CHIHANDA 8
Muze Mukupwa Umwe Luyinda
“Nwakulikwiza, chipwe haliapwila ha shimbu likepe, nyi muchitamba, hananuvwisa chinyengo ni yeseko yeka ni yeka.”—1 Petulu 1:6
Chipwe tuhu munweseka kulinga yuma yipema hanga nuwahilile mu ulo wenu ni mu usoko, nihindu yuma yipi yize te kunwashimbwilile muyihasa kunuwana ni kunupinjisa. (Chilumbununyi 9:11) Zambi ha zango lienyi kakutwaha ukwaso hanga tukumbe lamba. Nyi munukaula shimbi ja mu Mbimbiliya, yenu ni usoko wenu munuhasa kujikiza, ni ha mashimbu a lamba linji.
1 JIKIJILENU HALI YEHOVA
YIZE MBIMBILIYA YANAMBE: “Kunjikenu yipikalo yenu yeswe kuli iye, mumu iye kakunufunga.” (1 Petulu 5:7) Iwulukenu shimbu lieswe ngwenu hi Zambi ko wakunehena lamba. (Tiangu 1:13) Iye manukwasa chinji muze munukundama kuli iye. (Izaia 41:10) “Zukwilenu mbunge jenu kumeso jenyi.”—Masamu 62:8.
Munuwana nawa utakamiso muze munutanga ni kulilongesa Mbimbiliya matangwa eswe. Ha chino, munumona chize Yehova ‘akututakamisa mu lamba lietu lieswe.’ (2 A-Korindu 1:3, 4; A-Roma 15:4) Katulakenya kutwaha “sambukila ya Zambi, yize yakuhiana kunyonga cheswe.”—A-Fwilipu 4:6, 7, 13.
YIZE MUHASA KULINGA:
Lemba kuli Yehova akukwase ulihumikize ni kupwa ni manyonga apema
Tala ha yuma yeswe yize muhasa kulinga ni kusakulaho yize muyikukwasa chinji
2 LIFUNGENU YENWENE NI USOKO WENU
YIZE MBIMBILIYA YINAMBE: “Mbunge ya chikanyame kuyakuzuka yinyingi; twitwi lia mukwa-mana kuliakufupa yinyingi.” (Yishima 18:15) Nyingikenu yuma yeswe. Nwatamba kunyingika yuma yize yinafupiwa kuli asoko jenu. Hanjikenu no. Apanjikenu kanawa.—Yishima 20:5.
Yika munulinga nyi mutu yoze nwazanga hafwa? Kanda nwivwa woma wakusolola chinyengo chenu. Iwulukenu ngwenu ni Yesu ‘kalilile.’ (Yoano 11:35; Chilumbununyi 3:4) Kuhwima ni kupomba kanawa chili chilemu chinji. (Chilumbununyi 4:6) Chino muchinukwasa kunyongonona ha lamba lize unamono.
YIZE MUHASA KULINGA:
Muze lamba kanda lichisoloka, pwako ni kuhanjika ni usoko we. Nyi wapwa mu lamba, ayo mahasa kuhanjika ni yena
Hanjika ni atu eka waze hanji hanamono lamba liacho
3 FUPENU UKWASO
YIZE MBIMBILIYA YINAMBE: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.” (Yishima 17:17) Masepa jenu mazanga kunukwasa, alioze hanji kanyingikine yize atamba kulinga. Kashika alwezenu yize unafupu. (Yishima 12:25) Nawa, fupenu ukwaso wa ku spiritu kuli waze anyingika Mbimbiliya. Ukwaso wa mu Mbimbiliya uze manwaha muuhasa kunutakamisa.—Tiangu 5:14.
Munupwa ni ukwaso uze nunafupu ha kulikata shimbu lieswe ni atu waze ali ni ufulielo wamwenemwene muli Zambi, waze nawa ajikijila ku yilakenyo yenyi. Munupwa nawa ni utakamiso unji muze munukwasa akwenu waze anafupu utakamiso. Nwatamba kwambujola kuli akwenu ufulielo wenu muli Yehova ni yilakenyo yenyi. Kukilikitenu ha kukwasa atu eka, kanda nulihandununa kuli waze anuzanga ni kunukwasa.—Yishima 18:1; 1 A-Korindu 15:58.
YIZE MUHASA KULINGA:
Hanjika ni umwe sepa wamwenemwene akukwase
Hanjika pundu nawa ni umwenemwene ha yize unafupu