Pwako ni Shindakenyo Ngwe Makakulamwina Muze Songo lia Chifuchi Chino Linakundama

Kwasala hakehe uhomboloji wa Yehova muheta kusongo muze manongesa chifuchi chino chipi. Chikwo nawa, uwayilo wa mahuza makaunongesa, akwa-mavungu makalukukila atu ja Zambi, Yehova makanongesa atu api ha Armagedone. Akwa-Kristu eswe kanashimbwila kumanunuka cha yuma yino yilemu.

Chipwe chocho, kutwanyingikine yuma yeswe hakutwala ku luyinda munene. Chakutalilaho, kutwanyingikine tangwa lize luyinda munene makaputuka, kutwanyingikine yize muyikatwala akwa-mafwefwe kunongesa uwayilo wa mahuza, kutwanyingikine mashimbu waze makalinga akwa-mavungu muze makalukukila atu ja Zambi. Chikwo nawa, kutwanyingikine majila waze Yehova makazachisa akanongese atu api ha Armagedone.

Alioze, Mbimbiliya yakutwaha ulumbunwiso uze wakutukwasa kupwa ni hamu ni ufulielo ha yuma yize muyikalingiwa kulutwe lia matangwa. Chakutalilaho, tunanyingika ngwetu, tuli kusongo lia “matangwa a kusula.” (2Ti 3:1) Tunanyingika ngwetu, kulimika cha uwayilo ‘kumakachitepulula’ hanga uwayilo wamwenemwene akachine kuunongesa. (Mat 24:22) Tunanyingika nawa ngwetu, Yehova makafunga atu jenyi. (2Pe 2:9) Chikwo nawa, tuli ni shindakenyo ngwetu, yoze Yehova asakwile hanga anongese atu api ni kufunga mbunga yinene ha Armagedone, kali wa ululi nawa mukwa-ndundo.—Uso 19:11, 15, 16.

Yuma yize muyikalingiwa kulutwe muyikatwala atu ‘kulezumioka ni woma.’ Alioze, kutanga ni kupukuna ha majila waze Yehova azachishile hanga afunge atu jenyi kunyima ni chize akutulumbunwina yize muyikalingiwa kulutwe, mutuhasa ‘kuhetula [mitwe yetu], tutale kwilu’ ni shindakenyo ngwetu, ulamwino wetu unakundama.—Lu 21:26, 28.