Malongeso a Mukanda Wakuzachisa ha Kukunguluka cha Mwono ni Mulimo Wetu
4-10 MARÇO
YIKUMA YILEMU YA MU LIJI LIA ZAMBI | MASAMU 16-17
‘Yehova Kakutwaha Yuma Yipema’
(Samu 16:2, 3) Hinamba kuli Yehova ngwami, Yena uli Mwene wami, chishi nichimwe chipema shina muli yena. 3 Kuli asandu a hano hashi, muli ayo hiwamba ngwe, Ngunawahilila kanawa.
Akweze, Munuhasa Kuwahilila ku Mwono
SAKULA MASEPA AMWENEMWENE
11 Tanga Samu 16:3. Ndawichi kanyingikine chize te masakula masepa apema. Iye kasakwile masepa waze te akuzanga Yehova, chino chamuhele ‘uwahililo unji.’ Iye kavulukile masepa jenyi ngwe “asandu,” mumu ayo te kakusa tachi hanga akaule shimbi jingunu ja Yehova. Mukwa-kwimba masamu mukwo, neye che evwile hakutwala ku kusakula masepa, chocho yasoneka ngwenyi: “Nguli sepa lia waze eswe akukuvwila woma, ni lia waze akufunga ndongo je.” (Samu 119:63) Ngwe chize twashimutwina ha mutwe uze wapalika, muhasa kuwana masepa anji apema mukachi ka waze akuzanga Yehova ni kumwononokena. Chipwe chocho, masepa je katambile wika kupwa a miaka yimuwika ni yena.
(Samu 16:5, 6) Yehova iye chihanda chami cha chihinga ni cha musenge wami. Yena kuwakufunga chihanda chami. 6 Manjiza hanaholokela kuli yami ha mihela yipema, ewa, chihinga chipema nguli nacho.
w14 15/2 29 ¶4
“Ngukamone Upeme wa Yehova”
Ndawichi kambile ngwenyi “Yehova iye chihanda chami cha chihinga ni cha musenge wami. Yena kuwakufunga chihanda chami.” (Samu 16:5, 6) Ndawichi te kakusakwilile ha “chihanda,” chekwamba usepa wenyi ni Yehova n chiwape cha kumuwayila. Chizechene ngwe Ndawichi, ni yetu mutuhasa kupalika mu yipikalo, alioze tuli ni yiwape yinji ya ku ufulielo! Kashika, tunungenu ni kuwahilila ha kupwa mu uwayilo wamwenemwene ni kununga ni ‘kulemesa chinji’ tembele ya Yehova ya ku spiritu.
(Samu 16:8, 9) Hingunasela Yehova kumeso jami matangwa eswe. Chichi kakokoloka mumu iye kanamana ku chindume chami. 9 Kashika mbuge yami kuyinevu chiseke, ni ulemu wami kuunawahilila. Musunya wami nawa muutwama ni ufulielo nguu.
w08 15/2 3 ¶2-3
Nunga ni Kupwa Sali lia Yehova
2 Yetweswe mutuhasa kulilongesa yuma yinji ni atu waze akutongola chinji mu Mbimbiliya ngwe: Apalahama, Sara, Mose, Rute, Ndawichi, Estere, postolo Paulu ni atu akwo nawa. Alioze, sango ja atu waze keshi kutongola chinji mu Mbimbiliya nejo mujihasa kutukwasa. Kupukuna ha sango ja mu Mbimbiliya mujitukwasa kulinga yuma ngwe chize mukwa-kwimba masamu ambile ngwenyi: “Hingunasela Yehova kumeso jami matangwa eswe. Chichi kakokoloka mumu iye kanamana ku chindume chami.” (Samu 16:8) Kuchi mutuhasa kunyingika kanawa maliji wano?
3 Swalale kapwile ni kukwata mukwale ku kwoko lia utata, kwoko likwo kapwile ni kukwata lukepwe. Kashika, iye te mahasa kulifunga kanawa nyi ha kwasa jita umwe sepa lienyi mapwa sali lienyi lia utata. Nyi twanunga kusa Yehova kulutwe ni kulinga upale wenyi, iye matufunga. Kashika, tutalenu chize kuhengwola sango ja mu Mbimbiliya mujitukwasa kukolesa ufulielo wetu mba ‘tununge kupwa ni Yehova matangwa eswe.’—Byington.
Kuhengwola Yikuma Yilemu ya mu Mbimbiliya
(Samu 17:8) Ngufunge kama ngwe katumba ka liso. Ngusweke kushi lia chizulie cha mapulia je,
it-2 803
Katumba ka Liso
Liji ʼi·shohnʹ lize linakatuka mu limi lia Hepreu (Shi 32:10; Yis 7:2), muze akulizachisa ni liji ʽaʹyin (liso) liakulumbunuka “homenzinho do olho.” Chizechene nawa, ha mukanda wa Lungungu wa Jeremia 2:18, kakuzachizaho liji bath (mwana-pwo) lize linalumbunuka “katumba ka liso.” Maliji wano aali kakwachinga hanga ashindakenye ha maliji ali ha Samu 17:8 (ʼi·shohnʹ bath-ʽaʹyin), waze akulumbunuka katumba ka liso. Chino muchihasa kulumbunuka chizulie chikehe chize chakusoloka mu liso lia umwe mutu.
Chakupwa chashi mutu kwivwa yikola mu liso muze mwakunjila fufuta ni yuma yikwo. Chihanda cha liso chize chakukwasa hanga mu liso muhone kunjila fufuta ni yuma yikwo chize akuvuluka ngwo córnea, twatamba kuchifunga kanawa mumu nyi ngwe twalilemeka ha chihanda chacho, kutushi kuhasa kumona kanawa hanji mutuhasa kupwa tupuputa. Mbimbiliya yakuzachisa liji “katumba ka liso” hanga yisolole chuma chize twatamba kufunga kanawa. Che twatamba kulinga ni shimbi ja Zambi. (Yis 7:2) Ha kutongola ufunge wa Zambi kuli A-Izalele ngwe tato, mukanda wa Shimbi Yamuchiali 32:10 unambe ngwo: “Yamufunga ngwe katumba ka liso lienyi.” Ndawichi yalemba hanga Yehova amufunge ngwe “katumba ka liso.” (Sam 17:8) Iye kazangile hanga Yehova amukwase muze akwa-kole jenyi alimikine nenyi. (Tesa ni Zek 2:8; haze anatongola liji lia Hepreu ba·vathʹ ʽaʹyin, kanazachisa liji “katumba ka liso.”)—Tala LISO.
(Samu 17:1-15) Yehova! Ivwa kama chize chinalulama; panjika kama ku muteto wami. Ivwa kama kulemba chami kuchatuhukile ku mivumbo ya kalimbalimba. 2 Upatwilo wami ukatuke kama kumeso je; meso je akamone yuma yize yinalite. 3 Hiuneseka mbunge yami. Hiunahete kuli yami ha ufuku. Hiunangweseka hindu kwawanyine nichimwe. Hinalisela ngwami, Kanwa liami kulichi kuvulumuna. 4 Ha kutwala ku yitanga ya atu, ni liji lia ku mivumbo ye hinalifunga ku majila ja chonwonyi. 5 Shimbo jami jinalalaminya ku majila je, yiliato yami kuyasenunukine. 6 Hinatambika kuli yena mumu yena Zambi mukangukumbulula. Ngwivwe kama, upanjike ku kuhanjika chami. 7 Solola kama chikomokeso cha utu wa zango lie; yena mukwa kulamwina ni chindume che waze aswama muli yena kuli akwa kuakautukila. 8 Ngufunge kama ngwe katumba ka liso. Ngusweke kushi lia chizulie cha mapulwa je, 9 Kuli yingulungulu aze akungupinjisa, kuli akwa kole jami waze akunguseleka. 10 Hanajiki mu maji jo. Kakuhanjika nikulengumuka. 11 Hanatuseleka mu ngano jetu. Hanase meso jo mukutunungwina hashi. 12 Kanapu ngwe ndumba yoze unevu solo lia kulia chinji; ngwe mwevu wa ndumba yoze unatwama muze munajiki. 13 Yehova! Katuka kama! Umulimune, umunungwine hashi. Pulula kama mbunge yami kuli chingulungulu ni katana ke. 14 Ngulamwine kuli atu, yena Yehova, ni kwoko lie kuli atu a hano hashi, waze ali ni chihanda cho mu mwono uno. Wakukuchisa majimo jo ni yuma ye yipema ya kusweka. Hanayuku ni ana, kakuhichika upite wo kuli ana jo. 15 Alioze ha kutwala kuli yami, mungumona meso je ni ululi. Kumungukayuka muze mungulaula mu kulifwa cha yena.
11-17 MARÇO
YIKUMA YILEMU YA MU LIJI LIA ZAMBI | SAMU 18
“Yehova Iye . . . Mukwa Kungupulula”
(Samu 18:1, 2) Nakuzanga Yehova yena tachi jami. 2 Yehova iye liwe liami, ni mbonge yami, ni mukwa kungupulula; Zambi yami ni liwe liami lia tachi, muli iye munguswama. Iye lukepwe wami, ni tachi ja ulamwino wami, ni kaposhi kami musuku.
w09 1/5 14 ¶4-5
Tachi Jetu Jinejila ku Uwahililo wa Yehova
Mbimbiliya neyo yakutesa Yehova ni yuma yize kuyishi mwono. Iye kakumulumbununa ngwe “Liwe lia Izalele,” tachi, ni “kaposhi musuku”. (2 Samuele 23:3; Samu 18:2; Shimbi Yamuchiali 32:4) Kulifwa chika chiliko? Chizechene ngwe umwe mulundu unene uze unamane nguu chakuhona kulisunga, Yehova neye mahasa kupwa chishina cha uhwimino kuli yena.
5 Mukanda wa Samu unazala too ni yikuma yimwe yize yinasolola maliji alisa hakutwala ku chize wapwa utu wa Yehova. Chakutalilaho, mukanda wa Samu 84:11 wakwamba ngwo: “Zambi iye tangwa; iye lukepwe” mumu iye kapwa chishina cha pangu ni mwono ni chivukuminya ni ufunge. Chikwo nawa, mukanda wa Samu 121:5 unambe ngwo: “Yehova iye chihuhumuke ha chindume che.” Chizechene ngwe chihuhumuke muchihasa kutufunga ku mwalwa unasasaminya, Yehova mahasa kufunga waze akumuwayila ku chivukuminya cha lamba ni kwaha ufunge mu chizulie cha kwoko lienyi ni mapulwa jenyi.—Izaia 51:16; Masamu 17:8; 36:7.
(Samu 18:6) Mu luyinda wami natambikile Yehova, natetele kuli Zambi yami. Mu tembele yenyi wevwile liji liami; muteto wami wahetele kuli iye, mwe mu matwi jenyi.
it-3 805 § 3
Liji
Zambi kakwivwa liji lia tuvumbi twenyi. Waze akuwayila Zambi ni spiritu ni umwenemwene, mahasa kusanyika Zambi ni shindakenyo ngwo iye mapanjika liji lio mu limi lieswalio mamusanyika. Chikwo nawa, chipwe ngwe kahanjikile ni liji mwilu, Zambi yoze unanyingika mbunge ja atu, mapanjika yize mutu anambe. Zambi kakwivwa atu waze anamono lamba muze akumwita ukwaso. (Sam 66:19; 86:6 116:1; 1Sa 1:13; Neh 2:4) Kakwivwa nawa liji ni manyonga a atu waze akulimika nenyi ni waze akutesa kulinga kuli tuvumbi twenyi yuma yipi.—Upu 21:17; Sam 55:18, 19; 69:33; 94:9-11; Jer 23:25.
(Samu 18:16, 17) Watumishine kwilu, wangwanjile, wanguzambwile mu meya anji. 17 Wangupulwile kuli mukwa kole yami wa tachi. Wangupulwile kuli waze anguvwilile kole mumu angukumbile naye ni ngolo.
Chize Muhasa Kukumba Kusakalala
2. Kupukuna. Muze munyonga ha yuma yize yalingiwile ku mwono we kunyima, pukuna ha chize wahashile kunyongonona mu yipikalo yacho ni ukwaso wa Yehova. Muze twakupukuna ha chize Yehova atukwashile ni chize akwashile tuvumbi twenyi kunyima, twakulihumikiza ni kujikijila chinji muli iye. (Samu 18:17-19) Joshua, umwe mukulwana wa mu chikungulwila yamba ngwenyi: “Nguli ni kalifwo haze nakusoneka makumbululo a yilemba yami. Chino chapwile ni kungukwasa ngwiwuluke yisuho yize Yehova anguhele yize te ngunafupiwa muze napwile ni kuyita mu yilemba.” Kwamba pundu, nyi mutupukuna ha yize Yehova hanatulingila, mutupwa ni tachi jize tunafupiwa hanga tukumbe manyonga jetu a kusakalala.
Kuhengwola Yikuma Yilemu ya mu Mbimbiliya
(Samu 18:10) Watambukile ha kerupime, wahumukine. Ewa wahumukine chikolo ha mapulwa ja fuji.
it-3 362 ¶1
Kerupime
Akerupime wano, kakapwile ngwe tuponya waze akwa-uwayilo wa mahuza apwile ni kuzachisa ngwe chize atu amwe akwamba. Kulita ni yize A-Yunda ambile (Mbimbiliya kuyishi kuhanjika ha chikuma chino), akerupime wano kapwile ni kusoloka ngwe atu. Ayo kapwile apema chinji, chikwo nawa, kaalingile kulita ni “yeswe” yize Yehova alwezele Mose. (Kut 25:9) Postolo Paulu kahanjikile hakutwala kuli akerupime ngwenyi: “Akerupime ja uhenya kanazulamina chifuko cha ukukilo.” (Hep 9:5) Mbimbiliya yakusolola ngwo akerupime jacho kapwile ni kumanyinako Yehova ha kwamba ngwo: “Kokwene mungukatakana ni yena. Mungukalishimwinya ni yena ni liji lia kukatuka helu lia chitwamo cha keke, mukachi ka akerupime aali atwama ha mushete wa shindakenyo.” (Kut 25:22; Kwa 7:89) Kashika, Mbimbiliya yakwamba ngwo Yehova katwama “hakachi ka akerupime.” (1Sa 4:4; 2Sa 6:2; 2Mi 19:15; 1Sg 13:6; Sam 80:1; 99:1; Iza 37:16) Hachino, mutuhasa kwamba ngwetu, akerupime kanalumbunuka mashinyi ja Yehova waze iye te anendesa. (1Sg 28:18) Chikwo nawa, mapulwa a akerupime kapwile ni kufunga ni kwendesa wenyi kawashi. Kashika, ha mwaso wenyi, Ndawichi kahanjikile hakutwala ku chize Yehova ejile kawashi-washi ni kumukwasa ha kwamba ngwenyi: “Watambukile ha kerupime, wahumukine. Ewa wahumukine chikolo ha mapulwa ja fuji.”—2Sa 22:11; Sam 18:10.
(Samu 18:20-39) Yehova wangwononwene nikulita ni ululi wami; wangufwetele nikulita ni kupema cha moko jami. 21 Mumu hingunafungu majila ja Yehova, chehukile Zambi yami ni ungulungulu. 22 Mumu upatwilo wenyi weswe wapwile kumeso jami, chambilile yiyulo yenyi. 23 Napwile mungunu nawa kumeso jenyi, nalifungile ku uhenge wami. 24 Kashika Yehova hanangufwete nikulita ni ululi wami, nikulita ni kupema cha moko jami kumeso jenyi. 25 Kuli akwa keke yena kumulisolola uli mukwa keke. Kuli angunu kumulisolola uli mungunu. 26 Kuli akwa kulinanga kumulisolola uli mukwa kulinanga. Kuli akwa kupiya kumulisolola uli mukwa kulitachika. 27 Mumu kumulamwina akwa luyinda, alioze meso a kulizelula kumukaahombwesa. 28 Kumuwika ndeya yami; Yehova Zambi yami kumapangulula milima yami. 29 Ku tachi je nakupalika ndusu mu mbunga ya tujita. Ku tachi ja Zambi yami nakutumbuka chipanga. 30 Ha kutwala kuli Zambi, jila yenyi yingunu. Liji lia Yehova lia kweseka kulu. Iye lukepwe wa waze aswama muli iye. 31 Mumu Zambi iya? Shina Yehova wika. Lie liwe iya? Shina Zambi yetu. 32 Zambi yoze wakungujichika muya wa tachi, kakululamisa jila yami. 33 Kakupwisa molu jami ngwe molu ja kai. Kakungumanyisa ha milundu yami. 34 Kakulongesa moko jami kwasa jita, chocho moko jami kakunana uta wa unengu. 35 Hiwangwaha lukepwe wa ulamwino we, kwoko lie lia chindume hiliangujikijisa, umbovu we hiwangunangamisa. 36 Hiwatohesa shimbo jami kushi lia yami, yiliato yami kuyasenunukine. 37 Nakawile akwa kole jami, naawanyine, chahilukile kunyima ndo hinaakuwisa. 38 Naatuwile ndusu, kahashile kuhinduka. Alimbukile kushi lia yiliato yami. 39 Mumu hiwangujichika muya wa tachi ja kwasa jita. Hiwanguhombwesela waze angukatukilile.
18-24 MARÇO
YIKUMA YILEMU YA MU LIJI LIA ZAMBI | MASAMU 19-21
‘Malilu Kakwambujola Uhenya wa Zambi’
(Samu 19:1) Malilu kakwambujola ulemu wa Zambi. Che kuzazuluka cha mwilu chakulweza utotombo wenyi.
w04 1/1 8 ¶1-2
Yitangiwa Yakwambujola Uhenya wa Zambi
NDAWICHI mwana wa Yese, kapwile kafunga mu Mbeteleme. Ha yisuho yinji, kota kapwile ni kutala unene wa malilu hamwe ni tutongonoshi ha ufuku muze te akufunga mapanga! Kwamba pundu, iye kota kewulukile yuma yacho muze asonekene ni ukwaso wa spiritu yisandu ya Zambi maliji apema a mwaso uze uli ha Samu 19, anambe ngwo: “Malilu kakwambujola ulemu wa Zambi. Che kuzazuluka cha mwilu chakulweza utotombo wenyi. Njiza yo yinatuhuka hashi heswe. Maliji jo hanahete ku masongo a hashi.”—Samu 19:1, 4.
2 Chakuhona kuyambashana, malilu waze Yehova atangile kakwambujola uhenya wenyi matangwa eswe. Yitangiwa yakununga ni kwambujola uhenya wa Zambi. Chikwo nawa, twakulemesa Zambi muze twakupukuna ha chize yitangiwa yakwambujola uhenya wenyi “hashi heswe.” Alioze, hi wika ko yitangiwa yize yatamba kwambujola uhenya wa Zambi. Mbimbiliya yakukolweza atu ashishika hanga no ambujole uhenya wa Zambi ni liji mwilu. Umwe mukwa-kusoneka masamu kakolwezele tuvumbi ashishika a Zambi ha kwamba ngwenyi: “Hanenu kuli Yehova enu minyachi ya atu, hanenu kuli Yehova ulemu ni tachi. Hanenu kuli Yehova ulemu wa jina lienyi. Nehenu mulambu nukanjile mu yiize yenyi.”(Samu 96:7, 8) Atu waze akwete usepa upema ni Yehova kakuwahilila chinji ha kwambujola uhenya wa Zambi. Alioze kuhana uhenya kuli Zambi yika chinalumbunuka?
(Samu 19:4-6) Njiza yo yinatuhuka hashi heswe. Maliji jo hanahete ku masongo a hashi. Mwenamo hasela zuwo lia tangwa. 5 Iye kapwa ngwe sandungi ha kutuhuka mu zuwo lienyi. Kanawahilila ngwe chitakame yoze mazomboka mu jila yenyi. 6 Kuvumbuka chenyi chakuputukila ku songo lia lilu. Kujinga chenyi chakuheta ku masongo jalio. Nichimwe chuma chakuswama ku chivukuminya chenyi.
w04 1/6 11 ¶8-10
Yitangiwa Yakwambujola Uhenya wa Zambi!
8 Ndawichi kanalumbununa nawa chitangiwa chikwo cha Yehova chize chakukomwesa ha kwamba ngwenyi: “Njiza yo yinatuhuka hashi heswe. Maliji jo hanahete ku masongo a hashi. Mwenamo hasela zuwo lia tangwa. Iye kapwa ngwe sandungi ha kutuhuka mu zuwo lienyi. Kanawahilila ngwe chitakame yoze mazomboka mu jila yenyi. Kuvumbuka chenyi chakuputukila ku songo lia lilu. Kujinga chenyi chakuheta ku masongo jalio. Nichimwe chuma chakuswama ku chivukuminya chenyi” chakuhi.—Samu 19:4-6.
9 Kutesa ni tutongonoshi akwo, mwalwa hi unene ko chinji, chikwo nawa, hi ukehe ko chinji. Chipwe chocho, mwalwa uli katongonoshi yoze wakusoloka chinji, mumu kali munene kuhiana maplaneta waze akumujingilika. “Umwe mukanda wakwamba ngwo: Ulemu wa mwalwa uli wa 2 octilhões ya Toneladas”—yize yinalumbunuka 99,9 por cento wa ulemu wa sistema yetu solar! Tachi ja gravidade jakutwala hashi kulijinga ku sistema solar ha unji wa 150 milhões ya quilômetros, chakuhona kusekuluka hanji kuwema. Tachi jize jakuheta mu planeta jili jikehe wika, alioze tachi jacho jakukwasa yitangiwa kupwa ni mwono hano hashi.
10 Mukwa-kwimba masamu kahanjikile ngwe chilweza hakutwala ku mwalwa ha kumutongola ngwe umwe “mukwa-ndundo” yoze wakuzomboka kukatuka ku chivumbuko ndo ku chitokelo ha tangwa ni kuhwima ufuku mu limwe zuwo. Muze katongonoshi yono wa ndundo hanji ngwetu mwalwa, wakuya ku chitokelo, hashi kakusoloka ngwe kananjila mu limwe “zuwo” hanga ahwime. Chimene, mwalwa wakupeyima ni kusoloka ngwe “sandungi ha kutuhuka mu zuwo lienyi.” Ngwe kafunga mapanga, Ndawichi kanyingikine ngwenyi ha ufuku kwakupwa chishika chinji. (Uputukilo 31:40) Kapwile ni kwiwuluka nawa chize pangu lia mwalwa te liakusasaminya ha mujimba wenyi. Tunanyingika ngwetu mwalwa, ushi kuhonga muze wakukatuka ku chivumbuko ndo ku chitokelo. Chizechene ngwe umwe mutu “mukwa-ndundo” akulinga wenyi, mwalwa newo wakulinga wenyi matangwa eswe.
(Mateu 6:28) Chikwo nawa, mumu liaka nwakulipikala ha mazalo? Lilongesenu ha chize yitemo ya muyambu yakukola, kuyishi kukalakala chipwe kulilingila mazalo.
g95 11/8 7 ¶3
Tangi Yoze Atu Akulelesa Chinji
Kulihulikila ha yitangiwa, chakutukwasa kunyingika kanawa Tangi yetu yoze watangile yitangiwa yeswe yinatujingilika. Yesu kambile kuli tumbaji twenyi hanga atale kanawa yitemo yize yapwile ni kusoka hakamwihi ni Ngalileya. Iye kambile ngwenyi “Lilongesenu ha chize yitemo ya muyambu yakukola, kuyishi kukalakala chipwe kulilingila mazalo alioze ngunanulweze pundu ngwami, chipwe mwe Solomone mu uhenya wenyi weswe, kakazalile ngwe chimwe cha ku yitemo yino.” (Mateu 6:28, 29) Kupema cha yitemo muchihasa kulumbunuka ngwo Zambi kakulihulumba chinji ha yize atu akufupa.
Kuhengwola Yikuma Yilemu ya mu Mbimbiliya
(Samu 19:7-9) Shimbi ya Yehova yingunu; yakuhuzulula mbunge. Shindakenyo ya Yehova kuyakola, yakukanyamisa yizuzuke. 8 Longeso lia Yehova liamenemwene, liakuwahisa mbunge. Shimbi ya Yehova yakulinanga, yakupangulwisa meso. 9 Woma wa Yehova upema, kuwakulinduluka ku miaka ya mutolo. Upatwilo wa Yehova wamwenemwene, weswe wa ululi.
it-2 301
Hepreu
Maliji wano kanalifu mumu chihanda chamuchiali chishi kufunyina wika nyonga lia chihanda chitangu hanji kusolola kalisa. Alioze, chakuwezela nyonga likwo. Mukanda wa Samu 19:7-9 unatwehe chilweza ha chikuma chino:
Shimbi ya Yehova yingunu,
yakuhuzulula mbunge.
Shindakenyo ya Yehova kuyakola,
yakukanyamisa yizuzuke.
Longeso lia Yehova liamwenemwene,
liakuwahisa mbunge.
Shimbi ya Yehova yakulinanga,
yakupangulwisa meso.
Woma wa Yehova upema,
kuwakulinduluka ku miaka ya mutolo.
Upatwilo wa Yehova wamwenemwene,
weswe wa ululi.
Kwamba pundu, hita maliji a chihanda chamuchiali kanakumbanyisa nyonga. Kashika, versu yeswe yamuwundu yinanunga yihanda yeswe yaali. Ngwe chilweza, maliji ali ha yihanda yamuchiali ya sona ngwe: “Yakuhuzulula mbunge” ni “yakukanyamisa yizuzuke,” yakukwasa mukwa-kutanga kulilongesa chize Shimbi ya Yehova yapwa yingunu” ni chize “shindakenyo ya Yehova kuyakola.” Ha yihanda yaali ya maliji wano alifwa, kulihandununa cha chihanda chitangu ni chamuchiali, chakukwasa mutu kuhwima ndambu muze anatange. Hachino, mutu kakuhasa kupachikila ni kununga ni manyonga jacho waze ali ha yihanda yacho. Kashika, mutapu wa chize maliji jacho akwasoneka, kakwavuluka ngwo, maliji alifwa hanji waze akukolesa.
(Samu 19:1-14) Malilu kakwambujola ulemu wa Zambi. Che kuzazuluka cha mwilu chakulweza utotombo wenyi. 2 Tangwa ha tangwa kuliakuhanjika; ufuku ha ufuku kuwakulweza mana. 3 Kuhanjika chakuhi, chipwe limi. Liji lio keshi kulivwa. 4 Njiza yo yinatuhuka hashi heswe. Maliji jo hanahete ku masongo a hashi. Mwenamo hasela zuwo lia tangwa. 5 Iye kapwa ngwe sandungi ha kutuhuka mu zuwo lienyi. Kanawahilila ngwe chitakame yoze mazomboka mu jila yenyi. 6 Kuvumbuka chenyi chakuputukila ku songo lia lilu. Kujinga chenyi chakuheta ku masongo jalio. Nichimwe chuma chakuswama ku chivukuminya chenyi. 7 Shimbi ya Yehova yingunu; yakuhuzulula mbunge. Shindakenyo ya Yehova kuyakola, yakukanyamisa yizuzuke. 8 Longeso lia Yehova liamwenemwene, liakuwahisa mbunge. Shimbi ya Yehova yakulinanga, yakupangulwisa meso. 9 Woma wa Yehova upema, kuwakulinduluka ku miaka ya mutolo. Upatwilo wa Yehova wamwenemwene, weswe wa ululi. 10 Shinaho kuyizanga kuhiana oru, ewa, chipwe oru yinji yipema. Yahiana kuyema, chipwe wuchi uze muusotwoka ku chishila munyima. 11 Kavumbi ke kakumutoweza nayo. Ha kuyilinga kuchili kwononona chinene. 12 Iya manyingika kupianguka chenyi? Ngupemese kama ku tupalia twa kusweka. 13 Chinda kamaa kavumbi ke ku milonga ya kulengumuka; kanda yinguzeyesa. Chocho mungupwa mungunu, chichi kuvulumuna mulonga unene. 14 Maliji a mu kanwa liami, ni kupukuna cha mbunge yami chikapemene kumeso je, yena Yehova liwe liami, kanda Mukwa-Kungukuula.
25-31 MARÇO
YIKUMA YILEMU YA MU LIJI LIA ZAMBI | SAMU 22
Mbimbiliya Yaprofetezele mu Yimako-Yimako Kufwa cha Yesu
(Samu 22:1) Zambi yami, Zambi yami, kuchi te wangwehukanga? Kuchi te uli kusuku ni yami, kwangukwashile, uli kusuku ni maliji a mikuma yami?
w11 15/8 15 ¶16
Ayo Kawanyine Mesaya!
16 Te muchisoloka ngwe Mesaya mamwehuka kuli Zambi. (Tanga Samu 22:1.) Kulita ni uprofeto, “ha ola yamuchilivwa [kota ha maola 15], Yesu yakololoka chikolo ni liji mwilu ngwenyi: “Eli, Eli, lama sambatani?” chinalumbunuka ngwo: “Zambi yami, Zambi yami, mumu liaka wangwehuka?” (Marku 15:34) Yesu kakechele kufuliela kuli Tato wa mu malilu. Zambi kechele Yesu ku moko ja akwa-kole jenyi ha kwecha kumufunga hanga te ahase kweseka ushishiko wenyi. Hachino, muteto wenyi wamanunwine uprofeto uze uli ha mukanda wa Samu 22:1.
(Samu 22:7, 8) Waze eswe akungumona kakunguseha nikungusaula. Kakutuhwisa mivumbo, kakuhunga mitwe ngwo, 8 Wafulielele Yehova ngwenyi, Mangupulula. Amupulule se wawahililile muli iye.
w11 15/8 15 ¶13
Ayo Kawanyine Mesaya!
13 Ndawichi kaprofetezele ngwenyi, Mesaya te mamwamba yuma yipi. (Tanga Samu 22:7, 8.) Yesu kamwambile yuma yipi muze te anevu yikola ha mutondo wa lamba, mukanda wa Mateu wakwamba ngwo: “Atu waze apwile ni kupalika, yaputuka kuhunga mitwe ni kumwamba yuma yipi ha kwamba ngwo: “Yena wazangile kupuzula tembele ni kuyitungulula ha matangwa atatu, lilamwine yena mwene. Nyi uli lume mwana wa Zambi, sunuka ha mutondo!” Chizechene nawa, asasendote, alongeshi a shimbi ni makulwana akwo kapwile ni kumukekuna ha kwamba ngwo: “Walamwinyine akwo, alioze mwene kahashile kulilamwina! Iye mwe Mwanangana wa Izalele; asunuke haliapwila ha mutondo wa lamba, mba mutumufuliela. Kakujikijila muli Zambi, amulamwine haliapwila, nyi kakumuzanga, mumu kambile ngwenyi: ‘Nguli Mwana wa Zambi.’” (Mateu 27:39-43) Chipwe ngwe Yesu kamwambile yuma yinji, nihindu kanungine ni kushishika. Chino chili chilweza chipema chinji!
(Samu 22:18) Kanalianyina mazalo jami hakachi ko; ha chikuto chami kanate chela.
w11 15/8 15 ¶14
Ayo Kawanyine Mesaya!
14 Atu te mata uchela hanga alianyine mazalo a Mesaya. Mukwa-kwimba masamu, kambile ngwenyi: “Kanalianyina mazalo jami hakachi ko; ha chikuto chami kanate chela.” (Samu 22:18) Chino chalingiwile lume, mumu muze ‘[maswalale ja A-Roma] ahachile [Yesu] ha mutondo wa lamba, ayo yalianyina mazalo jenyi ha kuta uchela.’—Mateu 27:35; tanga Yoano 19:23, 24.
Kuhengwola Yikuma Yilemu ya mu Mbimbiliya
(Samu 22:22) Mungwambujola jina lie kuli mandumbu jami. Hakachi ka chikungulwila mungukuhalisa.
w06 1/11 29 ¶7
Sololenu Vumbi ha Kukunguluka
7 Kuli majila anji akusolwelamo vumbi muze tuli ha kukunguluka. Jila yimwe yili muze twakwimba miaso ya Wanangana. Unji wa ku miaso yacho, yakuhanjika ha yilemba, kashika twatamba kwimba miaso yacho ni vumbi. Postolo Paulu, katongwele maliji ali ha mukanda wa Samu 22 hakutwala kuli Yesu, muze asonekene ngwenyi: “Mungwambujola jina lie kuli mandumbu jami ni kukuhalisa ni miaso mukachi ka chikungulwila.” (A-Hepreu 2:12) Kashika, twatamba kupwa ha yihela yetu, shimbu kanda ndumbu yoze unasongwela achivuluka mwaso uze mutwimba ni kulihulikila ha ulumbunwiso wa mwaso wacho muze tunembi. Hachino, muze tunembi, manyonga jetu katamba kupwa ngwe a mukwa-kwimba masamu yoze wambile ngwenyi: “Mungusakwila kuli Yehova ni mbunge yami yeswe, mu punga ya akwa ululi ni mu chikungulwila.” (Samu 111:1) Kwamba pundu, amu kwimba miaso chakuhalisa Yehova, twatamba kulianga kuheta ha kukunguluka ni kununga ndo muze kukunguluka muchihwa.
w03 1/9 20 ¶1
Halisa Yehova “Hakachi ka Chikungulwila”
Chizechene ngwe ku mashimbu akunyima, ni musono nawa, kuli umwe ululikiso uze wakukwasa mandumbu jetu kusolola ufulielo wo ‘hakachi ka chikungulwila.’ Uhashi uze mandumbu anji alinawo, uli wakuhana kumbululo lia yihula yize akulinga ha kukunguluka. Kanda ulelesa upeme uze wakwiza ha kulinga chino. Ngwe chilweza, makumbululo waze akusolola chize mutuhasa kukumba yipikalo ni kuyehuka, kakukwasa mandumbu kupwa ni hamu lia kukaula shimbi ya mu Mbimbiliya. Makumbululo waze akulumbununa yisoneko ya mu Mbimbiliya yize yakutala ha kuhengwola cha hita ndumbu, muchihasa kukwasa mandumbu kupwa ni chako cha kulilongesa.
(Samu 22:1-19) Zambi yami, Zambi yami, kuchi te wangwehukanga? Kuchi te uli kusuku ni yami, kwangukwashile, uli kusuku ni maliji a mikuma yami? 2 Zambi yami, nakuteta, ha mwalwa, alioze kushi kungukumbulula; nakuteta ha ufuku, chishikuhola. 3 Alioze yena uli musandu, yena watwama hakachi ka uhaliso wa Izalele. 4 Akaka akufulielele. O afulielele ni yena waapulwile. 5 Atetele kuli yena, waapulwile. Afulielele muli yena mba kaakolesele sonyi. 6 Alioze yami nguli katutu, hi nguli mutu ko. Malunga kakunguchoka, atu kakungulelesa. 7 Waze eswe akungumona kakunguseha nikungusaula. Kakutuhwisa mivumbo, kakuhunga mitwe ngwo, 8 Wafulielele Yehova ngwenyi, Mangupulula. Amupulule se wawahililile muli iye. 9 Alioze yena wanguchijile mu jimo. Wakolesele ufulielo wami shimbu te nguchili ku mele ja mama. 10 Nalimbilile hali yena chize ku jimo; yena uli Zambi yami chize ku jimo lia mama. 11 Kanda umana kusuku ni yami, mumu lamba hakamwihi lili; kukushi yoze mangukwasa. 12 Makuji a ngombe anji hanangujingilika. Makuji a tachi a ku Mbashane hananguseleka. 13 Kanangupakwila makanwa jo ngwe ndumba nikuwumbula nikuteta. 14 Hingunatehuka ngwe meya. Yifwaha yami yeswe hiyasengunuka. Mbunge yami yapwa ngwe sela, hiyasangunuka muchima lia jimo liami. 15 Tachi jami jinomu ngwe chipalupalu cha ndeho; limi liami linalamata ku mbangachi jami; hiwangusa mu fufuta ya kufwa. 16 Mumu tuwa hanangujingilika. Chikungulwila cha yingulungulu hichinanguseleka. Atuwile moko jami ni yiliato yami. 17 Yifwaha yami yeswe munguhasa kuyalula, alioze kakungutala, kakunguhulikila meso jo. 18 Kanalianyina mazalo jami hakachi ko; ha chikuto chami kanate chela. 19 Yehova kanda umana kusuku; yena mukwa kungupulula, tambuka kama ungukwase.
1-7 ABRIL
YIKUMA YILEMU YA MU LIJI LIA ZAMBI | MASAMU 23-25
“Yehova Iye Kafunga Kami”
(Samu 23:1-3) Yehova iye kafunga kami, chichi kuhona nichimwe. 2 Kakungupombesa muma mwa kelo; kakungutwala mu sesa lia meya a uhwimino. 3 Kakuhuzulula mbunge yami; kakungusongwela mu majila a ululi mumu ha jina lienyi.
w11 1/5 31 ¶3
“Yehova Iye Kafunga Kami”
Yehova kakusongwela mapanga jenyi. Kanji-kanji, mapanga waze keshi kafunga kakutoka. Chizechene nawa, ni yetu twakufupa ukwaso hanga tuwane jila yalita ku mwono wetu. (Jeremia 10:23) Ngwe chize Ndawichi ambile, Yehova kakusongwela atu jenyi “muma mwa kelo” ni kwatwala ku “sesa lia meya a uhwimino.” Chikwo nawa, iye kakwasongwela “mu majila a ululi.” (Versu 2, 3) Yilweza yino ya chize kafunga akufunga mapanga, yinatwehe shindakenyo ngwetu, mutuhasa kufuliela muli Zambi. Nyi twakaula usongwelo wa spiritu uze tunawane mu Mbimbiliya, mutuhasa kupwa ni mwono upema, kuhuzuluka mbunge ni kuwana ufunge.
(Samu 23:4) Ewa, chipwe ngunende ndusu mu chikulo cha chizulie cha kufwa, chichi kwivwa woma wa chipi nichimwe; mumu yena uli hamwe ni yami; mulumbu we ni lukanda we muyingulembejeka.
w11 1/5 31 ¶4
“Yehova Iye Kafunga Kami”
Yehova kakufunga mapanga jenyi. Mapanga kakwivwa woma nyi keshi ni kafunga hakamwihi, chikwo nawa keshi kuhasa kulinga nichimwe hanga alifunge. Yehova kakulweza tuvumbi twenyi ngwenyi katambile kwivwa woma, chipwe muze mapalika “mu chikulo cha chizulie cha kufwa” chekwamba, ha mashimbu akalu chinji ku mwono wo. (Versu 4) Yehova kakwafunga ni kwakwasa. Iye kakuhana mana ni tachi kuli tuvumbi twenyi hanga ahase kukumba yipikalo.—A-Fwilipu 4:13; Tiangu 1:2-5.
(Samu 23:5) Wakungwalila mesa kumeso ja akwa kole jami. Wakuwayisa mutwe wami ni maji. Musenge wami kuunasupwoka.
w11 1/5 31 ¶5
“Yehova Iye Kafunga Kami”
Yehova kakulisa mapanga jenyi. Mapanga kakufupa ukwaso wa kafunga ko hanga aalise. Ni yetu twakufupa ukwaso wa ku spiritu uze Zambi wika mahasa kutwaha. (Mateu 5:3) Twakusakwilila chinji, mumu Yehova kali Chihanyi munene yoze wakutwaha kulia chinalumbama. (Versu 5) Mbimbiliya ni mikanda yikwo, ngwe mukanda uno unatange uli kulia cha ku spiritu chize chakutukwasa kunyingika mumu liaka Zambi atutangile ni upale wenyi hali atu.
Kuhengwola Yikuma Yilemu ya mu Mbimbiliya
(Samu 23:3) Kakuhuzulula mbunge yami; kakungusongwela mu majila a ululi mumu ha jina lienyi.
w11 15/2 24 ¶1-3
Zanga Ululi Ni Mbunge Ye Yeswe
KUPALIKILA MU Liji lienyi ni spiritu yenyi yisandu, Yehova kakusongwela tuvumbi twenyi “mu majila a ululi.” (Samu 23:3) Alioze amu tuli yihenge, ha mashimbu amwe mutuhasa kupianguka mu jila yacho. Kashika, mba tulinge cheka yuma yalita, twatamba kusa tachi. Yika muyitukwasa kulinga yuma yalita? Chizechene ngwe Yesu, twatamba kupwa ni zango lia kulinga yuma yalita.—Tanga Samu 45:7.
2 Majila a “ululi yika analumbunuka”? Jila ya ululi yili yimwe jila yikehe. Mutuhasa kunyingika “majila” a ululi kupalikila mu shimbi ja Yehova ja ululi. Mu limi lia Hepreu ni Ngregu, liji “ululi” liakulumbunuka chimwe chuma “chipema” hanji chalita, chize chakutukwasa kulikwachilila ku shimbi. Amu Yehova ‘atwama kuma kwa umwenemwene kwa ululi,’ tuvumbi twenyi kakuwahilila chinji ha kwecha hanga Iye aasolwele jila yalita yize atamba kwenda.—Jere. 50:7.
3 Mutuhasa wika kuvwisa Zambi kuwaha nyi twasa tachi hanga tutwame kulita ni shimbi jenyi ja ululi. (Shimbi 32:4) Chino chakufupiwa kuli yetu kulilongesa yuma yeswe hakutwala kuli Zambi mu Liji lienyi, Mbimbiliya. Kashika, nyi twanunga kulilongesa yuma yinji hakutwala kuli Yehova ni kununga kukundama kuli iye, zango lietu ha shimbi jenyi ja ululi mulioka chinji. (Tia. 4:8) Chikwo nawa, twatamba kukaula usongwelo wa mu Liji lia Zambi muze tunafupu kukwata yiyulo yilemu ku mwono wetu.
(Samu 23:1–24:10) Yehova iye kafunga kami, chichi kuhona nichimwe. 2 Kakungupombesa muma mwa kelo; kakungutwala mu sesa lia meya a uhwimino. 3 Kakuhuzulula mbunge yami; kakungusongwela mu majila a ululi mumu ha jina lienyi. 4 Ewa, chipwe ngunende ndusu mu chikulo cha chizulie cha kufwa, chichi kwivwa woma wa chipi nichimwe; mumu yena uli hamwe ni yami; mulumbu we ni lukanda we muyingulembejeka. 5 Wakungwalila mesa kumeso ja akwa kole jami. Wakuwayisa mutwe wami ni maji. Musenge wami kuunasupwoka. 6 Utu ni keke wika muyingukaula matangwa eswe a mwono wami; mba mungutwama mu zuwo lia Yehova ku miaka ya mutolo. 24 Hashi ha mbala ha Yehova, ni yuma yeswe yiliho; ni muno-muze ni aze eswe atwamamo. 2 Mumu wahatungile ha kalunga-lwiji; wahakolesele ha masanga a meya. 3 Iya makanduka ha mulundu wa Yehova? Iya mamana muma mwenyi musandu 4 Yoze uli ni moko apema ni mbunge ya kulinanga. Yoze katwalile mbunge yenyi ku yuma yamokomoko; kalishingile ni mahuza. 5 Iye kumatambula chiwape kuli Yehova; kumatambula ululi kuli Zambi ya ulamwino wenyi. 6 Chino che chisemuko cha akwa kumufupa; waze akufupa meso je, Zambi ya Yakomba. 7 Enu yajilo! hetulenu mitwe yenu, hetukenu enu mapito a mutolo; mba Mwanangana wa ulemu kumanjila. 8 Yono Mwanangana wa ulemu iya? Yehova mukolo, mukwa ndundo; Yehova mukwa ndundo mu jita. 9 Enu yajilo, hetulenu mitwe, ewa, yihetulenu, enu mapito a mutolo, mba Mwanangana wa ulemu kumanjila. 10 Yono Mwanangana wa ulemu iya? Yehova-wa-Tujita, iye mwe mwanangana wa ulemu.
8-14 ABRIL
YIKUMA YILEMU YA MU LIJI LIA ZAMBI | MASAMU 26-28
Chize Ndawichi Akolesele Ushishiko Wenyi
(Samu 26:1, 2) Ngupatwile yena Yehova, mumu kunenda mu kutuwika cha mbunge yami; kunafuliela nawa Yehova nikuyambashana ka. 2 Yehova ungusopele kama, ungweseke; eseka manyonga jami ni mbunge yami.
w04 1/12 14 ¶8-9
Nunga ni Kwenda ni Ushishiko
8 Ndawichi kalembele ngwenyi: “Yehova ungusopele kama, ungweseke; eseka manyonga jami ni mbunge yami.” (Samu 26:2) Manyonga kakupwa muchima lia mutu. Kashika, manyonga kakulumbunuka yize mutu akunyonga ni chize akwivwa muchima. Chikwo nawa, mbunge yinalumbunuka chize mutu apwa muchima. Muze Ndawichi alembele kuli Yehova, kechile hanga Yehova ahengwole mu yimako-yimako manyonga jenyi ni chize akwivwa.
9 Ndawichi kaliwumbile kuli Yehova hanga ahengwole manyonga jenyi ni mbunge. Kuchi Yehova akutuhengwola muchima? Ndawichi kambile ngwenyi: “Mungukusakwilila Yehova, yoze hanangulongesa mana: chipwe ha ufuku mbunge yami kuyakungufumba.” (Samu 16:7) Yika maliji wano analumbunuka? Kanalumbunuka ngwo, yiyulo ya Yehova yanungine mu mbunge ya Ndawichi chikwo nawa, yamukwashile kupemesa manyonga jenyi. Ni chino nawa muchihasa kulingiwa kuli yetu, nyi twapukuna ni zango ha yiyulo yili mu Liji lia Zambi ni ya waze akumumanyinako hamwe ni ululikiso wenyi ni kwecha hanga yiyulo yacho yinunge mu mbunge yetu. Kulemba mashimbu eswe kuli Yehova hanga atuhengwole mu jila yino, muchitukwasa kununga ni kushishika.
(Samu 26:4, 5) Chatwamine hamwe ni atu amokomoko; chipwe akwa kalimbalimba chichi kulifutula no. 5 Chikungwila cha akwa yitanga yipi nakuchivwila kole; chichi kutwama ni yingulungulu.
w04 1/12 15 ¶12-13
Nunga ni Kwenda ni Ushishiko
12 Ndawichi kalumbunwine chuma chize chamukwashile kukolesa ushishiko wenyi ha kwamba ngwenyi: “Chatwamine hamwe ni atu amokomoko; chipwe akwa kalimbalimba chichi kulifutula no. Chikungulwila cha akwa yitanga yipi nakuchivwila kole; chichi kutwama ni yingulungulu.” (Samu 26:4, 5) Ndawichi te keshi “kutwama ni yingulungulu.” Iye te kakuvwila kole atu akwa-yitanga yipi.
13 Mba yika mutwamba hali yetu? Shina twakulituna kutwama ni atu waze amokomoko muze twakutala TV, yinema, yizulie, internet hanji yuma yikwo? Shina twakwehuka atu waze akusweka kupwa cho? Atu amwe ku shikola hanji ku mulimo, mahasa kusoloka ngwe kali masepa apema, kuma ka. Shina tunazange lume kulikata ni atu waze keshi kwenda mu umwenemwene? Maliji a yitanganyanyi mahasa kusoloka ngwe kali amwenemwene, alioze hanji mayonga jo kali kutupiangula hanga tweche kulingila Yehova. Mba yika mutwamba nyi mu chikungulwila chetu muli mandumbu waze akulinga yuma yipi ku tenga? Mandumbu wano kakusweka kupwa cho. Jayson, yoze unakalakala ngwe kavumbi mu chikungulwila, kapwile ni masepa a mutapu au muze te achili mukweze. Hakutwala kuli ayo, iye kambile ngwenyi: “Tangwa limwe umwe wa kuli masepa jacho kangulwezele ngwenyi: Mutuhasa kulinga yeswayo mutuzanga haliapwila mumu muze chifuchi chaha muchiza, makatuwana hitwafwa. Kutuchi kunyingika ngwetu twatokesa chimwe chuma. Manyonga a mutapu au kangukwashile kukanyama. Chazangile kufwa muze chifuchi chaha kanda chiheta.” Jayson kasolwele mana ha kwecha kulikata no. Postolo Paulu katutowezele ngwenyi: “Kanda anwonga, masepa api kakupihisa yitanga yipema.” (1 A-Korindu 15:33) Kashika, chili chilemu chinji kwehuka masepa api!
(Samu 26:8) Yehova kunazanga kutwama mu zuwo lie, muze mwatwama ulemu we.
w04 1/12 16 ¶17-18
Nunga ni Kwenda ni Ushishiko
17 Tabernakulu ni chilumbilo chayo, kwe A-Izalele apwile ni kuwayila Yehova ni kuhana yitapo. Mba asolole uwahililo wenyi ha chihela chino, Ndawichi kalembele ngwenyi: “Yehova kunazanga kutwama mu zuwo lie, muze mwatwama ulemu we.”—Samu 26:8.
18 Shina twakuzanga kulikungulula ku chihela kuze akutulongesa hakutwala kuli Yehova? Hita Zuwo lia Wanangana kuze twakutambula usongwelo wa ku spiritu, lili chihela cha uwayilo wamwenemwene. Chikwo nawa, tuli ni kukunguluka cha mambonge ni kukunguluka cha mbonge. Ha kukunguluka chino, Yehova kakututoweza ni kutulongesa. Nyi twakuzanga chinji utowezo wenyi, mutusa tachi hanga tupwe ni kuya ha hita kukunguluka ni kulihulikila ha yize akutulongesa. (Samu 119:167) Chili chiwape chinene kupwa hamwe ni mandumbu jetu a ku ufulielo waze akulihulumba hali yetu ni kutukwasa kununga kushishika kuli Zambi!—A-Hepreu 10:24, 25.
Kuhengwola Yikuma Yilemu ya mu Mbimbiliya
(Samu 27:10) Mumu chipwe tata ni mama mangwehuka, Yehova mangutambula.
w06 15/7 28 ¶15
Yehova Kakupulula Waze Ananenganyana
15 Mukwa-kwimba masamu Ndawichi kambile ngwenyi: “Mumu chipwe tata ni mama mangwehuka, Yehova mangutambula.” (Samu 27:10) Twakuwahilila chinji ha kunyingika ngwetu, zango lia Yehova linahiana zango lize yisemi akusolwela ana jo. Chipwe ngwe muhasa kwivwa yikola ku mbunge nyi yisemi je makwehuka hanji kukulinga yuma yipi, nihindu muhasa kupwa ni shindakenyo ngwe, Yehova kakulihulumba hali yena. (A-Roma 8:38, 39) Iwuluka ngwe, Zambi kakukoka waze akuzanga. (Yoano 3:16; 6:44) Chipwe ngwe kakulingile yuma yipi kuli akwenu, nihindu Tata yetu wa mu malilu Yehova, kakukuzanga chinji!
(Samu 27:1-14) Yehova iye pangu liami ni ulamwino wami. Iya mungumuvwila woma? Yehova iye tachi ja mwono wami. Iya mungumuvwila woma? 2 Muze akwa yitanga yipi anguwanyine akalie musunya wami, chipwe akwa kulimika ni yami ni akwa-kole jami atalingile nikulimbuka. 3 Chipwe yizavu ya tujita manguseleka ni mbalaka jo, mbunge yami kuyichi kwivwa woma. Chipwe jita muyingusangumukina, hindu mungujikiza. 4 Chuma chimuwika hineta kuli Yehova, chenacho mungufupa; hanga ngukatwame mu zuwo lia Yehova miaka yeswe ya mwono wami. Ngukamone upeme wa Yehova ngukazewule tembele yenyi. 5 Ha tangwa lia lamba mangusweka mu mbalaka yenyi, mwe muchima lia tabernakulu yenyi mangusweka. Kumanguzundula helu, ha liwe. 6 Haliapwila kumazundula mutwe wami helu lia akwa kole jami a kungujingilika. Mungulambula yitapo ya uwahililo mu tabernakulu yenyi. Mungwimba, ewa mungwimbila Yehova uhaliso. 7 Ungwivwe, yena Yehova, muze munguteta ni liji liami. Nguvwile kama vumbi, ungukumbulule. 8 Muze wambile ngwe, fupa meso jami, mbunge yami yakumbulwile ngwami, Meso je mungufupa, Yehova. 9 Kanda unguswekela meso je; kanda unguchinda yami kavumbi ke mu utenu we. Yena wapwa chikwashi chami; kanda ungumbila, kanda ungwehuka, yena Zambi ya ulamwino wami; 10 Mumu chipwe tata ni mama mangwehuka, Yehova mangutambula. 11 Ngulongese jila ye, Yehova; ngusongwele kama mu jila yize yasalama, mumu hali akwa kole jami. 12 Kanda ungukunjika ku upale wa waze akulimika ni yami, mumu yilamikiji hanangukatukila, hamwe ni akwa kuhwilijela ni uswi. 13 Nyi kachi chafulielele kumona utu wa Yehova mu chifuchi cha akwa mwono, mba? 14 Twaminyina Yehova! Takama, mbunge ye yikajikize. Ewa, twaminyina Yehova.
15-21 ABRIL
YIKUMA YILEMU YA MU LIJI LIA ZAMBI | MASAMU 29-31
Fumbo Liakusolola Zango lia Zambi
(Samu 30:7) Yena Yehova mu vumbi lie wajikijishile mulundu wami. Waswekele meso je, mba nalipikalile.
it-2 99 ¶5
Meso
Mu Mbimbiliya, maliji ‘Kusweka meso’ kali ni ulumbunwiso unji kulita ni yize yinalingiwa. Muze Yehova akusweka meso jenyi, kanji-kanji chakulumbunuka kuchiza utayizo wenyi ni ndundo jenyi kuli umwe kavumbi kenyi. Chino muchihasa kulingiwa muze umwe mutu hanji chizavu mehuka shimbi ja Zambi ngwe chize vungu lia Izalele ehukile Zambi. (Yom 34:29; Sam 30:5-8; Iza 54:8; 59:2) Ha mashimbu amwe, maliji ‘kusweka meso’ mahasa kulumbunuka ngwo, Yehova kecha kukwasa chikwo nawa, mashimbwila ndo ha shimbu lialita mba ahane ukwaso. (Sam 13:1-3) Ndawichi kechile kuli Zambi ngwenyi: ‘Fuka meso je ku milonga yami,’ chino te chinalumbunuka ngwo, iye ketele ukonekeno wa shili yenyi kuli Zambi.—Sam 51:9; tesa ni Sam 10:11.
(Samu 30:8) Natetele kuli yena Yehova; kuli Yehova nalembele.
(Sam 30:5) Mumu utenu wenyi wa shimbu likepekepe wika, vumbi lienyi mulipwa lia miaka yeswe ya mwono wetu. Hanji malilo mapwa ha ufuku, alioze ha chimenemene uwahililo muwiza.
w07 1/3 19 ¶1
Wahililenu ha Kushimbwila Muli Yehova
Mutuhasa kutesa chize fumbo lia Yehova lia kutuyukisa ni chize muhuko wakukola. Hakutwala ku fumbo lia Zambi, Mbimbiliya yakwamba ngwo: “Kulutwe mulima mihuko ya ululi wa sambukila kuli waze akulifumba nalio.” (A-Hepreu 12:11) Chizechene ngwe ngwe mihuko yakumbata mashimbu mba yikole, ni yetu nawa, twakufupa mashimbu hanga twalumune yitanga yetu hakutwala ku fumbo lize Yehova akutwaha. Ngwe chilweza, nyi hamukunda wa uhenge wetu, twatokesa chimwe chiteli mu chikungulwila, zango lietu lia kushimbwila muli Zambi mulitukwasa hanga tuchine kunenganyana ni kuhonga. Nyi mutupalika mu yuma yino, maliji a Ndawichi mahasa kututakamisa anambe ngwo: “Mumu utenu wenyi wa shimbu likepekepe wika, vumbi lienyi mulipwa lia miaka yeswe ya mwono wetu. Hanji malilo mapwa ha ufuku, alioze ha chimenemene uwahililo muwiza.” (Samu 30:5) Nyi twapwa ni nyonga lia kushimbwila ni kukaula yiyulo yize twakutambula mu Liji lia Zambi ni ululikiso wenyi, mashimbu a “uwahililo” makaheta.
Kulikonyeka Chamwenemwene Yika Chinalumbunuka?
18 Mutu yoze asosolola mu chikungulwila, mafupiwa kulinga yimwe hanga asolole ngwenyi, kalikonyeka ni mbunge yeswe. Iye katamba kukunguluka mashimbu eswe ni kukaula yiyulo ya makulwana hakutwala ku kulemba ni kutanga Mbimbiliya mashimbu eswe. Katamba nawa kusa tachi hanga ehuke yuma yeswe yize yamutwalanga kulinga shili yacho. Nyi masa tachi jinji hanga alulieke usepa wenyi ni Yehova, iye mahasa kupwa ni shindakenyo ngwenyi, Yehova mamukonekena, nawa makulwana mamufunyisa mu chikungulwila. Muze makulwana anafupu kuwana nyi mutu yoze walinga shili yinene kalikonyeka ni mbunge yeswe, ayo kakunyingika ngwo hita chikuma chalisa. Hachino, kakuhengwola kanawa hita chikuma hanga achine kukalisa mbunge muze anasopesa chivulumunyi.
Kuhengwola Yikuma Yilemu ya mu Mbimbiliya
(Samu 31:23) Zangenu Yehova, enu asandu jenyi eswe; Yehova kakufunga waze akushishika; kakufwetesa chikolo yoze wakulinga ni kulengumuka.
w06 15/5 19 ¶13
Yikuma Yilemu ya Mukanda wa Masamu
31:23—Kuchi Yehova akufwetesa mukwa-kulinangamisa? Fweto lienyi lili kumuzangamisa. Nyi mukwa-ululi mahengesa chakuhona kunyingika, Yehova kakumwaha fumbo. Muze mutu yoze wakulinangamisa keshi kulikonyeka, Yehova kakumuzangamisa.—Yishima 11:31; 1 Petulu 4:18.
(Samu 31:1-24) Muli yena Yehova ngunafuliela, kanda angukolesa sonyi. Ungupulule kama ni ululi we. 2 Hetamisa twitwi lie kuli yami, ungupulule kama nikawashi. Upwe kuli yami liwe lia tachi, mbonge ya kungulamwina. 3 Mumu yena uli liwe liami ni mbonge yami; kashika, ungutetekele, ungusongwele mumu ha jina lie. 4 Unguchange ku wanda uze hanangutela ku lumbu, mumu yena uli tachi jami. 5 Mu kwoko lie ngunakunjika spiritu yami. Yehova, yena hiwangukuula, uli Zambi ya umwenemwene. 6 Nakuvwila kole waze akutala yuma yamokomoko ya mahuza, alioze yami kunafuliela Yehova. 7 Munguwahilila ni chiseke mu utu wa zango lie, mumu hiwamona luyinda wami; hiwanyingika lamba lia mbunge yami. 8 Kuwatayijile akwa kole kungukakachila mu kwoko lio; hiwasa yiliato yami ha chihela chinene. 9 Nguvwile kama vumbi Yehova mumu ngunapinji; liso liami linajijiminya ni chinyengo, ewa, ni mbunge yami ni mujimba wami. 10 Mumu mwono wami hiwanguhwa ni chinyengo. Miaka yami hiyahwa ni mikuma. Tachi jami jinatepuluka mumu ha uhenge wami; yifwaha yami hiyalishisa. 11 Kunapwa luchoko mumu hali akwa kulimika jami, ewa, kuhiana kuli akwetu natunga no. Nakuvwisa woma sepa liami. Waze akungumona haze kakunguchina. 12 Hanguvwulama ngwe mufu hanamuchiza mbunge. Hinapwa ngwe ndeho yize hiyafwa. 13 Mumu hinevwa kulamikiza cha anji, ni woma sali ni sali, shimbu mangutwama punga. Alitesele kuchiza mwono wami. 14 Hindu nafulielele yena Yehova. Nambile ngwami, Yena uli Zambi yami. 15 Miaka yami yili mu kwoko lie. Ngupulule kama ku kwoko lia akwa kole jami, kuli waze akunguhungumiona. 16 Meso je apanguluke hali yami kavumbi ke, ungulamwine ku utu wa zango lie. 17 Kanda angukolesa sonyi, Yehova, mumu hali yena hinatambika. Yingulungulu akevwe sonyi; akahole muma mwakufwa. 18 Mivumbo ya mahuza yikalumuke ngwe ya tumama, mumu kakuhanjika ni shino, nikulengumuka, ni kaleleso wa kulimika ni akwa ululi. 19 Utu we walumbama, uze hiwatulikila waze akukuvwila woma. Wenawo hiwalingila atu waze aswama muli yena kumeso ja ana ja atu. 20 Muasweka mu chiswamo kumeso je, kuchina punga ya atu. Muasweka kutenga mu mbalaka ye, kuchina kulitachika cha malimi. 21 Yehova akafumane, mumu hangulweza utu wa zango lienyi lia kukomwesa, mu limbo lia tachi. 22 Alioze ami nalipupwishile kwamba ngwami, Hiwanguteta kumeso je. Chipwe chocho wevwile liji lia kulemba chami muze natetele kuli yena. 23 Zangenu Yehova, enu asandu jenyi eswe; Yehova kakufunga waze akushishika; kakufwetesa chikolo yoze wakulinga ni kulengumuka. 24 Takamenu, mbunge jenu jihamuke, enu eswe nwakutatatata kuli Yehova.
22-28 ABRIL
YIKUMA YILEMU YA MU LIJI LIA ZAMBI | MASAMU 32-33
Mumu Lika Twatamba Kwambulula Shili Yinene Yize Twalinga?
(Samu 32:3, 4) Muze naholele yifwaha yami yazeketele, mumu ha mikuma yami tangwa lieswe. 4 Mwalwa ni ufuku kwoko lie liangulemene; tachi jami jomine ngwe changa cha lushiho.
w93 15/3 9 ¶7
Keke Ya Yehova Yakutukwasa Tuhone Kunenganyana
7 Nyi twalinga shili yinene, muchihasa kukaliwa kuli yetu kulweza Yehova shili yize twalinga. Nyi chino muchilingiwa kuli yetu, yika muyihasa kutukwasa? Ha mukanda wa Samu 32:3, 4, Ndawichi kambile ngwenyi: “Muze naholele yifwaha yami yazeketele, mumu ha mikuma yami tangwa lieswe. Mwalwa ni ufuku kwoko lie liangulemene; tachi jami jomine ngwe changa cha lushiho.” Muze Ndawichi esekele kusweka shili yenyi, mbunge yenyi yalemene, chikwo nawa, iye kahongele. Kunenganyana chamuhwishile tachi, kapwile ngwe umwe mutondo uze omisa, kuushi meya. Kwamba pundu, iye kota kamwene upi uze wakwiza ha kuvulumuna. Iye katokesele uwahililo wenyi. Nyi ngwe twaliwana mu kapinda ngwe yono, yika twatamba kulinga?
(Samu 32:5) Natayile shili yami kuli yena, uhenge wami chauswekele. Nambile ngwami, Mungushikisa uvulumunyi wami kuli Yehova mba yena wakonekenene uhenge wa shili yami.
cl 262 ¶8
Zambi Yoze “Wakukonekena”
8 Ndawichi yoze walikonyekene kambile ngwenyi: “Natayile shili yami kuli yena, uhenge wami chauswekele. . . . mba yena wakonekenene uhenge wa shili yami.” (Samu 32:5) Liji “wakonekenene,” mu limi lia Hepreu linalumbunuka “kuzundula” hanji “kumbata.” Ha versu yino, yinalumbunuka kuchiza “mulonga,” “upi” ni “shili.” Kashika, Yehova kazundwile ni kumbila shili ya Ndawichi. Chino chakwashile Ndawichi kutepulula yinyengo yenyi ha shili yize alingile. (Samu 32:3) Ni yetu mutuhasa kujikijila muli Zambi yoze wakukonekena atu waze akulikonyeka ni kufuliela ha chitapo cha Yesu.—Mateu 20:28.
(Samu 32:1) Kawaha yoze hanamukonekena uvulumunyi wenyi; shili yenyi hanayifuku.
w01 1/6 30 ¶1
Kwambulula Chakuwuka
Muze Ndawichi te hambulula shili yenyi, iye kakalivwile nawa chipi. Maliji waze asonekene ha mukanda wa samu hakutwala ku shili yenyi, kakusolola pundu chize iye alivwile kanawa ha kupwa ni hamu lia kuwayila Zambi ni ushishiko. Ngwe chilweza, ha mukanda wa Samu 32:1 hanambe ngwo: “Kawaha yoze hanamukonekena uvulumunyi wenyi; shili yenyi hanayifuku.” Chipwe ngwe twalinga shili yinene, mutuhasa kulivwa kanawa nyi twalikonyeka ni mbunge yeswe. Jila yimwe yize mutuhasa kusolwelamo ngwetu twalikonyeka, yili kutayiza shili yize twalinga ngwe chize Ndawichi alingile. (2 Samuele 12:13) Iye kakesekele kusweka shili yenyi hanji kulamikiza atu akwo. Versu 5 yinambe ngwo: “Natayile shili yami kuli yena, uhenge wami chauswekele. Nambile ngwami, Mungushikisa uvulumunyi wami kuli Yehova mba yena wakonekenene uhenge wa shili yami.” Kulikonyeka ni mbunge yetu yeswe, chakutukwasa kulivwa kanawa hanga twehuke kunenganyana mumu lia shili yize twalingile kunyima.
Kuhengwola Yikuma Yilemu ya mu Mbimbiliya
(Samu 33:6) Atangile malilu nikulita ni liji lia Yehova; chizavu chamo cheswe wachitangile ni mwiku wa mu kanwa lienyi.
w06 15/5 20 ¶1
Yikuma Yilemu Ya Mukanda Utangu Wa Masamu
33:6;—Yika yinalumbunuka “spiritu” hanji “mwiku” wa mu kanwa lia Yehova? Spiritu yino, yinalumbunuka tachi ja Zambi hanji spiritu yisandu yize iye azachishile muze atangile malilu. (Uputukilo 1:1, 2) Kakuyivuluka ngwo spiritu ya mu kanwa lienyi mumu chizechene ngwe mwiku ukwete ndundo, iye mahasa kuzachisa spiritu yenyi hanga amanunune upale wenyi chipwe kusuku.
(Samu 33:1-22) Wahililenu muli Yehova yenu akwa ululi. Uhaliso kuwatela hali akwa kululama. 2 Sakwililenu Yehova ni kalialia; mwimbilenu uhaliso ni kalialia wa kumi lia kusa. 3 Mwimbilenu mwaso waha; imbenu yisaji ni kawino ni liji linene. 4 Mumu liji lia Yehova kuliapema; milimo yenyi yeswe kakuyilinga ni umwenemwene. 5 Kazanga ululi ni upatwilo. Hashi hazala too ni utu wa zango lia Yehova. 6 Atangile malilu nikulita ni liji lia Yehova; chizavu chamo cheswe wachitangile ni mwiku wa mu kanwa lienyi. 7 Iye kakukunga meya a kalunga-lwiji ngwe mulumba; kakutulika meya a mu jondo mu machila. 8 Akwa hashi eswe avwile woma Yehova. Waze eswe atwama muno-muze apwe nikumuchikimina. 9 Mumu iye wahanjikile mba chalingiwile. Watuminyine mba chakolele. 10 Yehova kakupwisa yamokomoko yiyulo yeswe ya mavungu; manyonga eswe a atu kakuapwisa amokomoko. 11 Alioze yiyulo ya Yehova yakola mbe ku miaka ya mutolo; manyonga a mbunge yenyi kakola ndo ku yisemuko yeswe. 12 Vungu lize lili ni Yehova Zambi yo kuliawaha. Kawaha atu waze iye hatongola akapwe chihinga chenyi. 13 Yehova mwilu kakutala, kakumona ana ja atu eswe. 14 Kuma kwenyi kwa kutwama kakutala aze eswe atwama hano hashi; 15 Yoze wakuwumba mbunge jo jeswe; kakuzewula yitanga yo yeswe. 16 Mwanangana keshi kumulamwina ha kwoka cha yizavu. Chitakame keshi kumupulula ku tachi jenyi jinji. 17 Kavwalu wamokomoko ha kulilamwina nenyi, kechi kuhasa kupulula ni umwe ni tachi jenyi jinene. 18 Liso lia Yehova kuliakutala kuli waze akumuvwila woma, ni waze akutwaminyina utu wa zango lienyi; 19 Akapulule mwono wo ku kufwa; akaafunge mwono mu kapunga. 20 Mbunge jetu kujatwaminyina Yehova; iye chikwashi chetu ni lukepwe wetu. 21 Mumu mbunge jetu mujiwahilila muli iye, se twafuliela jina lienyi lisandu. 22 Yehova, utu wa zango lie utwame hali yetu, chizechene ngwe twatalatala muli yena.
29 ABRIL–5 MAIO
YIKUMA YILEMU YA MU LIJI LIA ZAMBI | MASAMU 34-35
‘Munguhalisa Yehova Mashimbu Eswe’
(Samu 34:1) Mungufumanyisa Yehova ha miaka yeswe; uhaliso wenyi muutwama mu kanwa liami tangwa ha tangwa.
w07 1/3 22 ¶11
Tuhalisenu Jina Lia Yehova Hamuwika
11 “Mungufumanyisa Yehova ha miaka yeswe; uhaliso wenyi muutwama mu kanwa liami tangwa ha tangwa.” (Samu 34:1) Muze Ndawichi te akuchina-china akwa-kole jenyi, kota iye kalihulikile chinji ha chize te mahasa kuwana kulia, alioze ngwe chize maliji wano anasolola, yuma yize te akufupa ku mwono, yakapwile yilemu chinji kuli iye kuhiana zango lienyi lia kuhalisa Yehova. Chino chili chilweza chipema kuli yetu nyi tunapalika mu kapinda! Chipwe ngwe tuli ku chihela cheswacho, ku shikola, ku mulimo, ni mandumbu jetu a ku ufulielo hanji mu munda, nyonga lietu liatamba kupwa kuhalisa Yehova. Tunyongenu ha yikuma yize muyihasa kututwala kuhalisa Yehova! Ngwe chilweza, mutuhasa kumona ni kuwahilila ha yitanga yipema ya Yehova mashimbu eswe. Mutuhasa nawa kumona yuma yize iye akulinga kupalikila mu ululikiso wenyi hano hashi! Chipwe ngwe kali yihenge, nihindu Yehova kakuzachisa tuvumbi twenyi ashishika ha mashimbu jetu. Kuchi milimo ya Zambi yakuhiana milimo yize atu waze akulemesa kuli akwa-hashi akulinga? Shina kushi kutayiza yize Ndawichi ambile ngwenyi: “Niumwe wapwa ngwe yena mwe Mwene. Niyimwe yitanga yinalifu ni yitanga ye”?—Samu 86:8.
(Samu 34:2-4) Mbunge yami muyilisamba muli Yehova; yimbovu machivwa, mawahilila. 3 Chichimiekenu Yehova hamwe ni yami, tunangamisenu jina lienyi hamuwika. 4 Nafupile Yehova, iye wangukumbulwile, mba wangupulwile ku woma wami weswe.
w07 1/3 22 ¶13
Tuhalisenu Jina Lia Yehova Hamuwika
13 “Mbunge yami muyilisamba muli Yehova, yimbovu machivwa, mawahilila.” (Samu 34:2) Ha versu yino, Ndawichi te kaso kulinangamisa ha yuma yize alingile. Ngwe chilweza, iye kakalinangamishine ha chize ongele mwanangana wa ku Ngata. Ndawichi kanyingikine ngwenyi, Yehova mwe wamukwashile muze apwile ku Ngata ni muze achinyine. (Yishima 21:1) Hachino, Ndawichi kakalinangamishine, alioze kahalishile Yehova. Chino chakwashile atu waze akwete mbunge yipema kukundama kuli Yehova. Chizechene nawa, Yesu kahalishile jina lia Zambi. Kashika akwa-kulikehesa apwile ni mbunge ya kulilongesa. Musono, akwa-kulikehesa a ku mavungu eswe kaneza mu chikungulwila cha hashi heswe muze muli Akwa-Kristu akuwayisa waze akusongwela kuli Yesu. (A-Kolosu 1:18) Akwa-kulikehesa wano aneza mu chikungulwila cha hashi heswe, kakuwahilila muze akumona tuvumbi twa Zambi kanahalisa jina lia Yehova ni muze akwivwa sango ja mu Mbimbiliya.—Yoano 6:44; Yilinga 16:14.
(Samu 34:5) Atalile kuli iye mba waapangulwile. Meso jo kechi kaakolesa sonyi nilimwe tangwa.
w07 1/3 23 ¶15
Tuhalisenu Jina Lia Yehova Hamuwika
15 “Nafupile Yehova, iye wangukumbulwile, mba wangupulwile ku woma wami weswe.” (Samu 34:4) Kupalika mu yuma yino, chakwashile chinji Ndawichi. Kashika, iye yamba ngwenyi: “Chiswale yono yateta, Yehova yamwivwa, yamupulula ku lamba lienyi lieswe.” (Samu 34:6) Muze twakupwa ha kukunguluka, twakupwa ni uhashi wa kutakamisa mandumbu jetu ha kwalweza chize Yehova akutukwasa muze tunapalika mu yipikalo. Chino chakukolesa ufulielo wa mandumbu jetu, chizechene ngwe maliji a Ndawichi akolosele waze te akumukwasa. Hakutwala kuli Ndawichi, masepa jenyi “atalile kuli [Yehova] mba waapangulwile. Meso jo kechi kaakolesa sonyi nilimwe tangwa.” (Samu 34:5) Chipwe ngwe te kanachina, nihindu ayo kakevwile sonyi. Kapwile ni kujikijila ngwo Zambi te kanakwasa Ndawichi. Chizechene nawa, akwa-kwambujola aha ni mandumbu waze ali mu umwenemwene ha mashimbu anji, no kakufupa ukwaso wa Yehova. Amu amwene ukwaso wa Yehova ku mwono wo, meso jo apangulwile ni tachi jize te anase hanga anunge ni kushishika kuli Zambi.
Kuhengwola Yikuma Yilemu ya mu Mbimbiliya
(Samu 35:19) Waze anapu akwa kole jami shili yamokomoko, kanda uatayiza kunguyunga. Waze akunguvwila kole kuyishi chikuma, kanda atenya ni meso jo.
w06 15/5 20 ¶2
Yikuma Yilemu Ya Mukanda Utangu wa Masamu
35:19—Maliji a Nadwichi anambe ngwo kanda wecha waze akunguvwila kole kutenya meso jo yika analumbunuka? Kutenya meso te muchilumbunuka ngwo, akwa-kole ja Ndawichi mawahilila ha yuma yipi yize ayo te matesa kumulinga. Kashika Ndawichi etele hanga chichine kulingiwa.
(Samu 34:1-22) Mungufumanyisa Yehova ha miaka yeswe; uhaliso wenyi muutwama mu kanwa liami tangwa ha tangwa. 2 Mbunge yami muyilisamba muli Yehova, yimbovu machivwa, mawahilila. 3 Chichimiekenu Yehova hamwe ni yami, tunangamisenu jina lienyi hamuwika. 4 Nafupile Yehova, iye wangukumbulwile, mba wangupulwile ku woma wami weswe. 5 Atalile kuli iye mba waapangulwile. Meso jo kechi kaakolesa sonyi nilimwe tangwa. 6 Chiswale yono yateta, Yehova yamwivwa, yamupulula ku lamba lienyi lieswe. 7 Mungelo wa Yehova kakutunga chilombo chenyi cha kujingilika waze akumuvwila woma, kakuapulula. 8 Panjikenu nukambe ngwenu, Yehova iye mupema; kawaha mweswe maswama muli iye. 9 Vwilenu woma Yehova, yenu asandu jenyi; mumu waze mamuvwila woma kechi kahona. 10 Mievu ja ndumba kakuhona nikwivwa zala, alioze waze akufupa Yehova kechi kuhona nichimwe chuma chipema. 11 Enu ana tweyenu nungwivwe, mba mungunulongesa woma wa Yehova. 12 Mutu iya yoze wakuzanga mwono ni matangwa anji hanga amone yipema? 13 Funga limi lie ku yipi. Mivumbo ye kanda yihanjika kalimbalimba. 14 China yipi, ulinge yipema. Fupa sambukila ukayihange. 15 Meso ja Yehova katala kuli akwa ululi. Matwi jenyi kajikuka ku muteto wo. 16 Meso ja Yehova kalimika ni waze alingalinga yipi, akatete chiwulwiso cho hano hashi. 17 Akwa ululi yateta, Yehova yevwa, yaapulula ku lamba lio lieswe. 18 Yehova katwama hehi ni waze amakuka mbunge. Kakulamwina waze ali ni spiritu ya kupihilila. 19 Mukwa ululi lamba linji akumona, alioze Yehova kakumupulula ku luyinda wenyi mweswe. 20 Kakufunga yifwaha yenyi, chipwe chimuwika kuchamakukine. 21 Yipi muyikashiha yingulungulu, waze akuvwila kole akwa ululi kumakahia. 22 Yehova kakukuula mwono wa tuvumbi twenyi. Hakachi ka waze maswama muli iye niumwe mahia wakuhi.