Kushimutwina cha Kasula ni Waze Mapapachisa

Kanji-kanji upapachiso wakulingiwa ha kukunguluka cha mbonge ni cha mambonge cha Yela ja Yehova. Ha kuhwa cha pande ja upapachiso, mukwa-kuhanjika pande kakwita waze mapapachisa hanga amane ni kukumbulula yihula yino yaali ni liji linene:

1. Nwalikonyeka ku shili yenu ni kulihana kuli Yehova ni kutayiza ngwenu, makanulamwina kupalikila muli Yesu Kristu, nyi?

2. Shina nunanyingika ngwenu, upapachiso wenu muunupwisa Yela ja Yehova mu ululikiso wenyi?

Ha kukumbulula yihula yino, muchisolola ngwo waze mapapachisa ‘kanatayiza kumeso ja mbunga’ ufulielo wo ha ukuule ni kusolola ngwo kalihana kuli Yehova. (Roma 10:9, 10) Kashika waze mapapachisa katamba kunyonga ni kulemba hakutwala ku yihula yino mba ahase kukumbulula kulita ni ufulielo wo.

Shina hiwalihana kuli Yehova ha kulemba kuli iye ni kumulakenya ngwe, muwayila wika iye ni kusa upale wenyi kulutwe lia yuma yeswe ku mwono we?

Shina uli ni shindakenyo ngwe hiwalilulieka hanga akupapachise?

Kuchi mutu atamba kuzala muze anamupapachisa? (1 Timo. 2:9, 10; Yoa. 15:19; Fwili. 1:10)

Waze mapapachisa katamba kuzala “mazalo waze analite,” hanga asolole ‘uwayilo wo kuli Zambi.’ Kashika, waze mapapachisa katambile kuzala mazalo a kusana no waze keshi kusolola vumbi kuli atu. Katamba kuzala mazalo waze analite ni shimbu lia upapachiso.

Yitanga yika mutu atamba kusolola muze anamupapachisa? (Luka 3:21, 22)

Upapachiso wa Yesu uli chilweza ha upapachiso wa akwa-Kristu musono. Iye kanyingikine ngwenyi, upapachiso uli chuma chilemu nawa kachisolwele ku manyonga ni ku yitanga yenyi. Kashika, ha chihela cha upapachiso katambile kusanyinaho, ni kuhehelaho hanji kulingilaho yuma yikwo yize muyipihisa ulemu wa shimbu liacho. Kuchishi kupema mutu muze hamupapachisa, alisambesambe ngwe yoze wakumba yimwe. Chipwe ngwe upapachiso uli shimbu lia chiseke, nihindu chiseke chacho katamba kuchisolola mu mulali walita.

Kuchi kulikungulula ni mandumbu mu chikungulwila muchikukwasa kutwama kulita ni chilakenyo che kuli Yehova?

Chipwe muze hakupapachisa, mumu liaka chili chilemu kununga ni katalilo mupema wa longeso lie lia wika ni kwambujola mashimbu eswe?

USONGWELO KULI MAKULWANA A MU CHIKUNGULWILA

Nyi mukwa-kwambujola yoze kanda achipapachisa malweza makulwana ngwenyi, kanazange amupapachise, nwatamba kumukwolweza hanga ahituluke mu “Yihula ya Waze Anazange Hanga Apapachise,” yize yili ha mafwo 185-207 mu mukanda uno. Mulwezenu hanga atange, “Sango Kuli Mukwa-Kwambujola Yoze Kanda Achipapachisa” jize jinaputukila ha lifwo 182, jinalumbununa chize mahasa kulilulieka hanga akashimutwine ni makulwana. Kulita ni sango jacho, yoze unazange hanga amupapachise, mahasa kuzachisa yize asonekanga ha papilo hanji kwazulula mukanda uno muze anashimutwina ni makulwana. Alioze, kafupiwile kushimutwina yihula yacho ni mutu mweka shimbu kanda achiliwana ni makulwana.

Muze umwe mafupa hanga amupapachise, katamba kulweza kasongo wa chizavu cha makulwana. Nyi mutu wacho kahituluka mu “Yihula ya Waze Anazange Hanga Apapachise,” kasongo wa chizavu cha makulwana mamuhula nyi halianga kulihana kuli Yehova ha kulemba kuli iye hanga alinge upale wenyi. Nyi matayiza ngwenyi halihana, kasongo wa chizavu cha makulwana masakula makulwana aali waze mashimutwina nenyi “Yihula ya Waze Anazange Hanga Apapachise.” Katamba kusakula makulwana alisa ha hita chihanda. Chino munuhasa kuchilinga shimbu kanda nuchitambula lusango wa kukunguluka cha mbonge hanji cha mambonge.

Ha yihanda yino yaali, hita chihanda muchihasa kumbata ola yimuwika, alioze kukushi shimbi yize yinakanjisa kupalikisa amwe mashimbu nyi muchilita. Hita chihanda chatamba kuputuka ni kulemba ni kuhwisa ni kulemba. Chipwe yoze mapapachisa chipwe makulwana katambile kushimutwina yihula yino kawashi-washi. Makulwana waze asakula katamba kulinga katalilo hanga ase mulimo wacho kulutwe.

Kanji-kanji atu waze mapapachisa katambile kwachinga hamuwika ha kushimutwina no yihula, alioze mutu ni mutu katamba kushimutwina nenyi kwa ukawenyi. Muze yoze mapapachisa makumbulula yihula yeswe, makulwana mahasa kunyingika ha yize ashimutwina nenyi nyi kanajame ni kumupapachisa nyi ka. Chikwo nawa, kushimutwina ni hita mutu kwa ukawenyi muchimukwasa alivwe kanawa muze anahanjika. Waze alimbata munuhasa kushimutwina no yihula yacho hamuwika.

Nyi yoze unafupu hanga amupapachise kali ndumbu wa pwo, mukulwana katamba kushimutwina nenyi ha chihela chize atu akwo mahasa kwamona. Alioze atu jacho katambile kwivwa yize ayo anashimutwina. Nyi munuzanga nupwe ni mutu mukwo, mutu wacho ndo apwe mukulwana hanji kavumbi, kulita ni chihanda munushimutwina, ngwe chize analumbununa ha paragrafu muyihataho.

Yikungulwila yize yili ni makulwana akehe, tuvumbi ajama nawa ashishika mahasa kushimutwina ni mutu yoze unafupu hanga amupapachise yihula ya “Chihanda 1: Yize Akwa-Kristu Akufuliela.” Makulwana wika e atamba kushimutwina ni mutu “Chihanda 2: Mwono wa Akwa-Kristu.” Nyi mu chikungulwila chenu kumushi makulwana ni tuvumbi anji, hulenu kalayi wa mbonge hanga amone nyi chikungulwila chili hakamwihi muchihasa kunukwasa.

Nyi yoze unafupu hanga amupapachise uchili kanuke, yisemi jenyi akwa-Kristu (hanji umwe wa kuli ayo) katamba kupwaho muze anashimutwina nenyi yihula ya upapachiso. Nyi yisemi kahashile kupwaho, makulwana aali (hanji mukulwana ni kavumbi, kulita ni chihanda chize mashimutwina) katamba kupwa ha hita chihanda.

Makulwana katamba kupwa ni shindakenyo ngwo yoze mapapachisa kali ni chinyingi chalita hakutwala ku malongeso a mu Mbimbiliya. Makulwana katamba nawa kusa shindakenyo ngwo, yoze mapapachisa kakuzanga chinji umwenemwene ni kusolola vumbi ha ululikiso wa Yehova. Nyi mutu kanyingikine kanawa malongeso a mu Mbimbiliya, makulwana malulieka jila yakumukwashilamo hanga ajame mba akamupapachise ha shimbu lieka. Akwo katela kupalikisa amwe mashimbu hanga akalakale chinji mu mulimo wa kwambujola sango lipema ni kuzeyela ku shimbi ja ululikiso wetu. Makulwana katamba kutesa kanawa shimbu ha kushimutwina hita chihanda, ha kuzachisa ola yimuwika ni minutu yize mazanga, mba apwe ni shindakenyo ngwo yoze unafupu hanga amupapachise kanatela kulinga chuma chino chilemu. Chipwe ngwe mashimbula ha yihula yimwe kuhiana yikwo, alioze katamba kushimutwina yihula yeswe.

Makulwana waze mashimutwina yihula ni yoze unafupu hanga amupapachise, muze mahwisa chihanda chamuchiali, katamba kuliwana hanga amone nyi mamupapachisa nyi ka. Makulwana katamba kunyonga ha uhashi wa hita mutu yoze unafupu hanga amupapachise, yize mahasa kulinga ni yize kechi kuhasa kulinga ni ha yuma yikwo nawa. Atu tunafupu ndo waze akusa tachi hanga azange Yehova ni kunyingika kanawa umwenemwene wa mu Mbimbiliya. Kashika, mutuhasa kukwasa waze mapapachisa alilulieke hanga alinge mulimo ulemu uze tuli nawo wa kwambujola sango lipema.

Muze makulwana mahwisa kushimutwina, umwe wa kuli ayo hanji eswe aali, katamba kuliwana ni mutu wacho hanga amulweze nyi makamupapachisa nyi ka. Nyi kanatela kumupapachisa, makulwana katamba kushimutwina nenyi chikuma, “Kushimutwina cha Kasula ni Waze Mapapachisa,” chize chili ha mafwo 206-207. Nyi yoze unafupu hanga amupapachise kanda ahwisa mukanda Wahilila ku Mwono ku Miaka Yeswe!, makulwana katamba kumukolweza hanga anunge ni kulilongesa chipwe ngwe hamupapachisa. Lwezenu yoze unafupu hanga amupapachise ngwenu tangwa lia upapachiso wenyi makalisoneka ha mukanda wenyi wa Mukwa-kwambujola mu Chikungulwila. Mwiwululenu ngwenu makulwana kakwita sango jacho kuli hita mukwa-kwambujola hanga ululikiso wetu uhase kulinga mulimo uze yetu Yela ja Yehova twakulinga hashi heswe. Sango jacho jakukwasa nawa makulwana amone milimo yize mukwa-kwambujola mahasa kulinga ni chize mahasa kumukwasa ku ufulielo. Chikwo nawa, makulwana mahasa kwiwulula akwa-kwambujola aha ngwo sango ja hita mutu kakukalakala najo kulita ni Shimbi ja Kufunga Sango ja Mutu jize jili ha site ya Yela ja Yehova jw.org. Kushimutwina chino kanji-kanji chatamba kumbata minutu kumi hanji mushi.

Muze mukwa-kwambujola malinga mwaka umuwika hanyima lia kumupapachisa, makulwana aali katamba kuliwana nenyi amukwase ni kumukolweza. Umwe wa kuli makulwana jacho, katamba kupwa kalayi wa chizavu chize mukwa-kwambujola wacho atwama. Nyi mukwa-kwambujola wacho kali kanuke, yisemi jenyi Yela ja Yehova (hanji umwe wa kuli ayo) katamba kupwa ha kuliwana chacho. Muze munuliwana nenyi, nwatamba kumusolwela zango ni kumukolweza. Makulwana mashimutwina ha kusenya chenyi kulutwe ni kumukolweza hanga anunge ni longeso lienyi lia wika, kutanga Mbimbiliya hita tangwa, kulinga uwayilo wa mu usoko hita poso, kuya ku kukunguluka, kuhana makumbululo ni kwambujola ha poso jeswe. (Efwe. 5:15, 16) Nyi kanda achihwisa mukanda Wahilila ku Mwono ku Miaka Yeswe!, makulwana katamba kusakula ndumbu yoze malilongesa nenyi mikanda yacho. Makulwana katamba kumusolwela zango ni kumuchichimieka. Munuhasa kumukwasa ha chikuma chimuwika hanji yaali wika.