MALONGESO A CHIFUKILO | SHINA KULEMBA CHIKWETE ULEMU NYI?
Mumu Liaka Atu Akulemba?
Ami te natwama ngwe hanangutakwila ku yiheho ya batota. Nalembele hanga ngupwe ni upite. Alioze chino kuchakalingiwile.”—Samuel,a Kenya.
“Ku shikola muze te twakuheta ku longeso lia ulembelo, chuma te twakulinga wika kwiwuluka maliji akulemba waze te akutulongesa.”—Teresa, Filipinas.
“Ami nakulemba ni nguli ni milonga. Nakulemba ha mukunda wa shili yize nakulinga nawa hanga ngupwe mukwa-Kristu mupema.”—Magdalene, Gana.
Maliji a Samuel, Teresa, ni Magdalene kanasolola ngwo atu kakulemba hakutwala ku yikuma yeka ni yeka, amwe ni nyonga lipema akwo ka. Yilemba ya atu akwo yili yamwenemwene; ya amwe kuyishi ni ulemu niumwe. Ha chino, chipwe ngwe atu kakulemba hanga apalike ku yeseko ku shikola, hanji kakulemba hanga yizavu yo ya konda yikumbe, hanga Zambi asongwele mu usoko, chipwe hakutwala ku yuma yeka ni yeka, atu anji kakuzanga kulemba. Kwamba umwenemwene, kuhengula cha akwa-mana chinasolola ngwo chipwe ngwe amwe atu keshi ni ulembelo niumwe, alioze nihindu kakulemba mashimbu eswe.
Shina yena wakulemba? Nyi wakulemba, ha yuma yika yena wakulemba? Chipwe ukwete ndako ya kulemba chipwe ka, kota muhasa kulihula chino: ‘Shina kulemba chakukwasa ko kama nyi? Shina umwe mutu wakwivwa kulemba? Umwe mukwa-kusoneka yamba ngwenyi kulemba chili ngwe “uwukiso . . . ngwe kuhanjika ni yishi yoze uli mu chitende.” Amwe mandotolo no kali ni nyonga lioliene, ayo kakwamba ngwo kulemba chili ‘jila yikwo ya kuliwukilamo,’ Kutala atu waze akulemba, shina kakulemba chakamokomoko nyi kakuwanakako umwe uwukiso?
Alioze, Mbimbiliya yinasolola ngwo kulemba chili ni ulemu unji, hi chuma cha uwukiso wika ko. Yinambe ngwo kuli umwe yoze wakwivwa kulemba chize chalita ni upale wenyi. Shina chino chili chambwende nyi? Tutalenu yimwe yilweza ya ushindakenyo
a Amwe majina kaalumuna.