KUCHI MUTUHASA KUKUMBA KOLE?

4 | Muhasa Kukumba Kole Ni Ukwaso Wa Zambi

Yize Mbimbiliya yakulongesa:

“Mihuko ya Spiritu, zango, ni uwahililo, ni sambukila, ni kulihumikiza, ni utu, ni upeme, ni kushishika, ni kushimbika, ni kusuula. Kulimika ni yuma ngwe yino shimbi yakuhi niyimwe.”—A-NGALASHIA 5:22, 23.

Yize Chisoneko Chino Chinalumbunuka:

Yetu mutuhasa wika kukumba kole ni ukwaso wa Zambi. Spiritu yisandu muyihasa kutukwasa kupwa ni yitanga yize kutuchi kuhasa kupwa nayo ku tachi ja yetwene. Kashika shimbu tweseke kukumba kole ku tachi ja yetwene, muchipema chinji nyi mutwita ukwaso wa Zambi. Nyi twalinga chino mutupwa ni shindakenyo ngwe yize apwile nayo postolo Paulu yoze wasonekene ngwenyi: “Kunahasa kulinga yuma yeswe muli yoze wakunguhashisa.” (A-Fwilipu 4:13) Chikwo nawa mutuhasa kwamba ngwetu: “Kakungukwasa kuli Yehova.”—Samu 121:2.

Yize Muhasa Kulinga:

“Yehova hanalumuna ndako jami, napwile chitenu musono hinapwa mutu wa sambukila.”—WALDO

Lemba kuli Yehova ni kumwita ni mbunge yeswe hanga akwehe spiritu yenyi yisandu. (Luka 11:13) Mwite hanga akukwase kupwa ni yitanga yipema. Lilongese yize Mbimbiliya yinambe hakutwala ku yitanga yize muyikukwasa kwehuka kole, ngwe zango, sambukila, uhomboloji ni uhumikizo. Fupa jila yakupwilamo ni yitanga yino ku mwono we. Likate ni atu waze anase tachi hanga apwe ni yitanga yino. Atu jacho mahasa kukukwasa “kulikasumuna ku zango ni yitanga yipema.” —A-Hepreu 10:24.

Sango ja ku Mwono—WALDO

Kakumbile Kole

Waldo muze te anakola iye kapwile ni mwono ukalu chinji, uze wa mupwishile mukwa-kole. Iye yamba ngwenyi: “Mashimbu eswe napwile ni kulilamba ni akwetu ni kulanda ni kulanjisa makanya asasu . . . tangwa limwe chimwe chizavu chize te nakulimika nacho yichifweta umwe lunga hanga angushihe alioze yinguhasa kuchina ni mwono, kangulemekene wika.”

Waldo kanakapihilila chinji muze mukwo-pwo aputukile kulilongesa Mbimbiliya ni Yela ja Yehova. Iye yamba ngwenyi: “Yami te kuchishi kuzanga Yela ja Yehova, nawa ha mashimbu anji te nakwatuka. Alioze ayo te kakungukumbulula ni vumbi hamwe ni zango.”

Ha kupalika cha mashimbu, Waldo neye yaputuka kulilongesa Mbimbiliya. Aye yamba ngwenyi: “Kuchakapwile chashi kukaula yuma yize te ngunalilongesa ku mwono wami. Napwile ni kunyonga ngwami, kuchishi kuhasa kwecha kupwa mukwa-kulivutula nawa chingalwe.” Alioze kuli chuma alilongesele mu Mbimbiliya, chize chalumwine manyonga jenyi.

Waldo yalumbununa ngwenyi: “Tangwa limwe Alejandro longeshi yami, yangwita hanga ngutange A-Ngalashia 5:22, 23. . . . Alejandro yangulweza ngwenyi, kuchishi kuhasa kupwa ni yitanga yino ku tachi jami mwene, alioze Zambi mangukwasa hanga ngupwe ni yitanga yacho. Chikuma chino chalumwine nyonga liami!”

Kujikijila ha ukwaso wa Zambi chakwashile Waldo kwecha kuvwila akwo kole. Iye yamba ngwenyi: “Asoko jami ni masepa kakukomoka chinji ha kumona chize nalumuna ndako jami.” Yamba nawa ngwenyi: “Yehova hanalumuna ndako jami, napwile chitenu musono hinapwa mutu wa sambukila.”