LONGESO 2

Kuhanjika Ngwe Unashimutwina

2 A-Korindu 2:17

CHIKUMA CHILEMU: Hanjika ni mbunge ye yeswe ngwe chize wakuhanjika matangwa eswe usolole chize unevu ha yize unahanjika kuli waze anakupanjika.

Lemba ni kulilulieka kanawa. Lemba kuli Zambi akukwase utale wika ha pande je hi hali yena mwene ko. Nyonga chinji ha yikuma yilemu yize watamba kuhanjika. Hanjika yikuma kulita ni chize wakuhanjika matangwa eswe. Kanda wamba liji ni liji ngwe chize analisoneka.

Nyi unalilulieka ukatange Mbimbiliya hanji mukanda ukwo, lijilise maliji waze mukatanga hanga ukaatange kanawa. Nyi mukatanga maliji ja amwe atu, atange kanawa hi kwaatanga ni miselo ko.
Hanjika ni mbunge yeswe. Nyonga ha yikuma yize atu atamba kupanjikila pande je. Shindakenya yikuma yacho, mba uhase kuhanjika ni chiseke ni kumana kanawa, kulahula ni kuzachisa kanawa mujimba.

Kanda unyonga ngwe kuhanjika limi, che kuhanjika kanawa, ka. Ena hanjika kanawa ni vumbi hanga usolole ulemu wa pande je.
Tala waze anakupanjika. Pwako ni kutala waze ali mu mbunga nyi chinalite. Muze unahanjika pande, shishika hali mutu ni mutu uli mu mbunga, hi kupalikisa wika meso ha mbunga ko.