Yela ja Yehova angahi yena unanyingika? Amwe akuli yetwe tuli enyembo je, akwo wakukalakala no, akwo hanji wakulilongesa no ku shikola. Hanji tunalilulieka hanga twambujole sango ja mu Mbimbiliya kuli yena. Yetwe tuli aya? Mumu liaka twakwambujola ufulielo wetu kuli akwetu?

Yetwe tuli ngwe atu eswao. Yetwe tuli a ku mavungu eswe, ni ku minyachi yeswe, ni ku malimi eswe. Amwe a kuli yetwe te twakulembela ku mangelaja eka ni eka, akwo te keshi kufuliela Zambi. Muze te kanda tuchipwa Yela ja Yehova, yetwe eswe te twakusa tachi tangwa ha tangwa hanga tuhengwole kanawa yisoneko ya Mbimbiliya. (Yilinga 17: 11) Yetwe twakutayiza yize tunalilongesa mu Mbimbiliya, kashika mutu ni mutu kanasakula iye mwene kuwayila Yehova Zambi.

Yetwe twakuyuka ha kulilongesa Mbimbiliya. Chizechene ngwe atu eswao, ni yetwe tunapinji ni kapalia ni milonga yeka ni yeka. Tachi jize twakusa hanga twononokene shimbi ja mu Mbimbiliya matangwa eswe, jinatwehe uwahililo ku mwono wetu. (Masamu 128:1, 2) Kashika twakwambujola kuli akwetu yuma yipema ize tunalilongesa mu Mbimbiliya.

Twatwama nyikulita ni shimbi ja Zambi. Shimbi jino ja mu Mbimbiliya, jinatukwasa kupwa ni vumbi kuli akwetu, kutwama kanawa, jinatupwisa nawa ni ndako ja mbunge yipema ni ululi. Shimbi ja Mbimbiliya jinakwase atu anji kupwa angunu ni kutwama kanawa mu yihunda yo, jinanungisa nawa asoko hanga apwe ni ndako jipema. Tunatayiza pundu ngwo “Zambi keshi katonde,” yetwe tuli mandumbu a muspiritu a hashi heswe, tushi kupwa ni katonde chipwe chipululu hanji kole kuli mandumbu a yifuchi yeka ni yeka. Chipwe ngwe tuli atu eswao, hindu tunalisa ni atu akwo ha yitanga.​—Yilinga 4:13, 10:34, 35.

• Yika Yela ja Yehova alinayo ngwe atu eswao?

• Shimbi jika Yela ja Yehova alinajo ha kulilongesa Mbimbiliya?

Atu anji akunyonga ngwe Yela ja Yehova lili jina lia ingeleja yaha. Alioze, ha kupalika cha miaka ya 2.700, tuvumbi a Zambi umuwika wamwenemwene, te kakwavuluka ngwo, “Yela” jenyi. (Izaia 43:10-12) Chize ha mwaka wa 1931, yetwe te kanatunyingika ni jina lia Akwa kulilongesa Mbimbiliya. Mumu liaka tuli ni jina Yela ja Yehova?

Ali jina lie linatunyingikisa Zambi yetu. Nyi twatala mu yisoneko yitangu, jina lia Zambi, Yehova, linasolokamo mu wunji wa tununu a tununu mu Mbimbiliya. Mu Mbimbiliya jinji jina liacho hanalichizamo hanasalakanyisamo jina lieka, ngwe Mwene hanji Zambi. Alioze Zambi wamwenemwene kanakalisolola iye mwene kuli Mose, ni jina lia Yehova, ngwenyi: “Lino lie jina liami ndo ku miaka ya mutolo.” (Kutuhuka 3:15) Jina lino, lie linamuhandununa ni tuzambi akwo amahuza. Yetwe tunawahilila chinji kupwa ni jina lisandu lia Zambi.

Jina lino lie linalumbununa milimo yetu. Ku mashimbu a shakulu, yimwe mbunga ya atu chize kuli Abele mutu mukwa ululi, ayo kanakasolola ushindakenyo wa ufulielo wo kuli Yehova. Kulutwe lia matangwa yikwiza nawa Noe, ni Apalahama, ni Sara, ni Mose, ni Ndawichi, ni mbunga yikwo yinene “ya yela.” (A-Hepreu 11:4-12:1) Ngwe chize umwe mutu mahasa kupwa chela mu upatwilo hali mutu yoze keshi chitela, ni yetwe tunahamuka ni kunyingikisa umwenemwene wa Zambi yetu.

Yetwe tunembulula Yesu. Mbimbiliya yinamuvuluka ngwo “chela wamwenemwene keshi mahuza.” (Usolwelo 3:14) Yesu kanakamba ngwenyi, ‘nakusolola jina lia Zambi’ ni ‘kushindakenya ha umwenemwene’ wa Zambi. (Yoano 17:26; 18:37) Tumbaji aumwenemwene a Kristu noo ndo chaatamba kwambujola jina lia Yehova ni kulisolola kuli atu. Yenayo Yela ja Yehova analinga tangwa ha tangwa.

• Mumu liaka akwa kulilongesa Mbimbiliya anaavuluka ngwo Yela ja Yehova?

• Ha mashimbu aka Yehova anakaputuka kupwa ni yela hano hashi?

• Chela munene wa Yehova iya?

Mbimbiliya te hiyinambe ngwo ha kufwa cha Kristu, amwe alongeshi amahuza makeza hakachi ka Akwa Kristu atangu ni kwalumuna umwenemwene wa mu Mbimbiliya. (Yilinga 20:29, 30) Che chapwile kulutwe lia matangwa. Ayo yachinga malongeso ja Yesu ni manyonga ja mangeleja akutomba kuli atu, nawa yokesa Ukristu wa mahuza. (2 Timoteu 4:3, 4) Kuchi mutupwa ni ushindakenyo matangwa wano ngwo tuli ni chinyingi cha ize Mbimbiliya yinalongesa?

Mwaka wa Yehova hiwaheta hanga asolole umwenemwene. Iye hanambe ngwenyi, ‘ku mwaka wa kusongo, yinyingi muyikaliwezela.’ (Daniele 12:4) Ha mwaka wa 1870, chimwe chizavu chikehe cha atu te kanafupu umwenemwene, yanyingika ngwo mu mangeleja anji malongeso jamo keshi kulita ni Mbimbiliya. Kashika, ayo yaputuka kuhengula chishina cha malongeso amu Mbimbiliya, Yehova yaawahisa ni malinjekela aspiritu.

Atu angunu kanalilongesa Mbimbiliya ni ushindakenyo. Ashakulu jetu, Akwa Kulilongesa Mbimbiliya angunu, te kakulilongesa ngwe chizechene ni yetwe tunalilongesa musono. Ayo te kakuhengula chikuma ni chikuma mu Mbimbiliya. Muze te akuwana chimwe chihanda cha Mbimbiliya chize chinakaliwa kunyingika, ayo te kakutala mu yihanda ya sali likwo lia Mbimbiliya hanga yihanda yikwo yilumbunuke. Muze eswe maheta ha chiyulo chimuwika chize chinalita ni yihanda yeswe ya mu Mbimbiliya, mba mayisoneka. Ha kwecha Mbimbiliya yililumbunune yene, ayo yawana umwenemwene wa jina lia Zambi, ni wa Wanangana wenyi, ni upale wa Zambi hali atu ni hashi, ni kupwa cha afu, nawa ni kutalatala cha uhindukilo. Kuhengula cho chinakaatusula ku ufulielo wa mahuza ni ku yitanga yipi.​—Yoano 8:31, 32.

Ha mwaka wa 1879, Akwa Kulilongesa Mbimbiliya yanyingika ngwo mwaka wa kunyingikisa umwenemwene hiwaheta. Kashika ha mwaka uzewene, ayo yaputuka kulinga mukanda uze twakuhana ndo musono, Kaposhi wa Kalayi Wakwambujola Wanangana wa Yehova (A Sentinela Anunciando o Reino de Jeová). Musono yetwe tunambujola umwenemwene wa mu Mbimbiliya kuli atu mu wunji wa, 240 a yifuchi ni 750 a malimi. Nilimwe tangwa chinyingi cha umwenemwene chokele chize ngwe musono!

• Ha kufwa cha Kristu, umwenemwene wa Mbimbiliya kuchi unakapwa?

• Yika yinakatukwasa mba tuwane umwenemwene wa mu Mbimbiliya?

Ha miaka yinji, Yela ja Yehova te kakulilongesa ni kufambwisa ni kuhana Mbimbiliya jeka ni jeka. Kashika, yetwe tunakanyonga ngwo chatamba kulinga yimwe Mbimbiliya ya ulumbunwiso waha, uze washi kukwasa nawo atu hanga alilongese “chinyingi cha umwenemwene,” mumu Zambi che anazange kuli atu eswe. (1 Timoteu 2:3, 4) Kashika ha mwaka wa 1950, yetwe yituputuka kutuhwisa yihanda ya Mbimbiliya ya mu malimi aha, Tradução do Novo Mundo. Mbimbiliya yino kanakayilumbununa ni kushishika ni ushindakenyo weswe mu kuhianyisa wunji wa 100 a malimi.

Te chinatela yimwe Mbimbiliya yashi ni kuyinyingika. Ha kupalika cha miaka malimi kanalumuka, Mbimbiliya jikwo maliji jamo hanapu akulu hanji kanakaliwa ni kwanyingika. Nawa yisoneko yinji yikulu ya ushindakenyo ize yili hakamwihi ni yitangu awanyine ye yinatwehe ulumbunwiso upema wa mu Mbimbiliya mu malimi a Hepreu, ni Aramaika, ni Gregu.

Te chinatela umwe ulumbunwiso uze unashishika mu liji lia Zambi. Akwa kulumbununa Mbimbiliya ndo ashishike ha yisoneko yitangu ya kuhwima kuli Zambi, chaatambile kusalakanyisa manyonga jo. Mbimbiliya jinji jina lisandu lia Zambi, Yehova, hanalichizamo.

Te chinatela Mbimbiliya yifumanyise Mwenyayo. (2 Samuele 23:2) Mu Tradução do Novo Mundo nemo jina lia Yehova mulili ngwe chize tunawane mu yisoneko yitangu ya Mbimbiliya, linasolokamo mu wunji wa 7.000, tala nawa chilweza cha kachivungu kaze kali mwishi. (Masamu 83:18) Mbimbiliya yino yinakalinga miaka yinji ha kuyihengwola, yili yipema ha kuyitanga, nawa yakulumbununa kanawa manyonga ja Zambi. Nyi uli ni Tradução do Novo Mundo mu limi lie, chipwe ka, tunete kuli yena hanga utange Liji lia Yehova tangwa ha tangwa.​—Yoshua 1:8; Masamu 1:2, 3.

• Mumu liaka twanyongene ngwo ndo kulinga yimwe Mbimbiliya ya ulumbunwiso waha?

• Yika chatamba kulinga ni unazange kunyingika upale wa Zambi?