بە‌شی ٥
چۆن لە‌گە‌ڵ خزمە‌کانت ئاشتی بپارێزی
«میهرە‌بانی و نیانی و ڕۆح‌سووکی و دڵ‌نە‌رمی و ئارامگرتن لە‌بە‌ر بکە‌ن.»—کۆلۆسی ٣:١٢
هاوسە‌رگیری خێزانێکی نوێ پێک‌دێنێت. دیارە هە‌مو کاتێک دە‌بێ دایک و باوکت خۆشبوێ، بە‌ڵام ئێستا گرنگترین کە‌س بۆ تۆ لە‌سە‌ر زە‌وی هاوسە‌رە‌کە‌تە. ئەوە لە‌وانە‌یە بۆ هە‌ندێک لە خزم و کە‌سە‌کانت قە‌بوڵ کردنی دژوار بێت. بە‌ڵام بنە‌ماکانی پەرتووکی پیرۆز بۆ پاراستنی ئاشتی لە‌گە‌ڵ خزم و کە‌سە‌کانتاندا یارمە‌تیتان دە‌دا. بۆ درووست کردنی ئە‌و خێزانە نوێیە کە پێکتان هێناوە تێبکۆشن.
١ ڕوانگە‌یە‌کی دروستت بۆ خزم و کە‌ست هە‌بێت
ئە‌وە‌ی کە پەرتووکی پیرۆز دە‌فە‌رمووێ: «ڕێزی دایک و باوکتان بگرن» (ئە‌فە‌سۆس ٦:٢). تە‌مە‌نت هە‌ر چە‌ند بێ دە‌بێ هە‌میشە ڕێز لە دایک و باوکت بگری. بیهێنە بە‌ر چاوت کە هاوسە‌رە‌کە‌ت، وە‌کو تۆ کچ یان کوڕی ماڵێکە و پێویستە ڕێز لە دایک و باوکی بگرێت. «خۆشە‌ویستی دڵ‌پیس نیە»، کە وایە هیچ کات هە‌ست بە مە‌ترسی مە‌کە بە هۆی ئە‌و پە‌یوە‌ندیە کە هاوسە‌رە‌کە‌ت لە‌گە‌ڵ بنە‌ماڵە‌کە‌ی هە‌یە‌تی (١ کۆرنسۆس ١٣:٤؛ گە‌لاتیا ٥:٢٦).
تۆ دە‌توانی چی بکە‌ی:
خۆت لە‌و قسە ناخۆشانە لادە وە‌ک: «بنە‌ماڵە‌ی تۆ هە‌میشە من بە کە‌م دادە‌نێن» یان «دایکی تۆ هە‌رگیز حە‌زی لە کارە‌کانی من نییە».
هە‌وڵ بدە شتە‌کان لە ڕوانگە‌ی هاوسە‌رە‌کە‌تە‌وە ببینی.
٢ لە کاتی پێویستدا لە بڕیاردان دودڵ مە‌بە
ئە‌وە‌ی کە پەرتووکی پیرۆز دە‌فە‌رمووێ: «لە‌بە‌ر ئەوە پیاو دایک و باوکی خۆی بە‌جێ دە‌هێڵێت و لە‌گە‌ڵ ژنە‌کە‌ی دە‌مێنێتە‌وە، ئیتر دە‌بنە یە‌ک جە‌ستە» (پە‌یدابوون ٢:٢٤). کاتێک ژیانی هاوسە‌ریە‌تی پێکدە‌هێنی، لە وانە‌یە دایک و باوکت ئە‌و کاتە‌ش هە‌ست بە‌وە بکە‌ن کە لە بە‌رامبە‌ر تۆدا بە‌رپرسیارن. لە‌وانە‌یە بیانهە‌وێ زیاتر لە‌وە‌ی کە پێویستە لە ژیانی هاوسە‌ریە‌تیتدا خۆیان تێهە‌ڵبقورتێنن.
دە‌ربارە‌ی ئە‌و سنورانە‌ی بۆ ئە‌وانی دادە‌نێن لە‌گە‌ڵ هاوسە‌رە‌کە‌ت هاوبیر بن و زۆر بە ڕێزە‌وە پێیان ڕابگە‌یێنن. دە‌کرێ بە ڕووڕاستی لە‌گە‌ڵیان بدوێن بێ ئە‌وە‌ی بێ‌ڕێزیان پێبکە‌ن (پە‌ندە‌کانی سلێمان ١٥:١). بێ‌فیزی، میهرە‌بانی و دانبە‌خۆگرتوویی یارمە‌تیتان دە‌دە‌ن پە‌یوە‌ندیە‌کی گە‌رم‌وگووڕ لە‌گە‌ڵ خزم و کە‌سە‌کانتان پێکبهێنن و بە‌ردە‌وام بن «بە خۆشە‌ویستی بە‌رگە‌ی یە‌کتری بگرن» (ئە‌فە‌سۆس ٤:٢).
تۆ دە‌توانی چی بکە‌ی:
ئە‌گە‌ر بە هۆی خۆتێهە‌ڵقورتاندنی خزمە‌کانتان لە ژیانی ئێوە‌دا نیگە‌رانی، لە کاتێکی لە‌باردا لە‌گە‌ڵ هاوسە‌رە‌کە‌ت وتووێژی لە‌سە‌ر بکە.
هە‌ردووکتان لە‌سە‌ر بڕیارێکی بێ‌لایە‌نە ڕێکبکە‌ون چۆن ئە‌و کێشانە دە‌بێ چارە‌سە‌ر بکە‌ن.