1 CORINTIOS

Nau kartaɗe Pabloba naa ɓʉɗa

1 Mʉ Pablobʉ. Dachi Akõreba ichi kʉ̃riaɗeeba mʉ iusii Jesucristoba bʉiɗa ɓuamera. Dachi ãba Sóstenes mʉ ome ɓuu. 2 Mʉʉba nau karta ɓʉʉruu chi ẽbẽrarã Dachi Akõreɗerã Corintoɗebena baita. Jesucristoɗeeba Dachi Akõreba machi awara ɓusii ichi baita biꞌia nureaɗamera. Ara mau kĩra ichiba druacha joma Dachi Mechiu Jesucristomaa ʉtaa iɗibadaurã awara ɓusii. Ichimaarã Mechiubʉ mauɗe Dachi Mechiubʉ. 3 Daiba kʉ̃ria panuu Dachi Bajãaɗebena Akõreba mauɗe Dachi Mechiu Jesucristo ãchi sõbiaɗeeba machi kariba panaɗai mauɗe jirukaraayuwãe panabiaɗai.

Pabloba ãbarã baita Dachi Akõremaa ichíturu kiɗibai aɗa

4 Machi Jesucristo ome panuuɗeeba Dachi Akõreba ichi sõbiaɗeeba aiɗa ɓuu. Mauɗeeba mʉʉba Dachi Akõremaa ʉtaa iɗiiruucha machi kakua ichíturu kiɗibai abarii. 5 Jesucristo ome panuuɗeeba Dachi Akõreba machimaa joma deasii biꞌia wauɗamera. Ichi beɗea poyaa kuitaa jaradea panaɗai mauɗe ichi ʉ̃rʉbena poyaa ãrea kuitaa panaɗai. 6 Joma Dachi Akõreba machimaa deaɗaba unubi ɓuu chi Cristo ʉ̃rʉbena beɗea daiba jaradeapeɗaaɗa biawãra ara ɓuu. 7 Machiba Dachi Mechiu Jesucristo unuɗai baita eseɗau panuumisa, Dachi Akõreba ichi Jauriɗeeba dea ɓuu joma uru panuu. 8 Mauɗeeba Dachi Akõreba machi meserãa dea ua ɓuai aɓa nau ewari wãꞌãeruuɗaa. Maka Dachi Mechiu Jesucristo neeruuɗe machi ʉ̃rʉbena kachirua jaraɗayuswãe nureaɗai. 9 Dachi Akõreba ara ichiba jara ɓuu kĩra waubarii. Ichiba machi iusii ichi Warr Dachi Mechiu Jesucristo ome ãbua nureaɗamera.

Ãbarã ãchi kakawaa kʉ̃risia uru panaɗa ʉ̃rʉbena

10 Ãbarã, Dachi Mechiu Jesucristoɗeeba mʉʉba machimaa chi chuburia iɗiiruu ãbua biꞌia duanaɗamera. Machi kʉ̃risia kakawaa uru panaɗaabai panuu, maumaarã kʉ̃risia aɓauɗe ãbua biꞌia duanaɗai panuu. 11 Ãbarã, mʉʉba ũrisiiɗeeba maka jara ɓuu. Neekau Cloé deɗebenarãba mʉʉmaa jarasiɗau machi ijara berrea duanabadau. 12 Mau ʉ̃rʉbena biꞌia jaraaruu. Waabenarã machiɗebenarãba jarabadau: «Mʉ Pabloɗe». Waabenarãba jarabadau: «Mʉ Apolosɗe». Waabenarãba jarabadau: «Mʉ Pedroɗe».* Mauɗe waabenarãba jarabadau: «Mʉ Cristoɗe». 13 Makarã ¿Cristorã ãreaka? ¿Mʉ machi kakua cruzɗe jiraɓusiɗaka? ¿Machi mʉ trʉ̃ɗe boro easiɗaka? ¡Makawãema!

14 Mʉʉba aɓa biɗa machiɗebena boro eabasiiɗeeba kĩrajʉʉ ɓuu. Mʉʉba aɓa Crispo mauɗe Gayóturu boro easii. 15 Maka aɓau biɗa poyaa jarawẽe mʉ trʉ̃ɗe boro eaɗa. 16 Mauɗe mʉʉba ãba Estéfanas deɗebenarã siɗa boro easii. Maarã awara waabenarã boro easiibʉrã mʉʉba kĩrabawẽma. 17 Cristoba mʉ bʉibasii ẽbẽrarã boro ea ɓuamera, maumaarã bʉisii chi beɗea bia ichi ʉ̃rʉbena jaradeamera. Nau iujãaɗebena kʉ̃risia kuitaaɗeeba jaradeawẽa ɓuu, Cristo cruzɗe biuɗa poyaaswãe ɓeerãamera.

Cristo, Dachi Akõre kʉ̃risia kuitaa mauɗe poyaabarii

18 Chi tʉbʉchia kiikauɗaa wãɗai ẽbẽrarãmaarã, Cristo cruzɗe biuɗa ʉ̃rʉbena beɗea kĩranema berrea ɓuu. Maamina dachi, chi Dachi Akõreba karibabadaurã, dachiba kuitaa panuu mau beɗeaba Dachi Akõre poyaabarii kuitaabia ɓuu. 19 Dachi Akõre beɗeaɗe naka ɓʉ kuɓuu:

«Chi ãrea kuitaa nuree kʉ̃risia kuitaa, mʉʉba biꞌiwãe ɓuu unubiai. Chi kʉ̃risia kuitaa nureerãba wauɗai kʉ̃risia panuu ida kabiabai».*

20 Biawãra Dachi Akõreba nau iujãaɗebena kʉ̃risia kuitaa biꞌiwãe ɓuu kuitaabiasii. Mauɗeeba ¿chi ãrea kuitaa nuree kãare sãasma? ¿Chi Moisesba ɓʉɗa jaradeabadaurã kãare sãasma? ¿Chi iɗibaebena kʉ̃risia kuitaaɗeeba berreabadaurã kãare sãasma? 21 Dachi Akõreba ichi kʉ̃risia kuitaaɗeeba wauɗaba, ara ichi unubia ɓuu. Maamina nau iujãaɗebenarãba ara ãchi kʉ̃risia kuitaaɗeeba ichi unuɗakau.* Chi daiba jaradea panuu kĩra kawawẽa ɓuu kĩra ɓumina Dachi Akõremaarã bibuara ɓuu mauɗeeba joma chi ichiɗe ijãaduu karibai.

22 Chi judiorãba, Cristoɗe ijãaɗai baita, ẽbẽrarãba ne poyaa wauɗakau unu kʉ̃riabadau. Chi judiowãerãba nau iujãaɗebena kʉ̃risia kuitaa jʉrʉbadau. 23 Maamina daiba Cristo cruzɗe biuɗa jaradea panuu. Mau beɗea judiorãba biꞌia ũriɗakau. Judiowãerãba mau biꞌiwãe ɓuu kʉ̃risiabadau. 24 Maamina Dachi Akõreba chi nuree judiorã mauɗe chi nuree judiowãerã iusii Cristoɗeeba karibai baita. Maarãba kuitaa panuu Dachi Akõreba Cristoɗeeba chi poyaabarii mauɗe kʉ̃risia kuitaa unubiasii. 25 Ẽbẽrarãmaarã Cristo cruzɗe biusiiɗeeba Dachi Akõre kuitaawãe nii mauɗe meserãaswãe nii. Maamina ne adua nii kĩra ɓumina Dachi Akõre joma nau iujãaɗebenarã audeara ne kuitaa nii. Mauɗe meserãaswãe nii kĩra ɓumina joma nau iujãaɗebenarã audeara meserãa nii.

26 Ãbarã, kʉ̃risiásturu Dachi Akõreba machi adausiiɗe saka nureasii. Ẽbẽrarãmaarã ãrea machiɗebena ne kuitaa nureaɗaabasii, chi jaradea ua ɓuabadaurã nureaɗaabasii mauɗe chi nejarra barau nureeɗebena neeɗaabasii. 27 Mauɗeeba chi ne kuitaa nureerãmaarã machi ne adua nuree. Maamina Dachi Akõreba chi ne adua nuree jʉrʉ adausii chi ne kuitaa nuree kĩrakayaɗamera. Dachi Akõreba chi meserãaswãe nuree jʉrʉ adausii chi meserãa nuree kĩrakayaɗamera. 28 Nau iujãaɗebenarãba chi nejarr barauwãe nuree abadau mauɗe chi maarãba ida ɓubadau Dachi Akõreba jʉrʉ adausii. Maka chi mechiuwãe nuree jʉrʉ adausii chi mechiu nuree chi nejarr barauwãe nureaɗai ɓui baita. 29 Mauɗeeba aɓau biɗa ara ichi ʉ̃rʉbena Dachi Akõre daaɗe poyaa biꞌia berreawẽma. 30 Maawẽa Dachi Akõreba machi Jesucristo ome ãbua ɓusii. Maka Cristoɗeeba Dachi Akõreba ichi kʉ̃risia kuitaa dachimaa kuitaabiasii. Ichiba dachi jipa ɓusii, ara ichi baita biꞌia ɓusii, mauɗe kachiruaɗebena karibasii. 31 Mauɗeeba Dachi Akõre beɗeaɗe naka ɓʉ kuɓuu kĩra dachiba wauɗai panuu: «Aɓauba biꞌia berrearuubʉrã, Dachi Mechiu ʉ̃rʉbena biꞌia berreai ɓuu».*

Cristo cruzɗe biuɗa ʉ̃rʉbena Pabloba jaradeaɗa

2 Ãbarã, mʉʉba Dachi Akõre ʉ̃rʉbena machimaa jaradeaɗe wãsiiɗe berrea mipitaa berrea ɓuuɗeeba mʉ kʉ̃risia kuitaaɗeeba ne aɓa biɗa jaradeabasii. 2 Machi tãeɗe ɓuasiiɗe mʉʉba aɓaburu Jesucristo ʉ̃rʉbena mauɗe ichi cruzɗe beapeɗaaɗa kuitaabiai kʉ̃ria ɓuasii. 3 Mauɗe mʉ meserãaswãe ɓuu kʉ̃risiasii. Mauɗe poyaa biꞌia jaradeawẽe kʉ̃risia ɓuasiiɗeeba wapeaba chi kakua uri ɓuabachii. 4 Mʉʉba Jesús ʉ̃rʉbena jaradea ɓuasiiɗe mʉ kʉ̃risia kuitaaɗeeba maka waubasii machiba ijãaɗamera. Maumaarã Dachi Akõre Jauriba ichi poyaaɗeeba kuitaabiasii mau beɗea biawãra. 5 Maka machiba nau iujãaɗebena kʉ̃risia kuitaaɗeeba Jesucristoɗe ijãaɗaabasii, maumaarã Dachi Akõre poyaaɗeeba ijãasiɗau.

Chi Dachi Akõreba naeɗe kuitaabiawẽa ɓuaɗa ichi Jauriɗeeba kuitaabiaɗa

6 Maka ɓuuɗe daiba jaradea panuu chi Dachi Akõreɗe ãrea ijãa nureemaa. Ãchi baita mau jaradea panuu chi kʉ̃risia kuitaabʉ. Mau kʉ̃risia kuitaa nau iujãaɗebenawãema mauɗe nau iujãaɗebena karrarã kʉ̃risia kuitaawãema. Maarã ãrea panaɗaabai. 7 Daiba chi Dachi Akõre kʉ̃risia kuitaa naeɗe kuitaabiawẽa ɓuaɗa jaradea panuu. Nau iujãa waui naeɗe Dachi Akõreba mau kʉ̃risia kuitaaɗeeba ne waui ɓusii dachi ichi ome ãbua biꞌia nureaɗamera. 8 Chi nau iujãaɗebena karrarã aɓau biɗa mau kʉ̃risia kuitaa kuitaaɗaabasii. Kuitaa panaɗa basirã, Dachi Mechiu biꞌia nii cruzɗe beaɗaabai basii. 9 Maamina kuitaaɗaabasii Dachi Akõre beɗeaɗe naka ɓʉ kuɓuu kĩra:

«Chi Dachi Akõreba ichi kʉ̃ria nuree baita biꞌia waupeɗa uru ɓuu, aɓau biɗa wabiɗa unuɗakau, kʉʉrʉba ũriɗakau mauɗe ne aɓa biɗa kuitaa kʉ̃risiaɗakau».*

10 Joma mau Dachi Akõreba ichi Jauriɗeeba dachimaa kuitaabiasii. Ichi Jauriba ne joma kuitaa ɓuu. Chi Dachi Akõre kʉ̃risia siɗa ne joma kuitaa ɓuu. 11 ¿Ẽbẽra kʉ̃risia kaiba kuitaa ɓuma? Ara ichi du aɓaburu kuitaa nii. Ara mau kĩra aɓau biɗa Dachi Akõre kʉ̃risia poyaa kuitaaɗaabasii. Aɓa Dachi Akõre Jauríburu mau kuitaa nii. 12 Dachiba nau iujãaɗebena kʉ̃risia adauɗaabasii, maumaarã Dachi Akõre Jauri adausiɗau joma Dachi Akõreba ichi sõbiaɗeeba deaɗa kuitaaɗamera. 13 Ara mau ʉ̃rʉbena daiba berrea panuu. Maamina nau iujãaɗebena kʉ̃risia kuitaaɗeeba berrea panuuwãema, maumaarã Dachi Akõre Jauriba daimaa jaradea ɓuu kĩra berrea panuu. Maka Dachi Akõre Jauriba kuitaabi ɓuu daiba jaradea panuu ichiba berreabi ɓuu kĩra.*

14 Maamina Dachi Akõre Jauriba kuitaabi ɓuu chi Dachi Akõre Jauriwãe niiba kuitaai kʉ̃riakau, ichimaarã biꞌiwãe ɓuuɗeeba. Mauɗe poyaa kuitaakau, aɓa Dachi Akõre Jauriɗéburu kuitaai ɓuuɗeeba. 15 Chi Dachi Akõre Jauri uru ɓuuba Dachi Akõre ʉ̃rʉbena poyaa ãrea kuitaai. Maamina chi Dachi Akõre Jauriwãe niiba chi Dachi Akõre Jauri uru ɓuu kʉ̃risia, kauwa ũrikau. 16 Dachi Akõre beɗeaɗe naka ɓʉ kuɓuu: «¿Kaiba Dachi Mechiu kʉ̃risia kuitaa ɓuma? ¿Kaiba ichimaa jaradeaima?»* Maamina dachiba Cristo kʉ̃risia uru panuu.

Pablo mauɗe Apolosba Dachi Akõre traju waupeɗaaɗa

3 Ãbarã, mʉ machimaa wãsiiɗe, chi Dachi Akõre Jauriɗeeba nibabadaurãmaa jaradea ɓuu kĩra poyaa makaabasii. Maumaarã chi nau kakuaba wau kʉ̃ria ɓuu kĩra waubadaurãmaa mauɗe chi ea Cristoɗe ijãapeɗaaɗarãmaa jaradea ɓuu kĩra jaradeasii. 2 Mʉʉba Cristo ʉ̃rʉbena beɗea chaareawãe ɓuu jaradeasii wãwamaa ju ɓaa dobi ɓuu kĩra. Chiko kobi ɓuu kĩra, mʉʉba chaareawãe ɓuu jaradeabasii, machiba kauwa ũriɗaabasiiɗeeba. Mauɗe wabiɗa kauwa ũriɗawẽa panuu. 3 Machi wabiɗa nau kakuaba wau kʉ̃ria ɓuu kĩra nibabadau: waabenarãba uru panuu kakua, kachirua kʉ̃risiabadau mauɗe oa kachirua berreabadau. Maka nureeɗeeba ¿nau kakuaba wau kʉ̃ria ɓuu kĩra nureewãeka? 4 Aɓauba jarabarii: «Mʉ Pauloɗebʉ». Waya aɓauba jarabarii: «Mʉ Apolosɗebʉ». Machiba maka jarabadauɗeeba nau iujãaɗebenarã kĩra nuree.

5 Maamina ¿Pablo kaima? ¿Apolos kaima? Dai Dachi Akõre baita bari trajabadaubʉ. Daiɗeeba machiba Dachi Mechiuɗe ijãasiɗau. Dachi Akõreba daicha waubiaɗa kĩra wausiɗau. 6 Ne uuruu kĩra mʉʉba machimaa Jesús ʉ̃rʉbena naa jaradeasii. Maabae mʉʉba uuɗaɗe bania earuu kĩra Apolosba Dachi Akõre beɗea biꞌia jaradeasii. Maamina Dachi Akõréburu aiɗasii machiba ijãaɗamera chi ne uuɗa waribiiruu kĩra. 7 Mauɗeeba chi ne uubarii chi aude mechiuwãema. Chi bania eabarii siɗa chi aude mechiuwãema. Dachi Akõre chi aude mechiubʉ. Ichiaburu ne uu nuɓuu waribibarii. 8 Chi ne uubarii mauɗe chi bania eabarii siɗa Dachi Akõre daaɗe araɓauɗe nuree. Ichiba dachicha ne biꞌia deai, dachiba wau panaɗa kĩra. 9 Mʉʉba Apolos ome araɓauɗe Dachi Akõre traju wau panuu. Machi siɗa Dachi Akõreɗe ne uu nuɓuu iujãabʉ.

Mau awara machi Dachi Akõreba de wau ɓuu kĩra nuree. 10 Mʉ chi de waubarii bia kĩra nii. Dachi Akõreba ichi sõbiaɗeeba mʉʉmaa deaɗaba, de jʉ̃rʉ ãrea iɗu ʉyaasii. Waabenarãba mau ʉ̃rʉ de waubadau. Maamina dachicha kauwa panaɗai ɓuu saka mau ʉ̃rʉ waui ɓuu. 11 Jesucristo chi de jʉ̃rʉ baerã, june ãyaa poyaa nuɓuuɗaabai. 12 Aɓauba mau ʉ̃rʉ de bia wauruubʉrã, ichiba wau ɓuu nee, parata maebʉrã mo doɗaa mipitaa ãrikau kĩra ɓuu. Maamina aɓauba mau ʉ̃rʉ de biawãe wauruubʉrã, ichiba wau ɓuu bakuru, kiruu maebʉrã sia kiruuba waupeɗaaɗa kĩra ɓuai. 13 Cristoba dachi nebʉra ichiai ewariɗe dachicha waupeɗaaɗa tʉbʉchiaba ichia chaai, ãrea dauchia jãadua ɓuai kuitaai baita. Mauba unubii dachiba waupeɗaaɗa saka ɓuasii. 14 Dachiba wauɗaba mau tʉbʉchiaɗe dauchia jãadua ɓuubʉrã Cristoba chi wau ɓuaɗamaa ne biꞌia deai. 15 Maamina chi dachiba wauɗa baawãaruubʉrã chi wau ɓuaɗaba ne aɓa biɗa adaubai. Dachi Akõreba ichi karibarumina de baawãaruuɗebena awara wãaruu kĩra ɓuai.

16 ¿Adua panuka Dachi Akõre Jauri machi sõɗe ɓuu? ¿Adua panuka machi Dachi Akõre de? 17 Aɓauba Dachi Akõre de ãriiruubʉrã Dachi Akõreba ãrea kastikai, ichi de ichi baitabena ɓuuɗeeba. Machi mau deebʉ.

18 Ara machi du aɓa setaa kũruarã́sturu. Aɓauba chi nau iujãaɗebena kʉ̃risia kuitaa kĩra ne kuitaa ɓuu kʉ̃risia ɓuubʉrã, waa maka kʉ̃risiabai ɓuu. Maumaarã chi biawãra kʉ̃risia kuitaa uru ɓuai baita nau iujãaɗebenarã daaɗe ne adua ɓuu kĩra ɓuai ɓuu. 19 Dachi Akõremaarã, nau iujãaɗebena kʉ̃risia kuitaa biꞌiwãe ɓuu. Dachi Akõre beɗeaɗe naka ɓʉ kuɓuu: «Dachi Akõreba chi nau iujãaɗe ne kuitaa nuree ara ãchi kʉ̃risia kuitaaɗeeba unubibarii ne kuitaa panuuwãe».* 20 Mauɗe naka ɓʉ kuɓuu: «Dachi Mechiuba kuitaa ɓuu chi nau iujãaɗe ne kuitaa nuree kʉ̃risia, mau kʉ̃risiaswãe bari ɓuu».* 21 Mauɗeeba kʉ̃risiarã́sturu ẽbẽra aɓa baara wãaduuɗeeba, mau waabenarã audeara biꞌia nii. Dachi Akõreɗeeba machiba ne joma uru panuu biꞌia nureaɗai baita. 22 Machiba mʉ, Apolos mauɗe Pedro uru panuu. Joma nau iujãaɗe ɓuu siɗa uru panuu. Chi iɗibaebena mauɗe nubena uru panuu. Dachi chokae panuubʉrã maebʉrã biuduubʉrã Dachi Akõreɗeeba ne joma uru panaɗai biꞌia nureaɗai baita. 23 Joma machi Cristoɗerãbʉ. Mauɗe Cristo Dachi Akõreɗebʉ.

Jesucristo baita bari trajabadaurã

4 Maka machiba kʉ̃risiaɗai panuu dai Cristo baita bari trajabadaurã. Dachi Akõreba dai ɓusii chi ichi ʉ̃rʉbena naeɗe kuitaabiawẽa ɓuaɗa jaradeaɗamera. 2 Biawãra chi chibari baita bari trajabariiba ichi jaradea ua ɓuabariiba waubi ɓuu joma jipa wau ɓuai ɓuu chi jaradea ua ɓuabariiba biꞌia unumera. 3 Mauɗeeba machiba maebʉrã barikia ẽbẽraba mʉ ʉ̃rʉbena kachirua jaraaduuɗe biꞌiwãe kʉ̃risiakau. Mauɗe ara mʉ du aɓa jarawẽma mʉʉba wau ɓuu saka ɓuu. 4 Mʉʉba ne aɓa biɗa biꞌiwãe wauwẽa ɓuu kuitaa ɓumina mauba jarawẽa ɓuu mʉʉba joma jipa wausii. Dachi Mechiúburu kuitaa jarai. 5 Mauɗeeba ichiba nebʉra ichiai ewari naeɗe dachiba jaraɗaabai panuu ichi traju wau ɓuuba jipa wau ɓuu maebʉrã jipa wauwẽa ɓuu. Dachi Mechiu neeruuɗe dachi sõɗe kʉ̃risia ɓuaɗa mauɗe ne joma dachi sõɗe miru nureaɗa kuitaabii. Dachi Akõréburu dachicha biꞌia jarai dachiba biꞌia waupeɗaaɗa kĩra.

6 Ãbarã, mʉ ʉ̃rʉbena mauɗe Apolos ʉ̃rʉbena ɓʉsii machi aiɗai baita. Dai ʉ̃rʉbena kuitaaɗai panuu Dachi Akõre beɗeaɗe ɓʉ kuɓuu aude kʉ̃risiaɗaabai panuu.* Makarã machiba aɓa biɗa waabena audeara biꞌia ɓuu kʉ̃risiaɗawẽa panuu. 7 ¿Kaiba machi waabenarã audeara biꞌia ɓusma? Dachi Akõreba deaɗa awara ¿machiba kãare uru panuma? Machiba Dachi Akõreɗebena ne joma adaupeɗaaɗaɗeeba ¿sakãe ara machi du aɓa adaupeɗaaɗa kĩra berrea panuma?

8 Dachi Akõreɗeeba adau kʉ̃ria panaɗa machiba joma uru panuu abadau. Dachi Akõreba dea ɓuu ãrea uru panuu abadau. Dai ida ɓuɗapeɗa machi du aɓa chi mechiurã paneeɗai a kʉ̃risia panuu. Maamina makawãema. Machi biawãra chi mechiurã paneeɗa basirã biꞌia ɓuai basii. Makara dai siɗa machi ome ãbua chi mechiurã paneeɗai basii. 9 Maamina mʉʉba kʉ̃risia ɓuu dai chi Jesucristoba bʉiɗarã Dachi Akõreba jomaurã audeara kaebeu ɓusii. Dai chi juezba jomaurã daaɗe beabíbaɗe a ɓuu kĩra panuu.* Ẽbẽrarãba mauɗe angelerãba, jomaurãba ichia panuu biuɗai kuitaaɗai baita. 10 Ẽbẽrarãmaarã dai Cristo baita ne adua nuree mauɗe meserãaswãe nuree. Maamina machi Cristo ome panuuɗeeba chi ne kuitaa nuree abadau mauɗe chi meserãa nuree abadau. Ẽbẽrarãba machi ʉ̃rʉbena biꞌia berrea panuu, maamina dai ida ɓu panuu. 11 Iɗibaeɗaa dai jarrba wau panuu, obisia wau panuu mauɗe paru sore uru panuu. Dai dewãe panuu mauɗe ẽbẽrarãba dai kachirua waubadau. 12 Dai kʉrrjĩruɗawẽa traja panuu ne uru panaɗai baita. Ẽbẽrarãba daimaa kachirua berreaduuɗe daiba ãchimaa biꞌia berreabadau. Dai kachirua wauduuɗe dauchia jãadua panabadau. 13 Setaɗeeba daimaa kachirua jaraaduuɗe beɗea biaɗeeba panaubadau. Iɗibaeɗaa ẽbẽrarãba dai nejarr kĩra unubadau mauɗe ne miadaa kĩra unubadau.

14 Mʉʉba mau ɓʉ kuɓuwẽe machi kĩrakayabiai baita. Maumaarã mʉ warrarã kĩra machi kʉ̃ria ɓuuɗeeba maka ɓʉ kuɓuu jipa kʉ̃risiabiai baita. 15 Machiba Cristo ʉ̃rʉbena jaradeabadaurã ãrea uru panaɗa basirã wabiɗa akõre aɓa uru panaɗai basii.* Mʉʉɗeeba machiba chi beɗea bia Jesús ʉ̃rʉbena ijãapeɗaaɗaɗeeba ichiɗeeba mʉ machi akõrebʉ. 16 Mauɗeeba mʉʉba machimaa chi chuburia iɗii mʉ nibabarii kĩra nibaɗamera. 17 Mauɗeeba Timoteo machimaa bʉiruu. Dachi Mechiuɗeeba mʉ warr kʉ̃riabarii kĩra nii, mauɗe jipa nibabarii. Ichiba machimaa kĩrababiai mʉ Jesucristo ome saka jipa nii. Mʉ maka nibai chi ẽbẽrarã Jesucristoɗerã duanabariicha jaradea ɓuu.

18 Waabenarã machiɗebena chi mechiurã kĩra nibabadau, kʉ̃risia panuuɗeeba mʉ machimaa wãabai. 19 Maamina Dachi Mechiuba kʉ̃riaruubʉrã, mʉ machimaa isa wãi. Mauɗe chi mechiu abadauba jara panuu ũriɗe wãabai, maumaarã ichiaɗe wãi ãchi biawãra Dachi Akõre poyaabarii uru panuu kuitaai baita. 20 Dachi Akõre juaɗe ua ɓuuɗebenarãba ichi ʉ̃rʉbena berreaɗakau, maumaarã ichi poyaaɗeeba jipa waubadau. 21 Mau ¿machiba saka kʉ̃ria panuma? ¿Kʉ̃ria panuka mʉʉba iadaaɗe wãi maebʉrã kʉ̃riaɗeeba, biꞌia berreaɗeeba wãi?*

Ãbarãba ida waubipeɗaaɗa chi ãbaba kachirua wauɗa

5 Ẽbẽrarãba jara panuu machi tãeɗe aɓa kĩra nejasia waubarii. Jara panuu mauba chi akõre wẽra ichi wẽra kĩra uru ɓuu. Biawãra Jesucristoɗe ijãaɗakaurã biɗa mau kachirua wauɗakau. 2 Maamina machiba wabiɗa kʉ̃risia panuu waabenarã audeara bibuara nuree. ¿Mau ẽbẽraba kachirua wauɗa kakua ãrea kĩra nomaa nureaɗai panuuwãeka? ¿Mau machiɗebena ãyaa ɓuɗai panuuwãeka? 3 Mʉ machi ome ɓuuwãemina, kʉ̃risiaɗeeba machi ome ãbua ɓuu. Maka machi ome ɓuu kĩra mau kachirua wau ɓuu ẽbẽra Dachi Mechiu Jesús trʉ̃ɗeeba kastikasii. 4 Machi araa ãbua imiiduuɗe mʉ jauriɗe machi ome ɓuai. Mauɗe Dachi Mechiu Jesusba chi poyaabarii machimaa deai, 5 mau ẽbẽra kastikaɗamera. Mau ãyaa duabʉiɗai panuu, Satanasba ãrea biꞌiwãe ɓuabimera. Makaaduubʉrã nau kakuaba kachirua wau kʉ̃ria ɓuu ida ɓui. Mauɗe Dachi Mechiu neei ewariɗe ichi karibai.

6 Ara machi waabenarã audeara biꞌia nuree aɗaabai panuu. ¿Machiba adua panuka masa ẽesãabibarii ɓaꞌãra ɓuuba harina joma ẽesãabibarii? Ara mau kĩra chi kachirua ɓaꞌãra wauruuba waabenarã ãbarã joma kachiruabiabarii. 7 Mauɗeeba masa ẽesãabibarii chi chõra ãyaa jirataaduu kĩra mau kachirua wau ɓuu machi tãeɗebena ãyaa duabʉ́isturu.* Maka machi kachiruaswãe nureaɗai, harina wiɗi peraɗa ẽesãabibariiwãe ɓuu kĩra. Machi mau kĩra nureabiai baita, Cristo dachi kachirua kakua biusii, Egiptoɗebena wãsiɗauɗe oeja beapeɗaaɗa kĩra.* 8 Jãabae pan ẽesãabibariiwãe ɓuu kobadau kĩra, kʉ̃risia sõbiaɗeeba mauɗe biawãraɗeeba nibaɗai panuu. Masa ẽesãabibarii chõra kĩra ɓuuɗeeba waa maka nibaɗaabai panuu. Waabenarã kĩramaa ɓuuɗeeba mauɗe kachirua wau ɓuuɗeeba waa maka nibaɗaabai panuu.

9 Naeɗe mʉʉba june kartaɗe ɓʉsii machi chi ãibena ome kãi paneebadaurã ome ãbua panaɗaabai panuu. 10 Maamina mauba jarawẽa ɓuu chi nau iujãaɗebena barikiu kachirua waubadaurã ome, chi nejarra kʉ̃riabadaurã ome, nechiruabadaurã ome mauɗe Dachi Akõre kuenda juaba ne kapeɗaaɗamaa ʉtaa iɗibadaurã ome panaɗaabai panuu. Maarã ome panaɗai kʉ̃riaɗawẽebʉrã, nau iujãaɗebena wãɗai panuu. 11 Maumaarã mʉʉba machi baita ɓʉsii barikiuba ara ichi ãba aaruubʉrã, maamina barikiu kachirua wau niibʉrã, chi nejarra kʉ̃ria niibʉrã, Dachi Akõre kuenda juaba ne kapeɗaaɗamaa ʉtaa iɗi niibʉrã, setaɗeeba waabena kachirua jara niibʉrã, itua biu niibʉrã, maebʉrã chirua niibʉrã, mau ẽbẽra ome ãbua panaɗaabai panuu mauɗe ãbua koɗaabai panuu. 12 Dachi Akõreɗe ijãaɗakaurã nebʉra ichiai baita mʉ ɓuwãema. Dachi Akõréburu chi ichi ijãaɗakaurã nebʉra ichiai. Maamina chi machi tãeɗe nuree machiba ichiaɗai panuu. Dachi Akõre beɗeaɗe ɓʉ kuɓuu: «Chi kachirua wau ɓuu machi tãeɗebena duabʉ́isturu».* 13 —.

Ãbarãba ara ãchi nebʉra ichiaɗai ʉ̃rʉbena

6 Machiɗebena aɓa nebʉra baraa ɓeeruubʉrã waabena ãba ome, ¿sakãe chi Dachi Akõreɗe ijãaɗakaurã juezrãmaa jaraɗe wãbadama? ¿Biꞌia ɓuuwãeka Dachi Akõreɗe ẽbẽrarãba ãchi nebʉra ichiaɗai? 2 ¿Machiba adua panuka Jesús neeruuɗe Dachi Akõreɗe ẽbẽrarãba chi nau iujãaɗe nuree nebʉra ichiaɗai? Machiba chi nau iujãaɗe nuree nebʉra ichiaɗaiɗeeba ¿sakãe nebʉra ɓistĩika nuree poyaa ichiaɗakama?* 3 ¿Adua panuka dachiba angelerã nebʉra ichiaɗai? Maka ɓuuɗeeba ¿chi iɗibaebena nebʉra machi tãeɗe nuree poyaa ichiaɗaabaska? 4 Machi mau kakua nebʉra baraa paneeduubʉrã, ¿sakãe Dachi Akõreɗe ijãaɗakaurãmaa wãbadama mau ichiaɗamera?* 5 Mʉʉba mau jara ɓuu machi kĩrakayaɗamera. ¿Machi tãeɗe kʉ̃risia kuitaa nii aɓa biɗa wãꞌãeka, ãbarã nebʉraɗe panuurã biꞌia berreabiai baita? 6 Mau ãyaa ãba waabena ãba ome kĩru berreaɗapeɗa nau iujãaɗebena juezrãmaa wãbadau. Biawãra maka wauɗaabai panuu chi Dachi Akõreɗe ijãaɗakaurã daaɗe kĩru berreabadauɗeeba.

7 Biawãra waabenarã machiɗebena nebʉra uru panabadauɗeeba unubi panuu jipa nibaɗakau. ¿Bibuara ɓuuwãeka chi bichimaa kachirua wauɗa jãaduai, chi nebʉra ichiabadaumaa wãi baɗamaarã? ¿Bibuara ɓuuwãeka bichiba uru ɓuu ida chiruabii, bichi ãba chi nebʉra ichiabadaumaa adooi baɗamaarã? 8 Maamina machiaburu ẽbẽrarãmaa kachirua waubadau mauɗe nechiruabadau. Biawãra ãrea kachirua wau panuu, ara machi ãbarãmaa maka waubadauɗeeba.

9 ¿Machiba adua panuka chi kachirua waubadau Dachi Akõre juaɗe panaɗaabai, ichiɗirã baara? ¡Ara machi du aɓa setaa kũruarã́sturu! Chi kakuaba barikiu kachirua waubadaurã, Dachi Akõre kuenda juaba ne kapeɗaaɗa kĩraare ʉtaa iɗi nuree, junebena ome kãi topaneebadaurã, mukĩra wẽra kĩra nuree, mukĩra aɓaarakau mukĩra ome panabadaurã, nechiruabadaurã, chi nejarra kʉ̃riabadaurã, itua biu nibabadaurã, setaɗeeba waabena ʉ̃rʉbena kachirua jarabadaurã mauɗe waabena setaa kũruabadaurã Dachi Akõre puuruɗe panaɗaabai. 10 —. 11 Naeɗe machiɗebena chi nuree maka nureasii. Maamina machiba kachirua waupeɗaaɗa Dachi Akõreba jeraasii, ichi baita biꞌia ɓusii, mauɗe nebʉraswãe nii asii Dachi Mechiu Jesucristoɗeeba mauɗe ichi Jauriɗeeba.

Dachi kakuaba barikia kachirua wauɗaabai panuu

12 Machiɗebenarã chi nureerãba jarabadau: «Cristoɗe ijãa ɓuuɗeeba mʉʉba kʉ̃ria ɓuu kĩra joma waui ɓuu». Maamina mʉʉba jaraaruu dachiba kʉ̃ria ɓuu joma wauɗai ɓumina, joma dachiba wau kʉ̃ria panuuba dachi aiɗakau. Mauɗeeba joma mʉʉba wau kʉ̃ria ɓuu mʉʉmaa ida kabiibai. 13 Mauɗe waabenarãba jarabadau: «Chiko dachi ɓi baita ɓuu, mauɗe dachi ɓi ãnimara kiuru baita ɓuu». (Maka ɓumina Dachi Akõreba mau omea wãꞌãebii). Maamina dachi kakuaba barikia kachirua waui ɓuai baita ɓuuwãe, maumaarã Dachi Mechiu baita ɓuu. 14 Dachi Akõreba ichi poyaaɗeeba Dachi Mechiu Jesús biuɗaɗebena chokae jiradubisii. Ara mau kĩra ichi poyaaɗeeba dachi siɗa chokae jiradubiai.

15 ¿Machiba adua panuka machi kakua Cristoɗe? Makarã ¿mʉʉba ãbua ɓuika chi Cristoɗe, wẽra auɗua nii ome? ¡Makawãema! 16 ¿Machiba adua panuka wẽra auɗua nii ome ɓuuɗe, mau wẽra ome kakua ara aɓa ɓuu kĩra nii? Dachi Akõre beɗeaɗe naka jara ɓuu: «Ãchi kakua aɓa ɓuu kĩra nureaɗai».* 17 Maamina Dachi Mechiu ome ãbua ɓuu ichi ome jauri aɓa ɓuu kĩra nuree.

18 Dachi kakuaba barikia kachirua ɓaꞌãra biɗa waurã́sturu. Kachirua june ãyaa wauruubʉrã, mauba dachi kakua biꞌiwãe ɓeebikau. Maamina kakuaɗeeba kachirua wauruubʉrã, dachi kakua kachirua ɓeei. 19 ¿Machiba adua panuka machi kakua Dachi Akõre Jauri de kĩra nii? Dachi Akõreba ichi Jauri machimaa deasii. Ichi machi sõɗe ɓuu. Machi ara machiɗiwãema maumaarã Dachi Akõreɗebʉ. 20 Dachi Akõreba machi nedosii. Dachi Akõreɗeɗeeba machi kakuaɗe mauɗe jauriɗe kĩra jipa panásturu.*

Kima adauɗai ʉ̃rʉbena

7 Jãabae machiba kartaɗe iɗipeɗaaɗa mʉʉba panauruu. Naka ɓʉsiɗau: «Biawãra mukĩraba wẽra adaubai biꞌia ɓuu».* 2 Maamina machi tãeɗe kachirua barikiu waubadauɗeeba mukĩraba ãchi wẽra ãchi kakawaa uru ɓeai ɓuu, mauɗe chi wẽraba ãchi mukĩra ãchi kakawaa uru ɓeai ɓuu. 3 Mukĩraba ichi kakua wẽramaa wãakaabai ɓuu. Chi wẽra biɗa ichi kakua kimamaa wãakaabai ɓuu. 4 Chi wẽra ichi kakua chibariwãema, maumaarã chi kimáturu ichi kakua chibaribʉ. Ara mau kĩra chi mukĩra ichi kakua chibariwãema, maumaarã ichi wẽráturu chibaribʉ. 5 Machi kakua machi kimamaa wãakarã́sturu. Dachi Akõremaa ʉtaa iɗi kʉ̃riaduuɗe, beɗea deásturu, mau ewariɗe ãbua kãi ɓeeɗaabai baita. Maamina kãꞌãa maka panaɗaabai panuu. Mau maaɗakare, waya ãbua kãi ɓeei panuu, machi kakuaba kʉ̃ria ɓuu jãaduaɗawẽa paneeduuɗe, Satanasba kachirua waubiarãamera. 6 Mʉʉba jaraaruu: machiba maka wau kʉ̃ria panuubʉrã, biꞌia ɓuu. Maamina mʉʉba wáubaɗe a ɓuuwãe. 7 Mʉʉmaarã, biꞌia ɓuai jomaurã mʉ kĩra du nureaɗai. Maamina Dachi Akõreba dachicha saka nureaɗai deasii. Dachi Akõreba chi nureemaa du nureaɗai dea ɓuu. Mauɗe chi nureemaa kima adauɗai dea ɓuu.

8 Mʉʉba jaraaruu chi du nureerãmaa mauɗe pẽdrãarãmaa: biꞌia ɓuu mʉ kĩra kimaswãe nureaɗai. 9 Maamina machi kakuaba kʉ̃ria ɓuu poyaa jãaduaɗawẽebʉrã, kima adauɗai panuu. Machi kakuaba kʉ̃ria ɓuu ʉ̃rʉbena ãrea kʉ̃risia ɓuai* audeara biꞌia ɓuu kima adauɗai.

10 Mʉʉba nau jaraaruu chi kima bara nureerãmaa. Nau beɗea mʉʉɗewãema, maumaarã Dachi Mechiuɗebʉ.* Chi wẽraba ichi kima amaabai ɓuu. 11 Maamina ichi kima amaaruubʉrã, mukĩra june adaubai ɓuu. Maumaarã du ɓuai ɓuu maebʉrã chi kima ome waya beɗea deai ɓuu. Ara mau kĩra chi mukĩraba ichi wẽra amaabai ɓuu.

12 Chi nuree ãbarãmaa mʉʉba nau (nau Dachi Mechiu Jesusba mʉʉmaa jaradeabiwẽma): ãbaba chi wẽra Jesusɗe ijãawẽa ɓuu uru ɓuubʉrã, mauɗe mau wẽra ichi ome ɓuai kʉ̃ria ɓuubʉrã, mau ãbaba chi mau amaabai ɓuu. 13 Neekauba chi mukĩra Jesusɗe ijãawẽa ɓuu uru ɓuubʉrã, mauɗe mau mukĩraba chi mau amaa kʉ̃riawẽebʉrã, mau neekauba ichi amaai ɓuu. 14 Mau Jesusɗe ijãawẽa ɓuu mukĩra Dachi Akõre baita ɓeesii ichi wẽraba ijãa ɓuuɗeeba. Ara mau kĩra chi Jesusɗe ijãawẽa ɓuu wẽra Dachi Akõre baita ɓeesii ichi kimaba ijãa ɓuuɗeeba. Makawãe basirã machi warrarã Dachi Akõre baita nureaɗaabai basii. Akõrerã Dachi Akõre baita panuuɗeeba ãchi siɗa Dachi Akõre baita panuu. 15 Maamina chi Jesusɗe ijãawẽa ɓuu ichi kimaɗebena ãyaa wã kʉ̃ria ɓuubʉrã, makarã́baɗe aɗaabai panuu. Maka chi ijãa ɓuu chi ãyaa wãɗa ijãawẽa ɓuu ome ɓeebai ɓuu. Dachi Akõreba dachi jirukaraayuwãe nureaɗamera iusii. 16 Neekau, ¿bichiba kuitaa ɓuka Dachi Akõreba bichi mukĩra karibai bichi kakua? Ãba, ¿bichia biɗa kuitaa ɓuka Dachi Akõreba bichi wẽra karibai bichi kakua?

17 Dachi Akõreba dachi iusiiɗe ara dachi panaɗa kĩra nureaɗai panuu. Mukĩra kakua tõo ɓuasiibʉrã ara maka ɓuai ɓuu. Mukĩra kakua tõowẽa ɓuasiibʉrã ara maka ɓuai ɓuu. Dachicha nureaɗai panuu Dachi Mechiuba ɓuɗa kĩra. Mʉʉba ẽbẽrarã Dachi Akõreɗerã araa ãbua imibadaucha maka jaradea ɓuu.18 —. 19 Mukĩra chi kakua tõo ɓuai aude bibuara ɓuwãema mauɗe mukĩra chi kakua tõowẽa ɓuai siɗa aude bibuara ɓuwãema. Dachi Akõreba waubi ɓuu beɗea wau ɓuai aude bibuara ɓuu. 20 Dachi Akõreba dachi iusiiɗe ara dachi panaɗa kĩra nureaɗai panuu. 21 Dachi Akõreba bichi iusiiɗe chi chibari baita bari trajabarii ɓuasiibʉrã, ãrea jirukaraa ɓuarã́se. Maamina bichi chibariba bichi ida bʉiruu ɓuubʉrã, maka wause. 22 Chi chibari baita bari trajabarii Dachi Akõreba iuɗa Dachi Mechiuba kachiruaɗebena karibasii ichi baita ne wau ɓuamera. Mauɗe chi chibari baita bari trajabariiwãe, jãabae Cristo baita bari trajabariibʉ. 23 Cristoba paaruuba machi nedosii. Mauɗeeba waabena chibari baita bari trajabarii panarã́sturu. 24 Ãbarã, Dachi Akõreba dachi iusiiɗe ara dachi panaɗa kĩra nureaɗai panuu ichi ome.

25 Mau awara chi wabiɗa miakãiɗawẽa nuree ʉ̃rʉbena mʉʉba jaraaruu. Dachi Mechiu Jesucristoba mʉʉmaa mau ʉ̃rʉbena jaradeabiibasiiɗeeba mʉʉba kʉ̃risia ɓuu jaraaruu. Machiba kuitaa panuu Dachi Mechiuba mʉ kĩra chuburiasiiɗeeba mʉʉba biawãra jarabarii. 26 Naka jaraaruu: mʉʉmaarã nau ewariɗe ãrea biꞌiwãe panuuɗeeba dachi mukĩra du nuree ara mau kĩra nureaɗai panuu. 27 Maamina kãiruubʉrã, bichi wẽra ida ɓui kʉ̃risiarã́se. Du niibʉrã, wẽra adaui kʉ̃risiarã́se. 28 Maamina kãiruubʉrã kachiruawãema. Wẽraba mukĩra adauruubʉrã kachiruawãema. Maamina chi kima adauruu nau iujãaɗe ãrea biꞌiwãe ɓuai. Machi maka ãrea biꞌiwãe panaɗai mʉʉba kʉ̃riawẽa ɓuu.

29 Ãbarã, mʉʉba nau jara kʉ̃ria ɓuu: nau ewari wãꞌãemaa ɓuu. Mauɗeeba jãabae chi ãbarã kima uru nureerãba Dachi Akõre oɗe wã panuu ida ɓuɗaabai panuu ãchi wẽra ome nureaɗai baita. Maumaarã chi kima wãꞌãe ɓuu kĩra nureaɗai panuu. 30 Ara mau kĩra chi ãbarã kĩra nomaa nuree kĩra nomaawẽa nuree kĩra nureaɗai panuu. Chi kĩrajʉʉ nuree kĩrajʉʉwẽa nuree kĩra nureaɗai panuu. Ne nedoɗaba ichiba nedoɗa ewaricha uru ɓuai kʉ̃risia ɓuabai ɓuu. 31 Chi nau iujãa dachiba unu panuu joma wãꞌãemaa ɓuuɗeeba chi ne barau nureeba ne barauwãe nuree kĩra kʉ̃risia nureaɗai panuu.

32 Mʉʉba kʉ̃ria ɓuu machi jirukaraaɗawẽa panaɗayu, nau iujãa ʉ̃rʉbena. Chi mukĩra kimawãe ɓuuba biꞌia kʉ̃risia ɓuabarii Dachi Mechiuba kʉ̃ria ɓuu waui baita. Dachi Mechiu kĩrajʉʉbii kʉ̃ria ɓuu. 33 Maamina chi mukĩra wẽra uru ɓuuba nau iujãaɗe ichi wẽra biꞌia uru ɓuai ãrea kʉ̃risia ɓuabarii. Ichi wẽra kĩrajʉʉbii kʉ̃ria ɓuu. 34 Maka chi wẽra bara ɓuuba kʉ̃risia ome uru ɓuabarii.* Ara mau kĩra chi wẽra kima uru ɓuuba nau iujãaɗe ichi kima biꞌia uru ɓuai ãrea kʉ̃risia ɓuabarii. Ichi kima kĩrajʉʉbii kʉ̃ria ɓuu. Maamina chi wẽra mukĩrawãe ɓuuba Dachi Mechiu ʉ̃rʉbena biꞌia kʉ̃risia ɓuabarii. Nau kakuaɗe mauɗe jauriɗe ichi baita biꞌia ɓuai kʉ̃ria ɓuu.

35 Mau mʉʉba jarawẽa ɓuu machiba kʉ̃ria panuu kĩra panarãaɗamera maumaarã biꞌia nureaɗamera. Mʉʉba aɓa kʉ̃ria ɓuu machi kĩra jipa nureaɗayu mauɗe joma machi sõɗeeba Dachi Mechiuba kʉ̃ria ɓuu wauɗayu.

36 Mukĩra aɓaba ãwera ome adaui baita beɗea dea ɓuubʉrã, adaui naeɗe poyaa jãaduawẽe kʉ̃risiaruubʉrã mauɗe isa kãi kʉ̃riaruubʉrã, kãi ɓuu. Mau kachiruawãema. 37 Maamina chi adaui baita beɗea deasiiɗe ichi sõɗe mau wẽra kãibai a kʉ̃risia ɓuubʉrã mauɗe ichi kakuaba kʉ̃ria ɓuu poyaa jãadua ɓuubʉrã, biꞌia ɓuu mau wẽra ome kãibai. 38 Biawãra chi miakãiruuba biꞌia wau ɓuu. Maamina mʉʉmaarã chi miakãiwẽeba aude bibuara wau ɓuu.*

39 Chi wẽra mukĩra bara ɓuu chi mukĩra chokae ɓuumisa ichi ome ɓuai ɓuu. Maamina chi mukĩra biuruubʉrã, waya miakãi kʉ̃riaruubʉrã, poyaa miakãai ɓuu. Maamina aɓaburu Dachi Mechiuɗe ijãa ɓuu ome miakãai ɓuu. 40 Mʉʉba kʉ̃risia ɓuu ichi kima adauwẽebʉrã kĩrajʉʉ ɓuai. Mauɗe mʉʉba kʉ̃risia ɓuu Dachi Akõre Jauriba maka kʉ̃risiabi ɓuu.

Juaba ne kapeɗaaɗamaa ãnimara kiuru baa deaɗa ʉ̃rʉbena

8 Jãabae Dachi Akõre kuenda juaba ne kapeɗaaɗamaa ãnimara kiuru baa deaɗa ʉ̃rʉbena mʉʉba jaraaruu.* Machiba jara panuu mau ʉ̃rʉbena kʉ̃risia kuitaa panuu. Maamina chi kʉ̃risia kuitaaba dachi waabenarã audeara biꞌia ɓuu kʉ̃risiabiabarii. Dachiba waabenarã kʉ̃ria panuuɗeeba waabenarã aiɗabadau. 2 Aɓauba ãrea kuitaa nii kʉ̃risia ɓuubʉrã, wabiɗa adua ɓuu ichiba kuitaai ɓuu kĩra. 3 Maamina aɓauba Dachi Akõre kʉ̃ria ɓuubʉrã, Dachi Akõreba mau kuitaa ɓuu.*

4 Mauɗeeba Dachi Akõrerã kuenda juaba ne kapeɗaaɗarãmaa ãnimara kiuru baa deaɗa kobadau ʉ̃rʉbena mʉʉba jaraaruu. Dachiba kuitaa panuu juaba ne kapeɗaaɗa biawãrawãe. Mauɗe kuitaa panuu Dachi Akõre biawãra aɓaburu nii. 5 Bajãaɗe mauɗe nau iujãaɗe «akõre mechiurã» abadau barau. Biawãra maarã mauɗe ẽbẽrarãba «ãchi chibarirã» abadau siɗa ãrea barau. 6 Maamina dachimaarã Dachi Akõre aɓaburu nii. Ichi dachi Bajãaɗebena Akõrebʉ. Ichiaburu ne joma wausii. Dachi ichi baita chokae panuu. Mauɗe Dachi Mechiu Jesucristo aɓaburu nii. Ichiɗeeba Dachi Akõreba ne joma wausii. Ichiɗeeba dachi chokae panuu.

7 Maamina waabenarãba mau sõɗeeba kuitaaɗawẽa panuu. Waabenarã ãbarãba wabiɗa kʉ̃risia panuu chi juaba ne kapeɗaaɗa ãchiba naeɗe kʉ̃ria panaɗa chokae panaɗa. Mauɗeeba chi juaba ne kapeɗaaɗarãmaa ãnimara kiuru deaɗa kooduubʉrã kʉ̃risiabadau maarãɗe ijãaduu. Chi biawãra beɗea ãrea adua panuuɗeeba mau ãnimara kiuru ko panuuɗeeba kʉ̃risiabadau Dachi Akõre daaɗe kachirua paneeduu. 8 Maamina chi ãnimara kiuru kooduuba dachi Dachi Akõre ome biꞌia ɓukau. Mauɗeeba dachiba ko panuuɗeeba maebʉrã koɗawẽa panuuɗeeba Dachi Akõre daaɗe biꞌia nureaɗaabai.

9 Biawãra dachiba ko kʉ̃ria panuu poyaa koɗai panuu. Maamina kauwa panásturu machiba barikia kooduuɗeeba machi ãba mau ʉ̃rʉbena adua nii kachiruaɗe ɓaerãamera. 10 Bichi chi Dachi Akõre kuenda juaba ne kapeɗaaɗa deɗe ko akʉ ɓeeruubʉrã, mauɗe chi ne joma koi ɓuu adua niiba bichi aria akʉ ɓuu unuuruubʉrã, ichia biɗa Dachi Akõre kuenda juaba ne kapeɗaaɗarãmaa ãnimara kiuru baa deaɗa koi kʉ̃risiai. Maamina chi juaba ne kapeɗaaɗamaa ʉtaa iɗiiruu kʉ̃risia ɓuuɗeeba, ichimaarã mau kachirua wau ɓuu. 11 Maka chi ne joma koi ɓuu kuitaa ɓuuba chi mau ʉ̃rʉbena chi ãrea adua nii ãba, chi mau Cristo biusii kakua ãba, ichiɗe ijãai ida ɓubii. 12 Machiba mau adua nuree ãbarã kachiruaɗe ɓaebiaduuɗe Cristomaa kachirua wau panuu. 13 Mauɗeeba mʉʉba ko ɓuuɗeeba mʉ ãba kachiruaɗe ɓaebiiruubʉrã, waa koobai.

Pablo beɗea ũribadaurãba ichi aiɗaɗai panuu

9 ¿Mʉʉba wau kʉ̃ria ɓuu wauwẽa ɓuka? ¿Mʉ Jesucristoba bʉiɗawãeka? ¿Mʉa biɗa Dachi Mechiu Jesús unusiiwãeka?* ¿Machiba mʉʉɗeeba Dachi Mechiuɗe ijãapeɗaaɗawãeka? 2 Waabenarã ãbarãba mʉ Jesucristoba bʉiɗa kʉ̃risiaɗawẽa panumina machiba kuitaaɗai panuu mʉ biawãra ichiba bʉiɗabʉ. Mʉʉba jaradeasiiɗeeba machiba Dachi Mechiuɗe ijãasiiɗeeba mau unubi ɓuu. 3 Chi mʉ ʉ̃rʉbena kachirua jarabadaurãmaa mʉʉba naka iɗiiruu: 4 ¿Mʉʉba jaradea ɓuuɗeeba koi baita adaubai ɓuka? ¿Doi baita biɗa adaubai ɓuka? 5 Waabenarã Jesusba bʉiɗarã, Dachi Mechiu Jesús ãbarã mauɗe Pedro ãchi wẽrarã ome ãbua nibabadau.* Ara maarã kĩra ¿Jesusɗe ijãa ɓuu wẽra ome kãipeɗa, mʉ ome ãbua uru nibaabai ɓuka? 6 Bernabeba, mʉa biɗa Dachi Akõre beɗea jaradea nibaɗaɗe awara traju waubadau ne uru panaɗai baita. Maamina ¿waabenarã kĩra daiba jaradea panuuɗeeba ne adau panaɗai panuuwãeka?

7 ¿Kokoroa ara ichi chi nejarraba chĩoɗe wãbarika? ¿Chi uva uuɗa uru ɓuuba ichi uva jõbariiwãeka? ¿Oeja nubariiba oeja ju ɓaa dobariiwãeka? 8 ¿Joma mau mʉ kʉ̃risiaɗeeba jara ɓuka? ¿Moisesba ɓʉɗaɗe ara mau kĩra jara ɓuuwãeka? 9 Mau ɓʉɗaɗe naka ɓʉ kuɓuu: «Pakaba ne biraduamaa ɓuuɗe chi kũ jʉ̃rã́se».* Dachi Akõreba mau beɗea jarasiiɗe ¿paka ʉ̃rʉbenáturu kʉ̃risiabarika? 10 ¿Dachi ʉ̃rʉbena siɗa kʉ̃risia ɓuasiiwãeka? Biawãra dachi baita Dachi Akõreba mau Moisesba ɓʉɗa deasii. Chi netaa uubarii mauɗe chi chauɗa pebarii trajabadau, mauɗebena ne uru panaɗai kuitaa panuuɗeeba. 11 Ara mau kĩra daiba machimaa Dachi Akõre beɗea jaradeasiiɗeeba ¿biꞌia ɓuuwãeka daiba machiɗebena ne adauɗai? 12 Waabenarãba machiɗebena ne adauɗai panuubʉrã, daiba ãchi audeara biꞌia ne adauɗai panuu.

Maamina ne iɗiɗakau. Maumaarã joma jãadua panuu ẽbẽrarãba chi beɗea bia Cristo ʉ̃rʉbena kachirua kʉ̃risiarãaɗamera. 13 Machiba kuitaa panuu Dachi Akõre de mechiuɗe trajabadaurãba ãchiba wau panuuɗeeba adaubadau koɗai baita. Chi ãnimara baa deabadaurãba mau kiuruɗebena adaubadau koɗai baita. 14 Ara mau kĩra Dachi Mechiu Jesusba jarasii chi beɗea bia ichi ʉ̃rʉbena jaradea nibabadaurãba mauɗebena adauɗai panuu koɗai baita.* 15 Maamina mʉʉba mau adaukau. Mau ʉ̃rʉbena nau kartaɗe ɓʉwãe ɓuu machiba chi nejarra deaɗamera. Mʉʉba jaradea ɓuuɗeeba chi nejarra adaukauɗeeba kĩrajʉʉ ɓuu. Mʉʉba kʉ̃riawẽma aɓau biɗa chi nejarra dea ɓuuɗeeba mau kĩrajʉʉ wãꞌãebii. Mʉʉmaarã machiɗebena chi nejarra adaui kãyabãra biui bibuara ɓuu.

16 Mʉʉba chi beɗea bia Cristo ʉ̃rʉbena jaradea ɓumina mʉ chi mechiu akau, Dachi Akõréburu jaradeabi ɓuuɗeeba. Biawãra mau beɗea bia jaradeawẽebʉrã, mʉ miichuburi ɓeei. 17 Ara michi kʉ̃ria jaradea ɓuubʉrã, chi nejarra adaui ɓuu. Maamina ara michi kʉ̃ria jaradeawẽa ɓuu. Dachi Akõréburu mʉʉmaa jaradeabisiiɗeeba, mʉʉba makai ɓuu. 18 Makarã ¿mʉʉba jaradea ɓuu baita, kãare adauima? Ne adaubai. Kĩrajʉʉ ɓuai chi beɗea bia Cristo ʉ̃rʉbena jaradea ɓuuɗeeba. Mʉʉba jaradea ɓuuɗeeba ne adaui ɓumina ne iɗikau.

19 Mʉ aɓau chibari baita biɗa ɓari trajabariiwãeɗeeba chi jomaurã chibari baita bari trajabarii ɓeesii ãreaba mʉʉɗeeba Jesucristoɗe ijãaɗamera. 20 Mʉ judiorã tãeɗe ɓuuɗe judiorã kĩra ɓuabarii mʉʉɗeeba Jesucristoɗe ijãaɗamera. Chi Moisesba ɓʉɗa ũribadaurã nuree tãeɗe ɓuuɗe mʉ mau Moisesba ɓʉɗaɗeeba ɓuuwãemina mau kĩra ɓuabarii ãchiba mʉʉɗeeba Jesucristoɗe ijãaɗamera. 21 Mauɗe chi Moisesba ɓʉɗa adua nuree tãeɗe ɓuuɗe mʉ ãchi kĩra ɓuabarii mʉʉɗeeba Jesucristoɗe ijãaɗamera. Maamina mʉʉba Dachi Akõreba Moisesmaa ɓʉbiɗa ida ɓukau. Joma Cristoba waubi ɓuu kĩra waubarii. 22 Chi ãbarã chi biawãra beɗea ãrea adua nuree tãeɗe ɓuuɗe ãchi kĩra ɓuabarii mʉʉɗeeba Jesucristo ʉ̃rʉbena biꞌia kuitaaɗamera. Mʉ wãaruucha ẽbẽrarã tãeɗe ɓuuɗe maarã kĩra ɓuabarii mʉʉɗeeba waabenarãba Cristoɗe ijãaɗapeɗa mʉʉba maarã kachiruaɗebena karibamera. 23 Mʉʉba joma mau kĩra waubarii chi beɗea bia Cristo ʉ̃rʉbena kuitaabii baita. Maka mʉa biɗa Dachi Akõreɗebena ne biꞌia adaui.

24 Machiba kuitaa panuu ẽbẽrarã pirabadau kai chi aude isa pira nii kuitaaɗai baita. Mauɗe kabanaa pirabadamina aɓa chi naa neeɗaburu ne adaubarii. Machi siɗa isa piraaduu kĩra joma biꞌia wáusturu Dachi Akõreba deai jaraɗa adauɗai baita. 25 Pirabadaurãba ãchi kakua nubadau chaarea nureaɗai baita. Maka waubadau waabenarã audeara biꞌia piraɗapeɗa boro jũra adauɗai baita. Mau boro jũra isa bʉʉbarii.* Maamina dachiba ne joma biꞌia waubadau Dachi Akõreba deai jaraɗa bʉʉkau adauɗai baita. 26 Mauɗeeba ẽbẽra barikia pira wãaruu kĩra mʉʉba waukau. Mauɗe ẽbẽra barikia drʉ ɓuu kĩra drʉkau. 27 Maumaarã mʉ kakua chaarea wau ɓuu mauɗe mʉ kakuaba waubai ɓuu mʉʉba waubi ɓuu. Maka joma wau ɓuu Dachi Akõreba deai jaraɗa adaui baita. Maka wauwẽebʉrã, mʉʉba ẽbẽrarãmaa jaradea ɓuasmina Dachi Akõreba deai jaraɗa poyaa adaubai.

Israelɗebenarãba kachirua waupeɗaaɗa ʉ̃rʉbena

10 Ãbarã, mʉʉba kʉ̃ria ɓuu machiba Moisés ewariɗe makaɗa kĩrabaɗawẽa panaɗai. Mau ewariɗe joma dachi nabẽraeɗebenarã Moisés baara nibapeɗaaɗa Dachi Akõreba bʉiɗa jʉ̃rʉara ekare nibasiɗau mauɗe Mar Purrɗe kĩaraa wãsiɗau.* 2 Mau marɗe mauɗe jʉ̃rʉara ekare joma ãchi Moisés ome ãbua panasiiɗeeba Moisés trʉ̃ɗeeba boro eapeɗaaɗa kĩra panasiɗau. 3 Jomaurãba chi araɓau chiko Dachi Akõreba bajãaɗebena bʉiɗa kobachiɗau.* 4 Jomaurãba araɓau bania Dachi Akõreba eakarrɗebena eaɓaribiɗa dobachiɗau.* Mau eakarr Cristo jara ɓuu, ãchi wãaduucha Cristo jauriɗeeba ãchi ome ɓuasiiɗeeba. 5 Maamina Dachi Akõreba ãchiɗebena ãrea biꞌiwãe unusii, ichi ome kachirua wausiɗauɗeeba. Mauɗeeba drua sirua wãꞌãe ɓuuɗe kinisiɗau.

6 Mau ewariɗe makaɗaba dachimaa kuitaabi ɓuu kachirua kʉ̃riaɗaabai panuu ãchiba kʉ̃riapeɗaaɗa kĩra. 7 Juaba ne kapeɗaaɗaɗe ijãarã́sturu waabenarã chi nureeba ijãapeɗaaɗa kĩra.* Dachi Akõre beɗeaɗe ãchi ʉ̃rʉbena naka ɓʉ kuɓuu: «Ẽbẽrarã akʉ paneeɗapeɗa kĩrajʉʉ ãbua ko duanasiɗau mauɗe itua do duanasiɗau. Mau maaɗakare jiraduɗapeɗa ãchi kakuaba wau kʉ̃ria ɓuu wau duaneesiɗau».* 8 Dachi kakuaba barikia kachirua wauɗaabai panuu waabenarãba waupeɗaaɗa kĩra. Ãchiba maka wau panuu kakua ara ewari aɓaɗe 23.000 kinisiɗau.* 9 Cristoba saka waui kuitaai dachiba kachirua wauɗaabai panuu waabenarã ãchiba waupeɗaaɗa kĩra. Mauɗeeba chi nuree damaba kaakuapeɗa kinisiɗau.* 10 Kĩrajʉʉwẽa panuuɗeeba Dachi Akõre ʉ̃rʉbena kachirua berrearã́sturu waabenarã chi nureeba waupeɗaaɗa kĩra. Mauɗeeba chi ángel dachi kinibibariiba ãchi ãrea kinibiasii.*

11 Joma ãchi makaɗaba unubi ɓuu saka Dachi Akõreba kachirua kastikabarii. Mau Dachi Akõre beɗeaɗe ɓʉ kuɓuu dachi nau kaaɗearebena ewariɗe nureerãba ara mau kĩra waurãaɗamera. 12 Mauɗeeba aɓauba ãrea ijãa ɓuu kʉ̃risia ɓuubʉrã, ara ichi du aɓa kauwa ɓuai ɓuu kachiruaɗe ida ɓaebiamaaba. 13 Ɓeseɗe dachi sõɗe kʉ̃risiabadau kachirua wauɗai baita, jomaurãba maka kʉ̃risiabadau kĩra. Mau poyaa dauchia jãadua panaɗawẽebʉrã, Dachi Akõreba dachimaa maka kʉ̃risiabiabai. Mauɗe dachiba maka kʉ̃risia paneeduuɗe ichiba aiɗai dauchia jãadua panaɗamera, ichiba jara ɓuu kĩra ewaricha waubariiɗeeba.

Juaba ne kapeɗaaɗa ida ɓuɗai panuu ʉ̃rʉbena

14 Mauɗeeba mʉ ãbarã mʉa kʉ̃riakuabarii, Dachi Akõre kuenda juaba ne kapeɗaaɗa ida ɓústuru. 15 Mʉʉba machimaa berrearuu kʉ̃risia kuitaa nureerãmaa berrearuu kĩra. Ãrea kʉ̃risiásturu mʉʉba jara ɓuu biawãra kuitaai. 16 Dachi Mechiu kĩraba panuuɗe dachiba uva ɓaa basuɗe ɓuu ʉ̃rʉbena Dachi Akõremaa ichíturu kiɗibai aɗapeɗa dobadau. Mau dooduuɗe unubibadau dachi Cristo oaɗeeba ichi ome ãbua panuu. Mauɗe pan ɓʉakuaɗa kooduuɗe unubibadau Cristo nau kakuaɗe ãrea biꞌiwãe ɓuasiiɗeeba dachi ichi ome ãbua panuu. 17 Dachiba pan aɓa ɓuu ãrea ɓʉakuapeɗa kobadau. Ara mau kĩra dachi ãrea panumina kakua aɓa ɓuu kĩra nuree.

18 Israelɗebenarãba waubadau ʉ̃rʉbena kʉ̃risiásturu. Ãchiba ãnimara Dachi Akõremaa baa deaduuɗe mau kiuruɗebena kobadau. Mau kooduuɗe unubibadau Dachi Akõreɗe ijãa panuu. (Ara mau kĩra aɓauba Dachi Akõre kuenda juaba ne kapeɗaaɗamaa kiuru baa deaɗaɗebena kooruubʉrã, unubii mau juaba kapeɗaaɗaɗe ijãa ɓuu). 19 Maamina mʉʉba jarawẽa ɓuu chi Dachi Akõre kuenda juaba ne kapeɗaaɗa biawãrabʉ. Chi maarãmaa kiuru deaɗaɗebena kiuru kĩra ɓuu. 20 Maamina Dachi Akõreɗe ijãaɗakaurãba kiuru ãchi juaba ne kapeɗaaɗarãmaa deaduuɗe biawãra jai kachiruarãmaa dea panuu. Dachi Akõremaa dea panuuwãema. Machiba mau kiuru kooduubʉrã, unubiɗai jai kachiruaɗe ijãa panuu. Mau mʉʉba kʉ̃riawẽma. 21 Jauri kachiruamaa deaɗa basuɗe ɓuu machiba dooduubʉrã, Jesucristo oa kĩrabaɗai baitabena basuɗe ɓuu doɗaabai panuu. Jai kachiruamaa ãnimara kiuru deaɗa machiba kooduubʉrã, Dachi Mechiu kĩrabaɗai baitabena kobadau koɗaabai panuu. 22 Maka wauduubʉrã ¿Dachi Mechiu kĩrubiɗaabaika? ¿Dachi ichi audeara meserãa nuree kĩra?

Joma wáusturu ãbarãba biꞌia kʉ̃risiaɗamera

23 Waabenarãba jara panuu «Cristoɗe ijãa ɓuuɗeeba mʉʉba kʉ̃ria ɓuu kĩra joma waui ɓuu». Maamina mʉʉba jaraaruu: ne joma waui ɓumina joma dachiba wau kʉ̃ria ɓuuba dachi aiɗakau. Biawãra joma dachiba wau kʉ̃ria ɓuu waui ɓumina joma mauba ãbarã aiɗakau. 24 Aɓau biɗa ara ichi biꞌia ɓuai jʉrʉ ɓuabai ɓuu, maumaarã waabenarã biꞌia nureaɗamera jʉrʉ ɓuai ɓuu.

25 Kiuru nedobʉibadaumare nedobʉiɗa joma koɗai panuu. Maamina iɗirã́sturu mau kiuru chi Dachi Akõre kuenda juaba ne kapeɗaaɗamaa deapeɗaaɗa baɗa kuitaaɗai baita, mau biꞌiwãe ɓuu a kʉ̃risia panuuɗeeba. 26 Nau iujãa mauɗe ne joma nau iujãaɗe ɓuu Dachi Mechiuba wausii. Mauɗeeba ne joma koɗai panuu.

27 Chi Jesusɗe ijãawẽa ɓuuba machi koɗamera iuruubʉrã mauɗe wã kʉ̃riaduubʉrã, wã́sturu. Ichiba dearuu kósturu. Iɗirã́sturu mau chiko Dachi Akõre kuenda juaba ne kapeɗaaɗamaa deapeɗaaɗa baɗa kuitaaɗai baita, mau biꞌiwãe ɓuu a kʉ̃risia ɓuuɗeeba. 28 Maamina aɓauba «nau kiuru Dachi Akõre kuenda juaba ne kapeɗaaɗamaa deapeɗaaɗa» aaruubʉrã, mau korã́se ichiba mau biꞌiwãe ɓuu a kʉ̃risiai ɓuuɗeeba.* 29 Mʉʉba jarawẽa ɓuu machiba mau kiuru koɗakau panuu. Maumaarã mʉʉba jara ɓuu chi aɓáuburu maka kʉ̃risia ɓuu.

Aɓauba naka kʉ̃risiai: Mʉʉba wau kʉ̃ria ɓuu wauruuɗe aɓauba kachirua a kʉ̃risiaruubʉrã, ¿mau poyaa waukau ɓuka? ¿Mʉʉba wau kʉ̃ria ɓuu kĩra waubai ɓuka? 30 Mʉʉba chiko ʉ̃rʉbena Dachi Akõremaa ichíturu kiɗibai aaruubʉrã, ¿sakãe waabenarãba mʉʉba chiko kooruu ʉ̃rʉbena kachirua berreaɗai panuma? Kachirua jaraɗaabai ɓuu.

31 Maamina mʉʉba jaraaruu: machi komaa panuuɗe mauɗe waumaa panuuɗe joma wáusturu ẽbẽrarãba Dachi Akõre ʉ̃rʉbena biꞌia jaraɗamera. 32 Machiba wau panuuɗeeba judiorã, judiowãerã mauɗe ẽbẽrarã Dachi Akõreɗerã kachiruaɗe ɓaebirã́sturu. 33 Ara mau kĩra mʉʉba wau ɓuuɗeeba jomaurãmaa biꞌia kʉ̃risiabiai kʉ̃ria ɓuu. Aɓaburu mʉ biꞌia ɓuai baita jʉrʉkau, maumaarã ẽbẽrarã ãrea biꞌia nureaɗamera jʉrʉbarii. Maka mʉʉba wau ɓuuɗeeba ãchiba Cristoɗe ijãaɗai Dachi Akõreba karibamera.

11 Mʉ Cristo nibaɗa kĩra nibabariiɗeeba mʉ kĩra nibásturu.

Neekaurã boroɗe jʉ̃badau ʉ̃rʉbena

2 Ãbarã, ewaricha mʉ kĩraba panuuɗeeba mauɗe mʉʉba jaradeaɗa ũri panabadauɗeeba machimaa biꞌia jaraaruu. 3 Maamina mʉʉba kʉ̃ria ɓuu machiba kuitaaɗai Cristo, joma mukĩra chibaribʉ; mukĩra, wẽra chibaribʉ; mauɗe Dachi Akõre, Cristo chibaribʉ.* 4 Ãbarã araa ãbua imiiduuɗe chi mukĩra ichi boroɗe ne jʉ̃peɗa Dachi Akõremaa ʉtaa iɗiiruubʉrã maebʉrã Dachi Akõre baita berrearuubʉrã, ichi chibari Cristo wapeawẽa nii unubi ɓuu. 5 Maamina wẽraba Dachi Akõremaa ʉtaa iɗiiruuɗe maebʉrã Dachi Akõre baita berrearuuɗe ichi boroɗe ne jʉ̃wẽebʉrã, ichi kima wapeawẽa nii unubi ɓuu. Chi maka wau ɓuu boro metaɗa kĩra ɓuu. 6 Wẽra chi boroɗe ne jʉ̃wẽebʉrã, boro tʉʉi ɓuu. Maamina boro tʉʉpeɗa nejasiai ɓuubʉrã maebʉrã boro metaɗa nejasiai ɓuubʉrã, boroɗe ne jʉ̃i ɓuu.

7 Mukĩrarã boroɗe ne jʉ̃ɗaabai panuu Dachi Akõreba ara ichi kĩra wausiiɗeeba mauɗe mukĩrarãba Dachi Akõre ãchi chibari unubi panuuɗeeba. Maamina wẽrarãba unubi panuu mukĩra ãchi chibaribʉ.* 8 Dachi Akõreba mukĩra wẽraɗebena waubasii, maumaarã wẽra mukĩraɗebena wausii.* 9 Mauɗe mukĩra wẽra baita waubasii, maumaarã wẽra mukĩra baita wausii. 10 Mauɗeeba wẽraba ichi boroɗe anaɓari jʉ̃barii jʉ̃i ɓuu unubii baita chi kima ichi chibari. Maka waui ɓuu angelerãba biꞌia unuɗamera.

11 Maamina machiba Dachi Mechiuɗe ijãabadauɗeeba wẽra chi mukĩra baita ɓuu mauɗe mukĩra chi wẽra baita ɓuu. 12 Chi nabena wẽra mukĩraɗebena neesii. Mamau tõpe mukĩra wẽraɗebena neebarii. Maamina biawãra joma Dachi Akõreɗebena nee panuu.

13 Machimaarã, ¿biꞌia ɓuka wẽraba boroɗe ne jʉ̃barii jʉ̃wẽeɗe Dachi Akõremaa ʉtaa iɗii? Ãrea kʉ̃risiásturu biꞌia ɓuu kuitaaɗai baita. 14 Ara dachi saka nureeɗeeba kuitaa panuu mukĩraba buɗa deseroa awa niibʉrã nejasiai ɓuu. 15 Maamina wẽra buɗa deseroa awa niibʉrã biꞌia unubadau. Dachi Akõreba wẽramaa buɗa deasii boroɗe anaɓari jʉ̃barii kĩra jʉ̃mera. 16 Aɓauba mau kakua oa kachirua berrea ɓeeruubʉrã, mʉʉba nau ichimaa jaraaruu: daiba mauɗe ẽbẽrarã Dachi Akõreɗerã awara wauɗakau.

Dachi Mechiu kĩrabaɗai baita kobadau ãbarãba biꞌiwãe waupeɗaaɗa

17 Nau ɓʉʉruuɗe mʉʉba machi poyaa biꞌia jarawẽma. Machi araa ãbua imiiduuɗe kĩra jipa wauɗakau. Biꞌia panaɗai audeara kachirua wau paneebadau. 18 Naa jaraaruu mʉʉba ũri ɓuu machi araa ãbua imiiduuɗe kʉ̃risia aꞌawaraa duanabarii. Mʉʉba kʉ̃risia ɓuu chi mʉʉmaa nebʉrʉpeɗaaɗa chi ɓee biawãra ɓuu. 19 Biawãra machi kʉ̃risia aꞌawaraa panuuɗeeba unubiɗai kairã Dachi Akõreba biꞌia unu ɓuu. 20 Machi araa ãbua imiiduuɗe Dachi Mechiu kĩrabaɗai baita kobadau kĩra jipa koɗakau. 21 Jomaurã neeɗai naeɗe machicha chi chiko kobadau. Mauɗe chi nuree jarrbisia duaneebarii mauɗe chi nuree itua biu duaneebarii.* 22 ¿Machi de wãꞌãe nuree kĩra aria koɗai baita mauɗe doɗai baita? ¿Machiba ẽbẽrarã Dachi Akõreɗerã kʉ̃ria panuuwãeka? ¿Mauba chi nejarr barauwãe nuree kĩra nejasiabi panuuwãeka? ¿Mʉʉba kãare jaraima? ¿Mauɗeeba mʉʉba machi biꞌia jaraaruka? Mau kakua biꞌia jaraabai.

Dachi Mechiu kĩrabaɗai baita kobadau

23 Mʉʉba machimaa jaradeaɗa Dachi Mechiu Jesusɗebena kuitaasii. Mau naka ɓuu: ẽsabuɗe Dachi Mechiu Jesús jidaubii naeɗe ichi juaɗe pan adausii. 24 Dachi Akõremaa bichíturu kiɗibai apeɗa chi pan ɓʉaruuɗe jarasii: «Adáusturu. Kósturu.* Nau mʉ kakuabʉ, machi kakua dearuu. Mʉ kĩrabaɗai baita ara nau kĩra wau panásturu». 25 Kopeɗaaɗakare, ara mau kĩra basu ichi juaɗe adaupeɗa jarasii: «Nau basuɗe ɓuu mʉ oabʉ. Mʉ oaɗeeba Dachi Akõreba machimaa beɗea chiwiɗi dearuu. Nau dooduucha mʉ kĩrabaɗai baita dósturu».*

26 Dachi Mechiu Jesús neeruumisa mau pan kooduucha mauɗe mau basuɗe ɓuu dooduucha machiba ichi biuɗa ʉ̃rʉbena jara panuu. 27 Mauɗeeba barikiuba Dachi Mechiu wapeawẽa mau pan kooruubʉrã mauɗe mau basuɗe ɓuu dooruubʉrã, kachirua wau ɓuu. Dachi Mechiu kakua mauɗe chi oa biꞌiwãe ɓuu a kʉ̃risia ɓuu. 28 Mau pan koi naeɗe, mau basuɗe ɓuu doi naeɗe dachicha ãrea ichiai ɓuu biawãra Dachi Mechiu wapea ɓuu kuitaai baita. 29 Chi Dachi Mechiu Jesús kakua wapeawẽa ɓuuba mau pan kooruubʉrã, mau basuɗe ɓuu dooruubʉrã, Dachi Akõreba nebʉra barau ai. 30 Mauɗeeba ãrea machiɗebenarã kakua biꞌiwãe nuree, ẽpermo nuree mauɗe waabenarã chi nuree biusiɗau. 31 Maamina ara dachicha ãrea kauwa ichiapeɗaaɗa basirã makarã Dachi Akõreba nebʉra barau aabai basii. 32 Maamina Dachi Mechiuba dachi ichiaruuɗe, dachi kastikabarii nau iujãaɗebenarã ome nebʉra bara ɓuu arãamera.

33 Mauɗeeba mʉ ãbarã, Dachi Mechiu kĩrabaɗai baita kobadau wauduuɗe jomaurã eseɗáusturu ãbua koɗai baita. 34 Aɓa jarrbisia ɓuubʉrã ichi deɗe koi ɓuu. Maka araa ãbua imiiduuɗe Dachi Akõreba machi kastikaabai kachirua wau panuuɗeeba. Mʉʉba wabiɗa jaradeai ɓuu machimaa wãaruuɗe joma jaradeai.

Dachi Akõre Jauriba waubi ɓuu ʉ̃rʉbena

12 Ãbarã, mʉʉba kʉ̃ria ɓuu Dachi Akõre Jauriba waubi ɓuu ʉ̃rʉbena machiba ãrea kuitaaɗayu. 2 Machiba kuitaa panuu Dachi Akõreɗe ijãaɗakaurã nureasiɗauɗe, barikia ʉ̃rʉbena kʉ̃risiabachiɗau. Dachi Akõre kuenda juaba ne kapeɗaaɗaɗe ijãabachiɗau. Chokae nureewãeɗeeba berreaɗakau. 3 Mauɗeeba mʉʉba kʉ̃ria ɓuu machiba nau kuitaaɗayu: Chi Dachi Akõre Jauriɗeeba berrea ɓuuba «Jesús kachirua nii» akau. Mauɗe chi Dachi Akõre Jauriɗeeba berreawẽa ɓuuba «Jesús jomaurã Mechiu» akau.

4 Dachi Akõre Jauri aɓa niiba dachimaa dea ɓuu ne diwaraa wauɗamera. 5 Dachi Mechiu aɓa nii baita ne diwaraa waubadau. 6 Dachi Akõre aɓa niiba dachimaa ne diwaraa waubi ɓuu. Ichiaburu dachiɗeeba mau joma waubarii.

7 Dachi Akõre Jauriba dachicha ne waubiabarii ãbarã jomaurã aiɗaɗamera. 8 Dachi Akõre Jauriba waabenarã chi nureerãmaa dea ɓuu ichi kʉ̃risia kuitaaɗeeba poyaa berreaɗamera. Dachi Akõre Jauri ara aɓa niiba chi nureemaa dea ɓuu ichiɗeeba kuitaapeɗaaɗa poyaa jaradeaɗamera. 9 Dachi Akõre Jauri ara aɓa niiba chi nureemaa dea ɓuu poyaa ãrea ijãa panaɗamera. Mauɗe Dachi Akõre Jauri ara aɓa niiba chi nureemaa dea ɓuu ẽpermo nuree poyaa aribiabiaɗamera. 10 Mauɗe Dachi Akõre Jauriba chi nureemaa dea ɓuu ẽbẽrarãba ne poyaa wauɗakau poyaa wauɗamera. Chi nureemaa dea ɓuu poyaa Dachi Akõre baita berreaɗamera. Chi nureemaa dea ɓuu poyaa kuitaaɗamera aɓauba Dachi Akõre Jauriɗeeba berrea ɓuu maebʉrã jai kachiruaɗeeba berrea ɓuu. Mauɗe chi nureemaa dea ɓuu dachiba ũriɗakau chi beɗea didiwaraa berreaɗamera. Mauɗe chi nureemaa dea ɓuu dachiba kauwa ũriɗakau beɗeaɗe jaraɗa kuitaa jaraɗamera. 11 Ara Dachi Akõre Jauri aɓa niiba joma mau waubi ɓuu. Ichiba dachicha waubi ɓuu ichiba kʉ̃ria ɓuu kĩra.

12 Dachi kakua aɓa ɓumina dachi kakuaɗe joma uru panuu. Cristo ichi ijãabadaurã ome ara mau kĩra panuu. 13 Chi nuree dachiɗebena dachi judiorãbʉ, chi nuree dachiɗebena judiowãerãbʉ, chi nuree dachiɗebena chi chibari baita bari trajabadaurãbʉ, chi nuree dachiɗebena chibariswãe nureerãbʉ. Maamina Dachi Akõre Jauri ara aɓa niiba dachi jomaurã kakua aɓaɗe ɓusii.* Joma dachiba Dachi Akõre Jauri araɓau nii adausiɗau.

14 Dachi kakuaɗe joma uru panuu. Maamina chi dachi kakuaɗe nuree araɓauɗe nureewãema. 15 Dachi jʉ̃rʉba jaraaruubʉrã: «Mʉ chi juawãeɗeeba nau dachi kakuaɗebenawãema», mauɗeeba ¿biawãra dachi kakuaɗebenawãeka? 16 Mauɗe dachi kʉʉrʉba jaraaruubʉrã: «Mʉ chi dauwãeɗeeba nau dachi kakuaɗebenawãema», mauɗeeba ¿biawãra dachi kakuaɗebenawãeka? 17 Dachi kakuaɗe aɓaburu dau basirã ¿kãareba ũrii basma? Dachi kakuaɗe aɓaburu kʉʉrʉ basirã ¿kãareba ʉ̃i basma? 18 Dachi Akõreba dachi kakuaɗe joma ɓusii ichiba kʉ̃ria ɓuaɗa kĩra. 19 Dachi kakuaɗe duanuu joma araɓau basirã kakua wãꞌãe bai basii. 20 Dachi kakuaɗe ne joma uru panumina dachi kakua aɓa nii.

21 Mauɗeeba dachi dauba chi juamaa poyaa jaraabai: «Bichiwãe mʉ biꞌia ɓuai». Mauɗe dachi boroba chi jʉ̃rʉmaa poyaa jaraabai: «Machiwãe mʉ biꞌia ɓuai». 22 Biawãra nau kakuaɗe nuree, chi nuree dachimaarã biꞌiwãe nureebʉ. Maamina maarãswãe dachi kakua biꞌia ɓuakau. 23 Mauɗe chi dachimaarã nau kakuaɗe ãrea balewẽa ɓee biꞌia nubadau biꞌia unuɗamera. Mauɗe nau kakuaɗe chi nuree dachiba unubiɗaabai panuu kauwa merabadau. 24 Maamina dachi kakuaɗe kĩrawãrea nuree meraɗakau. Dachi Akõreba dachi kakuaɗe nuree joma araa ãbua wausii. Chi dachiba unubiɗakau wausii biꞌia nuɗamera. 25 Maka wausii dachi kakua kachirua ɓeerãamera, maumaarã dachi kakuaɗe nuree chiya nu panaɗamera. 26 Dachi kakuaɗebena aɓa puꞌuaruubʉrã, chi kakua joma puꞌuabarii. Ara mau kĩra dachi kakuaɗebena aɓa biꞌia jaraaruubʉrã, joma kĩrajʉʉbadau.

27 Ara mau kĩra machi joma ara chi Cristo kakua kĩra nuree. Machi ichi kakuaɗebenarãbʉ. 28 Dachi Akõreba ãbarã tãeɗe chi Jesucristoba bʉiɗarã naa ɓusii. Mawãare ichi baita berreabadaurã ɓusii. Mawãare ichi beɗea jaradeabadaurã ɓusii. Mawãare waabenarã ɓusii ẽbẽrarãba ne poyaa wauɗakau poyaa wauɗamera, chi nuree ɓusii ẽpermo nuree poyaa aribiabiaɗamera, chi nuree ɓusii ãbarã aiɗaɗamera, chi nuree ɓusii chi ãbarã tãeɗe saka wauɗai kuitaa panaɗamera, mauɗe chi nuree ɓusii barikiu dachiba ũriɗakau beɗeaɗe berreaɗamera. 29 Makarã ¿jomaurã Jesucristoba bʉiɗarãka? ¿Jomaurã Dachi Akõre baita berreabadaurãka? ¿Jomaurã Dachi Akõre beɗea jaradeabadaurãka? ¿Jomaurãba ẽbẽrarãba ne poyaa wauɗakau poyaa waubadaurãka? 30 ¿Dachi Akõreba jomaurãmaa deasika ẽpermo nuree poyaa aribiabiaɗamera? ¿Dachi Akõreba jomaurãmaa deasika dachiba ũriɗakau beɗeaɗe poyaa berreaɗamera? ¿Jomaurãba dachiba ũriɗakau beɗeaɗe jaraɗa poyaa kuitaa jaraɗai panuka? 31 Dachi Akõre Jauriba waubi ɓuuɗebena chi dachi aude aiɗa nuree jʉrʉ́sturu.

Jãabae mʉʉba machimaa kuitaabiai saka ne joma poyaa aude biꞌia wau panaɗayu.*

Waabenarã kʉ̃riaɗai chi aude bibuara ɓuu

13 Mʉ nau iujãaɗebenarã beɗeaɗe berrearuubʉrã mauɗe ángel beɗeaɗe berrearuubʉrã mauɗe waabenarã ẽbẽrarã kʉ̃riawẽa ɓuubʉrã, mʉ jiorr wauɗa jĩwabarii kĩra maebʉrã campana jĩwabarii kĩra nii.* 2 Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa ɓuaɗa joma kuitaa ɓuubʉrã, Dachi Akõre kʉ̃risia kuitaa joma kuitaa ɓuubʉrã, mauɗe sõɗeeba biawãra ijãa ɓuuɗeeba ea poyaa ãyaa ɓuuruubʉrã, mauɗe waabenarã kʉ̃riawẽa ɓuubʉrã, mʉ baleswãe nii kĩra nii. 3 Joma mʉʉba uru ɓuu chi wãꞌãe nureemaa dearuubʉrã mauɗe Dachi Akõre baita ara michi kakua ida baa deabiiruubʉrã, maamina waabenarã kʉ̃riawẽa ɓuubʉrã, mʉ baleswãe nii kĩra nii.

4 Chi waabenarã kʉ̃riabariiba joma jãadua ɓuu, waabena kĩra chuburiabarii, waabenaba uru ɓuu uru ɓuai kʉ̃riakau, waabena audeara biꞌia nii jarakau mauɗe maka nii kʉ̃risiakau. 5 Chi waabenarã kʉ̃riabariiba waabenarã wapeadee ua ɓuabarii, ara ichi báitaburu ɓuu kʉ̃risiakau, bari au kĩrukau, waabenaba ichi kachirua wauɗa kĩrabakau. 6 Kachirua kakua kĩrajʉʉkau, maumaarã biawãra kakua kĩrajʉʉbarii. 7 Waabenaba kachirua wauɗa joma jãaduabarii, jomaɗe ijãabarii, waabenaba joma biꞌia waumera eseɗaubarii mauɗe ne jomaɗe jãadua ɓuabarii.

8 Ẽbẽrarã kʉ̃riai wãꞌãekau. Maamina ewari aɓa Dachi Akõre baita berreabadau waa berreaɗaabai, dachiba ũriɗakau beɗeaɗe berreabadau waa berreaɗaabai, Dachi Akõre Jauriɗeeba kuitaapeɗaaɗa jaradeabadaurãba waa jaradeaɗaabai. 9 Mauɗeeba iɗibae dachiba ɓaꞌãraburu kuitaa panuu mauɗe Dachi Akõre baita ɓaꞌãraburu berreabadau. 10 Maamina chi bibuara ɓuu neeruuɗe mau ɓaꞌãra ɓuu wãꞌãe bai. Mauɗe joma kuitaaɗai. 11 Mʉ wabiɗa kaebe nibasiiɗe warr cheke kĩra berreabachii mauɗe warr cheke kĩra kʉ̃risiabachii. Maamina sĩbãra basiiɗe warr cheke kĩra ɓuaɗa ida ɓusii. 12 Ʉ̃rauɗe dachiba Dachi Akõreɗebena tõroroa kĩra unu panuu chi kĩra ichiabadauɗe. Maamina ewari aɓaɗe dachiba joma ʉ̃ɗaa unuɗai mau saka ɓuu. Ʉ̃rauɗe mʉʉba ɓaꞌãraburu kuitaa ɓuu, maamina ewari aɓaɗe joma kuitaai Dachi Akõreba mʉ ʉ̃rʉbena kuitaa ɓuu kĩra. 13 Nau õbea panuu wãꞌãekau: ne jomaɗe biꞌia ijãa ɓuai, eseɗau ɓuai joma biꞌia neemera mauɗe waabenarã kʉ̃ria ɓuai. Mau õbeaɗebena, aɓau kʉ̃ria ɓuai chi aude bibuara ɓuu.

Dachiba ũriɗakau beɗeaɗe berreabadau ʉ̃rʉbena

14 Waabenarã biꞌia kʉ̃ria panásturu. Mauɗe Dachi Akõre Jauriba waubi ɓuu joma wau kʉ̃riásturu. Dachi Akõre baita berreaɗai aude kʉ̃riásturu. 2 Chi dachiba ũriɗakau beɗeaɗe berrea ɓuuba ẽbẽrarãmaa berrea ɓuuwãe, ichiba jaraaruu aɓau biɗa kuitaa ũriɗakauɗeeba. Aɓa Dachi Akõremáburu berrea ɓuu. Dachiba kauwa ũriɗakau chi Dachi Akõre Jauriɗeeba dachiba adua panabarii beɗea berrea ɓuu. 3 Maamina chi Dachi Akõre baita berrea ɓuuba ẽbẽrarãmaa berrea ɓuu biꞌia ijãaɗamera, chaarea nureaɗamera mauɗe sõbia panaɗamera. 4 Chi dachiba ũriɗakau beɗeaɗe berrea ɓuuba ara ichi du aɓa aiɗa ɓuu biꞌia ijãai baita. Maamina chi Dachi Akõre baita berrea ɓuuba ãbarã aiɗa ɓuu biꞌia ijãaɗamera.

5 Mʉʉmaarã joma machi dachiba ũriɗakau beɗeaɗe poyaa berreabadau basirã biꞌia ɓuai basii. Maamina jomaurã Dachi Akõre baita poyaa berreabadau basirã biꞌia ɓuai basii. Biawãra dachiba ũriɗakau beɗeaɗe berreai audeara Dachi Akõre baita berreai biꞌia ɓuu. Maamina aɓauba dachiba ũriɗakau beɗeaɗe berreapeɗa kuitaa jaraaruubʉrã, mau siɗa biꞌia ɓuu. Maka ãbarãba kauwa ũriɗapeɗa Dachi Akõreɗe biꞌia ijãaɗai. 6 Mauɗeeba ãbarã, mʉ machimaa wãpeɗa dachiba ũriɗakau beɗeaɗe berrearuubʉrã, ¿machi saka aiɗaima? Aiɗaabai. Maamina dachiba ũribadau beɗeaɗe Dachi Akõreba mʉʉmaa unubiɗa jaraaruubʉrã, maebʉrã Dachi Akõre kʉ̃risia kuitaaɗeeba berrearuubʉrã, maebʉrã Dachi Akõre baita berrearuubʉrã, maebʉrã Dachi Akõre beɗea jaradeaibʉrã mauba joma poyaa aiɗai.

7 Ara mau kĩra aɓauba purrsiru maebʉrã arpa chaaruubʉrã maamina arakʉɗe chaawẽebʉrã, jĩwa ɓumina dachiba kuitaaɗaabai kãare chaa ɓuu. 8 Kachu siɗa arakʉɗe chaawẽebʉrã, ¿kokoroarã isa sakaɗaima chĩoɗai baita? 9 Ara mau kĩra machiba ũribadau beɗeaɗe berreaɗawẽebʉrã, ẽbẽrarãba ¿saka kuitaaɗaima machiba jara panuma? Maka berreaduubʉrã, machi bari berreaɗai. 10 Nau iujãaɗe beɗea aꞌawaraa barau. Chi maarãɗebena beɗea kuitaa ɓuuba kauwa ũribarii. 11 Maamina mʉʉba mau beɗea adua ɓuubʉrã, chi berrearuumaarã mʉ ãibena kĩra nii, mauɗe mʉʉmaarã ichi ãibena kĩra nii. 12 Machi ara mau kĩra nuree. Dachi Akõre Jauriba waubi ɓuu machiba ãrea wau kʉ̃ria panuuɗeeba ãbarã aiɗai baita biꞌia wau kʉ̃riásturu ãchiba biꞌia Dachi Akõreɗe ijãaɗamera.

13 Mauɗeeba chi dachiba ũriɗakau beɗeaɗe berrea ɓuuba Dachi Akõremaa ʉtaa iɗi ɓuu ara ichiba jaraɗa poyaa kuitaa jaraaruu baita. 14 Dachiba ũriɗakau beɗeaɗe mʉʉba Dachi Akõremaa ʉtaa iɗiiruubʉrã, mʉ jauriba ʉtaa iɗi ɓuu. Maamina mʉʉba adua ɓuu kãare ʉtaa iɗi ɓuu. 15 Makarã ¿sakaima? Mʉ jauriba Dachi Akõremaa ʉtaa iɗii maamina mʉʉba chi mau kuitaa ɓuu beɗeaɗe biɗa ʉtaa iɗii. Mʉ jauriba Dachi Akõremaa biꞌia karii, maamina chi mʉʉba kuitaa ɓuu beɗeaɗe biɗa karii. 16 Bichi jauriba Dachi Akõremaa biꞌia berrearuubʉrã, bichiba jaraɗa kuitaa ũrikauba ¿saka mau biawãrabʉ aima, bichiba bichíturu kiɗibai aɗaɗeeba?* 17 Biawãra bichiba maka berrearuuɗe Dachi Akõremaa ichíturu kiɗibai abarii kʉ̃ria ɓuu, maamina waabenarã aiɗawẽa ɓuu biꞌia ijãaɗamera. 18 Mʉʉba Dachi Akõremaa bichíturu kiɗibai abarii mʉ machi audeara dachiba ũriɗakau beɗeaɗe aude berreabariiɗeeba. 19 Maamina ãbarã araa ãbua imiiduuɗe, mʉʉmaarã dachiba ũriɗakau beɗeaɗe 10.000 beɗea berreai baɗamaarã dachiba ũribadau beɗeaɗe jua aɓa beɗea jaradeai ɓuu.

20 Ãbarã, warr chekerã kĩra panásturu. Ãchiba kachirua ãrea adua panuu. Maamina Dachi Akõre Jauriba waubi ɓuu ʉ̃rʉbena chõrarã kĩra kʉ̃risia panásturu. Waa warr chekerã kĩra kʉ̃risiarã́sturu. 21 Dachi Akõre beɗeaɗe* naka ɓʉ kuɓuu:

«Dachi Mechiuba jara ɓuu: mʉ nau puuruɗebenarã ome berreai, ãibenarã iɗeeba, chi ãchiba ũriɗakau beɗea berreabadaurãɗeeba. Maamina mʉ beɗea ũrimaa panaɗai».*

22 Maka kuitaa panuu chi dachiba ũriɗakau beɗeaɗe berreabarii chi Jesusɗe ijãaɗakaurã baita ɓuu, maumaarã Jesusɗe ijãabadaurã baita ɓuuwãe. Mauɗe chi Dachi Akõre baita berreai Jesusɗe ijãabadaurã baita ɓuu, maumaarã Jesusɗe ijãaɗakaurã baita ɓuuwãe.* 23 Mauɗeeba ãbarã araa ãbua imiiduuɗe jomaurã dachiba ũriɗakau beɗeaɗe berreamaa panuubʉrã, mauɗe waabenarã Jesusɗe ijãaɗakaurã maebʉrã Dachi Akõre beɗea ũri kʉ̃ria nuree eɗa wãaduubʉrã ¿ãchiba jaraɗaabaika machi kĩranema panuu? 24 Maamina jomaurã Dachi Akõre baita berreaduubʉrã, mauɗe Jesusɗe ijãawẽa nii aɓa maebʉrã Dachi Akõre beɗea ũri kʉ̃ria ɓuu eɗa wãaruubʉrã, machiba jara panuu ũri ɓuuɗeeba ichiba kachirua waubarii kuitaaɗeeba Dachi Akõre daaɗe nebʉra barau nii kuitaai. 25 Ichi sõɗe mera uru ɓuaɗa biꞌia kuitaai. Mauɗe õdarrɗe koɓeepeɗa Dachi Akõremaa biꞌia berreai mauɗe «Dachi Akõre biawãra machi ome ɓuu» ai.

Araa ãbua imiiduuɗe joma arakʉɗe wáusturu

26 Mauɗeeba ãbarã, ¿saka arakʉɗe wauɗaima? Machi araa ãbua imiiduuɗe aɓauba Dachi Akõre beɗeaɗebena kari karii ɓuu, aɓauba Dachi Akõre beɗea jaradeai ɓuu, aɓauba Dachi Akõreba unubiɗa jarai ɓuu, aɓauba dachiba ũriɗakau beɗeaɗe berreai ɓuu mauɗe aɓauba mau berreaɗa kuitaa jarai ɓuu. Maamina joma mau wauɗai panuu ãbarãba biꞌia ijãaɗamera. 27 Dachiba ũriɗakau beɗeaɗe berreaduubʉrã, ãba omeeba maebʉrã õbeaba maka berreaɗai panuu. Maamina ãchi aɓaaɓaa berreaɗai panuu. Berreaɗakare aɓauba mau kuitaa jarai ɓuu. 28 Maamina ãbarã araa ãbua imiiduuɗe mau berreaɗa kuitaa jarabarii wãꞌãebʉrã, dachiba ũriɗakau beɗeaɗe berrea kʉ̃ria ɓuu chũpea ɓuai ɓuu. Ichi kʉ̃risiaɗe Dachi Akõremaa chũpea berreai ɓuu.

29 Ara mau kĩra Dachi Akõre baita berreabadau ome maebʉrã õbea berreaɗai panuu. Mauɗe jomaurãba ãchiba berrea panuu kauwa ũriɗai panuu biawãra kuitaaɗai baita. 30 Ãba aɓa berrea ɓuuɗe Dachi Akõreba chi ũri panuuɗebena aɓaumaa* ne unubiiruubʉrã, chi berrea ɓuuba mau ãba ida berreabi ɓuu. 31 Jomaurã aɓaaɓaa Dachi Akõre baita berreaɗai panuu biꞌia kuitaaɗamera mauɗe biꞌia ijãaɗamera. 32 Dachi Akõre baita berreabarii barikia berreakau, maumaarã eseɗaubarii berreai baita. 33 Dachi Akõreba ororoa nuɓeebikau, maumaarã jirukaraayuwãe ɓuabiabarii.

Ẽbẽrarã Dachi Akõreɗerã araa ãbua imiiduucha 34 wẽrarã berreaɗaabai panuu, maumaarã chũpea ũriɗai panuu. Ãchi kima beɗea ũri panaɗai panuu Moisesba ɓʉɗaɗe jara ɓuu kĩra. 35 Wẽrarãba ne iɗi kʉ̃riaduubʉrã, deɗe panuuɗe ãchi kimamaa iɗiɗai panuu. Ãbarã araa ãbua imiiduuɗe wẽra berreai baita bibuara ɓuuwãe.

36 ¿Dachi Akõre beɗea machiɗebena neeska? ¿Aɓa machimáburu neeska? 37 Aɓauba Dachi Akõre baita berreabarii kʉ̃risia ɓuubʉrã, maebʉrã Dachi Akõre Jauriɗeeba ne wau ɓuu kʉ̃risia ɓuubʉrã, ichiba kuitaai ɓuu mʉʉba nau kartaɗe ɓʉmaa ɓuu Dachi Mechiuba waubi ɓuu. 38 Aɓauba mau ida ɓuuruubʉrã, ichi siɗa ida ɓústuru.

39 Maka ãbarã, biꞌia jʉrʉ́sturu Dachi Akõre baita berreaɗayu. Mauɗe dachiba ũriɗakau beɗeaɗe berreabadaurã ida berreabiásturu. 40 Maamina joma kauwa arakʉɗe wáusturu.

Cristo chokae jiraduɗa ʉ̃rʉbena

15 Mau awara ãbarã, mʉʉba machimaa kĩrababiai chi beɗea bia Jesús ʉ̃rʉbena mʉʉba machimaa jaradeaɗa. Mau beɗea machiba mʉʉɗebena kuitaasiɗau mauɗe ãrea ijãa panuu. 2 Mʉʉba jaradeaɗa biawãra ijãa panuubʉrã, Dachi Akõreba karibai. Makawãebʉrã, machiba bari ijãasiɗau.

3 Mʉʉba chi aude biꞌia ɓuu machimaa jaradeasii, ara mʉʉba kuitaaɗa kĩra. Mau naubʉ: Cristo dachi kachirua kakua biusii Dachi Akõre beɗeaɗe ɓʉ kuɓuu kĩra.* 4 Ichi jau ɓusiɗau, maabae ewari õbeaɗe biuɗa baɗa chokae jiradusii Dachi Akõre beɗeaɗe ɓʉ kuɓuu kĩra.* 5 Chokae jiradusiiɗe Pedromaa unubisii.* Mawãare ichiba 12 jʉrʉ adauɗarãmaa unubiasii. 6 Mau maaɗakare ãbarã 500 araa ãbua panuumaa unubiasii. Ãchiɗebena chi nuree biusiɗau maamina ãrea wabiɗa chokae panuu. 7 Mau 500 ãbarãba Jesús unupeɗaaɗakare Santiagomaa unubisii.* Mau maaɗakare joma ichiba bʉiɗarãmaa unubiasii.

8 Kaaɗeare mʉʉmaa unubisii. Mʉ chi warr bai naeɗe adauɗa kĩra maka unubisii.* 9 Biawãra chi Jesucristoba bʉiɗaɗebena mʉ chi aude kaebeu nii. Ẽbẽrarã Dachi Akõreɗerã kachirua waui baita wãraa ɓuasiiɗeeba biꞌia ɓuwãema ẽbẽrarãba mʉ ichiba bʉiɗa jaraɗai. 10 Maamina Dachi Akõreba ichi sõbiaɗeeba mʉ ɓusii Jesucristoba bʉiɗa ɓuamera. Ichiba mʉ bari maka ɓuubasii. Maumaarã joma waabenarã chi Jesucristoba bʉiɗarã audeara mʉʉba ichi baita aude wau ɓuu. Maamina ara michiɗeeba maka wauwẽa ɓuu. Dachi Akõréburu ichi sõbiaɗeeba mʉ aiɗa ɓuu maka waumera. 11 Waabenarã Jesusba bʉiɗarãba ichi ʉ̃rʉbena jaradea panuubʉrã maebʉrã mʉʉba jaradea ɓuubʉrã, araɓauɗe jaradea panuu. Mauɗe machiba ara mau beɗea ijãasiɗau.

Ãbarã biupeɗaaɗa chokae jiraduɗai ʉ̃rʉbena

12 Daiba Cristo chokae jiraduɗa ʉ̃rʉbena jaradeabadau. Mau ¿saka waabenarã machiɗebenaba biupeɗaaɗa chokae jiraduɗaabai a panuma? 13 Biupeɗaaɗa chokae jiraduɗawẽebʉrã, mauba jara ɓuu Cristo siɗa chokae jiraduubasii. 14 Cristo chokae jiraduubasiibʉrã, makarã daiba bari jaradea panuu mauɗe machiba ichiɗe bari ijãa panuu. 15 Cristo chokae jiraduubasiibʉrã, Dachi Akõreba ichi chokae jiradubisii aaduuɗe daiba Dachi Akõre ʉ̃rʉbena setaa jara panuu. Biawãra biupeɗaaɗa chokae jiraduɗawẽebʉrã, mauba jara ɓuu Cristo siɗa chokae jiraduubasii. 16 —. 17 Cristo chokae jiraduɗawãe basirã, machiba ichiɗe bari ijãa panaɗai basii mauɗe wabiɗa kachiruaɗe panaɗai basii. 18 Makarã joma Cristoɗe ijãabadaurã biupeɗaaɗa wãꞌãesiɗau. 19 Dachiba Cristoɗeeba nau iujã́ɗeburu biꞌia nureaɗai kʉ̃risia panuubʉrã, jomaurã audeara miichuburi nuree.

20 Maamina Dachi Akõreba biawãra Cristo biu ɓuaɗaɗebena chokae jiradubisii. Biupeɗaaɗaɗebena ichi chi naa chokae jiraduɗabʉ. Maka Dachi Akõreba unubisii joma ichiɗirã siɗa biawãra chokae jiraduɗai. 21 Ẽbẽra aɓaba kachirua wauɗa kakua dachi biuɗai. Ara mau kĩra ẽbẽra aɓaba biꞌia wauɗa kakua dachi chokae jiraduɗai. 22 Joma Adanɗebena neepeɗaaɗaɗeeba biubadau. Ara mau kĩra Cristoɗeeba ichiɗirã joma chokae panaɗai. 23 Cristo naa chokae jiradusii. Ichi waya neeruuɗe ichiɗirã chokae jiraduɗai. 24 Kaaɗebena ewariɗe Cristoba jai kachiruarã jaradea ua ɓuabadaurã, jai kachiruarã mechiurã mauɗe jai kachirua meserãa nuree joma poyaai. Maabae ichiɗirã ichi juaɗe nuree Dachi Bajãaɗebena Akõremaa deai.

25 Biawãra Cristo jomaurã Mechiu ɓuai ɓuu aɓa joma ichi kĩramaabadaurã poyaaruuɗaa.* 26 Mau joma poyaapeɗa chi kaaɗebena kĩramaabarii, dachi biubarii, ichiba mau wãꞌãebii, 27 Dachi Akõre beɗeaɗe jara ɓuuɗeeba: «Bichiba joma ichi juaɗe ɓusii».* «Joma Cristo juaɗe ɓusii» a ɓumina biꞌia kuitaa panuu Dachi Akõreba ara ichi Cristo juaɗe ɓuubasii. Dachi Akõréburu joma Cristo juaɗe ɓusii. 28 Dachi Akõre Warr Cristoba joma poyaasiiɗe ichi Dachi Akõre juaɗe ɓeei Dachi Akõreba joma ichi juaɗe ɓuɗa kĩra. Maka Dachi Akõreba joma ichi juaɗe uru ɓuai.

29 Biupeɗaaɗa chokae jiraduɗakaubʉrã, ¿sakãe chi nuree biupeɗaaɗa kakau boro ea panuma? Dachi Akõreba biupeɗaaɗa chokae jiradubiawẽebʉrã, ¿sakãe maarã kakua boro eaɗaima?* 30 Mauɗe biupeɗaaɗa chokae jiraduɗawẽebʉrã, ¿dai sakãe Jesucristo beɗea baita ewaricha kachiruaɗe ãrea biꞌiwãe panuu? 31 Ãbarã, machiba Dachi Mechiu Jesucristoɗe ijãa panuu baita mʉ biawãra kĩrajʉʉ ɓuu. Biawãra jaraaruu: ewaricha kʉ̃risia ɓuu ẽbẽrarãba mʉ chi Jesús beɗea kakua beaɗai. 32 Éfeso puuruɗe Dachi Akõre beɗea jaradeai baita mʉ ãrea biꞌiwãe ɓuasii ãnimara kachirua nuree ome chĩo ɓuu kĩra.* Biupeɗaaɗa chokae jiraduɗaabaibʉrã, ¿mʉ ãrea biꞌiwãe ɓuasiiɗeeba kãare biꞌia adausma? Biawãra dachi chokae jiraduɗaabaibʉrã, biꞌia ɓuu wauɗai waabenarãba jarabadau kĩra: «Biꞌia koɗai, itua doɗai nu biuɗaiɗeeba».*

33 Ida setaa kũruabirã́sturu. Machi kachirua waubadaurã ome ãbua nibaaduubʉrã, maarãba machi biꞌia nibabadau kachirua babiɗai. 34 Jipa kʉ̃risiásturu. Kachirua waa waurã́sturu. Waabenarã chi nuree machiɗebenaba Dachi Akõre adua nuree. Mauɗeeba machi peraɗai panuu.

Ãbarã chokae jiraduuduuɗe ãchi kakua saka ɓuai ʉ̃rʉbena

35 Aɓauba iɗii ɓuẽka: «¿Biupeɗaaɗa saka chokae jiraduɗaima? ¿Ãchi kakua saka nureaɗaima?» 36 ¡Chi maka iɗi ɓuu kʉ̃risiaswãe nii! Ne uuɗa tonooruuɗe chi netaa e ɓeraabarii. 37 Trigo uuruuɗe maebʉrã barikiu netaa uuruuɗe, chi ɓʉʉrʉ uukau maumaarã chi netaa uubarii. 38 Maamina mau netaaɗebena Dachi Akõreba chi ɓʉʉrʉ tonobibarii ara ichi ɓʉʉrʉ kĩra ɓuamera.

39 Nau iujãaɗe chokae nuree araɓau kakua kĩra nureewãema. Ẽbẽra kakua ãyaa nii, ãnimara kakua ãyaa nii, ibana kakua ãyaa nii, ɓeda kakua ãyaa nii. 40 Mauɗe bajãaɗe ne aꞌawaraa barau. Nau iujãaɗe biɗa ne aꞌawaraa barau. Maamina chi bajãaɗe ne biꞌia nuree ãyaa nuree, chi nau iujãaɗe ne biꞌia nuree audeara. 41 Ʉmada ʉ̃ɗaa ãyaa nii, jeɗako ʉ̃ɗaa ãyaa nii, pusterrea ʉ̃ɗaa ãyaa nii. Pusterreacha ʉ̃ɗaa ãyaacha koabadau.

42 Chi biupeɗaaɗa chokae jiraduɗai ne uuɗa kĩra ɓuu. Kakua ɓeraabarii jau ɓubadau maamina kakua ɓeraakau chokae jiradui. 43 Kakua biꞌiawãe nii jau ɓubadau maamina kakua bia nii chokae jiradui. Kakua meserãaswãe nii jau ɓubadau maamina kakua meserãa nii chokae jiradui. 44 Nau iujãaɗebena kakua jau ɓubadau maamina bajãaɗebena kakua chokae jiradui. Nau iujãaɗebena kakua baraubʉrã bajãaɗebena kakua siɗa barau.

45 Dachi Akõre beɗeaɗe ɓʉ kuɓuu: «Chi nabena ẽbẽra Adán abadau Dachi Akõreba chokae ɓuabisii».* Maamina Cristo chi kaaɗebena Adán abadau ɓusii ichi jauriɗeeba chokae ɓuai deamera. 46 Bajãaɗebena kakua nabena kakuawãema, maumaarã nau iujãaɗebena kakua chi nabenabʉ. Chi nabena kakua wãꞌãekare bajãaɗebena kakua adaui. 47 Chi nabena ẽbẽra Adán abadau ioro wauɗaɗeeba, nau iujãaɗebena basii. Chi mawãarebena ẽbẽra Jesucristo abadau bajãaɗebenabʉ. 48 Adán ichi kakua ioro wauɗa basii. Ara mau kĩra nau iujãaɗe duanuuba mau uru panuu. Maamina Cristoba bajãaɗebena kakua uru ɓuu kĩra chi bajãaɗebena ẽbẽrarãba mau uru panaɗai. 49 Dachi chi nabena mukĩra ioro wauɗa kĩra nuree mauɗe bajãaɗebena neeɗa ẽbẽra Cristo kĩra panaɗai.

50 Ãbarã, mʉʉba nau jaraaruu: chi kakua nau iujãaɗebena Dachi Akõre juaɗe poyaa ɓuabai ichiɗirã baara. Chi kakua ɓeraabarii chi ɓeraakau kakuamaa poyaa ɓuabai. 51 Ũrísturu. Dachi Akõreba naeɗe kuitaabiawẽa ɓuaɗa mʉʉba kuitaabii: joma dachi biuɗaabai, maumaarã chi kakua kĩra awara paneeɗai. 52 Maka ɓuuɗe, ara makʉɗe, kaaɗebena kachu jĩwaaruuɗe maka kĩra awara paneeɗai. Biawãra Dachi Akõre kachu jĩwai. Mauɗe biupeɗaaɗa chi kakua ɓeraaɗakauɗe chokae jiraduɗai. Mauɗe dachi wabiɗa chokae nuree dachi kakua kĩra awara paneeɗai. 53 Dachi kakua chi ɓeraabarii, chi kakua ɓeraakau ɓeei. Dachi kakua biui ɓuu, chi kakua biukau ɓeei. 54 Maka dachi kakua chi ɓeraabarii, chi kakua ɓeraakau ɓeeruuɗe mauɗe nau kakua biui ɓuu chi biukau kakua ɓeeruuɗe, Dachi Akõre beɗeaɗe ɓʉ kuɓuu kĩra biawãra ɓuai. Naka ɓʉ kuɓuu: «Dachi Akõreba dachi biui wãꞌãebisii».* 55 Mauɗe ɓʉ kuɓuu:

«¿Chi dachi biubibariiba waa poyaa biubiibaika? ¿Chi dachi biubibariiba waa poyaa puꞌuabiibaika?»*

56 Moisesba ɓʉɗaba kuitaabi ɓuu dachiba kachirua waubadau. Kachirua waubadauɗeeba biuɗai. 57 Maamina Dachi Akõremaa ichíturu kiɗibai aɗai panuu Dachi Mechiu Jesucristoɗeeba biuɗai ʉ̃rʉbena karibasiiɗeeba. 58 Mauɗeeba ãbarã mʉa kʉ̃riakuabarii, ãrea ijãa panásturu. Dachi Mechiuba kʉ̃ria ɓuu ãrea wau kãribaɗeásturu. Machiba kuitaa panuu Dachi Mechiu baita wau panuu, machiba bari wau panuuwãe.

Ãbarã Jerusalenɗebena baita chi nejarra jʉrʉ pepeɗaaɗa

16 Mau awara machiba ãbarã Jerusalenɗebena baita chi nejarra peeduu ʉ̃rʉbena mʉʉba jaraaruu. Mʉʉba ãbarã Galacia druaɗebenarãmaa jaraɗa kĩra wáusturu. 2 Misacha machicha chi nejarra kanabadauɗebena awara ɓupeɗaaɗa merásturu. Makarã mʉ neeruuɗe machiba peɗaabai. 3 Mʉ neeruuɗe chi ãbarã machiba pepeɗaaɗa maarã ome mʉʉba Jerusalenɗaa chi nejarra urubʉʉi. Ãbarã Jerusalenɗebenarãba ãchi biꞌia irsibiɗamera mʉʉba maarã ome karta urubʉʉi. 4 Maamina machimaarã mʉ siɗa wãi biꞌia ɓuubʉrã, maarã ome wãi.

Pablo Corintoɗaa wãi kʉ̃risiaɗa

5 Mʉ naa Macedonia druaɗaa wãi ɓuu. Maabae machimaa wãi. 6 ¿Mʉ machi baara awawarrea ɓeei ɓuẽka? ¿Machi baara joma nau kui che ewariɗe ɓeei ɓuẽka? Maabae machiba mʉ poyaa aiɗaɗai mʉ wãaruumaa biꞌia wãmera. 7 Nauɗera poyaa kãꞌãa ɓeebaiɗeeba mʉʉba machi ichiaɗe wã kʉ̃riawẽe. Maamina Dachi Mechiuba kʉ̃riaruubʉrã, machimaa wãaruuɗe kãꞌãa ɓuaɗe wãi. 8 Nama Éfeso puuruɗe ɓuai aɓa Pentecostés bari panabadau ewari wãꞌãeruuɗaa.* 9 Nama mʉ kĩramaa panumina poyaa Dachi Akõre beɗea biꞌia jaradea ɓuai mauɗe ãreaba ijãa panuu.

10 Ãba Timoteo machimaa neeruubʉrã, ichi machi tãeɗe biꞌia irsibísturu wapearãamera. Dachi Mechiuba kʉ̃ria ɓuu ichiba biꞌia wau ɓuu mʉʉba wau ɓuu kĩra. 11 Mauɗeeba ichi kĩramaabiarã́sturu, maumaarã aiɗásturu mʉ ichiaɗe neeruuɗe jirukaraayuwãe neemera. Mʉʉba mauɗe waabenarã ãbarã ichi neei eseɗau panuu.

12 Dachi ãba Apolosmaa mʉʉba chi chuburia iɗisii waabenarã ãbarã ome machi ichiaɗe wãɗamera. Maamina ʉ̃rauɗe ichi wã kʉ̃riawẽa ɓuu. Wãi poyaaruuɗe wãi.

Pabloba nau kartaɗe aanama ɓʉɗa

13 Kauwa panásturu. Jesucristoɗe ãrea ijãa panásturu. Ichiɗeeba perawẽa panásturu mauɗe chaarea panásturu. 14 Ne joma machiba wauduu kʉ̃riaɗeeba wáusturu.

15 Ãbarã, machiba kuitaa panuu Acaya druaɗe Estefanasba mauɗe ichi deɗebenarã chi naeɗe Jesusɗe ijãapeɗaaɗa mauɗe ãchiba kʉ̃risia panuu joma ãbarã aiɗaɗai baita. 16 Mʉʉba machimaa chi chuburia iɗiiruu ãchi mauɗe joma ãchi kĩra nuree ũriɗamera. Joma Dachi Akõre traju waubadaurã mauɗe ãbarã aiɗabadaurã ũrísturu.

17 Ãba Estéfanas, Fortunato mauɗe Acaico mʉʉmaa neepeɗaaɗaɗeeba kĩrajʉʉ ɓuu. Maarãba machi kuenda mʉ aiɗa panuu. 18 Maarãba mʉ sõ kĩrajʉʉbisiɗau machi sõ kĩrajʉʉbiapeɗaaɗa kĩra. Maarã ʉ̃rʉbena mauɗe ãbarã ãchi kĩra panuu ʉ̃rʉbena biꞌia kʉ̃risiásturu.

19 Ãbarã Asia druaɗebenarãba kʉ̃ria panuu machi biꞌia panaɗayu. Ãba Aquilaba, neekau Priscilaba mauɗe ãbarã ãchi deɗe araa ãbua imibadaurã Dachi Mechiuɗeeba kʉ̃ria panuu machi biꞌia panaɗayu. 20 Ãbarã jomaurãba kʉ̃ria panuu machi biꞌia panaɗayu. Biawãra kʉ̃riaɗeeba chiya biꞌia berreásturu.*

21 Mʉ Pablobʉ. Nau beɗea ara mʉ juaba ɓʉʉruu.

22 Barikiuba Dachi Mechiu Jesucristo kʉ̃riawẽebʉrã, Dachi Akõreba mau ẽbẽra nebʉra barau ai. ¡Uche, Dachi Mechiu!

23 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai. 24 Jesucristoɗeeba mʉʉba machi biawãra kʉ̃ria ɓuu.*