CHIZE MUHASA KUPUTUKA LUSANGO
LONGESO 4
Pwako Mukwa-Kulikehesa
Shimbi: “Ni kulikehesa cheswe, monenu akwenu ngwenu kanuhiana.”—Fwili. 2:3.
Yika Paulu Alingile?
1. Tala CHINEMA, hanji kutanga Yilinga 26:2, 3. Mba nushimutwine yihula yino:
Kuchi Paulu asolwele ngwenyi kakulikehesa mu jila yize ahanjikile ni Mwanangana Akripa?
Kuchi Paulu ahalishile Yehova ni kushindakenya ha Yisoneko chakuhona kulihalisa mwene?—Tala Yilinga 26:22.
Yika Mutuhasa Kulilongesa Hali Paulu?
2. Sango jize twakwambujola, jakukwata ku mbunge ja atu nyi twajihanjika ni kulikehesa hamwe ni vumbi.
Imbulula Paulu
3. Hanjika ni vumbi. Ehuka kuhanjika mu jila yize muyisolola ngwe yena unanyingika yuma yeswe, ni kusolola ngwe mutu mukwo kanyingikine chuma nichimwe. Solola vumbi muze muhanjika ni mutu wacho.
4. Solola pundu ngwe yuma yize unalongesa yinakatuka mu Mbimbiliya. Mu Liji lia Zambi muli manyonga waze mahasa kukwata ku mbunge ja atu. Muze twakulizachisa, chakupwa ngwe tunatungu ufulielo wo ha fundamentu yalita.
5. Nunga ni kulihumikiza. Ehuka kufupa kusolola ngwe yuma yize unambe ye yinalite. Kutwazangile kulihangujola ni atu. Solola ngwe wakulikehesa ha kulihumikiza ni kunyingika mashimbu waze watamba kukatuka ku chihela chacho. (Yishi. 17:14; Titu 3:2) Nyi muhanjika ni umbovu, chino muchihasa kwazulula jila hanga mutu akapanjike sango jetu muze mutukahanjika nenyi ha chisuho chikwo.