KUCHI MUTUHASA KUKUMBA KOLE

3 | Chiza Kole Mu Mbunge Ye

Yize Mbimbiliya yakulongesa:

“Alumukenu ku kupwisa chaha cha kunyonga chenu, hanga nukase chinyingi chize wapwa upale upema ni ungunu wa Zambi ni uze wamupemena.”—A-ROMA 12:2.

Yize Chisoneko chino Chinalumbunuka:

Yuma yize twakunyonga neyo yili yilemu kuli Zambi. (Jeremia 17:10) Tunanyingika ngwetu twatamba kwehuka kulinga hanji kuhanjika maliji a luchoko, alioze kuli nawa yuma yikwo yize twatamba kulinga. Kole yakuputukila mu manyonga ni mu mbunge. Kashika, twatamba kuchiza tumanyonga tweswe twa kole tuze mutuhasa kusoloka mu mbunge yetu. Nyi twalinga chocho, mutuhasa ‘kwalumuka’ ni kukumba kole.

Yize Muhasa Kulinga:

Lihengwole yena mwene ni kulikehesa cheswe hanga umone yize wakunyonga hali akwenu, chipi-chipi atu a ku munyachi hanji chifuchi cheka. Lihule ngwe: ‘Kuchi nakwamona? Shina yuma yize nakunyonga hali ayo yinakatuka ha yize ngunanyingika? Nyi hanji yinakatuka ha katonde?’ Kanda utanga hanji kutala sango, yinema hanji yiheho yize yakusolola kole ni ungulungulu.

Liji lia Zambi mulihasa kutukwasa kukumba kole mu mbunge ni mu manyonga

Hi chashi ko kuhengwola kanawa manyonga jetu ni chize twakwivwa. Alioze Liji lia Zambi mulihasa kutukwasa kusa “chinyingi ha manyonga ni kuhala cha mu mbunge.” (A-Hepreu 4:12) Kashika, nunga ni kuhengwola Mbimbiliya. Tesa yuma yize wakulilongesa ni yize wakunyonga, nawa sako tachi hanga ulinge yuma yize muyivwisa Zambi kuwaha. Liji lia Zambi mulihasa kutukwasa ‘kupupa’ kole yize yinalitanda mu manyonga ni mu mbunge yetu.—2 A-Korindu 10:4, 5.

Sango ja ku Mwono—STEPHEN

Kalumwine Manyonga Jenyi

Stephen ni asoko jenyi te keshi kuzanga atu yindele. Kashika, yalinjisa mu chimwe chizavu cha mafwefwe chize chapwile ni kukalila ulite wa atu. Ha kupalika cha mashimbu, mwene yaputuka kulinga yuma yize te yakusolola kole. Stephen yamba ngwenyi: “Ha mashimbu amwe, yami ni masepa jami twapwile ni kutala chinema chize te chakusolola lamba lize atu a mu Africa apwile ni kumona muze apwile tupinji mu Estados Unidos. Hachino te twakwivwa uli ni kuputuka kulamba akweze yindele. Chikwo nawa, te twakuya mu yihunda muze mwapwile atu yindele hanga twaalambe.”

Nyonga lia Stephen lialumukine muze aputukile kulilongesa Mbimbiliya ni Yela ja Yehova. Mwene kanewuluka ngwenyi: “Yuma yize namwene hakachi ka Yela ja Yehova yangukomwesene mumu te hinejilila kumona katonde yoze wakwiza ha kalisa ka yikowa. Chakutalilaho, muze umwe Chela chindele ayile wenyi, yahichika ana jenyi hanga aafunge kuli usoko wa chikowa chilaa. Chikwo nawa, amwe asoko yindele yatwala kuzuwo lio umwe mukweze wa chikowa chilaa yoze te unafupu chihela cha kutwama.” Hachino, Stephen yamona ngwenyi, Yela ja Yehova kali asoko waze akulizanga chinji. Kashika, chino yichimukwasa kumona ngwenyi, Yela ja Yehova kali atu waze Yesu aprofetezele ngwenyi, te kumasolola zango liamwenemwene.—Yoano 13:35.

Yika yakwashile Stephen kukumba kole? Chisoneko cha A-Roma 12:2 che chamukwashile. Iye yamba ngwenyi: “Namwene ngwami, te natamba kwalumuna nyonga liami. Chocho yingulitwamina ungalwe ni kupwa mutu wa sambukila, namwene ngwami, au we mwono uze natamba kumbata.” Musono Stephen kanawahilila ku mwono, nawa keshi kulipikala ni manyonga api hikwapalika miaka 40.