2 TIMOTEO

Pabloba nau kartaɗe naa ɓʉɗa

1 Mʉ Pablobʉ. Dachi Akõreba kʉ̃riasiiɗeeba mʉ Jesucristoba bʉiɗa. Ichiba mʉ bʉisii Dachi Akõreba deai jaraɗa chokae ɓuai ʉ̃rʉbena jaraɗe wãmera. Mau chokae ɓuai Jesucristoɗebena ɓuu. 2 Timoteo, nau karta bichi baita ɓʉʉruu. Mʉʉba bichi ãrea kʉ̃ria ɓuu mʉ warr kĩra. Kʉ̃ria ɓuu Dachi Bajãaɗebena Akõreba* mauɗe Dachi Mechiu Jesucristo biɗa bichi kĩra chuburia panaɗai, ãchi sõbiaɗeeba aiɗa panaɗai mauɗe jirukaraayuwãe panabiɗamera.

Pabloba Timoteo baita Dachi Akõremaa ichíturu kiɗibai aɗa

3 Ãyadaa mauɗe ẽsabuɗe mʉʉba Dachi Akõremaa ʉtaa iɗiiruuɗe bichi baita ichíturu kiɗibai abarii. Dachi Akõreba jara ɓuu mʉʉba waubarii, mʉ kʉ̃risiaɗe nebʉraswãe ɓuuɗeeba, mʉ nabẽrarãba maka waupeɗaaɗa kĩra. 4 Mʉʉba bichi jẽaɗa ʉ̃rʉbena kʉ̃risiaruuɗe ichiaɗe wã kʉ̃ria ɓuabarii kĩrajʉʉ ãrea ɓuai baita. 5 Mʉʉba kĩraba ɓuabarii bichiba Cristoɗe biawãra ijãa ɓuu bichi tata Loida mauɗe bichi nawe Eunice bichi naeɗe ijãa panaɗa kĩra. Mʉʉba kuitaa ɓuu bichia biɗa araɓauɗe Cristoɗe ijãa ɓuu. 6 Mʉ jua bichi ʉ̃rʉ kuɓusiiɗe Dachi Akõreba bichimaa deasii ichi baita ne waumera. Mau baita mʉʉba jaraaruu: Dachi Akõreba deaɗa biꞌia wau ɓuase, etabarrɗe tʉbʉchia jãripuabarii kĩra. 7 Dachi Akõreba dachi sõ wapea panabiabasii, maumaarã dachi poyaabarii panabiasii, waabenarã kʉ̃ria uru panabiasii, mauɗe dachi kakua saka kĩra jipa panaɗai kuitaabiasii.

8 Mauɗeeba Dachi Mechiu Jesucristo ʉ̃rʉbena jarai baita kĩrakayarã́se. Mʉ Jesucristo baita jʉ̃a ɓumina kĩrakayarã́se. Maumaarã chi beɗea bia Jesús ʉ̃rʉbena jaradearuuɗe Dachi Akõre poyaabariiɗeeba bichi siɗa ãrea biꞌiwãe ɓuai jãadua ɓuase. 9 Dachi Akõreba dachi karibasii mauɗe iusii ichi baita biꞌia nureaɗamera. Dachiba biꞌia wau panuuɗeeba makaabasii, maumaarã ichi sõbiaɗeeba waui kʉ̃risia ɓuasiiɗeeba maka wausii. Biawãra nau iujãa ɓuai naeɗe Dachi Akõreba ichi sõbiaɗeeba kʉ̃risiasii Jesucristoɗeeba dachi karibai. 10 Maabae Jesucristo, Dachi Karibabarii neesiiɗe unubisii saka ichi sõbiaɗeeba karibabarii. Dachi biui ɓuaɗa Jesucristoba wãꞌãebipeɗa, ewaricha chokae ɓuabisii. Chi beɗea biaba ichi ʉ̃rʉbena mau biꞌia kuitaabi ɓuu.

11 Dachi Akõreba mʉ ɓusii mau beɗea bia jarabarii ɓuamera, Jesucristoba bʉiɗa ɓuamera mauɗe judiowãerãmaa jaradeabarii ɓuamera.* 12 Mau baita mʉ maka biꞌiwãe ɓuu. Maamina kĩrakayayuwãe ɓuu. Mʉʉba kuitaa ɓuu kaiɗe ijãa ɓuu. Mauɗe kuitaa ɓuu mʉʉba ichi juaɗe ɓuɗa, ichiba poyaa nui ɓuu aɓa ichiba kastikai ewariɗaa.

13 Mʉʉba jipa jaradea ɓuaɗa kĩra jaradea ɓuase. Jesucristoɗe ijãa niiɗeeba, waabenarã kʉ̃ria nibase. 14 Dachi Akõre Jauri dachi sõɗe ɓuu. Mauɗeeba chi biawãra beɗea Dachi Akõreba bichimaa deaɗa ãrea nu ɓuase.

15 Bichiba kuitaa ɓuu joma ãbarã Asia druaɗebenarãba mʉ istu ɓʉisiɗau. Maarãɗebena ãba Figeloba mauɗe Hermogenesba maka wausiɗau. 16 Maamina mʉʉba kʉ̃ria ɓuu Dachi Mechiuba ãba Onesíforo deɗebenarã kĩra chuburia ɓuamera. Ichiba mʉ ɓes ãrea aiɗasii. Mʉ kaenaba jʉ̃ ɓumina mau kĩrakayaabasii. 17 Maumaarã Roma puuruɗe neepeɗa mʉ jʉrʉ ɓuapeɗa unusii. 18 Mʉʉba kʉ̃ria ɓuu Dachi Mechiuba kastikai ewariɗe mau kĩra chuburiai. Bichiba kuitaa ɓuu Onesiforoba Efesoɗe ãrea aiɗasii.

Saka Jesucristo beɗea jaradeai ɓuu

2 Warr, Jesucristo* sõbiaɗeeba chaarea ɓuase. 2 Mʉʉba ẽbẽrarã ãrea daaɗe jaradea ɓuaɗa bichiba ũrisii. Ara mau jaradea ɓuaɗa bichia biɗa waabenarã ãbarãmaa jarabʉise waabenarãmaa mau jaradeaɗamera. Waabenarãba ãchi ijãaɗai panuu mauɗe poyaa bia jaradeaɗai panuu.

3 Bichi Jesucristo kokoroa biaɗeeba mʉ kĩra biꞌiwãe ɓuai baita ɓuase. 4 Kokoroaba barikia waukau, maumaarã chi audeara niiba kʉ̃ria ɓuu waubarii biꞌia unumera. 5 Mauɗe chi pirabarii chi jaradea ua ɓuabadaurãba jara panuu kĩra maka pirawẽebʉrã, mau chi naa neeruuba chi adaui ɓuaɗa adaubai. 6 Chi uubarii ãrea trajabariiɗeeba, ichiba chi uu nuɓuu chauɗaɗebena naa adaui ɓuu. 7 Mʉʉba jara ɓuu ʉ̃rʉbena ãrea kʉ̃risiáse. Dachi Mechiu Jesusba bichimaa joma mau kuitaabii.

8 Jesucristo kĩrabase. Ichi Davidɗebena neeɗabʉ. Ichi biu ɓuaɗa Dachi Akõreba chokae jiradubisii. Mau beɗea bia ichi ʉ̃rʉbena mʉʉba jaradea ɓuu. 9 Mau jaradea ɓuu kakua mʉ ãrea biꞌiwãe ɓuu. Mʉ ẽbẽra kachirua kĩra kaenaba jʉ̃ uru panuu. Maamina Dachi Akõre beɗea jʉ̃ uru panuuwãema. 10 Mau baita mʉʉba joma jãadua ɓuu Dachi Akõreba jʉrʉ adauɗa ẽbẽrarã karibai baita. Maka Dachi Akõreba ãchi siɗa Jesucristoɗeeba aiɗai ewaricha ichi biaɗebena uru panaɗamera.

11 Nau beɗea biawãraɗeeba, mau ijãaɗai panuu:

Dachi Akõre baita bari trajabarii saka ɓuai ɓuu

14 Joma mau ãbarãmaa kĩrababia ɓuase. Dachi Akõre* daaɗe jarase maarã barikia beɗea kakua kĩru iɗaa berrea panarãaɗamera. Mau kĩru iɗaa berreaba dachi aiɗakau, maumaarã chi ũri nureerãmaa kʉ̃risia kachirua kʉ̃risiabiabarii. 15 Chi biawãra beɗea Dachi Akõreɗe jipa jaradeabarii unubi ɓuase. Trajabarii biꞌia ɓuu kĩra kauwa wau ɓuase Dachi Akõreba bichi kĩrakayayuwãe ɓuu unumera. 16 Dachi Akõre daaɗe kachirua nureerãba nebʉrʉbadau ida ɓuse. Chi maka nureerã Dachi Akõreɗebena aude kaitawẽ wãbadau. 17 Ãchiba jaradea panuuba ẽbẽrarã kʉ̃risia ãyaa kʉ̃risiabiabarii, dachi kakuaɗe chauɗaba dachi kiuru ko kãrii kĩra. Mau jaradeabadaurãɗebena Himeneo mauɗe Filetobʉ. 18 Ãchi chi biawãra beɗeaɗebena ãyaa wãsiɗau. Ãchiba jaradeabadau ẽbẽrarã biupeɗaaɗa chokae jiradupeɗaaɗa. Mauɗeeba waabenarãba Cristoɗe ijãa panuu ʉ̃rʉbena ãyaa kʉ̃risia paneesiɗau. 19 Maamina ẽbẽrarã Dachi Akõreɗerãba Cristoɗe ãrea ijãa panuu de jʉ̃rʉ kaɗaba de chaarea uru ɓuabarii kĩra. De poraamaa ne ɓʉ nubadau kĩra, Dachi Akõreba naka jarasii: «Dachi Mechiuba joma ichiɗirã kuitaa ɓuu». Mauɗe jarasii: «Joma Dachi Mechiuɗe ijãa panuu abadaurãba kachirua ida ɓuɗai panuu».

20 De mechiuɗe paratu nee wauɗa duanuu mauɗe parata wauɗa duanuu. Mauɗe bakuru wauɗa mauɗe ioro kaɗa siɗa duanuu. Waabenarã biꞌia panuuɗeeba barikia ewari baita panuuwãema, maamina waabena barikia ewari baita panuu. 21 Dachi siɗa ara mau kĩra panuu. Dachiba kachirua ida ɓuuduubʉrã, Dachi Mechiu baita biꞌia nureaɗai. Maka dachiɗebena ichiba ne poyaa waui mauɗe ne joma biꞌia wauɗai baita nureaɗai.

22 Kũudrãarãba kachirua kʉ̃riabadau kĩra waurã́se. Mau kãyabãra jipa waui baita ɓuase. Jesusɗe ijãa ɓuase. Jomaurã kʉ̃ria ɓuase. Jomaurã ome jirukaraayuwãe ɓuase. Dachi Mechiumaa ʉtaa iɗibadaurã ome sõ jipa ɓuuɗeeba joma mau baara wã ɓuase. 23 Oa kachirua berrearã́se chi arakʉɗe kʉ̃risiaɗakau nuree ome, kuitaa ɓuuɗeeba mauba dachi oa kachirua berreabiabarii. 24 Chi Dachi Mechiu baita bari trajabarii oa kachirua berrea ɓuabai ɓuu, maumaarã jomaurã ome sõbia ɓuai ɓuu. Jaradea kuitaa ɓuai ɓuu. Jomaurã ome jãadua ɓuai ɓuu. 25 Ichiba beɗea biaɗeeba Dachi Akõre beɗea kuitaabia ɓuu, chi ichiba jaradea ɓuu kʉ̃riaɗakau ẽbẽrarãmaa, maka Dachi Akõreba maarã karibaaruubʉrã. Maka ichimaa waya neeɗapeɗa chi biawãra beɗea kuitaaɗai. 26 Arakʉɗe kʉ̃risiaduubʉrã jʉbawãe nii juaɗebena wãɗai. Ʉ̃rauɗe jʉbawãe niiba jidau ua ɓuu ichiba kʉ̃ria ɓuu wauɗamera.

Kaaɗebena ewariɗe ẽbẽrarã kachirua wau panaɗai

3 Kaaɗebena ewariɗe kachirua neeruuɗeeba bichiba mau kuitaa ɓuai ɓuu. 2 Ẽbẽrarãba joma ara ãchi baita kʉ̃ria panaɗai, chi nejarra kʉ̃ria panaɗai, ãchi biꞌia nuree a panaɗai, chi mechiu nuree kʉ̃risia panaɗai, waabenarã ʉ̃rʉbena kachirua jara panaɗai, ãchi akõrerã beɗea ijãaɗakau panaɗai, ãchi aiɗaaruu ẽbẽramaa ichíturu kiɗibai aɗakau panaɗai mauɗe Dachi Akõre wapeaɗakau panaɗai. 3 Waabenarã kʉ̃riaɗakau panaɗai, kĩra chuburiaɗakau panaɗai, waabenarã ʉ̃rʉbena beɗea kachirua jara panaɗai, kachirua wauɗai baita poyaa ida ɓuɗakau panaɗai, chĩo ãrea panaɗai mauɗe biꞌia ɓee joma ida ɓu panaɗai. 4 Ãchi kõpaero ichi kĩramaabarii juaɗe ɓuɗai kachirua waumera. Ãrea kʉ̃risiaswãe barikia wau panaɗai. Jomaurã audeara chi kuitaa ãrea nuree aɗai. Dachi Akõre audeara ara ãchíturu kĩrajʉʉ biꞌia kʉ̃ria nureaɗai. 5 Dachi Akõreɗe ijãabadaurã kĩra nureaɗai maamina ida ɓuɗaabai Dachi Akõreba ichi poyaabariiba ãchi jipa nureabiamera. Makʉrã ome ãbua ɓuarã́se.

6 Mau ẽbẽrarã decha wãbadau wẽrarã kʉ̃risiaswãe nuree mauɗe kachiruaba boro wãyaa nuree setaa kũruaɗai baita. Mau wẽrarãba joma kachirua wau kʉ̃riabadauɗeeba barikia ijãabadau. 7 Mau wẽrarã ewaricha kuitaamaa panuu, maamina chi biawãra beɗea poyaa kuitaaɗakau. 8 Jãarã setaa jaradeabadaurã chi biawãra beɗea ida ɓubadau. Janes mauɗe Jambres abadau kĩra waubadau, chi Moisés beɗea ida ɓupeɗaaɗarã.* Ãchiba kʉ̃risia kachirua kʉ̃risiabadau mauɗe biawãra Cristoɗe ijãaɗakau. 9 Maamina ãchiba wau panuu biꞌia ɓuabai. Jomaurãba ãchi kʉ̃risia biaswãe nuree kuitaaɗai Moisés ewariɗe Janes mauɗe Jambres makapeɗaaɗa kĩra.*

Pabloba Timoteomaa jaraɗa

10 Maamina bichiba nau biꞌia kuitaa ɓuu: mʉʉba jaradea ɓuu, mʉ nibabarii, mʉʉba wau kʉ̃ria ɓuu, mʉʉba Cristoɗe ijãa ɓuu, mʉ jomaɗe jãadua ɓuu, mʉʉba waabenarã kʉ̃ria ɓuu, mʉ jomaɗe dauchia jãadua ɓuu 11 mauɗe mʉ wãraa panuu kachirua wauɗai baita. Antioquiaɗe, Iconio puuruɗe mauɗe Listraɗe mʉ kachirua wauɗai baita wãraapeɗaaɗa bichiba biꞌia kuitaa ɓuu.* Mʉ ãrea biꞌiwãe ɓuasii. Maamina Dachi Mechiuba joma mauɗebena karibasii. 12 Biawãra joma Jesucristoɗe ijãabadaurã, Dachi Akõre daaɗe biꞌia nibaɗai kʉ̃riabadaurã, ẽbẽrarãba wãraaɗai kachirua wauɗai baita. 13 Mauɗe ẽbẽra kachiruarãba mauɗe waabenarã setaa kũruabadaurãba aude kachirua wau panaɗai. Waabenarã setaa kũrua panaɗai mauɗe waabenarãba ãchi setaa kũruaɗai.

14 Maamina bichiba kuitaaɗa chi biawãra kʉ̃risia ɓuuɗeeba, mauɗe nibase. Bichiba kuitaa ɓuu bichimaa jaradeapeɗaaɗaba jipa jaradeapeɗaaɗabʉ. 15 Warraeɗe Dachi Akõre Beɗea kuitaasii. Mau Beɗeaba bichimaa kuitaabi ɓuu aɓauba Cristoɗe ijãaruubʉrã Dachi Akõreba mau karibai. 16 Dachi Akõreba joma Ichi Beɗea ɓʉbisii. Joma mau biꞌia ɓuu jaradeai baita, kachirua wau nuree kastikai baita, biꞌiwãe wau nuree jipa wau kuitaabiai baita mauɗe saka kĩra jipa nibaɗai kuitaabiai baita. 17 Maka ẽbẽrarã Dachi Akõreɗerãba ne joma biꞌia wau kuitaaɗapeɗa poyaa wau panaɗai.

4 Jesucristo neei ichiɗirã ichi juaɗe ua ɓuai baita. Mauɗe ẽbẽrarã chokae nuree mauɗe biupeɗaaɗa nebʉra ichiai. Mauɗeeba Jesucristo daaɗe mauɗe Dachi Akõre daaɗe mʉʉba nau beɗea jaraaruu bichiba waumera: 2 Dachi Akõre Beɗea jaradea ɓuase. Ẽbẽrarãba ũri kʉ̃ria panuuɗe mauɗe ũri kʉ̃riaɗawẽa panuuɗe jaradeai baita ɓuase. Biꞌiwãe wau nuree jipa waui kuitaabiáse. Kachirua wau nuree iadaase. Mauɗe ãbarã aiɗase biꞌia ijãaɗamera. Joma jãadua ɓuuɗeeba, kauwa jaradea ɓuuɗeeba maka wause. 3 Ewari aɓa neeruuɗe ẽbẽrarãba biawãra beɗea ũri kʉ̃riaɗawẽa panaɗai. Maumaarã ara ãchiba kʉ̃ria panuu maka wauɗai. Mauɗeeba jaradeabadaurã ãrea jʉrʉɗai ãchiba ũri kʉ̃ria panuu jaradeaɗamera. 4 Chi biawãra beɗea ũriɗai ida ɓu panaɗai, mauɗe nabẽraeɗebena nebʉrʉbadau ijãaɗai. 5 Maamina bichi jomaɗe kĩra jipa ɓuase. Joma nebʉraɗe ɓuuɗe jãadua ɓuase. Beɗea biꞌia Cristo ʉ̃rʉbena jaradea ɓuase. Joma bichiba Dachi Akõre baita waui ɓuu jipa wau ɓuase.

6 Kãꞌãabariwãeɗe mʉ beaɗai.* Mʉ biui ewari ʉ̃rʉ ba ɓuu. 7 Mʉʉba Dachi Akõre baita waui ɓuaɗa joma wausii, pirabarii chi neei ɓuumaa neebarii kĩra. Joma jipa wausii biꞌia chĩoɗa kĩra. Mʉʉba Cristo ida ɓuwẽa ɓuu. 8 Mʉʉba jipa wau ɓuu baita Dachi Mechiuba mʉ baita boro jũra nu uru ɓuu. Ichiba jipa ichiabariiɗeeba mau boro jũra mʉʉmaa deai ichiba ichiaruuɗe. Maamina aɓaburu mʉʉmaa deabai, maumaarã joma ichi neei ewari unu kʉ̃ria nureerãmaa deai.

Pabloba jaraɗa Timoteo neemera

9 Isa mʉ ichiaɗe neese. 10 Dachi ãba Cresente Galacia druaɗaa wã ɓuasii. Tito Dalmacia druaɗaa wã ɓuasii. Mau awara ãba Demasba chi nau iujãaɗebena ãrea kʉ̃riasiiɗeeba mʉ ida ɓupeɗa Tesalónica puuruɗaa wãsii. 11 Aɓaburu ãba Lucas mʉ ome ɓuu. Bichi neeruuɗe ãba Marcos jʉrʉɗe wãpeɗa eneese.* Mʉʉba Dachi Akõre baita wau ɓuu mauba aiɗai ɓuu. 12 Ãba Tíquico mʉʉba Efesoɗaa bʉisii. 13 Bichi neeruuɗe mʉ paru ʉ̃rʉ jʉ̃barii eneese. Mau Troas puuruɗe, ãba Carpo deɗe ɓeesii. Mauɗe mʉ karta eneese. Mʉʉba aude kʉ̃ria ɓuu chi kartarã ãnimara eɗe ɓʉ kuɓuu.

14 Jiorrɗeeba ne waubarii Alejandroba mʉ kachirua wausiiɗeeba Dachi Mechiuba kastikai. 15 Ichi ome kauwa ɓuase. Dachiba jaradea panuu ʉ̃rʉbena ichiba ãrea kachirua jarasii.

16 Ara michi baita chi juez daaɗe berreasiiɗe aɓau biɗa mʉ kakua berreabasii, mʉ aiɗai baita. Maumaarã jomaurãba mʉ ida ɓusiɗau. Mʉʉba kʉ̃riawẽe mau ʉ̃rʉbena Dachi Akõre daaɗe maarã nebʉra baraa panuu ayu. 17 Maamina Dachi Mechiu mʉ ome ɓuasii. Mʉ poyaabarii deasii ichi beɗea jaramera. Maka joma judiowãerã aria panuuba ũrisiɗau. Mauɗe Dachi Mechiuba mʉ imama okarrɗebena karibasii. 18 Ichiba joma mʉ kachirua wauruuɗebena karibai. Mʉ biꞌia nupeɗa bajãaɗaa adooi, ichiɗirã ichi juaɗe ua ɓuuɗaa. Ewaricha ichimaa ãrea biꞌia berreaɗai panuu. Biꞌia ɓuu maka ɓuai.

Pabloba nau kartaɗe aanama ɓʉɗa

19 Ãba Aquilamaa mauɗe Priscamaa jarase mʉʉba jarabʉi ɓuu ãchi biꞌia panaɗai. Ara mau kĩra ãba Onesíforo deɗebenarãmaa jarase. 20 Ãba Erasto Corinto puuruɗe ɓeesii. Ãba Trófimo ẽpermo ɓuasiiɗeeba mʉʉba ichi Mileto puuruɗe ɓʉisii. 21 Kui chei ewari bai naeɗe isa neese. Ãbarã Eubuloba, Pudenteba, Linoba, Claudiaba mauɗe joma ãbarãba jarabʉi panuu bichi biꞌia ɓuai.

22 Mʉʉba kʉ̃ria ɓuu Dachi Mechiu Jesucristo bichi ome ɓuai mauɗe Dachi Akõreba ichi sõbiaɗeeba machi aiɗa ɓuai. Biꞌia ɓuu maka ɓuai.*