YIZE MUYIKUKWASA MUZE NDANDO YA YUMA MUYINYINA

Wahilila ni Yize Uli Nayo

Atu waze akuwahilila ni yuma yize ali nayo, kakwete chiseke. Chipwe ngwe yuma muyalumuka ku mwono wo, ayo kakusa tachi hanga atwame kulita ni yize anapalika.

TAYIZA NGWE YUMA YALUMUKA

Jessica Koehle, yoze walilongesele psicologia kamwene ngwenyi, atu waze akuwahilila kakwete nyonga lialita. Iye yamona nawa ngwenyi, atu jacho keshi kuvwila akwo chipululu mumu lia yuma yize ali nayo. Kashika, kutushi kukomoka ha kumona ngwetu, atu waze akuwahilila ni yuma yize ali nayo, kanji-kanji kakwete chiseke nawa keshi kusakalala chinji. Kwamba umwenemwene, atu amwe waze keshi kusakalala chinji katwamine ni yikumba yinji. Chino kanji-kanji chakulingiwa kuli atu waze akulemesa chinji yuma yize falanga kujishi kuhasa kulanda, ngwe uwahililo uze wakwiza ha kupalikisa mashimbu ni asoko ni masepa jo.

“Nyi tuli ni yize mutulia ni yize mutuzala, tuwahililenu nayo.”—1 Timoteu 6:8.

YIZE MUHASA KULINGA

Kanda ulitesa ni akwenu. Nyi watesa mwono we ni wa atu waze akusoloka ngwe kali ni falanga, muhasa kwivwa chinyengo ni kwaevwila chipululu. Mutu mahasa kusoloka ngwe kali pichi mumu lia kulanda yuma ya ndando yinji, alioze kuma kali chiswale. Mumu atu waze akwete falanga, mahasa kutambula mapanza anji. Nicole, yoze watwama mu Senegal, yamba ngwenyi: “Chafupile kupwa ni yuma yinji mba nguwahilile. Munguhasa kuwahilila, chipwe ngwe akwetu masoloka ngwe kali ni yuma yinji kunguhiana.”

Eseka kulinga chino: Kanda utala-tala yuma ha internet yize akusa atu waze akwete falanga jinji ni chize akumbata mwono wo.

“Nungenu ni kukanyama, lifungenu ku kuzo yeswe, mumu chipwe mutu mapwa ni yuma yinji, yuma yacho kuyichi kumwaha mwono.”—Luka 12:15.

Pwako ni kusakwilila. Kanji-kanji atu waze akusakwilila, kakuwahilila chinji. Chikwo nawa, keshi kunyonga ngwo katela yuma yinji. Roberton, yoze watwama ku Haiti, yamba ngwenyi: “Nakusa mashimbu hanga ngupukune ha yuma yipema yize akwetu akutulingila hamwe ni asoko jami. Yami nakusakwilila ha yize o akutulingilila. Nakulongesa nawa mwanami wa miaka 8 hanga apwe ni kusakwilila ha yeswe yize akumwaha.”

Eseka kulinga chino: Tangwa ha tangwa, soneka yuma yize unazange kusakwilila. Muhasa kusakwilila mumu lia kupwa ni mujimba upema, usoko upema, masepa amwenemwene chipwe lume mumu lia kutetama cha kakweji.

‘Mbunge ya chiseke yapwa ngwe chiwanyino chize kuchishi kuhwa.’—Yishima 15:15.

Ha mashimbu amwe, chakupwa chikalu kuli yetu eswe kuwahilila ni yuma yize tuli nayo. Alioze, nyi twasa tachi hanga tuwahilile ni yuma yacho, tachi jetu kujichi kulitokela. Muze twakuwahilila ni yize tuli nayo, twakupwa nawa ni chiseke; chitanga chize falanga kujichi kuhasa kulanda.