Yiwape Kuli Waze Akwononokena Zambi

Profeta Mose kambile ngwenyi, nyi twononokena shimbi ja Zambi, mututambula yiwape yenyi. (Shimbi Yamuchiali 10:13; 11:27) Twakwononokena Zambi mumu twakumuzanga, hi mumu lia woma ko ngwo matuzangamisa. Chikwo nawa, yitanga yipema ya Zambi yakututwala hanga tumwononokene ni kwehuka kulinga yize muyimuvwisa chinyengo. Mbimbiliya yinambe ngwo: “Lino lie zango lia Zambi ngwo, Tukafunge shimbi jenyi.”—1 Yoano 5:3.

Kuchi kwononokena Zambi muchihasa kutuyukisa? Tushimutwinenu majila aali.

1. NYI TWONONOKENA ZAMBI MUTUPWA NI MANA

“Yami Yehova nguli Zambi yenu, yoze wakunulongesa hanga nukalumbunuke, yoze wakunusongwela mu jila yize chanutamba kuya.” —IZAIA 48:17.

Yehova Zambi, Sakatanga yetu, kanatunyingika kanawa nawa kakutwaha usongwelo uze tunafupiwa. Mba tukwate yiyulo ya mana, twatamba kulilongesa Mbimbiliya hanga tunyingike yize Zambi anazange tulinge ni kukaula yize tunalilongesa ku mwono wetu.

2. KWONONOKA CHAKUTWAHA UWAHILILO

“Kawaha waze akwivwa liji lia Zambi nikulifunga.”—LUKA 11:28.

Musono, tununu twa atu kanawahilila mumu kakwononokena Liji lia Zambi. Chakutalilaho, tutalenu chilweza cha umwe lunga mu Espanha yoze te wakulivutula ni kawashi nawa te keshi kutwama kanawa ni akwo, chipwe ni mukwo-pwo. Limwe tangwa, yatanga mukanda uze asonekene profeta Mose hakutwala ku kupwa cha Yosefwe, mwana wa Yakomba. Yosefwe kamulanjishile mu undungo, hanyima yamusa mu zuwo lia ususu chakuhona chitela. Chipwe chocho, iye yanunga ni kusolola umbovu, sambukila ni kukonekena atu waze amulingile upi. (Uputukilo 37-45) Lunga wacho yamba ngwenyi: “Kunyonga ha chilweza cha Yosefwe changukwashile kupwa chimbovu, mukwa-keke nawa mukwa-kulihumikiza. Haliapwila, nguli ni uwahililo ku mwono wami.”

Mbimbiliya yakutwaha usongwelo wa chize twatamba kutwama ni akwetu. Yino ye mutushimutwina ha mutwe uze musulaho.