HEBREOS
Dachi Akõre Warr mechiu nii
1 Nabẽraeɗe Dachi Akõreba dachi nabẽrarãmaa ɓes ãrea beɗea ne jomaɗe berreabachii. Ichi baita berreabadaurãɗeeba maka berreabachii. 2 Maamina nau kaaɗebena ewariɗe ichi Warrɗeeba dachimaa berreasii. Ichi Warrɗeeba Dachi Akõreba joma wausii mauɗe mau ɓusii joma uru ɓuamera. 3 Ichi Warrba Dachi Akõre kĩrawãrea teɗechoa unubiabarii. Ara ichiɗeeba Dachi Akõre saka nii kuitaabiabarii. Ichi beɗea poyaabarii ɓuuba joma wauɗa ichi juaɗe arakʉɗe uru ɓuu.
Ichiba dachi kachirua jeraapeɗa Dachi Akõre Mechiu jua biare bajãaɗe akʉ ɓeesii. 4 Dachi Akõreba angelerã audeara ichi mechiu ɓusii. Maka Dachi Akõreba ichi trʉ̃aɗa ãchi trʉ̃aɗa audeara biꞌia ɓuu. 5 Dachi Akõreba ángel aɓaumaa biɗa naka jaraabasii:
«Bichi mʉ Warrbʉ. Iɗi bichi mʉ Warr aaruu».*
Mauɗe jãarã ʉ̃rʉbena nau jaraabasii:
«Mʉ ichi akõre bai, mauɗe ichi mʉ warr bai».*
6 Mauɗe Dachi Akõreba ichi Warr ara aɓa nii nau iujãaɗaa bʉisiiɗe naka jarasii:
«Joma Dachi Akõre angelerãba Maumaa biꞌia berreaɗai panuu».
7 Angelerã ʉ̃rʉbena Dachi Akõre beɗeaɗe naka ɓʉ kuɓuu:
«Ichiba angelerã wausii pũatu kĩra nureaɗamera.*
Maarã wausii tʉbʉ aoko kĩra nureaɗamera».*
8 Maamina ichi Warr ʉ̃rʉbenáturu Dachi Akõreba naka jarasii:
«Dachi Akõre, bichi ewaricha jomaurã rey ɓuai. Bichi puuru jipa ua ɓuai.
9 Bichiba chi jipa waubadau kʉ̃riasii. Kachirua kĩramaasii.
Mauɗeeba Dachi Akõre, bichi Akõreba joma bichi baara panuurã audeara bichi chi mechiu ɓusii. Maka bichi ãrea kĩrajʉʉbisii».*
10 Mauɗe naka jarasii:
«Dachi Mechiu, araɓaeɗeeɗe bichiba nau iujãa mauɗe bajãa wausii.
11 Joma mau wãꞌãe bai maamina araɓauɗe bichi ɓuai. Mau joma chi sore bai, paru chi sore babarii kĩra.
12 Paru sore ẽetapeɗa chiwiɗi jʉ̃ʉruu kĩra bichiba joma mau ãyaa ɓupeɗa chiwiɗi waui.
Maamina bichi ara bichíturu nibai. Bichi biukau».*
13 Dachi Akõreba ángel aɓaumaa biɗa jaraabasii:
«Mʉ jua biare akʉ ɓeese aɓa bichi kĩramaarã mʉʉba joma bichi juaɗe ɓuuruuɗaa».*
14 Makarã, ¿Angelerã kairãma? Maarã joma Dachi Akõre baita nureeɗeeba, ãchi bʉikabarii chi ichiba karibai ɓuurã aiɗaɗamera.
Kauwa panásturu Cristo ida ɓuɗaabai baita
2 Mauɗeeba chi biawãra beɗea ũripeɗaaɗaɗe kauwa ãrea nibaɗai panuu ãyaa wãrãaɗamera. 2 Dachi Akõreba naeɗe waubi ɓuaɗa beɗea angelerãɗeeba deasii. Mau beɗea ẽbẽrarãba joma ũribaba wauɗai panasii. Joma chi mau beɗea wauɗaka baɗa, mauɗe kʉ̃riaɗaa baɗa siɗa Dachi Akõreba kastikakuabachii ara chi kachirua waupeɗaaɗa kĩra. 3 Ara mau kĩra Dachi Akõreba karibai ʉ̃rʉbena beɗea dachiba ida ɓuuduubʉrã, ¿Dachi Akõreba kastikaiɗebena dachirã saka karibaɗaima? Mau beɗea ãrea biꞌia ɓuu Dachi Mechiu Jesusba naeɗe jaradeasii. Chi ũripeɗaaɗaba dachimaa mau beɗea biawãra abachiɗau. 4 Mau awara Dachi Akõreba ẽbẽrarãba ne poyaa wauɗakau mechiu aꞌawaraa waubiasii. Ichiba kʉ̃ria ɓuaɗa kĩra ichi Jauriba waubi ɓuu ichiɗirãcha deaɗakasii. Joma mauɗeeba kuitaabiasii mau beɗea biawãrabʉ.
Jesucristo dachi kĩra nibaɗa
5 Chi drua wiɗi neei ɓuu daiba jara panuu,* Dachi Akõreba angelerã juaɗe mau ɓuubasii. 6 Maumaarã Dachi Akõre beɗeaɗe naka ɓʉ kuɓuu:
«Chacha, mukĩra ¿kãarema, bichiba mau ʉ̃rʉbena kʉ̃risiai baita?
Ẽbẽra* ¿kãarema, bichiba mau nui baita?
7 Bichiba chi mau angelerã audeara kaebeu ɓusii.
Nau iujãaɗe mau biꞌia ɓusii mauɗe chi mechiu ɓusii».*
8 Bichiba joma ichi juaɗe ɓusii.
Dachi Akõreba maka joma ichi juaɗe ɓusiiɗeeba, ichi juaɗe ɓuubaɗa wãꞌãe. Daiba wabiɗa unuɗaabai joma ichi juaɗe ɓuu. 9 Maamina Jesús unu panuu. Dachi Akõreba ichi angelerã audeara nau iujãaɗe kaebeu ɓusii. Dachi Akõreba ichi sõbiaɗeeba maka wausii Jesús jomaurã kakua biumera. Ãrea biꞌiwãe ɓuapeɗa biusiiɗeeba Dachi Akõreba ichi biꞌia ɓusii mauɗe chi mechiu ɓusii.
10 Dachi Akõreba joma wausii. Ichiɗeeba joma duanuu. Dachi Akõremaarã biꞌia ɓuasii Jesús ãrea biꞌiwãe ɓuasii, Dachi Jipa Karibabarii nibamera. Ichiɗeeba Dachi Akõreba ichi warrarã ãrea jʉrʉ adausii ichi biꞌia irsibiɗamera. 11 Jesusba ẽbẽrarã biꞌia ɓubarii Dachi Akõre baita. Ichiba, mau ẽbẽrarã biɗa araɓau Akõre uru panuu. Mauɗeeba Jesús kĩra nejasiakau ãchi ichi ãbarã ai baita. 12 Dachi Akõre beɗeaɗe naka ɓʉ kuɓuu:
«Mʉʉba bichi ʉ̃rʉbena mʉ ãbarãmaa berreai. Joma araa ãbua imiiduuɗe mʉʉba bichi ʉ̃rʉbena biꞌia berreai».*
13 Mauɗe naka ɓʉ kuɓuu:
«Mʉʉba ichiɗe ijãa ɓuai».*
Mauɗe nau siɗa ɓʉ kuɓuu:
«Mʉ nama ɓuu, mauɗe warrarã Dachi Akõreba mʉʉmaa deaɗa mʉ ome ãbua duanuu».*
14 Maarã kiuru mauɗe oa nureeɗeeba Jesús siɗa araɓauɗe maarã ẽbẽra kĩra neesii ichi biuruuba jʉbawãe nii poyaai baita. Jʉbawãe niiba poyaa biubiabarii. 15 Jesusba jʉbawãe nii poyaasiiɗeeba, biuɗai baita wapea nureaɗa ichiba joma karibakuasii. Ewaricha biuɗai wapea panuuɗeeba ãchi kĩra nomaa panasiɗau bari trajabadaurã kĩra. 16 Biawãra Jesusba angelerã karibaɗe neebasii, maumaarã chi Abraham kĩra Dachi Akõreɗe ijãabadaurã karibaɗe neesii.* 17 Ichi neesiiɗe ne jomaɗe dachi kĩra nibasii, ẽbẽrarã kĩra chuburiabarii Paare Mechiu bai baita.* Biawãra Dachi Akõre daaɗe joma jipa waubarii ɓeesii. Mauɗeeba ara ichi ida beabisii ẽbẽrarãba kachirua waubadau Dachi Akõreba kĩraba ɓuarãamera. 18 Jʉbawãe niiba waa jara ɓuasiiɗe Jesús ãrea biꞌiwãe ɓuasii. Mauɗeeba Jesusba chi jʉbawãe niiba waa jarabia ɓuabarii aiɗai kuitaa ɓuu.
Moisés audeara Jesús mechiu nii
3 Ãbarã, machi ẽbẽrarã Dachi Akõreɗerãɗeeba mauɗe ichiba machi iukuasiiɗeeba, Jesucristo ʉ̃rʉbena ãrea biꞌia kauwa kʉ̃risiásturu. Dachiba biawãra ijãa panuu abadau, Ichi Dachi Akõreba bʉiɗa mauɗe Paare Mechiu. 2 Dachi Akõreba waubiɗa Jesusba joma arakʉɗe wausii Moisesba Dachi Akõre deɗebenarã ome wauɗa kĩra.* 3 Ẽbẽrarãba chi de biꞌia waubarii ʉ̃rʉbena ãrea berreabadau chi de audeara. Ara mau kĩra dachiba Moisés audeara Jesús ʉ̃rʉbena biꞌia berreaɗai panuu. 4 Chi de waubarii barau. Maamina chi joma wauɗa Dachi Akõrebʉ. 5 Moisés Dachi Akõre baita bari trajabariiɗeeba ẽbẽrarã Dachi Akõre deɗebenarã ome joma arakʉɗe wausii. Ichiba kuitaabiasii Dachi Akõreba kaaɗebena ewariɗe kãare jarai ɓuu. 6 Maamina Dachi Akõre warr Cristo baerã, mau ẽbẽrarã mechiubʉ. Ãchi ome joma arakʉɗe wau ɓuu. Dachiba Cristoɗe ijãa panuubʉrã mauɗe ichiɗeeba adauɗai kĩrajʉʉ eseɗau panuubʉrã, ẽbẽrarã Dachi Akõreɗerãbʉ.*
Cristo ida ɓurã́sturu
7 Mauɗeeba Dachi Akõre Jauriba naka jara ɓuu:
«Iɗi Dachi Akõre beɗea ũriiduuɗe machi sõ chaarearã́sturu machi nabẽrarã sõ chaareapeɗaaɗa kĩra.
Maarã drua sirua wãꞌãe ɓuuɗe duanasiɗauɗe Dachi Akõreba jaraɗa ida ɓusiɗau ichiba kãare waui kuitaaɗayua. 8 —.
9 Aria ichiba wauɗa 40 añosɗaa unu panasmina ãchiba ijãaɗaabasii kãare wau ɓuu kuitaaɗai baita.
10 Mauɗeeba ãchi ome kĩrupeɗa Dachi Akõreba naka jarasii:
“Jãarãba sõɗeeba biawãra mʉ baara nibaɗakau. Mʉ o unuɗai kʉ̃riaɗakau”.
11 Mauɗe ichi kĩrupeɗa biawãra naka jarasii: “Mʉʉba kʉrrjĩrubiaimaa jãarã wãɗaabai”».*
12 Ãbarã, kauwa panásturu. Sõ chaareaba machiɗebena aɓa biɗa Dachi Akõreɗe ijãawẽa ɓuarã́se. Chi maka niiba Dachi Akõre chokae nii ida ɓubarii. 13 Wabiɗa ãyadaa ɓuuɗeeɗe ewaricha chiya aiɗa panásturu biꞌia ijãaɗai baita. Maka aɓa biɗa kachiruaba setaa kũruapeɗa sõ chaarea nureabai. 14 Dachiba aɓaeɗeeɗe ijãapeɗaaɗaɗeeɗebena aɓa biuduuɗaa Cristoɗe ijãa panuubʉrã, ichi ome dauchia jãadua panaɗai. 15 Naeɗe jara ɓuaɗa kĩra waya jaraaruu:
«Iɗi Dachi Akõre beɗea ũriiduuɗe machi sõ chaarearã́sturu machi nabẽrarã sõ chaareapeɗaaɗa kĩra».*
16 Dachi Akõre beɗea ũripeɗaaɗakare ¿kairã ãchi sõ chaareasiɗama? ¿Joma Moisesba Egiptoɗebena awara adaukuaɗa maka sõ chaareasiɗauwãeka? 17 ¿Dachi Akõre kairã ome 40 años kĩru ɓuasma? ¿Kachirua waupeɗaaɗarã ome kĩru ɓuaswãeka? ¿Mauɗeeba maarã drua sirua wãꞌãe ɓuuɗe kinisiɗauwãeka? 18 ¿Dachi Akõreba kairãmaa biawãraɗeeba jarasma ichiba kʉrrjĩrubiaimaa wãɗaabai? ¿Chi ichi beɗea ijãaɗawẽa nureerãmaa maka jaraswãeka? 19 Mauɗeeba dachiba kuitaa panuu jãarãba ijãapeɗaaɗawãeɗeeba, Dachi Akõreba kʉrrjĩrubiaimaa poyaa wãɗaabai.
4 Dachi Akõreba biawãra jara ɓuu dachi wabiɗa ichiba kʉrrjĩrubiaimaa poyaa wãɗai panuu. Maamina kauwa panásturu. Makawãebʉrã machiɗebena aɓa biɗa aria wãabai. 2 Chi beɗea bia Dachi Akõreba kʉrrjĩrubiai ʉ̃rʉbena dachiba ũrisiɗau nabẽraeɗebenarãba ũripeɗaaɗa kĩra. Dachiba sõɗeeba ijãa panuuɗeeba Dachi Akõreba kʉrrjĩrubiaimaa wãɗai. Maamina nabẽraeɗebenarãba ũriɗapeɗa ijãaɗaabasiiɗeeba mau beɗeaba karibaabasii. Ãchi ʉ̃rʉbena Dachi Akõreba naka jarasii:
«Kĩru ɓuuɗe mʉʉba biawãraɗeeba naka jarasii: “Mʉʉba kʉrrjĩrubiaimaa jãarã wãɗaabai”».*
Maka jarasii nau iujãa wauɗaɗeeɗebena ichiba waui ɓuaɗa joma uru ɓumina.* 3 —. 4 Dachi Akõre beɗeaɗe bari panabadau ewari ʉ̃rʉbena naka ɓʉ kuɓuu:*
«Dachi Akõreba joma mau wau ɓuasiiɗeeba 7 ewariɗe kʉrrjĩrusii».*
5 Maamina Dachi Akõreba ichi beɗeaɗe naka jara ɓuu:
«Mʉʉba kʉrrjĩrubiaimaa jãarã wãɗaabai».*
6 Chi beɗea bia Dachi Akõreba kʉrrjĩrubiai ʉ̃rʉbena naeɗe ũripeɗaaɗaba ijãaɗaabasii. Mauɗeeba ichiba kʉrrjĩrubiaimaa neeɗaabasii. Maamina chi nuree wabiɗa Dachi Akõreba kʉrrjĩrubiaimaa poyaa neeɗai. 7 Mauɗeeba Dachi Akõreba ewari maucha ɓusii ichiba kʉrrjĩrubiaimaa neeɗamera. Mau ewari Dachi Akõreba trʉ̃ jarasii «iɗi». Mau ewari ɓusiiɗe ãrea baɗakare ichiba Davidɗeeba mau ʉ̃rʉbena berreasii. Mau beɗea naeɗe ɓʉɗa naubʉ:
«Iɗi Dachi Akõre beɗea ũriiduuɗe machi sõ chaarearã́sturu».*
8 Josueba israelɗebenarã Dachi Akõreba biawãra kʉrrjĩrubiaimaa adoeɗa basirã Dachi Akõreba june kʉrrjĩrubiai ʉ̃rʉbena berreabai basii. 9 Mauɗeeba bari panabadau ewari ẽbẽrarã Dachi Akõreɗerã baita wabiɗa ɓuu. 10 Ẽbẽra Dachi Akõreba kʉrrjĩrubiaimaa wãaruubʉrã, ichiba wau ɓuaɗaɗebena kʉrrjĩrui Dachi Akõreba joma waupeɗa kʉrrjĩruɗa kĩra. 11 Mauɗeeba dachiba aude jʉrʉɗai panuu Dachi Akõreba kʉrrjĩrubiaimaa wãɗai baita. Makarã aɓa biɗa ɓaebai chi nabẽrarã ijãapeɗaaɗa ɓaepeɗaaɗa kĩra.
12 Biawãra Dachi Akõre beɗea chokae nii mauɗe poyaabarii nii. Ichi beɗea espada muriacha peeɗea kĩra ɓuu. Ichi beɗeaba dachi kʉ̃risia mauɗe dachi sõba wau kʉ̃ria ɓuu joma arakʉɗe kuitaabiabarii dachi kʉ̃risia, dachi jauri mauɗe dachi sõ iɗu tõoruu kĩra. 13 Dachi Akõreba chi ichiba wauɗa joma unubarii. Aɓa biɗa wãꞌãe ichiba unukau. Ichiba ne joma doɗaa unubarii, dachiba mera uru panuu siɗa arakʉɗe unubarii. Ichiba ichiaruuɗe joma dachiba waupeɗaaɗa ichimaa jaraɗai.
Jesús dachi Paare Mechiu
14 Dachi Akõre Warr Jesús, dachi Paare Mechiu bajãaɗaa wãsii. Ichiɗe ijãa panuu a panuuɗeeba biawãra ijãa panaɗai panuu. 15 Jesús dachi Paare Mechiuba kuitaa ɓuu dachi meserãaswãe nuree. Jʉbawãe niiba mau kachiruaɗe ɓaebii chaa ɓuasii dachi kachiruaɗe ɓaebii chaa ɓuabarii kĩra. Makasmina Jesusba kachirua waubasii. 16 Mauɗeeba Dachi Akõremaa wapeaɗawẽa iɗiɗai panuu ichi rey ãkau kuɓuumaa ara kaita wãaduu kĩra. Maka ichiba dachi kĩra chuburiai mauɗe ichiba karibamera ʉtaa iɗiiduuɗe ichi sõbiaɗeeba karibai.
5 Dachi Akõreba paare mechiu ɓuuruucha ẽbẽra aɓa jʉrʉ adaupeɗa mau ɓubarii. Mauɗeeba ẽbẽrarãba kachirua waupeɗaaɗa kakua mauba Dachi Akõremaa ne kaebea deabarii mauɗe ãnimara baa deabarii.* 2 Ẽbẽrarãba adua panuuɗeeba kachirua waupeɗaaɗa paare mechiuba poyaa kuitaa ɓuu kĩra chuburiai baita, ichia biɗa araɓauɗe waubariiɗeeba. 3 Ẽbẽrarãba kachirua waupeɗaaɗa kakua ãnimara baa deaduuɗe ara ichiba wauɗa kakua biɗa ãnimara baa deai ɓuu. 4 Aɓau biɗa ara ichi du aɓa paare mechiu ɓeekau, maumaarã Dachi Akõréburu aɓa ɓubarii Aarón ɓuɗa kĩra. 5 Ara mau kĩra Cristo ara ichi du aɓa Paare Mechiu ɓeebasii, maumaarã Dachi Akõréburu ichi maka ɓusii. Dachi Akõreba ichimaa naka jarasii:
«Bichi mʉ warrbʉ. Iɗi bichi mʉ Warr aaruu».*
6 Mauɗe naka jarasii:
«Bichi ewaricha paare ɓuai Melquisedec ɓuaɗa kĩra».*
7 Cristo nau kakuaɗe ɓuasiiɗe jẽa ɓuuba Dachi Akõremaa jĩwa chi chuburia iɗisii, Dachi Akõreba ichi biuiɗebena poyaa karibai ɓuasiiɗeeba. Mauɗe Dachi Akõreba kʉ̃ria ɓuu kĩra waui asiiɗeeba, Dachi Akõreba ichiba ʉtaa iɗiɗa biꞌia ũrisii.* 8 Cristo Dachi Akõre Warrmina ichi ãrea biꞌiwãe ɓuuɗeeba saka ũribaba ɓuai kuitaasii. 9 Ne jomaɗe biꞌia wausiiɗeeba, joma chi ũribaba ũriiduu poyaa karibai ɓuu ewaricha chokae nureaɗamera. 10 Mauɗe Dachi Akõreba ichi Paare Mechiu ɓusii Melquisedec ɓuaɗa kĩra.
Chi biawãra beɗea ida ɓurã́sturu
11 Mau ʉ̃rʉbena daiba ãrea jaradea kʉ̃ria panuu. Maamina chaarea ɓuu arakʉɗe jaradeaɗai, machiba kauwa ũriɗakauɗeeba. 12 Machiba Jesusɗe ijãapeɗaaɗa ãrea baaruu. Mauɗeeba iɗi machi Dachi Akõre beɗea jaradeabadau nureaɗai panasiɗau. Maamina Dachi Akõre beɗea biꞌia adua panuuɗeeba poyaa biꞌia jaradeaɗakau. Aɓauba machimaa chi Dachi Akõre beɗea ʉ̃rʉbena naa jaradeaɗa waya jaradeai ɓuu, ju dobiiruu kĩra. Machi warrarã kĩra nureeɗeeba, kiuru koɗai baɗamaarã ju ɓaa doɗai panuu. 13 Chi ju ɓaa do nuree wabiɗa chuburi nureeɗeeba saka jipa waui adua nuree. 14 Maamina chiko chaarea ɓuu chõrarã baita ɓuu. Ãchiba Dachi Akõre beɗea kauwa kʉ̃risia panuuɗeeba kuitaa panuu kãare chi bia mauɗe kãare kachirua ɓuu.
6 Mauɗeeba Cristoɗe kuitaa wari kãri baɗai panuu. Dachiba ichi ʉ̃rʉbena naeɗe kuitaapeɗaaɗa akabichia aramáturu jaradearã́duru. Waya jaradeaɗaabai chi kachirua wau panuu kakua biuɗai panuu, kachirua ida ɓuɗapeɗa Dachi Akõremaa neeɗai panuu, Dachi Akõreɗe ijãaɗai ʉ̃rʉbena, boro eaɗai ʉ̃rʉbena, ãbarã ʉ̃rʉ jua kuɓuuɗai ʉ̃rʉbena, biuɗarã chokae jiraduɗai ʉ̃rʉbena mauɗe Dachi Akõreba kastikapeɗa ewaricha ãrea biꞌiwãe panaɗai ʉ̃rʉbena siɗa. 2 —. 3 Dachi Akõreba kʉ̃ria ɓuubʉrã, joma mau ʉ̃rʉbena waya jaradeaɗai baɗamaarã dachi Cristoɗe wari kãri baɗai.
4 Waabenarã chi nureeba chi beɗea biawãra kuitaapeɗaaɗakauɗe,* Dachi Akõreba dea ɓuu kuitaapeɗaaɗakauɗe, ichi Jauriɗeeba ne adaupeɗaaɗakauɗe, 5 ichi beɗea biꞌia ɓuu ũripeɗaaɗakauɗe mauɗe chi kaaɗebena iujãa neei poyaabariiba ẽbẽrarãba ne poyaa wauɗakau unupeɗaaɗakauɗe 6 aɓauba Dachi Akõre warr Cristo ida ɓuuruubʉrã, waya ichimaa poyaa neebai. Makaa basirã, maarãba jomaurãmaa Cristo ʉ̃rʉbena kachirua berreabiaɗai basii waya cruzɗe nuɓuuduu kĩra.
7 Kui cheeruucha ioroba sõbarii. Mauɗe ioro biaɗe uuɗa, chi uuɗa baita biꞌia chaubarii. Dachi Akõreba mau iujãa biꞌia jarabarii.* 8 Maamina kui cheɗakare ʉri tonooruubʉrã mauɗe sirua kachirua tonooruubʉrã, mau ioro biꞌiwãe ɓuu. Dachi Akõreba mau iujãa ʉ̃rʉbena kachirua jarapeɗa joma baabʉʉi.*
9 Ãbarã, dachi maka berrea duanumina kuitaa panuu Dachi Akõreba machi karibasii o biaɗe wãaduuɗeeba. 10 Dachi Akõre jipa niiɗeeba machiba biꞌia wau panuu mauɗe ichi kʉ̃ria panuu kʉde uru ɓuu ida ɓuubai. Ẽbẽrarã ichiɗirã aiɗa panuuɗeeba machiba unubisiɗau ichi* kʉ̃ria panuu. Mauɗe wabiɗa maarã aiɗa panuu. 11 Daiba kʉ̃ria panuu machicha maka wau panaɗai aɓa biuduuɗaa. Maka ɓuubʉrã machiba Dachi Akõreɗeeba adauɗai eseɗau panuu joma adauɗai. 12 Daiba kʉ̃riaɗawẽe machi koꞌoa nureaɗai, maumaarã kʉ̃ria panuu machi waabenarã ãbarã kĩra nureaɗai. Ãchiba Cristoɗe ijãa panuuɗeeba mauɗe joma jãadua panuuɗeeba, Dachi Akõreba deai jaraɗa joma adauɗai.
Dachi Akõreba beɗea deaɗa biawãra waui
13 Dachi Akõre audeara chi mechiu nii wãꞌãe. Mauɗeeba Abraham ome beɗea deasiiɗe ara ichi trʉ̃ɗeeba biawãra karibai asii. 14 Naka jarasii: «Biawãra mʉʉba bichi karibai mauɗe bichiɗebena ãrea imibiai».* 15 Abraham joma jãadua eseɗau ɓuuɗeeba, Dachi Akõreba warr deai jaraɗa unusii.
16 Ẽbẽrarãba biawãraɗeeba ne jaraaduuɗe ãchi audeara chi mechiu nii trʉ̃ɗeeba maka jarabadau. Mauɗe aɓau biɗa poyaa seta aɗakau. 17 Ara mau kĩra Dachi Akõreba arakʉɗe kuitaabiai kʉ̃riasii chi ichiba deai jaraɗa ẽbẽrarãba mau biawãra adauɗai mauɗe ichiba kʉ̃risia ɓuu kĩra biawãra waubarii. Mauɗeeba ara ichi trʉ̃ɗeeba deai asii. 18 Dachi Akõreba setaa jarakauɗeeba ichiba deai jaraɗa biawãra deai mauɗe ichi trʉ̃ɗeeba jaraɗa ãyaa waubai. Mau beɗea ome maka jara ɓuuɗeeba Dachi Akõre dachiba jʉrʉbadau dai karibamera mauɗe kʉ̃riamera. Ichiba jaraɗa biawãra waui kuitaa panuuɗeeba dachiba poyaa peraɗawẽa ijãa panaɗai. Mauɗe chi Jesusɗeeba adauɗai eseɗau panuu ida ɓuɗaabai. 19 Mauba dachi aiɗa ɓuu ãrea ijãa panaɗamera anclaba jãba jãaduabarii kĩra. Dachiba adauɗai panuu biawãra kuitaa panuu Jesús bajãaɗaa dachi naa wãsiiɗeeba. Ichi Dachi Akõre de eɗare paru eaɓari jira ɓuare wãyaa wãsii dachi karibai baita. Aria ichi dachi Paare mechiu ɓeesii Melquisedec nibaɗa kĩra. Ewaricha maka nii. 20 —.
Melquisedec
7 Mau Melquisedec Salem puuruɗebena chi rey basii mauɗe Dachi Akõre chi Mechiu nii paare basii. Mau ewariɗe Abraham chi nuree puuruɗebena reyrã ome chĩopeɗa joma poyaasii. Abraham waya neeruuɗe ara chi Melquisedecba irsibiɗe wãpeɗa ichimaa biꞌia jarasii Dachi Akõreba karibamera. 2 Maabae Abrahamba chi maarã juakaa adauɗaɗebena Melquisedecmaa deasii. 10 juasiiruuɗebena aɓa deasii. Melquisedec trʉ̃ jara ɓuu «ẽbẽrarã rey jipa nii». Mauɗe ichi «Salemɗebena rey» abachiɗau. Mau trʉ̃ jara ɓuu «jirukaraayuwãe ɓuai rey». 3 Melquisedec akõre, chi nawe mauɗe ichi ẽbẽrarã nabẽraeɗebenarã ʉ̃rʉbena Dachi Akõre beɗeaɗe ɓʉ kuɓuuwãe. Mauɗe ichi chi naweba adauɗa mauɗe biuɗa ʉ̃rʉbena ɓʉ kuɓuuwãe. Maka ichi Dachi Akõre Warr kĩra ewaricha paarebʉ.
4 ¡Melquisedec ʉ̃rʉbena ãrea kʉ̃risiásturu! Mau biawãra chi mechiu basii. Dachi nabẽraeɗebena chi mechiu Abrahamba chĩo ɓuapeɗa juakaa adauɗaɗebena ichimaa deasii. 10 juasiiruuɗebena aɓa deasii. 5 Moisesba ɓʉɗaɗe jarasii joma israelɗebenarãba adoeduuɗebena Leviɗebena imipeɗaaɗa paarerãmaa deaɗai panuu. 10 adoeduucha aɓa deaɗai panuu. Israelɗebenarã mau paarerã ãbarãmina mauɗe araɓau Abrahamɗebena imipeɗaaɗamina, maka deaɗai panuu. 6 Maumaarã Melquisedec Leviɗebena neeɗawãe basmina Abrahamba juakaa adauɗaɗebena maumaa deasii. 10 juasiiruuɗebena aɓa deasii. Mauɗe Melquisedecba Abraham biꞌia jarasii Dachi Akõreba aiɗamera. Mau Dachi Akõreba Abrahammaa naeɗe biawãra aiɗai a ɓuasii.* 7 Jomaurãba kuitaa panuu chi mechiu niiba chi kaebeu niimaa biꞌia jarabarii Dachi Akõreba aiɗamera.
8 Israelɗebenarãba adoeduuɗebena Leviɗebena imiiduurã paarerãmaa deabadau. Mau paarerã biuɗaimina 10 adoeduucha ãchimaa aɓa deabadau. Maamina Dachi Akõre beɗeaɗe jara ɓuu Melquisedec waa chokae ɓuu. Maka Abrahamba juakaa adauɗaɗebena mau biukau paaremaa deasii. 10 juasiiruucha aɓa deasii. 9 Israelɗebenarãba 10 adoeduuɗebena Leviɗebena imiiduurã paarerãmaa aɓa deabadau. Maamina Melquisedecba Abraham irsibisiiɗe Abrahamɗebena neeɗa Leví wabiɗa wãꞌãe basii. Mauɗeeba dachiba naka jaraɗai panuu: Abrahamba 10 juasiiruucha Melquisedecmaa aɓa deasiiɗe chi ichiɗebena neeɗa Leviɗebena imiiduurã biɗa mau deasiɗau. 10 —.
11 Dachi Akõreba ichi Moisesba ɓʉɗa Israelɗebenarãmaa deasiiɗe Leviɗebena imiiduurã ɓusii paarerã baɗamera. Mau paarerãba wau panuuɗeeba ẽbẽrarã poyaa Dachi Akõremaa wãbiaɗai ɓuasiibʉrã, ¿sakãe Aarón ãyaa paare Melquisedec kĩra nii neei ɓuasma? 12 Mau paare june kĩra ãyarebena neeɗaɗeeba, chi ley ɓʉɗa siɗa june ãyaa ɓeei basii. 13 Joma mauba Dachi Mechiu Jesús ʉ̃rʉbena berrea ɓuu. Ichi Leviɗebena imipeɗaaɗawãe basii, maumaarã Judaɗebena neeɗa basii. Mau naeɗe aɓa biɗa mauɗebena neeɗa paare nureaɗaabasii. 14 Moisesba jaraka basii paarerã mau ẽbẽrarãɗebena neeɗayu. Jomaurãba kuitaa panuu Dachi Mechiu Jesús Judaɗebena neeɗa basii.
15 Joma mʉʉba jaraɗa arakʉɗe ɓuu nau kuitaaduubʉrã: Jesús june kĩra ãyarebena neeɗaɗeeba, ichi paare ɓeesii Melquisedec ɓuaɗa kĩra. 16 Ichi paare ɓeebasii, chi Moisesba ɓʉɗa kĩra ɓeesiiɗeeba. Moisesba ɓʉɗaba aɓaburu Leviɗebena imiiduurã ɓubarii. Maumaarã Jesús paare ɓeesii ichi poyaabariiɗeeba biukauɗeeba. 17 Ichi ʉ̃rʉbena Dachi Akõre beɗeaɗe naka jara ɓuu:
«Bichi ewaricha paare ɓuai Melquisedec ɓuaɗa kĩra».*
18 Chi naa ɓʉɗa Dachi Akõreba wãꞌãebisii aɓa biɗa aiɗakauɗeeba, 19 mauɗe mau Moisesba ɓʉɗaba aɓa biɗa jipa nibabiabasii. Mau Moisesba ɓʉɗa audeara Dachi Akõreba ne bia deasii dachi karibai baita. Mauɗeeba dachi Dachi Akõremaa ara kaita wãbadau.
20 Dachi Akõreba chi nabena paarerã ɓusiiɗe ewaricha nureaɗai jaraabasii. Maamina Dachi Akõreba Jesús paare ɓusiiɗe biawãraɗeeba jarasii ewaricha maka ɓuai. Dachi Akõre beɗeaɗe naka ɓʉ kuɓuu:
«Dachi Mechiuba biawãraɗeeba jarasii bichi ewaricha paare ɓuai Melquisedec ɓuaɗa kĩra.* Mauba chi jaraɗa ãyaa waubai». 21 —.
22 Mau Dachi Akõreba biawãraɗeeba jarasiiɗeeba, dachiba kuitaa panuu Dachi Akõreba Jesusɗeeba dachi ome beɗea chiwiɗi deaɗa* biawãra makai. Mau beɗea naa deaɗa Moisesba ɓʉɗa audeara biꞌia ɓuu.
23 Chi nabenarã paarerã ãrea basii. Aɓa biuruuɗe june aɓa ɓeebachii. Chi biuɗaba wau badaaɗa waa poyaa wauɗaka basii. 24 Maamina Jesús biukauɗeeba ewaricha paare bai. 25 Mauɗeeba chi ichiɗeeba Dachi Akõremaa needuu joma poyaa karibai ewaricha chokae nureaɗamera. Biukauɗeeba ewaricha dachi baita Dachi Akõremaa chi chuburia iɗibarii.
26 Dachi Paare Mechiu Jesusba ne jomaɗe dachi poyaa aiɗai. Kachirua waukau, ne jomaɗe jipa nii. Dachi Akõreba mau biꞌia unu ɓuu. Kachirua waubadaurã tãeɗebena awara ɓupeɗa bajãaɗe chi mechiu ɓusii. 27 Ichiba waukau waabenarã paare mechiurãba ewaricha waubadau kĩra. Maarãba ara ãchiba kachirua waupeɗaaɗa kakua naa Dachi Akõremaa ãnimara baa deabachiɗau. Maaɗakare waabena ãnimara baa deabachiɗau waabenarã ẽbẽrarãba kachirua waupeɗaaɗa kakua. Maamina Jesusba ãnimara baa dearuu kĩra ara ichi ida beabisii ẽbẽrarãba kachirua waubadau kakua. Ɓes aɓa maka wauɗaba kachirua joma jeraasii. 28 Moisesba ɓʉɗaba ẽbẽrarã ne jomaɗe jipawãe nuree ɓubarii paare mechiurã nureaɗamera. Maamina mau Moisesba ɓʉɗa deasiiɗe Dachi Akõreba biawãra jarasii ichi Warr ewaricha Paarerã Mechiu nibai. Maka ichi Warr ɓusii dachi kakua paare arakʉɗe nibamera.
Jesusɗeeba chi beɗea wiɗi deaɗa bibuara ɓuu
8 Chi kʉ̃risia bia daiba jara panuu naubʉ: dachi Paare Mechiu bajãaɗe Dachi Akõre rey ãkau jua biare akʉ ɓuu, 2 mauɗe chi Dachi Akõre deɗe eɗa paare kĩra traja ɓuabarii. Mau chi biawãra de ãnimara e wauɗabʉ. Ẽbẽrarãba mau wauɗaabasii, maumaarã Dachi Mechiuba mau wausii.
3 Dachi Akõreba joma paare mechiurã ɓukuabarii ichimaa ne kaebea deaɗamera mauɗe ãnimara baa deaɗamera. Mauɗeeba dachi Paare Mechiu nii biɗa ne kaebea deai ɓuasii. 4 Ichi nau iujãaɗe ɓuaɗa basirã, paare nibaabai basii, nau iujãaɗe paarerã ãrea barauɗeeba. Mau paarerãba Dachi Akõremaa ne kaebea deabadau Moisesba ɓʉɗaɗe ɓʉ kuɓuu kĩra. 5 Paarerãba wau panuuɗeeba unubibadau bajãaɗe saka ɓuu. Mauɗeeba Moisesba chi ãnimara e de waui naeɗe Dachi Akõreba ichimaa naka jarasii: «Joma arakʉɗe kauwa wause mʉʉba eaɗe unubiɗa kĩra».* 6 Maamina Jesús dachi Paare Mechiuba bajãaɗe waubarii paarerãba nau iujãaɗe waubadau audeara biꞌia ɓuu. Ara mau kĩra Dachi Akõreba Jesusɗeeba beɗea deaɗa bibuara ɓuu ẽbẽrarã beɗea deaɗa audeara, Dachi Akõreba ẽbẽrarã ãrea karibai asiiɗeeba. 7 Dachi Akõreba ẽbẽrarã ome naeɗe beɗea deaɗaba biawãra karibaɗa basirã waya maucha beɗea deabai basii. 8 Maamina Dachi Akõreba ẽbẽrarãba mau joma wauɗawẽa panuu unusii. Mauɗeeba naka jarasii:
Dachi Mechiuba naka jara ɓuu: «Ewari aɓaɗe mʉʉba israelɗebenarã ome mauɗe Judaɗebenarãmaa beɗea chiwiɗi deai.
9 Mau beɗea chiwiɗi machi nabẽraeɗebenarãmaa beɗea deaɗa kĩra ɓuabai.
Maarãmaa beɗea deasii, Egiptoɗebena uaɗosiiɗe.*
Maamina biawãra ijãaɗaabasiiɗeeba mʉʉba ãchi ida ɓusii. Maka jara ɓuu Dachi Mechiuba.
10 Mauɗe Dachi Mechiuba naka jara ɓuu: Kaaɗebena ewariɗe mʉʉba nau beɗea chiwiɗi israelɗebenarãmaa deai:
Mʉʉba chi Moisesba ɓʉɗa ãchi kʉ̃risiaɗe mauɗe ãchi sõɗe ɓui.
Mʉ ãchi Akõre bai, mauɗe ãchi mʉ ẽbẽrarã bai.
11 Mauɗe jomaurãba mʉ kuitaa panaɗai. Chi kaebeu nureeba mauɗe chi mechiurã kuitaa panaɗai.
Mauɗeeba aɓau biɗa ichi druaɗebenarãmaa mauɗe ichi ẽbẽrarãmaa waa jaradeaɗaabai mʉ jomaurã Mechiu kuitaaɗamera.
12 Ãchiba kachirua waupeɗaaɗa mʉʉba joma perdonai. Ãchiba kachirua waupeɗaaɗa mʉʉba waa kʉ̃risia ɓuabai».*
13 Dachi Akõreba beɗea chiwiɗi deai asiiɗe kuitaabisii ichiba naeɗe beɗea deaɗa chi chõra ɓuu. Chi chõraɗeeba kãꞌãabariwãeɗe ãyaa ɓui.*
Dachi Akõre de nau iujãaɗebena
9 Dachi Akõre israelɗebenarã ome naeɗe beɗea deasiiɗe jarasii ichi ãnimara e de nau iujãaɗe wauɗai panuu mauɗe mau deɗe saka wauɗai panuu. 2 Mau deɗe pieza ome ɓuasii. Chi nabena pieza «Dachi Akõre baita ɓuu pieza» abachiɗau. Mau piezaɗe ʉ̃ɗaa koabarii mauɗe mesa nuɓuasii. Mauɗe chi pan Dachi Akõre baita kuɓuasii. 3 Chi mawãare ɓuu pieza paru eaɓari jiraɓu aɗu ɓuasii. Mau pieza «Dachi Akõre baita biꞌia ɓuu pieza» abachiɗau. 4 Kera baabarii aria nuɓuasii. Mau neeba joma bʉra ɓuasii. Mauɗe chi beɗea deabarii baura nuɓuasii. Mau siɗa neeba joma bʉra ɓuasii. Mauɗe eɗa kuuru nee wauɗaɗe maná duanasii.* Mauɗe Aarón bakuru tonoɗa siɗa eɗa kuɓuasii.* Moisesba mo pepeɗeaɗe ɓʉɗa siɗa eɗa kuɓuasii.* 5 Baura ʉ̃rʉ ángel kĩra ikia bara panuu ome panasiɗau. Chi ikiaba chi tapa ʉ̃rʉ jũra topanasiɗau.* Ãchi panuumaa Dachi Akõre kĩrawãrea teɗechoa neebachii. Mau tapa ʉ̃rʉ paareba oa jĩtoɗokaaruuɗe Dachi Akõreba ẽbẽrarãba kachirua waupeɗaaɗa perdonabachii. Ara makʉɗe mau ʉ̃rʉbena daiba nau kartaɗe poyaa biꞌia jaradeaɗaabai.
6 Mau joma wausiɗauɗe paarerã ewaricha chi nabena piezaɗe eɗa wãbachiɗau Dachi Akõre baita wauɗai panuu joma wauɗai baita. 7 Maamina chi mawãare ɓuu piezaɗe aɓa chi paare mechíuturu añocha ɓes aɓa eɗa wãbachii. Eɗa wãaruuɗe ichiba kachirua wauɗa kakua mauɗe ẽbẽrarãba adua panuuɗeeba kachirua waupeɗaaɗa kakua biɗa ãnimara oa Dachi Akõre daaɗe jĩtoɗokai baita adoebachii.* 8 Mauɗeeba Dachi Akõre Jauriba kuitaabi ɓuasii paarerãba wabiɗa Dachi Akõre de nau iujãaɗe ɓuuɗe ne wauɗai panuumisa ẽbẽrarã wabiɗa Dachi Akõre de bajãaɗe ɓuuɗe poyaa eɗa wãɗaabai. 9 Nau ʉ̃rauɗe joma mauba unubi ɓuu Dachi Akõremaa ne kaebea dea panuuɗeeba mauɗe ãnimara baa dea panuuɗeeba chi maka wau nuree kʉ̃risia poyaa jipa nureewãe. 10 Moisesba ɓʉɗaba náturu aɓaburu kuitaabiasii chi dachi kakua chi ʉ̃rʉbena ome waubadau jaradeabadau: kãare koɗai panuu, kãare doɗai panuu mauɗe Dachi Akõreba jeraabi ɓuu saka jeraaɗai panuu. Joma mau waubachiɗau aɓa Dachi Akõreba joma chiwiɗi wauruuɗaa.
11 Maamina Cristo dachi Paare mechiu ba ɓuasii, ne bia chi makaɗa uru panaɗamera. Dachi Akõre de bajãaɗe kuɓuɗe eɗa wãsii. Mau de chi aude kuɓuu mauɗe chi biara kuɓuu nau iujãaɗe kuɓuu audeara. Ẽbẽrarãba mau de waupeɗaaɗawãe; mau iujãaɗebenawãe. 12 Aria chi «Dachi Akõre baita biꞌia ɓuu piezaɗe» ɓes aɓa eɗa wãsii. Wãsiiɗe chivo oa mauɗe paka warr oa Dachi Akõre daaɗe jĩtoɗokai baita adoebasii. Maumaarã ara ichi oa adoesii. Ɓes aɓa maka wausiiba dachi karibasii ewaricha nebʉraswãe nureaɗamera. 13 Paareba paka mukĩra oa, chivo oa mauɗe paka warr baa deaɗa chi jãra ẽbẽrarã ʉ̃rʉ kuabʉibarii. Mauba ẽbẽrarã Dachi Akõre daaɗe kachirua nureaɗa nau kakua ʉ̃rʉbena biꞌia jarebarii. 14 Maka baibʉrã, ¿Cristo oaba dachi biꞌia ɓuwẽka? Cristo kachiruaswãe nibasii. Dachi Akõre Jauri biukauba karibasiiɗeeba ara ichi ida beabisii ãnimara Dachi Akõremaa baa dearuu kĩra. Kachirua wau panuu kakua dachi biuɗai panasiɗau. Maamina Cristoba ara ichi ida beabisiiɗeeba dachiba kachirua waupeɗaaɗa Dachi Akõreba perdonapeɗa dachi kʉ̃risia jipa ɓusii. Maka chi Dachi Akõre chokae niiba kʉ̃ria ɓuu, mau dachiba poyaa wauɗai.
15 Makarã Cristoɗeeba Dachi Akõreba beɗea chiwiɗi deasii. Ẽbẽrarã chi Ichiba nabena beɗea deaɗaɗe panabachiɗauɗe kachirua waubachiɗau. Maamina Cristo biusii mauɗebena karibai baita. Mauɗe Cristo biusiiɗeeba ichiɗeeba chi ichiba iukuaɗarãba chi bia wãꞌãekau deai jaraɗa poyaa adauɗai.
16 Nau kĩra ɓuu: ẽbẽraba kartaɗe ɓʉbarii ichi biuruuɗe kaiba ichiba uru ɓuu adaui ɓuu. Maamina chi adaui ɓuuba mau ẽbẽra biawãra biuɗa unubiwẽebʉra chi uru ɓuaɗa poyaa adaubai. 17 Chi beɗea ɓʉɗa ẽbẽra wabiɗa chokae ɓuuɗe chi adaui ɓuuba ichiba uru ɓuaɗa poyaa adaubai. (Biuruubʉrã makaburu poyaa adaui). 18 Ara mau kĩra Dachi Akõreba israelɗebenarã ome chi nabena beɗea deasiiɗe ãnimara oa chesii.* Mauba kuitaabiasii maarãba mau beɗea deaɗa ũribaba panaɗai panasiɗau. 19 Mau naka ɓuasii: Moisesba ichiba ɓʉɗa ẽbẽrarãmaa joma jarapeɗa maabae paka warr oa mauɗe chivo oa bania baara perasii. Hisopo bakuru juaɗe oeja kara puria wauɗa bʉrapeɗa oaɗe sunasii. Mau oaba ichiba mau karta ʉ̃rʉ mauɗe ẽbẽrarã ʉ̃rʉ jĩtoɗokasii. 20 Jĩtoɗokamaa ɓuuɗe naka jarasii: «Nau oaba jara ɓuu Dachi Akõre machi ome beɗea deaɗa joma ũribaba panaɗai panuu».* 21 Ara mau kĩra Moisesba chi ãnimara e de mauɗe joma mau deɗe koɓee mau oaba jĩtoɗokasii. 22 Biawãra Moisesba ɓʉɗaɗe jara ɓuu beraa ne joma ne kaebea oaba jĩtoɗokai ɓuu Dachi Akõre daaɗe biꞌia ɓuamera. Oa chewẽebʉrã dachiba kachirua waupeɗaaɗa Dachi Akõreba perdonaabai.
Cristo oaba dachiba kachirua waupeɗaaɗa joma jeraabarii
23 Dachi Akõre de ãnimara e waupeɗaaɗa mauɗe mau deɗe koɓee, Dachi Akõre de bajãaɗe kuɓuu kĩra ɓuasii. Joma mau ãnimara oaba jĩtoɗokai ɓuasii Dachi Akõre daaɗe biꞌia nureamera. Maamina Dachi Akõre de bajãaɗe kuɓuu, mauɗe mau deɗe eɗa ɓee, oa ãnimara oa aude bia ɓuuba jĩtoɗokai ɓuasii. 24 Cristo Dachi Akõre de ẽbẽrarãba waupeɗaaɗaɗe eɗa wãabasii, mau aɓaburu Dachi Akõre de chi biawãra ɓuu bajãaɗe kuɓuu kĩra ɓuasiiɗeeba. Cristo bajãaɗe Dachi Akõre daaɗe wãsii, ichi oa chesiiɗeeba dachi baita ichimaa chi chuburia iɗii baita. 25 Ichi bajãaɗaa wãabasii, ichi oa ɓes ãrea jĩtoɗokai baita nau iujãaɗebena paare mechiuba añocha Dachi Akõre baita biꞌia ɓuu piezaɗe waubarii kĩra. 26 Maka ɓuaɗa basirã nau iujãa wausiiɗeeɗebena waitaa Cristo ɓes ãrea biui basii. Maamina nau kaaɗebena ewariɗe neepeɗa ichi ida beabisii. Ɓes aɓa maka wauɗaba dachiba kachirua waupeɗaaɗa joma awara ɓusii. 27 Joma ɓes aɓaburu biuɗai. Mau maaɗakare Dachi Akõreba nebʉra ichiai. 28 Ara mau kĩra Cristoba ɓes aɓa ichi ida beabisii ãreaba kachirua waupeɗaaɗa awara ɓui baita. Ichi waya neei, maamina dachiba kachirua waubadau awara ɓui baita neebai. Maumaarã neei ichi eseɗau duanuu karibakuai baita.
10 Moisesba ɓʉɗaba joma ne bia Cristoɗeeba neei ʉ̃rʉbena biꞌia doɗaa unubiwẽa ɓuu. Mau ne bia Moisesba ɓʉɗaba deakau. Mauɗeeba Moisesba ɓʉɗaba chi Dachi Akõremaa ãnimara baa deaɗe wãbadaurã poyaa jipa nibabiakau. 2 Moisesba ɓʉɗaba ãchi biawãra jipa nibabiaɗa basirã, waa ãnimara baa deaɗe wãɗaabai basii. Mau ãnimara baa deaduuɗeeba biawãra kachiruaswãe paneeɗa basirã, waa ichi daaɗe nebʉraɗe panuu kʉ̃risiaɗaabai basii. 3 Maamina añocha ãnimara baa deaduuɗe, mauba kĩrababiabarii ãchiba kachirua waubadau, 4 paka mukĩra oaba mauɗe chivo oaba kachirua poyaa awara ɓukauɗeeba. 5 Mauɗeeba Cristo nau iujãaɗaa neesiiɗe ichiba Dachi Akõremaa naka jarasii:
«Bichiba ãnimara bichimaa baa deaɗai mauɗe ne kaebea deaɗai kʉ̃riawẽa ɓuu. Maamina bichiba mʉʉmaa kakua deasii mau deamera.
6 Ãchi kachirua kakua ãnimara baa deaduuɗe mauɗe ne kaebea deaduuɗe bichi kĩrajʉʉ ɓuabasii.
7 Mauɗeeba mʉʉba jarasii: “Dachi Akõre, mʉ nama ɓuu bichiba kʉ̃ria ɓuu waui baita,
Bichi Beɗeaɗe mʉ ʉ̃rʉbena maka ɓʉ kuɓuuɗeeba”».*
8 Cristoba naa jarasii Dachi Akõreba kʉ̃riawẽa ɓuu ẽbẽrarãba ãchi kachirua kakua ãnimara ichimaa baa deaɗai mauɗe ne kaebea deaɗai. Moisesba ɓʉɗaba maka waubia ɓumina, Dachi Akõre kĩrajʉʉ ɓuakau asii. 9 Maabae Cristoba Dachi Akõremaa naka jarasii: «Mʉ nama ɓuu bichiba kʉ̃ria ɓuu waui baita». Mauba unubi ɓuu chi nabena Dachi Akõreba beɗea deaɗa Cristoba awara ɓusii, chi mawãarebena beɗea deai baita. 10 Dachi Akõreba kʉ̃ria ɓuu Jesucristoba joma wausii. Ara ichi ida beabisii. Ɓes aɓa maka wauɗaba dachi ewaricha Dachi Akõre baita biꞌia ɓusii.
11 Paarerãba ewaricha Dachi Akõre baita ne waubadau mauɗe ãnimara baa deabadau. Maamina mauba kachirua awara ɓukau. 12 Maamina Jesucristoba ara ichi ida beabisii kachirua ewaricha awara ɓui baita. Maabae Dachi Akõre jua biare akʉ ɓeesii. 13 Aria eseɗau ɓuu aɓa Dachi Akõreba joma ichi kʉ̃riakaurãba ichi juaɗe ɓuuruuɗaa.* 14 Cristoba ɓes aɓa ara ichi ida beabisiiɗeeba chi Dachi Akõre baita awara ɓuɗarã jipa duanusii, maka ewaricha nureaɗamera. 15 Dachi Akõre Jauri biɗa araɓauɗe dachimaa kuitaabia ɓuu. Naka jara ɓuu:
16 «Dachi Mechiuba naka jara ɓuu: Kaaɗebena ewariɗe mʉʉba beɗea chiwiɗi israelɗebenarãmaa deai: Mʉʉba chi Moisesba ɓʉɗa ãchi kʉ̃risiaɗe mauɗe ãchi sõɗe ɓui».*
17 Mawãare naka jara ɓuu:
«Ãchiba kachirua waupeɗaaɗa mʉʉba joma perdonai. Ãchiba kachirua waupeɗaaɗa mʉʉba waa kʉ̃risia ɓuabai».*
18 Dachi Akõreba dachi kachirua waupeɗaaɗa ida ɓusiiɗeeba, waa dachi kachirua kakua ichimaa ne kaebea deaɗaabai panuu.
Dauchia panaɗai panuu
19 Mauɗeeba ãbarã, Dachi Akõre baita biꞌia ɓuu piezaɗe eɗa wãaduu kĩra Jesucristo oaɗeeba Dachi Akõre kaita wapeawẽa wãɗai panuu. 20 Mau piezaɗe eɗa paru eaɓari jiraɓu kõawãaruu kĩra Jesús biusiiɗeeba o wiɗi wausii, chi Dachi Akõre kaita needuurã chokae nureaɗamera. 21 Dachiba Paare Mechiu bajãaɗe uru panuu. Ichiba ẽbẽrarã Dachi Akõreɗerã joma karibabarii. 22 Cristoba dachi kʉ̃risia kachirua panaɗa jipa ɓusii dachi sõ ichi oaba jĩtoɗokaaruu kĩra. Dachi Akõre daaɗe biꞌia duanuu dachi kakua bania pawãraaba jeraaɗa kĩra. Mauɗeeba kʉ̃risia aɓaɗeeba mauɗe biawãra ijãa panuuɗeeba wãɗai panuu. 23 Dachi Akõreba ichiba jaraɗa kĩra waubariiɗeeba dachiba kʉ̃risiabadau mauɗe jomaurãmaa jarabadau mau aɓa biɗa ida ɓuɗaabai panuu. 24 Jʉrʉɗai panuu saka chiya aiɗaɗai aude kʉ̃riaɗai baita mauɗe chi bia wauɗai baita. 25 Ãbua duanaɗai ida ɓuɗaabai panuu chi nureeba waubadau kĩra. Maumaarã bari chiya aiɗaɗai panuu aude ijãaɗai baita. Maka biꞌia wauɗai panuu, Dachi Mechiuba nebʉra kastikai ewari kãꞌãabariwãeɗe neei kuitaa panuuɗeeba.
26 Maamina dachiba chi biawãra beɗea kuitaapeɗaaɗakare ara dachiɗeeba kachirua wauduubʉrã, waa wãꞌãe Dachi Akõremaa deaɗai baita mau kachirua ida ɓumera. 27 Chi maka wau ɓuuba aɓa wapeaɗeeba eseɗau ɓuai ɓuu Dachi Akõreba mau kastikamera. Mau ewariɗe Dachi Akõreba joma ichi kĩramaarã tʉbʉ aoko nuɓuuɗe jirakuai ewaricha baa nuɓeemera. 28 Naeɗe aɓauba Moisesba ɓʉɗa ũri kʉ̃riawẽebʉrã, mauɗe ẽbẽra omeeba maebʉrã õbeaba biawãra maka ɓuu aaduubʉrã, mau aɓaeɗe kĩra chuburiaɗawẽa beabachiɗau.* 29 Mauɗeeba ¿saka kʉ̃risia panuma? ¿Dachi Akõreba chi ichi Warr ida ɓubadaurã aude kastikaika? Dachi Akõreba ichi Warr oaɗeeba beɗea chiwiɗi deasii dachi ichi baita biꞌia ɓui baita. Makarã ¿chi Dachi Akõreba ichi Warr oa cheɗa biꞌiwãe ɓuu abadaurã aude kastikaika? Mau awara Dachi Akõre Jauriba ichi sõbiaɗeeba dachi aiɗa ɓuu. Maka ɓuubʉrã ¿chi Dachi Akõre Jauri ʉ̃rʉbena kachirua jarabadaurã kastikawẽka? 30 Dachiba kuitaa panuu Dachi Akõreba naka jarasii: «Mʉaburu chi nebʉra kastikai. Jomaurãmaa deai ãchiba waupeɗaaɗa kĩra».* Mauɗe naka jarasii: «Dachi Mechiuba ichi ẽbẽrarã nebʉra ichiai».* 31 Dachi Akõre chokae niiba dachi nebʉra ichiaruubʉrã biawãra ãrea mia kachirua ɓuu.
32 Kĩrabásturu machiba naeɗe chi biawãra beɗea kuitaasiɗauɗe saka panasii. Mau ewariɗe machi ãrea biꞌiwãe panaɗa dauchia jãadua panasiɗau. 33 Ɓeseɗe jomaurã daaɗe Cristo kakua kachirua jarabachiɗau mauɗe machimaa kachirua waubachiɗau. Ɓeseɗe ãbarã Cristo kakua ãrea biꞌiwãe panuu baara ãrea biꞌiwãe paneebachiɗau. 34 Chi Cristo kakua jʉ̃apeɗaaɗa machiba aiɗasiɗau. Mauɗe machiba ne uru ɓeaɗa kĩrajʉʉ ida juakaa adaubiasiɗau, kuitaa panuuɗeeba mau audeara ne bia wãꞌãekau bajãaɗe uru panuu. 35 Mauɗeeba machiba Dachi Akõreɗe ijãa panuu ida ɓurã́sturu. Ijãa panuubʉrã, Dachi Akõreba bajãaɗe ne bia mechiu deai. 36 Machiba mau joma eseɗau panaɗai panuu. Makaburu Dachi Akõreba kʉ̃ria ɓuu wauɗapeɗa ichiba deai jaraɗa joma adauɗai. 37 Dachi Akõre beɗeaɗe naka ɓʉ kuɓuu:
«Chi neei ɓuu kãꞌãabariwãeɗe neei. Ichi biawãra kãꞌãabariwãeɗe neei.
38 Chi jipa nii mʉʉɗe ijãa niiɗeeba chokae nibai. Maamina ichiba ijãa ɓuu ida ɓuuruubʉrã, mʉʉba mau biꞌia unuubai».*
39 Waabenarãba Dachi Akõreɗe ijãa panuu ida ɓuɗapeɗa adua paneebadau. Maamina dachi mau ẽbẽrarã kĩra panuuwãema, maumaarã Dachi Akõreɗe ijãa panuuɗeeba ewaricha chokae panaɗai.
Dachi Akõreɗe ijãa nii ʉ̃rʉbena
11 Dachiba Dachi Akõreɗe ijãa panuuɗeeba kuitaa panuu chi dachiba eseɗaubadau mau biawãra adauɗai. Mauɗe chi dachiba unuɗakau mau ɓuabarii kuitaa panuu. 2 Dachi nabẽraeɗebenarãba Dachi Akõreɗe ijãa panasiiɗeeba Dachi Akõreba maarã biꞌia unusii.
3 Dachiba Dachi Akõreɗe ijãa panuuɗeeba kuitaa panuu Dachi Akõre berrearuuba nau iujãa mauɗe bajãa joma wausii. Maka chi dachiba unuɗakauɗebena joma dachiba unubadau wausii.
4 Abelba Dachi Akõreɗe ijãa ɓuasiiɗeeba Cainba deaɗa audeara ne bia ɓuu deasii. Ijãasiiɗeeba ichiba deaɗa Dachi Akõreba biꞌia unupeɗa jarasii ichi jipa nii. Abel biusmina ichiba biawãra ijãa ɓuasiiɗeeba dachimaa wabiɗa kuitaabia ɓuu Dachi Akõreɗe ijãaɗai panuu.*
5 Enocba Dachi Akõreɗe ijãa ɓuasiiɗeeba Dachi Akõreba mau biubiimaaba chokae adoesii. Mau adoesiiɗeeba waya unuɗaabasii. Dachi Akõre beɗeaɗe ɓʉ kuɓuu Enoc adooi naeɗe Dachi Akõreba chi mau biꞌia unusii.* 6 Maamina chi Dachi Akõreɗe ijãawẽa nii ichiba biꞌia unukau. Chi Dachi Akõremaa neei kʉ̃ria ɓuuba ijãai ɓuu ichi biawãra nii mauɗe joma chi ichi jʉrʉʉduu karibabarii.
7 Dachi Akõreba Noemaa jarasii chi wabiɗa unukau neei ʉ̃rʉbena. Noeba mau ijãasiiɗeeba, Dachi Akõre wapea ɓuasiiɗeeba jãba mechiu wausii ichi deɗebenarã karibai baita. Maka nau iujãaɗebenarãmaa kachiruaɗe duanuu unubiasii. Ichiba ijãasiiɗeeba Dachi Akõreba ichi jipa nii unusii.*
8 Dachi Akõreba Abrahammaa jarasii ichiba deai jaraɗa druaɗaa wãmera. Abrahamba Dachi Akõreɗe ijãasiiɗeeba samaa wãaruu adua ɓumina ichi drua ɓʉipeɗa wãsii.* 9 Ijãasiiɗeeba ichi Dachi Akõreba deai jaraɗa druaɗe neepeɗa, ãyarebena druaɗebena neeɗa kĩra paru de wauɗaɗe ɓuabachii. Ichi warr Isaac mauɗe chi ãicheke Jacob ara mau kĩra panabachiɗau, ãchimaa biɗa mau drua deai jarasiiɗeeba. 10 Abraham maka ɓuabachii, bajãaɗe ɓuu puuru wãꞌãekauɗaa ɓuaɗe wãi baita kʉ̃ria ɓuasiiɗeeba. Mau puuru Dachi Akõreba ãrea kʉ̃risiapeɗa joma wausii.
11 Abraham chõra ɓuasiiɗe, ichi wẽra Sara warr adauka basmina, Abrahamba ijãasii Dachi Akõreba ichimaa warr unubii ɓuu. Dachi Akõreba jaraaruu maka waubarii ijãasiiɗeeba warr biawãra unusii.* 12 Maka Abraham biuimaa ɓuasmina chi ichiɗebena ẽbẽrarã ãrea neesiɗau pusterrearã ãrea kĩra mauɗe mar ibu poyaa juasiibai ɓuu kĩra.
13 Joma maarã ẽbẽrarã Dachi Akõreɗe ijãa badapeɗaaɗa biusiɗau. Maamina Dachi Akõreba deai jaraɗa ãchiba nau iujãaɗe adauɗaabasii. Maamina kuitaasiɗau kaaɗebena ewariɗe ichiba joma deai.* Mauɗeeba kĩrajʉʉsiɗau mauɗe arakʉɗe jarasiɗau nau iujãaɗe ãchi ãyarebena druaɗebena kĩra duanuu mauɗe ãibena druacha duanuu. 14 Maka jara panuuɗeeba arakʉɗe kuitaabiasiɗau ãchi drua adauɗai baita eseɗau panuu. 15 Ãchi drua wãpeɗaaɗebena mamaa waya wãɗai kʉ̃risiapeɗaaɗa basirã poyaa waya wãɗai basii. 16 Maamina ãchiba drua aude biꞌiau bajãaɗe ɓuu kʉ̃ria panasiɗau. Mauɗeeba Dachi Akõre kĩra nejasiakau ãchi Akõre aaduuɗe. Maarã baita bajãaɗe puuru wau uru ɓuu.
17 Abrahamba biawãra ijãa ɓuu kuitaayua Dachi Akõreba jarasii ichi warr baa deamera. Maamina mau naeɗe Dachi Akõreba ichimaa biawãra naka jarasii: «Bichi warr Isaacɗeeba bichi ãichekerã ãrea imiɗai».* Dachi Akõreba maka jarasiiɗeeba Abrahamba ichi warr ara aɓa nii baa deai baita ɓuasii. 18 —. 19 Abrahamba kʉ̃risiasii ichi warr Isaac bearuubʉrã Dachi Akõreba mau poyaa chokae jiradubii. Biawãra Isaac chokae jiradubisiiɗeeba Abrahamba chi warr chokae uru ɓeesii.*
20 Isaacba Dachi Akõreɗe ijãa ɓuasiiɗeeba ichi warrarã Jacob mauɗe Esaú biꞌia jarasii Dachi Akõreba kaaɗebena ewariɗe aiɗamera.*
21 Jacob biumaa ɓuasiiɗe Dachi Akõreɗe ijãa ɓuasiiɗeeba ichiba José warrarã aɓaaɓaa biꞌia jarasii Dachi Akõreba aiɗamera. Maabae ichi dumamaa jidau ʉkʉ nuɓuuba Dachi Akõremaa biꞌia berreasii.*
22 José biumaa ɓuasiiɗe Dachi Akõreɗe ijãa ɓuasiiɗeeba israelɗebenarã Egipto druaɗebena wãɗai asii. Wãaduuɗe ichi ɓʉʉrʉ Canaán druaɗaa jau ɓuɗe adoésturu asii.*
23 Moisés chi naweba adauɗa ewariɗe faraonba israelɗebenarã mukĩra warrarã joma kenabiasii. Maamina Moisés akõrerãba Dachi Akõreɗe ijãa panasiiɗeeba chi mauba jaraɗa wapeaɗaabasii. Chi naweba Moisés adausiiɗe unusiɗau chi mau warr mipitaa nii. Mau bearãamera jeɗako õbea miru uru panasiɗau.*
24 Moisesba Dachi Akõreɗe ijãa ɓuasiiɗeeba chõra ɓeesiiɗe kʉ̃riawẽa ɓuasii ẽbẽrarãba ichi faraón kau warr aɗai.* 25 Ichimaarã kachirua wau ɓuuɗeeba kĩrajʉʉ ɓuadaui baɗamaarã, biꞌia ɓuasii ẽbẽrarã Dachi Akõreɗerã ome ãbua ãrea biꞌiwãe ɓuai. 26 Dachi Akõreba Dachi Karibabarii deai jaraɗa biawãra neei ijãasiiɗeeba, ichiba kʉ̃risiasii Egiptoɗebena ne bia uru ɓuai audeara biꞌia ɓuu ãrea biꞌiwãe ɓuai.* Kaaɗebena ewariɗe deai jaraɗa biꞌia adaui kʉ̃riasiiɗeeba maka kʉ̃risia ɓuasii.
27 Moisesba Dachi Akõreɗe ijãa ɓuasiiɗeeba faraón kĩrubi wapeawẽa Egiptoɗebena wãsii. Chi Dachi Akõre dachiba unuɗakau unu ɓuu kĩra ichiba ijãa ɓuu ida ɓuubasii.
28 Moisesba Dachi Akõreɗe ijãa ɓuasiiɗeeba israelɗebenarãmaa Pascua ewari waubiasii.* Mauɗe decha poraaɗe oa jĩtoɗokabiasii chi beabariiba chi nabena mukĩra warrarã kenarãamera.*
29 Dachi Akõreɗe ijãa panasiiɗeeba israelɗebenarã Dachi Akõreba Mar Purrɗe chi o ewaɗa põasãaɗe wãsiɗau. Maamina Egiptoɗebenarã araɓau oɗe wãaduuɗe joma ʉ̃yaba jãri kinisiɗau.*
30 Dachi Akõreɗe ijãa panasiiɗeeba israelɗebenarã 7 ewari Jericó puuru aɗu purra ɓarisiɗau mau puuru aɗu mo ka kuɓuaɗa joma ãrisii.*
31 Israelɗebenarã omeeba Jericó puuru saka ɓuu kuitaai baita ichiaɗe wãsiɗauɗe wẽra auɗuabarii Rahaba Dachi Akõreɗe ijãa ɓuasiiɗeeba ãchi biꞌia irsibisii. Mauɗeeba chi mau puuruɗebena Dachi Akõre ũribabaswãe nuree joma kenasiɗauɗe chi mau beaɗaabasii.*
32 ¿Dachi Akõreɗe ijãabadaurã ʉ̃rʉbena mʉʉba maucha kãare jaraima? Sansón, Gedeón, Barac, Jefté, David, Samuel mauɗe Dachi Akõre baita berreabadaurã ʉ̃rʉbena berreai baita ewari wãꞌãema. 33 Dachi Akõreɗe ijãa panasiiɗeeba chi nureeba drua poyaasiɗau, chi nureeba ãchi drua jipa uru nureasii mauɗe chi nureeba drua nau iujãaɗe Dachi Akõreba deai jaraɗa irsibisiɗau. Dachi Akõreɗe ijãa panasiiɗeeba chi nuree Dachi Akõreba imamamaa ida kobiabasii. 34 Chi nuree Dachi Akõreɗe ijãa panasiiɗeeba tʉbʉ aokoba baaɗaabasii. Chi nuree espadaba beaɗai baɗaɗebena jĩichoa wãurisiɗau. Chi nuree kakua meserãaswãe nureaɗa meserãa adausiɗau mauɗe chaarea paneesiɗau chĩoɗai baita. Mauɗeeba chi kĩramaabadaurã jĩichoabiasiɗau.
35 Chi nuree wẽrarãba Dachi Akõreɗe ijãa panasiiɗeeba ãchi deɗebenarã biupeɗaaɗa chokae jiradusiɗau. Maamina chi nuree Dachi Akõreɗe ijãa panuu kakua ẽbẽrarãba ãrea sĩɗapeɗa beasiɗau. Jʉ̃abadau deɗe jʉ̃a uru panasiɗau, ãrea biꞌiwãe paneebiaɗai baita. Aria ãchi enaɗai asiɗau, Dachi Akõreɗe ijãa panuu waya ijãaɗaabai apeɗaaɗa basirã. Maamina ida beabiasiɗau, chokae jiraduɗapeɗa bibuara duanaɗai eseɗausiɗauɗeeba. 36 Chi nuree Dachi Akõreɗe ijãa panuu kakua ẽbẽrarãba atua jarasiɗau, soaba pesiɗau mauɗe kaenaba jʉ̃ɗapeɗa jʉ̃a kuɓusiɗau. 37 Chi nuree mooba ɓata beasiɗau. Mauɗe waabenarã ẽsa ɓʉa ʉrratasiɗau. Chi nuree espadaba beasiɗau. Chi nuree de wãꞌãe nureeɗeeba samaa wãɗai adua wãsiɗau. Mauɗe ãchiba paru jʉ̃ɗai baita wãꞌãe basiiɗeeba chivo e mauɗe oeja e wauɗa jʉ̃bachiɗau. Ãchi ne kaebea wãꞌãe nureasii. Ẽbẽrarãba ãchi ãrea biꞌiwãe panabiabachiɗau mauɗe kachirua waubachiɗau. 38 Chi nau iujãaɗebenarã biꞌia duanaɗaabasii, ãchi baara duanaɗai baita. Ãchi de wãꞌãe nureeɗeeba drua sirua wãꞌãe ɓuuɗe mauɗe eaɗe nibabachiɗau. Ea choɓeaɗe mauɗe ioro choɓeaɗe panabachiɗau.
39 Joma mau ẽbẽrarãba Dachi Akõreɗe ijãa panasiiɗeeba Dachi Akõreba ãchi biꞌia unusii. Maamina chokae panuuɗe ichiba deai jaraɗa irsibiɗaabasii. 40 Dachi Akõreba dachi baita ne bia uru ɓuuɗeeba kʉ̃riasii ãchi dachi ome ne jomaɗe biꞌia panaɗai.
Jesucristo ʉ̃rʉbena kʉ̃risia panásturu
12 Mau ẽbẽrarã ãreaba Dachi Akõreɗe maka biawãra ijãasiɗauɗeeba, dachia biɗa ara mau kĩra ijãa panaɗai panuu. Chi dachimaa ida ijãabiakau mauɗe ara dachiba kachirua waubadauba dachi ɓʉra uru ɓuabarii ãyaa ɓuɗapeɗa, maabae joma dauchia jãadua panuuɗeeba wã́duru chi neeɗai panuumaa baɗai baita. 2 Jesusɗe kʉ̃risiáduru. Mauba karibasii dachiba naeɗe ijãaɗamera mauɗe aiɗabarii ewaricha ijãa panaɗamera. Kʉ̃risiásturu saka ichi cruzɗe ãrea biꞌiwãe ɓuasii. Mau kakua kĩra nejasia ɓuai baɗaɗe kĩra nejasiabasii. Ichiba kuitaasii nau maaɗakare ãrea kĩrajʉʉ ɓuai. Biawãra Dachi Akõre rey ãkau jua biare akʉ ɓuu.
3 Biꞌia kʉ̃risiásturu ẽbẽra kachiruarãba Jesús miadaa wausiɗauɗe saka dauchia jãaduasii. Maka machi kakua ãkaa panaɗaabasii mauɗe machiba ijãa panuu ida ɓuɗai kʉ̃risiaɗaabasii. 4 Machi kachirua ome chĩo panumina wabiɗa machi beaɗawẽa panuu Jesús beapeɗaaɗa kĩra.* 5 Biꞌia ijãaɗamera Dachi Akõre beɗea ɓʉ kuɓuu ¿machiba kʉde uru panuuwãeka? Ichi warrarãmaa naka jarasii:
«Mʉ warr, Dachi Mechiuba iadaaruuɗe mau ʉ̃rʉbena ãrea kʉ̃risiáse. Kĩrabia iadaaaruuɗe kĩra nomaarã́se.
6 Chi Dachi Mechiuba kʉ̃ria ɓuu ẽbẽrarã iadaabarii.
Mauɗe chi ichi warrarã kĩra ua ɓuurãba kachirua wauduuɗe ichiba maarã kĩrabia iadaabarii».*
7 Machi Dachi Akõre warrarãɗeeba, ãrea biꞌiwãe panuu ãwatásturu ichiba mau kakua jipa waubia ɓuuɗeeba. ¿Akõreba chi warr iadaabaika? 8 Dachi Akõreba ichi warrarã joma iadaabarii. Maka wauwẽebʉrã, machi ichi warrarãwãe. 9 Dachi nau iujãaɗebena akõrerãba dachi iadaabachiɗauɗeeba dachiba maarã wapeabachiɗau. Mauba ¿ewaricha chokae nureaɗai baita dachi Bajãaɗebena Akõre makaa wapeaɗaabai panuka? 10 Dachi nau iujãaɗebena akõrerã chokae panasiɗauɗe dachi iadaabachiɗau ara ãchiba kʉ̃risia panaɗa kĩra. Maamina Dachi Akõreba maka waubarii ichi kĩra kachiruaswãe biꞌia nureaɗamera. 11 Iadaaduuɗe dachi kĩrajʉʉɗakau maumaarã kĩra nomaabadau. Maamina maaɗakare chi jipa wauɗai kuitaapeɗaaɗakare mau maka waubadau mauɗe jirukaraayuwãe nureabadau.
12 Mauburu machi jua ãkaa panumina mauɗe machi õdarr suriidu panuu waya chaareabiaduu kĩra biꞌia ijãa panásturu. 13 O jipauɗe nibásturu. Maka chi poyaara nuree ɓaeɗaabai, maumaarã biꞌia ijãa panaɗai.*
Dachi Akõre sõbia ida ɓuɗaabai ɓuu
14 Jomaurã ome jirukaraayuwãe nureásturu. Mauɗe Dachi Mechiu baita biꞌia panásturu. Dachi Mechiu baita biꞌia nureewãeɗeeba ichi poyaa unuɗaabai. 15 Kauwa panásturu Dachi Akõreba ichi sõbiaɗeeba kariba ɓuu aɓau biɗa ida ɓurãaɗamera. Mauɗe kauwa panásturu machi tãeɗe aɓa biɗa ne karr kachirua kĩra panarãaɗamera. Mauba ãbarãmaa kachirua kʉ̃risiabiapeɗa ara mau kĩra panabiabarii. 16 Kauwa panásturu machi tãeɗe aɓa biɗa chi dachi kakuaɗeeba barikiu kachirua waurãaɗamera mauɗe chi Esaú kĩra Dachi Akõre ʉ̃rʉbena biꞌiwãe kʉ̃risiarãaɗamera. Esaú chi warr imina basiiɗeeba chi akõreba uru ɓuuɗebena ãrea adaui ɓuasii. Maamina ichi ãbaba chiko ɓes aɓa kobiɗa kakua, ichiba adooi ɓuaɗa joma ichi ãbamaa deasii.* 17 Machiba kuitaa panuu nau maaɗakare Esauba kʉ̃ria ɓuasii chi akõreba ichi ʉ̃rʉbena biꞌia jarai Dachi Akõreba karibamera. Maamina chi akõreba ichi ida ɓusii. Esaú jẽasmina ichiba naeɗe wauɗa poyaa biꞌia ɓuubasii.*
18 Machi Dachi Akõremaa neepeɗaaɗa israelɗebenarã neepeɗaaɗa kĩra ɓuwãema. Israelɗebenarã Sinaí eaɗaa wãurisiɗauɗe, mau ea ara ãchi dauba unusiɗau.* Mauɗe chi ea baawãmaa ɓuasii, ewari pãriu nuɓeesii mauɗe ãrea pũatu koɓeesii. 19 Ãchiba kachu jĩwaaruu mauɗe Dachi Akõreba jĩwa berrearuu ũrisiɗau. Mau ũrisiɗauɗe wapeaba chi chuburia iɗisiɗau Dachi Akõre waa berrearãamera. 20 Ãrea perasiɗau Dachi Akõreba naka jarasiiɗeeba: «Barikiu ẽbẽra maebʉrã ãnimara nau ea kaita neeruubʉrã, mooba ɓata beaɗai panuu maebʉrã enadrumaba drʉ beaɗai panuu».* 21 Israelɗebenarãba ichiamaa panuu ãrea kachirua ɓuuɗeeba Moisesba naka jarasii: «Wapeaba mʉ kakua urimaa ɓuu».*
22 Maamina machi Dachi Akõremaa neesiɗauɗe chi biawãra Sión eaɗaa mauɗe chi bajãaɗebena Jerusalenɗaa neesiɗau. Mau puuru Dachi Akõre chokae niiɗebʉ. Aria angelerã mil ãrea ãbua kĩrajʉʉ duanuu. 23 Machi Dachi Akõre warrarã araa ãbua duanuumaa neesiɗau. Dachi Akõremaarã joma Ichi warr iminabʉ. Bajãaɗebenaɗeeba ãchi trʉ̃ aria ɓʉ kuɓuu. Machi chi dachi nebʉra joma kastikabariimaa neesiɗau. Chi ẽbẽrarã jipa nuree Dachi Akõreba biꞌia duanuɗamaa neesiɗau. 24 Machi Jesusmaa neesiɗau. Ichiɗeeba ẽbẽrarã Dachi Akõreɗerã ome beɗea chiwiɗi deasiiɗe machi ichi oa jĩtoɗokaɗamaa neesiɗau. Jesús oa cheɗaba Abel oa cheɗa audeara kuitaabia ɓuu.*
25 Mauɗeeba kauwa duanásturu Dachi Akõreba jara ɓuu ida ɓurãaɗamera. Chi ichiba nau iujãaɗe Sinaí eaɗe jaraɗa ida ɓupeɗaaɗarã kastikaɗebena poyaa jĩichoaɗaabasii. Mauɗeeba chi ichiba bajãaɗebena dachi sõɗe jara ɓuu ida ɓuuduubʉrã ¿jĩichoaɗaika? Jĩichoaɗaabai ɓuu. 26 Sinaí eaɗe Dachi Akõre berreasiiɗe ioromia baraasii. Maamina nau ʉ̃rauɗe ichiba naka jara ɓuu:
Waya mʉʉba ioromia baraabii. Mauɗe aɓaburu nau iujãa uribiibai, maumaarã bajãa siɗa uribii.*
27 Waya uribiiruu asiiɗe Dachi Akõreba kuitaabiasii ne joma ichiba waukuaɗa uribipeɗa wãꞌãebii. Mauɗe aɓaburu chi wãꞌãekáuturu ɓeei. 28 Dachi Akõre jua wãꞌãekauɗe panaɗaiɗeeba ichimaa bichíturu kiɗibai aɗai panuu. Ãrea wapea panuuɗeeba ichimaa biꞌia berreaɗai panuu ichiba kʉ̃ria ɓuu kĩra, 29 Dachi Akõreba tʉbʉ aokoba joma baabariiɗeeba.
Ãbarã saka nibaɗai panuu
13 Machi ãbarã baerã chiya kʉ̃ria panásturu. 2 Kĩraba panaɗai ida ɓurã́sturu machi deɗe needuu biꞌia irsibiɗai panuu. Chi nuree adua panuuba angelerã ãchi deɗe biꞌia irsibisiɗau. 3 Chi jʉ̃a uru panuu kĩrabásturu machi siɗa maarã ome jʉ̃a panuu kĩra. Ẽbẽrarãba kachirua wau panuuɗeeba ãrea biꞌiwãe nuree kĩrabásturu machi siɗa maarã ome ãrea biꞌiwãe panuu kĩra.
4 Jomaurãba ãchi kima wapeadee nureaɗai panuu. Dachi Akõreba chi auɗuabadau mauɗe junebena wẽra ome kãi ɓeebadau kastikaiɗeeba aɓa machi kima ómeburu kãi ɓeeɗai panuu.
5 Chi nejarr kʉ̃ria panarã́sturu. Maumaarã ara machiba uru nureeba kĩrajʉʉ panásturu Dachi Akõreba naka jarasiiɗeeba: «Mʉʉba bichi ɓʉiwẽe mauɗe ida ɓuwẽe».* 6 Mauɗeeba dachiba ne wapeawẽa naka jaraɗai panuu:
«Mʉ Mechiuba mʉ karibabariiɗeeba mʉ wapeawẽa ɓuu. ¿Ẽbẽraba mʉ saka kachirua wauima?»*
7 Machi karrarã kĩrabásturu. Maarãba Dachi Akõre beɗea machimaa jaradeasiɗau. Kʉ̃risiásturu ãchi saka nibasiɗau mauɗe maka niɗauba kãare sakasii. Ãchiba Cristoɗe ijãa panaɗa kĩra machia biɗa ijãa panásturu.
8 Jesucristo june ãyaa ɓuakau. Nuiɗa nibaɗa kĩra iɗi biɗa maka nii, mauɗe ewaricha maka nibai. 9 Maamina waabenarãba barikiu ne ãyaa jaradeabadau. Maarãmaa ida setaa kũrabiarã́sturu. Machiba kooduuba maebʉrã koɗawẽa panuuba aiɗakau. Chi maka wau panuuba biꞌia panaɗakau. Dachi Akõreba ichi sõbiaɗeeba aiɗa ɓuu machiba biꞌia sõɗeeba ijãaɗamera.
10 Dachiba Jesús uru panuu ãnimara dachi kachirua kakua baa deapeɗaaɗa kĩra. Maamina paarerãba ãchi kachirua waupeɗaaɗa kakua ne baa dea panuuba Jesusɗebena ne bia poyaa uru panaɗaabai.* 11 Kachirua kakua paare mechiuba ãnimara oa Dachi Akõre baita biꞌia ɓuu piezaɗe eɗa adoebarii. Maamina chi ãnimara koɗai baɗamaarã puuru awara adoeɗapeɗa baabadau. 12 Ara mau kĩra Jesús puuru awara ãrea biꞌiwãe ɓuasii ichi oaba ẽbẽrarã Dachi Akõre baita biꞌia ɓui baita. 13 Mauɗeeba puuru awara Jesusmaa wãaduu kĩra ichi baara wãɗai panuu. Ẽbẽrarãba Jesús kachirua jarapeɗaaɗa kĩra dachi siɗa kachirua jaraaduuɗe ãwataɗai panuu. 14 Nau iujãaɗe dachi puuru wãꞌãekauɗe panuuwãema, maumaarã eseɗau panuu puuru wãꞌãekauɗe panaɗai baita. 15 Mauɗeeba Jesucristoɗeeba dachiba, chi Dachi Akõreɗe ijãa panuu a panuuba, ewaricha ichimaa biꞌia berreaɗai panuu, ãnimara baa deaduu kĩra. 16 Kĩrabaɗai ida ɓurã́sturu biꞌia wauɗai baita mauɗe machiba uru panuuɗeeba chiya aiɗaɗai baita. Joma mau Dachi Akõreba biꞌia unu ɓuu ãnimara baa deaduu kĩra.
17 Ãbarã, machi karrarãba jara panuu ijã́sturu. Machi nu panuuɗeeba ãchi juaɗe panásturu. Ãchiba kuitaa panuu Dachi Akõreba ichiaruuɗe joma ãchiba waupeɗaaɗa ichimaa arakʉɗe jaraɗai. Mauɗeeba ãchiba jara panuu ijã́sturu. Maka ãchiba kĩrajʉʉ mauɗe kĩra nomaaɗawẽa joma wauɗai. Machiba maka wauɗawẽa panuuɗeeba ãchi kĩra nomaabiiduubʉrã, machi poyaa biꞌia aiɗabiabasii.
18 Dai baita Dachi Akõremaa ʉtaa iɗísturu. Dai ne jomaɗe jipa nibaɗai kʉ̃ria panuu mauɗe kuitaa panuu kachirua wauɗawẽa panuu. 19 Michuburia, mʉ baita Dachi Akõremaa ʉtaa iɗísturu waya isa machimaa wãbimera.
20 Dachi Mechiu Jesucristo chi Oeja Nubarii Mechiubʉ. Dachi Akõreba chi dachi jirukaraayuwãe ɓuai deabarii ichi biu ɓuaɗa chokae jiradubisii. Jesucristo oaɗeeba ẽbẽrarã Dachi Akõreɗerã ome beɗea deasii. Mau ewaricha ɓuai. 21 Mʉʉba kʉ̃ria ɓuu ara mau Dachi Akõreba ne joma biꞌia machimaa wau kuitaabiai, ichiba kʉ̃ria ɓuu kĩra poyaa wauɗamera. Mauɗe kʉ̃ria ɓuu Jesucristoɗeeba ichiba dachi sõɗe ne joma waui ichiba kʉ̃ria ɓuu kĩra nureaɗamera. Dachiba ewaricha Jesucristomaa biꞌia berreaɗai panuu. Biꞌia ɓuu maka ɓuai.
22 Ãbarã, mʉʉba nau karta ɓaꞌãra ɓʉsii machiba biꞌia ijãaɗamera. Mauɗeeba mʉʉba machimaa chi chuburia iɗiiruu nau beɗea bia ũriɗamera.
23 Kuitásturu dachi ãba Timoteo jʉ̃a ɓuaɗa awara wãsii. Mau isa mʉʉmaa neeruubʉrã, machi ichiaɗe wãaruuɗe mʉʉba mau adooi.
24 Ãbarã, machi karrarãmaa, mauɗe joma ẽbẽrarã Dachi Akõreɗerãmaa jarásturu mʉʉba kʉ̃ria ɓuu ãchi biꞌia duanaɗai. Ãbarã Italia druaɗebenarãba kʉ̃ria panuu machi biꞌia duanaɗai.
25 Mʉʉba kʉ̃ria ɓuu Dachi Akõreba ichi sõbiaɗeeba machi joma aiɗa ɓuai.
1:5 Iɗi bichi mʉ Warr aaruu. Griego beɗeaɗe naka ɓʉ kuɓuu: Iɗi mʉʉba bichi unusii maebʉrã Iɗi mʉ bichi akõre basii. Salmos 2:7.
2 Samuel 7:14.
1:7 Griego beɗeaɗe pũatu mauɗe jauri araɓau beɗeabʉ. Mauɗeeba waabenarã traduccionɗe mau versiculoɗe naka ɓʉ kuɓuu: Ichi angelerã wausii jauri nureaɗamera.
Salmos 104:4.
Salmos 45:6-7.
Salmos 102:25-27.
1:13 Bichi juaɗe ɓuuruuɗaa. Griego beɗeaɗe naka ɓʉ kuɓuu: bichi jʉ̃rʉ ekare ɓuuruuɗaa. Salmos 110:1.
2:5 Chi drua wiɗi neei ɓuu daiba jara panuu. Hebreos 1:10-12.
2:6 Ẽbẽra. Griego beɗeaɗe naka ɓu kuɓuu: ẽbẽra warr.
2:7 Griego beɗeaɗe chi ɓee kartaɗe nau siɗa ɓʉ kuɓuu: Mau ɓusii joma bichiba wauɗa ichi juaɗe ua ɓuamera.
Salmos 22:22.
Isaías 8:17.
Isaías 8:18.
2:16 Griego beɗeaɗe naka ɓʉ kuɓuu: Abrahamɗebena imiiduurã karibaɗe neesii.
2:17 Dachi kĩra. Griego beɗeaɗe naka ɓʉ kuɓuu: ichi ãbarã kĩra.
3:2 Dachi Akõre deɗebenarã ome. Griego beɗeaɗe naka ɓʉ kuɓuu: Dachi Akõre deɗe. Números 12:7.
3:6 Griego beɗeaɗe chi ɓee kartaɗe nau siɗa ɓʉ kuɓuu: aɓa nau ewari wãꞌãeruuɗaa.
Salmos 95:7-11; Números 14:21-35.
Salmos 95:7-8.
Salmos 95:11.
4:2-3 Ichiba waui ɓuaɗa. Mauba kuitaabi ɓuu Dachi Akõreba dachi kʉrrjĩrubiai siɗa wausii.
4:4 Bari panabadau ewari. Griego beɗeaɗe naka ɓʉ kuɓuu: séptimo día.
Génesis 2:2.
Salmos 95:11.
Salmos 95:7-8.
Levítico 1:1-6,7.
5:5 Salmos 2:7. Iɗi bichi mʉ Warr aaruu. Griego beɗeaɗe naka ɓʉ kuɓuu: Iɗi mʉʉba bichi wausii maebʉrã Iɗi mʉ bichi akõre basii.
Salmos 110:4; Génesis 14:18.
6:4 Chi beɗea biawãra kuitaapeɗaaɗakauɗe. Griego beɗeaɗe naka ɓʉ kuɓuu: ʉ̃ɗaabiaɗakare.
6:7 Chi Cristo ida ɓuwẽa nuree mau ioro kĩra nuree. Mateo 13:18-23.
6:8 Chi Cristo ida ɓubadau mau iujãa kachirua kĩra nuree. Mateo 13:24-29.
6:10 Ichi. Griego beɗeaɗe naka ɓʉ kuɓuu: ichi trʉ̃.
Génesis 22:17.
Génesis 12:1-3.
Salmos 110:4.
7:20-21 Melquisedec ɓuaɗa kĩra. Griego beɗeaɗe chi ɓee kartaɗe mau wãꞌãe.
7:22 Beɗea chiwiɗi deaɗa. Jeremías 31:31-34.
Éxodo 25:40.
8:9 Uaɗosiiɗe. Griego beɗeaɗe naka ɓʉ kuɓuu: jua jidaupeɗa karibasiiɗe.
Jeremías 31:31-34.
8:13 Kãꞌãabariwãeɗe ãyaa ɓui. Griego beɗeaɗe naka ɓʉ kuɓuu: kãꞌãabariwãeɗe waꞌãei.
Éxodo 16:33.
Números 17:1-10.
Éxodo 25:16.
Éxodo 25:17-22.
Levítico 16:1-34.
9:18 Ãnimara oa chesii. Mau ewariɗe beɗea deaduuɗe, ãnimara beabachiɗau mau beɗea biawãra wauɗai unubiɗamẽra.
Éxodo 24:8.
Salmos 40:6-8.
10:13 Ichi juaɗe ɓuuruuɗaa. Griego beɗeaɗe naka ɓʉ kuɓuu: ichi jʉ̃rʉ ekare ɓuuruuɗaa. Salmos 110:1.
Jeremías 31:33.
Jeremías 31:34.
Deuteronomio 17:2-6.
Deuteronomio 32:35.
Deuteronomio 32:36.
Habacuc 2:3-4.
Génesis 4:3-5.
Génesis 5:22-24.
Génesis 6—8.
Génesis 12:1-5.
11:11 Griego beɗeaɗe nau versículo chaarea ɓuu ũriɗai baita. Naka traduciɗa ɓuu: Abraham kima Sara biɗa Dachi Akõreɗe ijãasiiɗeeba warr baraasii, warr adaukamina mauɗe chõodraa ɓumina. Dachi Akõreba jaraaruu maka waubarii ijãasiiɗeeba warr biawãra unusii.
11:13 Kuitaasiɗau kaaɗebena ewariɗe ichiba joma deai. Griego beɗeaɗe naka ɓʉ kuɓuu: Mau kaitawẽeba unusiɗau.
Génesis 21:12.
Génesis 22:1-14.
Génesis 27:27-29,39-40.
Génesis 48:1-20.
Génesis 50:24-25.
Éxodo 1:22—2:2.
Éxodo 2:10-12.
11:26 Dachi Akõreba Dachi Karibabarii deai jaraɗa. Griego beɗeaɗe naka ɓʉ kuɓuu: Cristo.
11:28 Pascua. Mau ewariɗe chi judiorãba Egiptoɗebena wãpeɗaaɗa ʉ̃rʉbena kʉ̃risiabadau.
Éxodo 12:21-30.
Éxodo 14:21-31.
Josué 6:1-21.
Josué 2:1-21; 6:22-25.
12:4 Machi beaɗawẽa panuu Jesús beapeɗaaɗa kĩra. Griego beɗeaɗe naka ɓʉ kuɓuu: Wabiɗa machi oa cheɗawẽa panuu.
Proverbios 3:11-12.
12:13 Griego beɗeaɗe naka ɓʉ kuɓuu: O jipa wáusturu chi nʉka nuree ãyaa wãrãaɗamera maumaarã aribiaɗamera.
Génesis 25:27-34.
Génesis 27:1-41.
12:18 Ea ara ãchi dauba unusiɗau. Griego beɗeaɗe naka ɓʉ kuɓuu: Ea dachiba poyaa waui ɓuumaa neesiɗau.
12:20 Maebʉrã enadrumaba drʉ beaɗai panuu. Griego beɗeaɗe chi ɓee kartaɗe mau wãꞌãe. Éxodo 19:12-13.
Deuteronomio 9:19.
12:24 Jesús oa cheɗaba Abel oa cheɗa audeara kuitaabia ɓuu. Abel oa cheɗaba kuitaabia ɓuu Dachi Akõreba kachirua kastikabarii. Maamina Jesús oa cheɗaba kuitaabia ɓuu Dachi Akõreba kachirua jeraabarii.
Hageo 2:6.
Deuteronomio 31:6.
Salmos 118:6.
13:10 Griego beɗeaɗe mau versículo naka ɓʉ kuɓuu: Dachiba ãnimara baabadau uru panuu. Dachi Akõre de ãnimara e waupeɗaaɗaɗe ne waubadaurãba mauɗebena kokau panuu.