ni kwalumuka.’ (Tanga Yilinga 3:19.) Chino chinalumbunuka ngwo walinyenga ha yuma yipi yize walingile kunyima, chocho unechi kuli Yehova akukonekene. Chikwo nawa, mwehuka ndako jeswe jipi ni kusa tachi hanga utwame kulita ni chize Zambi akuzanga. Watamba nawa kuputuka kuya ni kukunguluka ni kwambujola hamwe ni chikungulwila.

3. Mumu liaka kuwatambile kwecha hanga woma ukukwike?

Atu amwe kakwivwa woma ngwo kechi kuhasa kulinga yuma yize alakenyene kuli Yehova. Kwamba pundu, ha mashimbu amwe muhasa kulinga yuma yipi, ngwe chizechene chalingiwile kuli malunga ni mapwo ashishika waze atongola mu Mbimbiliya. Alioze Yehova keshi kushimbwila hanga tuvumbi twenyi apwe angunu. (Tanga Samu 103:13, 14.) Iye kakuwahilila chinji muze wakusa tachi hanga ulinge yuma yalita! Yehova makukwasa. Iye kanatulakenya ngwenyi: “Nichimwe chuma muchihasa kutuhandununa ku zango [lienyi]” chakuhi.—Tanga A-Roma 8:38, 39.

NYINGIKA NAWA

4. Nyingika kanawa Yehova

Kuchi muhasa kunyingika Yehova shimbu kanda achikupapachisa? Watamba kunyingika kanawa Yehova mba uhase kumuzanga ni kumuvwisa kuwaha. Tala CHINEMA hanga umone chize alongi a Mbimbiliya a hashi heswe akuchilinga, mba nushimutwine chihula chinahateho.

CHINEMA: Yize Mutuhasa Kulinga Mba Atupapachise (3:56)

• Kulita ni chinema, yika yakwashile amwe a kuli alongi kulilulieka hanga aapapachise?

Tanga A-Roma 12:2, mba nushimutwine yihula yino:

• Shina wakuyambashana ha limwe longeso lia Mbimbiliya hanji nyi Yela ja Yehova kakulongesa umwenemwene?

• Nyi chenacho, yika watamba kulinga?

5. Kumba yuma yize yinakukwika hanga akupapachise

Tulieswe twakupalika mu umwe kapinda muze twakutesa kulihana kuli Yehova ni kutupapachisa. Nyi unazange kumona chimwe chilweza, tala CHINEMA, mba nushimutwine yihula yinahateho.

CHINEMA: Zango Hali Yehova Liakukumba Yikwiko Yeswe (5:22)

• Kulita ni chinema, kapinda muka Narangerel akumbile mba ahase kulingila Yehova?

• Kuchi zango lienyi hali Yehova liamukwashile kukumba kapinda wacho?

Tanga Yishima 29:25 ni 2 Timoteu 1:7, mba nushimutwine chihula chino:

• Yuma yika yakutwaha hamu mba tukumbe kapinda?

6. Jikijila ha ukwaso wa Yehova

Yehova mahasa kukukwasa hanga umulingile. Tala CHINEMA, mba nushimutwine yihula yinahateho.

CHINEMA: Yehova Zambi Makukwasa (2:50)

• Kulita ni chinema, mumu liaka longi wa Mbimbiliya te kasolo kulihana hanga amupapachise?

• Yuma yika alilongesele yize yamukwashile kukolesa ufulielo wenyi muli Yehova?

Tanga Izaia 41:10, 13, mba nushimutwine chihula chino:

• Mumu liaka muhasa kupwa ni shindakenyo ngwe muhasa kumanununa chilakenyo chize walingile kuli Yehova?

7. Sakwilila ha zango lia Yehova

Nyi wapukuna ha chize Yehova akukuzanga, muzanga kumusakwilila ni kumuwayila. Tanga Samu 40:5, mba nushimutwine chihula chino:

• Yiwape yika ya Yehova yize wakuzanga chinji?

Profeta Jeremia kapwile ni kuzanga Yehova hamwe ni Liji lienyi. Kashika asakwilile chinji ha kupwa ni chiwape chakumbata jina lia Yehova. Iye yamba ngwenyi: “Maliji jenu alumukine kuli yami uwahililo ni chiseke cha mbunge yami, mumu hananguluku jina lia yenu, Yehova Zambi-ya-Tujita.” (Jeremia 15:16) Kumbululenu yihula yino:

• Mumu liaka chili chiwape chinene kupwa Chela cha Yehova?

• Shina unazange hanga akupapachise ni kupwa Chela cha Yehova?

• Shina kuli yuma yimwe yize yinakukwika?

• Ku nyonga lie, yika watamba kulinga mba akupapachise?

YIZE WALILONGESA

Yehova mahasa kukukwasa kukumba kapinda mweswawo hanga akupapachise.

Kuhitulula

• Shina watamba kunyingika yuma yeswe ya mu Mbimbiliya mba akupapachise?

• Yuma yika watamba kwecha shimbu kanda achikupapachisa?

• Mumu liaka kuwatambile kwecha hanga woma ukukwike?

HENGWOLA NAWA

Tala chuma chilemu cha mumu liaka watamba kukwata chiyulo cha kukupapachisa.

“Hiwalilulieka Hanga Akupapachise?” (Kaposhi wa Kutalila Março, 2020)

Lilongese chize muhasa kukumba kapinda yoze mahasa kukukwika hanga akupapachise.

“Yika Yinangukwika Kutambula Upapachiso?” (Kaposhi wa Kutalila Março, 2019)

Tala chize umwe lunga akumbile umwe kapinda ni kumupapachisa.

‘Yika Unashimbwila Mba Akupapachise?’ (1:10)

Umwe lunga avuluka ngwo Ataa, ku uputukilo kapwile ni kwivwa woma wa kumupapachisa. Tala yize yamukwashile mba amupapachise.

Yize Mutuhasa Kulinga Mba Atupapachise? (7:21)