Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
4-10 FEVEREIRO
YIKUMA YILEMU YA MU LIJI LIA ZAMBI | A-ROMA 1-3
“Nunga Ni Kufumba Mbunge Ye”
(A-Roma 2:15, 16) Mumu muze mavungu aze keshi shimbi, malinga ni mbunge jo yuma ya shimbi, o se keshi shimbi, kanapu shimbi kuli ayoene. 16 Waze kakulweza chitanga cha shimbi chakusonewa mu mbunge jo, mbunge jo nawa se jinashindakenya hamuwika, ni manyonga jo kaanasumu hanji kanaasambisa hakachi ko.
Mbunge Yipema Kumeso Ja Zambi
6 Chipwe atu waze kanyingikine Yehova kananyingika ngwo, kuli yuma yipi ni yipema. Mbimbiliya yinambe ngwo: “Manyonga jo kaanasumu hanji kanaasambisa hakachi ko.” (A-Roma 2:15,16) Chakutalilaho, atu anji kananyingika ngwo, chili chipi kwiya hanji kushiha mutu. Chipwe ngwe ayo kanyingine shimbi, nihindu kakupanjika mbunge yo. Mbunge yacho yili chinyingi chize Yehova aahele chakunyingika yipi ni yipema. Ayo kakukaula shimbi ya Zambi, hanji usongwelo uze Yehova atuhele hanga utukwase kukwata yiyulo yipema ku mwono wetu.
(A-Roma 2:16) Waze kakulweza chitanga cha shimbi chakusonewa mu mbunge jo, mbunge jo nawa se jinashindakenya hamuwika, ni manyonga jo kaanasumu hanji kanaasambisa hakachi ko.
Mbunge Yipema Kumeso Ja Zambi
8 Atu amwe kakwamba ngwo, kupanjika mbunge yo chinalumbunuka kulinga yeswe yize ananyongo. Ayo kakunyonga ngwo, mahasa kulinga yeswayo mazanga, mumu mbunge yo kuyishi kwaasuma. Alioze, manyonga jetu kali a uhenge, nawa mahasa kutwonga. Chikwo nawa, manyonga jetu mahasa kupwa ni tachi jinji hali yetu, ni kupiangula mbunge yetu. Kashika, Mbimbiliya yinambe ngwo: “Mbunge kuyakwonga kuhiana yuma yeswe, ni kupiha chikolo. Iya mayinyingika?” (Jeremia 17:9) Kashika, mutuhasa kunyonga ngwetu, tunalingi yuma yalita, chipwe ngwe yili yipi. Chakutalilaho, muze Paulu te kanda achipwa mukwa-Kristu, iye te kakuhungumiona atu ja Zambi, nawa te kakufuliela ngwenyi, kanalingi yuma yalita. Ku nyonga lienyi, iye kapwile ni mbunge yipema. Alioze, ha kupalika cha mashimbu yamba ngwenyi: “Mukwa kungusopesa mwe [Yehova].” (1 A-Korindu 4:4; Yilinga 23:1; 2 Timoteu 1:3) Muze Paulu anyingikine chize Yehova akwivwa ha yize te akulinga, yamona ngwenyi, te katamba kwalumuna manyonga jenyi. Kashika, shimbu kanda tuchikwata chimwe chiyulo, twatamba kulihula ngwetu, ‘Yika Yehova anazange hanga ngulinge?’
9 Nyi yena wakuzanga umwe mutu, uchi kulinga yize muyimulemeka ku mbunge. Chizechene nawa, amu twakuzanga Yehova, twakwehuka kulinga yuma yize keshi kuzanga. Twatamba kupwa ni woma wa kulinga yuma yipi hanga tuchine kuvwisa Yehova kupiha. Chino che twakumona ha chilweza cha Nehemia. Nehemia, kakazachishile chiteli chenyi cha unguvulu hanga apwe pichi. Mumu liaka? Iye yalumbununa ngwenyi, mumu “ha woma wa Zambi.” (Nehemia 5:15) Nehemia kakazangile kulinga yize te muyivwisa Yehova kupiha. Chizechene ngwe Nehemia, ni yetu twatamba kupwa ni woma wa kulinga yize Yehova keshi kuzanga. Alioze, mutuhasa kulilongesa yize Yehova akuzanga ha kutanga Mbimbiliya.—Tala Maliji Akusongo 6.
Kuhengwola Yikuma Yilemu ya mu Mbimbiliya
(A-Roma 3:4) Ka, pundu! Alioze Zambi apwe wamwenemwene, ni atu eswe akapwe akwa mahuza, ngwe chinasonewa ngwo, hanga nukasambe ni maliji jenu, hanga nukakumbe muze manupatwila.
w08 15/6 30 ¶5
Sango Jilemu ja Mukanda wa A-Roma
3:4. Nyi maliji a atu malimika ni maliji a Zambi, yetu twakwecha hanga “Zambi apwe wamwenemwene” ha kufuliela ha sango ja mu Mbimbiliya ni kujikaula. Muze mutulihana ni mbunge yeswe hanga twambujola sango ja Wanangana ni kutayisa tumbaji, mutukwasa akwetu hanga apwe ni shindakenyo ngwo, Zambi kali wamwenemwene.
(A-Roma 3:24, 25) Hanatusambisa chawana ku vumbi lienyi, ku ukuule uze uli muli Kristu Yesu: 25 yoze Zambi asele kulutwe, akapwe kuka ha kufuliela manyinga jenyi, ha kusolola chinyingi cha ululi wenyi ha kuzomboka milonga yize yapwile kushi, ha kulihumikiza cha Zambi.
w08 15/6 29 ¶6
Sango Jilemu ja Mukanda wa A-Roma
3:24, 25—Kuchi “ukuule uze uli muli Kristu Yesu” wafukile “milonga yize yapwile kushi” hanji kunyima, shimbu te kanda achiufweta? Uprofeto utangu wa Mesaya uze uli ha Uputukilo 3:15, wamanunukine ha 33 M.J. muze Yesu afwile ha mutondo wa lamba. (Nga 3:13, 16) Chize ha tangwa lize Yehova ambile uprofeto uno, kuli iye chapwile ngwe ukuule wacho te haufweta kulu. Mumu kukushi chuma nichimwe chize muchihasa kukwika Zambi kumanununa upale wenyi. Kashika, kupalikila mu chitapo cha Yesu Kristu chize te mafweta kulutwe lia matangwa, Yehova te makonekena shili ya ana ja Alama waze te mafuliela ha chilakenyo chacho. Ukuule nawa wakupwisa chashi uhindukilo wa afu waze afwile kushakulu shimbu Yesu te kanda achisemuka.—Yilinga 24:15.
Kutanga Mbimbiliya
(A-Roma 1:1-17) Yami Paulu, ndungo ya Kristu Yesu, angutambikile ngupwe postolo, anguselele ku Sango Lipema lia Zambi. 2 Sango lino alilakenyene kushi mu Yisoneko Yisandu ya aprofeta jenyi. 3 Sango lia kutwala kuli Mwanenyi, yoze wasemukine ku munyachi wa Ndawichi nikulita ni musunya, 4 Alioze amwinyikine ngwo, Iye mwe Mwana Zambi nikulita ni Spiritu ya usandu, ni tachi ja uhindukilo wenyi hakachi ka afu; iye Yesu Kristu Mwene wetu. 5 Kuli iye twatambwile vumbi ni upostolo wa kuneha kwononoka cha ufulielo hakachi ka mavungu eswe, mumu ha jina lienyi. 6 Hakachi ko yenu nawa, hananutambika kuli Yesu Kristu. 7 Ngunasoneka kuli yenu eswe nuli mu Roma kananuzange chikolo kuli Zambi, hananutambika nupwe asandu: Vumbi kuli yenu ni sambukila ya kuli Zambi Tata yetu ni Mwene Yesu Kristu. 8 Hatangu, ngunasakwila kuli Zambi yami mu jina lia Yesu Kristu hali yenu eswe, mumu ufulielo wenu kakuwambujola hashi heswe. 9 Mumu Zambi iye chela chami, yoze nakumulingila ni spiritu yami mu Sango Lipema lia Mwanenyi, nakunuvulwoka mu yilemba yami nikulitwamina nichimwe. 10 Nakulemba, hanji ku jila yimwe akanguwahise ku upale wa Zambi ngukahete kuli yenu. 11 Mumu usona ngunevu kunumona, hanga ngukalianyine ni yenu chawana chimwe cha vumbi, cha uspiritu, hanga nukajikize; 12 Ngwami, Hanga tukaliwahise hamuwika, mweswe ku ufulielo wa mukwo; ufulielo wa yenu ni wa yami. 13 Mandumbu jami, ngunazange nunyingike ngwami, Kanji nahalile kuheta kuli yenu, hanga ngukapwe ni mihuko yimwe hakachi kenu nawa, chizechene ngwe hakachi ka akwa mavungu akwo (alioze angukwikile ndo haliapwila). 14 Kongo nguli nalio kuli A-Ngresia ni kuli tundaka, kuli akwa mana ni kuli waze hi akwa mana ko. 15 Kashika ha kutwala kuli yami ngunazange kwambujola sango lipema kuli yenu nawa nuli mu Roma. 16 Sango Lipema chalivwilile sonyi: mumu kuliapwa je tachi ja Zambi ha ulamwino kuli mweswe mafuliela; hatangu kuli A-Yunda, ni kuli akwa Mavungu nawa. 17 Mumu mwenamo munasoloka ululi wa Zambi mu ufulielo, ni ha kufuliela: se chinasonewa ngwo, Mukwa ululi kumakenda ku ufulielo.
11-17 FEVEREIRO
YIKUMA YILEMU YA MU LIJI LIA ZAMBI | A-ROMA 4-6
“Zambi Hanasolola Chinyingi cha Zango Lienyi Kuli Yetu”
(A-Roma 5:8) Alioze Zambi hanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.
(A-Roma 5:12) Kashika, chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.
w11 15/6 12 ¶5
Zambi Hanasolola Chinyingi cha Zango Lienyi Kuli Yetu
5 Paulu yasoneka ngwenyi: “Chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.” (Roma 5:12) Yetu tuli ni uhashi wa kunyingika yuma yino, mumu Zambi hanatumu kusoneka chize mwono wa atu waputukile. Yehova katangile atu aali, Alama ni Eva. Sakatanga kali mungunu, ni atu wano aali atangu tulamba twetu, no kapwile angunu. Zambi yaaha wika shimbi yimuwika, nawa yalweza ngwenyi, nyi te mecha kuyononokena te mafwa. (Uputu. 2:17) Alioze, ayo yasakula kulinga ungulungulu, yavulumuna shimbi ya Zambi, hachino, ayo yalituna Wata wenyi.—Shimbi 32:4, 5.
(A-Roma 5:13, 14) Mumu ndo ku shimbi, shili te yapwile hano hashi; alioze keshi kwalula shili kuze shimbi yakuhi. 14 Hindu kufwa chayulile, chize kuli Alama ndo kuli Mose, chipwe hali waze kavulumwine nikulita ni kulifwa cha utanguko wa Alama, mwenawo chizulie cha yoze meza.
w11 15/6 12 ¶6
Zambi Hanasolola Chinyingi cha Zango Lienyi Kuli Yetu
6 Alama muze te halinga shili, mba yashita ana, hachino, shili yiyinjila muli ana jenyi eswe. Kwamba pundu, hi ana ko avulumwine shimbi, Alama mwe wavulumwine, nawa ana ja Alama kakaasumine mulonga hamukunda wa shili yacho; chikwo nawa, te kanda kuchipwa mukanda wa shimbi. (Uputu. 2:17) Chipwe chocho, shili yiyinjila mukachi ka ana ja Alama. Shili ni kufwa ‘yayulile’ ndo haze Zambi ahanyine shimbi kuli A-Izalele, jize te jinasolola pundu ngwo, te kali akwa-shili. (Tanga A-Roma 5:13, 14.) Fweto lize liakwiza hamukunda wa shili mutuhasa kulitesa ni yimwe misongo yakuhinga mu usoko, ngwe diabete. Kwamba pundu, chipwe ngwe mukachi ka usoko muze mwatwama yikola yacho ana amwe keshi kuyikwachika, nihindu ajikulu jo mahasa kusemuka nayo. Chino chinalise ni shili. Lamba lize liakwiza ha mukunda wa shili ya Alama te tuchi kuhasa kuliehuka. Atu eswe kali nalio. Liakutupinjisa chinji. Nawa liakunjila muli ana eswe. Shina limwe tangwa te mahwisa kapinda wacho?
(A-Roma 5:18) Kashika chizechene ngwe ku mulonga umuwika upatwilo wejile hali atu eswe nikuneha uhiso; chocho nawa ku chilinga chimuwika cha ululi, chawana chejile kuli atu eswe nikuneha usambiso wa mwono.
(A-Roma 5:21) Hanga chizechene ngwe shili yayulile mu kufwa, chocho nawa vumbi likayule ha ululi ndo ku mwono wa mutolo mumu hali Yesu Kristu Mwene wetu.
w11 15/6 13 ¶9-10
Zambi Hanasolola Chinyingi cha Zango Lienyi Kuli Yetu
9 Yika maliji a Ngregu anambe ngwo, “nikuneha usambiso” ni “kumakaapwisa akwa ululi” analumbunuka? Umwe mukwa-kulumbununa Mbimbiliya kambile ngwenyi: “Maliji wano kali wika chilayi. Kanahanjika hakutwala ku kwalumuka cha mutu kumeso ja Zambi. Chilayi chino, chinasolola Zambi ngwe ngaji yoze wakwata chiyulo chipema hakutwala kuli mutu yoze atwala ku chota cha Zambi, hakumusuma ngwo kalinga uhenge. Alioze Zambi yamusambisa.”
10 Chitela chika muchihasa kulingisa Zambi wa ululi “chisopa-mulonga wa akwa hashi eswe” mba asambise chihenge? (Uputu. 18:25) Mba alulieke yuma, Zambi yatuma Mwanenyi wa wika hano hashi. Yesu kamanunwine kanawa upale wa Tato, chipwe ngwe te kapalikile mu yeseko yinji ngwe kumukekuna ni kumusosomba. Iye kashishikile ndo ha kufwa chenyi ha mutondo wa lamba. (Hepre. 2:10) Ha kuhana mwono wenyi ungunu ngwe chitapo, Yesu yahana ukuule uze te muutusula ana ja Alama ku shili ni kufwa.—Mateu 20:28; Roma 5:6-8.
Kuhengwola Yikuma Yilemu ya mu Mbimbiliya
(A-Roma 6:3-5) Te kunwanyingikine, nyi? Yetu eswe hanatupapachisa muli Kristu Yesu, hanatupapachisa mu kufwa chenyi? 4 Kashika hanatufundu hamwe nenyi ku upapachiso mu kufwa; hanga chizechene ngwe hanahindwisa Kristu hakachi ka afu akachichimieke mwe Tata, chocho yetu nawa twendenu mu mwono waha. 5 Mumu se hitunalifutula nenyi mu kulifwa cha kufwa chenyi, chocho nawa kumutukapwa mu kulifwa cha uhindukilo wenyi.
w08 15/6 29 ¶7
Sango Jilemu ja Mukanda wa A-Roma
6:3-5—Upapachiso “muli Kristu Yesu” ni upapachisa “mu kufwa chenyi,” yika yinalumbunuka? Muze Yehova akuwayisa tumbaji a Yesu ni spiritu yisandu, ayo kakulinunga ni Yesu nawa kakupwa chihanda cha chikungulwila, we mujimba wa Kristu, iye we Mutwe. (1 Kori. 12:12, 13, 27; Kolo. 1:18) Uno we upapachiso wo muli Kristu Yesu. Akwa-Kristu akuwayisa ni spiritu, kakwapapachisa nawa “mu kufwa [cha Kristu]” ha kuhana mwono wo ngwe yitapo ni kulituna kutalatala cha mwono wa mutolo hano hashi. Kufwa cho chili chitapo, ngwe chize chapwile kufwa cha Yesu, chipwe ngwe kufwa cho chishi ni ulemu wa ukuule. Upapachiso uno mu kufwa cha Kristu, wakulingiwa muze ayo akufwa ni kwahindwisa hanga apwe ni mwono mu malilu.
(A-Roma 6:7) Mumu mutu nyi hanafu hanatusuka ku shili.
w14 1/6 11 ¶1
Kutalatala Chika Tulamba Twetu ali Nacho?
Muze makahindwisa yihenge, shina makaasopesa kulita ni shili yize alingile shimbu te kanda achifwa? Ka. A-Roma 6:7 unambe ngwo: “Mutu nyi hanafu hanatusuka ku shili.” Kashika, kufwa chili fweto ya shili yo. Ha chino, makaasopesa kulita ni yitanga yo yize makalinga ha mashimbu jacho muze hahindwisa, hi yize ko alingile shimbu te kanda achifwa.
Kutanga Mbimbiliya
(A-Roma 4:1-15) Mba kuchi mutwamba? Apalahama kulwetu nikulita ni musunya chika awanyine? 2 Mumu nyi kachi hapwisa Apalahama mukwa ululi ku yitanga, kachi kali ni chimwe cha kulisamba nacho; alioze hi kumeso ja Zambi ko. 3 Kuchi kevwe chisoneko cha Zambi chinambe? Ngwo, Apalahama wafulielele Zambi, mba achalwile kuli iye ha ululi. 4 Acho kuli mukwa kukilikita, keshi kwalula fweto yenyi ngwe ya vumbi, alioze ya kongo. 5 Alioze kuli yoze kakilikichile, hindu mafuliela mukwa kusambisa yitanganyanyi, malula ufulielo wenyi ha ululi. 6 Chizechene ngwe Ndawichi nawa kanavuluka kuwaha cha mutu yoze Zambi mamwalwila ululi kuushi yitanga, 7 ngwenyi, Kawaha waze ungulungulu wo hanaakonekenawo, waze milonga yo yinafukiwa. 8 Kawaha mutu yoze Mwene kechi kumwalwila milonga yenyi ya shili. 9 Kuwaha chino chili hali ngalami wika, nyi? Shina hali yilima nawa? Mumu tunambe ngwetu, Alwile kuli Apalahama ufulielo wenyi ngwe ululi. 10 Ngwe kuchi aualwile? Muze apwile ngalami, nyi? Shina chilima? Hi mu ungalami ko, alioze mu ulima. 11 Iye watambwile chinyingi cha ungalami, chijikilo cha ululi wa ku ufulielo, uze apwile nawo shimbu te achili chilima: hanga akapwe tato ya waze eswe akufuliela, chipwe yilima; hanga akalule ululi kuli ayo nawa: 12 hanga akapwe tato ya ngalami, waze kapwile ngalami wika, alioze waze akwenda mu ngano ja ufulielo wa kulwetu Apalahama, uze apwile nawo shimbu te achili chilima. 13 Mumu hi ku Shimbi ko, chilakenyo chapwile kuli Apalahama, hanji ku munyachi wenyi, akapwe swana ya hashi, alioze ku ululi wa ufulielo. 14 Mumu nyi kachi waze a ku shimbi anapu maswana, ufulielo unapu wamokomoko, ni chilakenyo chinapu chamokomoko: 15 mumu Shimbi kuyakukoka utenu; alioze kuze kukushi shimbi, ako utanguko nawa kuushiko.
18-24 FEVEREIRO
YIKUMA YILEMU YA MU LIJI LIA ZAMBI | A-ROMA 7-8
Shina Unatalatala Nikulawoka?
(A-Roma 8:19) Mumu yuma yeswe yakutangiwa kuyakutalatala nikulawoka usolwelo wa ana a Zambi.
w12 15/7 11 ¶17
Echa hanga Yehova Akwehe Utuswilo Wamwenemwene
17 Muze te anahanjika hakutwala ku utuswilo uze Yehova makahana kuli tuvumbi twenyi hano hashi, Paulu yasoneka ngwenyi: “Yuma yeswe yakutangiwa kuyakutalatala nikulawoka usolwelo wa ana a Zambi.” Yaweza nawa ngwenyi: “Hashi hene nawa hakatusuke ku undungo wa kupola ndo ku kutusuka cha uhenya wa ana a Zambi.” (Roma 8:19-21) “Yuma yeswe yakutangiwa” yinalumbunuka atu waze ali ni kutalatala cha kutwama hano hashi, waze makayuka ha “usolwelo” wa ana a Zambi akuwayisa ni spiritu. Usolwelo uno muukaputuka muze “ana” jacho, ali ni kutalatala cha kuya mu malilu, makakalakala chimwika ni Kristu hanga akatusule hashi mu ungulungulu ni kufunga “mbunga yinene” ya atu waze makanjila hashi haha.—Uso. 7:9, 14.
(A-Roma 8:20) Mumu yuma yeswe Zambi atangile ayizeyesele ku yikatalo yamokomoko, hi ni upale wayoene ko, alioze mumu hali yoze wayizeyesele mu kutalatala
w12 15/3 23 ¶11
Tuwahililenu mu Kutalatala Chetu
11 Yehova kahanyine “kutalatala” kuli atu muze alakenyene kunongesa “kapela wa shakulu,” mwe Satana Ndiapu, kupalikila mu “munyachi” wa chilakenyo. (Uso. 12:9; Uputu. 3:15) Yesu Kristu, mwe chihanda chitangu cha “munyachi” wacho. (Ngala. 3:16) Kupalikila mu kufwa ni uhindukilo wenyi, Yesu yahana shindakenyo ha kutalatala cha kutusula atu ku shili ni kufwa. Umanunuko wa kutalatala chino, unalite ni “usolwelo wa ana a Zambi.” Akwa-Kristu akuwayisa ni spiritu, kali chihanda chamuchali cha “munyachi” wacho. ‘Makaasolola’ muze makakalakala hamuwika ni Kristu hanga anongese hashi hano hapi ha Satana. (Uso. 2:26, 27) Chino muchikalumbunuka ulamwino kuli mapanga akwo waze makatuhuka mu luyinda munene.—Uso. 7:9, 10, 14.
(A-Roma 8:21) Hanga hashi hene nawa hakatusuke ku undungo wa kupola ndo ku kutusuka cha uhenya wa ana a Zambi.
w12 15/3 23 ¶12
Tuwahililenu mu Kutalatala Chetu
12 Atu makapwa ni utuswilo hano “hashi” muze Kristu makayula ha Kanunu wa Miaka! Ha mashimbu jacho, “ana a Zambi” akuwayisa ‘makaasolola’ nawa muze makakalakala ngwe asasendote ni Kristu, ha kuhana yiwape ya chitapo cha ukuule wa Yesu kuli atu. Amu atu makazeyela Wanangana wa mu malilu, makapwa ni utuswilo wa lamba lize liakwiza ha shili ni kufwa. Atu waze akwononoka makaatusula “ku undungo wa kupola.” Nyi makanunga ni kushishika kuli Yehova ha mashimbu a Kanunu ka Miaka ni mu cheseko cha kasula, majina jo makanunga mu mukanda “wa mwono” ndo ku miaka yeswe. Makanjila mu utuswilo wa “uhenya wa ana a Zambi.” (Uso. 20:7, 8, 11, 12) Chochene chino chili kutalatala chilemu!
Kuhengwola Yikuma Yilemu ya mu Mbimbiliya
(A-Roma 8:6) Mumu kunyonga cha musunya, kufwa; alioze kunyonga cha Spiritu, mwono ni uhwimino.
Uneuluka?
Kalisa muka uli ha “kunyonga cha musunya” ni “kunyonga cha spiritu”? (Roma 8:6)
Mutu yoze wakuhulikila manyonga jenyi ha yuma ya musunya kakuzanga wika kukuchisa usolo wenyi, nawa kakwecha hanga uhenge umusongwele. Mashimbu eswe kakunyonga ni kuhanjika wika ha yuma ya musunya. Mutu yoze wakunyonga yuma ya spiritu kananyingika ngwenyi, chuma chilemu ku mwono wenyi chili kulingila Yehova. Kakwecha hanga spiritu yisandu yisongwele manyonga jenyi. Kunyonga cha spiritu chinalumbunuka mwono ni sambukila, alioze kunyonga cha musunya chinalumbunuka kufwa.—w16.12, mafwo 15-17.
(A-Roma 8:26, 27) Chizechene Spiritu nawa kakukwasa ulelu wetu: mumu kutwanyingikine kulemba ngwe chinalite; alioze Spiritu iye mwene kakutuhakwila ni mikuma yize niumwe mahasa kuyilumbununa; alioze yoze wakuhengula mu mbunge, kakunyingika chize chapwa kunyonga cha Spiritu, mumu kakuhakwila asandu ni upale wa Zambi.
w09 15/11 7 ¶20
Yika Yilemba ye Yakusolola Hakutwala Hali Yena?
20 Ha mashimbu amwe, hanji tushi kunyingika yize mutwita muze tunalembe ukawetu. Alioze Paulu kasonekene ngwenyi, “Spiritu iye mwene kakutuhakwila ni mikuma yize niumwe mahasa kuyilumbununa; alioze [Zambi] yoze wakuhengula mu mbunge, kakunyingika chize chapwa kunyonga cha Spiritu.” (Roma 8:26, 27) Mu Yisoneko muli yilemba yinji yize Yehova atayijile kuyisoneka. Iye katayijile yilemba yacho hanga yipwe ngwe yilweza kuli yetu muze mutulemba, mba ayitayize kulita ni upale wenyi. Zambi kanatunyingika, nawa kananyingika ulumbunwiso wa yuma yize atumine kusoneka mu Mbimbiliya kupalikila mu spiritu yenyi. Yehova kakukumbulula kuliumba chetu muze spiritu yakutuhakwila “ni mikuma” hanji kwita. Alioze, muze mutunyingika kanawa liji lia Zambi, muchipwa chashi kunyingika yize twatamba kwita muze mutulemba.
Kutanga Mbimbiliya
(A-Roma 7:13-25) Mba ye yipema yalumukine kufwa kuli yami, nyi? Ka, pundu! Alioze shili, hanga yikasoloke shili pundu, ye shimbi yipema yalingile kufwa muli yami; hanga shili yikapwe yipi yahiana mumu ha shimbi. 14 Mumu tunanyingika ngwetu, ye shimbi yapwa ya uspiritu: alioze yami nguli wa musunya, angulanjishile kushi lia chiyulo cha shili. 15 Mumu chize nakulinga, chishi kuchitayiza: mumu chize ngunapale chachilingile. Chize changupihila chenacho nakulinga. 16 Alioze nyi mungulinga chize chapalile, acho ngunataa ku shimbi ngwami, Yinapeme. 17 Chocho hi yami ko nawa nakuchilinga, alioze shili yize yatwama muli yami. 18 Mumu ngunanyingika ngwami, Muli yami, mwe mu musunya wami, chuma chipema kuchishimo: mumu kupala na kupala, alioze kulinga chize chinapeme chachihashile. 19 Mumu yipema yize ngunapale, chishi kuyilinga: alioze yipi yize chapalile, yenayo nakulinga. 20 Alioze nyi nakulinga chize chapalile, hi yami ko nawa nakulinga, alioze shili yize yatwama muli yami. 21 Kashika ngunawane shimbi yikwo muli yami: muze nakupala kulinga kanawa, yipi yili muli yami. 22 Mumu nakuwaha ni shimbi ya Zambi ni kulita ni mutu wa muchima: 23 alioze ngunamono shimbi yeka mu mujimba wami, yakwasa jita ni shimbi ya kunyonga chami, yakunguneha ku ufunge ku shimbi ya shili yize yili mu mujimba wami. 24 Lwangu! Nguli mutu wa kulungajala chichize! Iya mangupulula ku mujimba uno wa kufwa? 25 Ngunasakwila Zambi mu jina lia Yesu Kristu Mwene wetu. Chocho yami mwene ni kunyonga chami nakulingila shimbi ya Zambi; alioze ni musunya nakulingila shimbi ya shili.
25 FEVEREIRO–3 MARÇO
YIKUMA YILEMU YA MU LIJI LIA ZAMBI | A-ROMA 9-11
“Chishima cha Mutondo wa Olevwe”
(A-Roma 11:16) Nyi kachi chihanda chitangu cha mwaha muchipwa chisandu, kachi mwaha weswe nawa usandu. Nyi muji usandu, kachi mitango nawa yisandu.
w11 15/5 23 ¶13
‘Mana . . . . a Zambi, Kajondoka!’
13 Postolo Paulu katesele waze akulinga chihanda ku munyachi wa Apalahama ni mitango ya olevwe. (Roma 11:21) Mutondo uno wa olevwe, unalumbunuka umanunuko wa upale wa Zambi ha usendo uze alingile ni Apalahama. Miji ya mutondo yili yisandu nawa yinalumbunuka Yehova yoze wakuhana mwono kuli A-Izalele a spiritu. (Iza. 10:20; Roma 11:16) Mungowa unalumbunuka Yesu ngwe chihanda chitangu cha munyachi wa Apalahama. Mitango yinalumbunuka “kuzala too cha” eswe waze akulinga chihanda chamuchaali ku munyachi wa Apalahama.
(A-Roma 11:17) Nyi kachi mitango yimwe hanayipatulako, ni yena, se uli olevwe wa mu yambu, akunungine hakachi kayo, hiwapwa mukwa kuliangana ni mukwo hamwe nayo ha muji ni maji ja olevwe;
(A-Roma 11:20, 21) Mba, ayipatwileko mumu kafulielele, ni yena unamana mumu ha ufulielo. Kanda ulengumuka, alioze ivwa woma: mumu nyi Zambi kavwilile keke mitango yitangu, chipwe yena kechi kakuvwila keke nawa.
w11 15/5 24 ¶15
‘Mana . . . . a Zambi, Kajondoka!’
15 Yika Yehova alingile mba amanunune upale wenyi? Paulu yalumbununa ngwenyi, mba asalakanyise mitango yize apatwile ku mutondo utangu wa olevwe, kanungineko mitango ya olevwe wa mu yambu. (Tanga A-Roma 11:17, 18.) Hachino, akwa-Kristu akuwayisa ni spiritu a ku mavungu akwo, ni amwe a mu chikungulwila cha Roma, kali ngwe kaanungine ku mutondo wa olevwe. Chocho yapwa a ku munyachi wa Apalahama. Kwamba pundu, ayo kapwile ngwe mitango ya olevwe wa mu yambu, mumu te keshi ni uhashi wakulinga chihanda mu usendo uno ulemu. Alioze Yehova yaazulwila jila hanga apwe A-Yunda a ku spiritu.—Roma 2:28, 29.
(A-Roma 11:25, 26) Mandumbu chazangile yenu nwalajale ha chijimbikilo chino, kuchina munukanyama ni kutaka cha yenwene. Ngwami, kukalisa ha chihanda hichawana A-Izalele, ndo kuzala too cha akwa mavungu muchiza. Chocho makalamwina A-Izalele eswe; ngwe chinasonewa ngwo, Mukwa kupulula kumakakatuka mu Zaione; iye kumakakatwisa utanganyanyi kuli akwa Yakomba.
w11 15/5 25 ¶19
‘Mana . . . . a Zambi, Kajondoka!’
19 Kwamba pundu, upale wa Yehova hali “A-Izalele a Zambi” unamanunuka. (Ngala. 6:16) Ngwe chize Paulu ambile, “makalamwina A-Izalele eswe.” (Roma 11:26) Muze tangwa lize Yehova asele mulitakana, “A-Izalele eswe”—chekwamba A-Izalele eswe a ku spiritu—makakalakala ngwe mianangana ni asasendote mu malilu. Kukushi nichimwe chize muchikinda upale wa Yehova.
Kuhengwola Yikuma Yilemu ya mu Mbimbiliya
(A-Roma 9:21-23) Hanji tengi keshi chiyulo ha uma, ku mwaha umuwika kutenga chikwachilo chimwe ku ulemu ni chikwo ku ulelu? 22 Kachi Zambi, kanazange kulweza utenu wenyi, nikusolola tachi jenyi, wanyongonwene ni uhomboloji wunji ni yikwachilo ya utenu alitesele ha kwonwona: 23 hanga akasolole kulumbama cha uhenya wenyi ha yikwachilo ya keke, yize iye alulikile shimbu-kanda akazuke uhenya.
w13 15/6 25 ¶5
Echa Hanga Yehova Akufumbe
5 Mba nyi atu ni uhulia weswe malituna fumbo lia Tengi Munene? Kuchi mba, iye masolola chiyulo chenyi? Nyonga ha yize yakulingiwa ha uma nyi kuwatuhukile ngwe chize tengi anazange. Hachino, tengi mahasa kulinga chikwachilo cheka hanji kumbila uma wacho! Kanji-kanji muze uma kuwatuhukile kanawa uhenge wakupwa wa tengi. Alioze, chino kuchichi kulingiwa kuli Tengi yetu. (Shimbi 32:4) Muze mutu katuhukile kulita ni chize Yehova anamufumba, nihindu uhenge wakupwa wa mutu mwene. Yehova kakuzachisa chiyulo chenyi ngwe tengi ha kutesa fumbo lienyi hali atu, chili kuli ayo chize matayiza fumbo liacho. Waze akwecha hanga Yehova aafumbe kakuzuka yiwape yinji. Chakutalilaho, akwa-Kristu akuwayisa ni spiritu kali “yikwachilo ya keke” kakwafumba hanga apwe ‘yikwachilo yilemu.’ Kwamba pundu, waze akulimika ni Zambi kakupwa “yikwachilo ya utenu alitesele ha kwonwona.”—Roma 9:19-23.
(A-Roma 10:2) Mumu nakushindakenya hali ayo ngwami, Mbunge ali nayo kufupa Zambi, alioze hi nikulita ni chinyingi ko.
it-1 517 ¶5
Ukwa
Kusolola Zango mu Jila Yize Kuyalitele. Mutu mahasa kusolola zango linji, hanji ukwa hamukunda wa chimwe chitela chipema, chipwe chocho, mahasa kuyisolola mu jila yipi ni kwivwisa Zambi kupiha. Yino ye te yakulingiwa kuli A-Yunda a ku sekulu yitangu. Ayo te kakushimbwila ngwo, ululi muwiza ha yitanga yo ene ha mukunda wa Shimbi ja Mose. Alioze Paulu yashindakenya ngwenyi, ayo te kanasolola zango mu jila yize kuyalitele, mumu te keshi ni chinyingi chamwenemwene. Hachino, kakahashile kupwa ni ululi wamwenemwene uze wakwiza kuli Zambi. Kachi kalikonyekene ni kufuna kuli Zambi kupalikila muli Kristu, hanga atambule ululi ni utuswilo uze wakwiza ha uhiso wa Shimbi. (Ro 10:1-10) Saulu wa ku Tarsu neye kapwile umwe wa kuli atu jacho, kapwile ni zango linji mu Uyunda, nawa mumu lia chino yapwa mukwa “kuhungumiona chikungulwila cha Zambi, nikuchenyeka.” Te kakufunga Shimbi ni mbunge yeswe ngwe, yoze ‘keshi chitela.’ (Nga 1:13, 14; Fwp 3:6) Chipwe chocho, ukwa uze te akwivwa mumu lia Uyunda te kakuusolola mu jila yipi. Kapwile ni mbunge yipema, kashika Yehova amusolwelele keke kupalikila muli Kristu, ha kumusolwela jila ya uwayilo wamwenemwene.—1Ti 1:12, 13.
Kutanga Mbimbiliya
(A-Roma 10:1-15) Mandumbu jami, che kuzanga cha mbunge yami, ni kuliumba chami kuli Zambi hali ayo, hanga akawane ulamwino. 2 Mumu nakushindakenya hali ayo ngwami, Mbunge ali nayo kufupa Zambi, alioze hi nikulita ni chinyingi ko. 3 Mumu se kanyingikine ululi wa Zambi, kakufupa kulikolela ha ululi woene, kalizeyesele ku ululi wa Zambi. 4 Mumu Kristu iye mwe umanunwino wa Shimbi ja Zambi ha ululi kuli mweswe mafuliela. 5 Mumu Mose hanasoneka ngwenyi, Mukwa kulinga ululi uze wa ku shimbi kumakapwa nawo ni mwono. 6 Alioze ululi uze wa ku ufulielo unambe ngwe chino ngwo, Kanda uamba mu mbunge ye ngwe, Iya mazezuka mwilu? Te akahulumune Kristu. 7 Hanji iya mahulumuka ku jondo? Te akazezwise Kristu hakachi ka afu. 8 Alioze kuchi chinambe? Ngwo, Liji lili hehi ni yena, mu kanwa lie, ni mu mbunge ye: alioze liji lia ufulielo lize twakwambujola: 9 ngwo, Nyi mutayiza ni kanwa lie ngwe, Yesu iye mwe Mwene; mba mu mbunge ye mufuliela ngwe, Zambi wamuhindwishile hakachi ka afu, kumakulamwina. 10 Mumu mutu mafuliela mu mbunge akatambule ululi; mba ni kanwa matayiza akatambule ulamwino. 11 Mumu Chisoneko cha Zambi chinambe ngwo, Mweswawo mamufuliela, kechi kevwa sonyi. 12 Mumu kulipwila chakuhi ha kachi ka A-Yunda ni Akwa Mavungu, nichimwe: mumu Mwene umuwika, mwe Mwene wa eswe, kakuyukisa waze eswe akutambika kuli iye: 13 mumu mweswawo matambika ha jina lia Mwene, kumakamulamwina. 14 Alioze kuchi mahasa kutambika kuli yoze kamufulielele? Kuchi mahasa kufuliela yoze kamuvwilile liji? Kuchi mahasa kwivwa nyi mukwa kwambujola wakuhi? 15 Kuchi mahasa kwambujola shina matumiwa? Nikulita ngwe chinasonewa ngwo, Cho kupema cha molu ja akwa kwambujola Sango Lipema!