Kuchi Mutuhasa Kusopa Milonga Hakutwala ku Mingoso

Ha mukanda 1 A-Korindu 6:1-8, postolo Paulu kahanjikile hakutwala ku usopeso hakachi ka akwa-Kristu. Aye kevwile yinyengo yinji hakunyingika ngwo, amwe akwa-Kristu mu mbonge ya Korindu ‘kahamukine kuya ni kusopa kumeso ja yihenge.’ (Versu 1) Postolo Paulu kahanyine chikuma chilemu cha mumu liaka akwa-Kristu atamba kusopela milonga yo mu chikungulwila chakuhona kuya kuli ngaji. Tutalenu yikuma yimwe ya mumu liaka iye ahanyine chiyulo chacho, mba tuhengwole yikuma yikwo yize kuyishi pundu mu chiyulo chacho.

Nyi twapwa ni umwe kapalia ni ndumbwetu mu chikungulwila hakutwala ku mingoso, chitangu twatamba kusopa milonga kulita ni nyonga lia Yehova, hi kulita ni nyonga lietu ko. (Yishima 14:12) Yesu kambile ngwenyi, chili chilemu kusopa kawashi-washi mulonga, mumu nyi washimbula chinji muuhasa kwoka. (Mateu 5:23-26) Chipwe chocho, akwa-Kristu amwe kapwile akwa-mbwanja, nawa te kakutwala milonga yo ku chipatwilo cha usopeso. Postolo Paulu yamba ngwenyi: “Pundu, hinwalilelesa yenwene, ha kulitwala umwe ni mukwo kuli ngaji.” Mumu liaka Paulu ambile chocho? Mumu kutwala umwe ndumbu kuli ngaji chili kupihisa lufuma mupema wa chikungulwila ni wa Zambi yoze twakufuliela. Kashika twatamba kupukuna ha chihula chilemu cha postolo Paulu chize ahulile ngwenyi: “Kuchi te kunwaatayijile akanwehe mulonga?”—Versu 7.

Postolo Paulu kaalwezele ngwenyi, Zambi hanatwehe chikungulwila ngwe jila yimwe yipema yakusopelamo milonga. Makulwana amu chikungulwila kali atu waze hanapu ni mana ha kunyingika umwenemwene wa mu Mbimbiliya, Postolo Paulu kambile ngwenyi, ayo kali ni uhashi ‘wakupatwila akwa-Kristu waze ali ni milonga’ ku “yuma ya kutwala ku mwono uno.” (Versu 3-5) Yesu kasolwele ngwenyi ha kusopa milonga ngwe, saki ni kalimbalimba, twatamba kukaula usongwelo utatu. Utangu: kweseka kuhanjika ni mutu wacho ukawetu wika. Wamuchaali; nyi kutwahashile, mutuyako ni chela umuwika hanji aali. Wamuchitatu; nyi kutwahashilemo, mba mututwala mulonga wacho kuli makulwana a mu chikungulwila.​—Mateu 18:15-17.

Chino kuchalumbunukine ngwo, makulwana kali ngaji hanji akwa-mingoso, nawa katambile kupwa chocho. Ayo keshi kukwachila mandumbu jo yiyulo hakutwala ku yikuma ya mingoso. Shimbu alinge chocho, ayo kakufupa kukwasa eswe ha kukaula shimbi ja mu Mbimbiliya hanga mandumbu jo alivwashane kanawa. Mba, nyi kutala ngwe mulonga wacho uli ukalu chinji, muchipema kuhanjika ni kalayi wa mbonge hanji ku mutango wa Yela ja Yehova. Alioze kuli yuma yikwo yize kuyishi kutwaha uhashi wa kukaula chiyulo cha postolo Paulu. Yuma yika yenayo?

Ha mashimbu amwe, muchifupiwa kuya kuli sopi a nguvulu hanga mutu asope chimwe chikuma chize chakufupiwa ngaji, chize kuchishi yitanga ya ufwatulo ni kuzo. Chakutalilaho, ngwe kulinga mikanda ya kulilakula, kusala ni ana ha kulilakula, ukwaso wa kulanda mazalo ni kulia, kutambula mbongo muze makuchiza ku mulimo, kutambula mbongo ku banco, hanji kutambula yikumba ya chisemi muze mafwa. Mukuhasa kusoloka nawa yuma yize ndumbu mahasa kutwala mulonga kuli ngaji.a

Nyi mutu mafupa ukwaso kuli nguvulu ni sambukila yeswe, ha chino iye kota kaso kulimika ni usongwelo uze Paulu ahanyine.b Alioze, chuma chitangu chize mukwa-Kristu atamba kusela shindakenyo, chili kupwisa jina lia Yehova lisandu ni kuneha sambukila ni kulinunga mu chikungulwila. Zango che chuma chitangu chakusolola tumbaji a Kristu, nawa “zango . . . kulishi kufupa yuma yalio-liene.”​—1 A-Korindu 13:4, 5; Yoano 13:34, 35.