Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
4-10 NOVEMBRO
YIKUMA YILEMU YA MU LIJI LIA ZAMBI | 1 YOANO 1-5
“Kanda Nuzanga Hano Hashi, Chipwe Yuma Yize Yili Hano Hashi”
(1 Yoano 2:15, 16) Kanda nuzanga hano hashi, chipwe yuma yize yili hano hashi. Nyi umwe mazanga yuma ya hashi, zango lia Tata kulishimo muli iye. 16 Mumu yize yeswe yili hano hashi, usolo wa musunya, ni usolo wa meso, ni kulizata cha mwono, hi ya kuli Tata ko, alioze ya hano hashi.
w05 1/1 10 ¶13
Tukaulenu mu Ngano ja Yesu
13 Atu amwe mahasa kwamba ngwo, yuma yimwe yili hano hashi hi yipiko. Chipwe ngwe maliji wano kali amwenemwene, alioze kwamba pundu yuma ya hano hashi muyihasa kutupiangula kuwayila Yehova. Yuma ya hano hashi kuyishi kutukwasa kuwayila Zambi. Kashika, nyi mutuputuka kuzanga yuma ya hano hashi, chipwe yize muyisoloka ngwe yipema, mutulisa mu ponde. (1 Timoteu 6:9, 10) Chikwo nawa, yuma yinji ya hano hashi yili yipi, kashika muyihasa kutupiangula. Nyi mututala yinema hanji yizulie ya ungulungulu, chipwe yize ya kushinjila kuzanga chinji upite, ni utanji, ha kupalika cha mashimbu mutuhasa kuzanga yuma yacho, mba henaho muyipwa ponde hali yetu. Nyi mutulikata ni atu waze akuhulikila wika mwono wo ha upite hanga apwe ni mwono upema, ni yetu mutuhasa kupwa ngwe ayo.—Mateu 6:24; 1 A-Korindu 15:33.
(1 Yoano 2:17) Ya hashi muyipalika, ni usolo wayo: alioze yoze malinga upale wa Zambi matwama ndo ku miaka ya mutolo.
w13 15/8 27 ¶18
Mutu wa Mulali Uka Watamba Kupwa
18 Chuma chikwo chize muchitukwasa kwehuka yuma “ya hashi” chili kwiwuluka maliji a Yoano anambe ngwo: “Ya hashi muyipalika, ni usolo wayo: alioze yoze malinga upale wa Zambi matwama ndo ku miaka ya mutolo.” (1 Yoa. 2:17) Yuma ya hano hashi ha Satana yakusoloka ngwe muyinunga ndo ku miaka ya mutolo. Alioze tangwa limwe muyinonga. Yuma yeswe ya hano hashi ha Satana kuyichi kununga ndo ku miaka yeswe. Kunyingika yuma yino muchitukwasa hanga tuchine kuholokela mu muheto wa Ndiapu.
Kuhengwola Yikuma Yilemu ya mu Mbimbiliya
(1 Yoano 2:7, 8) Akwetu a zango, chasonekene shimbi yaha kuli yenu, alioze shimbi yikulu yize nwapwile nayo chize ku uputukilo: shimbi yikulu lie liji lize nwevwile. 8 Cheka nawa shimbi yaha ngunasoneka kuli yenu; chenacho chamwenemwene muli iye ni muli yenu; mumu milima yinapalika, ni pangu liamwenemwene linapanguka kulu.
w13 15/9 10 ¶14
Shindakenyo ya Yehova Kuyakola
14 Mu Yisoneko ya Ngregu ya akwa-Kristu, kanatutoweza chinji hanga tusolole zango hali akwetu. Yesu kambile ngwenyi, shimbi yinene yamuchiali yili ngwo, “ukazange mwenyembo we ngwe wakulizanga yena mwene.” (Mateu 22:39) Nawa Tiangu mwana-kwo ya Yesu, kavulukile zango ngwo “shimbi ya ku wanangana.” (Tia. 2:8) Postolo Yoano kasonekene ngwenyi: “Akwetu a zango, chasonekene shimbi yaha kuli yenu, alioze shimbi yikulu yize nwapwile nayo chize ku uputukilo.” (1 Yoa. 2:7, 8) Yika Yoano azangile kwamba muze ambile ngwenyi, “shimbi yikulu”? Iye te kanahanjika ha shimbi ya zango. Shimbi yacho yapwile “yikulu” mumu Yesu kayihanyine ha mashimbu akunyima “chize ku uputukilo.” Alioze yapwile nawa “yaha” mumu akwa-Kristu te katamba kusolola zango lingunu kuli akwo mashimbu eswe. Yetu tumbaji ja Kristu, twakulemesa chinji utowezo uze wakutukwasa kwehuka yitanga ya chipululu, yize muyihasa kupihisa zango lietu hali akwetu.
(1 Yoano 5:16, 17) Nyi umwe mamona ndumbwenyi kanavulumuna mulonga hi wa kufwa ko, akete kuli Zambi, mba makamwaha mwono hali waze keshi kuvulumuna mulonga wa kufwa. Kuuli mulonga wa kufwa chambile nukalembele uno. 17 Uhenge weswe hi shili, alioze kuuli mulonga hi wa kufwa ko.
it-3 243 ¶3
Kukonekena
Chili chipema kulembela akwetu kuli Zambi hanga twite ukonekeno wa shili yo, chipwe kulembela chikungulwila. Mose kalembelele vungu lia Izalele ni kwambulula shili yo, ni kwita ukonekeno, Yehova yapanjika yilemba yenyi. (Kwa 14:19, 20) Nawa Solomone muze azulwile tembele, yalemba kuli Yehova hanga akonekene atu jenyi muze te mavulumuna ni kulikonyeka. (1Mi 8:30, 33-40, 46-52) Ezera kalembele ha mbunga hanga ambulule shili ya A-Yunda waze afunyine mu chifuchi cho. Kulemba chenyi chingunu ni utowezo uze ahanyine kuli A-Yunda, yakwashile atu alikolweze hanga apwe ni ukonekeno wa Yehova. (Ezr 9:13–10:4, 10-19, 44) Tiangu kanakolweza yoze unayiza ku ufulielo, asanyike makulwana a mu chikungulwila alembe hali iye, nawa “nyi kachi hanavulumuna milonga, mamukonekenayo.” (Tia 5:14-16) Alioze, kuli “mulonga wa kufwa,” uze wakushililika spiritu musandu, che kwamba, kupwa ni ndako ya kulinga shili, shili yacho keshi kuyikonekena. Mukwa-Kristu katambile kulembela waze akulinga shili yacho.—1Yo 5:16; Mat 12:31; Hep 10:26, 27. ESPÍRITO; PECADO.
Kutanga Mbimbiliya
(1 Yoano 1:1–2:6) Yoze wapwile chize ku uputukilo, yoze hitunamwivwu, yoze hitunamumono ni meso jetu, yoze hitunamuhulikila meso, mba ni moko jetu hitunamuvwavwata, ha kutwala ku Liji lia Mwono. 2 (Hanasolola mwono, mba hitunamono, twakuushindakenya, tunanwambulwila mwono wa mutolo, yoze wapwile hamwe ni mwe Tata, hanamusolola kuli yetu); 3 yoze twamumwene, twamuvwile, mwenawo tunanwambulwilaye, hanga ni yenu nawa nukaliendele hamwe ni yetu. Mba kuliendela chetu chamwenemwene chili hamwe ni mwe Tata, ni hamwe ni Mwanenyi Yesu Kristu. 4 Yino yuma tunasoneka, hanga uwahililo wenu ukazale too. 5 Lino liji twevwile kuli iye, tunanwambulwilalio ngwo, Zambi iye pangu, muli iye milima yakuhi nyiyimwe. 6 Nyi kachi mutwamba ngwetu, Tunaliendela nenyi, hindu mutwenda mu milima, tunahanjika mahuza, kutwalingile umwenemwene. 7 Alioze nyi kachi mutwenda mu pangu ngwe iye uli mu pangu, mutuliendela umwe ni mukwo ni mukwo, ni manyinga a Yesu Mwanenyi kakutupemesa ku shili yeswe. 8 Nyi mutwamba ngwetu Kutushi shili, tunaliongo, mba umwenemwene kuushimo muli yetu. 9 Nyi mutushikisa milonga yetu, iye wamwenemwene, iye mukwa ululi kutukonekena milonga yetu, ni kutupemesa ku uhenge weswe. 10 Nyi mutwamba ngwetu, kutwavulumwine, mutumupwisa mukwa mahuza, liji lienyi kulishimo muli yetu.
2 Anami akepe, yino yuma ngunasoneka kuli yenu, hanga kunuchi kuvulumuna. Nyi kachi umwe mavulumuna, Hako tuli nenyi kumeso ja mwe Tata, iye Yesu Kristu, mwe mukwa ululi. 2 Iye lie kuka ha milonga yetu; hi ha milonga yetu wika ko, alioze nawa ha milonga ya akwa hashi eswe. 3 Ku chino tunase chinyingi ngwetu, tunamunyingika, nyi tunafungu shimbi jenyi. 4 Yoze mamba ngwenyi, Ngunamunyingika, alioze keshi kufunga shimbi jenyi, iye mukwa mahuza, umwenemwene kuushimo muli iye; 5 Alioze mweswe mafunga liji lienyi, muli yono chamwenemwene zango lia Zambi linapu lingunu. Ha chino tunanyingika ngwetu, Tuli muli iye. 6 Yoze mamba ngwenyi, Ngunatwama muli iye, chamutamba nawa kwenda chizechene ngwe endele iye.
11-17 NOVEMBRO
YIKUMA YILEMU YA MU LIJI LIA ZAMBI | 2 YOANO 1–YUNDASE
“Twatamba Kulikolweza Hanga Tupwe mu Umwenemwene”
(Yundase 3) Akwetu a zango, shimbu nasele mbunge kusoneka kuli yenu ha kutwala ku ulamwino wa yetu eswe, alioze ngunamono ngwami, Changutamba kusoneka kuli yenu, ni kunushinjila nulitachike chikolo ha ufulielo uze aukunjikile kuli asandu kamuwika kunahu.
w04 15/9 11-12 ¶8-9
“Likolezenu Muli Mwene, ni mu Ngolo ja Ndundo Jenyi”
8 Mbimbiliya yakutusolwela miheto ya Satana. (2 A-Korindu 2:11) Satana kanehene lamba linji hali Yombi mutu mungunu, yashiha ana jenyi, asoko jenyi yalimika nenyi, yamwasa yikola yipi chinji, nawa masepa asaki yamwamba yuma yinji yisasu. Yombi yalinyenga chinji ni kunyonga ngwenyi, Zambi hamuvulama. (Yombi 10:1, 2) Chipwe ngwe Satana keshi kutumwesa lamba ngwe lize amwesene Yombi, nihindu akwa-Kristu anji kanamono lamba linji. Kashika, Satana mahasa kutupinjisa kupalikila mu lamba liacho.
9 Ha mashimbu wano akusula, kwakusoloka ponde yinji ya ku spiritu. Hano hashi twatwama, atu kakulihulikila chinji ha kufupa upite kuhiana yuma ya ku spiritu. Yinema yakusolola ngwe utanji wakuneha chiseke ku mwono wa atu hi yinyengo ko. Atu waze akulinga yuma yacho “kakuzanga kuheha, kazangile Zambi.” (2 Timoteu 3:1-5) Yuma yino muyihasa kupihisa ufulielo wetu, kashika twatamba kulitachika “chikolo ha ufulielo.”—Yundase 3.
Kuhengwola Yikuma Yilemu ya mu Mbimbiliya
(Yundase 4) Mumu amwe atu aliombele nikunjila ku tenga, waze ku shakulu aavulukile shimbu-kanda ha uhiso uno, yitanganyanyi, waze akwalumuna vumbi lia Zambi ujila, kakulikala Mwata wetu umuwika, kanda Mwene wetu Yesu Kristu.
(Yundase 12) Wano kanapu yipeka mu yiteleka yenu ya zango, muze maliangana hamwe ni yenu, tufunga waze keshi woma, kakulilisa ene; malelwa aze keshi meya, a kuhungumioka kweka ni kweka ni fuji; mitondo ya lushiho kuyakakaminya, kuyinafu kaali, yakutangumuka;
it-1 62
Yiteleka ya Zango
Mbimbiliya kuyishi kuhanjika ha yiteleka ya zango chipwe kusolola yisuho yize apwile ni kuyilinga. (Yu 12) Mwene Yesu Kristu kakatumine apostolo jenyi alinge chiwanyino chacho, chinasoloka pundu ngwo kukushi shimbi yize yinatumu kulinga yiwanyino yino. Amwe kakwamba ngwo akwa-Kristu waze apwile pichi e apwile ni kulinga chiwanyino chacho hanga asanyike mandumbu jo waze yiswale apwe hamuwika. Tuliwa, ana shiwa ni pichi te kakulia hamuwika ni chiseke cheswe.
it-3 456
Chipeka
Liji lia Ngregu spi·lasʹ, linalumbunuka liwe lize liakupwa kwishi lia meya. Yundase kavulukile liji lino hanga ahanjike hali atu waze anjilile mu chikungulwila cha akwa-Kristu ni manyonga api. Chizechene ngwe liwe kushi lia meya mulihasa kusa ulungu mu ponde, atu jacho te kapwa ponde yinene mu chikungulwila. Yundase kahanjikile hali atu jacho ha kwamba ngwo: “Wano kanapu yipeka mu yiteleka yenu ya zango, muze maliangana hamwe ni yenu.”—Yu 12.
(Yundase 14, 15) Enoke, wamuchishimbiali kuli Alama, waprofetezele hali wano ngwenyi, Mwene kumeza hamwe ni yizavu yinji ya asandu jenyi, 15 mukulinga upatwilo hali eswe, mukukumika yitanganyanyi eswe ha yitanga yo yeswe ya utanganyanyi, yize alingile ni utanganyanyi, ni ha yuma yeswe yikalu yize yivulumunyi a utanganyanyi hanahanjika ya kulimika nenyi.
‘Te Kakupemena Kuli Zambi’
Uprofeto wa Enoke kuchi wambile? Wambile ngwo: “Mwene kumeza hamwe ni yizavu yinji ya asandu jenyi, mukulinga upatwilo hali eswe, mukukumika yitanganyanyi eswe ha yitanga yo yeswe ya utanganyanyi, yize alingile ni utanganyanyi, ni ha yuma yeswe yikalu yize yivulumunyi a utanganyanyi hanahanjika ya kulimika nenyi.” (Yundase 14, 15) Enoke kapwile ni ufulielo ukolo ngwenyi, yuma yacho te muyilingiwa pundu. Kuli iye, Zambi te hanamanununa kulu uprofeto wacho. Nyonga hano lili ngwo: Profeta kanahanjika ha chimwe chuma chize muchikalingiwa, chize muchihasa kupwa kulumbununa ngwe hichalingiwa kulu!—Izaia 46:10.
‘Te Kakupemena Kuli Zambi’
Ufulielo wa Enoke wakutulingisa hanga tulihule yetwene nyi Zambi kakumona yuma yeswe yize yinalingiwa hano hashi. Upatwilo uze Enoke ambulwile ni hamu lieswe ni haliapwila uchiliko; unatale nawa yuma yize yinalingiwa musono hano hashi, ngwe chize yapwile ha matangwa ja Enoke. Kulita ni utowezo wa Enoke, Yehova yaneha Sanga Linene lia Meya lize liashihile yitanganyani eswe ha matangwa ja Noa. Alioze unongeso wacho wahichikile chilweza cha luyinda munene yoze uneza kulutwe lia matangwa. (Mateu 24:?38, 39; 2 Petulu 2:?4-6) Ni musono nawa, Zambi kanalilulieka hamwe ni yizavu ya asandu jenyi hanga akanehe upatwilo ungunu hano hashi ha yitanga yipi. Yetweswe twatamba kusa ku mbunge utowezo wa Enoke ni kuulweza kuli akwetu. Asoko ni masepa jetu mahasa kuhona kupwa sali lietu. Mutuhasa kwivwa ngwe tuli ukawetu ha amwe mashimbu. Alioze Yehova kakavulamine Enoke; kashika chipwe haliapwila, iye kechi kavulama tuvumbi twenyi ashishika!
Kutanga Mbimbiliya
(2 Yoano 1-13) Mukulwana kuli ndona yoze amutongwele, ni kuli ana jenyi, waze ngunaazange ni umwenemwene; hi yami wika ko, alioze nawa waze eswe ananyingika umwenemwene; 2 mumu ha umwenemwene uze watwama muli yetu, kumuukapwa hamwe ni yetu ndo ku miaka ya mutolo: 3 Vumbi, ni keke, ni sambukila kumuyikapwa hamwe ni yetu, ya kuli Zambi Tata ni ya kuli Mwene Yesu Kristu, mwe Mwana wa Tata, ni umwenemwene ni zango. 4 Nakuwahilila chikolo ha kuwana amwe a kuli ana je akwenda mu umwenemwene, ngwe hitunatambula shimbi kuli Tata. 5 Haliapwila ngunaliumbu kuli yena ndona, kuchapwile ngwe ngunasoneka kuli yena shimbi yaha, alioze yize twapwile nayo chize ku uputukilo ngwetu, Tukalizange umwe ni mukwo ni mukwo. 6 Lino lie zango, ngwetu, Tukende nikulita ni shimbi jenyi. Yino ye shimbi ngwe nwevwile chize ku uputukilo, hanga nukende nayo. 7 Mumu akwa kupiangula anji haneza hano hashi, waze keshi kutayiza ngwo, mwe Yesu Kristu haneza mu musunya; mwe mukwa kupiangula yono, mwe mukwa kulimika ni Kristu. 8 Litalenu kuli yenwene, hanga kutuchi katokesa yuma yize hitunalingi, alioze hanga tukatambule kwononona cheswe. 9 Mweswe matangula, keshi kutwama mu longeso lia Kristu, awo keshi ni Zambi. Yoze matwama mulongeso lia Kristu, kali ni eswe aali, ni mwe Tata ni mwe Mwana. 10 Nyi kachi umwe meza kuli yena, kanehene longeso lino, kanda umutambula mu zuwo lie, kanda umumeneka: 11 mumu yoze mamumeneka, malifutula ni yitanga yenyi ya ungulungulu. 12 Yuma yinji nguli nayo kusoneka kuli yena, alioze chazangile kuyisoneka ha papilo ni ulombo; alioze ngunatalatala kwiza kuli yena, ni kuhanjika meso ni meso, hanga uwahililo wetu ukazale too. 13 Ana ja pangie yoze amutongwele kanakumeneka.
18-24 NOVEMBRO
YIKUMA YILEMU YA MU LIJI LIA ZAMBI | USOLWELO 1–3
“Ngunanyingika Yitanga ye”
(Usolwelo 1:20) Chijimbikilo cha matongonoshi shimbiali waze hiwamona ha kwoko liami lia chindume, ni yikwachilo shimbiali ya ndeya ya oru ngwami, Matongonoshi shimbiali, e angelo ja Yikungulwila shimbiali; ni yikwachilo shimbiali ya ndeya, ye Yikungulwila shimbiali.
w12 15/10 14 ¶8
Spiritu ya Mulali Uka Yena Wakusolola?
8 Twatamba kwiwuluka ngwetu, Yesu kakumuvuluka mu Mbimbiliya ngwe yoze uli ni “matongonoshi shimbiali ha kwoko [lienyi] lia chindume.” “Matongonoshi” kali makulwana a mu chikungulwila cha akwa-Kristu akuwayisa ni spiritu, kuchingaho makulwana eswe a mu yikungulwila. Yesu mahasa kusongwela “matongonoshi” ali ha moko jenyi mu jila yize anazange. (Uso. 1:16, 20) Amu Yesu ali Mutwe wa chikungulwila cha akwa-Kristu, iye kananyingika makulwana eswe a mu chikungulwila. Nyi umwe wa mu chizavu cha makulwana a mu chikungulwila mafupa ukwaso, Yesu uli ni “meso ngwe mulengi wa kahia” mafunga hanga yuma yeswe yende kanawa ni ha mashimbu alita. (Uso. 1:14) Kashika, twatamba kusa vumbi makulwana waze hanase kulita ni spiritu yisandu. Postolo Paulu, kasonekene ngwenyi: “Ononokenu kuli waze apwa tusongo twenu, nukazeye kuli ayo: mumu kakulawoka ha mbunge jenu, chizechene ngwe waze makalumbununa kuli Zambi, hanga akalinge chino ni uwahililo, hi ni kutwa mikuma ko, mumu chino kuchichi kanufumbula.”—Hepre. 13:17.
(Usolwelo 2:1, 2) Kuli mungelo wa Chikungulwila mu Efwesu soneka ngwe, Yino yuma anambe yoze uli ni matongonoshi shimbiali mu kwoko lienyi lia chindume, yoze wakwenda mukachi ka yikwachilo shimbiali ya ndeya ya oru, ngwenyi, 2 Ngunanyingika yitanga ye, ni kukilikita che, ni kunyongonona che. Kwahashile kutayiza atu api, hiuneseka waze akwamba ngwo, Tuli apostolo, alioze hi apostolo ko, hiunaawane akwa mahuza.
w12 15/4 29 ¶11
Yehova Kakutufunga Hanga Akatulamwine
11 Usolwelo uze uli ha Usolwelo kapitulu 2 ni 3, unasolola Yesu Kristu kanahengula yikungulwila shimbiali ya ku Azia Yikehe. Usolwelo wacho, unasolola ngwo Kristu kakumona hita chuma chinalingiwa mu chikungulwila. Ha mashimbu amwe, kakuvuluka atu ha majina jo, ni kwachichimieka hanji kwaha chiyulo. Yika yino yinalumbunuka? Kulita ni usolwelo wacho, yikungulwila shimbiali yinalumbunuka akwa-Kristu akuwayisa ni spiritu kuputuka ha mwaka wa 1914. Chiyulo chize ahanyine ku yikungulwila shimbiali chinatale ha yikungulwila ya atu ja Zambi hashi heswe. Kashika, mutuhasa kwamba ngwetu, Yehova kanasongwela atu jenyi kupalikila muli Mwanenyi. Kuchi mutuhasa kuyuka ha chiyulo chino?
w01 15/1 20-21 ¶20
Kaula Ululikiso wa Yehova
20 Kukaula ululikiso wa Yehova chinafupiwa kunyingika ulemu wa Yesu Kristu, yoze asele kuli Zambi, ngwe “mutwe wa Chikungulwila.” (A-Efwesu 5:22, 23) Mukanda wa Izaia 55:4, newo unambe ngwo: “[Yami Yehova] namupwishile chela ku mavungu; kasongo ni kapitau ka minyachi.” Kwamba pundu, Yesu kanyingika kanawa kusongwela atu. Kanyingika nawa mapanga jenyi ni yitanga yo. Kashika, muze Yesu ahengwile yikungulwila shimbiali ya mu Azia Yikehe, yamba katano keswe ngwenyi: “Ngunanyingika yitanga ye.” (Usolwelo 2:2, 19; 3:1, 8, 15) Yesu nawa kanyingika yize tunafupu ngwe chize Tato Yehova, anyingika. Kashika shimbu te kanda achilongesa tumbaji twenyi kulemba, Yesu yamba ngwenyi: “Tatenu kananyingika yuma yize nwakufupafupa, shimbu kanda nwita kuli iye.”—Mateu 6:8-13.
Kuhengwola Yikuma Yilemuya mu Mbimbiliya
(Usolwelo 1:7) Nyingikenu, kumeza ni malelwa; mba meso eswe kumakamumona, chipwe waze amutuwile; mavungu nawa eswe a hashi kumakalila mbimbi hali iye. Chochene. Amene.
Wanangana wa Zambi Muunongesa Akwa-Kole Jawo
10 Maliji a upatwilo. Akwa-kole ja Wanangana wa Zambi makalila mbimbi ha upatwilo uze makaanehena. Yesu yamba ngwenyi: “Hohene makamona mwe Mwana Mutu kaneza mu malelwa hamwe ni tachi jinene ni uhenya.” (Marku 13:26) Usolwelo uno muukasolola ngwo Yesu heza nikuneha upatwilo. Chihanda chikwo cha usolwelo uno, chize chinahanjika ha matangwa akusula, Yesu kanahanjika nawa ha chize upatwilo wacho muukapwa. Maliji jacho tunaawana ha lusango wa mapanga ni pembe. (Tanga Mateu 25:31-33, 46.) Waze ali sali lia Wanangana wa Zambi makaavuluka ngwe “mapanga” muze makatala kwilu, makanyingika ngwo “ulamwino wo unakundama.” (Luka 21:28) Alioze waze akulimika ni Wanangana wa Zambi maakasopesa ngwe “pembe,” makalila mbimbi ni kunyingika ngwo kufwa cho cha mutolo chinakundama.—Mateu 24:30; Uso. 1:7.
(Usolwelo 2:7) Yoze uli ni matwi, apanjike chize anambe Spiritu ku Yikungulwila. Kuli yoze makumba, mungukamwaha mukulia ku mutondo wa mwono uze uli mu Paraisu ya Zambi.
w09 15/1 31 ¶1
Sango Jilemu ja Mukanda wa Usolwelo—I
2:7—“Paraisu ya Zambi” Yika? Amu maliji wano anatale hali akwa-Kristu akuwayisa ni spiritu, kashika mutuhasa kwamba ngwetu paraisu ya Zambi yili utumino wa mu malilu—kusoloka cha Zambi. Akwa-Kristu akuwayisa ni spiritu makapwa ni ulite wa kulia “mutondo wa mwono.” Ayo makapwa ni mwono uze kuushi songo.—1 Kori. 15:53.
Kutanga Mbimbiliya
(Usolwelo 1:1-11) Usolwelo wa Yesu Kristu, uze Zambi amuhele mukulweza kuli ndungo jenyi chize chatamba kupwa nikawashi: iye watumine mungelo waulwezele ni yilayi kuli ndungo yenyi Yoano. 2 Mwenawo washindakenyene ha liji lia Zambi, ni ha shindakenyo ya Yesu Kristu, yuma yize yeswe amwene. 3 Kawaha yoze matanga, ni waze mevwa maliji a uprofeto uno, waze mafunga yuma yize yinasonewamo: mumu mwaka hakamwihi uli. 4 Yami Yoano ngunasoneka ku Yikungulwila shimbiali ya mu Azia: Vumbi kuli yenu ni sambukila ya kuli yoze kwali, yoze wapwile, yoze meza kupwa; ni ya kuli Maspiritu shimbiali waze ali kulutwe lia nguja yenyi; 5 ni ya kuli Yesu Kristu, mwe Chela wamwenemwene, mwe Mutangu kuhinduka hakachi ka afu, mwe mukwa kuyula hakachi ka mianangana a hashi. Kuli yoze wakutuzanga, watutuswile ku milonga yetu mumu ha manyinga; 6 watupwishile wanangana, asasendote kuli Zambi yenyi kanda Tato; uhenya ni ndundo yikapwe kuli iye ndo ku miaka ya mutolo. Amene. 7 Nyingikenu, kumeza ni malelwa; mba meso eswe kumakamumona, chipwe waze amutuwile; mavungu nawa eswe a hashi kumakalila mbimbi hali iye. Chochene. Amene. 8 Yami nguli mwe Alfa ni mwe Omenga, chocho anambe Mwene Zambi, yoze kwali, yoze wapwile, yoze meza kupwa, mwe Mukwa-Ndundo-Jeswe. 9 Yami Yoano, ndumbwenu ni mukwa kulianyina-ni-mukwenu ha luyinda ni wanangana ni uhumikizo wa Yesu, napwile mu tungu lize ngwo, Patemu, mumu ha liji lia Zambi ni mumu ha shindakenyo ya Yesu. 10 Napwile mu Spiritu ha tangwa lia Mwene, yingwivwa kunyima liami liji linene, ngwe lia chitavwi, 11 linambe ngwo, Chize unamono, chisoneke mu mukanda, ukautume ku Yikungulwila shimbiali: ku Efwesu, ku Semina, ku Perekamu, ku Tayatera, ku Sarte, ku Filadelfia, ku Laotisea.
25 NOVEMBRO–1 DEZEMBRO
YIKUMA YILEMU YA MU LIJI LIA ZAMBI | USOLWELO 4–6
“Kuzomboka Cha Akwa-Tuvwalu Awana”
(Usolwelo 6:2) Namwene kavwalu mutoma. Yoze watwamineho, kali ni uta wa kazenga. Amuhele chipangula, iye watuhukile nikukumba, hanga akakumbe.
Akwa-Tuvwalu Awana—Yika Analumbunuka?
Iya yoze uli ha kavwalu mutoma? Mukanda wa Usolwelo unatunyingikisa ngwo mutu yoze uli ha kavwalu kali, “Liji lia Zambi.” (Usolwelo 19:11-13) Jina liacho, lili chisanyiko cha Yesu Kristu, mumu iye kakuhanjika mu jina lia Zambi. (Yoano 1:1, 14) Kakumuvuluka nawa ngwo, “Mwanangana wa mianangana eswe, Mwene wa ene eswe” nawa ngwo, “Wamwenemwene, Keshi-mahuza.” (Usolwelo 19: 16) Chochene, iye kali ni chiyulo cha kuyula ngwe Mwanangana wa jita nawa iye keshi kuzachisa chipi ndundo jenyi. Alioze mukuhasa kupwa yimwe yihula.
wp17.3 4 ¶5
Akwa-Tuvwalu Awana—Yika Analumbunuka?
Shimbu lika akwa-tuvwalu aputukile kuzomboka cho? Tunyingikenu ngwetu, mukwa-kavwalu mutangu, Yesu, kaputukile kuzomba chenyi muze amuhele chipangula cha Wanangana. (Usolwelo 6:2) Ha shimbu lika Yesu amupwishile Mwanangana mu malilu? Hi muze ko afunyine mu malilu ha kufwa chenyi. Mbimbiliya yinasolola ngwo, iye kashimbwile yimwe ndambu. (A-Hepreu 10:12, 13) Yesu kalwezele tumbaji twenyi chilayi chakuhwa cha shimbu liacho, ni shimbu lia uputukilo wa kuyula chenyi mu malilu. Iye kambile ngwenyi, muze te maputuka kuyula, yuma hano hashi te muyipiha chinji. Te mukupwa jita, zala ni yikola. (Mateu 24:3, 7; Luka 21:10, 11) Muze Jita ya Hashi Heswe yaputukile ha mwaka wa 1914, yuma hano hashi yasolwele ngwo atu hanjila ha mashimbu a lamba, a kapinda waze anavuluka mu Mbimbiliya ngwo “matangwa a kusula.”—2 Timoteu 3:1-5.
(Usolwelo 6:4-6) Ni kavwalu mukwo watuhukile, iye muchila. Ahanyine kuli yoze watwamineho kuchiza sambukila hashi, hanga akalishihe umwe ni mukwo ni mukwo. Mba amuhele katana munene. 5 Ha kupakula chijikilo chamuchitatu, nevwile mukwa mwono wamuchitatu ngwenyi, Tweya! Namwene kavwalu mulaa. Yoze watwamineho kali ni mbalansa mu kwoko lienyi. 6 Nevwile ngwe liji mukachi ka akwa mwono ngwo, Njongo ya tiliku ha lumbongo umuwika, ni Njongo jitatu ja sevada ha lumbongo umuwika; alioze kanda ukwika maji ni vinyu.
Akwa-Tuvwalu Awana—Yika Analumbunuka?
Mukwa-kavwalu yono kanalumbunuka jita. Twamona ngwo iye kanachiza sambukila hi mu chifuchi chimuwika ko, alioze hashi heswe. Ha mwaka wa 1914, haputukile jita yinene ya hashi heswe. Hi kusulaho, yikupwa nawa jita yikwo yamuchaali ya hashi heswe, yize yashahile atu anji. Kwalula chize akulinga cha atu waze afwile ha jita chize ha mwaka wa 1914 ndo musono kali unji wa 100 wa tununu a tununu! Atu akwo anji nawa kamwene lamba ni kupwa yitonji.
wp17.3 5 ¶4-5
Akwa-Tuvwalu Awana—Yika Analumbunuka?
“Ha kupakula chijikilo chamuchitatu, nevwile mukwa mwono wamuchitatu ngwenyi, Tweya! Namwene kavwalu mulaa. Yoze watwamineho kali ni mbalansa mu kwoko lienyi. Nevwile ngwe liji mukachi ka akwa mwono ngwo, Njongo ya tiliku ha lumbongo umuwika, ni Njongo jitatu ja sevada ha lumbongo umuwika; alioze kanda ukwika maji ni vinyu.”—Usolwelo 6:5, 6.
Mukwa-kavwalu mulaa kanalumbunuka kapunga wa zala. Hano kanatesa kulia ni njongo ya tiliku ha lumbongo umuwika yoze mutu te akumufweta ha kukalakala tangwa lieswe ku mulimo ha mashimbu akunyima! (Mateu 20:2) Lumbongo yomwene te mahasa kulanda nenyi njongo jitatu ja sevada, mumu masangu te keshi kufwika mbongo jinji kuhiana tiliku. Kuchi yuma yino te muyihasa kupinjisa yisemi ha kulisa asoko? Atu kaanalweze hanga ahone kukisa mbongo jinji ha yuma yize akulia ha tangwa ni tangwa, ngwe maji ni vinyu yize anahanjika hano te akulanda chinji ha mashimbu akunyima.
(Usolwelo 6:8) Namwene, kavwalu watomonoka. Yoze watwamineho, jina lienyi, Kufwa; Heteze yakawile hamwe nenyi. Aahele chiyulo ha chihanda chimuwika cha ku yihanda yiwana ya hashi, mukushiha ni katana, ni kapunga, ni kufwa, ni kuli tushitu asasu a hashi.
wp17.3 5 ¶8-10
Akwa-Tuvwalu Awana—Yika Analumbunuka?
Mukwa-kavwalu wa muchiwana kanalumbunuka kufwa ha mukunda wa yikola ni yilungo yikwo. Ha kuhwa cha mwaka 1914, yikola ya gripe Espanhol yashahile kumi lia tununu ja atu. Kota unji wa 500 a tununu ja atu akwachikile yikola yacho, akehe wika asalile ni mwono.
Alioze yikola ya gripe Espanhol te yili wika uputukilo wa yilungo. Kulita ni akwa-mana ngwo tununu twa atu afwile ni yikola yacho ha sekulu 20. Ha matangwa wano, mwono wa atu anji unatepuluka ha mukunda wa yikola ya SIDA, mukaka, ni kachiki, chipwe ngwe kunasoloka yitumbo yinji.
Jita, zala, hanji yikola—yeswe ai yakushiha atu. Heteze hanji mafuka kakutambula afu, chakuhona kwaha kutalatala.
Kuhengwola Yikuma Yilemu ya mu Mbimbiliya
(Usolwelo 4:4) Ha kujingilika ngunja makumi aali ni ngunja jiwana: ha ngunja makumi aali ni makulwana awana kanatwama, kanazala mazalo atoma; ha mitwe yo yipangula ya oru.
(Usolwelo 4:6) Kulutwe lia ngunja ngwe chitende cha vidro chalifwa ni kristale. Mukachi ka ngunja, ni ha kujingilika ngunja, akwa mwono awana a too ni meso kulutwe ni kunyima.
re 76-77 ¶8
Ulemu wa Ngunja ya Yehova mu Malilu
8 Yoano te kananyingika ngwenyi asasendote e apwile ni kukalakala ku tabernakulu. Kota kakomokene ha yize amwene mu usolwelo, kashika asonekene ngwenyi: “Ha kujingilika ngunja makumi aali ni ngunja jiwana: ha ngunja makumi aali ni makulwana awana kanatwama, kanazala mazalo atoma; ha mitwe yo yipangula ya oru.” (Usolwelo 4:4) Kachi te kamwene asasendote, alioze iye yamona makulwana 24 waze hanaatongola ni kwapwisa mianangana. Makulwana jacho aya? Kali akwa-Kristu akuwayisa ni spiritu, waze hanahinduka ali ni chihela mu malilu chize Yehova anakalakenya. Kuchi tunachinyingika?
re 80 ¶19
Ulemu wa Ngunja ya Yehova mu Malilu
19 Akwa mwono jacho yika analumbunuka? Usolwelo ukwo wa profeta Ezekiele, muutukwasa kuwana kumbululo. Ezekiele kamwene Yehova kali mu temba, yize yili ni akwa mwono alifwa ni waze anatongola kuli Yoano. (Ezekiele 1:5-11, 22-28) Kulutwe, Ezekiele yamona nawa temba liacho linapu ngwe nguja kanalikaula kuli akwa mwono. Alioze akwa mwono jacho yavuluka ngwo, akerupimi. (Ezekiele 10:9-15) Akwa mwono awana waze Yoano amwene kota kanalumbunuka akerupimi anji a Zambi—yitangiwa yize yikwete ulemu unji mu ululikiso Wenyi wa ku spiritu. Yoano kakakomokene ha kumona akerupimi kanamana sali lia Yehova, mumu ku mashimbu akunyima mu tabernakulu mwapwile akerupimi aali a oru helu lia mushete wa usendo, te anamanyinako ngunja ya Yehova. Hali akerupimi wano aali a oru , he hapwile ni kukatuka liji lia Yehova hanga ahane shimbi kuli A-Izalele.—Kutuhuka 25:22; Samu 80:1.
(Usolwelo 5:5) Mba umwe wa kuli makulwana yamba kuli yami ngwenyi, Kanda ulila! Nyonga, mwe Ndumba yoze wa ku vungu lia Yunda, chikota cha Ndawichi, hanakumbu kupakula mukanda ni yijikilo yawo shimbiali.
cf 36 ¶5-6
“Nyonga, mwe Ndumba yoze wa ku Vungu lia Yunda”
5 Ndumba kakwete hamu linji. Hiunamono kama Ndumba? Nyi hiunamumona, kota ndumba wacho kapwile mu chipanga cha tushitu. Chipwe ngwe kapwile mu chipanga, nihindu wevwile woma unji. Nyi watala kanawa ku meso ja kashitu yono munene nawa wa hamu, mumona ngwe kashitu wacho kakwete hamu linji nawa keshi kwivwa woma. Mbimbiliya yinahanjika hakutwala kuli “ndumba” ngwo, “mukwa kuhiana tushitu eswe ni tachi; keshi kukondoloka hali niumwe.” (Yishima 30:30) Hamu lia Kristu nelio che liapwa.
6 Tutalenu chize Yesu anakasolola hamu ngwe lia ndumba ha yikuma yitatu: chitangu, ha kukalila umwenemwene, chamuchaali, ha kukalila ululi, chamuchitatu, ha kupalika mu yihungumiona. Nyi twatala kanawa, mutumona ngwetu, chipwe yetu mutuhasa kwimbulula chilweza cha Yesu ha kusolola hamu.
Kutanga Mbimbiliya
(Usolwelo 4:1-11) Kulutwe lia yino yuma namwene, kumanyi, pito lia kwazulula mwilu, ni liji litangu lize nevwile ngwe chitavwi linahanjika ni yami ngwo, Zezuka, wize kuno, mungukulweza yuma yize chatamba kupwa kulutwe lia yino yuma. 2 Hazehene napwile mu Spiritu: kumanyi, ngunja ayisele mwilu, ni ha ngunja umwe unatwamaho. 3 Yoze watwaminoho kalifwa ni liwe lia jasepe ni sartiu: kongolo ha kujingilika ngunja, kalifwa ni esmeralda. 4 Ha kujingilika ngunja makumi aali ni ngunja jiwana: ha ngunja makumi aali ni makulwana awana kanatwama, kanazala mazalo atoma; ha mitwe yo yipangula ya oru. 5 Mu ngunja munatuhuka mihenyo ni maliji ni kukulunguza; ni temo shimbiali ja kahia ja kuyila kulutwe lia nguja, jenajo maspiritu shimbiali a Zambi. 6 Kulutwe lia ngunja ngwe chitende cha vidro chalifwa ni kristale. Mukachi ka ngunja, ni ha kujingilika ngunja, akwa mwono awana a too ni meso kulutwe ni kunyima. 7 Mukwa mwono mutangu kalifwa ni ndumba; mukwa mwono wamuchiali kalifwa ni mwana-ngombe; mukwa mwono wamuchitatu kali ni meso ngwe a mutu; mukwa mwono wamuchiwana kalifwa ni pupa unahumuka. 8 Akwa mwono awana, umwe ni umwe, kali ni mapulwa asambano, a too ni meso ha kujingilika ni muchima. Mwalwa ni ufuku o keshi kuhwima kwamba ngwo, Musandu, musandu, musandu, Mwene Zambi ya Ndundo-Jeswe, yoze wapwile, kwali, meza kupwa. 9 muze akwa mwono machichimieka, ni kulemesa, ni kusakwilila yoze watwama ha ngunja, mwe mukwa mwono ndo ku miaka yeswe ya mutolo, 10 makumi aali ni makulwana awana mafulamana kumeso ja yoze mukwa mwono ndo ku miaka yeswe ya mutolo, mambila yipangula yo kulutwe lia ngunja ngwo, 11 Yenu kunwatela, Mwene wetu kanda Zambi yetu, kutambula uhenya ni ulemu ni tachi, mumu yenu nwatangile yuma yeswe, ni mumu ha upale wenu yapwile, yatangiwile.