2 CORINTIOS

Nau kartaɗe Pabloba naa ɓʉɗa

1 Mʉ Pablobʉ. Dachi Akõreba ichi kʉ̃riaɗeeba mʉ Jesucristoba bʉiɗabʉ. Dachi ãba Timoteo mʉ ome ɓuu. Nau karta ɓʉʉruu ẽbẽrarã Dachi Akõreɗerã Corintoɗebena baita mauɗe joma ichi ẽbẽrarã Acaya druaɗe nuree baita. 2 Mʉʉba kʉ̃ria ɓuu Dachi Bajãaɗebena Akõreba mauɗe Dachi Mechiu Jesucristo ãchi sõbiaɗeeba machi aiɗa panaɗai mauɗe jirukaraayuwãe panabiaɗai.

Pablo biꞌiwãe ɓuaɗa

3 Dachi Mechiu Jesucristo Bajãaɗebena Akõremaa biꞌia berreaɗai panuu. Ichi dachi kĩra chuburiabarii Dachi Akõrebʉ, dachi sõ kĩrajʉʉbiabarii Dachi Akõrebʉ. 4 Ne jomaɗe ãrea biꞌiwãe panuuɗe ichiba dai sõ kĩrajʉʉbiabarii waabenarã ãrea biꞌiwãe nuree sõ kĩrajʉʉbiaɗamera ichiba dai sõ kĩrajʉʉbiaɗa kĩra.* 5 Biawãra Cristo baita dai ãrea biꞌiwãe duanubadamina ichiɗeeba ne jomaɗe kĩrajʉʉbadau. 6 Maamina dai maka ãrea biꞌiwãe panuu machi sõ kĩrajʉʉbia panaɗamera mauɗe kachiruaɗebena wãɗamera. Dachi Akõreba dai sõ kĩrajʉʉbiaruuɗe machi siɗa daiɗeeba kĩrajʉʉbadau. Maka machi dai kĩra ãrea biꞌiwãe paneeduuɗe poyaa dauchia jãaduaɗai. 7 Daiba kuitaa panuu machiba Dachi Akõre biawãra ãrea ijãa panuu. Kuitaa panuu machi dai kĩra ãrea biꞌiwãe paneebadamina Dachi Akõreba machi dai kĩra sõ kĩrajʉʉbiabarii.

8 Ãbarã, mauɗeeba daiba kʉ̃ria panuu dai Asia druaɗe biawãra ãrea biꞌiwãe panapeɗaaɗa machiba mau kuitaaɗai. Dai ãrea nebʉraɗe panasiiɗeeba waa poyaa dauchia jãaduaɗaabai kʉ̃risiasiɗau mauɗe poyaa chokae panaɗaabai kʉ̃risiasiɗau. 9 Biawãra dai beaɗai kʉ̃risiasiɗau. Maamina joma makasii ara dai du aɓa poyaa karibaɗai kʉ̃risiarãaɗamera maumaarã chi biupeɗaaɗa chokae jiradubibarii Dachi Akõreba karibai ijãaɗamera. 10 Ichiba dai beaɗai baɗa karibasii mauɗe waya beaɗai kʉ̃risiaduubʉrã kariba ɓuai. Daiba biawãra ijãa panuu ichiba dai beaɗai baɗa kariba ɓuai. 11 Machia biɗa dai baita Dachi Akõremaa ʉtaa iɗi panuuɗeeba aiɗa panuu. Ãreaba maka ʉtaa iɗi panuuɗeeba ãreaba Dachi Akõremaa bichíturu kiɗibai aɗai ichi sõbiaɗeeba dai aiɗa ɓuu baita.

Pablo Corintoɗaa wãi baɗa

12 Nau kakua kĩrajʉʉ panuu: daiba kuitaa panuu sõ jipa panuuɗeeba, kʉ̃risia biaɗeeba nau iujãaɗebenarã tãeɗe, mauɗe machi tãeɗe biꞌia nibapeɗaaɗa. Mau sõ jipa ɓuai mauɗe kʉ̃risia bia Dachi Akõreɗebenabʉ. Dai nau iujãaɗebena kʉ̃risia kuitaaɗeeba maka nibaɗakau, maumaarã Dachi Akõreba ichi sõbiaɗeeba aiɗa ɓuuɗeeba maka nibabadau. 13 Daiba kartaɗe ɓʉɗaabasii chi machiba poyaa kuitaaɗaabai panuu. Mʉʉba kʉ̃risia ɓuu machiba ɓaꞌãra kuitaapeɗaaɗa ãrea kuitaa kãribaɗayu. Maka machi dai kakua kĩrajʉʉɗai mauɗe Dachi Mechiu Jesús neeruuɗe dai machi kakua kĩrajʉʉɗai. 14 —.

15 Machi biawãra kĩrajʉʉɗai mʉ kakua mʉʉba kʉ̃risia ɓuuɗeeba, naa mʉʉba kʉ̃risia ɓuasii ɓes ome machi ichiaɗe wãi ãrea aiɗai baita.* 16 Mʉʉba kʉ̃risia ɓuasii Macedonia druaɗaa wãaruuɗe naa machi ichiaɗe wãi. Maabae Macedoniaɗaa wãpeɗa waya machi ichiaɗe wãi kʉ̃risia ɓuasii. Maka Judea druaɗaa wãaruuɗe machiba mʉ poyaa aiɗaɗai kʉ̃risia ɓuasii. 17 Maamina mʉʉba kʉ̃risia ɓuaɗa kĩra waubasiiɗeeba ¿machimaarã mʉʉba ãyaa jaraska? ¿Machimaarã mʉʉba waui aɗa waya wauwẽ abarika mʉʉba wau kʉ̃ria ɓuu kĩra waui baita? 18 Dachi Akõre beɗea aɓa ɓuu. Ichiba kuitaa ɓuu daiba jarapeɗaaɗa biawãra basii. Daiba machimaa wãɗai aɗapeɗa ara makʉɗe wãɗaabai aɗaabasii. Daiba «nau biawãra» aɗaabasii, maaɗakare «seta» aɗai baita. 19 Silvanoba, Timoteoba mauɗe mʉa biɗa machimaa Dachi Akõre Warr Jesucristo ʉ̃rʉbena jaradea panasiɗau. Jesucristoba waui aɗa waya wauwẽa akau. Ichiba waui aɗa joma waubarii. Daiba «nau biawãra» aɗaabasii, maaɗakare «seta» aɗai baita. 20 Biawãra Dachi Akõreba waui jaraɗa joma Cristoɗeeba waubarii. Mauɗeeba dachiba Dachi Akõremaa ʉtaa iɗiiduuɗe Cristoɗeeba biꞌia ɓuu maka ɓuai abadau.* Maka ichi ʉ̃rʉbena biꞌia jara panuu. 21 Dachi Akõréburu dai mauɗe machi siɗa Cristo ome ãrea nu ua ɓuu. Ichiba dachi jʉrʉ adausii. 22 Ichi Jauriba dachicha dauchaa ɓusii dachiba ichiɗirã kuitaaɗamera. Mauɗe dachi sõɗe ɓusii kuitaaɗamera joma ichiba deai jaraɗa biawãra adauɗai.

23 Mʉʉba Dachi Akõre daaɗe jaraaruu: Corintoɗaa wabiɗa wãwãe ɓuu machi kĩra nomaabiamaaba chi mʉʉba machi ãrea kastikakuai ɓuuɗeeba. 24 Daiba jara panuu kĩra waubiaɗaabai machiba Cristoɗe ãrea ijãa panuuɗeeba. Bari machi aiɗa kʉ̃ria panuu kĩrajʉʉ panaɗamera.

2 Mauɗeeba mʉʉba kʉ̃risiasii machi ichiaɗe wãabai. Waya kastikaɗe wãaruuɗeeba machi kĩra nomaabiai kʉ̃riabasii. 2 Mʉʉba machi kĩra nomaabiaruubʉrã ¿kaiba mʉ kĩrajʉʉbiima? ¿Machi kĩra nomaaba mʉ kĩrajʉʉbiɗaika? 3 Mauɗeeba machi ichiaɗe wãi baɗamaarã karta urubʉisii. Maka mʉ wãaruuɗe machiba mʉ kĩra nomaabiɗaabai. Machiba mʉ kĩrajʉʉbiɗai panuu. Mʉʉba kuitaa ɓuu machiba maka wauɗaiɗeeba mʉ ome ãbua kĩrajʉʉ panaɗai. 4 Biawãra mau karta ɓʉsii machi iadaai baita. Maamina maka ɓʉʉbasii machi kĩra nomaaɗamera, maumaarã kuitaaɗamera mʉʉba machi biawãra kʉ̃ria ɓuu. Mauɗeeba mʉʉba kĩra nomaaɗeeba, ãrea kʉ̃risia ɓuuɗeeba mauɗe jẽa ɓuuɗeeba mau karta ɓʉ ɓuasii.

Aɓauba kachirua wauɗa Pabloba perdonaɗa

5 Biawãra aɓauba kachirua wau ɓuuɗeeba mʉ kĩra nomaabisii. Maamina mʉ́turu kĩra nomaabiibasii, maumaarã beraa joma machi siɗa kĩra nomaabiasii. (Mʉʉba «beraa joma machi» jara ɓuu, ichiba wauɗa aude kachirua ɓuu a ɓuuwãeɗeeba). 6 Machiɗebena ãreaba mau ẽbẽra kachirua wauɗa kastikasiɗau. Ara mauba ara ɓuu. 7 Maumaarã, jãabae ichiba wauɗa perdonaɗai panuu mauɗe mau sõbiabiɗai panuu ãrea kĩra nomaa ɓeerãamera. 8 Mauɗeeba mʉʉba machimaa chi chuburia iɗiiruu machiba ichi kʉ̃ria panuu waya kuitaabiɗamera. 9 Mʉʉba naeɗe mau ʉ̃rʉbena ɓʉsii machiba biawãra joma mʉʉba jaraɗa ijãaɗai kuitaai baita. 10 Aɓauba kachirua wauɗa machiba kʉde uru ɓee ida ɓuuduubʉrã mʉa biɗa kʉde uru ɓuu ida ɓui. Kachirua mʉʉba kʉde uru ɓuu ida ɓui biawãra ɓuasiibʉrã, mau kachirua Cristo daaɗe joma perdonasii machi biꞌia duanaɗamera. 11 Mʉʉba mau perdonasii Satanasba dachi setaa kũruarãamera. Ichiba saka waubarii dachiba ãrea kuitaa panuu.

Cristoɗeeba dachiba ne joma poyaa panuu

12 Mʉ Troas puuruɗaa wãsii chi beɗea bia Cristo ʉ̃rʉbena jarai baita. Aria Dachi Mechiuba poraa ewaaruu kĩra wausii ẽbẽrarãba ũri kʉ̃riaɗamera. 13 Maamina mʉ ãba Tito unuwẽeɗeeba jirukaraa ɓuasii. Mauɗeeba ãbarã ome araa ãbua neesiiɗe mʉ wãi asii. Ara makʉɗe Macedonia druaɗaa Tito jʉrʉɗe wãsii.

14 Dachi Akõremaa bichíturu kiɗibai aɗai panuu. Jesucristoba joma poyaapeɗa jomaurã daaɗe puuruɗe dai adoeruu* mauɗe daiɗeeba druacha ichi ʉ̃rʉbena kuitaabi ɓuu. Cristo ʉ̃rʉbena jaradea panuuɗe Dachi Akõre daaɗe dai kera kĩra tuwaa panuu. Mauɗe ichi ʉ̃rʉbena kuitaai, mau kera kĩra ɓuu. Chi Dachi Akõreba karibai panuu ẽbẽrarãba mauɗe chi karibaabai panuu ẽbẽrarãba mau kera ʉ̃badau. 15 —. 16 Chi karibaabai nureemaarã, mau kera ẽbẽra biuɗa mikia kĩra ɓuu, Jesusɗe ijãaɗawẽa panuuɗeeba biuɗaiɗeeba. Maamina chi karibai nureemaarã, mau kera ãrea tuwaa ɓuu, ewaricha chokae panaɗaiɗeeba. Maka ¿kaiba ara ichi meserãaɗeeba Dachi Akõre beɗea poyaa jaradeaima? 17 Daiba chi nejarra adauɗai baita Dachi Akõre beɗea jaradea nibaɗaabai ãreaba waubadau kĩra. Maumaarã Cristo ome panuuɗeeba Dachi Akõreba dai bʉisii. Mauɗe ichi daaɗe kʉ̃risia sõbiaɗeeba jaradeabadau.

Dachi Akõreba ẽbẽra baita beɗea chiwiɗi ɓuɗa

3 ¿Mau jara panuuɗeeba waya ara dai ʉ̃rʉbena biꞌia berrea panuka? ¿Dai biꞌia nibapeɗaaɗa ʉ̃rʉbena karta machimaa ichiabiaɗai panuka jaradeaɗai baita? ¿Daiba machimaa karta iɗiɗai panuka jaradeaɗe wãɗai baita waabenarãba waubadau kĩra? 2 Machi chi karta dai sõɗe ɓʉ kuɓuu kĩra panuu. Jomaurãba mau karta ichiaduuɗe kuitaabadau daiba jipa jaradeabadau. 3 Daiɗeeba Cristoɗe ijãapeɗaaɗaɗeeba machi karta Cristoba ɓʉ deaɗa kĩra panuu. Ichiba mau karta chi tintaba ɓʉʉbasii, maumaarã chi chokae nii Dachi Akõre Jauriɗeeba ɓʉsii. Mo peeɗeaɗe ɓʉʉbasii, maumaarã dachi sõɗe ɓʉsii.*

4 Dachi Akõre daaɗe daiba Cristoɗeeba mau biawãra kuitaa panuu. 5 Daiba poyaa jaraɗaabai ara dai du aɓa Dachi Akõre traju poyaa wauɗai panuu. Maumaarã kuitaa panuu Dachi Akõreɗeeba joma poyaa wauɗai. 6 Dachi Akõreba dai ɓusii ichiba ẽbẽrarãmaa beɗea chiwiɗi deaɗa poyaa jaradeaɗamera. Mau beɗea chiwiɗi deaɗa Moisesba ɓʉɗa kĩra juaba ɓʉɗawãe, maumaarã Dachi Akõre Jauriba kuitaabi ɓuu. Moisesba ɓʉɗaba kuitaabi ɓuu kachirua wau panuu kakua ẽbẽrarã biuɗai panuu, maamina Dachi Akõre Jauriba dachimaa chokae nibabiabarii.

7 Dachi Akõreba Moisesmaa ichi ley mokara peeɗeaɗe deasiiɗe, ichi teɗechoaba Moisés kĩedarrmaa jẽratĩusii.* Mauɗeeba israelɗebenarãba Moisés kĩedarr poyaa ichiaɗaabasii. Mau kĩrawãrea ɓuu bikãa wãꞌãemaa ɓuasmina wabiɗa poyaa ichiaɗaabai panasiɗau.* Biawãra Dachi Akõreba ichi kĩrawãreaba unubisii mau Moisesba ɓʉɗa ãrea biꞌia ɓuu. Maamina ichiba beɗea chiwiɗi deaɗa ichi Jauriba kuitaabi ɓuuɗeeba ¿Moisesba ɓʉɗa audeara aude biꞌia ɓuwẽka? 8 —. 9 Biawãra mau Moisesba ɓʉɗaba ẽbẽrarã biuɗai panuu jara ɓumina ãrea biꞌia ɓuu. Maamina Dachi Akõreba beɗea chiwiɗi deaɗa aude bibuara ɓuu. Mauba kuitaabi ɓuu saka Dachi Akõreba dachi nebʉraswãe nuree abarii. 10 Moisesba ɓʉɗa ãrea biꞌia ɓuasmina iɗibae ãrea biꞌiwãe ɓuu ichiba beɗea chiwiɗi deaɗa aude bibuara ɓuuɗeeba. 11 Moisesba ɓʉɗa naeɗe ãrea biꞌia ɓuasmina ewaricha waa ɓuabai basii. Maamina ichiba beɗea chiwiɗi deaɗa wãꞌãekauɗeeba bibuara ɓuu.

12 Mau beɗea chiwiɗi deaɗa biawãra wãꞌãekau kuitaa panuuɗeeba daiba biꞌia jaradeabadau. 13 Dai Moisés kĩra nibaɗakau. Mauba ichi kĩedarrɗe paru anabaribachii israelɗebenarãba chi kĩrawãrea wãꞌãeruu apii ichiarãaɗamera. 14 Maamina ãchiba mau ʉ̃rʉbena kuitaaɗaabasii. Iɗibae biɗa judiorãba chi Moisesba ɓʉɗa ichiaduuɗe kuitaaɗakau. Ãchi kʉ̃risia wabiɗa paruba mera panuu kĩra nuree, aɓa Cristoɗéburu mau ãyaa ewaiɗeeba. 15 Iɗibae biɗa Moisesba ɓʉɗa eɗa jaraaduuɗe, paruba ãchi sõ mera panuu kĩra nuree. 16 Biawãra aɓa Dachi Akõremaa waya neeruuɗe ichi kʉ̃risia paruba mera uru ɓuu kĩra ɓuu Dachi Mechiuba ãyaa ewai. 17 «Dachi Mechiu» aaruuɗe «Dachi Akõre Jauri» jara ɓuu. Chi Dachi Mechiu Jauriɗeeba nibabarii kachiruaɗebena mauɗe Moisesba ɓʉɗaɗebena ãyaa wãsii. 18 Dachiba Cristoɗe ijãa panuuɗeeba dachi kĩra paruba mera uru panuu kĩra panuuwãema. Mauɗeeba dachiɗeeba waabenarãba Dachi Mechiu kĩrawãrea unu panuu kĩra ichiabadauɗe ichia panuu kĩra. Mauɗe Dachi Mechiu Jauriba dachi ewaricha biꞌia wau kãrii Dachi Mechiu kĩra panaɗamera.

4 Dachi Akõreba dachi maka kĩra chuburiaɗeeba ichi beɗea ida jaradeabia ɓu baerã daiba poyaaɗawẽe kʉ̃risiaɗakau. 2 Ne joma kachirua ẽbẽrarãba mirubia waubadau mauɗe mia kĩra nejasia waubadau daiba ida ɓusiɗau. Waabenarã setaa kũruaɗakau. Dachi Akõre beɗea ãyaa jaradeaɗakau, maumaarã chi biawãra beɗea arakʉɗe jaradeabadau. Maka Dachi Akõre daaɗe jomaurãmaa kuitaabiabadau daiba jipa wau panuu. 3 Maamina chi beɗea bia Cristo ʉ̃rʉbena daiba jaradea panuu wabiɗa biꞌia ũriɗawẽebʉrã, aɓa chi ẽbẽrarã Dachi Akõreba karibaabai panuu baita maka ɓuu. 4 Dachi Akõreɗe ijãaɗakaurãmaarã mau biꞌia ũriɗakau. Nau iujãaɗe jʉbawãe nii maarã chibaribʉ. Ãchimaa chi biawãra beɗea bia Cristo ʉ̃rʉbena kauwa kuitaabiwẽa ɓuu dau pãriu wau ɓuu kĩra.* Maka ãchiba Cristo biꞌia nii ʉ̃rʉbena poyaa kauwa kuitaaɗaabai. Cristo Dachi Akõre niiɗeeba maka biꞌia ɓuu. 5 Ara dai ʉ̃rʉbena jaradea panuuwãema, maumaarã jaradea panuu Jesucristo jomaurã Mechiu. Mauɗe daiba jara panuu Jesús kakua dai machi baita bari trajabadaurã. 6 Nau iujãa joma pãriu ɓuaɗa Dachi Akõreba ʉ̃ɗaabisii.* Ara mau kĩra ichi ʉ̃ɗaa dachi sõɗe ʉ̃ɗaabisii. Mauba jara ɓuu ichi kĩrawãrea Cristoɗeeba dachimaa kuitaabisii.

Cristoɗe ijãa ɓuuɗeeba nibaɗai panuu

7 Daiba chi beɗea bia Cristo ʉ̃rʉbena uru panumina, nau kakua meserãaswãe ɓuu. Choko bari au ãribarii kĩra ɓuu. Mauɗeeba jomaurãba kuitaa panuu dai meserãaɗeeba mau beɗea jaradea panuuwãe, maumaarã Dachi Akõre meserãa mechia ɓuuɗeeba jaradea panuu. 8 Dai ne jomaɗe ãrea biꞌiwãe panumina mau nebʉraɗebena poyaa wãɗaabai kʉ̃risiaɗakau. Saka wauɗai adua panuuɗe poyaa wauɗaabai kʉ̃risiaɗakau. 9 Ẽbẽrarãba dai kachirua wau panumina Dachi Akõreba ida ɓuwẽa ɓuu. Dai jeeɗa jirataadumina poyaa beaɗaabai. 10 Dai wãaduucha ẽbẽrarãba dai beaɗai kʉ̃ria panuu Jesús beapeɗaaɗa kĩra. Maamina Jesusba dai kariba ɓuuɗeeba ãchiba daiɗeeba Jesús chokae ɓuu unubadau. 11 Biawãra dai wabiɗa chokae panuuɗe Jesús kakua ẽbẽrarãba dai bea kʉ̃ria panaɗai. Maka dai chi kakua biui ɓuuɗeeba jomaurãba Jesús chokae ɓuu unuɗai. 12 Biawãra ẽbẽrarãba dai beaɗai kʉ̃ria panumina daiba jaradea panuu machiba ijãasiɗau. Mauɗeeba ewaricha Dachi Akõre ome chokae panaɗai.

13 Dachi Akõre beɗeaɗe ɓʉ kuɓuu: «Mʉʉba Dachi Akõreɗe ijãasiiɗeeba berreasii».* Ara mau kĩra daiba Dachi Akõreɗe biawãra ijãa panuuɗeeba ichi ʉ̃rʉbena berrea panuu. 14 Dachi Akõreba Dachi Mechiu Jesús chokae jiradubisii, mauɗe daiba kuitaa panuu dai siɗa Jesús kĩra chokae jiradubiai. Maabae dai machi ome ãbua ara ichi daaɗe ɓui. 15 Dai mau joma ãrea biꞌiwãe panuu machi biꞌia nureaɗamera. Mauɗe Dachi Akõreba ichi sõbiaɗeeba ẽbẽrarã ãrea karibaaruu. Maka ãreaba ichimaa bichíturu kiɗibai aɗai mauɗe ichi ʉ̃rʉbena biꞌia jaraɗai.

16 Mauɗeeba daiba waa jaradeaɗai ida ɓuɗai kʉ̃risiaɗakau. Dai chi kakua ewaricha meserãaswãekãrimina Dachi Akõreba aiɗa ɓuu dai sõɗe chaarea nureaɗamera.* 17 Dai ʉ̃rauɗe ãrea biꞌiwãe paneebadamina, mauba dai aiɗa ɓuu, maaɗakare chi Dachi Akõre kĩrawãreaɗe ewaricha panaɗai baita. Mau kĩrawãrea aude bibuara ɓuai chi iɗibae ɓaꞌãra biꞌiwãe paneebadau audeara. 18 Mauɗeeba dauba unubadau daiba kʉ̃risia panuuwãe, maumaarã dauba unuɗakau kʉ̃risia panuu. Dachi dauba unubadau isa wãꞌãebarii maamina dauba unuɗakau wãꞌãekau.

5 Nau iujãaɗe dachi kakua ãrea dauchia jãaduaɗakauɗeeba de ãnimara e waupeɗaaɗa kĩra ɓuu.* Dachiba kuitaa panuu dachi biuduuɗe Dachi Akõreba dachimaa chi kakua biukau bajãaɗebena deai. Ẽbẽrarãba mau biukau kakua wauɗakau. 2 Mauɗeeba nau kakuaɗe panuuɗe dachiba chi bajãaɗebena kakua ãrea adauɗai kʉ̃ria panuu. 3 Dachiba mau bajãaɗebena kakua uru panaɗaiɗeeba kakuaswãe nureaɗaabai.* 4 Biawãra dachi nau kakuaɗe panuuɗe ãrea biꞌiwãe panabadau mauɗe kĩra nomaa berreabadau. Maamina mʉʉba jarawẽa ɓuu dachi biu kʉ̃ria panuu nau kakua uru paneeɗamaaba. Maumaarã bajãaɗebena kakua adau kʉ̃ria panuu. Maka dachi kakua biui ɓuu wãꞌãepeɗa dachi kakua biukau ɓeei. 5 Biawãra Dachi Akõreba dachi mau baita wausii. Ichi Jauri dachimaa deasii kuitaaɗamera joma ichiba deai jaraɗa biawãra adoeɗayu.

6 Mauɗeeba ewaricha dachi jirukaraayuwãe mauɗe wapeaɗawẽa panuu. Dachiba kuitaa panuu nau kakuaɗe panuuɗe Dachi Mechiu ɓuumaa panuuwãe. 7 Dachi dauba unu panuuɗeeba nibaɗakau, maumaarã Dachi Akõreɗe ijãa panuuɗeeba nibabadau. 8 Maka dachi jirukaraayuwãe mauɗe wapeaɗawẽa panuu. Dachi nau kakuaɗebena wã kʉ̃ria panuu Dachi Mechiu baara nureaɗai baita. 9 Mauɗeeba nau kakuaɗe panuuɗe maebʉrã biuduubʉrã, dachiba joma wau kʉ̃ria panuu Dachi Akõreba dachi biꞌia unumera. 10 Biawãra Cristoba joma dachiba waupeɗaaɗa ichiai. Ichiba dachicha deai dachiba nau kakuaɗe wau ɓuaɗa kĩra. Biꞌia wau ɓuasiibʉrã, ara mau kĩra deai. Kachirua wau ɓuasiibʉrã, ara mau kĩra deai.*

Dachi Akõreba ẽbẽrarã ichi ome waya ãbua panabiaɗa

11 Dachi Mechiu wapea panuuɗeeba daiba ẽbẽrarãmaa jara panuu ichiɗe ijãaɗamera. Dachi Akõreba kuitaa ɓuu daiba kʉ̃risia biaɗeeba jaradea nibapeɗaaɗa. Mʉʉba kʉ̃risia ɓuu machia biɗa mau kuitaa panuu. 12 Waya ara dai ʉ̃rʉbena machimaa biꞌia berrea panuuwãe, maumaarã kʉ̃ria panuu machiba dai ʉ̃rʉbena poyaa biꞌia kʉ̃risiaɗai. Maka waabenarãba dai ʉ̃rʉbena kachirua jaraaduuɗe machiba dai ʉ̃rʉbena poyaa biꞌia jaraɗai. Ãchi dauba biꞌia unu ɓuu biꞌia ɓuu kʉ̃risiabadau. Maamina chi sõɗe ɓuu kʉ̃risiaɗakau. 13 Waabenarãba jara panuu dai kĩranema nuree. Dai kĩranema panuubʉrã, Dachi Akõreba jara ɓuu wauɗai baita maka panuu. Dai kĩrabia panuubʉrã, machi aiɗaɗai baita maka panuu. 14 Cristoba dai kʉ̃ria ɓuuɗeeba ichiba kʉ̃ria ɓuu wau panuu. Mau kʉ̃risiaɗapeɗa biawãra kuitaa panuu Ẽbẽra Aɓa biusii jomaurã kakua. Mauɗeeba Dachi Akõre daaɗe joma biusiɗau. 15 Biawãra Cristo jomaurã kakua biupeɗa chokae jiradusii dachi chokae nureeba ara dachiba wau kʉ̃ria panuu kĩra waa waurãaɗamera, maumaarã ichiba kʉ̃ria ɓuu kĩra wau panaɗamera.

16 Mauɗeeba nau iujãaɗebenarãba waabenarã ichiabadau kĩra jãabae daiba maka ichiaɗakau. Naeɗe daiba Cristo ʉ̃rʉbena maka kʉ̃risia panasmina jãabae maka wauɗakau. 17 Biawãra aɓa Cristo ome ɓuubʉrã, ichi chi naeɗe ɓuaɗa kĩra ɓuuwãe maumaarã ichi ẽbẽra chiwiɗi nii. 18 Joma mau Dachi Akõreba wausii. Cristoɗeeba dachi ichi ome biꞌia ɓusii mauɗe dai ɓusii mau ʉ̃rʉbena ẽbẽrarãmaa jaradeaɗamera. 19 Biawãra Cristoɗeeba Dachi Akõreba nau iujãaɗebenarã ichi ome waya ãbua duanabiasii. Dachiba kachirua waupeɗaaɗa joma perdonasii. Mauɗe mau beɗea ichi ome biꞌia ɓuai ʉ̃rʉbena daimaa deasii jaradeaɗamera. 20 Mauɗeeba Cristoba dai bʉisii ichi baita berreaɗamera. Daiɗeeba Dachi Akõreba machi iu ɓuu ichi ome waya ãbua panaɗamera. Daiba Cristo trʉ̃ɗeeba chi chuburia iɗiiduu: Dachi Akõre ome waya ãbua panásturu. 21 Cristoba kachirua waukau basii. Maamina dachi baita Dachi Akõreba ichi kachirua waubarii kĩra unusii.* Maka Cristoɗeeba chi Dachi Akõre jipa nii dachiba waabenarãmaa poyaa unubiabadau.

6 Daiba Dachi Akõre ome ichi traju wau panuuɗeeba, machimaa chi chuburia iɗiiduu Dachi Akõreba ichi sõbiaɗeeba kariba ɓuu ʉ̃rʉbena ida ɓurãaɗamera. 2 Dachi Akõre beɗeaɗe naka jara ɓuu:

Mʉʉba biawãra jaraaruu: Mau ewari neesii. Iɗi Dachi Akõreba dachi karibabarii.

3 Dai ʉ̃rʉbena aɓaumaa kachirua unubiɗawẽa panuu, aɓau biɗa kachirua berrearãaɗamera daiba jaradeabadau ʉ̃rʉbena. 4 Maumaarã ne jomaɗe unubia panuu dai Dachi Akõre baita bari trajabadaurã. Ãrea biꞌiwãe panuuɗe, ne wãꞌãe panuuɗe mauɗe nebʉraɗe panuuɗe joma dauchia jãadua panuuɗeeba maka unubia panuu. 5 Soaba pe panuuɗe, jʉ̃a uru panuuɗe mauɗe dai kakua kĩrubika panuuɗe maka unubia panuu. Ãrea traja panuuɗe, kãi ɓeeɗawẽa panuuɗe mauɗe jarrbisia panuuɗe maka unubia panuu. 6 Dai jipa nibapeɗaaɗaɗeeba, biawãra kʉ̃risia kuitaaɗeeba, joma dauchia jãadua panuuɗeeba, sõbiaɗeeba, Dachi Akõre Jauri dai sõɗe ɓuuɗeeba, biawãra kʉ̃riaɗeeba, chi biawãra beɗea jaradea panuuɗeeba, mauɗe Dachi Akõre poyaaba maka unubi panuu. Dai jipa panuuɗeeba kachirua poyaabadau mauɗe ara mau jipa panuuɗeeba daiba chi kachiruamaa ida poyaabiɗakau.* 7 —. 8 Ɓeseɗe waabenarãba dai ʉ̃rʉbena biꞌia jarabadau. Ɓeseɗe kachirua jarabadau. Ɓeseɗe dai ʉ̃rʉbena kachirua trʉ̃ poabadau. Ɓeseɗe biꞌia trʉ̃ poabadau. Daiba chi biawãra beɗea jara panumina waabenarãba jara panuu dai setaa jarabadau abadau. 9 Dai ãrea unu panumina ãchiba unuɗakau ẽbẽrarã kĩra waubadau. Dai biumaa panuu kĩra kʉ̃risia panumina wabiɗa chokae panuu. Dai soaba pebadamina beaɗakau. 10 Dai kĩra nomaabadamina ewaricha kĩrajʉʉ panuu. Dai chi nejarra barauwãe panuu. Maamina daiba ẽbẽrarã ãreamaa Dachi Akõre ʉ̃rʉbena kuitaabiabadau ãchi barau nuree kĩra nureaɗamera. Dai chi nejarr barauwãe nuremina Dachi Akõreɗeeba joma uru panuu.

11 Ãbarã Corintoɗebena, daiba sõɗeeba machi ãrea kʉ̃ria panuuɗeeba arakʉɗe jara panuu. 12 Biawãra daiba machi sõɗeeba kʉ̃ria panuu, maamina machiba sõɗeeba dai kʉ̃riawẽa panuu. 13 Mauɗeeba mʉʉba machimaa chi chuburia iɗiiruu akõreba ichi warrarãmaa chi chuburia iɗibarii kĩra: daiba sõɗeeba machi kʉ̃ria panuu kĩra machia biɗa sõɗeeba dai kʉ̃ria panásturu.

Cristoɗe ijãaɗakaurã ome beɗea dearã́sturu

14 Cristoɗe ijãaɗakaurã ome beɗea dearã́sturu. ¿Ẽbẽra jipa nii saka ẽbẽra kachirua ome biꞌia ɓuaima? ¿Chi ʉ̃ɗaaɗe ɓuu saka chi pãriuɗe ɓuu ome biꞌia ɓuaima? 15 ¿Cristo saka jʉbawãe nii ome biꞌia ɓuaima?* ¿Cristoɗe ijãa ɓuu saka Cristoɗe ijãawẽa ɓuu ome biꞌia nibaima? 16 ¿Dachi Akõre kuenda juaba ne kapeɗaaɗa Dachi Akõre de mechiuɗe ɓuai ɓuka? Biawãra dachi, chi Dachi Akõre chokae ɓuu de mechiubʉ. Mauɗeeba Dachi Akõreba ichi beɗeaɗe naka jarasii:

17 Mauɗeeba Dachi Mechiuba naka jarasii:

7 Ãbarã, Dachi Akõreba dachimaa mau joma waui asiiɗeeba nau kakuaba kachirua waubarii mauɗe dachi kʉ̃risiaɗeeba waubarii joma ida ɓuɗai panuu. Dachi Akõre ãrea wapea panuuɗeeba ichi baita biꞌia nureaɗai panuu.

Pablo Corintoɗebena ãbarã kakua kĩrajʉʉɗa

2 Sõɗeeba dai kʉ̃riásturu. Daiba aɓaumaa biɗa kachirua wauɗawẽa panuu, kachirua kʉ̃risiabiaɗawẽa panuu mauɗe setaa kũruaɗawẽa panuu. 3 Mʉʉba mau jarawẽa ɓuu machi ʉ̃rʉbena kachirua jarai baita. Mʉʉba naeɗe jara ɓuasii daiba machi sõɗeeba kʉ̃ria panuu. Mauɗe machi ome ãbua panuuɗe maebʉrã biuduuɗe maka kʉ̃ria panaɗai. 4 Mʉʉba machimaa biawãra berrea ɓuu mauɗe machi kakua mʉ kĩrajʉʉ ɓuu. Dai ãrea biꞌiwãe panuuɗe mʉ machi kakua sõbiaɗeeba ɓuabarii mauɗe ãrea kĩrajʉʉ ɓuabarii.

5 Macedonia druaɗe neesiɗauɗe dai poyaa kʉrrjĩruɗawẽa panasiɗau, maumaarã ne jomaɗe ãrea biꞌiwãe panasiɗau. Ẽbẽrarã dai ome oa kachirua berreabachiɗau mauɗe dai ne wapea nibabachiɗau. 6 Maamina Tito neesiiɗe dai kĩrajʉʉbiasii Dachi Akõreba chi kĩra nomaa nuree kĩrajʉʉbiabariiɗeeba. 7 Dai ichi neeɗa kakúaburu kĩrajʉʉɗaabasii, maumaarã machi kakua kĩrajʉʉsiɗau. Ichiba jarasii machi ome ɓuasiiɗe machiba ichi kĩrajʉʉbipeɗaaɗa. Mau awara nebʉrʉsii machiba dai unu kʉ̃ria panuu, kachirua waupeɗaaɗa kakua kĩra nomaaba jẽa panuu mauɗe kʉ̃riaɗeeba mʉ ʉ̃rʉbena kʉ̃risia panuu. Mauɗeeba mʉ ãrea kĩrajʉʉsii.

8 Mʉʉba karta naa ɓʉɗaba machi kĩra nomaabia ɓuasmina mʉ kĩra nomaawẽa ɓuu. Biawãra naeɗe kĩra nomaa ɓuasii. Kuitaasii machi awawarrea kĩra nomaa panasmina mau kartaɗeeba machi kĩra nomaabiasii. 9 Maamina jãabae mʉ kĩrajʉʉ ɓuu. Kĩrajʉʉ ɓuuwãe machi kĩra nomaabiasiiɗeeba, maumaarã kĩrajʉʉ ɓuu machiba kachirua wau panaɗa kĩra nomaaɗeeba ida ɓuɗapeɗa waya Dachi Akõremaa neesiiɗauɗeeba. Biawãra Dachi Akõreba kʉ̃ria ɓuu kĩra machi kĩra nomaa paneesiɗau. Maka daiba kastikapeɗaaɗa kakua machi kachirua nureaɗaabasii. 10 Aɓaba kachirua wauɗa kakua Dachi Akõreba kʉ̃ria ɓuu kĩra nomaa ɓeeruubʉrã, ichiba kachirua wauɗa ida ɓupeɗa Dachi Akõremaa neei. Maabae Dachi Akõreba ichi karibai. Dachi Akõre ome biꞌia ɓeesiiɗeeba mau kĩra nomaa ɓuaɗa kachirua kʉ̃risiakau. Maamina aɓaba nau iujãaɗebenarã kĩra nomaabadau kĩra nomaaruubʉrã, kachirua ida ɓuwẽeɗeeba biui.

11 Dachi Akõreba kʉ̃ria ɓuu kĩra machi kĩra nomaasiɗauɗeeba mau kĩra nomaaba machimaa jipa kʉ̃risiabiapeɗa jipa waubiasii. Mauɗeeba machiba jipa wau panuu jomaurãmaa kuitaabiai kʉ̃ria panuu. Ãbaba kachirua wauɗa kakua machi kĩrusiɗau mauɗe Dachi Akõreba kastikai baɗa wapeasiɗau. Mauɗeeba chi kachirua wauɗa ẽbẽra kastikaɗapeɗa ãyaa bʉisiɗau. Nejomaɗeeba machiba unubisiɗau mau kachirua wauɗa kakua nebʉraswãe panuu.* 12 Mʉʉba mau karta chi kachirua wauɗa ẽbẽra kastikai báitaburu ɓʉʉbasii. Mauɗe chi kachirua ɓeeɗa ẽbẽra aiɗai baita ɓʉʉbasii. Maumaarã ɓʉsii machiba ijãa panuuɗeeba Dachi Akõre daaɗe kuitaaɗamera biawãra dai ome panuu. 13 Joma mauba dai kĩrajʉʉbiasii.

Mau awara machiba Tito kĩrajʉʉbisiɗau. Ichi machimarebena kĩrajʉʉ neesiiɗeeba dai ãrea kĩrajʉʉsiɗau. 14 Tito machimaa wãi naeɗe mʉʉba machi ʉ̃rʉbena ichimaa biꞌia jarasii. Mʉʉba jaraɗa kĩra Titoba unuɗe wãsiiɗeeba mʉ machi kakua kĩra nejasiawẽa ɓuu. Joma daiba machimaa jaradeapeɗaaɗa biawãra basii. Ara mau kĩra joma daiba Titomaa machi ʉ̃rʉbena biꞌia jarapeɗaaɗa biawãra basii. 15 Titoba kĩraba ɓuabarii machiba ichi beɗea ijãapeɗaaɗa mauɗe wapea panuuɗeeba ichi biꞌia irsibisiɗau. Mauɗeeba machi ãrea kʉ̃ria ɓuu. 16 Jãabae mʉ siɗa kĩrajʉʉ ɓuu. Mʉʉba kuitaa ɓuu machiba biawãra jipa wau panaɗai.

Ãbarãba sõbiaɗeeba chi nejarra deapeɗaaɗa

8 Mau awara ãbarã, daiba kuitaabiai kʉ̃ria panuu Dachi Akõreba ichi sõbiaɗeeba ãbarã Macedonia druaɗebenarã aiɗa ɓuu. 2 Ãchi ãrea biꞌiwãe panumina kĩrajʉʉ panuu. Chi nejarra barauwãe panumina kĩrajʉʉba chi nejarra ãrea deasiɗau. 3 Mʉʉba jaraaruu: ãchiba sõbiaɗeeba chi nejarra ãchi poyaara deasiɗau. Mauɗe ãchiba poyaa deaɗai panaɗa aude deasiɗau. 4 Daimaa ãrea chi chuburia iɗisiɗau ãchia biɗa ãbarã Jerusalenɗebena aiɗaɗai baita. 5 Mauɗe ãchiba wauɗaabasii aɓaburu daiba kʉ̃risia panaɗa kĩra. Maumaarã naa ara ãstu deasiɗau Dachi Mechiuba kʉ̃ria ɓuu kĩra wauɗai baita. Mawãare daiba jarapeɗaaɗa wausiɗau. Maka Dachi Akõreba kʉ̃ria ɓuu kĩra arakʉɗe wausiɗau.

6 Mauɗeeba daiba Titomaa chi chuburia iɗisiɗau machimaa jaraɗe wãmera joma machiba sõbiaɗeeba deaɗai apeɗaaɗa biawãra peɗai baita. 7 Machiba ne jomaɗe ãrea biꞌia wau panuu: Jesusɗe ãrea ijãa panuu, ãrea berrea kuitaa panuu, Dachi Akõreɗeeba ãrea ne kuitaa panuu, Dachi Akõreba kʉ̃ria ɓuu kĩra ãrea wau kʉ̃ria panuu mauɗe dai ãrea kʉ̃ria panuu. Mauɗeeba machiba sõbiaɗeeba chi nejarra pe panuu ãrea deásturu.

8 Mʉʉba mau wáusturu awẽa ɓuu, maumaarã mʉʉba kʉ̃ria ɓuu machiba unubiɗai ãbarã biawãra kʉ̃ria panuu. Mauɗeeba mʉʉba machimaa kuitaabiai ɓuu saka waabenarãba chi nejarra ãbarã Jerusalenɗebena baita pe panuu. 9 Machiba ãrea kuitaa panuu Dachi Mechiu Jesucristoba ichi sõbiaɗeeba wauɗa. Ichi bajãaɗe ne joma uru ɓumina, machi baita chi nejarr barauwãe ɓuu kĩra ɓuasii machiba ne joma Dachi Akõreba dea ɓuuɗebena uru nureaɗamera.

10 Mʉʉmaarã machiba naka wauduubʉrã biꞌia panaɗai: Nabena año basiiɗe machiba waabenarã audeara naa chi nejarra peɗai paneesiɗau mauɗe maka wauɗai kʉ̃riasiɗau. 11 Machiba naa chi nejarra pe panasiɗauɗe sõbiaɗeeba maka wau panasiɗau. Ara mau kĩra machiba sõbiaɗeeba deaɗai apeɗaaɗa joma maka deásturu. Machicha deaɗai panuu machi poyaara deásturu. 12 Biawãra aɓauba poyaa dearuu kĩra sõbiaɗeeba dearuubʉrã, mau deaɗa Dachi Akõreba biꞌia unui. Aɓauba deai baita uru ɓuuwãebʉrã, Dachi Akõreba deábaɗe akau.

13 Mʉʉba maka jarawẽa ɓuu waabenarã aiɗa panuuɗeeba machi ãrea biꞌiwãe panaɗamera. Maumaarã mʉʉba kʉ̃ria ɓuu araɓauɗe chiya aiɗaɗai. 14 Mʉʉba jara ɓuu iɗibae machiba ãrea uru panuuɗeeba ãbarã aiɗaɗai panuu. Ara mau kĩra machi ne wãꞌãe panuuɗe ãchiba ãrea uru panuuba machi aiɗaɗai panuu. Maka jomaurã araɓauɗe chiya aiɗa nureaɗai. 15 Dachi Akõre beɗeaɗe naka jara ɓuu: «Chi ãrea peɗaba ʉ̃rʉ aude uru ɓuabasii mauɗe chi ɓaꞌãra peɗa kiriɓaebasii».*

Pabloba Tito Corintoɗaa bʉiɗa

16 Mʉʉba Dachi Akõremaa ichíturu kiɗibai abarii. Ichiba Titomaa sõɗeeba machi kʉ̃ria ɓuabisii mʉʉba machi kʉ̃ria ɓuu kĩra. 17 Daiba ichimaa jarasiɗau machi ichiaɗe wãmera. Maabae machi ichiaɗe wã kʉ̃ria ɓuasiiɗeeba, wãsii. 18 Ichi ome daiba ãba aɓa bʉiduu. Mau ãbaba chi beɗea bia Cristo ʉ̃rʉbena aiɗa jaradea nibabariiɗeeba ãbarã puuruchaɗebenaba ichi ʉ̃rʉbena biꞌia jarabadau. 19 Mau awara ãbarã puuruchaɗebenaba ichi jʉrʉ adausiɗau dai ome chi nejarra ãbarã baita pepeɗaaɗa Jerusalenɗaa deaɗe wãmera. Mau daiba wau panuu ãbarãba Dachi Mechiumaa biꞌia berreaɗamera mauɗe daiba biawãra aiɗa kʉ̃ria panuu unubiɗai baita.* 20 Daiba kauwa wau panuu mau chi nejarra ãrea pepeɗaaɗa adoeduuɗe aɓau biɗa kachirua jararãaɗamera. 21 Biawãra daiba Dachi Mechiu daaɗe mauɗe ẽbẽrarã daaɗe jipa wau kʉ̃ria panuu.

22 Mau ãbarã baara machimaa bʉiduuɗe, ãba june bʉiɗai. Mau ãbaba ɓes ãrea daimaa unubiasii ãbarã ãrea aiɗa kʉ̃ria ɓuu. Iɗibae machi ãrea aiɗa kʉ̃ria ɓuu machiba jipa wauɗai kuitaa ɓuuɗeeba. 23 Barikiuba Tito ʉ̃rʉbena iɗiiruubʉrã jarásturu ichi mʉ baara nibabarii mauɗe mʉ ome machi tãeɗe Dachi Akõre traju wau ɓuu. Barikiuba chi maarã ome ʉ̃rʉbena iɗiiruubʉrã jarásturu chi ãbarãba maarã bʉipeɗaaɗarã mauɗe ãchi kakua Cristo ʉ̃rʉbena biꞌia berrea panuu. 24 Mau ãbarãmaa unubiásturu machiba ãchi biawãra kʉ̃ria panuu. Maka ãchiba kuitaaɗai daiba machi ʉ̃rʉbena biꞌia jarapeɗaaɗa biawãra basii. Waabenarã ãbarã biɗa ara mau kĩra kuitaaɗai.

Ãbarã Jerusalenɗebena baita chi nejarra pepeɗaaɗa

9 Machiba ãbarã Jerusalenɗebena baita chi nejarra pe panuu ʉ̃rʉbena mʉʉba nau kartaɗe waa ɓʉʉbai ɓuu, 2 mʉʉba kuitaa ɓuuɗeeba machiba aiɗa kʉ̃ria panuu. Mauɗeeba nama Macedonia druaɗe mʉʉba ãbarãmaa machi ʉ̃rʉbena biꞌia berreabarii. Mʉʉba ãchimaa jarabachii nabena año basiɗeeɗebena machi Acaya druaɗebenarãba aiɗaɗai baita panuu. Maka ũrisiɗauɗeeba ãbarã ãrea Macedoniaɗebenarãba ara mau kĩra aiɗaɗai kʉ̃ria panuu. 3 Mauɗeeba mʉʉba nau ãbarã machimaa bʉiruu chi mʉʉba machi ʉ̃rʉbena biꞌia jaraɗa setawãe ɓuu maumaarã machiba biawãra deaɗai baita panaɗai. 4 Maka wauɗawẽebʉrã, chi nuree Macedoniaɗebena ãbarã mʉ baara machimaa wãaduuɗe machiba chi nejarra peɗawẽa panuu unuɗai basii. Mauɗeeba dai kĩra nejasiaɗai, kʉ̃risia panuuɗeeba machiba biawãra peɗai baɗa. Mauɗe machi siɗa ãrea kĩra nejasiaɗai. 5 Mauɗeeba mʉʉba naarã ãbarãmaa chi chuburia iɗisii mʉ naa machimaa jaraɗe wãɗamera machiba sõbiaɗeeba deaɗai apeɗaaɗa joma peɗamera. Maka mʉ neeruuɗe mau joma uru panaɗai. Mauba unubiaɗai daiba deábaɗe aɗawẽa panuu, maumaarã machiba sõbiaɗeeba deasiɗau.

6 Nau kĩrabásturu: «Ɓaꞌãra uuruuba ɓaꞌãra junai. Ãrea uuruuba ãrea junai». 7 Ẽbẽraba aɓaaɓacha deai ɓuu ichi sõɗe kʉ̃risia ɓuu kĩra. Deamaa ɓuuɗeeba deabai ɓuu, maebʉrã deábaɗe a panuuɗeeba deabai ɓuu. Chi kĩrajʉʉba dea ɓuu Dachi Akõreba kʉ̃ria ɓuu. 8 Biawãra Dachi Akõreba ne joma machimaa ãrea poyaa deai. Maka ewaricha ne jomaɗe machiba uru nureaɗai panuu biawãra uru panaɗai mauɗe joma biꞌia wauɗai baita. 9 Dachi Akõre beɗeaɗe naka ɓʉ kuɓuu:

«Ichiba deaɗakasiiɗe chi nejarra barauwãe nureerãmaa ãrea deasii. Ewaricha ichiba jipa waubarii».*

10 Dachi Akõreba netaa deabarii uuɗamera. Koɗai baita biɗa deabarii. Netaa ãrea deabarii kĩra uuɗamera, ichiba joma ãrea machimaa deai waabenarã ãrea aiɗaɗamera. Mauɗe jipa wau panuuɗeeba ne biꞌia ãrea unuɗai, ne uuɗa ãrea chaubarii kĩra. 11 Biawãra Dachi Akõreba machimaa ne joma ãrea deai waabenarã sõbiaɗeeba poyaa aiɗaɗamera. Maabae machiba dai ome chi nejarra urubʉiduu ʉ̃rʉbena ãbarãba Dachi Akõremaa ichíturu kiɗibai aɗai. 12 Machiba chi nejarra deaduuba aɓaburu aiɗaɗaabai ãbarã barauwãe panuuba uru panaɗamera, maumaarã mau kakua ãchiba Dachi Akõremaa ãrea ichíturu kiɗibai a panaɗai. 13 Machiba maka aiɗa panuuba, maka unubi panuu chi beɗea bia Cristo ʉ̃rʉbena biawãra ijãa panuu. Sõbiaɗeeba chi ãbarãmaa dea panuu mauɗe jomaurã aiɗa panuu. Mauɗeeba Dachi Akõremaa biꞌia berreaɗai. 14 Dachi Akõreba ichi sõbiaɗeeba machi ãrea aiɗasii maarã aiɗaɗamera. Mauɗeeba ãchiba machi ãrea kʉ̃ria panuuɗeeba Dachi Akõremaa machi baita ʉtaa iɗi panaɗai. 15 Biawãra Dachi Akõreba mau deaɗa* kakua dachiba Dachi Akõremaa ichíturu kiɗibai aɗai panuu. Mau deaɗa aude biꞌia ɓuuɗeeba dachiba poyaa kuitaa jaraɗaabai saka ɓuu.

Pabloba ara ichi ʉ̃rʉbena ãbarãmaa kuitaabiaɗa

10 Mʉ Pablobʉ. Cristo kʉ̃riaɗeeba mauɗe ichi sõbiaɗeeba mʉʉba machimaa chi chuburia iɗiiruu mʉ beɗea ũriɗamera. Waabenarãba jara panuu machi ome ɓuuɗe mʉʉba wapea ɓuabarii machi iadaai baita, maamina machi ome ɓuuwãeɗe wapeakau kartaɗeeba iadaai baita. 2 Maka jara panumina machimaa neeruuɗe dai kachirua jara panuu mʉʉba biawãra iadaai. Ãchiba jara panuu dai nau kakuaba kʉ̃ria ɓuu kĩra nibabadau. Mauɗeeba machi siɗa iadaamaaba mʉʉba chi chuburia iɗiiruu jipa wauɗamera. 3 Dai nau kakuaɗe panuu maamina nau kakuaɗeeba chĩo panuuwãe kachirua poyaaɗai baita. 4 Daiba chĩoɗai baita uru panuu nau iujãaɗebenawãema, maumaarã Dachi Akõre poyaabariiɗeeba joma nau iujãaɗebena kʉ̃risiabadau daiba poyaabadau.* 5 Joma kʉ̃risia biꞌiwãe ɓee mauɗe dachi nejuakayaɗeeba Dachi Akõre ʉ̃rʉbena ida kuitaabiaɗakau, daiba chi seta kuitaabiabadau. Jʉ̃a uru paneeduu kĩra daiba chi maka kʉ̃risia nuree jipa kʉ̃risiabiabadau Cristoɗe ijãaɗamera. 6 Daiba ãbarã sõ chaarea nuree kastikaɗai baita panuu. Maamina naa eseɗau panuu machiba Cristoɗe joma ijãa panuu unubiaɗamera.

7 Machiba chi ʉ̃rʉbena ichia panuu. Barikiuba biawãra Cristoɗe ɓuu kʉ̃risia ɓuubʉrã, kuitaa ɓuai ɓuu dai siɗa Cristoɗerã. 8 Dachi Akõreba daimaa waubi ɓuu ʉ̃rʉbena mʉʉba ãrea berrea ɓumina mau kakua kĩra nejasia ɓuuwãe. Dachi Mechiuba daimaa maka waubi ɓuu machiba biꞌia ijãaɗamera. Ichiba dai ɓuubasii machiba ijãa panuu ida ɓuɗamera. 9 Mʉʉba kʉ̃riawẽe machiba kʉ̃risiaɗai mʉ kartaɗeeba machi perabiai kʉ̃ria ɓuu. 10 Waabenarãba jara panuu: «Pabloba kartaɗeeba ãrea iadaabarii mauɗe machimaa ãrea waubiabarii. Maamina machi ome ɓuuɗe wapea ɓuu kĩra nii mauɗe biꞌiwãe berreabarii abadau». 11 Chi maka jara panuuba kuitaaɗai panuu daiba kaitawẽeba kartaɗeeba iadaa panuu kĩra, machi baara panuuɗe maka iadaaɗai.

12 Maamina ¿sakaburu dai ara ãstu chi bibuara nuree abadau kĩra kʉ̃risiaɗaima? Ara ãstu ichiabadau mauɗe ãchiɗebena ichiabadau kai aude bibuara nuree kuitaaɗai baita. Maka wau panuuba, kauwa ũriɗakau unubiabadau. 13 Ara dai ʉ̃rʉbena biꞌia berreaɗaabai, maumaarã Dachi Akõreba daimaa waubi ɓuu ʉ̃rʉbena biꞌia berreaɗai. Ichiba waubi ɓuu wau panuuɗeeba dai machimaa neesiɗau. 14 Dai machimaa naa chi beɗea bia Cristo ʉ̃rʉbena jaradeaɗe wãsiɗau. Maka ɓuaɗawãe basirã iɗibae machimaa jaradeaduuɗe, Dachi Akõreba bʉiɗawãemaa panaɗaabai basii. 15 Waabenarãba waupeɗaaɗa kakua ara dai ʉ̃rʉbena biꞌia berreaɗakau ara daiba waupeɗaaɗa kĩra. Maumaarã daiba kʉ̃ria panuu machiba Cristoɗe biꞌia ijãaɗai. Maka daiba machi druaɗe poyaa biꞌia jaradeaɗai ara Dachi Akõreba waubi ɓuu kĩra. 16 Jãabae chi beɗea bia Cristo ʉ̃rʉbena waabena druaɗe biɗa jaradeaɗai. Maamina waabenarãba jaradeapeɗaaɗamaa wãɗaabai, mau waabenarãba waupeɗaaɗa daiburu wausiɗau aɗaamaaba. 17 Dachi Akõre beɗeaɗe ɓʉ kuɓuu: «Aɓauba biꞌia berrearuubʉrã, Dachi Mechiu ʉ̃rʉbena biꞌia berreai ɓuu».* 18 Aɓauba ara ichi ʉ̃rʉbena biꞌia jaraaruubʉrã, mauba jara ɓuuwãe Dachi Mechiuba mau ẽbẽra biꞌia unu ɓuu. Maumaarã chi Dachi Mechiuba biꞌia jara ɓuu ẽbẽra biꞌia unu ɓuu.

Jesucristoba bʉiɗarã kĩra nuree

11 Mʉ kʉ̃risiaswãe nii kĩra berrea ɓumina kʉ̃ria ɓuu machiba dauchia jãadua panaɗai. Mʉ chi chuburia iɗiiruu mʉʉba jaraaruu ũrísturu. 2 Dachi Akõreba nubia ɓuu kĩra mʉʉba machi ãrea nu kʉ̃ria ɓuu. Ẽbẽraba ichi kau kima dearuu kĩra mʉʉba machi Cristomaa dea kʉ̃ria ɓuu ara ichiɗirã nureaɗamera. Mʉʉba kʉ̃ria ɓuu machi ichi baita ãrea biꞌia nureaɗai ãwera mukĩra adua ɓuu kĩra. 3 Maamina mʉʉba wapea ɓuu waabenarãba machi setaa kũruaɗai damaba kʉ̃risia kuitaaɗeeba Eva setaa kũruaɗa kĩra.* Makarã machiba Cristoɗe biawãra sõɗeeba ijãa panuu ida ɓuɗai. 4 Dai diware nuree neeɗaba Jesús ʉ̃rʉbena daiba jaradeapeɗaaɗa awara jaradearuuɗe maebʉrã chi Dachi Akõre Jauri machiba adaupeɗaaɗa ʉ̃rʉbena awara jaradearuuɗe machiba kauwa ũribadau. Mauɗe chi beɗea bia machiba ijãapeɗaaɗa awara jaradearuuɗe kauwa ũribadau. 5 Chi maka jaradeabadaurã ¿machimaarã, jãarã Jesucristoba bʉiɗarã chi aude bibuararãka? Mʉʉmaarã, ãchi audeara mʉ chi aude kaebeu ɓuwãema. 6 Mʉ biꞌia berreakamina, biawãra beɗea ãrea kuitaa nii. Mau biawãra beɗea daiba nejomaɗeeba machimaa arakʉɗe kuitaabiasiɗau.

7 Mʉʉba chi beɗea bia Dachi Akõre ʉ̃rʉbena machimaa chi nejarra iɗiyuswãe jaradeasiiɗeeba mʉ machi daaɗe kaebeu kĩra ɓeesii Dachi Akõre ome biꞌia nureaɗamera. ¿Makarã kachirua wauska? 8 Waabena ãbarãba chi nejarra mʉʉmaa deasiɗau machimaa poyaa ãrea jaradea ɓuamera. 9 Mʉ machimare ɓuasiiɗe ne joma uru ɓuabasmina machimaa ne iɗiibasii. Maumaarã mʉʉba wãꞌãe ɓuaɗa ãbarã Macedoniaɗebena neepeɗaaɗaba joma mʉʉmaa deasiɗau. Mʉʉba ne aɓa biɗa machimaa iɗiibasii mauɗe iɗiwẽa ɓuai. 10 Cristo mʉ sõɗe ɓuuɗeeba biawãra jaraaruu: Mʉʉba machiɗeeba chi nejarra adauwẽa ɓuu aaruuɗe, chi waabenarã audeara nii kĩra jara ɓuu. Acaya druaɗebenarã aɓau biɗa poyaa jaraɗaabai mʉʉba maka jaraabai ɓuu. 11 ¿Mʉʉba sakãe maka chi nejarra iɗiwẽa ɓuma? ¿Machi kʉ̃riawẽa ɓuuɗeeba maka wau ɓuka? Dachi Akõreba kuitaa ɓuu mʉʉba machi kʉ̃ria ɓuu.

12 Ara mʉʉba waubarii kĩra wau ɓeei. Chi dai kĩra wau panuu abadaurãba maka berreabadau waabenarã audeara nuree a kʉ̃risia panuuɗeeba. Maamina aɓau biɗa poyaa jaraɗaabai dai kĩra wau panuu. 13 Ãchi Cristoba bʉiɗarãwãema, maumaarã waabenarã setaa kũruabadaurãbʉ. Setaɗeeba kʉ̃risiabiabadau ãchi Cristoba bʉiɗarã. 14 Jãarã ʉ̃rʉbena machiba kauwa kʉ̃risiaɗai adua panuuwãema. Satanás siɗa ángel ʉ̃ɗaaɗebena kĩra neebarii. 15 Mauɗeeba ichi baita bari trajabadaurã biɗa jipa wau panuu kĩra needuubʉrã machiba kʉ̃risiaɗaabai panuu saka jãka needuu. Maamina ãchi biuɗai ewariɗe ãchiba kachirua waupeɗaaɗa kĩra kastikai.

Pablo ãrea biꞌiwãe ɓuu tãeɗe kĩrajʉʉɗa

16 Mʉʉba waya jaraaruu: aɓau biɗa kʉ̃risiabai ɓuu mʉ kʉ̃risiaswãe nii. Maamina maka kʉ̃risiaduubʉrã, mʉ kʉ̃risiaswãe nii kĩra ida berreabísturu mʉa biɗa ara mʉ ʉ̃rʉbena ɓistĩika biꞌia berreai baita. 17 Ara mʉ ʉ̃rʉbena biꞌia berrea ɓuuɗe Dachi Mechiuba maka berreabiwẽa ɓuu, maumaarã mʉ kʉ̃risiaswãe nii kĩra berrea ɓuu. 18 Ãreaba ara ãchi ʉ̃rʉbena ãrea berreabadau nau iujãaɗebenarãba waubadau kĩra. Mauɗeeba mʉa biɗa ara mʉ ʉ̃rʉbena biꞌia berreai. 19 Machi kʉ̃riskawa nureeɗeeba nau kʉ̃risiaswãe niiba jaradea ɓuu machiba dauchia jãadua panabadau.* 20 Machi ãchi baita bari trajabadaurã kĩra paneebiaduuɗe, machi koɗai baɗa kooduuɗe, machiɗe juakaa adauduuɗe, maarãba machi aude bibuara nuree kʉ̃risiaduuɗe maebʉrã machi kĩedarr sĩiduuɗe machiba ida kabibadau. 21 Mʉʉba jaraaruu: mʉ machi tãeɗe ɓuasiiɗe, jãarã kĩra ɓuabasii. Machimaarã, mʉ maka chi poyaabariiswãe ɓuaɗa kakua, ¿nejasia ɓuai ɓuka?

Aɓauba ara ichi ʉ̃rʉbena poyaa biꞌia berrearuubʉrã, mʉa biɗa ara mʉ ʉ̃rʉbena poyaa biꞌia kʉ̃riai. Maamina maka berrearuuɗe kʉ̃risiaswãe nii kĩra berreai ɓuu. 22 Ãchi hebreorã a panuu. ¿Mʉ siɗa araɓauwãeka? Ãchi Israelɗebenarã a panuu. ¿Mʉ siɗa araɓauwãeka? Ãchi Abrahamɗebena imipeɗaaɗarã a panuu. ¿Mʉ siɗa araɓauwãeka? 23 Ãchi Cristo baita bari trajabadaurã a panuu. Maamina ãchi audeara mʉʉba biꞌia Cristoba kʉ̃ria ɓuu waubarii. Maka berrea ɓuuɗe kʉ̃risiaswãe nii kĩra berrea ɓuu. Biawãra ãchi audeara mʉʉba Dachi Akõre traju audeara waubarii. Ãchi audeara ẽbẽrarãba mʉ ɓes ãrea sĩsiɗau. Ãchi audeara mʉ ɓes ãrea jʉ̃a uru panasiɗau. Ɓes ãrea mʉ biumaa ɓuasii. 24 Ɓes jua aɓa judiorãba mʉ jidausiɗau. Jidauduucha soaba 39 ɓes pesiɗau. 25 Ɓes õbea mʉ jidauɗapeɗa bakuruba usiɗau. Ɓes aɓa mʉ mooba ɓatasiɗau beaɗai baita. Ɓes õbea mʉ marɗe wãsiiɗe, jãba taawãsii. Ɓes aɓa ãyadaa mauɗe ẽsabuɗe mʉ mar ẽsa ũu ɓuasii.

26 Mʉ oɗe wãaruuɗe, do che nuɓuuɗe nibabachii, mauɗe nechiruabadau baraumare nibabachii. Ara mʉ ẽbẽrarã judiorã tãeɗe mauɗe judiowãerã tãeɗe mʉ kachiruaɗe ɓuasii. Puuruɗe mauɗe puuru awara mʉ kachiruaɗe ɓuasii. Marɗe biɗa kachiruaɗe ɓuasii. Biawãra ãbarãwãe kakua mʉ kachiruaɗe ɓuasii. 27 Traja ɓuuɗe mʉ ãrea biꞌiwãe ɓuabachii. Ɓes ãrea kãi ɓeeka basii, jarrbaa ɓuabachii, obisia ɓuabachii, kowẽa ɓuabachii. Kũrasãaba mʉ uri ɓuabachii mauɗe paruswãe ɓuabachii. 28 Mau awara ewaricha joma ãbarã druachaɗebena ʉ̃rʉbena mʉ ãrea jirukaraa ɓuabarii. 29 Aɓa ẽpermo ɓeeruubʉrã, mʉ siɗa ẽpermo ɓeeruu kĩra ɓuabarii. Aɓauba waabena ãba kachiruaɗe ɓaebiiruubʉrã, mʉ mau ẽbẽra ome kĩrubarii.

30 Ara mʉ ʉ̃rʉbena biꞌia berrearuubʉrã, mʉ meserãaswãe nii ʉ̃rʉbena biꞌia berreai. 31 Dachi Bajãaɗebena Mechiu Jesús Akõre ʉ̃rʉbena ewaricha biꞌia berreaɗai panuu. Ichiba kuitaa ɓuu mʉ setaa jarakau. 32 Damasco puuruɗe ɓuasiiɗe chi rey Aretasba ichi puuru nubariimaa mʉ jʉrʉbisii jidaumera. 33 Maamina ãbarãba mʉ ẽ mechiuɗe eɗa joaɗapeɗa, maabae chi puuru mooba aɗu karaaɗa choɓea nuɓuuɗe ʉ̃rʉʉba eɗaa bʉisiɗau. Maka ichi juakaa jĩidru wãsii.*

Pabloba bajãaɗe unuɗa

12 Waya ara mʉ ʉ̃rʉbena biꞌia berreai, mauba waabenarã aiɗakamina. Dachi Mechiuba mʉ daumaa unubiɗa mauɗe kuitaabiɗa mʉʉba jaraaruu. 2 Cristoɗe ijãabarii ẽbẽra aɓa mʉʉba unubarii.* Año 14 basiiɗe, Dachi Akõreba mau ãba bajãaɗaa ichi ɓuumaa adoesii.* Mʉʉba adua ɓuu Dachi Akõreba ichi chi kakua adoe ɓuasii maebʉrã aɓaburu ichi jauri adoe ɓuasii. Dachi Akõréburu mau kuitaa ɓuu. 3 Maamina mʉʉba kuitaa ɓuu Dachi Akõreba mau ãba ichi bajãa biꞌia ɓuuɗaa adoe ɓuasii. Aria mau ãbaba beɗea bia ũrisii dachiba poyaa kuitaa jaraɗakau mauɗe nau iujãaɗe jaraɗaabai ɓuu. Biawãra mʉʉba adua ɓuu Dachi Akõreba ichi kakua adoe ɓuasii maebʉrã aɓaburu ichi jauri adoe ɓuasii. Dachi Akõréburu mau kuitaa ɓuu. 4 —. 5 Mau ãba ʉ̃rʉbena mʉʉba biꞌia berreai, maamina ara mʉ ʉ̃rʉbena biꞌia berreawẽma. Aɓaburu mʉ meserãaswãe nii ʉ̃rʉbena biꞌia berreai. 6 Biawãra ara mʉ ʉ̃rʉbena biꞌia berrea kʉ̃ria basirã mʉ kʉ̃risiaswãe nii kĩra berreabasii, biawãra beɗea berreai basiiɗeeba. Maamina mʉ maka berreawẽma aɓau biɗa mʉ biꞌia ɓuu kʉ̃risiarãaɗamera. Maumaarã mʉʉba kʉ̃ria ɓuu machiba mʉ ʉ̃rʉbena arakʉɗe kʉ̃risiaɗai mʉʉba wau ɓuu unu panuuɗeeba mauɗe mʉʉba jaradea ɓuu ũri panuuɗeeba.

7 Dachi Akõreba mʉʉmaa bajãaɗe unubiɗa ãrea bibuara ɓuasii. Maamina mʉʉba ara mʉ ʉ̃rʉbena ãrea biꞌia kʉ̃risiarãamera, Dachi Akõreba mʉʉmaa puꞌuabisii ʉriba su nuɓuu kĩra. Satanasba bʉiɗaba maka waubarii. 8 Mʉʉba ɓes õbea Dachi Mechiumaa chi chuburia iɗisii mau puꞌua wãꞌãebimera. 9 Maamina ichiba jarasii: «Mʉ sõbiaɗeeba bichi aiɗai joma dauchia jãadua ɓuamera. Bichi meserãaswãe ɓuuɗe mʉ jua aude meserãa ɓuu». Mʉ meserãaswãe ɓuuɗe Cristo poyaa ɓuabariiɗeeba mʉ meserãaswãe ɓuu ʉ̃rʉbena kĩrajʉʉba biꞌia berreai. 10 Cristo kakua ãrea biꞌiwãe ɓuuɗe, meserãaswãe ɓuuɗe, ne wãꞌãe ɓuuɗe, ẽbẽrarãba mʉ ʉ̃rʉbena kachirua jara panuuɗe mauɗe kachirua wauɗai baita wãraa panuuɗe mʉ kĩrajʉʉ ɓuu. Biawãra mʉ meserãaswãe ɓuuɗe Cristoɗeeba meserãa nii.

Corintoɗebena ãbarã ʉ̃rʉbena Pabloba kʉ̃risia ɓuaɗa

11 Mʉ kʉ̃risiaswãe nii kĩra ara mʉ ʉ̃rʉbena biꞌia berrea ɓuu, maamina machiaburu mʉ maka berreabisiɗau. Machiba mʉ ʉ̃rʉbena biꞌia berreaɗai panumina biꞌia berreaɗawẽa panuu. Mauɗe kʉ̃risia panuu jãarã Jesucristoba bʉiɗarã abadaurã chi mechiu nuree. Mʉ chi mechiuwãemina ãchi audeara kaebeu ɓuuwãe. 12 Mʉ machi tãeɗe ɓuasiiɗe joma wausii, Jesucristoba bʉiɗarãba waubadau kĩra. Joma dauchia jãadua ɓuasii mauɗe ẽbẽrarãba ne poyaa wauɗakau waubachii. 13 ¿Mʉʉba kãareɗeeba machi waabena puuruɗebena ãbarã audeara kachirua wausma? ¿Aɓaburu machiɗebena mʉʉba ne iɗiwẽa ɓuasiiɗeeba, maka kʉ̃risia panuka? Maka ɓuubʉrã ¡mau kachirua wauɗa michuburia perdonásturu!

14 Mʉ machimaa wãi baita ɓuu. Nauba ɓes õbea bai wãaruu. Maamina mʉʉba iɗiwẽma machiba aiɗaɗamera. Machiba uru ɓee jʉrʉ ɓuuwãe, maumaarã machi kʉ̃ria ɓuu. Warrarãba chi nejarra jaatʉɗakau ãchi akõrerãmaa deaɗai baita, maumaarã chi akõrerãba chi nejarra jaatʉbadau ãchi warrarãmaa deaɗai baita. 15 Ara mʉ mauɗe joma mʉʉba uru ɓuu kĩrajʉʉ deai machi aiɗai baita. Mʉ ãrea kʉ̃riaɗawẽa panumina, mʉʉba machi aude kʉ̃riakua ɓuai.

16 Machiba kuitaa panuu mʉʉba machi chi nejarra ɓaꞌãra biɗa iɗiibasii. Maamina chi waabenarãmaarã mʉ kʉ̃risia kuitaaɗeeba machi setaa kũruasii chi nejarra adaui baita. 17 Mʉʉba ãbarã bʉisiiɗe ¿ãchiɗeeba machi setaa kũruaska chi nejarra adaui baita? 18 Mʉʉba Titomaa chi chuburia iɗisii machi ichiaɗe wãmera. Junebena ãba siɗa ichi ome bʉisii. Ãchi wãsiɗauɗe ¿Titoba machi setaa kũruaska chi nejarra adaui baita? ¿Daiba araɓau kʉ̃risia uru panaɗaabaska? ¿Ara mau kĩra nibaɗaabaska?

19 ¿Machimaarã daiba maka jara panuka dai ʉ̃rʉbena kachirua kʉ̃risiarãaɗamera? Makawãema. Ãbarã, dai Cristoɗerãɗeeba Dachi Akõre daaɗe joma mau jara panuu machiba biꞌia ijãaɗamera. 20 Mʉʉba wapea ɓuu machimaa wãpeɗa machi unuubai mʉʉba unu kʉ̃ria ɓuu kĩra. ¡Mauɗe machiba mʉ unuɗaabai machiba kʉ̃ria panuu kĩra, machi iadaaiɗeeba! Biawãra mʉʉba wapea ɓuu unuɗe wãi machi oa kachirua berrea panuu, waabenarãba ne uru panuu kakua kĩra kachirua panuu, kĩru panuu, ara machi biꞌia panaɗai baita jʉrʉ panuu, waabenarã ʉ̃rʉbena oa kachirua berrea panuu, waabenarã ʉ̃rʉbena setaa jara panuu, chi aude mechiu nii kʉ̃risia panuu, mauɗe kĩrubika bara ɓuu. 21 Mʉʉba wapea ɓuu machimaa waya neeruuɗe Dachi Akõreba mʉ kaebeu kĩra ɓui, machi kakua. Mauɗe ãrea machiba naeɗe kachirua wau panaɗa wabiɗa wau panuuɗeeba mʉ jẽai. Machiba chi Dachi Akõremaarã biꞌiwãe waubadau, dachi kakuaba barikia kachirua waubadau mauɗe waabenarã daaɗe kĩra nejasia waubadau wabiɗa mau ida ɓuɗawẽa panuuɗeeba jẽai.

Pabloba nau kartaɗe aanama ɓʉɗa

13 Dachi Akõre beɗeaɗe naka jara ɓuu: «Aɓauba kachirua wauɗa ichiaduuɗe ẽbẽra ome maebʉrã õbea panaɗai panuu. Mauɗe ichiba kachirua wauɗa ʉ̃rʉbena araɓauɗe jaraaduubʉrã, kuitaaɗai biawãra kachirua wausii».* Nauba ɓes õbea mʉ machimaa wãaruuɗeeba iadaai Dachi Akõre beɗeaɗe jara ɓuu kĩra. 2 Ɓes ome machimaa wãsiiɗe mʉʉba jarasii kachirua wau nureerãmaa waa waurãaɗamera. Maka wauɗawẽebʉrã, waya neeruuɗe mʉʉba ãchi kĩra chuburiabai asii. Mauɗe ara ʉ̃rauɗe mʉ machi baara ɓuuwãemina araɓauɗe jaraaruu: kachirua wau nureerãba ida ɓuɗawẽebʉrã, mʉ waya wãaruuɗe ãchi kĩra chuburiabai. 3 Machiba Cristo biawãra mʉʉɗeeba berrea ɓuu kuitaa kʉ̃ria panuuɗeeba, mʉʉba maka unubiai. Cristoba ara ichi meserãaswãe nii machimaa unubiakau, maumaarã meserãa nii unubia ɓuu. 4 Ichi meserãaswãe nii kĩra cruzɗe jiraɓusiɗamina Dachi Akõre poyaabariiɗeeba chokae nii. Dai siɗa meserãaswãe panuu ichi meserãaswãe ɓuaɗa kĩra, maamina machimaa unubiaɗai ichi ome dai Dachi Akõre poyaabariiɗeeba panaɗai.

5 Ara machicha ãrea kʉ̃risiásturu biawãra Jesusɗe ijãa panuu kuitaaɗai baita. Ara machicha ãrea ichiásturu jipa nibaɗa kuitaaɗai baita. ¿Machiba adua panuka Jesucristo machi sõɗe ɓuu? Machi sõɗe ɓuuwãebʉrã ichiɗirãwãema. 6 Maamina machi sõɗe ɓuu kuitaaduubʉrã mʉʉba kʉ̃risia ɓuu machiba kuitaaɗai dai biawãra Jesucristoba bʉiɗarã. 7 Daiba Dachi Akõremaa iɗi panuu machiba kachirua waurãaɗamera. Maamina maka iɗi panuuwãema unubiɗai baita dai Jesucristoba bʉiɗarã. Maumaarã iɗi panuu machiba joma biꞌia wauɗamera, dai Jesucristoba bʉiɗarã kʉ̃risiaɗawẽa panumina. 8 Daiba chi biawãra beɗea poyaa kĩra awara wauɗaabai, maumaarã chi biawãra beɗea joma wauɗai panuu. 9 Machiba ãrea ijãa panuubʉrã dai meserãaswãe panumina kĩrajʉʉ panuu. Mau awara daiba Dachi Akõremaa ʉtaa iɗi panuu machiba jipa wau panaɗamera. 10 Mauɗeeba machimaa wãi naeɗe mʉʉba nau karta urubʉiruu. Machiba mau ijãaduubʉrã machimaa neeruuɗe mʉʉba iadaabai. Biawãra Dachi Mechiu Jesusba mʉ ɓuubasii machi kachirua wauɗamera, maumaarã mʉ ɓusii machiba biꞌia ijãaɗamera.

11 Ãbarã, kaaɗeare mʉʉba naka ɓʉʉruu: kĩrajʉʉ panásturu, waya jipa wau panásturu, mʉʉba jara ɓuu wau panásturu, araɓau kʉ̃risia uru panásturu mauɗe jirukaraayuwãe panásturu. Makarã chi Dachi Akõreba dachimaa kʉ̃riabiabarii mauɗe jirukaraayuwãe ɓuabiabarii machi ome ɓuai. 12 Biawãra kʉ̃riaɗeeba chiya biꞌia berreásturu.* 13 Joma namabena ãbarãba kʉ̃ria panuu machi biꞌia duanaɗai.

14 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai, Dachi Akõreba ãrea kʉ̃ria ɓuai mauɗe ewaricha Dachi Akõre Jauriba ãbua biꞌia uru ɓuai.