TITO

Pabloba nau kartaɗe naa ɓʉɗa

1 Mʉ Pablobʉ, Dachi Akõre baita bari trajabarii mauɗe Jesucristoba bʉiɗa. Mʉ bʉisii Dachi Akõreba jʉrʉ adauɗarãba ichiɗe ijãaɗamera mauɗe chi biawãra beɗea kuitaaɗapeɗa Dachi Akõreba kʉ̃ria ɓuu kĩra nureaɗamera. 2 Chi maka ijãa panuuba Dachi Akõre ome ewaricha chokae panaɗai baita eseɗau panuu, nau drua waui naeɗe Dachi Akõre setaa jarakauba maka waui asiiɗeeba. 3 Maabae ichiba ɓuɗa ewariɗe mʉʉba jaradea ɓuuɗeeba ichi beɗea Cristo ʉ̃rʉbena biꞌia kuitaabisii. Mau beɗea Dachi Akõre chi Karibabariiba mʉʉmaa jaradeabisii.

4 Tito, mʉʉba nau karta bichi baita ɓʉʉruu. Dachiba araɓauɗe Cristoɗe ijãa panuuɗeeba bichi biawãra mʉ warr kĩra ɓuu. Mʉʉba kʉ̃ria ɓuu Dachi Bajãaɗebena Akõreba* mauɗe Dachi Mechiu Jesucristoba ãchi sõbiaɗeeba bichi aiɗa panaɗamera mauɗe jirukaraayuwãe panabiɗamera.

Pabloba Titomaa ijãabadaurã nubadaurã ɓukuábaɗe aɗa

5 Mʉʉba bichi Creta islaɗe ɓʉisii dachiba wauɗai ɓuu joma waumera. Mʉʉba jaraɗa kĩra ijãabadaurã nubadaurã puurucha ɓukuase.* 6 Ijãabadaurã nubarii ʉ̃rʉbena nebʉra barau nii aɗayuswãe ɓuu. Wẽra aɓaburu uru ɓuai ɓuu. Chi warrarãba Cristoɗe ijãa panaɗai panuu mauɗe jipa nibaɗai panuu. Maka ẽbẽrarãba jaraɗaabai kachirua wau panuu maebʉrã ũribabaswãe nuree. 7 Ijãabadaurã nubariiba Dachi Akõre traju waubariiɗeeba, nebʉra barau nii aɗayuswãe ɓuu. Ichi nejuakaya nibaabai ɓuu, bari au kĩru nibaabai ɓuu, itua biu nibaabai ɓuu, kĩrubi iɗaa nibaabai ɓuu mauɗe chi nejarra kʉ̃ria nibaabai ɓuu. 8 Maumaarã ichi deɗe needuu sõbiaɗeeba urúbaɗe aɗai ɓuu, ne joma biꞌia wau kʉ̃ria nibai ɓuu, kʉ̃risia sõbiaɗeeba ɓuai ɓuu, jipa ɓuai ɓuu, Dachi Akõre baita ɓuai ɓuu, mauɗe ara ichi kakua jipa uru ɓuai ɓuu. 9 Chi biawãra beɗea

ẽbẽrarã poyaa aiɗai biꞌia ijãaɗamera mauɗe chi biawãra beɗea kachirua abadaurãmaa poyaa kuitaabiai maarãba biꞌiwãe kʉ̃risia panuu.

10 Mʉʉba maka jara ɓuu biawãra beɗea kʉ̃riaɗakaurã, dachi aiɗaɗakau beɗea jaradeabadaurã mauɗe waabenarã setaa kũruabadaurã barauɗeeba. Maarãba dachi mukĩra chi kakua tõoɗai panuu abadaurã. 11 Ãchiba chi jaradeabai ɓuu jaradea panuuɗeeba decha ẽbẽrarãmaa biꞌiwãe kʉ̃risiabiabadau. Aɓa chi nejarra bareburu jaradeabadau. Maarãmaa ida jaradeabiarã́se.

12 Ara mau Creta islaɗebena nabẽraeɗebena aɓa chi aude kʉ̃risia kuitaa niiba naka jarasii: «Creta islaɗebenarã, ãnimara kachirua kĩra nuree, ko ãrea nuree mauɗe koꞌoa nuree».* 13 Mauba jaraɗa biawãrabʉ. Mauɗeeba mau ẽbẽrarã iadaa ɓuase biawãra beɗea ijãaɗamera, judiorãba nabẽraeɗebena nebʉrʉbadau ida ɓuɗamera mauɗe chi biawãra beɗea ijãaɗakaurãba jaradea panuu ijãarãaɗamera. 14 —.

15 Dachi Akõre daaɗe chi bia nuree baita ne joma Dachi Akõre daaɗe bia ɓuu. Maamina Dachi Akõreɗe ijãaɗakaurã baita ne aɓa biɗa biꞌiwãe ɓuu. Ãchiba kachirua kʉ̃risiabadau mauɗe ãchi sõɗe nebʉra barauwãe nuree abadau. 16 Ãchiba jarabadau Dachi Akõre kuitaa panuu, maamina ãchiba wau panuuɗeeba unubibadau ichi ida ɓu panuu. Ãchi sõ chaarea nuree mauɗe ne bia wauɗai baita panaɗakau. Ãchiba waubadau Dachi Akõreba kʉ̃riakau.

Pabloba Titomaa jaradeabiɗa

2 Maamina bichiba chi biawãra beɗea jipa jaradea ɓuai ɓuu. 2 Chõrarãmaa jaradease ãchi kakua jipa uru nureaɗamera, kĩra jipa nureaɗamera, kʉ̃risia biaɗeeba nibaɗamera, Cristoɗe ãrea ijãaɗamera, biawãra kʉ̃riaɗeeba nureaɗamera, mauɗe joma jãaduaɗamera. 3 Mauɗe chõodraarãmaa jaradease Dachi Akõre daaɗe jipa nureaɗamera, waabenarã ʉ̃rʉbena setaa jararãaɗamera mauɗe itua biu nibarãaɗamera. Maumaarã ne joma biꞌia jaradeaɗai panuu. 4 Ãchiba awẽrarãmaa jaradeaɗai panuu ãchi kima, ãchi warrarã siɗa kʉ̃riaɗamera, kʉ̃risia biaɗeeba jipa nibaɗamera, wẽra bia nureaɗamera, ãchi de biꞌia nuɗamera, sõbia nureaɗamera, mauɗe ãchi kimaba jaraaruu wauɗamera. Maka aɓau biɗa Dachi Akõre beɗea kachirua jaraɗaabai. 5 —.

6 Kũudrãarãmaa jaradease kʉ̃risia biaɗeeba jipa nibaɗamera. 7 Joma biꞌia wau ɓuuɗeeba jomaurãmaa unubi ɓuase saka nibaɗai panuu. Kʉ̃risia biꞌia jipa jaradea ɓuase. 8 Biawãra beɗea jaradea ɓuase aɓau biɗa bichi ʉ̃rʉbena kachirua jararãaɗamera. Maka jaradea ɓuaibʉrã, bichi kĩramaabadaurã kĩrakayaɗai. Ãchiba ɓaꞌãra biɗa dachi poyaa kachirua jaraɗaabai.

9 Chibari baita bari trajabadaurãmaa jaradease ãchi chibariba jara ɓuu joma wauɗamera. Ne joma biꞌia wauɗai panuu ãchi chibariba biꞌia unumera. Ãchiba jaraaruu arakʉɗe panauɗaabai panuu. 10 Ãchi jaradea ua ɓuabariiɗe chiruaɗaabai panuu, maumaarã unubiɗai panuu ãchiba ne joma jipa wau panuu. Maka ẽbẽrarãba kuitaaɗai Dachi Akõre Karibabarii beɗea ãrea biꞌia ɓuu.

11 Dachi Akõreba jomaurãmaa unubiasii ichi sõbiaɗeeba ẽbẽrarã karibabarii. 12 Mauba dachimaa kuitaabia ɓuu ne joma kachirua mauɗe nau iujãaɗebenarãba kʉ̃riabadau ida ɓuɗai panuu. Mauɗe kuitaabia ɓuu dachi nau iujãaɗe panuuɗe kʉ̃risia sõbiaɗeeba dachi kakua kĩra jipa nibaɗai panuu Dachi Akõreba kʉ̃ria ɓuu kĩra. 13 Dachi biꞌia panaɗai ewari eseɗau panuumisa maka panaɗai panuu. Mau ewariɗe Dachi Karibabarii Jesucristo neeruuɗe, ichi kĩrawãrea unuɗai Ichi Dachi Akõre chi mechiuɗeeba. 14 Dachi baita Jesucristoba ara ichi ida beabisii ne joma kachiruaɗebena karibai baita. Dachi ara ichi baita biꞌia ɓusii ichi puuruɗe panaɗamera mauɗe ne joma biꞌia wau kʉ̃ria panaɗamera.

15 Joma mau jaradea ɓuase. Aiɗase ãbarãba mau beɗea wauɗamera. Biꞌiwãe wau nuree iadaase, Dachi Akõreba bichi ɓusiiɗeeba maka waumera. Ãbarãmaa bichi ida makabiarã́se.

Dachi Akõreba ichi sõbiaɗeeba dachi karibaɗa

3 Ãbarãmaa kĩrababiáse nau iujãaɗebena jaradea ua ɓuabadaurã juaɗe panaɗamera. Ãchiba jaraaduu ijãa wauɗai panuu mauɗe ne joma biꞌia wauɗai baita nureaɗai panuu. 2 Ãbarãmaa jarase: aɓau ʉ̃rʉbena kachirua berreaɗawẽa panaɗai panuu mauɗe oa kachirua berreaɗawẽa panaɗai panuu, maumaarã jomaurã ome sõbia nureaɗai panuu, maarã audeara kʉ̃risiaɗawẽa.

3 Biawãra naeɗe dachia biɗa kʉ̃risia biꞌiwãe panasiɗau, Dachi Akõreɗe ijãaɗaabai panasiɗau, biꞌiwãe kʉ̃risia panasiɗau. Dachiba kachirua wau kʉ̃ria nuree mauɗe kĩrajʉʉ wau kʉ̃ria nuree, chibari baita bari trajabarii kĩra joma waubachiɗau. Barikia kachiruaɗe nibabachiɗau, waabenarãba uru panuu kakua sõɗe kachirua panabachiɗau, waabenarãba dachi kĩramaabachiɗau, mauɗe dachiba waabenarã kĩramaabachiɗau. 4 Maamina Dachi Akõre chi Karibabariiba ichi biꞌia nii mauɗe ichiba dachi kʉ̃ria ɓuu jomaurãmaa kuitaabiasii. 5 Mauba dachi karibasii. Dachiba biꞌia waupeɗaaɗa kakua karibaabasii, maumaarã ichi kĩra chuburiasiiɗeeba karibasii. Dachi kachirua jeraasii paru ea jeraaɗa kĩra nureaɗamera mauɗe Dachi Akõre Jauriba dachimaa chokae ɓuai chiwiɗi deasii. 6 Dachi Karibabarii Jesucristoɗeeba, Dachi Akõreba ichi Jauri dachimaa ãrea deasii bania ãrea easii kĩra dachi kakua ʉ̃rʉ. 7 Maka Dachi Akõreba ichi sõbiaɗeeba dachi jipa unu ɓuuɗeeba ewaricha ichi ome chokae panaɗai. Mau eseɗau panuu.

8 Mau beɗea biawãraɗeeba, mau ijãaɗai panuu. Mʉʉba kʉ̃ria ɓuu bichiba mau ãrea jaradea ɓuai Dachi Akõreɗe ijãabadaurãba ne joma biꞌia wau wãɗamera. Mau beɗea ãrea biꞌia ɓuu. Jomaurã karibabarii. 9 Maamina barikia beɗea biawãe ɓuu kakau oa kachirua berrearã́se. Mauɗe Moisesba ɓʉɗa ʉ̃rʉbena oa kachirua berrearã́se. Mauɗe dachi nabẽraeɗebenarã trʉ̃ jaradeabadau ida ɓuse. Joma mau biꞌiwãe ɓuu mauɗe aɓa biɗa karibakau.

10 Aɓauba ãbarã ijaraa berreabiiruubʉrã, mau iadaase waa maka waurãamera. Mauba ijãawẽebʉrã, waya iadaase. Mauɗe wabiɗa ijãawẽa ɓuubʉrã, mau ome ɓuarã́se. 11 Bichiba ãrea kuitaa ɓuu mau ẽbẽraba biawãra beɗea ida ɓupeɗa kachirua wau ɓuu. Kachirua wau ɓuuɗeeba unubi ɓuu ara ichi Dachi Akõre daaɗe nebʉra barau a ɓuu.

Pabloba nau kartaɗe aanama ɓʉɗa

12 Mʉʉba ãba Artemas maebʉrã ãba Tíquico bichimaa bʉiruu. Jãma neeruuɗe isa Nicópolis puuruɗaa mʉ ichiaɗe neese. Mʉ nau kui che ewariɗe mama ɓuai kʉ̃risia ɓuu. 13 Ẽbẽra chi aiɗa berreabarii Zenas mauɗe Apolos bichiɗebena wãaduuɗe ne jomaɗe aiɗase biꞌia wãɗamera. 14 Dachi chi Cristoɗe ijãabadaurãba biꞌia wau kuitaa wãɗai panuu chi nejarr barauwãe nuree aiɗaɗai baita. Maka ara dachi bari nureaɗaabai.

15 Joma mʉ ome panuuba jarabʉi panuu bichi biꞌia ɓuai. Chi Cristoɗe ijãabadaurãmaa jarábaɗe ase daiba jarabʉi panuu maarã biꞌia duanaɗai. Daiba maarã ãrea kʉ̃ria panuu. Mʉʉba kʉ̃ria ɓuu Dachi Akõreba ichi sõbiaɗeeba joma machi kariba ɓuai.