Nunga ni Kulemba Hanga Uzuke Yiwape ya Zambi

Zambi kahanyine chawana chipema kuli atu, uhashi wakuhanjika nenyi ni kumulweza chize anevu kupalikila mu yilemba. Profeta Ndawichi yalemba ngwenyi: “Yena wakwivwa kulemba, kuli yena akwa musunya eswe meza.” (Samu 65:2) Kuchi mutuhasa kulemba mba Zambi atwivwe ni kutuwahisa?

LEMBA NI MBUNGE YESWE HAMWE NI KULIKEHESA

Kulemba chakutukwasa ‘kuzukula mbunge jetu kuli [Zambi]’ hanga tumulweze chize tunevu ku mbunge. (Samu 62:8) Zambi Mukwa-Ndundo-Jeswe, kakuzanga kwivwa yilemba yize atu akulinga ni mbunge yeswe.

MUZE UNALEMBE VULUKA ZAMBI HA JINA LIENYI

Chipwe ngwe Zambi kali ni yisanyiko yinji, nihindu iye kali ni jina limuwika. Mbimbiliya yinambe ngwo: “Yami Yehova. Lie jina liami lienalio.” (Izaia 42:8) Jina Yehova liakusoloka mu Mbimbiliya mu unji wa yisuho kuhiana 7,000. Aprofeta anji kahanjikile ni Zambi ha kuzachisa jina lienyi, Yehova. Apalahama yamba ngwenyi: “Yehova, lisesa, . . . ngweche kama nguhanjike ne.” (Uputukilo 18:30, NM.) Muze tunalembe, ni yetu twatamba kuzachisa jina lia Zambi, Yehova.

LEMBA MU LIMI LIE

Zambi kananyingika manyonga jetu ni chize twakwivwa chipwe ngwe, twakuhanjika limi lieswalio. Liji lia Zambi linambe ngwo: “Chamwenemwene ngunamono Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.”—Yilinga 10:34, 35.

Alioze, mba tuzuke yiwape ya Zambi, twatamba kulinga yuma yinji hi wika ko kulemba. Ha mitwe yize muyisulaho, mutushimutwina yize twatamba kulinga.