Shina Wakufupa Uchinyino Muli Yehova?

1. Kuchi tuvumbi anji a Zambi waze ashishika akwivwa, hamukunda wa shili yo?

POSTOLO Paulu kambile ngwenyi: “Nguli mutu wa kulungajala!” (A-Roma 7:24) Musono, tuvumbi anji a Zambi waze ashishika no kakulivwa ngwe chize evwile Paulu. Mumu liaka? Mumu chipwe ngwe tunazange kuwayila Yehova ni mbunge yeswe, alioze yetweswe tunakahinga shili chocho yitupwa yihenge. Kashika mutuhasa kulema ku mbunge muze mutuhona kuvwisa Yehova kuwaha. Akwa-Kristu amwe waze alingile shili yinene nihindu kakwivwa ngwe Yehova kechi keza kaakonekena.

2. (a) Kuchi Samu 34:22 yinasolola ngwo tuvumbi twa Zambi katambile kulipikala chinji ha shili yo? (b) Yika mutulilongesa mu mutwe uno? (Tala mushete “Malongeso hanji Ulumbunwiso wa Yilayi?”)

² Yisoneko yakutwaha shindakenyo ngwo nyi mutufupa uchinyino muli Yehova, kutwatambile kulipikala ha shili yize twalingile. (Tanga Samu 34:22.) Yika chinalumbunuka kufupa uchinyino muli Yehova? Yika twatamba kulinga nyi tunazange hanga Yehova atwivwile keke ni kutukonekena? Mutuhasa kuwana kumbululo lia yihula yino ha kunyingika ululikiso wa yihunda ya uchinyino mu Izalele ku shakulu. Ululikiso uno te wakukatuka ha Shimbi ya usendo, yize yasalakanyine ha Pentekoste wa mwaka 33. Alioze, Shimbi yino te ya Yehova. Hachino, kupalikila ku ululikiso wa yihunda ya uchinyino, mutunyingika chize Yehova akumona shili, yivulumunyi, ni waze akulikonyeka. Chitangu, tutalenu mumu liaka A-Izalele apwile ni yihunda ya uchinyino, ni chize yino te yakulingiwa.

“TONGOLENU YIHUNDA YA KUCHINYINA”

3. Yika te A-Izalele atamba kulinga kuli mutu yoze washiha mukwo chakuhona chitela?

³ Yehova te kakulipikala chinji ha kufwa cha umwe mutu. Nyi umwe Ka-Izalele mashiha mukwo, usoko wa mutu ashiha, yoze te avuluka ngwo, “mukwa kukala manyinga” maya ni kushiha chingalwe wacho. (Kwalula 35:19) Hachino, chingalwe wacho mafwete mwono wenyi ha mwono wa yoze ashihanga keshi chitela. Nyi chingalwe wacho kamushihile kawashi, Chifuchi cha Chilakenyo te muchipihia hanji kuchichi kupwa nawa chisandu. Mumu shimbi ya Yehova yambile ngwo: ‘Kanda nukapihisa chifuchi nunatwama’ ha kumwanga manyinga ja mutu, chekwamba kushiha mutu.—Kwalula 35:33, 34.

4. Yika A-Izalele te atamba kulinga kuli mutu yoze washiha mukwo kachihalile?

⁴ Mba yika te yakulingiwa kuli umwe Ka-Izalele nyi mashiha mutu kachihalile? Chipwe ngwe mutu wacho kafwa mu ponde, nihindu yoze wa mushiha te kakumusuma mulonga ha kushiha mutu yoze keshi chitela. (Uputukilo 9:5) Hachino, Yehova yamba ngwenyi, mutu wacho mahasa kumusolwela keke. Mutu yoze washiha mukwo kachihalile te kakuchina mukwa-kukala manyinga ni kuya ku chimwe cha yihunda yisambano ya uchinyino. Nyi mamutayiza hanga atwame mu chihunda chize achinyina, acho kamulamwina. Alioze iye te katamba kununga mu chihunda chacho ndo ha kufwa cha sasendote wa lutwe.—Kwalula 35:15, 28.

5. Mumu liaka ululikiso wa yihunda ya uchinyino muutukwasa kunyingika kanawa Yehova?

⁵ Ululikiso uno wa yihunda ya uchinyino te hi manyonga ja atu ko. Kanakatuka kuli Yehova. Iye kalwezele Yosua ngwenyi: “Amba kuli A-Izalele ngwe, Tongolenu yihunda yakuchinyina.” Yihunda yino “yapwile yisandu.” (Yoshua 20:1, 2, 7, 8) Yehova mwe wakwachile chiyulo cha kuyihanduna ni kuyipwisa yisandu. Kashika mutuhasa kulilongesa chinji ha ululikiso uno wa Yehova. Chakutalilaho, chino muchitukwasa kunyingika kanawa keke ya Yehova. Nawa muchitulongesa ha chize mutuhasa kufupa uchinyino kuli Yehova musono.

KATAMBA KULUMBUNUNA “CHIKUMA CHENYI KULI MAKULWANA”

6, 7. (a) Lumbununa mulimo wa makulwana ha kusopesa yoze washiha mukwo kachihalile. (Tala chizulie ha uputukilo.) (b) Mumu liaka mutu wacho te atamba kuhanjika ni makulwana?

⁶ Nyi Ka-Izalele mashiha mutu te kachihalile, iye katamba kuya ku chihunda cha uchinyino ni “kulumbununa chikuma chenyi” kuli makulwana aku chikolo cha chihunda chacho. Makulwana jacho te katamba kumutambula kanawa. (Yoshua 20:4) Hanyima, mamufunyisa nawa kuli makulwana aku chihunda chize iye ashihilile mutu hanga amusopese. (Tanga Kwalula 35:24, 25.) Nyi makulwana jacho mamba ngwo mutu wacho kamushihanga kachihalile, mba hi mamufunyisa nawa ku chihunda cha uchinyino.

⁷ Mumu liaka mutu wacho te atamba kuhanjika ni makulwana? Hanga makulwana apwe ni shindakenyo ngwo chikungulwila cha Izalele chinalinanga nawa te muchikwasa mutu yoze washiha mukwo kachihalile azuke keke ya Yehova. Umwe mukwa-mana hakutwala ku Mbimbiliya yasoneka ngwenyi, nyi mutu wacho kayile kuli makulwana, neye te mamushiha. Yamba nawa ngwenyi, chitela cha manyinga te muchipwa hali mwene, mumu kakawile yize te Zambi hanatese. Yoze washiha mukwo kachihalile te katamba kwita ukwaso ni kuutayiza mba atwame ni mwono. Nyi kayile ku chimwe chihunda cha uchinyino, usoko wa mutu yoze ashihanga mapwa ni ulite wakumushiha.

8, 9. Mumu liaka mukwa-Kristu yoze halinga shili yinene atamba kuhanjika ni makulwana amu chikungulwila?

⁸ Musono, mba apwe ni usepa upema ni Yehova, mukwa-Kristu yoze walinga shili yinene katamba kuhanjika ni makulwana amu chikungulwila hanga amukwase. Mumu liaka chili chilemu? Mumu chitangu, Yehova mwe wahanyine chiteli kuli makulwana kusopesa mandumbu waze malinga shili yinene. (Tiangu 5:14-16) Chamuchiali, makulwana kaasele mu chikungulwila hanga akwase yivulumunyi waze malikonyeka apwe nawa ni utayizo wa Zambi ni kwecha kulinga shili yacho. (A-Ngalashia 6:1; A-Hepreu 12:11) Chamuchitatu, makulwana kakwaatongwola ni kwaafumba hanga ahwimise mbunge ja yivulumunyi waze malikonyeka ni kwaakwasa ahuzulule yikola ni yinyengo yo. Yehova kakuvuluka makulwana jacho ngwo, “uchinyino ha kangonga.” (Izaia 32:1, 2.) Ululikiso uno uli yimwe jila yize Zambi akusolwelamo keke yenyi hali yetu.

⁹ Tuvumbi anji a Zambi waze hanavulumuna, muze akuhanjika ni makulwana ni kutambula ukwaso wo chino chakwaahuzulula ku mbunge. Chakutalilaho, ndumbu avuluka ngwo Daniel kalingile shili yinene, alioze kwapalikile tukweji anji chakuhona kuyilweza kuli makulwana. Yamba ngwenyi: “Muze te hikwapalika mashimbu, yingunyonga ngwami kukushi nawa nichimwe chize makulwana mahasa kulinga ha shili yami.” Chipwe chocho, te kakwivwa woma ngwe hanji umwe manyingika shili yenyi, chocho kuuputukilo wa hita kulemba chenyi te kakwita ukonekeno kuli Yehova. Kusongo, mba hi yaya ni kwita ukwaso kuli makulwana. Muze hashinginyeka yize alingile, yamba ngwenyi: “Napwile ni kwivwa woma wakuhanjika ni makulwana. Alioze, muze nahanjikile no, chapwile ngwe kanguchijile yilemu ha yipaya.” Hachino, Daniel yaputuka nawa kuhanjika kanawa ni Yehova. Haliapwila iye kali ni mbunge yitoma nawa hapwa kavumbi mu chikungulwila.

IYE KATAMBA KUCHINYINA “KU CHIMWE CHA YIHUNDA YINO”

10. Mba akonekene mutu yoze washiha mukwo kachihalile, yika te iye atamba kulinga?

¹⁰ Mba akonekene mutu yoze washiha mukwo kachihalile, te katamba kuchinyina mu chihunda cha uchinyino chize chili hakamwihi. (Tanga Yoshua 20:4.) Mba anunge ni mwono, iye te katamba kutwamamo ndo hakufwa cha sasendote wa lutwe. Uno wapwile mwono ukalu chinji. Mumu, iye te kakuhichika mulimo wenyi, zuwo lienyi lipema, ni utuswilo wenyi wakwendangana.a (Tala maliji mushi lia lifwo.) (Kwalula 35:25) Chipwe chocho te shinoho kuchilinga. Nyi matuhukamo ha shimbu lieswalio, iye te masolola ngwe keshi kwivwa yikola ha kufwa cha mukwo, nawa te masa mwono wenyi mu ponde.

11. Kuchi mukwa-Kristu yoze halikonyeka mahasa kusolola ngwenyi kanasakwilila ha keke ya Zambi?

¹¹ Musono chivulumunyi yoze malikonyeka katamba nawa kulinga yimwe mba Zambi amukonekene. Iye katamba kwecha yitanga yenyi ya shili. Chinalumbunuka kwehuka hita chuma chize muchihasa kumutwala ku shili yinene. Postolo Paulu kasolwele yize akwa-Kristu waze alikonyekene alingile mu Korindu. Yasoneka ngwenyi: “Chikuma chino-chene, cha kunuvwisa chinyengo nikulita ni upale wa Zambi, talenu kulipupwisa chipwahaha chalingile muli yenu, ewa, kulisambisa chipwahaha! Ewa, kwivwa kupiha chinene chipwahaha! Ni woma upwahaha! Ni usona upwahaha! Ni tachi ja mbunge jipwahaha! Ni kulikala chipwahaha!” (2 A-Korindu 7:10, 11) Nyi mutusa tachi hanga tweche kulinga shili, mutusolola kuli Yehova ngwetu tunevu yikola ku mbunge ha yize twalingile, nawa ngwetu nyi kutwalingile nichimwe kutuchi kuzuka keke yenyi.

12. Yika mukwa-Kristu atamba kwecha mba anunge ni kuzuka keke ya Yehova?

¹² Yika mukwa-Kristu atamba kwecha mba anunge ni kuzuka keke ya Yehova? Katamba kwecha yuma yize muyihasa kumutwala kukulinga shili chipwe ngwe yuma yacho kayizanga chinji. (Mateu 18:8, 9) Chakutalilaho, nyi masepa je makushinjila kulinga yuma yize muyivwisa Yehova chinyengo, shina mwecha kulikata no? Nyi chapwa chikalu kunyingika unji wa walwa uze wakunwa, kutala mwehuka kuya ku yihela yize muyihasa kukutwala ku kunwa walwa unji? Nyi chakukupwila chikalu kwehuka usolo wakulisumbakenya, shina muwecha kutala yinema, site, ni yuma yize muyihasa kukunehena manyonga aluchisa? Iwuluka ngwe, shinoho kwononokena shimbi ja Yehova. Mumu hi chipema ko kuhona ukwaso wa Yehova. Alioze chili chiwape chinene kupwa mu “zango lia mutolo” lia Yehova.—Izaia 54:7, 8.

“MUYIKAPWA KULI YENU UCHINYINO”

13. Lumbununa mumu liaka mutu yoze wachinyina mu chihunda cha uchinyino mahasa kupwa ni ukulungunga, sambukila ni uwahililo.

¹³ Mutu yoze te wakushiha mukwo kachihalile, muze maya mu chihunda cha uchinyino te kakumufunga kanawa. Yehova kambile hakutwala ku yihunda yacho ngwenyi: “Muyikapwa kuli yenu uchinyino.” (Yoshua 20:2, 3) Yehova kakambile ngwenyi mutu wacho katambile kumusopesa nawa ha chitela chochene. Chikwo nawa, te keshi kutayiza mukwa-kukala manyinga hanga anjilemo ni kumushiha. Muze mutu wacho ali mu chihunda cha uchinyino, iye kali mushi lia mapulwa ja Yehova. Iye kakapwile mu kamenga. Mumu te kakukalakala, kukwasa akwo, ni kuwayila Yehova ni ukulungunga. Chochene, iye te mahasa kuwahilila ku mwono wenyi hamwe ni sambukila!

14. Shindakenyo yika mukwa-Kristu yoze halikonyeka mahasa kupwa nayo?

¹⁴ Amwe tuvumbi a Zambi waze hanalingi shili yinene ni haliapwila machivwa yinyengo ha yize alingile, chipwe ngwe hanaakonekena. Akwo kakunyonga ngwe Yehova kechi keza kaakonekena ha yize alingile. Nyi che wakwiwva, nyingika ngwe, muze Yehova makukonekena, iye kakuchilinga ni mbunge yeswe. Kashika kuwatambile kununga ni kwivwa yinyengo ha chikuma chacho. Chino che chalingiwile kuli Daniel, yoze hitwatongola kulu. Muze makulwana amufumbile ni kumukwasa hanga apwe nawa ni mbunge yitoma, iye yahuzuluka ku mbunge. Yamba ngwenyi: “Chatambile nawa kwivwa yikola ku mbunge. Mumu Yehova nyi makonekena mutu shili yenyi kakuyivulama lume. Ngwe chize Yehova ambile, iye makutambula yilemu yize uli nayo ni kuyimbila kusuku. Kuuchi keza kayimona nawa nilimwe tangwa.” Muze mutu yoze washiha mukwo kachihalile, machinyina mu chihunda cha uchinyino, iye te katambile kwivwa woma ngwe mukwa-kukala manyinga mayamo hanga amushihe. Chizechene nawa, muze Yehova makonekena shili yetu, kutwatambile kwivwa woma ngwetu mayiwuluka nawa hanji matumwesa lamba hamukunda wa shili yacho.—Tanga Samu 103:8-12.

15, 16. Kuchi kunyingika ngwo Yesu kahanyine ukuule nawa ngwo kali Sasandete wa Lutwe chinakolesa ufulielo we ha keke ya Zambi?

¹⁵ Kwamba pundu, yetu tuli ni yitela yinji ya kufuliela ha keke ya Yehova kuhiana yize A-Izalele apwile nayo. Muze Paulu alivwile ngwe, ‘kanalungajala’ hakuhona kwononokena Yehova ni ungunu weswe, iye yamba ngwenyi: “Ngunasakwila Zambi mu jina lia Yesu Kristu Mwene wetu.” (A-Roma 7:25) Yika iye ambile kwamba? Chipwe ngwe Paulu, kapwile ni kupinda ni manyonga auhenge ni shili yize alingile kunyima, nihindu kalikonyekene. Kashika afulielele ngwenyi Yehova te hanamukonekena hamukunda wa chitapo cha ukuule wa Yesu. Mutuhasa kupwa ni mbunge yitoma hamwe ni sambukila mumu lia chitapo cha Yesu. (A-Hepreu 9:13, 14) Amu Yesu ali Sasendote wetu wa Lutwe “kanahase nawa kulamwina ndo ku songo, waze akukundama kuli Zambi mu jina lienyi, se matangwa eswe katwama ni mwono mukuahakwila.” (A-Hepreu 7:24, 25) Ku shakulu, sasendote wa lutwe te kakukwasa A-Izalele hanga apwe ni shindakenyo ngwo Yehova kakonekena shili yo. Tuli ni shindakenyo ngwetu mutuhasa ‘kuwana keke, ni vumbi liakutukwasa ha mwaka wa chikala,’ mumu Yesu kali Sasendote wetu wa Lutwe.—A-Hepreu 4:15, 16.

¹⁶ Mba tufupe uchinyino wa Yehova, twatamba kufuliela mu chitapo cha ukuule wa Yesu. Kanda unyonga ngwe ukuule unatale wika hali atu eswe. Alioze fuliela ngwe ni yena muyuka ha ukuule wacho. (A-Ngalashia 2:20, 21) Fuliela ngwe hamukunda wa ukuule, Yehova makonekena shili ye. Nawa fuliela ngwe ukuule unakwehe kutalatala cha kutwama ni mwono wa mutolo. Chitapo cha ukuule wa Yesu chili chiwape chize Yehova hanahane hali yena!

17. Mumu liaka unafupu uchinyino muli Yehova?

¹⁷ Yihunda ya uchinyino, yinatukwase tunyingike keke ya Yehova. Ululikiso uno wa Zambi unatulongesa ngwo mwono uli usandu. Unatusolwela nawa chize makulwana amu chikungulwila mahasa kutukwasa hanga tunyingike kulikonyeka chamwenemwene, nawa mumu liaka twatamba kufuliela ngwetu Yehova matukonekena ni mbunge yeswe. Shina unafupu uchinyino muli Yehova? Kukushi nawa chihela chikwo kuze mutuhasa kuwana uchinyino upema! (Samu 91:1, 2) Mutwe uze muusulaho, muusolola chize yihunda ya uchinyino muyihasa kutukwasa kwimbulula Yehova, chilweza chinene cha ululi ni keke.